Missale 1962 742

Sabbato

III classis

Statio ad S. Nicolaum in Carcere


§ Missa, in qua hoc sabbato Ordines conferuntur, dicenda est de sabbato, etiam festo I vel II classis occurrente, et in ea additur oratio ritualis «In collatione Ordinum» sub unica conclusione cum oratione Missae, et omittuntur omnes commemorationes, nisi sint privilegiatae.

Ant. ad Introitum Isai. 55,1
743 Sitientes, venite ad aquas, dicit Dóminus: et qui non habetis pretium, venite, et bibite cum laetítia. Ps. 77,1 Attendite, popule meus, legem meam: inclinate aurem vestram in verba oris mei. V. Glória Patri.

Oratio
744 Fiat, Domine, quaesumus, per grátiam tuam fructuosus nostrae devotionis affectus: quia tunc nobis proderunt suscepta ieiunia, si tuae sint placita pietati. Per Dóminum.

Léctio Isaiae Prophetae. Isai. 49, 8-15
745 Haec dicit Dóminus: In témpore placito exaudivi te, et in die salutis auxiliatus sum tui: et servavi te, et dedi te in foedus populi, ut suscitares terram, et possideres hereditates dissipatas: ut diceres his, qui vincti sunt: Exite: et his, qui in tenebris: Revelamini. Super vias pascentur, et in omnibus planis páscua eórum. Non esurient, neque sitient, et non percutiet eos aestus et sol: quia miserator eórum reget eos, et ad fontes aquarum potabit eos. Et ponam omnes montes meos in viam, et sémitae meae exaltabuntur. Ecce isti de longe venient, et ecce illi ab aquilone et mari, et isti de terra australi. Laudate, caeli, et exsulta, terra, iubilate, montes, laudem: quia consolatus est Dóminus populum suum, et pauperum suorum miserebitur. Et dixit Sion: Dereliquit me Dóminus, et Dóminus oblitus est mei. Numquid oblivisci potest mulier infantem suum, ut non misereatur filio úteri sui? et si illa oblita fuerit, ego tamen non obliviscar tui, dicit Dóminus omnípotens.

Graduale Ps. 9, 14 et 1-2
746 Tibi, Domine, derelictus est pauper: pupillo tu eris adiutor. V. Ut quid, Domine, recessisti longe, déspicis in opportunitatibus, in tribulatione? dum superbit impius, incenditur pauper.

+ Sequentia sancti Evangelii secúndum Ioannem. Io. 8, 12-20
747 In illo témpore: Locútus est Iesus turbis Iudaeórum, dicens: Ego sum lux mundi: qui sequitur me, non ambulat in tenebris, sed habebit lumen vitae. Dixerunt ergo ei pharisaei: Tu de te ipso testimonium perhibes: testimonium tuum non est verum. Respondit Iesus, et dixit eis: Et si ego testimonium perhibeo de meípso, verum est testimonium meum: quia scio unde veni, et quo vado: vos autem nescitis unde venio, aut quo vado. Vos secúndum carnem iudicatis: ego non iudico quemquam: et si iudico ego, iudicium meum verum est, quia solus non sum: sed ego, et qui misit me, Pater. Et in lege vestra scriptum est, quia duorum hominum testimonium verum est. Ego sum, qui testimonium perhibeo de meipso : et testimonium perhibet de me, qui misit me, Pater. Dicebant ergo ei: Ubi est Pater tuus? Respondit Iesus: Neque me scitis, neque Patrem meum: si me sciretis, forsitan et Patrem meum sciretis. Haec verba locútus est Iesus in gazophylacio, docens in templo: et nemo apprehendit eum, quia necdum venerat hora eius.

Ant. ad Offertorium Ps. 17, 3
748 Factus est Dóminus firmamentum meum, et refugium meum, et liberator meus: et sperabo in eum.

Secreta
749 Oblationibus nostris, quaesumus, Domine, placare susceptis: et ad te nostras etiam rebelles compelle propitius voluntates. Per Dóminum.
Praefatio de Quadragesima.

Ant. ad Communionem      Ps. 22, 1-2
750 Dóminus regit me, et nihil mihi deerit: in loco páscuae ibi me collocavit: super aquam refectionis educavit me.

Postcommunio
751 Tua nos, quaesumus, Domine, sancta puríficent: et operatione sua tibi placitos esse perficiant. Per Dóminum.

Super populum: Oremus. Humiliáte capita vestra Deo.

Oratio
752 Deus, qui sperantibus in te misereri potius éligis, quam irasci: da nobis digne flere mala, quae fecimus; ut tuae consolationis gratiam invenire mereamur. Per Dóminum.

§ Expleta Missa, cooperiuntur cruces et imagines per ecclesiam ; quae coopertae manent, cruces quidem usque ad expletam per celebrantem Crucis adorationem in feria VI in Passione et Morte Domini, imagines vero usque ad intonatum hymnum angelicum in Missa Vigiliae paschalis.


TEMPUS PASSIONIS

DOMINICA I PASSIONIS

I classis


§ Ab hac dominica usque ad feriam V in Cena Domini inclusive, in Missis de Tempore non dicitur psalmus Iudica ante confessionem, neque Glória Patri ad antiphonam ad Introitum et post psalmum Lavabo.

Statio ad S. Petrum



Ant. ad Introitum Ps. 42, 1-2
754 Iúdica me, Deus, et discerne causam meam de gente non sancta: ab homine iniquo et doloso éripe me: quia tu es Deus meus, et fortitudo mea. Ps. ibid., 3 Emitte lucem tuam et veritatem tuam: ipsa me deduxerunt, et adduxerunt in montem sanctum tuum, et in tabernacula tua. Iudica me.

Oratio

Quaesumus, omnípotens Deus, familiam tuam propitius respice: ut, te largiente, regatur in corpore ; et, te servante, custodiatur in mente. Per Dóminum nostrum.

Léctio Epistolae beáti Pauli Apostoli ad Hebraeos. Hebr. 9, 11-15
755 Fratres: Christus assistens pontifex futurorum bonorum, per amplius et perfectius tabernaculum non manufactum, id est, non huius creationis: neque per sanguinem hircorum aut vitulorum, sed per proprium sanguinem introivit semel in Sancta, aeterna redemptione inventa. Si enim sanguis hircorum et taurorum, et cinis vítulae aspersus, inquinatos sanctificat ad emundationem carnis; quanto magis sanguis Christi, qui per Spiritum Sanctum semetipsum obtulit immaculatum Deo, emundabit conscientiam nostram ab operibus mortuis, ad serviendum Deo viventi? Et ídeo novi testamenti mediator est: ut morte intercedente, in redemptionem earum praevaricatiónum, quae erant sub priori testamento, repromissionem accipiant, qui vocati sunt aetérnae hereditatis, in Christo Iesu Domino nostro.

Graduale Ps. 142, 9 et 10
756 Eripe me, Domine, de inimicis meis: doce me facere voluntatem tuam. V. Ps. 17,48-49 Liberator meus, Domine, de gentibus iracundis: ab insurgentibus in me exaltabis me: a viro iniquo erípies me.

Tractus Ps. 128, 1-4
757 Saepe expugnaverunt me a iuventute mea. V. Dicat nunc Israel: saepe expugnaverunt me a iuventute mea. V. Etenim non potuerunt mihi: supra dorsum meum fabricavérunt peccatores. V. Prolongaverunt iniquitates suas: Dóminus iustus concidit cervices peccatorum.

+ Sequentia sancti Evangelii secúndum Ioannem. 10.8,46-59
758 In illo témpore: Dicebat Iesus turbis Iudaeórum: Quis ex vobis arguet me de peccato ? Si veritatem dico vobis, quare non creditis mihi? Qui ex Deo est, verba Dei audit. Propterea vos non auditis, quia ex Deo non estis. Responderunt ergo Iudaei, et dixerunt ei: Nonne bene dicimus nos, quia Samaritanus es tu, et daemónium habes? Respondit Iesus: Ego daemónium non habeo, sed honorifico Patrem meum, et vos inhonorástis me. Ego autem non quaero gloriam meam: est qui quaerat, et iudicet. Amen, amen dico vobis: si quis sermonem meum servaverit, mortem non videbit in aetérnum. Dixerunt ergo Iudaei: Nunc cognovimus quia daemónium habes. Abraham mortuus est, et prophetae: et tu dicis: Si quis sermonem meum servaverit, non gustabit mortem in aetérnum. Numquid tu maior es patre nostro Abraham, qui mortuus est? et prophetae mortui sunt. Quem teipsum facis? Respondit Iesus: Si ego glorifico meipsum, glória mea nihil est: est Pater meus, qui glorificat me, quem vos dicitis quia Deus vester est, et non cognovistis eum: ego autem novi eum: et si dixero, quia non scio eum, ero similis vobis, mendax. Sed scio eum, et sermonem eius servo. Abraham pater vester exsultavit, ut videret diem meum: vidit, et gavisus est. Dixerunt ergo Iudaei ad eum: Quinquaginta annos nondum habes, et Abraham vidisti? Dixit eis Iesus: Amen, amen dico vobis, antequam Abraham fíeret, ego sum. Tulerunt ergo lapides, ut iacerent in eum: Iesus autem abscondit se, et exivit de templo. Credo.

Antiphona ad Offertorium Ps. no, i et 118, 17, 107
759 Confitebor tibi, Domine, in toto corde meo: retribue servo tuo: vivam, et custodiam sermones tuos: vivifica me secúndum verbum tuum, Domine.

Secreta
760 Haec munera, quaesumus, Domine, et vincula nostrae pravitátis absolvant, et tuae nobis misericordiae dona concílient. Per Dóminum.

§ Praefatio de sancta Cruce, quae dicitur tamquam propria in Missis de Tempore a dominica I Passionis usque ad feriam V in Cena Domini ; et tamquam de Tempore in omnibus Missis a dominica I Passionis usque ad feriam IV Hebdomadae sanctae, quae praefatione propria carent.

Antiphona ad Communionem 1 Cor. n, 24 et 25
761 Hoc corpus, quod pro vobis tradetur: hic calix novi testamenti est in meo sanguine, dicit Dóminus: hoc facite, quotiescumque súmitis, in meam commemorationem.

Postcommunio
762 Adésto nobis, Domine Deus noster: et quos tuis mysteriis recreásti, perpetuis defénde subsidiis. Per Dóminum.

Feria secunda

III classis

Statio ad S. Chrysogonum


Ant. ad Introitum Ps. 55, 2
763 Miserére mihi, Domine, quoniam conculcavit me homo: tota die bellans tribulávit me. Ps. ibid., 3 Conculcaverunt me inimici mei tota die: quoniam multi bellantes adversum me. Miserere mihi.

Oratio
764 Sanctifica, quaesumus, Domine, nostra ieiunia: et cunctarum nobis indulgentiam propitius largire culparum. Per Dóminum.

Léctio Ionae Prophetae. Ionae 3, 1-10
765 In diebus illis : Factum est verbum Dómini ad Ionam prophetam secundo, dicens: Surge, et vade in Níniven civitatem magnam: et praedica in ea praedicationem, quam ego loquor ad te. Et surrexit Ionas, et abiit in Níniven iuxta verbum Dómini. Et Nínive erat civitas magna itinere trium dierum. Et coepit Ionas introire in civitatem itinere diei unius: et clamavit, et dixit: Adhuc quadraginta dies, et Nínive subvertetur. Et crediderunt viri Ninivítae in Deum: et praedicaverunt ieiunium, et vestiti sunt saccis a maiore usque ad minorem. Et pervenit verbum ad regem Nínive: et surrexit de sólio suo, et abiecit vestimentum suum a se, et indutus est sacco, et sedit in cinere. Et clamavit, et dixit in Nínive ex ore regis et principum eius, dicens: Homines et iumenta, et boves, et pecora non gustent quidquam: nec pascantur, et aquam non bibant. Et operiantur saccis homines, et iumenta, et clament ad Dóminum in fortitudine, et convertatur vir a via sua mala et ab iniquitate, quae est in manibus eórum. Quis scit, si convertatur et ignoscat Deus: et revertatur a furore irae suae, et non peribimus? Et vidit Deus opera eórum, quia conversi sunt de via sua mala: et misertus est populo suo Dóminus Deus noster.

Graduale Ps. 53, 4 et 3
766 Deus, exaudi orationem meam: auribus percipe verba oris mei. V. Deus, in nomine tuo salvum me fac, et in virtute tua libera me.

Tractus Ps. 102, 10
767 Domine, non secúndum peccata nostra, quae fecimus nos: neque secúndum iniquitates nostras retríbuas nobis. V. Ps. 78,8-9 Domine, ne memineris iniquitatum nostrarum antiquarum: cito anticipent nos misericordiae tuae, quia pauperes facti sumus nimis. (Hic genuflectitur) V. Adiuva nos, Deus salutaris noster: et propter gloriam nominis tui, Domine, libera nos: et propitius esto peccatis nostris, propter nomen tuum.

+ Sequentia sancti Evangelii secúndum Ioannem. Io. 7, 32-39
768 In illo témpore: Miserunt principes et pharisaei ministros, ut apprehenderent Iesum. Dixit ergo eis Iesus: Adhuc modicum tempus vobiscum sum: et vado ad eum qui me misit. Quaerétis me, et non invenietis: et ubi ego sum, vos non potestis venire. Dixerunt ergo Iudaei ad semetípsos: Quo hic iturus est, quia non inveniemus eum? numquid in dispersionem gentium iturus est, et docturus gentes? Quis est hic sermo, quem dixit: Quaerétis me, et non invenietis: et ubi sum ego, vos non potestis venire ? In novissimo autem die magno festivitatis stabat Iesus, et clamabat, dicens: Si quis sitit, veniat ad me et bibat. Qui credit in me, sicut dicit Scriptura, flumina de ventre eius fluent aquae vivae. Hoc autem dixit de Spiritu, quem accepturi erant credentes in eum.

Ant. ad Offertorium Ps. 6, 5
769 Domine, convertere, et éripe ánimam meam: salvum me fac propter misericordiam tuam.

Secreta
770 Concede nobis, Domine Deus noster: ut haec hostia salutaris, et nostrorum fiat purgátio delictorum, et tuae propitiatio maiestatis. Per Dóminum. Praefatio de sancta Cruce.

771 Ant. ad Communionem       Ps. 23, 10

Dóminus virtutum ipse est Rex glóriae.

Postcommunio
772 Sacramenti tui, quaesumus, Domine, participatio salutaris, et purificationem nobis tribuat, et medelam. Per Dóminum nostrum.

Super populum: Oremus. Humiliáte capita vestra Deo.

Oratio
773 Da, quaesumus, Domine, populo tuo salutem mentis et corporis: ut, bonis operibus inhaeréndo, tua semper mereatur protectione deféndi. Per Dóminum nostrum.

Feria tertia

III classis

Statio ad S. Cyriacum


Ant. ad Introitum Ps. 26, 14
774 Exspecta Dóminum, viriliter age: et confortetur cor tuum, et sústine Dóminum. Ps. ibid., 1 Dóminus illuminatio mea, et salus mea: quem timebo? Exspecta Dóminum.

Oratio
775 Nostra tibi, Domine, quaesumus, sint accepta ieiunia : quae nos et expiando gratia tua dignos efficiant ; et ad remedia perducant aeterna. Per Dóminum.

Léctio Danielis Prophetae. Dan. 14, 27 et 28-42
776 In diebus illis: Congregati sunt Babylónii ad regem, et dixerunt ei: Trade nobis Danielem, qui Bel destruxit, et draconem interfecit, alioquin interficiemus te et domum tuam. Vidit ergo rex, quod irruerent in eum vehementer: et necessitate compulsus tradidit eis Danielem. Qui miserunt eum in lacum leonum, et erat ibi diebus sex. Porro in lacu erant leones septem, et dabantur eis duo corpora cotidie, et duae oves: et tunc non data sunt eis, ut devorarent Danielem. Erat autem Habacuc propheta in Iudaea, et ipse coxerat pulmentum, et intriverat panes in alveolo: et ibat in campum, ut ferret messoribus. Dixitque Angelus Dómini ad Habacuc: Fer prandium, quod habes, in Babylonem Danieli, qui est in lacu leonum. Et dixit Habacuc: Domine, Babylonem non vidi, et lacum nescio. Et apprehendit eum Angelus Dómini in vertice eius, et portavit eum capillo capitis sui, posuitque eum in Babylone supra lacum in impetu spiritus sui. Et clamavit Habacuc, dicens: Daniel, serve Dei, tolle prandium, quod misit tibi Deus. Et ait Daniel: Recordatus es mei, Deus, et non dereliquisti diligentes te. Surgensque Daniel comedit. Porro Angelus Dómini restituit Habacuc confestim in loco suo. Venit ergo rex die septimo, ut lugeret Danielem: et venit ad lacum, et introspexit, et ecce Daniel sedens in medio leonum. Et exclamavit voce magna rex, dicens : Magnus es, Domine Deus Danielis. Et extraxit eum de lacu leonum. Porro illos, qui perditionis eius causa fuerant, intromisit in lacum, et devorati sunt in momento coram eo. Tunc rex ait: Paveant omnes habitantes in universa terra Deum Danielis: quia ipse est salvator, faciens signa et mirabilia in terra: qui liberavit Danielem de lacu leonum.

Graduale Ps. 42, 1 et 3
777 Discerne causam meam, Domine: ab homine iniquo, et doloso éripe me. V. Emitte lucem tuam, et veritatem tuam: ipsa me deduxerunt, et adduxerunt in montem sanctum tuum.

+ Sequentia sancti Evangelii secúndum Ioannem. Io. 7, 1-13
778 In illo témpore: Ambulabat Iesus in Galilaeam, non enim volebat in Iudaeam ambulare, quia quaerébant eum Iudaei interficere. Erat autem in proximo dies festus Iudaeórum, Scenopegia. Dixerunt autem ad eum fratres eius: Transi hinc, et vade in Iudaeam, ut et discipuli tui videant opera tua, quae facis. Nemo quippe in occulto quid facit, et quaerit ipse in palam esse: si haec facis, manifesta teipsum mundo. Neque enim fratres eius credebant in eum. Dicit ergo eis Iesus: Tempus meum nondum advenit: tempus autem vestrum semper est paratum. Non potest mundus odisse vos: me autem odit: quia ego testimonium perhibeo de illo, quod opera eius mala sunt. Vos ascendite ad diem festum hunc, ego autem non ascendo ad diem festum istum: quia meum tempus nondum impletum est. Haec cum dixisset, ipse mansit in Galilaea. Ut autem ascenderunt fratres eius, tunc et ipse ascendit ad diem festum non manifeste, sed quasi in occulto. Iudaei ergo quaerébant eum in die festo, et dicebant: Ubi est ille? Et murmur multum erat in turba de eo. Quidam enim dicebant: Quia bonus est. Alii autem dicebant: Non, sed seducit turbas. Nemo tamen palam loquebatur de illo, propter metum Iudaeórum.

Ant. ad Offertorium   Ps. 9, 11-12 et i3
779 Sperent in te omnes, qui noverunt nomen tuum, Domine: quoniam non derelínquis quaeréntes te: psallite Domino, qui habitat in Sion: quoniam non est oblitus oratiónes pauperum.

Secreta
780 Hostias tibi, Domine, deferimus immolándas: quae temporalem consolationem significent ; ut promissa non desperémus aeterna. Per Dóminum. Praefatio de sancta Cruce.

Ant. ad Communionem       Ps. 24, 22
781 Redime me, Deus Israel, ex omnibus angustiis meis.

Postcommunio
782 Da, quaesumus, omnípotens Deus: ut, quae divina sunt, iugiter exsequentes, donis mereamur caeléstibus propinquare. Per Dóminum nostrum Iesum Christum, Fílium tuum: Qui tecum vivit et regnat in unitate.

Super populum: Oremus. Humiliáte capita vestra Deo.

Oratio
783 Da nobis, quaesumus, Domine: perseverántem in tua voluntate famulátum; ut in diebus nostris, et merito et numero, populus tibi serviens augeatur. Per Dóminum.

Feria quarta

III classis

Statio ad S. Marcellum


Ant. ad Introitum Ps. 17, 48-49
784 Liberátor meus de gentibus iracúndis : ab insurgentibus in me exaltabis me : a viro iniquo erípies me, Domine. Ps. ibid., 2-3 Diligam te, Domine, virtus mea: Dóminus firmamentum meum, et refugium meum, et liberator meus. Liberator meus.

Oratio
785 Sanctificato hoc ieiunio, Deus, tuorum corda fidelium miserator illustra: et, quibus devotionis praestas affectum, praebe supplicántibus pium benignus auditum. Per Dóminum.

Léctio libri Levitici. Levit. 19, 1-2, 11-19 et 25
786 In diebus illis: Locútus est Dóminus ad Moysen, dicens: Loquere ad omnem caetum filiorum Israel, et dices ad eos: Ego Dóminus Deus vester. Non facietis furtum. Non mentiemini, nec decipiet unusquisque proximum suum. Non periurabis in nomine meo, nec pollues nomen Dei tui. Ego Dóminus. Non facies calumniam proximo tuo: nec vi opprimes eum. Non morabitur opus mercenárii tui apud te usque mane. Non maledices surdo, nec coram caeco pones offendiculum: sed timebis Dóminum Deum tuum, quia ego sum Dóminus. Non facies quod iniquum est, nec iniuste iudicabis. Non consideres personam pauperis, nec honores vultum potentis. Iuste iudica proximo tuo. Non eris criminator, nec susurro in populo. Non stabis contra sanguinem proximi tui. Ego Dóminus. Non oderis fratrem tuum in corde tuo, sed publice árgue eum, ne habeas super illo peccatum. Non quaeras ultionem, nec memor eris iniuriae civium tuorum. Diliges amicum tuum sicut teipsum. Ego Dóminus. Leges meas custodite. Ego enim sum Dóminus Deus vester.

Graduale Ps. 29, 2-4
787 Exaltabo te, Domine, quoniam suscepisti me: nec delectasti inimicos meos super me. V. Domine Deus meus, clamavi ad te, et sanasti me: Domine, abstraxísti ab inferis animam meam, salvasti me a descendentibus in lacum.

Tractus Ps. 102, 10
788 Domine, non secúndum peccata nostra, quae fecimus nos: neque secúndum iniquitates nostras retríbuas nobis. V. Ps. 78, 8-9 Domine, ne memineris iniquitatum nostrarum antiquarum: cito anticipent nos misericordiae tuae, quia pauperes facti sumus nimis. (Hic genuflectitur) V. Adiuva nos, Deus salutaris noster: et propter gloriam nominis tui, Domine, libera nos: et propitius esto peccatis nostris, propter nomen tuum.

Sequentia sancti Evangelii secúndum Ioannem. Io. 10, 22-38
789 In illo témpore: Facta sunt Encaenia in Ierosolymis: et hiems erat. Et ambulabat Iesus in templo, in porticu Salomonis. Circumdederunt ergo eum Iudaei, et dicebant ei: Quousque animam nostram tollis? Si tu es Christus, dic nobis palam. Respondit eis Iesus: Loquor vobis, et non creditis: Opera, quae ego facio in nomine Patris mei, haec testimonium perhibent de me: sed vos non creditis, quia non estis ex ovibus meis. Oves meae vocem meam audiunt: et ego cognosco eas, et sequuntur me: et ego vitam aeternam do eis : et non peribunt in aetérnum, et non rapiet eas quisquam de manu mea. Pater meus quod dedit mihi, maius omnibus est: et nemo potest rapere de manu Patris mei. Ego et Pater unum sumus. Sustulerunt ergo lapides Iudaei, ut lapidarent eum. Respondit eis Iesus: Multa bona opera ostendi vobis ex Patre meo, propter quod eórum opus me lapidatis? Responderunt ei Iudaei: De bono opere non lapidamus te, sed de blasphemia: et quia tu, homo cum sis, facis teipsum Deum. Respondit eis Iesus: Nonne scriptum est in lege vestra: quia Ego dixi, dii estis? Si illos dixit deos, ad quos sermo Dei factus est, et non potest solvi Scriptura: quem Pater sanctificavit, et misit in mundum, vos dicitis: Quia blasphemas: quia dixi, Filius Dei sum? Si non facio opera Patris mei, nolite credere mihi. Si autem facio, et si mihi non vultis credere, operibus credite, ut cognoscatis, et credatis, quia Pater in me est, et ego in Patre.

790 Ant. ad Offertorium Ps. 58, 2

Eripe me de inimicis meis, Deus meus: et ab insurgentibus in me libera me, Domine.

Secreta

791 Annue, misericors Deus: ut hostias XjL placatiónis et laudis sincero tibi deferamus obsequio. Per Dóminum.

Praefatio de sancta Cruce.

Ant. ad Communionem Ps. 25, 6-7
792 Lavabo inter innocentes manus meas, et circuibo altare tuum, Domine: ut audiam vocem laudis tuae, et enarrem universa mirabilia tua.

Postcommunio
793 Caelestis doni benedictione percepta: Vox supplices te, Deus omnípotens, deprecámur; ut hoc idem nobis et sacramenti causa sit, et salutis. Per Dóminum nostrum Iesum Christum, Fílium tuum: Qui tecum vivit et regnat in unitate.

Super populum: Oremus. Humiliáte capita vestra Deo.

Oratio
794 Adésto supplicationibus nostris, omnípotens Deus: et, quibus fiduciam sperándae pietatis indúlges; consuétae misericordiae tribue benignus effectum. Per Dóminum.

Feria quinta

III classis

Statio ad S. Apollinarem


Ant. ad Introitum Dan. 3, 31
795 Omnia, quae fecisti nobis, Domine, in vero iudicio fecisti: quia peccavimus tibi, et mandatis tuis non oboedivimus: sed da gloriam nomini tuo, et fac nobiscum secúndum multitudinem misericordiae tuae. Ps. 118, 1 Beáti immaculati in via: qui ambulant in lege Dómini. Omnia.

Oratio
796 Praesta, quaesumus, omnípotens Deus : ut dignitas condicionis humanae, per immoderántiam sauciata, medicinális parsimóniae studio reformetur. Per Dóminum nostrum.

Léctio Danielis Prophetae. Dan. 3, 25 et 34-45
797 In diebus illis: Oravit Azarias Dóminum, dicens: Domine Deus noster: ne, quaesumus, tradas nos in perpetuum propter nomen tuum, et ne dissipes testamentum tuum: neque auferas misericordiam tuam a nobis propter Abraham dilectum tuum, et Isaac servum tuum, et Israel sanctum tuum: quibus locútus es, póllicens quod multiplicares semen eórum sicut stellas caeli, et sicut arenam, quae est in líttore maris: quia, Domine, imminuti sumus plus quam omnes gentes, sumusque humiles in universa terra hodie propter peccata nostra. Et non est in témpore hoc princeps, et dux, et propheta, neque holocaustum, neque sacrifícium, neque oblatio, neque incensum, neque locus primitiarum coram te, ut possimus invenire misericordiam tuam: sed in animo contrito, et spiritu humilitatis suscipiamur. Sicut in holocausto arietum et taurorum, et sicut in milibus agnorum pinguium: sic fiat sacrifícium nostrum in conspectu tuo hodie, ut placeat tibi: quoniam non est confusio confidentibus in te. Et nunc sequimur te in toto corde, et timemus te, et quaerimus fáciem tuam. Ne confundas nos : sed fac nobiscum iuxta mansuetudinem tuam, et secúndum multitudinem misericordiae tuae. Et érue nos in mirabilibus tuis, et da gloriam nomini tuo, Domine: et confundantur omnes, qui ostendunt servis tuis mala, confundantur in omni potentia tua: et robur eórum conteratur: et sciant, quia tu es Dóminus Deus solus, et gloriosus super orbem terrarum, Domine Deus noster.

Graduale Ps. 95, 8-9
798 Tollite hostias, et introite in atria eius : adorate Dóminum in aula sancta eius. V. Ps. 28, 9 Revelavit Dóminus condensa: et in templo eius omnes dicent gloriam.

+ Sequentia sancti Evangelii secúndum Lucam. Luc. 7, 36-50
799 In illo témpore : Rogabat Iesum quidam de pharisaeis, ut manducaret cum illo. Et ingressus domum pharisaei, discubuit. Et ecce mulier, quae erat in civitate peccatrix, ut cognovit, quod accubuísset in domo pharisaei, attulit alabastrum unguenti: et stans retro secus pedes eius, lacrimis coepit rigare pedes eius, et capillis capitis sui tergebat, et osculabatur pedes eius, et unguento ungebat. Videns autem pharisaeus, qui vocaverat eum, ait intra se, dicens: Hic si esset propheta, sciret utique, quae et qualis est mulier, quae tangit eum: quia peccatrix est. Et respondens Iesus, dixit ad illum: Simon, habeo tibi aliquid dicere. At ille ait: Magister, dic. Duo debitores erant cuidam foeneratóri: unus debebat denarios quingentos, et alius quinquaginta. Non habentibus illis unde redderent, donavit utrisque. Quis ergo eum plus diligit? Respondens Simon, dixit: AEstimo quia is, cui plus donavit. At ille dixit ei: Recte iudicasti. Et conversus ad mulierem, dixit Simoni: Vides hanc mulierem? Intravi in domum tuam, aquam pedibus meis non dedisti: haec autem lacrimis rigavit pedes meos, et capillis suis tersit. Osculum mihi non dedisti: haec autem, ex quo intravit, non cessavit osculari pedes meos. Oleo caput meum non unxisti: haec autem unguento unxit pedes meos. Propter quod dico tibi: Remittuntur ei peccata multa, quoniam dilexit multum. Cui autem minus dimittitur, minus diligit. Dixit autem ad illam: Remittuntur tibi peccata. Et coepérunt, qui simul accumbebant, dicere intra se: Quis est hic, qui etiam peccata dimittit? Dixit autem ad mulierem: Fides tua te salvam fecit: vade in pace.

Ant. ad Offertorium Ps. 136, 1
800 Super flumina Babylonis illic sedimus, et flevimus: dum recordaremur tui, Sion.

Secreta
801 Dómine Deus noster, qui in his pótius creaturis, quas ad fragilitátis nostrae subsidium condidísti, tuo quoque nomini munera iussisti dicánda constitui: tribue, quaesumus; ut et vitae nobis praeséntis auxilium, et aeternitátis efficiant sacramentum. Per Dóminum. Praefatio de sancta Cruce.

Ant. ad Communionem Ps. 118,49-50
802 Memento verbi tui servo tuo, Domine, in quo mihi spem dedisti: haec me consolata est in humilitate mea.

Postcommunio
803 Quod ore sumpsimus, Domine, pura mente capiamus: et de munere temporali fiat nobis remedium sempiternum. Per Dóminum.

Super populum: Oremus. Humiliáte capita vestra Deo.

Oratio
804 Esto, quaesumus, Domine, propitius plebi tuae: ut, quae tibi non placent, respuentes; tuorum potius repleantur delectatiónibus mandatorum. Per Dóminum nostrum.

Feria sexta

III classis

Statio ad S. Stephanum in Caelio monte


Antiphona ad Introitum Ps. 30, 10, 16 et 18
805 Miserere mihi, Domine, quoniam tribulor: libera me, et éripe me de manibus inimicorum meorum, et a persequentibus me: Domine, non confundar, quoniam invocavi te. Ps. ibid., 2 In te, Domine, speravi, non confundar in aetérnum: in iustitia tua libera me. Miserere mihi.

Oratio
806 Cordibus nostris, quaesumus, Dómine, gratiam tuam benignus infunde: ut, peccata nostra castigatione voluntaria cohibéntes, temporáliter potius macerémur, quam suppliciis deputémur aetérnis. Per Dóminum.

Léctio Ieremiae Prophetae. Ier. 17, 13-18
807 In diebus illis : Dixit Ieremias : Domine, omnes qui te derelinquunt, confundentur: recedentes a te, in terra scribentur rquóniam dereliquerunt venam aquarum viventium Dóminum. Sana me, Domine, et sanabor: salvum me fac, et salvus ero: quoniam laus mea tu es. Ecce ipsi dicunt ad me: Ubi est verbum Dómini ? Veniat. Et ego non sum turbatus, te pastorem sequens: et diem hominis non desideravi, tu scis. Quod egressum est de labiis meis, rectum in conspectu tuo fuit. Non sis tu mihi formidini, spes mea tu in die afflictionis. Confundantur, qui me persequuntur, et non confundar ego: paveant illi, et non paveam ego. Indue super eos diem afflictionis, et duplici contritione contere eos, Domine Deus noster.

Graduale Ps. 34, 20 et 22
808 Pacifice loquebantur mihi inimici mei: et in ira molesti erant mihi. V. Vidisti, Domine, ne sileas: ne discedas a me.

Tractus Ps. 102, 10
809 Domine, non secúndum peccata nostra, quae fecimus nos: neque secúndum iniquitates nostras retríbuas nobis. V. Ps. 78, 8-9 Domine, ne memineris iniquitatum nostrarum antiquarum : cito anticipent nos misericordiae tuae, quia pauperes facti sumus nimis. (Hic genuflectitur) V. Adiuva nos, Deus salutaris noster: et propter gloriam nominis tui, Domine, libera nos: et propitius esto peccatis nostris, propter nomen tuum.

Sequentia sancti Evangelii secúndum Ioannem.       Io. 11, 47-54
810 In illo témpore: Collegerunt pontifices et pharisaei concilium adversus Iesum, et dicebant : Quidfácimus, quia hic homo multa signa facit? Si dimittimus eum sic, omnes credent in eum: et venient Romani, et tollent nostrum locum et gentem. Unus autem ex ipsis, Caiphas nomine, cum esset pontifex anni illius, dixit eis: Vos nescitis quidquam, nec cogitatis quia expedit vobis, ut unus moriatur homo pro populo, et non tota gens pereat. Hoc autem a semetipso non dixit: sed cum esset pontifex anni illius, prophetavit, quod Iesus moriturus erat pro gente, et non tantum pro gente, sed ut filios Dei, qui erant dispersi, congregaret in unum. Ab illo ergo die cogitaverunt, ut interficerent eum. Iesus ergo iam non in palam ambulabat apud Iudaeos: sed abiit in regionem iuxta desertum, in civitatem, quae dicitur Ephrem, et ibi morabatur cum discipulis suis.

Antiphona ad Offertorium Ps. 118, 12, 121 et 42
811 Benedíctus es, Domine, doce me iustificationes tuas: et non tradas calumniantibus me superbis: et respondebo exprobrantibus mihi verbum.

Secreta
812 Praesta nobis, misericors Deus: ut digne tuis servire semper altaribus mereamur; et eórum perpetua participatione salvari. Per Dóminum.

Praefatio de sancta Cruce.

Ant. ad Communionem       Ps. 26, 12
813 Ne tradideris me, Domine, in animas persequentium me: quoniam insurrexerunt in me testes iniqui, et mentita est iniquitas sibi.

Postcommunio
814 Sumpti sacrificii, Domine, perpetua nos tuitio non derelinquat: et noxia semper a nobis cuncta depéllat. Per Dóminum nostrum.

Super populum: Oremus. Humiliáte capita vestra Deo.

Oratio
815 Concede,   quaesumus,  omnípotens Deus : ut, qui protectionis tuae gratiam quaerimus, liberati a malis omnibus, secura tibi mente serviamus. Per Dóminum nostrum.

Sabbato

III classis


Statio ad S. Ioannem ante Portam Latinam


Antiphona ad Introitum Ps. 30, 10, 16 et 18
816 Miserere mihi, Domine, quoniam tribulor: libera me, et éripe me de manibus inimicorum meorum, et a persequentibus me: Domine, non confundar, quoniam invocavi te. Ps. ibid., 2 In te, Domine, speravi, non confundar in aetérnum: in iustitia tua libera me. Miserere mihi.

Oratio
817 Proficiat, quaesumus, Domine, plebs tibi dicata piae devotionis affectu: ut, sacris actionibus erudita, quanto maiestati tuae fit gratior, tanto donis potióribus augeatur. Per Dóminum nostrum Iesum Christum.

Léctio Ieremiae Prophetae. Ier. 18, 18-23
818 In diebus illis : Dixerunt impii Iudaei ad invicem: Venite, et cogitemus contra iustum cogitationes: non enim peribit lex a sacerdote, neque consilium a sapiente, nec sermo a propheta: venite, et percutiamus eum lingua, et non attendamus ad universos sermones eius. Attende, Domine, ad me, et audi vocem adversariorum meorum. Numquid redditur pro bono malum, quia foderunt foveam animae meae? Recordare, quod steterim in conspectu tuo, ut loquerer pro eis bonum, et averterem indignationem tuam ab eis. Propterea da filios eórum in famem, et deduc eos in manus gladii: fiant uxores eórum absque liberis, et víduae: et viri earum interficiantur morte: iuvenes eórum confodiantur gladio in proelio. Audiatur clamor de domibus eórum: adduces enim super eos latronem repente : quiafodérunt foveam, ut caperent me, et laqueos absconderunt pedibus meis. Tu autem, Domine, scis omne consilium eórum adversum me in mortem: ne propitieris iniquitati eórum, et peccatum eórum a facie tua non deleatur. Fiant corruentes in conspectu tuo, in témpore furoris tui abutere eis, Domine Deus noster.

Graduale Ps. 34, 20 et 22
819 Pacifice loquebantur mihi inimici mei : et in ira molesti erant mihi. V. Vidisti, Domine, ne sileas: ne discedas a me.

+ Sequentia sancti Evangelii secúndum Ioannem.       Io. 12, 10-36
820 In illo témpore : Cogitaverunt principes sacerdotum ut et Lazarum interficerent: quia multi propter illum abibant ex Iudaeis, et credebant in Iesum. In crastinum autem turba multa, quae venerat ad diem festum, cum audissent quia venit Iesus Ierosólymam, acceperunt ramos palmarum, et processerunt obviam ei, et clamabant: Hosanna, benedíctus qui venit in nomine Dómini, Rex Israel. Et invenit Iesus asellum, et sedit super eum, sicut scriptum est: Noli timere, filia Sion: ecce Rex tuus venit sedens super pullum ásinae. Haec non cognoverunt discipuli eius primum: sed quando glorificatus est Iesus, tunc recordati sunt quia haec erant scripta de eo: et haec fecerunt ei. Testimonium ergo perhibebat turba, quae erat cum eo, quando Lazarum vocavit de monumento, et suscitavit eum a mortuis. Propterea et obviam venit ei turba: quia audierunt eum fecisse hoc signum. Pharisaei ergo dixerunt ad semetípsos: Videtis quia nihil proficimus ? Ecce mundus totus post eum abiit. Erant autem quidam gentiles ex his, qui ascenderant ut adorarent in die festo. Hi ergo accesserunt ad Philippum, qui erat a Bethsaida Galilaeae : et rogabant eum, dicentes : Domine, volumus Iesum videre. Venit Philippus, et dicit Andréae : Andreas rursum et Philippus dixerunt Iesu. Iesus autem respondit eis, dicens: Venit hora, ut clarificetur Filius hominis. Amen, amen dico vobis, nisi granum frumenti cadens in terram, mortuum fuerit, ipsum solum manet: si autem mortuum fuerit, multum fructum affert. Qui amat animam suam, perdet eam: et qui odit animam suam in hoc mundo, in vitam aeternam custodit eam. Si quis mihi ministrat, me sequatur: et ubi sum ego, illic et minister meus erit. Si quis mihi ministraverit, honorificabit eum Pater meus. Nunc anima mea turbata est. Et quid dicam? Pater, salvifica me ex hac hora. Sed propterea veni in horam hanc. Pater, clarifica nomen tuum. Venit ergo vox de caelo: Et clarificavi, et iterum clarificábo. Turba ergo, quae stabat et audierat, dicebat tonitruum esse factum. Alii dicebant: Angelus ei locútus est. Respondit Iesus, et dixit: Non propter me haec vox venit, sed propter vos. Nunc iudicium est mundi, nunc princeps huius mundi eicietur foras. Et ego si exaltatus fúero a terra, ómnia traham ad meipsum. (Hoc autem dicebat, significans qua morte esset moriturus). Respondit ei turba: Nos audivimus ex lege, quia Christus manet in aetérnum, et quómodo tu dicis: Oportet exaltari Fílium hominis? Quis est iste Filius hominis? Dixit ergo eis Iesus: Adhuc modicum lumen in vobis est. Ambulate dum lucem habetis, ut non vos ténebrae comprehendant: et qui ambulat in tenebris, nescit quo vadat. Dum lucem habetis, credite in lucem: ut filii lucis sitis. Haec locútus est Iesus : et abiit, et abscondit se ab eis.

Antiphona ad Offertorium Ps. 118, 12, 121 et 42
821 Benedíctus es, Domine, doce me iustificationes tuas: et non tradas calumniantibus me superbis: et respondebo exprobrantibus mihi verbum.

Secreta
822 Acunctis nos, quaesumus, Domine, reátibus et periculis propitiátus absólve:quos tanti mysterii tríbuis esse consortes. Per Dóminum. Praefatio de sancta Cruce.

Ant. ad Communionem       Ps. 26, 12
823 Ne tradideris me, Domine, in animas persequentium me: quoniam insurrexerunt in me testes iniqui, et mentita est iniquitas sibi.

Postcommunio
824 Divini muneris largitate satiati, quaesumus, Domine Deus noster: ut huius semper participatione vivamus. Per Dóminum.

Super populum: Oremus. Humiliáte capita vestra Deo.

Oratio
825 Tueátur, quaesumus, Domine, déxtera tua populum deprecántem: et purificatum dignánter erúdiat; ut, consolatione praesénti, ad futura bona proficiat. Per Dóminum.


Missale 1962 742