Missale Romanum 1957 - DE PASSIONE DOMINI


II

MISSAE VOTIVAE AD DIVERSA


MISSA

PRO ELIGENDO SUMMO PONTIFICE


Dicitur Missa de Spiritu Sancto ut supra, vel ut sequitur.


Introitus 1 Reg. 2, 35
SUSCITÁBO mihi sacerdótem fidélem, qui juxta cor meum et ánimam meam fáciet: et aedificábo ei domum fidélem, et ambulábit coram Christo meo cunctis diébus. (T. P. Allelúja, allelúja.) Ps. 131, 1 Meménto, Dómine, David: et omnis mansuetúdinis ejus. V/. Glória Patri.


Oratio


SÚPPLICI, Dómine, humilitáte depóscimus: ut sacrosánctae Románae Ecclésiae concédat Pontíficem illum tua imménsa píetas ; qui et pio in nos stúdio semper tibi plácitus, et tuo pópulo pro salúbri regímine sit assídue ad glóriam tui nóminis reveréndus. Per Dóminum.


Léctio Epístolae beáti Pauli Apóstoli ad Hebraéos.

Hebr. 4, 16 ; 5, 1-7


FATRES: Adeámus cum fidúcia ad thronum grátiae, ut misericórdiam consequámur, et grátiam inveniámus in auxílio opportúno. Omnis namque póntifex ex homínibus assúmptus, pro homínibus constitúitur in iis, quae sunt ad Deum, ut ófferat dona, et sacrifícia pro peccátis: qui condolére possit iis, qui ignórant et errant: quóniam et ipse circúmdatus est infirmitáte: et proptérea debet, quemádmodum pro pópulo, ita étiam et pro semetípso offérre pro peccátis. Nec quisquam sumit sibi honórem, sed qui vocátur a Deo, tamquam Aaron. Sic et Christus non semetípsum clarificávit, ut póntifex fíeret, sed qui locútus est ad eum: Fílius meus es tu, ego hódie génui te. Quemádmodum et in álio loco dicit: Tu es sacérdos in aetérnum, secúndum órdinem Melchísedech. Qui in diébus carnis suae preces supplicationésque ad eum, qui possit illum salvum fácere a morte, cum clamóre válido et lácrimis ófferens, exaudítus est pro sua reveréntia.


Graduale Levit. 21, 10 Póntifex sacérdos magnus inter fratres suos, super cujus caput fusum est unctiónis óleum, et cujus manus in sacerdótio consecrátae sunt, vestitúsque est sanctis véstibus: débuit per ómnia frátribus similári. V/. Hebr. 2, 17 Ut miséricors fíeret, et fidélis póntifex ad Deum: ut repropitiáret delícta pópuli.
Allelúja , allelúja. V/. Levit. 21, 8 Sacérdos sit sanctus, sicut et ego sanctus sum, Dóminus, qui sanctífico vos. Allelúja.



Post Septuagesimam, omissis Allelúja et Versu sequenti, dicitur

Tractus Ps. 131, 8-10 Surge, Dómine, in réquiem tuam: tu et arca sanctificatiónis tuae. V/. Sacerdótes tui induántur justítiam, et sancti tui exsúltent. V/. Propter David servum tuum, non avértas fáciem Christi tui.

Tempore autem Paschali omittitur Graduale, et ejus loco dicitur:


Allelúja , allelúja. V/. Levit. 21, 8 Sacérdos sit sanctus, sicut et ego sanctus sum, Dóminus, qui sanctífico vos. Allelúja. V/. Joann. 10, 14 Ego sum pastor bonus: et cognósco oves meas, et cognóscunt me meae. Allelúja.



+ Sequéntia sancti Evangélii secúndum Joánnem.

Joann. 14, 15-21


IN illo témpore: Dixit Jesus discípulis suis: Si dilígitis me, mandáta mea serváte. Et ego rogábo Patrem, et álium Paráclitum dabit vobis, ut máneat vobíscum in aetérnum, Spíritum veritátis, quem mundum non potest accípere, quia non videt eum nec scit eum. Vos autem cognoscétis eum: quia apud vos manébit, et in vobis erit. Non relínquam vos órphanos: véniam ad vos. Adhuc módicum, et mundus me jam non videt. Vos aurem vidétis me, quia ego vivo, et vos vivétis. In illo die vos cognoscétis quia ego sum in Patre meo, et vos in me, et ego in vobis. Qui habet mandáta mea et servat ea: ille est, qui díligit me. Qui autem díligit me, diligétur a Patre meo: et ego díligam eum, et manifestábo ei meípsum.


Offertorium 3 Esdrae 5, 40 Non participéntur sancta, donec exsúrgat póntifex in ostensiónem, et veritátem. (T. P. Allelúja.)


Secreta


TUAE nobis, Dómine, abundántia pietátis indúlgeat: ut per sacra múnera, quae tibi reverénter offérimus, gratum majestáti tuae Pontíficem sanctae matris Ecclésiae regímini praeésse gaudeámus. Per Dóminum.


Communio Exodi 29, 29-30 Veste sancta utétur póntifex, qui fúerit constitútus, et ingrediétur tabernáculum testimónii, ut minístret in sanctuário. (T. P. Allelúja.)


Postcommunio


PRETIÓSI córporis et sánguinis tui nos, Dómine, sacraménto reféctos, mirífica tuae majestátis grátia de illíus summi Pontíficis concessióne laetíficet: qui et plebem tuam virtútibus ínstruat, et fidélium mentes spirituálium arómatum odóre perfúndat: Qui vivis.



MISSAE VOTIVAE AD DIVERSA


IN DIE

CREATIONIS ET CORONATIONIS

PAPAE

et in eorum dierum Anniversario


* In die Creationis et Coronationis Summi Pontificis et in eorum dierum Anniversario canitur, ad modum votivae solemnis, juxta Rubricas, sequens Missa.


Introitus Eccli. 45, 30
STÁTUIT ei Dóminus testaméntum pacis, et príncipem fecit eum: ut sit illi sacerdótii dígnitas in aetérnum. (T. P. Allelúja, allelúja.) Ps. 131, 1 Meménto, Dómine, David: et omnis mansuetúdinis ejus. V/. Glória Patri.


Oratio


DEUS, ómnium fidélium pastor et rector, fámulum tuum N., quem pastórem Ecclésiae tuae praeésse voluísti, propítius réspice: da ei, quaésumus, verbo et exémplo, quibus praeest, profícere ; ut ad vitam, una cum grege sibi crédito, pervéniat sempitérnam. Per Dóminum.


Léctio Epístolae beáti Petri Apóstoli.

1 Petr. 1, 1-7


PETRUS Apóstolus Jesu Christi, eléctis ádvenis dispersiónis Ponti, Galátiae, Cappadóciae, Asiae et Bithýniae, secúndum praesciéntiam Dei Patris, in sanctificatiónem Spíritus, in obediéntiam, et aspersiónem sánguinis Jesu Christi: grátia vobis et pax multiplicétur. Benedíctus Deus, et Pater Dómini nostri Jesu Christi, qui secúndum misericórdiam suam magnam regenerávit nos in spem vivam, per resurrectiónem Jesu Christi ex mórtuis, in hereditátem incorruptíbilem, et incontaminátam, et immarcescíbilem, conservátam in caelis in vobis, qui in virtúte Dei custodímini per fidem in salútem, parátam revelári in témpore novíssimo. In quo exultábitis, módicum nunc si opórtet contristári in váriis tentatiónibus: ut probátio vestrae fídei multo pretiósior auro (quod per ignem probátur) inveniátur in laudem, et glóriam, et honórem, in revelatióne Jesu Christi Dómini nostri.


Graduale Ps. 106, 32 et 31 Exáltent eum in ecclésia plebis: et in cáthedra seniórum laudent eum. V/. Confiteántur Dómino misericórdiae ejus, et mirabília ejus fíliis hóminum.
Allelúja , allelúja. V/. Matth. 16, 18 Tu es Petrus, et super hanc petram aedificábo Ecclésiam meam. Allelúja.



Post Septuagesimam, omissis Allelúja et Versu sequenti, dicitur

Tractus Matth. 16, 18-19 Tu es Petrus, et super hanc petram aedificábo Ecclésiam meam. V/. Et portae ínferi non praevalébunt advérsus eam: et tibi dabo claves regni caelórum. V/. Quodcúmque ligáveris super terram, erit ligátum et in caelis. V/. Et quodcúmque sólveris super terram, erit solútum et in caelis.

Tempore autem Paschali, omittitur Graduale, et ejus loco dicitur:

Allelúja, allelúja. V/. Ps. 106, 8 Confiteántur Dómino misericórdiae ejus, et mirabília ejus fíliis hóminum. Allelúja. V/. Matth. 16, 18 Tu es Petrus, et super hanc petram aedificábo Ecclésiam meam. Allelúja.



+ Sequéntia sancti Evangélii secúndum Matthaéum.

Matth. 16, 13-19


IN illo témpore: Venit Jesus in partes Caesaréae Philíppi, et interrogábat discípulos suos, dicens: Quem dicunt hómines esse Fílium hóminis ? At illi dixérunt: Alii Joánnem Baptístam, álii autem Elíam, álii vero Jeremíam, aut unum ex prophétis. Dicit illis Jesus: Vos autem quem me esse dícitis ? Respóndens Simon Petrus, dixit: Tu es Christus Fílius Dei vivi. Respóndens autem Jesus, dixit ei: Beátus es, Simon Bar Jona: quia caro et sanguis non revelávit tibi, sed Pater meus, qui in caelis est. Et ego dico tibi, quia tu es Petrus, et super hanc petram aedificábo Ecclésiam meam, et portae ínferi non praevalébunt advérsus eam. Et tibi dabo claves regni caelórum. Et quodcúmque ligáveris super terram, erit ligátum et in caelis: et quodcúmque sólveris super terram, erit solútum et in caelis.


Credo.


Offertorium Matth. 16, 18-19 Tu es Petrus, et super hanc petram aedificábo Ecclésiam meam: et portae ínferi non praevalébunt advérsus eam: et tibi dabo claves regni caelórum. (T. P. Allelúja.)


Secreta


OBLÁTIS, quaésumus, Dómine, placáre munéribus: et fámulum tuum N., quem pastórem Ecclésiae tuae praeésse voluísti, assídua protectióne gubérna. Per Dóminum nostrum.


Praefatio de Apostolis.


Communio Matth. 16, 18 Tu es Petrus, et super hanc petram aedificábo Ecclésiam meam. (T. P. Allelúja.)


Postcommunio


HAEC nos, quaésumus, Dómine, divíni sacraménti percéptio prótegat: et fámulum tuum N., quem pastórem Ecclésiae tuae praeésse voluísti ; una cum commísso sibi grege, salvet semper, et múniat. Per Dóminum.



MISSAE VOTIVAE AD DIVERSA


IN CONSECRATIONE EPISCOPI


* Missa dicitur de Officio diei, sed sub unica conclusione cum 1a Oratione adduntur sequentes Orationes: et infra Actionem dicitur Hanc ígitur, ut infra.


Oratio


ADÉSTO supplicatiónibus nostris, omnípotens Deus: ut, quod humilitátis nostrae geréndum est ministério, tuae virtútis impleátur efféctu. Per Dóminum.


Secreta


Consecrator dicit:

SÚSCIPE, Dómine, múnera, quae tibi offérimus pro hoc fámulo tuo: ut propítius in eo tua dona custódias. Per Dóminum.

Consecratus dicit:

SÚSCIPE, Dómine, múnera, quae tibi offérimus pro me fámulo tuo: ut propítius in me tua dona custódias. Per Dóminum.


Infra Actionem


Consecrator dicit:

HANC ígitur oblatiónem servitútis nostrae, sed et cunctae famíliae tuae, quam tibi offérimus étiam pro hoc fámulo tuo, quem ad Episcopátus órdinem promovére dignátus es, quaésumus, Dómine, ut placátus accípias, et propítius in eo tua dona custódias: ut, quod divíno múnere consecútus est, divínis efféctibus exsequátur: diésque nostros in tua pace dispónas, atque ab aetérna damnatióne nos éripi, et in electórum tuórum júbeas grege numerári. Per Christum Dóminum nostrum. Amen.

Consecratus dicit:

HANC ígitur oblatiónem servitútis nostrae, sed et cunctae famíliae tuae, quam tibi offérimus étiam pro me fámulo tuo, quem ad Episcopátus órdinem promovére dignátus es, quaésumus, Dómine, ut placátus accípias, et propítius in me tua dona custódias: ut, quod divíno múnere consecútus sum, divínis efféctibus éxsequar: diésque nostros in tua pace dispónas, atque ab aetérna damnatióne nos éripi, et in electórum tuórum júbeas grege numerári. Per Christum Dóminum nostrum. Amen.


Postcommunio


PLENUM, quaésumus, Dómine, in nobis remédium tuae miseratiónis operáre: ac tales nos esse pérfice propítius, et sic fovéri ; ut tibi in ómnibus placére valeámus. Per Dóminum.



MISSAE VOTIVAE AD DIVERSA


IN ANNIVERSARIO

ELECTIONIS ET CONSECRATIONIS

EPISCOPI


* In Anniversario Electionis Episcopi, vel, si Episcopus ex alia Sede translatus fuerit, Translationis, nec non in Anniversario Consecrationis ejusdem, in ecclesiis Cathedralibus et Collegiatis Dioecesis, accedente Episcopi mandato, dicitur ad modum votivae solemnis, juxta Rubricas, sequens Missa.


Introitus Ps. 131, 9-10
SACERDÓTES tui, Dómine, índuant justítiam, et sancti tui exsúltent: propter David servum tuum, non avértas fáciem Christi tui. (T. P. Allelúja, allelúja.) Ps. ibid., 1 Meménto, Dómine, David: et omnis mansuetúdinis ejus. V/. Glória Patri.


Oratio


DEUS, ómnium fidélium pastor et rector, fámulum tuum N., quem pastórem ecclésiae N. praeésse voluísti, propítius réspice: da ei, quaésumus, verbo et exémplo, quibus praeest, profícere ; ut ad vitam, una cum grege sibi crédito, pervéniat sempitérnam. Per Dóminum.


Léctio Epístolae beáti Pauli Apóstoli ad Hebraéos.

Hebr. 5, 1-4


FRATRES: Omnis póntifex ex homínibus assúmptus, pro homínibus constitúitur in iis, quae sunt ad Deum: ut ófferat dona et sacrifícia pro peccátis: qui condolére possit iis, qui ignórant et errant: quóniam et ipse circúmdatus est infirmitáte: et proptérea debet, quemádmodum pro pópulo, ita étiam et pro semetípso offérre pro peccátis. Nec quisquam sumit sibi honórem, sed qui vocátur a Deo, tamquam Aaron.


Graduale Ps. 131, 16-17 Sacerdótes ejus índuam salutári: et sancti ejus exsultatióne exsultábunt. V/. Illuc prodúcam cornu David: parávi lucérnam Christo meo.
Allelúja , allelúja. V/. Ps. 109, 4 Jurávit Dóminus, et non paenitébit eum: Tu es sacérdos in aetérnum, secúndum órdinem Melchísedech. Allelúja.



Post Septuagesimam, omissis Allelúja et Versu sequenti, dicitur

Tractus Ps. 111, 1-3 Beátus vir, qui timet Dóminum: in mandátis ejus cupit nimis. V/. Potens in terra erit semen ejus: generátio rectórum benedicétur. V/. Glória et divítiae in domo ejus: et justítia ejus manet in saéculum saéculi.

Tempore autem Paschali omittitur Graduale, et ejus loco dicitur:


Allelúja , allelúja. V/. Ps. 109, 4 Jurávit Dóminus, et non paenitébit eum: Tu es sacérdos in aetérnum, secúndum órdinem Melchísedech. Allelúja. V/. Eccli. 45, 9 Amávit eum Dóminus, et ornávit eum: stolam glóriae índuit eum. Allelúja.



+ Sequéntia sancti Evangélii secúndum Marcum.

Marc. 13, 33-37


IN illo témpore: Dixit Jesus discípulis suis: Vidéte, vigiláte, et oráte: nescítis enim quando tempus sit. Sicut homo, qui péregre proféctus relíquit domum suam, et dedit servis suis potestátem cujúsque óperis, et janitóri praecépit ut vígilet. Vigiláte ergo, (nescítis enim quando dóminus domus véniat: sero, an média nocte, an galli cantu, an mane) ne cum vénerit repénte, invéniat vos dormiéntes. Quod autem vobis dico, ómnibus dico: Vigiláte.


Credo.


Offertorium Ps. 88, 25 Véritas mea et misericórdia mea cum ipso: et in nómine meo exaltábitur cornu ejus. (T. P. Allelúja.)


Secreta


OBLÁTIS, quaésumus, Dómine, placáre munéribus: et fámulum tuum N., quem pastórem ecclésiae N. praeésse voluísti, assídua protectióne gubérna. Per Dóminum.


Communio Matth. 24, 46-47 Beátus servus, quem, cum vénerit dóminus, invénerit vigilántem: amen dico vobis, super ómnia bona sua constítuet eum. (T. P. Allelúja.)


Postcommunio


HAEC nos, quaésumus, Dómine, divíni sacraménti percéptio prótegat: et fámulum tuum N., quem pastórem ecclésiae N. praeésse voluísti ; una cum commísso sibi grege, salvet semper, et múniat. Per Dóminum.



MISSAE VOTIVAE AD DIVERSA


IN COLLATIONE

SACRORUM ORDINUM


* In Sabbatis Quatuor Temporum et in Sabbato infra Hebdomadam IV Quadragesimae, Missa dicitur de Sabbato, et reliquis diebus de Officio diei ; sed sub unica conclusione cum 1a Oratione adduntur sequentes:


Oratio


EXÁUDI, quaésumus, Dómine, súpplicum preces, et devóto tibi péctore famulántes, perpétua defensióne custódi: ut nullis perturbatiónibus impéditi, líberam servitútem tuis semper exhibeámus offíciis. Per Dóminum.


Secreta


TUIS, quaésumus, Dómine, operáre mystériis: ut haec tibi múnera dignis méntibus offerámus. Per Dóminum.


Postcommunio


QUOS tuis, Dómine, réficis sacraméntis, contínuis attólle benígnus auxíliis: ut tuae redemptiónis efféctum, et mystériis capiámus, et móribus: Qui vivis et regnas.



MISSAE VOTIVAE AD DIVERSA


IN BENEDICTIONE ABBATIS


* Missa dicitur de Officio diei, sed sub unica conclusione cum 1a Oratione adduntur sequentes Orationes:


Oratio


Pontifex dicit:

CONCÉDE, quaésumus, Dómine, huic fámulo tuo: ut praedicándo et exercéndo quae recta sunt, per exémplum bonórum óperum ánimos suórum ínstruat subjectórum ; et aetérnae remuneratiónis mercédem a te piíssimo Pastóre percípiat. Per Dóminum.

Electus dicit:

CONCÉDE, quaésumus, Dómine, mihi fámulo tuo: ut praedicándo et exercéndo quae recta sunt, per exémplum bonórum óperum ánimos meórum ínstruam subjectórum ; et aetérnae remuneratiónis mercédem a te piíssimo Pastóre percípiam. Per Dóminum.


Secreta


Pontifex dicit:

MÚNERA nostra, quaésumus, Dómine, súscipe placátus: et hunc fámulum tuum semper et ubíque misericórditer prótege. Per Dóminum.

Abbas dicit:

MÚNERA, quaésumus, Dómine, súscipe placátus: et me fámulum tuum semper et ubíque misericórditer prótege. Per Dóminum.


Postcommunio


Pontifex dicit:

HAEC nos commúnio, Dómine, purget a crímine ; et hunc fámulum tuum benígna pietáte consérvet. Per Dóminum.

Abbas dicit:

HAEC nos commúnio, Dómine, purget a crímine ; et me fámulum tuum benígna pietáte consérvet. Per Dóminum.



MISSAE VOTIVAE AD DIVERSA


IN BENEDICTIONE ABBATISSAE


* Missa dicitur de Officio diei, sed sub unica conclusione cum 1a Oratione adduntur sequentes Orationes:


Oratio


DA, quaésumus, Dómine, huic fámulae tuae, quam virginitátis honóre dignátus es decoráre, inchoáti óperis consummátum efféctum: et, ut perféctam tibi ófferat plenitúdinem, inítia sua perdúcere mereátur ad finem. Per Dóminum.


Secreta


OBLÁTIS hóstiis, quaésumus, Dómine, praesénti fámulae tuae perseverántiam perpétuae virginitátis accómmoda: ut, apértis jánuis, summi Regis advéntu, regnum caeléste cum laetítia mereátur intráre. Per Dóminum.


Postcommunio


RÉSPICE, Dómine, fámulae tuae tibi débitam servitútem, ut inter humánae fragilitátis incérta, nullis adversitátibus opprimátur, quae de tua protectióne confídit. Per Dóminum.



MISSAE VOTIVAE AD DIVERSA


IN BENEDICTIONE

ET CONSECRATIONE VIRGINUM


* Missa dicitur de Officio diei, sed sub unica conclusione cum 1a Oratione adduntur sequentes Orationes:


Oratio


DA, quaésumus, Dómine, his famulábus tuis, quas virginitátis honóre dignátus es decoráre, inchoáti óperis consummátum efféctum: et, ut perféctam tibi ófferant plenitúdinem, inítia sua perdúcere mereántur ad finem. Per Dóminum.


Secreta


OBLÁTIS hóstiis, quaésumus, Dómine, praeséntibus famulábus tuis perseverántiam perpétuae virginitátis accómmoda: ut, apértis jánuis, summi Regis advéntu, regnum caeléste cum laetítia mereántur intráre. Per Dóminum.


Postcommunio


DEUS, qui habitáculum tuum in corde pudíco fundásti: réspice super has fámulas tuas ; et quae castigatiónibus assíduis póstulant, tua consolatióne percípiant. Per Dóminum.



MISSAE VOTIVAE AD DIVERSA


IN BENEDICTIONE COEMETERII


* Missa dicitur de Officio diei, sed sub unica conclusione cum 1a Oratione adduntur sequentes Orationes:


Oratio


DEUS, cujus miseratióne ánimae fidélium requiéscunt: huic coemetério, quaésumus, Dómine, Angelum tuum sanctum députa custódem, et quorum quarúmque córpora hic sepeliúntur, ánimas eórum ab ómnibus absólve vínculis delictórum ; ut in te semper cum Sanctis tuis sine fine laeténtur. Per Dóminum.


Secreta


MÚNERA, Dómine, obláta sanctífica: et, qui te ipsum in sepúlcro poni voluísti, et exémplum resurgéndi fidélibus tuis largíri dignátus es, da, quaésumus, fidélium tuórum animábus hic in te quiescéntium véniam peccatórum ; ut haec salutáris hóstia sit remédium et réquies animárum eórum et córporum: Qui vivis.


Postcommunio


MUNÉRIBUS sacris satiáti, quaésumus, Dómine Deus noster: ut plebs tua, quae in futúro a morte córporis resurrectúra créditur, te miseránte, a morte ánimae resúrgere mereátur. Per Dóminum.



MISSAE VOTIVAE AD DIVERSA


IN RECONCILIATIONE

ECCLESIAE ET COEMETERII


* Missa dicitur de Officio diei, sed sub unica conclusione cum 1a Oratione adduntur sequentes Orationes:


Oratio


DEUS, qui dixísti: Domus mea domus oratiónis vocábitur: domum istam infidélium spurcítiis contaminátam mundáre et sanctificáre dignéris ; et ómnium preces et vota hoc in loco ad te clamántium cleménter exáudias, et benígnus suscípias. Per Dóminum.


Secreta


HAEC hóstia, quaésumus, Dómine, et locum istum ab ómnibus immundítiis expúrget: et supplicatiónes nostras semper et ubíque reddat tibi accéptas. Per Dóminum.


Postcommunio


PERCIPIÉNTES, Dómine, múnera salútis aetérnae, súpplices exorámus: ut templum hoc et coemetérium, ab infidélium inquinaméntis emundátum, benedictióne tua máneat sanctificátum ; et péctora nostra ab omni sorde vitiórum alienáta tibíque devóta semper exsístant. Per Dóminum.



MISSAE VOTIVAE AD DIVERSA


MISSA

PRO SPONSO ET SPONSA


* Si solemnis benedictio Nuptiarum, intra Missam, facienda sit die Dominica, vel alio die Festo, sive de praecepto, licet suppresso, sive Duplici I vel II classis, aut in Octavis Epiphaniae, Paschatis, Pentecostes aut Corporis Christi, vel in Feriis ac Vigiliis privilegiatis, dicatur Missa de Officio occurrenti, cum Glória in excélsis et Credo, si illa Missa id requirat, et cum Commemoratione sequentis Missae pro Sponso et Sponsa, et reliquis, quae pro Communione, et complemento benedictionis in ea habentur. Si autem solemnis benedictio Nuptiarum, intra Missam, facienda sit aliis diebus, etiamsi in iis occurrat Festum Duplex majus vel minus, dicatur sequens Missa votiva pro Sponso et Sponsa, praeterquam in Commemoratione Omnium Fidelium Defunctorum, in qua et Missa votiva et solemnis benedictio Nuptialis prohibentur.


Introitus Tob. 7, 15 ; 8, 19
DEUS Israël conjúngat vos: et ipse sit vobíscum, qui misértus est duóbus únicis: et nunc, Dómine, fac eos plénius benedícere te. (T. P. Allelúja, allelúja.) Ps. 127, 1 Beáti omnes qui timent Dóminum: qui ámbulant in viis ejus. V/. Glória Patri.


Oratio


EXÁUDI nos, omnípotens et miséricors Deus: ut, quod nostro ministrátur offício, tua benedictióne pótius impleátur. Per Dóminum nostrum.


Léctio Epístolae beáti Pauli Apóstoli ad Ephésios.

Ephes. 5, 22-33


FRATRES: Mulíeres viris suis súbditae sint, sicut Dómino: quóniam vir caput est mulíeris: sicut Christus caput est Ecclésiae: ipse, salvátor córporis ejus. Sed sicut Ecclésia subjécta est Christo, ita et mulíeres viris suis in ómnibus. Viri, dilígite uxóres vestras, sicut et Christus diléxit Ecclésiam, et seípsum trádidit pro ea, ut illam sanctificáret, mundans lavácro aquae in verbo vitae, ut exhibéret ipse sibi gloriósam Ecclésiam, non habéntem máculam, aut rugam, aut áliquid hujúsmodi, sed ut sit sancta et immaculáta. Ita et viri debent dilígere uxóres suas, ut córpora sua. Qui suam uxórem díligit, seípsum díligit. Nemo enim umquam carnem suam ódio hábuit: sed nutrit, et fovet eam, sicut et Christus Ecclésiam: quia membra sumus córporis ejus, de carne ejus et de óssibus ejus. Propter hoc relínquet homo patrem et matrem suam, et adhaerébit uxóri suae: et erunt duo in carne una. Sacraméntum hoc magnum est, ego autem dico in Christo et in Ecclésia. Verúmtamen et vos sínguli, unusquísque uxórem suam, sicut seípsum díligat: uxor autem tímeat virum suum.


Graduale Ps. 127, 3 Uxor tua sicut vitis abúndans in latéribus domus tuae. V/. Fílii tui sicut novéllae olivárum in circúitu mensae tuae.
Allelúja, allelúja. V/. Ps. 19, 3 Mittat vobis Dóminus auxílium de sancto: et de Sion tueátur vos. Allelúja.



Post Septuagesimam, omissis Allelúja et Versu sequenti, dicitur

Tractus Ps. 127, 4-6 Ecce sic benedicétur omnis homo, qui timet Dóminum. V/. Benedícat tibi Dóminus ex Sion: et vídeas bona Jerúsalem ómnibus diébus vitae tuae. V/. Et vídeas fílios filiórum tuórum: pax super Israël.

Tempore autem Paschali omittitur Graduale, et ejus loco dicitur:


Allelúja, allelúja. V/. Ps. 19, 3 Mittat vobis Dóminus auxílium de sancto: et de Sion tueátur vos. Allelúja. V/. Ps. 133, 3 Benedícat vobis Dóminus ex Sion: qui fecit caelum et terram. Allelúja.



+ Sequéntia sancti Evangélii secúndum Matthaéum.

Matth. 19, 3-6


IN illo témpore: Accessérunt ad Jesum pharisaéi tentántes eum, et dicéntes: Si licet hómini dimíttere uxórem suam quacúmque ex causa ? Qui respóndens, ait eis: Non legístis, quia qui fecit hóminem ab inítio, másculum et féminam fecit eos ? et dixit: Propter hoc dimíttet homo patrem et matrem, et adhaerébit uxóri suae, et erunt duo in carne una. Itaque jam non sunt duo, sed una caro. Quod ergo Deus conjúnxit, homo non séparet.


Offertorium Ps. 30, 15-16 In te sperávi, Dómine: dixi: Tu es Deus meus: in mánibus tuis témpora mea. (T. P. Allelúja.)


Secreta


SÚSCIPE, quaésumus, Dómine, pro sacra connúbii lege munus oblátum: et, cujus largítor es óperis, esto dispósitor. Per Dóminum.


* Dicto Pater noster, Sacerdos antequam dicat Líbera nos, quaésumus, Dómine, stans in cornu Epistolae versus Sponsum et Sponsam ante Altare genuflexos, dicit super eos sequentes Orationes:

Orémus. Oratio
PROPITIÁRE, Dómine, supplicatiónibus nostris, et institútis tuis, quibus propagatiónem humáni géneris ordinásti, benígnus assíste: ut, quod te auctóre júngitur, te auxiliánte servétur. Per Dóminum.

Oremus.


DEUS, qui potestáte virtútis tuae de níhilo cuncta fecísti: qui dispósitis universitátis exórdiis, hómini ad imáginem Dei facto, ídeo inseparábile mulíeris adjutórium condidísti, ut femíneo córpori de viríli dares carne princípium, docens quod ex uno placuísset instítui, numquam licére disjúngi: Deus, qui tam excellénti mystério conjugálem cópulam consecrásti, ut Christi et Ecclésiae sacraméntum praesignáres in fo édere nuptiárum: Deus, per quem múlier júngitur viro, et socíetas principáliter ordináta, ea benedictióne donátur, quae sola nec per originális peccáti poenam, nec per dilúvii est abláta senténtiam: réspice propítius super hanc fámulam tuam, quae maritáli jungénda consórtio, tua se éxpetit protectióne muníri: sit in ea jugum dilectiónis et pacis: fidélis et casta nubat in Christo, imitatríxque sanctárum permáneat feminárum: sit amábilis viro suo, ut Rachel: sápiens, ut Rebécca: longaéva et fidélis, ut Sara: nihil in ea ex áctibus suis ille auctor praevaricatiónis usúrpet: nexa fídei mandatísque permáneat: uni thoro juncta, contáctus illícitos fúgiat: múniat infirmitátem suam róbore disciplínae: sit verecúndia gravis, pudóre venerábilis, doctrínis caeléstibus erudíta: sit fecúnda in sóbole, sit probáta et ínnocens: et ad beatórum réquiem, atque ad caeléstia regna pervéniat: et vídeant ambo fílios filiórum suórum, usque in tértiam et quartam generatiónem, et ad optátam pervéniant senectútem. Per eúmdem Dóminum.


* Tunc Sacerdos reversus ad medium Altaris dicat Líbera nos, quaésumus, Dómine, et reliqua more solito ; et postquam sumpserit Sanguinem, communicet Sponsos: et prosequatur Missam.


Communio Ps. 127, 4 et 6 Ecce sic benedicétur omnis homo, qui timet Dóminum: et vídeas fílios filiórum tuórum: pax super Israël. (T. P. Allelúja.)


Postcommunio


QUSUMUS, omnípotens Deus: institúta providéntiae tuae pio favóre comitáre ; ut, quos legítima sociétate connéctis, longaéva pace custódias. Per Dóminum.


* Dicto Benedicámus Dómino, vel, si Missae illius diei conveniat, Ite, Missa est, Sacerdos antequam populo benedicat, conversus ad Sponsum et Sponsam, dicat:

DEUS Abraham, Deus Isaac, et Deus Jacob sit vobíscum: et ipse adímpleat benedictiónem suam in vobis: ut videátis fílios filiórum vestrórum usque ad tértiam et quartam generatiónem, et póstea vitam aetérnam habeátis sine fine: adjuvánte Dómino nostro Jesu Christo, qui cum Patre et Spíritu Sancto vivit et regnat Deus, per ómnia saécula saeculórum. R/. Amen.


* Moneat eos Sacerdos sermone gravi, ut sibi invicem servent fidem: orationis tempore, et praesertim jejuniorum ac solemnitatum, casti maneant: et vir uxorem, atque uxor virum diligat: et in timore Dei permaneant. Postea eos aspergat aqua benedicta, et dicto Pláceat tibi, sancta Trínitas, det benedictionem: et legat, ut solitum est, Evangelium S. Joannis: In princípio erat Verbum, vel aliud, juxta Rubricas.



MISSAE VOTIVAE AD DIVERSA


MISSA

PRO FIDEI PROPAGATIONE


Introitus Ps. 66, 2-3
DEUS misereátur nostri, et benedícat nobis: illúminet vultum suum super nos, et misereátur nostri: ut cognoscámus in terra viam tuam, in ómnibus géntibus salutáre tuum. (T. P. Allelúja, allelúja.) Ps. ibid., 4 Confiteántur tibi pópuli, Deus: confiteántur tibi pópuli omnes. V/. Glória Patri.


Oratio


DEUS, qui omnes hómines vis salvos fíeri, et ad agnitiónem veritátis veníre: mitte, quaésumus, operários in messem tuam, et da eis cum omni fidúcia loqui verbum tuum ; ut sermo tuus currat et clarificétur, et omnes gentes cognóscant te solum Deum verum, et quem misísti Jesum Christum Fílium tuum, Dóminum nostrum: Qui tecum vivit et regnat.


Léctio libri Sapiéntiae.

Eccli. 36, 1-10 et 17-19


MISERÉRE nostri, Deus ómnium, et réspice nos, et osténde nobis lucem miseratiónum tuárum: et immítte timórem tuum super gentes, quae non exquisiérunt te, ut cognóscant quia non est Deus nisi tu, et enárrent magnália tua. Alleva manum tuam super gentes aliénas, ut vídeant poténtiam tuam. Sicut enim in conspéctu eórum sanctificátus es in nobis, sic in conspéctu nostro magnificáberis in eis, ut cognóscant te, sicut et nos cognóvimus, quóniam non est Deus praeter te, Dómine. Innova signa, et immúta mirabília. Glorífica manum et bráchium dextrum. Excita furórem, et effúnde iram. Tolle adversárium, et afflíge inimícum. Festína tempus, et meménto finis, ut enárrent mirabília tua. Da testimónium his, qui ab inítio creatúrae tuae sunt, et súscita praedicatiónes, quas locúti sunt in nómine tuo prophétae prióres. Da mercédem sustinéntibus te, ut prophétae tui fidéles inveniántur: et exáudi oratiónes servórum tuórum, secúndum benedictiónem Aaron de pópulo tuo, et dírige nos in viam justítiae, et sciant omnes, qui hábitant terram, quia tu es Deus conspéctor saeculórum.


Graduale Ps. 66, 6-8 Confiteántur tibi pópuli, Deus: confiteántur tibi pópuli omnes: terra dedit fructum suum. V/. Benedícat nos Deus, Deus noster, benedícat nos Deus: et métuant eum omnes fines terrae.
Allelúja , allelúja. V/. Ps. 99, 1 Jubiláte Deo, omnis terra: servíte Dómino in laetítia: introíte in conspéctu ejus, in exsultatióne. Allelúja.



Post Septuagesimam, omissis Allelúja et Versu sequenti, dicitur

Tractus Ps. 95, 3-5 Annuntiáte inter gentes glóriam Dómini, in ómnibus pópulis mirabília ejus. V/. Quóniam magnus Dóminus, et laudábilis nimis: terríbilis est super omnes deos. V/. Quóniam omnes dii géntium daemónia: Dóminus autem caelos fecit.

Tempore autem Paschali omittitur Graduale, et ejus loco dicitur:


Allelúja , allelúja. V/. Ps. 99, 1-2 Jubiláte Deo, omnis terra: servíte Dómino in laetítia: introíte in conspéctu ejus, in exsultatióne. Allelúja. V/. Scitóte quóniam Dóminus ipse est Deus: ipse fecit nos, et non ipsi nos. Allelúja.



+ Sequéntia sancti Evangélii secúndum Matthaéum.

Matth. 9, 35-38


IN illo témpore: Circuíbat Jesus omnes civitátes et castélla, docens in synagógis eórum, et praédicans Evangélium regni, et curans omnem languórem et omnem infirmitátem. Videns autem turbas, misértus est eis: quia erant vexáti et jacéntes sicut oves non habéntes pastórem. Tunc dicit discípulis suis: Messis quidem multa, operárii autem pauci. Rogáte ergo Dóminum messis, ut mittat operários in messem suam.


Offertorium Ps. 95, 7-9 Afférte Dómino, pátriae géntium, afférte Dómino glóriam et honórem, afférte Dómino glóriam nómini ejus: tóllite hóstias, et introíte in átria ejus: adoráte Dóminum in átrio sancto ejus. (T. P. Allelúja.)


Secreta


PROTÉCTOR noster áspice Deus, et réspice in fáciem Christi tui, qui dedit redemptiónem semetípsum pro ómnibus: et fac ; ut ab ortu solis usque ad occásum magnificétur nomen tuum in géntibus, ac in omni loco sacrificétur et offerátur nómini tuo oblátio munda. Per eúmdem Dóminum.


Communio Ps. 116, 1-2 Laudáte Dóminum, omnes gentes: laudáte eum, omnes pópuli: quóniam confirmáta est super nos misericórdia ejus, et véritas Dómini manet in aetérnum. (T. P. Allelúja.)


Postcommunio


REDEMPTIÓNIS nostrae múnere vegetáti: quaésumus, Dómine ; ut hoc perpétuae salútis auxílio, fides semper vera profíciat. Per Dóminum.


* Item alia Epistola

Léctio Epístolae beáti Pauli Apóstoli ad Timótheum.

1 Tim. 2, 1-7


OBSECRO primum ómnium fíeri obsecratiónes, oratiónes, postulatiónes, gratiárum actiónes, pro ómnibus homínibus: pro régibus et ómnibus qui in sublimitáte sunt, ut quiétam et tranquíllam vitam agámus, in omni pietáte et castitáte ; hoc enim bonum est et accéptum coram Salvatóre nostro Deo, qui omnes hómines vult salvos fíeri, et ad agnitiónem veritátis veníre. Unus enim Deus, unus et mediátor Dei et hóminum, homo Christus Jesus: qui dedit redemptiónem semetípsum pro ómnibus, testimónium tempóribus suis: in quo pósitus sum ego praedicátor et apóstolus (veritátem dico, non méntior), doctor géntium in fide et veritáte.



Missale Romanum 1957 - DE PASSIONE DOMINI