Missale Romanum 2002 continu 1084

1084 & 4 X

Pagina 1084.


Vel: Da, quaesumus, Dómine, fámulo tuo N., quem pascéndo gregi tuo in Apostolórum successióne praefecísti, spíritum consílii et fortitúdinis, spíritum sciéntiae et pietátis, ut, pópulum sibi créditum fidéliter gubérnans, Ecclésiae aedíficet in mundo sacraméntum. Per Dóminum.

Super oblata Haec oblátio, Dómine, pro fámulo tuo N. deláta sit tibi munus accéptum, et, quem sacerdótem magnum in tuo pópulo suscitásti, apostolicárum virtútum munéribus, ad gregis proféctum, exórna. Per Christum.

Ant. ad communionem Mt 20,28 Fílius hóminis non venit ministrári, sed ministráre, et dare ánimam suam redemptiónem pro multis.

Post communionem Huius, Dómine, virtúte mystérii, in fámulo tuo N. epíscopo nostro grátiae tuae dona multíplica, ut et tibi digne persólvat pastorále ministérium, et fidélis dispensatiónis aetérna praemia consequátur. Per Christum.


1085 & 4 X

Pagina 1085.

4. PRO ELIGENDO PAPA VEL EPISCOPO

Ant. ad introitum Mt 1 Suscitábo mihi sacerdótem fidélem, qui iuxta cor meum et ánimam meam fáciet; et aedificábo ei domum fidélem, et ambulábit coram me cunctis diébus.

Collecta Deus, qui, pastor aetérnus, gregem tuum assídua custódia gubérnas, eum imménsa tua pietáte concédas Ecclésiae pastórem, qui tibi sanctitáte pláceat, et vígili nobis sollicitúdine prosit. Per Dóminum.

Super oblata Tuae nobis, Dómine, abundántia pietátis indúlgeat, ut, per sacra múnera quae tibi reverénter offérimus, gratum maiestáti tuae pastórem Ecclésiae sanctae praeésse gaudeámus. Per Christum.

Ant. ad communionem Jn 15,16 Ego elégi vos et pósui vos, ut fructum afferátis, et fructus vester máneat, dicit Dóminus.

Post communionem Reféctos, Dómine, Córporis et Sánguinis Unigéniti tui salubérrimo sacraménto, nos mirífica tuae maiestátis grátia de illíus pastóris concessióne laetíficet, qui et plebem tuam virtútibus ínstruat, et fidélium mentes evangélica veritáte perfúndat. Per Christum.


1086 & 4 X

Pagina 1086.

5. PRO CONCILIO VEL SYNODO

Ant. ad introitum Col 3,14-15 Super ómnia caritátem habéte, quod est vínculum perfectiónis: et pax Christi exsúltet in córdibus vestris.

Collecta Ecclésiae tuae, Dómine, rector et custos, infúnde, quaesumus, fámulis tuis spíritum intellegéntiae, veritátis et pacis, ut, quae tibi plácita sunt, toto corde cognóscant et, ágnita, tota virtúte secténtur. Per Dóminum.

Vel: Deus, qui pópulis tuis indulgéntia cónsulis et amóre domináris, da spíritum sapiéntiae quibus dedísti régimen disciplínae, ut plebs tua ad veritátis agnitiónem pleniórem et sanctitátis tibi accéptum ducátur augméntum. Per Dóminum.

Super oblata Réspice, clementíssime Deus, múnera servórum tuórum, et grátiam tui lúminis illis impénde, ut quae recta sunt in óculis tuis veráciter intéllegant, et fiduciáliter exsequántur. Per Christum.

Praefatio II de Spiritu Sancto, p. 117 0.

Ant. ad communionem Ubi cáritas et amor, Deus ibi est. Congregávit nos in unum Christi amor.

1087 & 4 X

Pagina 1087.


Post communionem Da, quaesumus, miséricors Deus, ut sancta quae súmpsimus fámulos tuos in veritáte confírment, et honórem tui nóminis illos fáciant exquírere. Per Christum.


1088 & 4 X

Pagina 1088.

6. PRO SACERDOTIBUS

Ant. ad introitum Lc 4,18 Spíritus Dómini super me, propter quod unxit me, evangelizáre paupéribus misit me, sanáre contrítos corde, dimíttere confráctos in remissiónem.

Collecta Deus, qui Unigénitum tuum summum aeternúmque constituísti sacerdótem, praesta, ut, quos minístros tuorúmque mysteriórum dispensatóres elégit, in accépto ministério adimpléndo fidéles inveniántur. Per Dóminum.

Vel: Dómine Deus noster, qui in regéndo pópulo tuo ministério úteris sacerdótum, tríbue illis perseverántem in tua voluntáte famulátum, ut ministério atque vita tuam váleant in Christo glóriam procuráre. Qui tecum.

Super oblata Deus, qui sacerdótes tuos sacris altáribus tuóque pópulo ministráre voluísti, per huius sacrifícii virtútem concéde propítius, ut eórum servítium tibi iúgiter pláceat, et fructum qui semper manet in Ecclésia tua váleat afférre. Per Christum.

Ant. ad communionem Jn 17,17-18 Pater sancte, sanctífica eos in veritáte: sermo tuus véritas est. Sicut tu me misísti in mundum, et ego misi eos in mundum, dicit Dóminus.

1089 & 4 X

Pagina 1089.


Post communionem Sacerdótes tuos, Dómine, et omnes fámulos tuos vivíficet divína, quam obtúlimus et súmpsimus, hóstia, ut, perpétua tibi caritáte coniúncti, digne famulári tuae mereántur maiestáti. Per Christum.


1090 & 4 X

Pagina 1090.

7. PRO SEIPSO SACERDOTE

A praesertim pro sacerdote curam animarum gerente

Ant. ad introitum Cf. Col 1,25 Col 28 Ecclésiae factus sum ego miníster, secúndum dispensatiónem Dei quae data est mihi in vos: Christum nos annuntiámus, ut exhibeámus omnem hóminem perféctum in Christo Iesu.

Collecta Deus, qui non própriis suffragántibus méritis, sed sola ineffábilis grátiae tuae largitáte, me famíliae tuae praeésse voluísti, tríbue me tibi digne persólvere ministérium sacerdotális offícii, plebémque commíssam, te in ómnibus gubernánte, dirígere concéde. Per Dóminum.

Super oblata Deus, diérum temporúmque potens et benígne moderátor, collátis in me per grátiam tuam propitiáre munéribus, et, praeséntis oblatiónis virtúte, in hunc afféctum dírige cor plebis et sacerdótis, ut nec pastóri obodiéntia gregis, nec gregi desit cura pastóris. Per Christum.

Ant. ad communionem Jn 15,9 Sicut diléxit me Pater, et ego diléxi vos; manéte in dilectióne mea, dicit Dóminus.

1091 & 4 X

Pagina 1091.


Post communionem Omnípotens sempitérne Deus, orígo cunctárum perfectióque virtútum, da mihi, quaesumus, huius participatióne mystérii, et exercére quae recta sunt et praedicáre quae vera, ut instructiónem grátiae tuae fidélibus et agéndo praebeam et docéndo. Per Christum.

B Ant. ad introitum Ps 15,2 Ps 5 Dixi Dómino: Dóminus meus es tu, bonum mihi non est sine te. Dóminus pars hereditátis meae et cálicis mei: tu es qui détines sortem meam.

Collecta Aures tuae pietátis, clementíssime Deus, inclína précibus meis, et grátia Sancti Spíritus illúmina cor meum, ut tuis mystériis digne ministráre, Ecclésiae tuae fidéliter servíre, teque mérear aetérna caritáte dilígere. Per Dóminum.

Super oblata Súscipe, Deus omnípotens, haec múnera, quae tibi offérimus veneránter, et respíciens Christum tuum, sacerdótem simul et hóstiam, da, ut, eius sacerdótii párticeps efféctus, oblatiónem spiritálem me tibi semper exhíbeam placéntem. Per Christum.

Ant. ad communionem Cf. Lc 22,28-30 Dixit Iesus illis qui permansérunt in tentatiónibus suis: Ego dispóno vobis regnum, ut edátis et bibátis super mensam meam.

1092 & 4 X

Pagina 1092.


Post communionem Pane caelésti confirmátum et novi testaménti cálice congaudéntem, fac me, Pater sancte, tibi servíre fidéliter, et in salútem hóminum vitam fórtiter devotéque consúmere. Per Christum.

C In anniversario propriae ordinationis

Ant. ad introitum Cf. Jn 15,16 Nos vos me elegístis, dicit Dóminus; sed ego elégi vos, et pósui vos ut eátis et fructum afferátis, et fructus vester máneat.

Collecta Pater sancte, qui me ad communiónem cum aetérno Christi tui sacerdótio et ad Ecclésiae tuae ministérium nullis meis méritis elegísti, praesta, ut Evangélii strénuus ac mitis praedicátor exsístam, et mysteriórum tuórum fidélis dispensátor invéniar. Per Dóminum.

Super oblata Pro nostrae servitútis augménto sacrifícium tibi, Dómine, laudis offérimus, ut, quod imméritis contulísti, propítius exsequáris. Per Christum.

Ant. ad communionem Cf. 1Co 10,16 Calix benedictiónis cui benedícimus, communicátio Sánguinis Christi est; et panis quem frángimus, participátio Córporis Dómini est.

1093 & 4 X

Pagina 1093.


Post communionem Ad glóriam, Dómine, tui nóminis ánnua festa répetens sacerdotális exórdii, mystérium fídei laetánter celebrávi, ut in veritáte hoc sim, quod in sacrifício mystice tractávi. Per Christum.


1094 & 4 X

Pagina 1094.

8. PRO MINISTRIS ECCLESIAE

Ant. ad introitum Cf. 1Co 12,4-6 Divisiónes gratiárum sunt, idem autem Spíritus; et divisiónes ministratiónum, idem autem Dóminus; et divisiónes operatiónum, idem vero Deus, qui operátur ómnia in ómnibus.

Collecta Deus, qui minístros Ecclésiae tuae docuísti non ministrári velle, sed frátribus ministráre, illis, quaesumus, concéde et in actióne sollértiam, et cum mansuetúdine ministérii in oratióne constántiam. Per Dóminum.

Super oblata Pater sancte, cuius Fílius discipulórum vóluit laváre pedes, ut nobis praebéret exémplum, súscipe, quaesumus, nostrae múnera servitútis, et praesta, ut, nosmetípsos in spiritálem hóstiam offeréntes, spíritu humilitátis et diligéntiae repleámur. Per Christum.

Ant. ad communionem Lc 12,37 Beáti servi illi, quos cum vénerit Dóminus, invénerit vigilántes. Amen dico vobis, quod praecínget se, et fáciet illos discúmbere, et tránsiens ministrábit illis.

Post communionem Concéde fámulis tuis, Dómine, caelésti cibo potúque replétis, ut, ad glóriam tuam et salútem credéntium procurándam, fidéles inveniántur Evangélii, sacramentórum caritatísque minístri. Per Christum.


1095 & 4 X

Pagina 1095.

9. PRO VOCATIONIBUS AD SACROS ORDINES

Ant. ad introitum Mt 9,38 Rogáte Dóminum messis, ut mittat operários in messem suam, dicit Iesus discípulis suis.

Collecta Deus, qui pastóres pópulo tuo providére voluísti, effúnde in Ecclésia tua spíritum pietátis et fortitúdinis, qui dignos altáribus tuis éxcitet minístros, et Evangélii tui strénuos ac mites assertóres effíciat. Per Dóminum.

Super oblata Plebis tuae, quaesumus, Dómine, preces et múnera benígnus inténde, ut dispensatóres mysteriórum tuórum multiplicéntur, et in amóre tuo iúgiter persevérent. Per Christum.

Ant. ad communionem 1Jn 3,16 In hoc cognóvimus caritátem Dei: quóniam ille ánimam suam pro nobis pósuit, et nos debémus pro frátribus ánimas pónere.

Post communionem Pane mensae caeléstis refécti, te, Dómine, deprecámur, ut, per hoc sacraméntum caritátis, illa sémina maturéscant, quae magna in agrum Ecclésiae tuae largitáte dispérgis, quátenus multi sorte sibi éligant tibi in frátribus ministráre. Per Christum.


1096 & 4 X

Pagina 1096.

10. PRO LAICIS

Ant. ad introitum Mt 13,33 Símile est regnum caelórum ferménto, quod accéptum múlier abscóndit in farínae satis tribus, donec fermentátum est totum.

Collecta Deus, qui Evangélii virtútem véluti ferméntum in mundum misísti, concéde fidélibus tuis, quos in médio mundi negotiorúmque saeculárium vitam ágere vocásti, ut, spíritu christiáno fervéntes, per temporália quae gerunt múnera, regnum tuum iúgiter instáurent. Per Dóminum.

Super oblata Deus, qui Fílii tui sacrifício cunctum voluísti mundum salváre, per huius oblatiónis virtútem concéde, ut fámuli tui, quos étiam in statu laicáli ad apostolátum vocáre non désinis, et mundum spíritu ímbuant Christi, et eius sint sanctificatiónis ferméntum. Per Christum.

Ant. ad communionem Ps 99,2 Iubiláte Dómino, omnis terra, servíte Dómino in laetítia; introíte in cospéctu eius in exsultatióne, allelúia.

Vel: Jn 15,8 In hoc clarificátus est Pater meus, ut fructum plúrimum afferátis et efficiámini mei discípuli, dicit Dóminus.

1097 & 4 X

Pagina 1097.


Post communionem De plenitúdine grátiae tuae suméntes, quaesumus, Dómine, ut, eucharístici convívii fortitúdine roboráti, fidéles tui, quos rebus saeculáribus déditos esse voluísti, strénui sint evangélicae testes veritátis, et Ecclésiam tuam in rebus temporálibus praeséntem iúgiter reddant et actuósam. Per Christum.


1098 & 4 X

Pagina 1098.

11. IN ANNIVERSARIIS MATRIMONII

In praecipuis anniversariis Matrimonii, uti v. gr. in XXV, L, LX anniversario, adhiberi potest, quando permittuntur Missae pro variis necessitatibus, Missa pro gratiis Deo reddendis (pp. 115 3-1154), cum orationibus quae infra ponuntur. Eaedem orationes adhiberi possunt, pro opportunitate, etiam in Missa de feria " per annum ". His in celebrationibus opportune peculiaris memoria sacramenti habeatur formis, quae in Rituali Romano indicantur (Ordo celebrandi Matrimonium, nn. 272-286).

A

In anniversario

Collecta Deus, creátor ómnium, qui virum et féminam in princípio condidísti, ut vínculum constitúerent coniugále, uniónem famulórum tuórum N. et N. bénedic et confírma, ut coniunctiónis Christi cum Ecclésia imáginem semper perfectiórem exhíbeant. Per Dóminum.

Super oblata Deus, qui ex látere Christi sánguinem et aquam manáre fecísti ad humánae regeneratiónis significánda mystéria, múnera nostra in gratiárum actiónem pro fámulis tuis N. et N. dignáre suscípere, et eórum coniúgium tuis donis ómnibus munerári. Per Christum.


Post communionem Supérno cibo potúque reféctis, Dómine, his fámulis tuis in gáudio et caritáte corda diláta, ut sit eórum domus sedes honestátis et pacis, et ómnibus ad consolatiónes páteat caritátis. Per Christum.


1099 & 4 X

Pagina 1099.

B

In XXV anniversario

Collecta Dómine, qui hos fámulos tuos N. et N. indissolúbili matrimónii nexu coniunxísti, et animórum communióne dignátus es inter labóres et gáudia sustentáre, eórum, quaesumus, auge et purífica caritátem, ut mútua (cum prole sua) sanctificatióne laeténtur. Per Dóminum.

Super oblata Haec múnera, Deus, in gratiárum actiónem pro fámulis tuis N. et N. dignánter assúme, ut exínde pacem et gáudium abundánter exháuriant. Per Christum.


Post communionem Deus, qui ad mensam famíliae tuae hos cóniuges N. et N. (cum líberis et amícis) propítius admisísti, da eis fórtiter et alácriter in mútuam communiónem sic prógredi, ut usque ad caeléste convívium, tuo múnere, coniungántur. Per Christum.


1100 & 4 X

Pagina 1100.

C

In L anniversario

Collecta Deus Pater omnípotens, hos cóniuges N. et N. cleménter aspícias, (cum sóbole sua, quam ad vitam fidémque genuérunt) pro bonis longaevae conversatiónis opéribus, et eórum fructíferam bénedic senectútem, sicut eórum caritátis primítias sacraménto mirábili confirmásti. Per Dóminum.

Super oblata Haec múnera, Deus, in gratiárum actiónem pro fámulis tuis N. et N. dignánter assúme, qui tot annos una simul fide sincéra vixérunt, et ómnia bona unitátis et pacis a tua póstulant largitáte. Per Christum.


Post communionem Mensae tuae pasti delíciis, te, Dómine, deprecámur, ut hos cóniuges N. et N. in sancta senectúte custódias, donec ambos, plenos diérum, ad tuum admíttas caeléste convívium. Per Christum.


1101 & 4 X

Pagina 1101.

12. PRO FAMILIA

Ant. ad introitum Ep 6,2-3 Honóra patrem tuum et matrem tuam, quod est mandátum primum in promissióne, ut bene sit tibi et sis longaevus super terram.

Collecta Deus, cuius in ordinatióne socíetas familiáris firmum suum habet fundaméntum, réspice famulórum tuórum preces miserátus, et praesta, ut, exémplo sanctae Famíliae Unigéniti tui domésticis virtútibus caritatísque obséquio sectántes, in laetítia domus tuae praemiis fruámur aetérnis. Per Dóminum.

Super oblata Hóstiam tibi placatiónis offérimus, Dómine, supplíciter deprecántes, ut famílias nostras in tua grátia fírmiter et pace constítuas. Per Christum.

Ant. ad communionem Is 49,15 Numquid oblivísci potest múlier infántem suum? Et si illa oblíta fúerit, ego tamen non oblíscar tui, dicit Dóminus.

Post communionem Quos caeléstibus réficis sacraméntis, fac, clementíssime Pater, sanctae Famíliae Unigéniti tui exémpla iúgiter imitári, ut, post aerúmnas saeculi, eius consórtium consequántur aetérnum. Per Christum.


1102 & 4 X

Pagina 1102.

13. PRO RELIGIOSIS

A

Ant. ad introitum Ps 36,3-4 Spera in Dómino et fac bonitátem, et inhabitábis terram et pascéris in fide. Delectáre in Dómino, et dabit tibi petitiónes cordis tui.

Collecta Deus, omnis boni propósiti inspirátor atque perféctor, dírige fámulos tuos in viam salútis aetérnae, et, quos, relíctis ómnibus, tibi se totos devovérunt, fac, ut Christum sequéntes et ea quae sunt saeculi abnegántes, in spíritu paupertátis et cordis humilitáte tibi et frátribus suis fidéliter mínistrent. Per Dóminum.

Super oblata Sanctífica, quaesumus, Dómine, per haec sancta quae tibi offérimus, fámulos tuos, quos in nómine tuo congregásti, ut, fidéliter vota sua tibi reddéntes, maiestáti tuae sincéro corde desérviant. Per Christum.

Ant. ad communionem Ps 1 Angelus Dómini dixit Elíae: Surge, cómede; grandis enim tibi restat via.

Vel: Ap 22,17-20 Spíritus et sponsa dicunt: Veni. Amen. Veni, Dómine Iesu.

1103 & 4 X

Pagina 1103.


Post communionem Servos tuos, Dómine, in amóre tuo congregátos et de uno pane participántes, da unánimes consideráre ínvicem in provocatiónem caritátis et bonórum óperum, ut eórum sancta conversatióne Christi testes veri ubíque exhibeántur. Qui vivit et regnat in saecula saeculórum.

B

In XXV vel L anniversario professionis religiosae

Ant. ad introitum Cf. Ps 39,8-9 Ecce vénio, Dómine, ut fáciam voluntátem tuam. Vólui legem tuam in médio cordis mei.

Collecta Dómine Deus fidélis, da nobis, quaesumus, grátias tibi reférre pro tua erga fratrem nostrum (sorórem nostram) N. benignitáte, qui accéptum a te donum hódie renováre conténdit; róbora in eo (ea) spíritum perféctae caritátis ut glóriae tuae et óperi salútis in dies váleat fervéntius inservíre. Per Dóminum.

Super oblata Súscipe, Dómine, una cum munéribus oblatiónem sui quam hódie frater noster (soror nostra) N. confirmáre desíderat, et per virtútem Sancti Spíritus imágini dilécti Fílii tui ámplius eum (eam) conformáre dignéris. Qui vivit et regnat in saecula saeculórum.

1104 & 4 X

Pagina 1104.

Ant. ad communionem Ps 41,2 Quemádmodum desíderat cervus ad fontes aquárum, ita desíderat ánima mea ad te, Deus.

Post communionem Súmpsimus, Dómine, Corpus et Sánguinem Fílii tui, quae in iucúnda celebratióne huius anniversárii contulísti; concéde, quaesumus, ut frater noster (soror nostra) N., caelésti pane potúque reféctus (refécta), incépti itíneris ad te ducéntis felícem progréssum obtíneat. Per Christum.


1105 & 4 X

Pagina 1105.

14. PRO VOCATIONIBUS AD VITAM RELIGIOSAM

Ant. ad introitum Mt 19,21 Si vis perféctus esse, vade, vende quae habes et da paupéribus, et veni, séquere me, dicit Dóminus.

Collecta Pater sancte, qui, licet fidéles omnes ad perfectiónem caritátis invítas, multos tamen excitáre non désinis, ad Fílii tui vestígia préssius sequénda, concéde, ut, quos tibi in sortem peculiárem elégeris, conversatióne sua váleant regni tui signum osténdere Ecclésiae mundóque perspícuum. Per Dóminum.

Vel, a sacerdote religioso dicenda: Famíliam tuam, quaesumus, Dómine, propítius réspice et nova prole semper amplífica, ut et fílios suos ad propósitam caritátis perfectiónem addúcere, et ad hóminum salútem efficáciter váleat laboráre. Per Dóminum.

Super oblata Múnera quae tibi offérimus, Pater sancte, súscipe miserátus, et ómnibus, qui Fílium tuum per arctam viam imitári laeta sibi mente propónunt, communiónem concéde fratérnam et spiritálem libertátem. Per Christum.


1106 & 4 X

Pagina 1106.

Ant. ad communionem Cf. Mt 19,27-29 Amen dico vobis, quod vos qui reliquístis ómnia, et secúti estis me, céntuplum accipiétis et vitam aetérnam possidébitis, dicit Dóminus.

Post communionem Fámulos tuos, Dómine, spiritáli cibo potúque confírma, ut, evangélicae semper vocatióni fidéles, vivam ubíque Fílii tui imáginem repraeséntent. Qui vivit et regnat in saecula saeculórum.

Vel, a sacerdote religioso dicenda: Huius, Dómine, virtúte sacraménti, da nobis, quaesumus, perseverántem in tua voluntáte famulátum, ut tuam caritátem mundo testári et bona quae sola non amittúntur valeámus fórtiter inquírere. Per Christum.


1107 & 4 X

Pagina 1107.

15. PRO CONCORDIA FOVENDA

Ant. ad introitum Ac 4,32-33 Multitúdinis credéntium erat cor unum et ánima una. Et virtúte magna reddébant Apóstoli testimónium resurrectiónis Iesu Christi Dómini nostri; et grátia magna erat in ómnibus illis, allelúia.

Collecta Deus, summa únitas et vera cáritas, da fidélibus tuis cor unum et ánimam unam, ut Ecclésiae tuae corpus concórdia vígeat, et, quae veritátis confessióne nítitur, stábili unitáte firmétur. Per Dóminum.

Vel: Deus, qui Ecclésiam tuam in dilectiónem tuae divinitátis et próximi cuncta serváre caeléstia mandáta docuísti, da nobis spíritum pacis et grátiae, ut univérsa família tua et toto tibi sit corde devóta, et pura sibi voluntáte concórdet. Per Dóminum.

Super oblata Deus, qui nos ad imáginem tuam sacraméntis rénovas et praecéptis, gressus nostros in sémitis tuis pérfice miserátus, ut caritátis donum, quod a nobis sperári fecísti, per haec quae offérimus sacrifícia tríbuas apprehéndi. Per Christum.

Praefatio de unitate christianorum, p. 111 2.

Ant. ad communionem Jn 17,20-21 Rogo, Pater, pro eis qui creditúri sunt in me, ut ipsi in nobis unum sint, ut credat mundus quia tu me misísti, dicit Dóminus.

1108 & 4 X

Pagina 1108.


Post communionem Súmpsimus, Dómine, sacraméntum unitátis; praesta nobis, quaesumus, sancta unanimitáte in domo tua vivéntibus, pacem habére quam trádimus, pacem serváre quam súmimus. Per Christum.


1109 & 4 X

Pagina 1109.

16. PRO RECONCILIATIONE

Quae in hac Missa inter parentheses inscribuntur, occasione peculiaris temporis paenitentialis dicuntur.

Ant. ad introitum Salus pópuli ego sum, dicit Dóminus. De quacúmque tribulatióne clamáverint ad me, exáudiam eos, et ero illórum Dóminus in perpétuum.

Collecta Deus cleméntiae et reconciliatiónis, qui praecípuos dies salútis homínibus praebes ad te ómnium creatórem et patrem agnoscéndum, (per hoc acceptábile tempus) propítius nos ádiuva, ut, libénter verbum pacis a te accipiéntes, ómnia in Christo instaurándi tuae deserviámus voluntáti. Per Dóminum.

Vel, praesertim tempore paschali: Deus, verae libertátis auctor, qui omnes hómines unum vis efformáre pópulum a servitúte solútum, (quique grátiae et benedictiónis tempus nobis praebes,) concéde, quaesumus, ut, increménta libertátis accípiens, universále salútis sacraméntum in mundum Ecclésia tua vivídius appáreat atque in hómines caritátis maniféstet et operétur mystérium. Per Dóminum.

Super oblata Memoráre, Dómine, Fílium tuum, qui est pax et reconciliátio nostra, mundi peccátum suo sánguine delevísse, et múnera Ecclésiae tuae propitiátus aspíciens, da, ut, (grátiam huius témporis cum laetítia celebrántes,) libertátem Christi ad omnes possímus exténdere. Qui vivit et regnat in saecula saeculórum.

1110 & 4 X

Pagina 1110.

Adhiberi potest utraque forma Precis eucharisticae de reconciliatione, p. 675 et p. 681 .

Ant. ad communionem Mt 11,28 Veníte ad me, omnes qui laborátis et oneráti estis, et ego refíciam vos, dicit Dóminus.

Vel: Jn 16,24 Pétite et accipiétis, ut gáudium vestrum sit plenum, dicit Dóminus.

Post communionem Sacraméntum Fílii tui, quod súmpsimus, quaesumus, Dómine, vires nostras adáugeat, ut, ex hoc unitátis mystério, válidum hauriámus amórem et ubíque tuae pacis operatóres efficiámur. Per Christum.


1111 & 4 X

Pagina 1111.

17. PRO UNITATE CHRISTIANORUM

Haec Missa adhiberi potest, quando peculiares celebrationes pro unitate christianorum habentur, dummodo non occurrat dominica Adventus, Quadragesimae vel Paschae, aut sollemnitas quaedam.

A

Ant. ad introitum Jn 10,14-15 Ego sum pastor bonus, et cognósco oves meas, et cognóscunt me meae, dicit Dóminus. Sicut novit me Pater, et ego agnósco Patrem; et ánimam meam pono pro óvibus meis.

Collecta Omnípotens sempitérne Deus, qui dispérsa cóngregas et congregáta consérvas, ad gregem Fílii tui placátus inténde, ut, quos unum sacrávit baptísma, eos et fídei iungat intégritas, et vínculum sóciet caritátis. Per Dóminum.

Vel: Súpplices te rogámus, amátor hóminum, Dómine: pleniórem Spíritus tui grátiam super nos effúnde benígnus, et praesta, ut, digne qua nos vocásti vocatióne ambulántes, testimónium veritátis exhibeámus homínibus, et ómnium credéntium unitátem in vínculo pacis fidéntes inquirámus. Per Dóminum.

Super oblata Qui una semel hóstia, Dómine, adoptiónis tibi pópulum acquisísti, unitátis et pacis in Ecclésia tua propítius nobis dona concédas. Per Christum.


1112 & 4 X

Pagina 1112.

Praefatio: De unitate Corporis Christi, quod est Ecclesia.

V. Dóminus vobíscum. R. Et cum spíritu tuo. V. Sursum corda. R. Habémus ad Dóminum. V. Grátias agámus Dómino Deo nostro. R. Dignum et iustum est. Vere dignum et iustum est, aequum et salutáre, nos tibi semper et ubíque grátias ágere: Dómine, sancte Pater, omnípotens aetérne Deus: per Christum Dóminum nostrum. Per ipsum enim nos adduxísti ad agnitiónem tuae veritátis, ut uníus fídei et baptísmi vínculo Corpus eius efficerémur; per ipsum in cunctis géntibus largítus es Spíritum Sanctum tuum, qui, in diversitáte donórum mirábilis operátor et unitátis efféctor, fílios adoptiónis inhábitat totámque replet et regit Ecclésiam. Et ídeo, choris angélicis sociáti, te laudámus in gáudio confiténtes: Sanctus, Sanctus, Sanctus Dóminus Deus Sábaoth...

Ant. ad communionem Cf. 1Co 10,17 Unus panis, et unum corpus multi sumus, omnes qui de uno pane et de uno cálice participámus.

Post communionem Haec tua, Dómine, sumpta sacra commúnio, sicut fidélium in te uniónem praesígnat, sic in Ecclésia tua unitátis operétur efféctum. Per Christum.


1113 & 4 X

Pagina 1113.

B

Ant. ad introitum Ps 105,47 Salvos nos fac, Dómine Deus noster, et cóngrega nos de natiónibus, ut confiteámur nómini sancto tuo, et gloriémur in laude tua.

Collecta Deus, qui diversitátem géntium in confessióne tui nóminis adunásti, da nobis et velle et posse quae praecipis, ut pópulo ad regnum tuum vocáto una sit fides méntium et píetas actiónum. Per Dóminum.

Vel: Preces pópuli tui, quaesumus, Dómine, placátus inténde, et praesta, ut fidélium corda in tua laude et commúni paeniténtia iungántur, quátenus, christianórum divisióne subláta, in perfécta Ecclésiae communióne ad aetérnum tuum regnum properémus laetántes. Per Dóminum.

Super oblata Salútis nostrae memoriále celebrántes, cleméntiam tuam, Dómine, supplíciter exorámus, ut hoc sacraméntum pietátis fiat nobis signum unitátis et vínculum caritátis. Per Christum.

Praefatio propria, p.1112.

Ant. ad communionem Col 3,14-15 Super ómnia caritátem habéte, quod est vínculum perfectiónis; et pax Christi exsúltet in córdibus vestris, in qua et vocáti estis in uno córpore.

1114 & 4 X

Pagina 1114.


Post communionem Spíritum nobis, Dómine, tuae caritátis infúnde, ut, huius sacrifícii virtúte, una fácias in te credéntes pietáte concórdes. Per Christum.

C

Ant. ad introitum Ep 4,4-6 Unum corpus et unus spíritus, sicut vocáti estis in una spe vocatiónis vestrae; unus Dóminus, una fides, unum baptísma; unus Deus et Pater ómnium, qui est super omnes et per ómnia et in ómnibus nobis.

Collecta Pópulum tuum, quaesumus, Dómine, propítius réspice, et Spíritus tui super ipsum dona cleménter effúnde, ut in veritátis iúgiter amóre succréscat, et perféctam christianórum unitátem stúdio perquírat et ópere. Per Dóminum.

Vel: Ubertátem misericordiárum tuárum, Dómine, revéla super nos et, in virtúte Spíritus tui, christianórum divisiónes rémove, ut Ecclésia tua signum inter natiónes elevátum clárius appáreat, et mundus, tuo Spíritu illustrátus, in Christum credat quem misísti. Qui tecum.

Super oblata Quam tibi, Dómine, offérimus hóstia et purificatiónem cónferat, et omnes uno baptísmate coniúnctos eorúndem mysteriórum tandem partícipes effíciat. Per Christum.

Praefatio propria, p. 111 2.

1115 & 4 X

Pagina 1115.

Ant. ad communionem Jn 17,21 Jn 23 Ut omnes unum sint, sicut tu, Pater, in me, et ego in te, ut et ipsi in nobis unum sint: ego in eis et tu in me, ut sint consummáti in unum.

Post communionem Sacraménta Christi tui suméntes, quaesumus, Dómine, ut in Ecclésia tua sanctificatiónis grátiam rénoves quam dedísti, et omnes qui christiáno gloriántur nómine in unitáte fídei tibi servíre mereántur. Per Christum.


1116 & 4 X

Pagina 1116.

18. PRO EVANGELIZATIONE POPULORUM

Haec Missa adhiberi potest etiam dominicis " per annum ", quando peculiares celebrationes pro opere missionum habentur, dummodo non occurrat dominica Adventus, Quadragesimae vel Paschae, aut sollemnitas quaedam.

A

Ant. ad introitum Cf. Ps 66,2-3 Deus misereátur nostri, et benedícat nobis, illúminet vultum suum super nos et misereátur nostri; ut cognoscámus in terra viam tuam, in ómnibus géntibus salutáre tuum.

Collecta Deus, qui omnes hómines vis salvos fíeri et ad agnitiónem veritátis veníre, réspice messem tuam multam et operários in eam mitte dignánter, ut omni creatúrae Evangélium praedicétur, et plebs tua, verbo vitae congregáta et sacramentórum virtúte suffúlta, in via salútis et caritátis procédat. Per Dóminum.

Vel: Deus, qui Fílium tuum lumen verum in mundum misísti, effúnde Spíritum promissiónis, qui veritátis sémina in córdibus hóminum iúgiter diffúndat et fídei súscitet obséquium, ut omnes, per baptísmum ad novam vitam generáti, unum pópulum tuum íngredi mereántur. Per Dóminum.

Super oblata Réspice, Dómine, in fáciem Christi tui, qui pro ómnibus redemptiónem trádidit semetípsum, ut per eum ab ortu solis usque ad occásum nomen tuum magnificétur in géntibus, et una ubíque maiestáti tuae exhibeátur oblátio. Per Christum.


1117 & 4 X

Pagina 1117.

Ant. ad communionem Cf. Mt 28,20 Docéte omnes gentes serváre quaecúmque mandávi vobis, dicit Dóminus. Ego vobíscum sum ómnibus diébus, usque ad consummatiónem saeculi.

Post communionem Redemptiónis nostrae múnere vegetáti, quaesumus, Dómine, ut, hoc perpétuae salútis auxílio, fides semper vera profíciat. Per Christum.

B

Ant. ad introitum Ps 95,3-4 Annuntiáte inter gentes glóriam Dómini, in ómnibus pópulis mirabília eius: quóniam magnus Dóminus et laudábilis nimis.

Collecta Deus, qui Ecclésiam tuam sacraméntum salútis cunctis géntibus esse voluísti, ut Christi salutíferum opus usque in fines saeculórum persevéret, éxcita tuórum corda fidélium, et praesta, ut ad omnem creatúram salvándam urgéntius vocári se séntiant, quátenus ex ómnibus pópulis una família unúsque tibi pópulus exsúrgat et crescat. Per Dóminum.

Super oblata Múnera supplicántis Ecclésiae, Domine, in conspéctum maiestátis tuae ascéndant accépta, cui pro totíus mundi salúte grata éxstitit Fílii tui pássio gloriósa. Qui vivit et regnat in saecula saeculórum.

1118 & 4 X

Pagina 1118.

Ant. ad communionem Ps 116,1-2 Laudáte Dóminum, omnes gentes, collaudáte eum, omnes pópuli; quóniam confirmáta est super nos misericórdia eius, et véritas Dómini manet in aetérnum.

Vel: Mc 16,15 Eúntes in mundum univérsum, praedicáte Evangélium omni creatúrae, dicit Dóminus.

Post communionem Sanctíficet nos, quaesumus, Dómine, mensae tuae participátio, et praesta, ut, quam Unigénitus tuus in cruce operátus est salútem, omnes gentes per Ecclésiae tuae sacraméntum gratánter accípiant. Per Christum.


1119 & 4 X

Pagina 1119.

19. PRO CHRISTIANIS PERSECUTIONE VEXATIS

Ant. ad introitum Cf. Ps 73,20 Ps 21 Ps 22 Ps 23 Réspice, Dómine, in testaméntum tuum, et ánimas páuperum tuórum ne derelínquas in finem; exsúrge, Dómine, et iúdica causam tuam, et ne obliviscáris voces quaeréntium te.

Vel: Ac 12,5 Petrus servabátur in cárcere; orátio autem fiébat sine intermissióne ab Ecclésia ad Deum pro eo.

Collecta Deus, qui inscrutábili providéntia passiónibus Fílii tui vis Ecclésiam sociári, praesta fidélibus tuis, in tribulatióne propter nomen tuum versántibus, spíritum patiéntiae et caritátis, ut promissiónum tuárum fidi inveniántur testes atque veráces. Per Dóminum.

Super oblata Súscipe, quaesumus, Dómine, humilitátis nostrae preces et hóstias, et praesta, ut, qui, tibi fidéliter serviéntes, hóminum persecutiónes patiúntur, gáudeant se Christi Fílii tui sacrifício sociári, et sua séntiant inter electórum nómina scripta esse in caelis. Per Christum.

Ant. ad communionem Mt 5,11-12 Beáti estis, cum maledíxerint vobis et persecúti vos fúerint propter me, dicit Dóminus; gaudéte et exsultáte, quóniam merces vestra copiósa est in caelis.


Missale Romanum 2002 continu 1084