Missale Romanum 1957 - S. SILVESTRI
Duplex II classis
Statio ad S. Mariam trans Tiberim
Introitus Isai. 9, 6
PUER natus est nobis, et fílius datus est nobis: cujus impérium super húmerum ejus: et vocábitur nomen ejus, magni consílii Angelus. Ps. 97, 1 Cantáte Dómino cánticum novum: quia mirabília fecit. V/. Glória Patri.
Oratio
DEUS, qui salútis aetérnae, beátae Maríae virginitáte fecúnda, humáno géneri praémia praestitísti: tríbue, quaésumus ; ut ipsam pro nobis intercédere sentiámus, per quam merúimus auctórem vitae suscípere, Dóminum nostrum Jesum Christum Fílium tuum: Qui tecum vivit.
Léctio Epístolae beáti Pauli Apóstoli ad Titum.
Tit. 2, 11-15
CARÍSSIME: Appáruit grátia Dei Salvatóris nostri ómnibus homínibus, erúdiens nos, ut abnegántes impietátem, et saeculária desidéria, sóbrie, et juste, et pie vivámus in hoc saéculo, exspectántes beátam spem, et advéntum glóriae magni Dei et Salvatóris nostri Jesu Christi: qui dedit semetípsum pro nobis: ut nos redímeret ab omni iniquitáte, et mundáret sibi pópulum acceptábilem, sectatórem bonórum óperum. Haec lóquere, et exhortáre: in Christo Jesu Dómino nostro.
Graduale Ps. 97, 3-4 et 2 Vidérunt omnes fines terrae salutáre Dei nostri: jubiláte Deo, omnis terra. V/. Notum fecit Dóminus salutáre suum: ante conspéctum géntium revelávit justítiam suam.
Allelúja, allelúja. V/. Hebr. 1, 1-2 Multifárie olim Deus loquens pátribus in prophétis, novíssime diébus istis locútus est nobis in Fílio. Allelúja.
+ Sequéntia sancti Evangélii secúndum Lucam.
Luc. 2, 21
IN ILLO témpore: Postquam consummáti sunt dies octo, ut circumciderétur puer: vocátum est nomen ejus Jesus, quod vocátum est ab Angelo priúsquam in útero conciperétur.
Credo.
Offertorium Ps. 88, 12 et 15 Tui sunt caeli, et tua est terra: orbem terrárum et plenitúdinem ejus tu fundásti: justítia et judícium praeparátio sedis tuae.
Secreta
MUNÉRIBUS nostris, quaésumus, Dómine, precibúsque suscéptis: et caeléstibus nos munda mystériis, et cleménter exáudi. Per Dóminum.
Praefatio et Communicántes de Nativitate.
Communio Ps. 97, 3 Vidérunt omnes fines terrae salutáre Dei nostri.
Postcommunio
HAEC nos commúnio, Dómine, purget a crímine: et, intercedénte beáta Vírgine Dei Genitríce María, caeléstis remédii fáciat esse consórtes. Per eúmdem Dóminum.
* Dominica a die 2 ad 5 Januarii occurrente, si celebretur aliquod Festum quod non sit Domini, in Missa fit Commemoratio ipsius Dominicae, ut in Vigilia Epiphaniae, sine tamen ultimo Evangelio Dominicae, nisi haec in ipsam Vigiliam occurrat.
vel, si ipsa non occurrat, die 2 Januarii
Duplex II classis
Introitus Philipp. 2, 10-11
IN nómine Jesu omne genu flectátur, caeléstium, terréstrium et infernórum: et omnis lingua confiteátur, quia Dóminus Jesus Christus in glória est Dei Patris. Ps. 8, 2 Dómine, Dóminus noster, quam admirábile est nomen tuum in univérsa terra ! V/. Glória Patri.
Oratio
DEUS, qui unigénitum Fílium tuum constituísti humáni géneris Salvatórem, et Jesum vocári jussísti: concéde propítius ; ut, cujus sanctum nomen venerámur in terris, ejus quoque aspéctu perfruámur in caelis. Per eúmdem Dóminum nostrum.
Léctio Actuum Apostolórum.
Act. 4, 8-12
IN diébus illis: Petrus replétus Spíritu Sancto, dixit: Príncipes pópuli, et senióres audíte: Si nos hódie dijudicámur in benefácto hóminis infírmi, in quo iste salvus factus est, notum sit ómnibus vobis, et omni plebi Israël: quia in nómine Dómini nostri Jesu Christi Nazaréni, quem vos crucifixístis, quem Deus suscitávit a mórtuis, in hoc iste astat coram vobis sanus. Hic est lapis, qui reprobátus est a vobis aedificántibus: qui factus est in caput ánguli: et non est in álio áliquo salus. Nec enim áliud nomen est sub caelo datum homínibus, in quo opórteat nos salvos fíeri.
Graduale Ps. 105, 47 Salvos fac nos, Dómine Deus noster, et cóngrega nos de natiónibus: ut confiteámur nómini sancto tuo, et gloriémur in glória tua. V/. Isai. 63, 16 Tu, Dómine, pater noster, et redémptor noster: a saéculo nomen tuum.
Allelúja, allelúja. V/. Ps. 144, 21 Laudem Dómini loquétur os meum, et benedícat omnis caro nomen sanctum ejus. Allelúja.
In Missis votivis post Septuagesimam, omissis Allelúja et Versu sequenti, dicitur
Tractus Ps. 79, 20 et Cant. 2, 14 Dómine, Deus virtútum, convérte nos: et osténde fáciem tuam, et salvi érimus: sonet vox tua in áuribus meis. Vox enim tua dulcis, et fácies tua decóra nimis. V/. Cant. 1, 2 Oleum effúsum nomen tuum, Jesu: ídeo adolescéntulae dilexérunt te.
Tempore autem Paschali omittitur Graduale, et ejus loco dicitur:
Allelúja, allelúja. V/. Ps. 144, 21 Laudem Dómini loquétur os meum, et benedícat omnis caro nomen sanctum ejus. Allelúja. V/. ibid., 1 Exaltábo te, Deus meus Rex: et benedícam nómini sancto tuo, Jesu, in saéculum, et in saéculum saéculi. Allelúja.
+ Sequéntia sancti Evangélii secúndum Lucam.
Luc. 2, 21
IN illo témpore: Postquam consummáti sunt dies octo, ut circumciderétur puer: vocátum est nomen ejus Jesus, quod vocátum est ab Angelo priúsquam in útero conciperétur.
Credo.
Offertorium Ps. 85, 12 et 5 Confitébor tibi, Dómine Deus meus, in toto corde meo, et gloriflcábo nomen tuum in aetérnum: quóniam tu, Dómine, suávis et mitis es: et multae misericórdiae ómnibus invocántibus te, allelúja.
Secreta
BENEDÍCTIO tua, clementíssime Deus, qua omnis viget creatúra, sanctíficet, quaésumus, hoc sacrifícium nostrum, quod ad glóriam nóminis Fílii tui, Dómini nostri Jesu Christi, offérimus tibi: ut majestáti tuae placére possit ad laudem, et nobis profícere ad salútem. Per eúmdem Dóminum.
Praefatio de Nativitate.
Communio Ps. 85, 9-10 Omnes gentes quascúmque fecísti, vénient, et adorábunt coram te, Dómine, et glorificábunt nomen tuum: quóniam magnus es tu, et fáciens mirabília: tu es Deus solus, allelúja.
Postcommunio
OMNÍPOTENS aetérne Deus, qui creásti et redemísti nos, réspice propítius vota nostra: et sacrifícium salutáris hóstiae, quod in honórem nóminis Fílii tui, Dómini nostri Jesu Christi, majestáti tuae obtúlimus, plácido et benígno vultu suscípere dignéris ; ut grátia tua nobis infúsa, sub glorióso nómine Jesu, aetérnae praedestinatiónis título, gaudeámus nómina nostra scripta esse in caelis. Per eúmdem Dóminum.
Protomartyris
Simplex
Introitus Ps. 118, 23, 86 et 23
SEDÉRUNT príncipes et advérsum me loquebántur: et iníqui persecúti sunt me: ádjuva me, Dómine Deus meus, quia servus tuus exercebátur in tuis justificatiónibus. Ps. ibid., 1 Beáti immaculáti in via, qui ámbulant in lege Dómini. V/. Glória Patri.
Oratio
OMNÍPOTENS sempitérne Deus, qui primítias Mártyrum in beáti Levítae Stéphani sánguine dedicásti: tríbue, quaésumus, ut pro nobis intercéssor exsístat, qui pro suis étiam persecutóribus exorávit Dóminum nostrum Jesum Christum Fílium tuum: Qui tecum.
Léctio Actuum Apostolórum.
Act. 6, 8-10 ; 7, 54-59
IN diébus illis: Stéphanus, plenus grátia et fortitúdine, faciébat prodígia et signa magna in pópulo. Surrexérunt autem quidam de synagóga, quae appellátur Libertinórum, et Cyrenénsium, et Alexandrinórum, et eórum qui erant a Cilícia, et Asia, disputántes cum Stéphano: et non póterant resístere sapiéntiae et Spirítui, qui loquebátur. Audiéntes autem haec, dissecabántur córdibus suis, et stridébant déntibus in eum. Cum autem esset Stéphanus plenus Spíritu Sancto, inténdens in caelum, vidit glóriam Dei, et Jesum stantem a dextris Dei. Et ait: Ecce vídeo caelos apértos, et Fílium hóminis stantem a dextris Dei. Exclamántes autem voce magna continuérunt aures suas, et ímpetum fecérunt unanímiter in eum. Et ejiciéntes eum extra civitátem, lapidábant: et testes deposuérunt vestiménta sua secus pedes adolescéntis, qui vocabátur Saulus. Et lapidábant Stéphanum invocántem, et dicéntem: Dómine Jesu, súscipe spíritum meum. Pósitis autem génibus clamávit voce magna, dicens: Dómine, ne státuas illis hoc peccátum. Et cum hoc dixísset, obdormívit in Dómino.
Graduale Ps. 118, 23 et 8 ; 86, 5 Sedérunt príncipes, et advérsum me loquebántur: et iníqui persecúti sunt me. V/. Adjuva me, Dómine Deus meus: salvum me fac propter misericórdiam tuam.
Allelúja, allelúja. V/. Act. 7, 56 Vídeo caelos apértos, et Jesum stantem a dextris virtútis Dei. Allelúja.
+ Sequéntia sancti Evangélii secúndum Matthaéum.
Matth. 23, 34-39
IN illo témpore: Dicébat Jesus scribis et pharisaéis: Ecce ego mitto ad vos prophétas, et sapiéntes, et scribas, et ex illis occidétis et crucifigétis, et ex eis flagellábitis in synagógis vestris, et persequémini de civitáte in civitátem: ut véniat super vos omnis sanguis justus, qui effúsus est super terram, a sánguine Abel justi usque ad sánguinem Zacharíae, fílii Barachíae, quem occidístis inter templum et altáre. Amen dico vobis, vénient haec ómnia super generatiónem istam. Jerúsalem, Jerúsalem, quae occídis prophétas, et lápidas eos, qui ad te missi sunt, quóties vólui congregáre fílios tuos, quemádmodum gallína cóngregat pullos suos sub alas, et noluísti ? Ecce relinquétur vobis domus vestra desérta. Dico enim vobis, non me vidébitis ámodo, donec dicátis: Benedíctus, qui venit in nómine Dómini.
Offertorium Act. 6, 5 et 7, 59 Elegérunt Apóstoli Stéphanum Levítam, plenum fide et Spíritu Sancto: quem lapidavérunt Judaéi orántem, et dicéntem: Dómine Jesu, áccipe spíritum meum, allelúja.
Secreta
SÚSCIPE, Dómine, múnera pro tuórum commemoratióne Sanctórum: ut, sicut illos pássio gloriósos effécit ; ita nos devótio reddat innócuos. Per Dóminum.
Praefatio de Nativitate, ratione Temporis.
Communio Act. 7, 56, 59, et 60 Vídeo caelos apértos, et Jesum stantem a dextris virtútis Dei: Dómine Jesu, áccipe spíritum meum, et ne státuas illis hoc peccátum.
Postcommunio
AUXILIÉNTUR nobis, Dómine, sumpta mystéria: et intercedénte beáto Stéphano Mártyre tuo, sempitérna protectióne confírment. Per Dóminum nostrum Jesum Christum Fílium tuum: Qui tecum vivit et regnat.
Apostoli et Evangelistae
Simplex
Introitus Eccli. 15, 5
IN médio Ecclésiae apéruit os ejus: et implévit eum Dóminus spíritu sapiéntiae, et intelléctus: stolam glóriae índuit eum. Ps. 91, 2 Bonum est confitéri Dómino: et psállere nómini tuo, Altíssime. V/. Glória Patri.
Oratio
ECCLÉSIAM tuam, Dómine, benígnus illústra: ut beáti Joánnis Apóstoli tui et Evangelístae illumináta doctrínis, ad dona pervéniat sempitérna. Per Dóminum.
Léctio libri Sapiéntiae.
Eccli. 15, 1-6
QUI timet Deum, fáciet bona: et qui cóntinens est justítiae, apprehéndet illam, et obviábit illi quasi mater honorificáta. Cibábit illum pane vitae et intelléctus, et aqua sapiéntiae salutáris potábit illum: et firmábitur in illo, et non flectétur: et continébit illum, et non confundétur: et exaltábit illum apud próximos suos, et in médio ecclésiae apériet os ejus, et adimplébit illum spíritu sapiéntiae et intelléctus, et stola glóriae véstiet illum. Jucunditátem, et exsultatiónem thesaurizábit super illum, et nómine aetérno hereditábit illum, Dóminus Deus noster.
Graduale Joann. 21, 23 et 19 Exiit sermo inter fratres, quod discípulus ille non móritur: et non dixit Jesus: Non móritur. V/. Sed: Sic eum volo manére, donec véniam: tu me séquere.
Allelúja, allelúja. V/. Ibid., 24 Hic est discípulus ille, qui testimónium pérhibet de his: et scimus, quia verum est testimónium ejus. Allelúja.
+ Sequéntia sancti Evangélii secúndum Joánnem.
Joann. 21, 19-24
IN illo témpore: Dixit Jesus Petro: Séquere me. Convérsus Petrus vidit illum discípulum, quem diligébat Jesus, sequéntem, qui et recúbuit in cena super pectus ejus, et dixit: Dómine, quis est qui tradet te ? Hunc ergo cum vidísset Petrus, dixit Jesu: Dómine, hic autem quid ? Dicit ei Jesus: Sic eum volo manére, donec véniam, quid ad te ? tu me séquere. Exiit ergo sermo iste inter fratres, quia discípulus ille non móritur. Et non dixit ei Jesus: Non móritur ; sed: Sic eum volo manére, donec véniam ; quid ad te ? Hic est discípulus ille, qui testimónium pérhibet de his, et scripsit haec: et scimus, quia verum est testimónium ejus.
Offertorium Ps. 91, 13 Justus ut palma florébit: sicut cedrus, quae in Líbano est, multiplicábitur.
Secreta
SÚSCIPE, Dómine, múnera, quae in ejus tibi solemnitáte deférimus, cujus nos confídimus patrocínio liberári. Per Dóminum.
Praefatio de Apostolis.
Communio Joann. 21, 23 Exiit sermo inter fratres, quod discípulus ille non móritur: et non dixit Jesus: Non móritur ; sed: Sic eum volo manére, donec véniam.
Postcommunio
REFÉCTI cibo potúque caelésti, Deus noster, te súpplices deprecámur: ut, in cujus haec commemoratióne percépimus, ejus muniámur et précibus. Per Dóminum.
Martyrum
Simplex
Introitus Ps. 8, 3
EX ore infántium, Deus, et lacténtium perfecísti laudem propter inimícos tuos. Ps. ibid., 2 Dómine, Dóminus noster: quam admirábile est nomen tuum in univérsa terra ! V/. Glória Patri.
Et dicitur Glória in excélsis.
Oratio
DEUS, cujus hodiérna die praecónium Innocéntes Mártyres non loquéndo, sed moriéndo conféssi sunt: ómnia in nobis vitiórum mala mortífica ; ut fidem tuam, quam lingua nostra lóquitur, étiam móribus vita fateátur. Per Dóminum.
Léctio libri Apocalýpsis beáti Joánnis Apóstoli.
Apoc. 14, 1-5
IN diébus illis: Vidi supra montem Sion Agnum stantem, et cum eo centum quadragínta quátuor míllia, habéntes nomen ejus, et nomen Patris ejus scriptum in fróntibus suis. Et audívi vocem de caelo, tamquam vocem aquárum multárum, et tamquam vocem tonítrui magni: et vocem, quam audívi, sicut citharaedórum citharizántium in cítharis suis. Et cantábant quasi cánticum novum a nte sedem, et ante quátuor animália, et senióres: et nemo póterat dícere cánticum, nisi illa centum quadragínta quátuor míllia, qui empti sunt de terra. Hi sunt, qui cum muliéribus non sunt coinquináti: vírgines enim sunt. Hi sequúntur Agnum, quocúmque íerit. Hi empti sunt ex homínibus primítiae Deo, et Agno: et in ore eórum non est invéntum mendácium: sine mácula enim sunt ante thronum Dei.
Graduale Ps. 123, 7-8 Anima nostra, sicut passer, erépta est de láqueo venántium. V/. Láqueus contrítus est, et nos liberáti sumus: adjutórium nostrum in nómine Dómini, qui fecit caelum et terram.
Allelúja, allelúja. V/. Ps. 112, 1 Laudáte, púeri, Dóminum, laudáte nomen Dómini. Allelúja.
+ Sequéntia sancti Evangélii secúndum Matthaéum.
Matth. 2, 13-18
IN illo témpore: Angelus Dómini appáruit in somnis Joseph, dicens: Surge, et áccipe púerum, et matrem ejus, et fuge in AEgýptum, et esto ibi usque dum dicam tibi. Futúrum est enim, ut Heródes quaerat púerum ad perdéndum eum. Qui consúrgens accépit púerum, et matrem ejus nocte, et secéssit in AEgýptum: et erat ibi usque ad óbitum Heródis: ut adimplerétur quod dictum est a Dómino per Prophétam dicéntem: Ex AEgýpto vocávi Fílium meum. Tunc Heródes videns quóniam illúsus esset a Magis, irátus est valde, et mittens occídit omnes púeros, qui erant in Béthlehem, et in ómnibus fínibus ejus, a bimátu et infra, secúndum tempus quod exquisíerat a Magis. Tunc adimplétum est quod dictum est per Jeremíam prophétam dicéntem: Vox in Rama audíta est, plorátus, et ululátus multus: Rachel plorans fílios suos, et nóluit consolári, quia non sunt.
Offertorium Ps. 123, 7 Anima nostra sicut passer erépta est de láqueo venántium: láqueus contrítus est, et nos liberáti sumus.
Secreta
SANCTÓRUM tuórum, Dómine, nobis pia non desit orátio: quae et múnera nostra concíliet, et tuam nobis indulgéntiam semper obtíneat. Per Dóminum.
Praefatio de Nativitate, ratione Temporis.
Communio Matth. 2, 18 Vox in Rama audíta est, plorátus, et ululátus: Rachel plorans fílios suos, et nóluit consolári, quia non sunt.
Postcommunio
VOTÍVA, Dómine, dona percépimus: quae Sanctórum nobis précibus, et praeséntis, quaésumus, vitae páriter et aetérnae tríbue conférre subsídium. Per Dóminum.
Et dicitur Ite, Missa est.
II classis Semiduplex
Introitus Sap. 18, 14-15
DUM médium siléntium tenérent ómnia, et nox in suo cursu médium iter habéret, omnípotens sermo tuus, Dómine, de caelis a regálibus sédibus venit. Ps. 92, 1 Dóminus regnávit, decórem indútus est: indútus est Dóminus fortitúdinem, et praecínxit se. V/. Glória Patri.
* Et dicitur Glória in excélsis.
Oratio
OMNÍPOTENS sempitérne Deus, dírige actus nostros in beneplácito tuo: ut in nómine dilécti Fílii tui mereámur bonis opéribus a bundáre: Qui tecum.
Et fit Commemoratio S. Telesphori Papae et Martyris.
Oratio C
GREGEM tuum, Pastor aetérne, placátus inténde: et per beátum Telésphorum Mártyrem tuum atque Summum Pontíficem, perpétua protectióne custódi ; quem totíus Ecclésiae praestitísti esse pastórem. (Per Dóminum.)
3a De S. Maria
Oratio
DEUS, qui salútis aetérnae, beátae Maríae virginitáte fecúnda, humáno géneri praémia praestitísti: tríbue, quaésumus, ut ipsam pro nobis intercédere sentiámus, per quam merúimus auctórem vitae suscípere, Dóminum nostrum Jesum Christum, Fílium tuum: Qui tecum vivit et regnat.
Léctio Epístolae beáti Pauli Apóstoli ad Gálatas.
Gal. 4, 1-7
FRATRES: Quanto témpore heres párvulus est, nihil differt a servo, cum sit dóminus ómnium: sed sub tutóribus et actóribus est usque ad praefinítum tempus a patre: ita et nos, cum essémus párvuli, sub eleméntis mundi erámus serviéntes. At ubi venit plenitúdo témporis, misit Deus Fílium suum, factum ex mulíere, factum sub lege, ut eos, qui sub lege erant, redímeret, ut adoptiónem filiórum reciperémus. Quóniam autem estis fílii, misit Deus Spíritum Fílii sui in corda vestra, clamántem: Abba, Pater. Itaque jam non est servus, sed fílius: quod si fílius, et heres per Deum.
Graduale Ps. 44, 3 et 2 Speciósus forma prae fíliis hóminum: diffúsa est grátia in lábiis tuis. V/. Eructávit cor meum verbum bonum, dico ego ópera mea Regi: lingua mea cálamus scribae, velóciter scribéntis.
Allelúja, allelúja. V/. Ps. 92, 1 Dóminus regnávit, decórem índuit: índuit Dóminus fortitúdinem, et praecínxit se virtúte. Allelúja.
+ Sequéntia sancti Evangélii secúndum Matthaéum.
Matth. 2, 19-23
IN illo témpore: Defúncto Heróde, ecce Angelus Dómini appáruit in somnis Joseph in AEgýpto, dicens: Surge, et áccipe púerum, et matrem ejus, et vade in terram Israël: defúncti sunt enim, qui quaerébant ánimam púeri. Qui consúrgens, accépit púerum et matrem ejus, et venit in terram Israël. Audiens autem, quod Archeláus regnáret in Judaéa pro Heróde patre suo, tímuit illo ire: et admónitus in somnis, secéssit in partes Galilaéae. Et véniens habitávit in civitáte quae vocátur Názareth: ut adimplerétur quod dictum est per prophétas: Quóniam Nazaraéus vocábitur.
Dicitur Credo, etiam si de Vigilia fit tantum Commemoratio.
Offertorium Ps. 92, 1-2 Deus firmávit orbem terrae, qui non commovébitur: paráta sedes tua, Deus, ex tunc, a saéculo tu es.
Secreta
CONCÉDE, quaésumus, omnípotens Deus: ut óculis tuae majestátis munus oblátum, et grátiam nobis piae devotiónis obtíneat, et efféctum beátae perennitátis acquírat. Per Dóminum.
Pro S. Telesphoro
Secreta C
OBLÁTIS munéribus, quaésumus, Dómine, Ecclésiam tuam benígnus illúmina: ut, et gregis tui profíciat ubíque succéssus, et grati fiant nómini tuo, te gubernánte, pastóres. (Per Dóminum.)
3a De S. Maria
Secreta
TUA, Dómine, propitiatióne, et beátae Maríae semper Vírginis intercessióne, ad perpétuam atque praeséntem haec oblátio nobis profíciat prosperitátem et pacem. Per Dóminum.
Praefatio de Nativitate (sed Communicántes fit ut per annum).
Communio Matth. 2, 20 Tolle púerum et matrem ejus, et vade in terram Israël: defúncti sunt enim, qui quaerébant ánimam púeri.
Postcommunio
PER hujus, Dómine, operatiónem mystérii, et vítia nostra purgéntur, et justa desidéria compleántur. Per Dóminum.
Pro S. Telesphoro
Postcommunio C
REFECTIÓNE sancta enutrítam gubérna, quaésumus, Dómine, tuam placátus Ecclésiam: ut poténti moderatióne dirécta, et increménta libertátis accípiat, et in religiónis integritáte persístat. (Per Dóminum.)
3a De S. Maria
Postcommunio
HAEC nos commúnio, Dómine, purget a crímine: et, intercedénte beáta Vírgine Dei Genitríce María, caeléstis remédii fáciat esse consórtes. Per eúmdem Dóminum nostrum Jesum Christum Fílium tuum: Qui tecum vivit et regnatin unitáte Spíritus.
Papa et Martyre
Missa Si díligis me, de Communi unius aut plurium Summorum Pontificum.
Oratio
GREGEM tuum, Pastor aetérne, placátus inténde: et per beátum Telésphorum Mártyrem tuum atque Summum Pontíficem, perpétua protectióne custódi ; quem totíus Ecclésiae praestitísti esse pastórem. Per Dóminum.
Secreta
OBLÁTIS munéribus, quaésumus, Dómine, Ecclésiam tuam benígnus illúmina: ut, et gregis tui profíciat ubíque succéssus, et grati fiant nómini tuo, te gubernánte, pastóres. Per Dóminum.
Postcommunio
REFECTIÓNE sancta enutrítam gubérna, quaésumus, Dómine, tuam placátus Ecclésiam: ut poténti moderatióne dirécta, et increménta libertátis accípiat, et in religiónis integritáte persístat. Per Dóminum.
Duplex I classis cum Octava privilegiata II Ordinis
Statio ad S. Petrum
Introitus Mal. 3, 1 ; 1 Par. 29, 12
ECCE advénit dominátor Dóminus: et regnum in manu ejus, et potéstas, et impérium. Ps. 71, 1 Deus, judícium tuum Regi da: et justítiam tuam Fílio Regis. V/. Glória Patri.
Oratio
DEUS, qui hodiérna die Unigénitum tuum géntibus stella duce revelásti: concéde propítius ; ut, qui jam te ex fide cognóvimus, usque ad contemplándam spéciem tuae celsitúdinis perducámur. Per eúmdem Dóminum.
Léctio Isaíae Prophétae.
Isai. 60, 1-6
SURGE, illumináre Jerúsalem: quia venit lumen tuum, et glória Dómini super te orta est. Quia ecce ténebrae opérient terram, et calígo pópulos: super te autem oriétur Dóminus, et glória ejus in te vidébitur. Et ambulábunt gentes in lúmine tuo, et reges in splendóre ortus tui. Leva in circúitu óculos tuos, et vide: omnes isti congregáti sunt, venérunt tibi: fílii tui de longe vénient, et fíliae tuae de látere surgent. Tunc vidébis, et áfflues, mirábitur et dilatábitur cor tuum, quando convérsa fúerit ad te multitúdo maris, fortitúdo géntium vénerit tibi. Inundátio camelórum opériet te, dromedárii Mádian et Epha: omnes de Saba vénient, aurum et thus deferéntes, et laudem Dómino annuntiántes.
Graduale Ibid. 6 et 1 Omnes de Saba vénient, aurum et thus deferéntes, et laudem Dómino annuntiántes. V/. Surge, et illumináre, Jerúsalem: quia glória Dómini super te orta est.
Allelúja, allelúja. V/. Matth. 2, 2 Vídimus stellam ejus in Oriénte, et vénimus cum munéribus adoráre Dóminum. Allelúja.
+ Sequéntia sancti Evangélii secúndum Matthaéum.
Matth. 2, 1-12
CUM natus esset Jesus in Béthlehem Juda in diébus Heródis regis, ecce Magi ab Oriénte venérunt Jerosólymam, dicéntes: Ubi est qui natus est rex Judaeórum ? Vídimus enim stellam ejus in Oriénte, et vénimus adoráre eum. Audiens autem Heródes rex, turbátus est, et omnis Jerosólyma cum illo. Et cóngregans omnes príncipes sacerdótum, et scribas pópuli, sciscitabátur ab eis, ubi Christus nascerétur. At illi dixérunt ei: In Béthlehem Judae: sic enim scriptum est per Prophétam: Et tu Béthlehem terra Juda, nequáquam mínima es in princípibus Juda: ex te enim éxiet dux, qui regat pópulum meum Israël. Tunc Heródes, clam vocátis Magis, diligénter dídicit ab eis tempus stellae, quae appáruit eis: et mittens illos in Béthlehem, dixit: Ite, et interrogáte diligénter de púero: et cum invenéritis, renuntiáte mihi, ut et ego véniens adórem eum. Qui cum audíssent regem, abiérunt. Et ecce stella, quam víderant in Oriénte, antecedébat eos, usque dum véniens, staret supra, ubi erat puer. Vidéntes autem stellam, gavísi sunt gáudio magno valde. Et intrántes domum, invenérunt púerum cum María matre ejus, (hic genuflectitur) et procidéntes adoravérunt eum. Et apértis thesáuris suis, obtulérunt ei múnera, aurum, thus, et myrrham. Et respónso accépto in somnis, ne redírent ad Heródem, per áliam viam revérsi sunt in regiónem suam.
Credo.
Offertorium Ps. 71, 10-11 Reges Tharsis, et ínsulae múnera ófferent: reges Arabum et Saba dona addúcent: et adorábunt eum omnes reges terrae, omnes gentes sérvient ei.
Secreta
ECCLÉSIAE tuae, quaésumus, Dómine, dona propítius intuére: quibus non jam aurum, thus et myrrha profértur ; sed quod eísdem munéribus declarátur, immolátur, et súmitur, Jesus Christus Fílius tuus Dóminus noster: Qui tecum vivit et regnat.
Praefatio et Communicántes propria: quae dicuntur per totam Octavam, juxta Rubricas.
Communio Matth. 2, 2 Vídimus stellam ejus in Oriénte, et vénimus cum munéribus adoráre Dóminum.
Postcommunio
PRAESTA, quaésumus, omnípotens Deus: ut, quae solémni celebrámus offício, purificátae mentis intelligéntia consequámur. Per Dóminum.
* Infra Octavam Missa dicitur ut in Festo, additis Orationibus pro diversitate Temporum assignatis, 2a de S. Maria Deus, qui de salútis, 3a contra persecutores Ecclesiae vel pro Papa.
Duplex majus
Introitus Prov. 23, 24 et 25
EXSÚLTAT gáudio pater Justi, gáudeat Pater tuus et Mater tua, et exsúltet quae génuit te. Ps. 83, 2-3 Quam dilécta tabernácula tua, Dómine virtútum ! concupíscit, et déficit ánima mea in átria Dómini. V/. Glória Patri.
Oratio
DÓMINE Jesu Christe, qui Maríae et Joseph súbditus, domésticam vitam ineffabílibus virtútibus consecrásti: fac nos, utriúsque auxílio, Famíliae sanctae tuae exémplis ínstrui ; et consórtium cónsequi sempitérnum: Qui vivis.
Et fit Commemoratio Dominicae infra Octavam Epiphaniae.
Oratio
VOTA, quaésumus, Dómine, supplicántis pópuli caelésti pietáte proséquere ; ut et quae agénda sunt, vídeant, et ad implénda quae víderint, convaléscant. (Per Dóminum.)
Deinde Commemoratio Octavae.
Oratio
DEUS, qui hodiérna die Unigénitum tuum géntibus stella duce revelásti: concéde propítius ; ut, qui jam te ex fide cognóvimus, usque ad contemplándam spéciem tuae celsitúdinis perducámur. Per eúmdem Dóminum.
Léctio Epístolae beáti Pauli Apóstoli ad Colossénses.
Col. 3, 12-17
FRATRES: Indúite vos sicut elécti Dei, sancti et dilécti, víscera misericórdiae, benignitátem, humilitátem, modéstiam, patiéntiam: supportántes ínvicem, et donántes vobismetípsis, si quis advérsus áliquem habet querélam: sicut et Dóminus donávit vobis, ita et vos. Super ómnia autem haec, caritátem habéte, quod est vínculum perfectiónis: et pax Christi exsúltet in córdibus vestris, in qua et vocáti estis in uno córpore: et grati estóte. Verbum Christi hábitet in vobis abundánter, in omni sapiéntia, docéntes et commonéntes vosmetípsos, psalmis, hymnis et cánticis spirituálibus, in grátia cantántes in córdibus vestris Deo. Omne, quodcúmque fácitis in verbo, aut in ópere, ómnia in nómine Dómini Jesu Christi, grátias agéntes Deo et Patri per ipsum.
Graduale Ps. 26, 4 Unam pétii a Dómino, hanc requíram, ut inhábitem in domo Dómini ómnibus diébus vitae meae. V/. Ps. 83, 5 Beáti, qui hábitant in domo tua, Dómine: in saécula saeculórum laudábunt te.
Allelúja, allelúja. V/. Isai. 45, 15 Vere tu es Rex abscónditus, Deus Israël Salvátor. Allelúja.
In Missis votivis post Septuagesimam, omissis Allelúja et Versu sequenti, dicitur
Tractus Hebr. 10, 5 Hóstiam et oblatiónem noluísti, corpus autem aptásti mihi. V/. Ps. 39, 7-8 Holocáustum et pro peccáto non postulásti: tunc dixi: Ecce vénio. V/. Hebr. 10, 7 In cápite libri scriptum est de me: Ut fáciam, Deus, voluntátem tuam.
Tempore autem Paschali omittitur Graduale, et ejus loco dicitur:
Allelúja, allelúja. V/. Prov. 8, 34 Beátus homo qui audit me, et qui vígilat ad fores meas quotídie, et obsérvat ad postes óstii mei. Allelúja. V/. Col. 3, 3 Vita nostra est abscóndita cum Christo in Deo. Allelúja.
+ Sequéntia sancti Evangélii secúndum Lucam.
Luc. 2, 42-52
CUM factus esset Jesus annórum duódecim, ascendéntibus illis Jerosólymam secúndum consuetúdinem diéi festi, consummatísque diébus, cum redírent, remánsit puer Jesus in Jerúsalem, et non cognovérunt paréntes ejus. Existimántes autem illum esse in comitátu, venérunt iter diéi, et requirébant eum inter cognátos et notos. Et non inveniéntes, regréssi sunt in Jerúsalem, requiréntes eum. Et factum est, post tríduum invenérunt illum in templo sedéntem in médio doctórum, audiéntem illos, et interrogántem eos. Stupébant autem omnes, qui eum audiébant, super prudéntia, et respónsis ejus. Et vidéntes admiráti sunt. Et dixit mater ejus ad illum: Fili, quid fecísti nobis sic ? ecce pater tuus et ego doléntes quaerebámus te. Et ait ad illos: Quid est quod me quaerebátis ? nesciebátis quia in his quae Patris mei sunt, opórtet me esse ? Et ipsi non intellexérunt verbum quod locútus est ad eos. Et descéndit cum eis, et venit Názareth: et erat súbditus illis. Et mater ejus conservábat ómnia verba haec in corde suo. Et Jesus proficiébat sapiéntia, et aetáte, et grátia apud Deum et hómines.
Credo.
Offertorium Luc. 2, 22 Tulérunt Jesum paréntes ejus in Jerúsalem, ut sísterent eum Dómino.
Secreta
PLACATIÓNIS hóstiam offérimus tibi, Dómine, supplíciter deprecántes: ut, per intercessiónem Deíparae Vírginis cum beáto Joseph, famílias nostras in pace et grátia tua fírmiter constítuas. Per eúmdem Dóminum.
Pro Dominica
Secreta
OBLÁTUM tibi, Dómine, sacrifícium vivíficet nos semper, et múniat. (Per Dóminum.)
Deinde Commemoratio Octavae.
Secreta
ECCLÉSIAE tuae, quaésumus, Dómine, dona propítius intuére: quibus non jam aurum, thus et myrrha profértur ; sed quod eísdem munéribus declarátur, immolátur, et súmitur, Jesus Christus Fílius tuus Dóminus noster: Qui tecum vivit et regnat.
Praefatio de Epiphania.
Infra Octavam tantum etiam Communicántes de eadem Epiphania.
Communio Luc. 2, 51 Descéndit Jesus cum eis, et venit Názareth, et erat súbditus illis.
Postcommunio
QUOS caeléstibus réficis sacraméntis, fac, Dómine Jesu, sanctae Famíliae tuae exémpla júgiter imitári: ut, in hora mortis nostrae, occurrénte gloriósa Vírgine Matre tua cum beáto Joseph ; per te in aetérna tabernácula récipi mereámur: Qui vivis.
Pro Dominica
Postcommunio
SÚPPLICES te rogámus, omnípotens Deus: ut quos tuis réficis sacraméntis, tibi étiam plácitis móribus dignánter deservíre concédas. (Per Dóminum.)
Deinde Commemoratio Octavae.
Postcommunio
PRAESTA, quaésumus, omnípotens Deus: ut, quae solémni celebrámus offício, purificátae mentis intelligéntia consequámur. Per Dóminum.
* In fine legitur Evangelium S. Joannis.
* Infra Octavam, sicubi haec fuerit celebranda, et in Missis votivis Sanctae Familiae, pro Orationibus juxta diversitatem Temporum assignatis, dicitur 2a Oratio de Spiritu Sancto, 3a contra persecutores Ecclesiae, vel pro Papa.
Semiduplex
* Missa hujus Dominicae infra Octavam impedita, si ipsa Dominica a die 7 ad 11 Januarii occurrerit, reponitur in proximiorem sequentem Feriam, in qua Officium agatur de Octava ; si autem occurrerit die 13 Januarii, resumitur die 19 ejusdem mensis.
Introitus
IN excélso throno vidi sedére virum, quem adórat multitúdo Angelórum, psalléntes in unum: ecce cujus impérii nomen est in aetérnum. Ps. 99, 1 Jubiláte Deo, omnis terra: servíte Dómino in laetítia. V/. Glória Patri.
* Dicitur Glória in excélsis, etiam si haec Missa resumatur post diem 13 Januarii.
Oratio
VOTA, quaésumus, Dómine, supplicántis pópuli caelésti pietáte proséquere: ut et quae agénda sunt, vídeant, et ad implénda quae víderint, convaléscant. Per Dóminum nostrum.
Et fit Commemoratio Octavae Epiphaniae.
Oratio
DEUS, qui hodiérna die Unigénitum tuum géntibus stella duce revelásti: concéde propítius ; ut, qui jam te ex fide cognóvimus, usque ad contemplándam spéciem tuae celsitúdinis perducámur. Per eúmdem Dóminum.
Léctio Epístolae beáti Pauli Apóstoli ad Romános.
Rom. 12, 1-5
FRATRES: Obsecro vos per misericórdiam Dei, ut exhibeátis córpora vestra hóstiam vivéntem, sanctam, Deo placéntem, rationábile obséquium vestrum. Et nolíte conformári huic saéculo, sed reformámini in novitáte sensus vestri: ut probétis, quae sit volúntas Dei bona, et benéplacens, et perfécta. Dico enim per grátiam, quae data est mihi, ómnibus qui sunt inter vos: non plus sápere, quam opórtet sápere, sed sápere ad sobrietátem: et unicuíque sicut Deus divísit mensúram fídei. Sicut enim in uno córpore multa membra habémus, ómnia autem membra non eúmdem actum habent: ita multi unum corpus sumus in Christo, sínguli autem alter altérius membra: in Christo Jesu Dómino nostro.
Graduale Ps. 71, 18 et 3 Benedíctus Dóminus Deus Israël, qui facit mirabília magna solus a saéculo. V/. Suscípiant montes pacem pópulo tuo, et colles justítiam.
Allelúja, allelúja. V/. Ps. 99, 1 Jubiláte Deo, omnis terra: servíte Dómino in laetítia. Allelúja.
+ Sequéntia sancti Evangélii secúndum Lucam.
Luc. 2, 42-52
CUM factus esset Jesus annórum duódecim, ascendéntibus illis Jerosólymam secúndum consuetúdinem diéi festi, consummatísque diébus, cum redírent, remánsit puer Jesus in Jerúsalem, et non cognovérunt paréntes ejus. Existimántes autem illum esse in comitátu, venérunt iter diéi, et requirébant eum inter cognátos et notos. Et non inveniéntes, regréssi sunt in Jerúsalem, requiréntes eum. Et factum est, post tríduum invenérunt illum in templo sedéntem in médio doctórum, audiéntem illos, et interrogántem eos. Stupébant autem omnes, qui eum audiébant super prudéntia, et respónsis ejus. Et vidéntes admiráti sunt. Et dixit mater ejus ad illum: Fili, quid fecísti nobis sic ? ecce pater tuus et ego doléntes quaerebámus te. Et ait ad illos: Quid est quod me quaerebátis ? nesciebátis quia in his, quae Patris mei sunt, opórtet me esse ? Et ipsi non intellexérunt verbum quod locútus est ad eos. Et descéndit cum eis, et venit Názareth: et erat súbditus illis. Et mater ejus conservábat ómnia verba haec in corde suo. Et Jesus proficiébat sapiéntia, et aetáte, et grátia apud Deum et hómines.
Credo.
Offertorium Ps. 99, 1 et 2 Jubiláte Deo, omnis terra, servíte Dómino in laetítia: intráte in conspéctu ejus in exsultátióne: quia Dóminus ipse est Deus.
Secreta
OBLÁTUM tibi, Dómine, sacrifícium vivíficet nos semper, et múniat. Per Dóminum.
Pro Octava Epiphaniae
Secreta
ECCLÉSIAE tuae, quaésumus, Dómine, dona propítius intuére: quibus non jam aurum, thus, et myrrha profértur ; sed quod eísdem munéribus declarátur, immolátur, et súmitur, Jesus Christus Fílius tuus Dóminus noster: Qui tecum vivit et regnat.
* Praefatio de Epiphania ; et de ea dicitur etiam Communicántes, nisi post Octavam Missa resumatur.
Communio Luc. 2, 48 et 49 Fili, quid fecísti nobis sic ? ego et pater tuus doléntes quaerebámus te. Et quid est, quod me quaerebátis ? nesciebátis, quia in his, quae Patris mei sunt, opórtet me esse ?
Postcommunio
SÚPPLICES te rogámus, omnípotens Deus: ut quos tuis réficis sacraméntis, tibi étiam plácitis móribus dignánter deservíre concédas. Per Dóminum.
Pro Octava Epiphaniae
Postcommunio
PRAESTA, quaésumus, omnípotens Deus: ut, quae solémni celebrámus offício, purificátae mentis intelligéntia consequámur. Per Dóminum.
Missale Romanum 1957 - S. SILVESTRI