Missale Romanum 1957 - S. ISIDORI AGRICOLAE


MISSAE PRO ALIQUIBUS LOCIS

Die 16 Maji

S. JOANNIS NEPOMUCENI

Martyris



Introitus Eccli. 51, 30
DEDIT mihi Dóminus linguam mercédem meam: et in ipsa laudábo eum. (T. P. Allelúja, allelúja.) Ps. 38, 2 Dixi: Custódiam vias meas, ut non delínquam in lingua mea. V/. Glória Patri.


Oratio


DEUS, qui ob invíctum beáti Joánnis sacramentále siléntium nova Ecclésiam tuam martýrii coróna decorásti: da ; ut, ejus exémplo et intercéssione, ori nostro custódiam ponéntes, beátis, qui lingua non sunt lapsi, annumerémur. Per Dóminum.


Léctio libri Sapiéntiae.

Eccli. 21, 26-31


STULTUS a fenéstra respíciet in domum: vir autem erudítus foris stabit. Stultítia hóminis auscultáre per óstium: et prudens gravábitur contumélia. Lábia imprudéntium stulta narrábunt: verba autem prudéntium statéra ponderabúntur. In ore fatuórum cor illórum: et in corde sapiéntium os illórum. Dum maledícit ímpius diábolum, maledícit ipse ánimam suam. Susúrro coinquinábit ánimam suam, et in ómnibus odiétur: et qui cum eo mánserit, odiósus erit: tácitus et sensátus honorábitur.


Graduale Prov. 11, 13 Qui ámbulat fraudulénter, revélat arcána: qui autem fidélis est ánimi, celat. V/. Ps. 14, 1 et 3 Dómine, quis habitábit in tabernáculo tuo, aut quis requiéscet in monte sancto tuo ? Qui non egit dolum in lingua sua: nec fecit próximo suo malum.
Allelúja, allelúja. V/. Eccli. 25, 11 Beátus, qui lingua sua non est lapsus, et qui non servívit indígnis se. Allelúja.



Post Septuagesimam, omissis Allelúja et Versu sequenti, dicitur

Tractus Jac. 1, 26 ; 3, 2 et 7-8 Si quis putat se religiósum esse, non refrénans linguam suam, sed sedúcens cor suum, hujus vana est relígio. V/. Si quis in verbo non offéndit, hic perféctus est vir. V/. Omnis enim natúra bestiárum domántur, et dómita sunt a natúra humána: linguam autem nullus hóminum domáre potest.

Tempore autem Paschali omittitur Graduale, et ejus loco dicitur:


Allelúja, allelúja. V/. Eccli. 25, 11 Beátus, qui lingua sua non est lapsus, et qui non servívit indígnis se. Allelúja. V/. Prov. 10, 31 Lingua pravórum períbit: lingua autem sapiéntium est sánitas. Allelúja.



+ Sequéntia sancti Evangélii secúndum Matthaéum.

Matth. 11, 2-10


IN illo témpore: Cum audísset Joánnes in vínculis ópera Christi, mittens duos de discípulis suis, ait illi: Tu es, qui ventúrus es, an álium exspectámus ? Et respóndens Jesus, ait illis: Eúntes renuntiáte Joánni, quae audístis, et vidístis. Caeci vident, claudi ámbulant, leprósi mundántur, surdi áudiunt, mórtui resúrgunt, páuperes evangelizántur: et beátus est, qui non fúerit scandalizátus in me. Illis autem abeúntibus, coepit Jesus dícere ad turbas de Joánne: Quid exístis in desértum vidére ? arúndinem vento agitátam ? Sed quid exístis vidére ? hóminem móllibus vestítum ? Ecce qui móllibus vestiúntur, in dómibus regum sunt. Sed quid exístis vidére ? prophétam ? Etiam dico vobis, et plus quam prophétam. Hic est enim, de quo scriptum est: Ecce ego mitto Angelum meum ante fáciem tuam, qui praeparábit viam tuam ante te.


Offertorium Eccli. 42, 1 Non dúplices sermónem de revelatióne sermónis abscónditi, et eris vere sine confusióne: et invénies grátiam in conspéctu ómnium hóminum. (T. P. Allelúja.)


Secreta


HAEC tua, Dómine, sacra mystéria illum in nobis, quaésumus, ignem accéndant: quo ínclitus Martyr et Sacérdos tuus Joánnes, ea peragéndo, flagrábat. Per Dóminum.


Communio Isai. 6, 6-7 Volávit ad me unus de Séraphim: et in manu ejus cálculus, quem túlerat de altári, et tétigit os meum. (T. P. Allelúja.)


Postcommunio


FRAGILITÁTEM nostram, Dómine, caeléstis haec mensa fórtium pane confírmet: qui beáti Mártyris et Sacerdótis tui Joánnis tentátam contra honórem sacraménti constántiam, júgiter áluit ad victóriam. Per Dóminum.



MISSAE PRO ALIQUIBUS LOCIS

Die 22 Maji

S. RITAE A CASSIA

Viduae



Introitus Ps. 117, 19 et 22
APERÍTE mihi portas justítiae, ingréssus in eas confitébor Dómino: lápidem, quem reprobavérunt aedificántes, hic factus est in caput ánguli. (T. P. Allelúja, allelúja.) Ps. ibid., 1 Confitémini Dómino quóniam bonus: quóniam in saéculum misericórdia ejus. V/. Glória Patri.


Oratio


DEUS, qui sanctae Ritae tantam grátiam conférre dignátus es, ut inimícos dilígeret et in corde ac fronte caritátis et passiónis tuae signa portáret: da nobis, quaésumus, ejus intercessíone et méritis ; inimícis nostris sic párcere, et passiónis tuae dolóres contemplári, ut promíssa mítibus ac lugéntibus praémia consequámur: Qui vivis.


Léctio libri Sapiéntiae.

Cant. 2, 1-13


EGO flos campi, et lílium convállium. Sicut lílium inter spinas, sic amíca mea inter fílias. Sicut malus inter ligna silvárum, sic diléctus meus inter fílios. Sub umbra illíus, quem desideráveram, sedi: et fructus ejus dulcis gútturi meo. Introdúxit me in cellam vináriam, ordinávit in me caritátem. Fulcíte me flóribus, stipáte me malis: quia amóre lángueo. Laeva ejus sub cápite meo, et déxtera illíus amplexábitur me. Adjúro vos, fíliae Jerúsalem, per cápreas, cervósque campórum, ne suscitétis, neque evigiláre fa ciátis diléctam, quoadúsque ipsa velit. Vox dilécti mei, ecce iste venit sáliens in móntibus, transíliens colles: símilis est diléctus meus cápreae, hinnulóque cervórum. En ipse stat post paríetem nostrum, respíciens per fenéstras, prospíciens per cancéllos. En diléctus meus lóquitur mihi: Surge, própera, amíca mea, colúmba mea, formósa mea, et veni. Jam enim hiems tránsiit, imber ábiit et recéssit. Flores apparuérunt in terra nostra, tempus putatiónis advénit: vox túrturis audíta est in terra nostra: ficus prótulit grossos suos: víneae floréntes dedérunt odórem suum. Surge, amíca mea, speciósa mea, et veni.


Graduale Ps. 117, 6 Dóminus mihi adjútor: non timébo quid fáciat mihi homo. V/. Ps. 115, 16-17 Dirupísti víncula mea: tibi sacrificábo hóstiam laudis, et nomen Dómini invocábo.
Allelúja, allelúja. V/. Ibid., 18-19 Vota mea Dómino reddam in conspéctu omnis pópuli ejus: in átriis domus Dómini, in médio tui, Jerúsalem. Allelúja.



Post Septuagesimam, omissis Allelúja et Versu sequenti, dicitur

Tractus Veni, sponsa Christi, áccipe corónam, quam tibi Dóminus praeparávit in aetérnum. V/. Ps. 44, 8 et 5 Dilexísti justítiam, et odísti iniquitátem: proptérea unxit te Deus, Deus tuus, óleo laetítiae prae consórtibus tuis. V/. Spécie tua, et pulchritúdine tua inténde, próspere procéde, et regna.

Tempore autem Paschali omittitur Graduale, et ejus loco dicitur:


Allelúja, allelúja. V/. Eccli. 24, 18 Quasi palma exaltáta sum in Cades, et quasi plantátio rosae in Jéricho. Allelúja. V/. Ibid., 20 Sicut cinnamómum, et bálsamum aromatízans odórem dedi: quasi myrrha elécta dedi suavitátem odóris. Allelúja.



+ Sequéntia sancti Evangélii secúndum Matthaéum.

Matth. 13, 44-52


IN illo témpore: Dixit Jesus discípulis suis parábolam hanc: Símile est regnum caelórum thesáuro abscóndito in agro: quem, qui invénit homo, abscóndit, et prae gáudio illíus vadit, et vendit univérsa, quae habet, et emit agrum illum. Iterum símile est regnum caelórum hómini negotiatóri, quaerénti bonas margarítas. Invénta autem una pretiósa margaríta, ábiit, et véndidit ómnia, quae hábuit, et emit eam. Iterum símile est regnum caelórum sagénae missae in mare, et ex omni génere píscium congregánti. Quam, cum impléta esset, educéntes, et secus littus sedéntes, elegérunt bonos in vasa, malos autem foras misérunt. Sic erit in consummatióne saéculi: exíbunt Angeli, et separábunt malos de médio justórum, et mittent eos in camínum ignis: ibi erit fletus, et stridor déntium. Intellexístis haec ómnia ? Dicunt ei: Etiam. Ait illis: Ideo omnis scriba doctus in regno caelórum símilis est hómini patrifamílias, qui profert de thesáuro suo nova et vétera.


Offertorium Gen. 40, 9-10 Vidébam coram me vitem, in qua erant tres propágines, créscere paulátim in gemmas, et post flores uvas maturéscere. (T. P. Allelúja.)


Secreta


CORDA nostra, quaésumus, Dómine, sanctae Ritae méritis, supérni dolóris spina confíge: ut, a peccátis ómnibus tua grátia liberáti, sacrificáre tibi hóstiam laudis pura mente valeámus. Per Dóminum.


Communio Ps. 20, 4 Praevenísti eam, Dómine, in benedictiónibus dulcédinis: posuísti in cápite ejus corónam de lápide pretióso. (T. P. Allelúja.)


Postcommunio


CAELÉSTIBUS, Dómine, pasti delíciis, súpplices te rogámus: ut, intercedénte sancta Rita, caritátis et passiónis tuae in méntibus nostris signa ferámus, et perpétuae pacis fructu júgiter perfruámur. Per Dóminum.



MISSAE PRO ALIQUIBUS LOCIS

Die 23 Maji

S. JOANNIS BAPTISTAE DE ROSSI

Confessoris



Introitus Deut. 15, 11
PRAECÍPIO tibi, ut apérias manum fratri tuo egnéno et páuperi, qui tecum versátur in terra. (T. P. Allelúja, allelúja.) Ps. 40, 2 Beátus, qui intélligit super egénum et páuperem: in die mala liberábit eum Dóminus. V/. Glória Patri.


Oratio


DEUS, qui sanctum Joánnem Baptístam Confessórem tuum, in evangelizándis paupéribus, caritáte et patiéntia decorásti: concéde, quaésumus ; ut, cujus pia mérita venerámur, virtútum quoque imitémur exémpla. Per Dóminum.


Léctio libri Job.

Job 29, 1 et 8-18


IN diébus illis: Addidit Job, assúmens parábolam suam, et dixit: Vidébant me júvenes, et abscondebántur: et senes assurgéntes stabant. Príncipes cessábant loqui, et dígitum superponébant ori suo. Vocem suam cohibébant duces, et lingua eórum gútturi suo adhaerébat. Auris áudiens beatificábat me, et óculus videns testimónium reddébat mihi: eo quod liberássem páuperem vociferántem, et pupíllum, cui non esset adjútor. Benedíctio peritúri super me veniébat, et cor víduae consolátus sum. Justítia indútus sum: et vestívi me, sicut vestiménto et diadémate, judício meo. Oculus fui caeco, et pes claudo. Pater eram páuperum: et causam quam nesciébam, diligentíssime investigábam. Conterébam molas iníqui, et de déntibus illíus auferébam praedam. Dicebámque: In nídulo meo móriar, et sicut palma multiplicábo dies.


Graduale Eccli. 4, 1 Fili, eleemósynam páuperis ne defráudes, et óculos tuos ne transvértas a páupere. V/. Ibid., 7, 39 Non te pígeat visitáre infírmum: ex his enim in dilectióne firmáberis.
Allelúja, allelúja. V/. Isai. 58, 7 Frange esuriénti panem tuum, et egénos vagósque induc in domum tuam: cum víderis nudum, óperi eum, et carnem tuam ne despéxeris. Allelúja.



Post Septuagesimam, omissis Allelúja et Versu sequenti, dicitur

Tractus Ps. 111, 1-3 Beátus vir, qui timet Dóminum: in mandátis ejus cupit nimis. V/. Potens in terra erit semen ejus: generátio rectórum benedicétur. V/. Glória et divítiae in domo ejus: et justítia ejus manet in saéculum saéculi.

Tempore autem Paschali omittitur Graduale, et ejus loco dicitur:


Allelúja, allelúja. V/. Ps. 73, 21 Ne avertátur húmilis factus confúsus: pauper et inops laudábunt nomen tuum. A llelúja . V/. Prov. 31, 20 Manum suam apéruit ínopi, et palmas suas exténdit ad páuperem. Allelúja.



+ Sequéntia sancti Evangélii secúndum Matthaéum.

Matth. 25, 31-40


IN illo témpore: Dixit Jesus discípulis suis: Cum vénerit Fílius hóminis in majestáte sua, et omnes Angeli cum eo, tunc sedébit super sedem majestátis suae: et congregabúntur ante eum omnes gentes, et separábit eos ab ínvicem, sicut pastor ségregat oves ab haedis: et státuet oves quidem a dextris suis, haedos autem a sinístris. Tunc dicet Rex his, qui a dextris ejus erunt: Veníte benedícti Patris mei, possidéte parátum vobis regnum a constitutióne mundi. Esurívi enim, et dedístis mihi manducáre: sitívi, et dedístis mihi bíbere: hospes eram, et collegístis me: nudus, et cooperuístis me: infírmus, et visitástis me: in cárcere eram, et venístis ad me. Tunc respondébunt ei justi, dicéntes: Dómine, quando te vídimus esuriéntem, et pávimus te: sitiéntem, et dédimus tibi potum ? quando autem te vídimus hóspitem, et collégimus te: aut nudum, et cooperúimus te ? aut quando te vídimus infírmum, aut in cárcere, et vénimus ad te ? Et respóndens Rex, dicet illis: Amen dico vobis: quámdiu fecístis uni ex his frátribus meis mínimis, mihi fecístis.


Offertorium Jac. 1, 27 Relígio munda et immaculáta apud Deum et Patrem, haec est: Visitáre pupíllos et víduas in tribulatióne eórum, et immaculátum se custodíre ab hoc saéculo . (T. P. Allelúja.)


Secreta


OBLÁTUM tibi munus, quaésumus, Dómine, in odórem suavitátis ascéndat: et, sancto Joánne Baptísta Confessóre tuo intercedénte, nos córpore et me nte puríficet. Per Dóminum.


Communio 2 Tim. 2, 24-25 Servum autem Dómini non opórtet litigáre: sed mansuétum esse ad omnes, docíbilem, patiéntem, cum modéstia corripiéntem eos, qui resístunt veritáti. (T. P. Allelúja.)


Postcommunio


CAELÉSTIS, Dómine, participátio sacraménti, sancti Joánnis Baptístae Confessóris tui suffragántibus méritis, fidéles tuos mundet et múniat: ac bonis opéribus júgiter praestet esse inténtos. Per Dóminum.



MISSAE PRO ALIQUIBUS LOCIS

Die 24 Maji

B. MARIAE VIRGINIS

TITULO

AUXILIUM CHRISTIANORUM


Introitus Sedulius
SALVE, sancta parens, eníxa puérpera Regem: qui caelum terrámque regit in saécula saeculórum. (T. P. Allelúja, allelúja.) Ps. 44, 2 Eructávit cor meum verbum bonum: dico ego ópera mea Regi. V/. Glória Patri.


Oratio


OMNÍPOTENS et miséricors Deus, qui ad defensiónem pópuli christiáni in beatíssima Vírgine María perpétuum auxílium mirabíliter constituísti: concéde propítius ; ut, tali praesídio muníti certántes in vita, victóriam de hoste malígno cónsequi valeámus in morte. Per Dóminum.


Léctio libri Sapiéntiae.

Eccli. 24, 14-16


AB inítio et ante saécula creáta sum, et usque ad futúrum saéculum non désinam, et in habitatióne sancta coram ipso ministrávi. Et sic in Sion firmáta sum, et in civitáte sanctificáta simíliter requiévi, et in Jerúsalem potéstas mea. Et radicávi in pópulo honorificáto, et in parte Dei mei heréditas illíus, et in plenitúdine sanctórum deténtio mea.


Graduale Benedícta et venerábilis es, Virgo María, quae sine tactu pudóris invénta es mater Salvatóris. V/. Virgo Dei Génitrix, quem totus non capit orbis, in tua se clausit víscera factus homo.
Allelúja , allelúja. V/. Post partum, Virgo, invioláta permansísti: Dei Génitrix, intercéde pro nobis. Allelúja.



Tempore Adventus, loco Versus praecedentis, dicitur:

Allelúja, allelúja. V/. Luc. 1, 28 Ave, María, grátia plena: Dóminus tecum: benedícta tu in muliéribus. Allelúja.

Post Septuagesimam, omissis Allelúja et Versu sequenti, dicitur

Tractus Gaude, María Virgo, cunctas haéreses sola interemísti. V/. Quae Gabriélis Archángeli dictis credidísti. V/. Dum Virgo Deum et hóminem genuísti: et post partum, Virgo, invioláta permansísti. V/. Dei Génitrix, intercéde pro nobis.

Tempore autem Paschali omittitur Graduale, et ejus loco dicitur:


Allelúja, allelúja. V/. Num. 17, 8 Virga Jesse flóruit: Virgo Deum et hóminem génuit: pacem Deus réddidit, in se reconcílians ima summis. Allelúja. V/. Luc. 1, 28 Ave, María, grátia plena: Dóminus tecum: benedícta tu in muliéribus. Allelúja.



+ Sequéntia sancti Evangélii secúndum Lucam.

Luc. 11, 27-28


IN illo témpore: Loquénte Jesu ad turbas, extóllens vocem quaedam múlier de turba, dixit illi: Beátus venter, qui te portávit, et úbera, quae suxísti. At ille dixit: Quinímmo beáti, qui áudiunt verbum Dei, et custódiunt illud.


Credo.


Offertorium Luc. 1, 28 et 42 Ave, María, grátia plena: Dóminus tecum: benedícta tu in muliéribus, et benedíctus fructus ventris tui . (T. P. Allelúja.)


Secreta


PRO religiónis christiánae triúmpho hóstias placatiónis tibi, Dómine, immolámus: quae, ut nobis profíciant, opem auxiliátrix Virgo praestet ; per quam talis perfécta est victória. Per Dóminum.


Praefatio de beata Maria Virgine Et te in Festivitáte.


Communio Beáta víscera Maríae Vírginis, quae portavérunt aetérni Patris Fílium. (T. P. Allelúja.)


Postcommunio


ADÉSTO, Dómine, pópulis, qui participatióne córporis et sánguinis tui reficiúntur: ut, sanctíssima tua Genitríce auxiliánte, ab omni malo et perículo liberéntur, et in omni ópere bono custodiántur: Qui vivis.



MISSAE PRO ALIQUIBUS LOCIS

Die 30 Maji

S. FERDINANDI

Regis, Confessoris



Missa Justus, de Communi Confessoris non Pontificis 2 loco, praeter Orationem sequentem.


Oratio
P


DEUS, qui beáto Confessóri tuo Ferdinándo praeliári praélia tua et fídei inimícos superáre dedísti: concéde ; ut, ejus nos intercessióne muníti, ab hóstibus mentis et córporis liberémur. Per Dóminum.


Secreta
C


PRAESTA nobis, quaésumus, omnípotens Deus: ut nostrae humilitátis oblátio, et pro tuórum tibi grata sit honóre Sanctórum, et nos córpore páriter et mente puríficet. Per Dóminum.


Postcommunio
C


QUSUMUS, omnípotens Deus: ut, qui caeléstia aliménta percépimus, intercedénte beáto Ferdinándo Confessóre tuo, per haec contra ómnia advérsa muniámur. Per Dóminum.



MISSAE PRO ALIQUIBUS LOCIS

Die 30 Maji

S. JOANNAE DE ARC

Virginis



Introitus Exodi 15, 1 et 2
CANTÉMUS Dómino: glorióse enim magnificátus est. Fortitúdo mea et laus mea Dóminus, et factus est mihi in salútem. (T. P. Allelúja, allelúja.) Ps. 97, 1 Cantáte Dómino cánticum novum, quia mirabília fecit. V/. Glória Patri.


Oratio


DEUS, qui beátam Joánnam Vírginem ad fidem ac pátriam tuéndam mirabíliter suscitásti: da, quaésumus, ejus intercessióne ; ut Ecclésia tua, hóstium superátis insídiis, perpétua pace fruátur. Per Dóminum.


Léctio libri Sapiéntiae.

Sap. 8, 9-15


PROPÓSUI sapiéntiam addúcere mihi ad convivéndum: sciens quóniam mecum communicábit de bonis, et erit allocútio cogitatiónis et taédii mei. Habébo, propter hanc, claritátem ad turbas, et honórem apud senióres júvenis: et acútus invéniar in judício, et in conspéctu poténtium admirábilis ero, et fácies príncipum mirabúntur me: tacéntem me sustinébunt, et loquéntem me respícient, et sermocinánte me plura, manus ori suo impónent. Praetérea habébo, per hanc, immortalitátem: et memóriam aetérnam his, qui post me futúri sunt, relínquam. Dispónam pópulos: et natiónes mihi erunt súbditae. Timébunt me audiéntes reges horréndi: in multitúdine vidébor bonus, et in bello fortis.


Graduale Judic. 5, 8-11 Nova bella elégit Dóminus, et portas hóstium ipse subvértit. V/. Ubi collísi sunt currus, et hóstium suffocátus est exércitus, ibi narréntur justítiae Dómini, et cleméntia ejus in fortes Israël.
Allelúja , allelúja. V/. Judith 13, 17-18 Laudáte Dóminum Deum nostrum, qui non deséruit sperántes in se, et in me ancílla sua adimplévit misericórdiam suam, quam promísit dómui Israël. Allelúja.



Post Septuagesimam, omissis Allelúja et Versu sequenti, dicitur

Tractus V/. Judith 6, 15 Benedíctus es, Dómine, qui non derelínquis praesuméntes de te: et praesuméntes de se, et de sua virtúte gloriántes, humílias. V/. 2 Machab. 1, 5 Exaudívit Dóminus oratiónem puéllae suae, qua orávit pro nobis, ut reconciliétur nobíscum Deus. V/. Judith 15, 11 ; 8, 29 Fecísti viríliter, et confortátum est cor tuum: manus Dómini confortávit te, et ídeo eris benedícta in aetérnum. V/. Nunc ergo ora pro nobis, quóniam múlier sancta es, et timens Deum.

Tempore autem Paschali omittitur Graduale, et ejus loco dicitur:


Allelúja, allelúja. V/. Judith 15, 11 Fecísti viríliter, et confortátum est cor tuum: manus Dómini confortávit te, et ídeo eris benedícta in aetérnum. Allelúja. V/. Ibid. 8, 29 Nunc ergo ora pro nobis, quóniam múlier sancta es, et timens Deum. Allelúja.



+ Sequéntia sancti Evangélii secúndum Matthaéum.

Matth. 16, 24-27


IN illo témpore: Dixit Jesus discípulis suis: Si quis vult post me veníre, ábneget semetípsum, et tollat crucem suam, et sequátur me. Qui enim volúerit ánimam suam salvam fácere, perdet eam: qui autem perdíderit ánimam suam propter me, invéniet eam. Quid enim prodest hómini, si mundum univérsum lucrétur, ánimae vero suae detriméntum patiátur ? Aut quam dabit homo commutatiónem pro ánima sua ? Fílius enim hóminis ventúrus est in glória Patris sui cum Angelis suis: et tunc reddet unicuíque secúndum ópera ejus.


Offertorium Judith 15, 10 Benedixérunt eam omnes una voce, dicéntes: Tu glória Jerúsalem, tu laetítia Israël, tu honorificéntia pópuli nostri. (T. P. Allelúja.)


Secreta


HAEC hóstia salutáris, Dómine, illam nobis in rebus árduis cónferat fortitúdinem, cujus beáta Joánna, sub tanta discríminum varietáte, tam insígnia praébuit exémpla: ut, ad inimícos repelléndos, étiam belli perícula subíre non dubitáverit. Per Dóminum.


Communio Ps. 22, 4 Si ambulávero in médio umbrae mortis, non timébo mala, quóniam tu mecum es, Dómine Jesu. (T. P. Allelúja.)


Postcommunio


CAELÉSTI pane reféctos, qui tóties beátam Joánnam áluit ad victóriam: praesta, quaésumus, omnípotens Deus ; ut hoc salútis aliméntum de inimícis nostris victóres nos effíciat. Per Dóminum.



MISSAE PRO ALIQUIBUS LOCIS

Die 31 Maji

B. MARIAE VIRGINIS

REGINAE SANCTORUM OMNIUM

ET MATRIS PULCHRAE DILECTIONIS


Introitus
EGREDÍMINI et vidéte, fíliae Sion, Regínam vestram, quam laudant astra matutína: cujus pulchritúdinem sol et luna mirántur, et júbilant omnes fílii Dei. (T. P. Allelúja, allelúja.) Ps. 83, 2-3 Quam dilécta tabernácula tua, Dómine virtútum ! concupíscit, et déficit ánima mea in átria Dómini. V/. Glória Patri.


Oratio


DEUS, qui beatíssimam Vírginem Maríam, ómnium Sanctórum Regínam, et Matrem pulchrae dilectiónis, nos venerári tribuísti: concéde propítius ; ut, ipsa protegénte, te in ómnibus et super ómnia diligámus in terris, et Sanctórum tuórum felíci consórtio perfruámur in caelis. Per Dóminum.


Léctio libri Sapiéntiae.

Eccli. 24, 22-31


EGO quasi terebínthus exténdi ramos meos, et rami mei honóris et grátiae. Ego quasi vitis fructificávi suavitátem odóris: et flores mei, fructus honóris et honestátis. Ego mater pulchrae dilectiónis, et timóris, et agnitiónis, et sanctae spei. In me grátia omnis viae et veritátis: in me omnis spes vitae et virtútis. Transíte ad me, omnes qui concupíscitis me, et a generatiónibus meis implémini. Spíritus enim meus super mel dulcis, et heréditas mea super mel et favum. Memória mea in generatiónes saeculórum. Qui edunt me, adhuc esúrient: et qui bibunt me, adhuc sítient. Qui audit me, non confundétur: et qui operántur in me, non peccábunt. Qui elúcidant me, vitam aetérnam habébunt.


Graduale 1 Machab. 6, 14-15 Praepósuit eam Dóminus super univérsum regnum suum, et dedit ei diadéma, ut fílium suum nutríret, et regnáret. V/. Eccli. 45, 14 Coróna áurea super caput ejus, expréssa signo sanctitátis, glória honóris, et opus fortitúdinis.
Allelúja, allelúja. V/. Cant. 5, 1 ; 4, 11 Veni, Regína nostra, veni, Dómina, in hortum tuum. Odor vestimentórum tuórum super ómnia arómata. Allelúja.



Post Septuagesimam, omissis Allelúja et Versu sequenti, dicitur

Tractus Cant. 5, 1 ; 4, 11 Veni, Regína nostra, veni, Dómina, in hortum tuum. V/. Favus distíllans lábia tua, mel et lac sub lingua tua. V/. Et odor vestimentórum tuórum sicut odor thuris.

Tempore autem Paschali omittitur Graduale, et ejus loco dicitur:


Allelúja, allelúja. V/. Cant. 2, 14 Osténde mihi fáciem tuam, sonet vox tua in áuribus meis: vox enim tua dulcis, et fácies tua decóra. Allelúja. V/. Ibid. 4, 11 Favus distíllans lábia tua, mel et lac sub lingua tua, et odor vestimentórum tuórum sicut odor thuris. Allelúja.



+ Sequéntia sancti Evangélii secúndum Joánnem.

Joann. 19, 25-27


IN illo témpore: Stabant juxta crucem Jesu mater ejus, et soror matris ejus María Cléophae, et María Magdaléne. Cum vidísset ergo Jesus matrem, et discípulum stantem, quem diligébat, dicit matri suae: Múlier, ecce fílius tuus. Deínde dicit discípulo: Ecce mater tua. Et ex illa hora accépit eam discípulus in sua.


Credo.


Offertorium Prov. 9, 4-5 Si quis est párvulus, véniat ad me, et insipiéntibus locúta est: Veníte, comédite panem meum, et bíbite vinum quod míscui vobis, allelúja.


Secreta


LAUDIS tibi, Dómine, hóstias immolámus, de Genitrícis Fílii tui glória laetántes: cujus suffúlti praesídio, et praeséntibus éxui malis confídimus, et futúris. Per eúmdem Dóminum.


Praefatio de beata Maria Virgine Et te in Festivitáte.


Communio Regína mundi digníssima, María Virgo perpétua, intercéde pro nostra pace et salúte, quae genuísti Christum Dóminum Salvatórem ómnium. (T. P. Allelúja.)


Postcommunio


CAELÉSTIBUS pasti delíciis, te súpplices deprecámur, Dómine Deus noster: ut sicut nobis beatíssima Fílii tui Genitríce tutélam et praesídium constituísti ; ita ejus solémnia celebrántibus aetérnae glóriae corónam retríbuas. Per eúmdem Dóminum.



MISSAE PRO ALIQUIBUS LOCIS

Eadem die 31 Maji

B. MARIAE VIRGINIS

OMNIUM GRATIARUM MEDIATRICIS


Introitus Hebr. 4, 16
ADEÁMUS cum fidúcia ad thronum grátiae, ut misericórdiam consequámur, et grátiam inveniámus in auxílio opportúno. (T. P. Allelúja, allelúja.) Ps. 120, 1 Levávi óculos meos in montes: unde véniet auxílium mihi. V/. Glória Patri.


Oratio


DÓMINE Jesu Christe, noster apud Patrem mediátor, qui beatíssimam Vírginem matrem tuam, matrem quoque nostram et apud te mediatrícem constitúere dignátus es: concéde propítius ; ut quisquis ad te benefícia petitúrus accésserit, cuncta se per eam impetrásse laetétur: Qui vivis et regnas cum eódem Deo Patre.


Léctio Isaíae Prophétae.

Isai. 55, 1-3 et 5


OMNES sitiéntes, veníte ad aquas: et qui non habétis argéntum, properáte, émite et comédite: veníte, émite absque argénto et absque ulla commutatióne vinum et lac. Quare appénditis argéntum non in pánibus, et labórem vestrum non in saturitáte ? audíte, audiéntes me, et comédite bonum, et delectábitur in crassitúdine ánima vestra. Inclináte aurem vestram, et veníte ad me: audíte, et vivet ánima vestra. Ecce gentem, quam nesciébas, vocábis: et gentes, quae te non cognovérunt, ad te current propter Dóminum Deum tuum, et Sanctum Israël, quia glorificávit te.


Graduale Eccli. 24, 25-26 In me grátia omnis viae et veritátis, in me omnis spes vitae et virtútis. V/. Transíte ad me, omnes qui concupíscitis me, et a generatiónibus meis implémini.
Allelúja, allelúja. V/. Salve, Mater misericórdiae, Mater spei et grátiae, o María. Allelúja.



Post Septuagesimam, omissis Allelúja et Versu sequenti, dicitur

Tractus Ap. 22, 16-17 Ego sum radix et genus David, stella pléndida et matutína. V/. Et spíritus et sponsa dicunt: Veni. Et qui audit, dicat: Veni. V/. Et qui sitit, véniat ; et qui vult, accípiat aquam vitae gratis.

Tempore autem Paschali omittitur Graduale, et ejus loco dicitur:


Allelúja, allelúja. V/. Isai. 60, 4 Leva in circúitu óculos tuos, et vide: omnes isti congregáti sunt, venérunt tibi. Allelúja. V/. Fílii tui de longe vénient, et fíliae tuae de látere surgent. Allelúja.



+ Sequéntia sancti Evangélii secúndum Joánnem.

Joann. 19, 25-27


IN illo témpore: Stabant juxta crucem Jesu mater ejus, et soror matris ejus María Cléophae, et María Magdaléne. Cum vidísset ergo Jesus matrem, et discípulum stantem, quem diligébat, dicit matri suae: Múlier, ecce fílius tuus. Deínde dicit discípulo: Ecce mater tua. Et ex illa hora accépit eam discípulus in sua.


Credo.


Offertorium Jerem. 18, 20 Recordáre, Virgo Mater, in conspéctu Dei, ut loquáris pro nobis bona, et ut avértat indignatiónem suam a nobis. (T. P. Allelúja.)


Secreta


MATRIS tuae ac mediatrícis nostrae précibus, Dómine, quaésumus: haec hostiárum oblátio nosmetípsos, tua grátia largiénte, tibi perfíciat munus aetérnum: Qui vivis.


Praefatio de beata Maria Virgine Et te in Festivitáte.


Communio Esther 15, 17 Valde mirábilis es, o María, et fácies tua plena est gratiárum. (T. P. Allelúja.)


Postcommunio


SUBVÉNIAT nobis, Dómine, beátae Maríae Matris tuae ac nostrae mediatrícis orátio: ut per haec sacrosáncta commércia, tua grátia largiénte, ad redemptiónis aetérnae proficiámus augméntum: Qui vivis.



MISSAE PRO ALIQUIBUS LOCIS

Eadem die 31 Maji

B. MARIAE VIRGINIS

DOMINAE NOSTRAE A S. CORDE JESU


Introitus Ps. 9, 3 et 11
LAETÁBOR et exsultábo in te: sperent in te qui novérunt nomen tuum, quóniam non derelínquis quaeréntes te. (T. P. Allelúja, allelúja.) Ps. ibid., 2 Confitébor tibi, Dómine, in toto corde meo: narrábo ómnia mirabília tua. V/. Glória Patri.


Oratio


DÓMINE Jesu Christe, qui beáta María Vírgine intercedénte, in nos divítias Cordis tui dignáris effúndere: concéde, quaésumus ; ut, quod in ejúsdem Vírginis veneratióne depóscimus, te propitiánte cónsequi mereámur: Qui vivis.


Léctio libri Sapiéntiae.

Eccli. 24, 23-31


EGO quasi vitis fructificávi suavitátem odóris: et flores mei, fructus honóris et honestátis. Ego mater pulchrae dilectiónis, et timóris, et agnitiónis, et sanctae spei. In me grátia omnis viae et veritátis: in me omnis spes vitae et virtútis. Transíte ad me, omnes qui concupíscitis me, et a generatiónibus meis implémini. Spíritus enim meus super mel dulcis, et heréditas mea super mel et favum. Memória mea in generatiónes saeculórum. Qui edunt me, adhuc esúrient: et qui bibunt me, adhuc sítient. Qui audit me, non confundétur: et qui operántur in me, non peccábunt. Qui elúcidant me, vitam aetérnam habébunt.


Graduale Benedícta et venerábilis es, Virgo María: quae sine tactu pudóris invénta es mater Salvatóris. V/. Virgo Dei Génitrix, quem totus non capit orbis, in tua se clausit víscera factus homo.
Allelúja, allelúja. V/. Num. 17, 8 Virga Jesse flóruit: Virgo Deum et hóminem génuit: pacem Deus réddidit, in se reconcílians ima summis. Allelúja.



Post Septuagesimam, omissis Allelúja et Versu sequenti, dicitur

Tractus Luc. 1, 46-50 Magníficat ánima mea Dóminum: et exsultávit spíritus meus in Deo salutári meo. V/. Quia respéxit humilitátem ancíllae suae: ecce enim ex hoc beátam me dicent omnes generatiónes. V/. Quia fecit mihi magna qui potens est: et sanctum nomen ejus. V/. Et misericórdia ejus a progénie in progénies timéntibus eum.

Tempore autem Paschali omittitur Graduale, et ejus loco dicitur:


Allelúja, allelúja. V/. Num. 17, 8 Virga Jesse flóruit: Virgo Deum et hóminem génuit: pacem Deus réddidit, in se reconcílians ima summis. Allelúja. V/. Luc. 1, 28 Ave, María, grátia plena: Dóminus tecum: benedícta tu in muliéribus. Allelúja.



+ Sequéntia sancti Evangélii secúndum Joánnem.

Joann. 2, 1-11


IN illo témpore: Núptiae factae sunt in Cana Galilaéae: et erat mater Jesu ibi. Vocátus est autem et Jesus, et discípuli ejus ad núptias. Et deficiénte vino, dicit mater Jesu ad eum: Vinum non habent. Et dicit ei Jesus: Quid mihi et tibi est, múlier ? nondum venit hora mea. Dicit mater ejus minístris: Quodcúmque díxerit vobis, fácite. Erant autem ibi lapídeae hýdriae sex pósitae secúndum purificatiónem Judaeórum, capiéntes síngulae metrétas binas vel ternas. Dicit eis Jesus: Impléte hýdrias aqua. Et implevérunt eas usque ad summum. Et dicit eis Jesus: Hauríte nunc, et ferte architriclíno. Et tulérunt. Ut autem gustávit architriclínus aquam vinum factam, et non sciébat unde esset, minístri autem sciébant, qui háuserant aquam: vocat sponsum architriclínus, et dicit ei: Omnis homo primum bonum vinum ponit: et cum inebriáti fúerint, tunc id, quod detérius est. Tu autem servásti bonum vinum usque adhuc. Hoc fecit inítium signórum Jesus in Cana Galilaéae: et manifestávit glóriam suam, et credidérunt in eum discípuli ejus.


Credo.


Offertorium Jerem. 18, 20 Recordáre, Virgo Mater Dei, dum stéteris in conspéctu Dómini, ut loquáris pro nobis bona. (T. P. Allelúja.)


Secreta


INTERCÉSSIO, quaésumus, Dómine, beátae Maríae semper Vírginis múnera nostra comméndet: nosque in ejus veneratióne sacratíssimo unigéniti Fílii tui Cordi reddat accéptos: Qui tecum vivit.


Praefatio de beata Maria Virgine Et te in Festivitáte.


Communio Eccli. 24, 25 In me grátia omnis viae et veritátis, in me omnis spes vitae et virtútis. (T. P. Allelúja.)


Postcommunio


COGNÓSCIMUS, Dómine Jesu, tuae circa nos cleméntiae largitátem: et ídeo, beáta María Vírgine apud Cor tuum intercedénte, fiduciálius exorámus ; ut, quos páscere non désinis imméritos, et digne tibi servíre perfícias et donis uberióribus prosequáris: Qui vivis.



Missale Romanum 1957 - S. ISIDORI AGRICOLAE