Missale Romanum 1957 - IN QUADRAGESIMA
Simplex
Statio ad S. Petrum ad Vincula
Introitus Ps. 122, 2
SICUT óculi servórum in mánibus dominórum suórum: ita óculi nostri ad Dóminum Deum nostrum, donec misereátur nobis: miserére nobis, Dómine, miserére nobis. Ps. ibid., 1 Ad te levávi óculos meos: qui hábitas in caelis. V/. Glória Patri.
Oratio
CONVÉRTE nos, Deus salutáris noster: et, ut nobis jejúnium quadragesimále profíciat, mentes nostras caeléstibus ínstrue disciplínis. Per Dóminum.
Orationes pro diversitate Temporum assignatae, ut supra. (Vide post benedictionem cinerum.)
Léctio Ezechiélis Prophétae.
Ezech. 34, 11-16
HAEC dicit Dóminus Deus: Ecce ego ipse requíram oves meas, et visitábo eas. Sicut vísitat pastor gregem suum in die, quando fúerit in médio óvium suárum dissipatárum: sic visitábo oves meas, et liberábo eas de ómnibus locis, in quibus dispérsae fúerant in die nubis et calíginis. Et edúcam eas de pópulis, et congregábo eas de terris, et indúcam eas in terram suam: et pascam eas in móntibus Israël, in rivis, et in cunctis sédibus terrae. In páscuis ubérrimis pascam eas, et in móntibus excélsis Israël erunt páscuae eárum: ibi requiéscent in herbis viréntibus, et in páscuis pínguibus pascéntur super montes Israël. Ego pascam oves meas, et ego eas accubáre fáciam, dicit Dóminus Deus. Quod períerat, requíram ; et quod abjéctum erat, redúcam ; et quod confráctum fúerat, alligábo ; et quod infírmum fúerat, consolidábo ; et quod pingue et forte, custódiam: et pascam illas in judício, dicit Dóminus omnípotens.
Graduale Ps. 83, 10 et 9 Protéctor noster áspice, Deus, et réspice super servos tuos. V/. Dómine Deus virtútum, exáudi preces servórum tuórum.
Tractus Ps. 102, 10 Dómine, non secúndum peccáta nostra, quae fécimus nos: neque secúndum iniquitátes nostras retríbuas nobis. V/. Ps. 78, 8-9 Dómine, ne memíneris iniquitátum nostrárum antiquárum: cito antícipent nos misericórdiae tuae, quia páuperes facti sumus nimis. (Hic genuflectitur) V/. Adjuva nos, Deus salutáris noster: et propter glóriam nóminis tui, Dómine, líbera nos: et propítius esto peccátis nostris, propter nomen tuum.
+ Sequéntia sancti Evangélii secúndum Matthaéum.
Matth. 25, 31-46
IN illo témpore: Dixit Jesus discípulis suis: Cum vénerit Fílius hóminis in majestáte sua, et omnes Angeli cum eo, tunc sedébit super sedem majestátis suae: et congregabúntur ante eum omnes gentes, et separábit eos ab ínvicem, sicut pastor ségregat oves ab haedis: et státuet oves quidem a dextris suis, haedos autem a sinístris. Tunc dicet Rex his, qui a dextris ejus erunt: Veníte benedícti Patris mei, possidéte parátum vobis regnum a constitutióne mundi. Esurívi enim, et dedístis mihi manducáre: sitívi, et dedístis mihi bíbere: hospes eram, et collegístis me: nudus, et cooperuístis me: infírmus, et visitástis me: in cárcere eram, et venístis ad me. Tunc respondébunt ei justi, dicéntes: Dómine, quando te vídimus esuriéntem, et pávimus te: sitiéntem, et dédimus tibi potum ? quando autem te vídimus hóspitem, et collégimus te: aut nudum, et cooperúimus te ? aut quando te vídimus infírmum, aut in cárcere, et vénimus ad te ? Et respóndens Rex, dicet illis: Amen dico vobis: quámdiu fecístis uni ex his frátribus meis mínimis, mihi fecístis. Tunc dicet et his, qui a sinístris erunt: Discédite a me maledícti in ignem aetérnum, qui parátus est diábolo, et ángelis ejus. Esurívi enim, et non dedístis mihi manducáre: sitívi, et non dedístis mihi potum: hospes eram, et non collegístis me: nudus, et non cooperuístis me: infírmus, et in cárcere, et non visitástis me. Tunc respondébunt ei et ipsi, dicéntes: Dómine, quando te vídimus esuriéntem, aut sitiéntem, aut hóspitem, aut nudum, aut infírmum, aut in cárcere, et non ministrávimus tibi ? Tunc respondébit illis, dicens: Amen dico vobis: Quámdiu non fecístis uni de minóribus his, nec mihi fecístis. Et ibunt hi in supplícium aetérnum: justi autem in vitam aetérnam.
Offertorium Ps. 118, 18, 26 et 73 Levábo óculos meos, et considerábo mirabília tua, Dómine, ut dóceas me justítias tuas: da mihi intelléctum, et discam mandáta tua.
Secreta
MÚNERA tibi, Dómine, obláta sanctífica: nosque a peccatórum nostrórum máculis emúnda. Per Dóminum.
Praefatio de Quadragesima.
Communio Matth. 25, 40 et 34 Amen dico vobis: quod uni ex mínimis meis fecístis, mihi fecístis: veníte, benedícti Patris mei, possidéte parátum vobis regnum ab inítio saéculi.
Postcommunio
SALUTÁRIS tui, Dómine, múnere satiáti, súpplices exorámus: ut, cujus laetámur gustu, renovémur efféctu. Per Dóminum.
Super populum: Orémus. Humiliáte cápita vestra Deo.
Oratio
ABSÓLVE, quaésumus, Dómine, nostrórum víncula peccatórum: et, quidquid pro eis merémur, propitiátus avérte. Per Dóminum.
Simplex
Statio ad S. Anastasiam
Introitus Ps. 89, 1 et 2
DÓMINE, refúgium factus es nobis a generatióne et progénie: a saéculo, et in saéculum tu es. Ps. ibid., 2 Priúsquam montes fíerent, aut formarétur terra, et orbis: a saéculo, et usque in saéculum tu es, Deus. V/. Glória Patri.
Oratio
RÉSPICE, Dómine, famíliam tuam: et praesta ; ut apud te mens nostra tuo desidério fúlgeat, quae se carnis maceratióne castígat. Per Dóminum.
Orationes pro diversitate Temporum assignatae, ut supra. (Vide post benedictionem cinerum.)
Léctio Isaíae Prophétae.
Isai. 55, 6-11
IN diébus illis: Locútus est Isaías prophéta, dicens: Quaérite Dóminum, dum inveníri potest: invocáte eum, dum prope est. Derelínquat ímpius viam suam, et vir iníquus cogitatiónes suas, et revertátur ad Dóminum: et miserébitur ejus, et ad Deum nostrum: quóniam multus est ad ignoscéndum. Non enim cogitatiónes meae, cogitatiónes vestrae: neque viae vestrae, viae meae, dicit Dóminus. Quia sicut exaltántur caeli a terra, sic exaltátae sunt viae meae a viis vestris, et cogitatiónes meae a cogitatiónibus vestris. Et quómodo descéndit imber et nix de caelo, et illu c ultra non revértitur, sed inébriat terram, et infúndit eam, et germináre eam facit, et dat semen serénti, et panem comedénti: sic erit verbum meum, quod egrediétur de ore meo: non revertétur ad me vácuum, sed fáciet quaecúmque vólui, et prosperábitur in his, ad quae misi illud: ait Dóminus omnípotens.
Graduale Ps. 140, 2 Dirigátur orátio mea sicut incénsum in conspéctu tuo, Dómine. V/. Elevátio mánuum meárum sacrifícium vespertínum.
+ Sequéntia sancti Evangélii secúndum Matthaéum.
Matth. 21, 10-17
IN illo témpore: Cum intrásset Jesus Jerosólymam, commóta est univérsa cívitas, dicens: Quis est hic ? Pópuli autem dicébant: Hic est Jesus Prophéta a Názareth Galilaéae. Et intrávit Jesus in templum Dei, et ejiciébat omnes vendéntes, et eméntes in templo ; et mensas nummulariórum, et cáthedras vendéntium colúmbas evértit: et dicit eis: Scriptum est: Domus mea domus oratiónis vocábitur: vos autem fecístis illam spelúncam latrónum. Et accessérunt ad eum caeci et claudi in templo: et sanávit eos. Vidéntes autem príncipes sacerdótum, et scribae mirabília, quae fecit, et púeros clamántes in templo, et dicéntes: Hosánna fílio David: indignáti sunt, et dixérunt ei: Audis quid isti dicunt ? Jesus autem dixit eis: Utique. Numquam legístis: Quia ex ore infántium et lacténtium perfecísti laudem ? Et relíctis illis, ábiit foras extra civitátem in Bethániam: ibíque mansit.
Offertorium Ps. 30, 15-16 In te sperávi, Dómine ; dixi: Tu es Deus meus, in mánibus tuis témpora mea.
Secreta
OBLÁTIS, quaésumus, Dómine, placáre munéribus: et a cunctis nos defénde perículis. Per Dóminum.
Praefatio de Quadragesima.
Communio Ps. 4, 2 Cum invocárem te, exaudísti me, Deus justítiae meae: in tribulatióne dilatásti me: miserére mihi, Dómine, et exáudi oratiónem meam.
Postcommunio
QUSUMUS, omnípotens Deus: ut illíus salutáris capiámus efféctum, cujus per haec mystéria pignus accépimus. Per Dóminum nostrum Jesum Christum.
Super populum: Orémus. Humiliáte cápita vestra Deo.
Oratio
ASCÉNDAT ad te, Dómine, preces nostrae: et ab Ecclésia tua cunctam repélle nequítiam. Per Dóminum.
Simplex
Statio ad S. Mariam majorem
Introitus Ps. 24, 6, 3 et 22
REMINÍSCERE miseratiónum tuárum, Dómine, et misericórdiae tuae, quae a saéculo sunt: ne umquam dominéntur nobis inimíci nostri: líbera nos, Deus Israël, ex ómnibus angústiis nostris. Ps. ibid., 1-2 Ad te, Dómine, levávi ánimam meam: Deus meus, in te confído, non erubéscam. V/. Glória Patri.
Post Kýrie, eléison, dicitur: Orémus. Flectámus génua.
R/. Leváte.
Oratio
PRECES nostras, quaésumus, Dómine, cleménter exáudi: et contra cuncta nobis adversántia, déxteram tuae majestátis exténde. Per Dóminum.
Léctio libri Exodi.
Exodi 24, 12-18
IN diébus illis: Dixit Dóminus ad Móysen: Ascénde ad me in montem, et esto ibi: dabóque tibi tábulas lapídeas, et legem ac mandáta quae scripsi: ut dóceas fílios Israël. Surrexérunt Móyses et Jósue miníster ejus: ascendénsque Móyses in montem Dei, senióribus ait: Exspectáte hic donec revertámur ad vos. Habétis Aaron et Hur vobíscum: si quid natum fúerit quaestiónis, referétis ad eos. Cumque ascendísset Móyses, opéruit nubes montem, et habitávit glória Dómini super Sínai, tegens illum nube sex diébus: séptimo autem die vocávit eum de médio calíginis. Erat autem spécies glóriae Dómini, quasi ignis ardens super vérticem montis, in conspéctu filiórum Israël. Ingressúsque Móyses médium nébulae, ascéndit in montem: et fuit ibi quadragínta diébus et quadragínta nóctibus.
Graduale Ps. 24, 17-18 Tribulatiónes cordis mei dilatátae sunt: de necessitátibus meis éripe me, Dómine. V/. Vide humilitátem meam, et labórem meum: et dimítte ómnia peccáta mea.
Hic dicitur V/. Dóminus vobíscum, sine Flectámus génua.
Orémus Oratio
DEVOTIÓNEM pópuli tui, quaésumus, Dómine, benígnus inténde: ut, qui per abstinéntiam macerántur in córpore, per fructum boni óperis reficiántur in mente. Per Dóminum nostrum Jesum Christum Fílium tuum: Qui tecum.
Orationes pro diversitate Temporum assignatae, ut supra. (Vide post benedictionem cinerum.)
Léctio libri Regum.
3 Reg. 19, 3-8
IN diébus illis: Venit Elías in Bersabée Juda, et dimísit ibi púerum suum, et perréxit in desértum, viam uníus diéi. Cumque venísset, et sedéret subter unam juníperum, petívit ánimae suae ut morerétur, et ait: Súfficit mihi, Dómine, tolle ánimam meam: neque enim mélior sum, quam patres mei. Projecítque se, et obdormívit in umbra juníperi: et ecce Angelus Dómini tétigit eum, et dixit illi: Surge et cómede. Respéxit, et ecce ad caput suum subcinerícius panis, et vas aquae: comédit ergo et bibit, et rursum obdormívit. Reversúsque est Angelus Dómini secúndo, et tétigit eum, dixítque illi: Surge, cómede: grandis enim tibi restat via. Qui cum surrexísset, comédit, et bibit, et ambulávit in fortitúdine cibi illíus quadragínta diébus, et quadragínta nóctibus, usque ad montem Dei Horeb.
Tractus Ps. 24, 17, 18 et 1-4 De necessitátibus meis éripe me, Dómine: vide humilitátem meam et labórem meum: et dimítte ómnia peccáta mea. V/. Ad te, Dómine, levávi ánimam meam: Deus meus, in te confído, non erubéscam: neque irrídeant me inimíci mei. V/. Etenim univérsi qui te exspéctant, non confundéntur: confundántur omnes faciéntes vana.
+ Sequéntia sancti Evangélii secúndum Matthaéum.
Matth. 12, 38-50
IN illo témpore: Respondérunt Jesu quidam de scribis et pharisaéis, dicéntes: Magíster, vólumus a te signum vidére. Qui respóndens, ait illis: Generátio mala et adúltera signum quaerit: et signum non dábitur ei, nisi signum Jonae prophétae. Sicut enim fuit Jonas in ventre ceti tribus diébus, et tribus nóctibus: sic erit Fílius hóminis in corde terrae tribus diébus, et tribus nóctibus. Viri Ninivítae surgent in judício cum generatióne ista, et condemnábunt eam: quia paeniténtiam egérunt in praedicatióne Jonae. Et ecce plus quam Jonas hic. Regína Austri surget in judício cum generatióne ista, et condemnábit eam: quia venit a fínibus terrae audíre sapiéntiam Salomónis. Et ecce plus quam Sálomon hic. Cum autem immúndus spíritus exíerit ab hómine, ámbulat per loca árida, quaerens réquiem, et non ínvenit. Tunc dicit: Revértar in domum meam, unde exívi. Et véniens ínvenit eam vacántem, scopis mundátam, et ornátam. Tunc vadit, et assúmit septem álios spíritus secum nequióres se, et intrántes hábitant ibi: et fiunt novíssima hóminis illíus pejóra prióribus. Sic erit et generatióni huic péssimae. Adhuc eo loquénte ad turbas, ecce mater ejus et fratres stabant foris, quaeréntes loqui ei. Dixit autem ei quidam: Ecce mater tua et fratres tui foris stant quaeréntes te. At ipse respóndens dicénti sibi, ait: Quae est mater mea, et qui sunt fratres mei ? Et exténdens manum in discípulos suos, dixit: Ecce mater mea, et fratres mei. Quicúmque enim fécerit voluntátem Patris mei, qui in caelis est: ipse meus frater, et soror, et mater est.
Offertorium Ps. 118, 47 et 48 Meditábor in mandátis tuis, quae diléxi valde: et levábo manus meas ad mandáta tua, quae diléxi.
Secreta
HÓSTIAS tibi, Dómine, placatiónis offérimus: ut et delícta nostra miserátus absólvas, et nutántia corda tu dírigas. Per Dóminum.
Praefatio de Quadragesima.
Communio Ps. 5, 2-4 Intéllige clamórem meum: inténde voci oratiónis meae, Rex meus, et Deus meus:quóniam ad te orábo, Dómine.
Postcommunio
TUI, Dómine, perceptióne sacraménti, et a nostris mundémur occúltis, et ab hóstium liberémur insídiis. Per Dóminum.
Super populum: Orémus. Humiliáte cápita vestra Deo.
Oratio
MENTES nostras, quaésumus, Dómine, lúmine tuae claritátis illústra: ut vidére possímus, quae agénda sunt ; et, quae recta sunt, ágere valeámus. Per Dóminum.
Simplex
Statio ad S. Laurentium in Paneperna
Introitus Ps. 95, 6
CONFÉSSIO et pulchritúdo in conspéctu ejus: sánctitas et magnificéntia in sanctificatióne ejus. Ps. ibid., 1 Cantáte Dómino cánticum novum: cantáte Dómino, omnis terra. V/. Glória Patri.
Oratio
DEVOTIÓNEM pópuli tui, quaésumus, Dómine, benígnus inténde: ut, qui per abstinéntiam macerántur in córpore, per fructum boni óperis reficiántur in mente. Per Dóminum.
Orationes pro diversitate Temporum assignatae, ut supra. (Vide post benedictionem cinerum.)
Léctio Ezechiélis Prophétae.
Ezech. 18, 1-9
IN diébus illis: Factus est sermo Dómini ad me, dicens: Quid est, quod inter vos parábolam vértitis in provérbium istud in terra Israël, dicéntes: Patres comedérunt uvam acérbam, et dentes filiórum obstupéscunt ? Vivo ego, dicit Dóminus Deus, si erit ultra vobis parábola haec in provérbium in Israël. Ecce omnes ánimae, meae sunt: ut ánima patris, ita et ánima fílii, mea est: ánima, quae peccáverit, ipsa moriétur. Et vir si fúerit justus, et fécerit judícium et justítiam, in móntibus non coméderit, et óculos suos non leváverit ad idóla domus Israël: et uxórem próximi sui non violáverit, et ad mulíerem menstruátam non accésserit: et hóminem non contristáverit: pignus debitóri reddíderit, per vim nihil rapúerit: panem suum esuriénti déderit, et nudum operúerit vestiménto: ad usúram non commodáverit, et ámplius non accéperit: ab iniquitáte avérterit manum suam, judícium verum fécerit inter virum et virum: in praecéptis meis ambuláverit, et judícia mea custodíerit, ut fáciat veritátem: hic justus est, vita vivet, ait Dóminus omnípotens.
Graduale Ps. 16, 8 et 2 Custódi me, Dómine, ut pupíllam óculi: sub umbra alárum tuárum prótege me. V/. De vultu tuo judícium meum pródeat: óculi tui vídeant aequitátem.
+ Sequéntia sancti Evangélii secúndum Matthaéum.
Matth. 15, 21-28
IN illo témpore: Egréssus Jesus secéssit in partes Tyri et Sidónis. Et ecce múlier Chananaéa a fínibus illis egréssa clamávit, dicens ei: Miserére mei, Dómine, fili David: fília mea male a daemónio vexátur. Qui non respóndit ei verbum. Et accedéntes discípuli ejus rogábant eum, dicéntes: Dimítte eam ; quia clamat post nos. Ipse autem respóndens, ait: Non sum missus nisi ad oves, quae periérunt, domus Israël. At illa venit, et adorávit eum, dicens: Dómine, ádjuva me. Qui respóndens, ait: Non est bonum súmere panem filiórum, et míttere cánibus. At illa dixit: Etiam, Dómine: nam et catélli edunt de micis, quae cadunt de mensa dominórum suórum. Tunc respóndens Jesus, ait illi: O múlier, magna est fides tua: fiat tibi sicut vis. Et sanáta est fília ejus ex illa hora.
Offertorium Ps. 33, 8-9 Immíttet Angelus Dómini in circúitu timéntium eum, et erípiet eos: gustáte, et vidéte, quóniam suávis est Dóminus.
Secreta
SACRIFÍCIA, Dómine, quaésumus, propénsius ista nos salvent, quae medicinálibus sunt institúta jejúniis. Per Dóminum.
Praefatio de Quadragesima.
Communio Joann. 6, 52 Panis, quem ego dédero, caro mea est pro saéculi vita.
Postcommunio
TUÓRUM nos, Dómine, largitáte donórum, et temporálibus attólle praesídiis, et rénova sempitérnis. Per Dóminum.
Super populum: Orémus. Humiliáte cápita vestra Deo.
Oratio
DA, quaésumus, Dómine, pópulis christiánis: et, quae profiténtur, agnóscere, et caeléste munus dilígere, quod frequéntant. Per Dóminum.
Simplex
Statio ad Ss. duodecim Apostolos
Introitus Ps. 24, 17 et 18
DE necessitátibus meis éripe me, Dómine: vide humilitátem meam et labórem meum, et dimítte ómnia peccáta mea. Ps. ibid., 1-2 Ad te, Dómine, levávi ánimam meam: Deus meus, in te confído, non erubéscam. V/. Glória Patri.
Oratio
ESTO, Dómine, propítius plebi tuae: et, quam tibi facis esse devótam, benígno réfove miserátus auxílio. Per Dóminum.
Orationes pro diversitate Temporum assignatae, ut supra. (Vide post benedictionem cinerum.)
Léctio Ezechiélis Prophétae.
Ezech. 18, 20-28
HAEC dicit Dóminus Deus: Anima, quae peccáverit, ipsa moriétur: fílius non portábit iniquitátem patris, et pater non portábit iniquitátem fílii: justítia justi super eum erit, et impiétas ímpii erit super eum. Si autem ímpius égerit paeniténtiam ab ómnibus peccátis suis, quae operátus est, et custodíerit ómnia praecépta mea, et fécerit judícium et justítiam: vita vivet, et non moriétur. Omnium iniquitátum ejus, quas operátus est, non recordábor: in justítia sua, quam operátus est, vivet. Numquid voluntátis meae est mors ímpii, dicit Dóminus Deus, et non ut convertátur a viis suis, et vivat ? Si autem avérterit se justus a justítia sua, et fécerit iniquitátem secúndum omnes abominatiónes, quas operári solet ímpius, numquid vivet ? Omnes justítiae ejus, quas fécerat, non recordabúntur: in praevaricatióne, qua praevaricátus est, et in peccáto suo, quod peccávit, in ipsis moriétur. Et dixístis: Non est aequa via Dómini. Audíte ergo domus Israël: Numquid via mea non est aequa, et non magis viae vestrae pravae sunt ? Cum enim avérterit se justus a justítia sua, et fécerit iniquitátem, moriétur in eis: in injustítia, quam operátus est, moriétur. Et cum avérterit se ímpius ab impietáte sua, quam operátus est, et fécerit judícium et justítiam: ipse ánimam suam vivificábit. Consíderans enim, et avértens se ab ómnibus iniquitátibus suis, quas operátus est, vita vivet, et non moriétur, ait Dóminus omnípotens.
Graduale Ps. 85, 2 et 6 Salvum fac servum tuum, Deus meus, sperántem in te. V/. Auribus pércipe, Dómine, oratiónem meam.
Tractus Ps. 102, 10 Dómine, non secúndum peccáta nostra, quae fécimus nos: neque secúndum iniquitátes nostras retríbuas nobis. V/. Ps. 78, 8-9 Dómine, ne memíneris iniquitátum nostrárum antiquárum: cito antícipent nos misericórdiae tuae, quia páuperes facti sumus nimis. (Hic genuflectitur) V/. Adjuva nos, Deus salutáris noster: et propter glóriam nóminis tui, Dómine, líbera nos: et propítius esto peccátis nostris, propter nomen tuum.
+ Sequéntia sancti Evangélii secúndum Joánnem.
Joann. 5, 1-15
IN illo témpore: Erat dies festus Judaeórum, et ascéndit Jesus Jerosólymam. Est autem Jerosólymis Probática piscína, quae cognominátur hebráice Bethsáida, quinque pórticus habens. In his jacébat multitúdo magna languéntium, caecórum, claudórum, aridórum exspectántium aquae motum. Angelus autem Dómini descendébat secúndum tempus in piscínam, et movebátur aqua. Et qui prior descendísset in piscínam post motiónem aquae, sanus fiébat a quacúmque detinebátur infirmitáte. Erat autem quidam homo ibi, trigínta et octo annos habens in infirmitáte sua. Hunc cum vidísset Jesus jacéntem, et cognovísset quia jam multum tempus habéret, dicit ei: Vis sanus fíeri ? Respóndit ei lánguidus: Dómine, hóminem non hábeo, ut cum turbáta fúerit aqua, mittat me in piscínam: dum vénio enim ego, álius ante me descéndit. Dicit ei Jesus: Surge, tolle grabátum tuum, et ámbula. Et statim sanus factus est homo ille: et sústulit grabátum suum, et ambulábat. Erat autem sábbatum in die illo. Dicébant ergo Judaéi illi qui sanátus fúerat: Sábbatum est, non licet tibi tóllere grabátum tuum. Respóndit eis: Qui me sanum fecit, ille mihi dixit: Tolle grabátum tuum, et ámbula. Interrogavérunt ergo eum: Quis est ille homo, qui dixit tibi: Tolle grabátum tuum et ámbula ? Is autem, qui sanus fúerat efféctus, nesciébat quis esset. Jesus enim declinávit a turba constitúta in loco. Póstea invénit eum Jesus in templo, et dixit illi: Ecce sanus factus es: jam noli peccáre, ne detérius tibi áliquid contíngat. Abiit ille homo, et nuntiávit Judaéis, quia Jesus esset, qui fecit eum sanum.
Offertorium Ps. 102, 2 et 5 Bénedic, ánima mea, Dómino, et noli oblivísci omnes retributiónes ejus: et renovábitur, sicut áquilae, juvéntus tua.
Secreta
SÚSCIPE, quaésumus, Dómine, múnera nostris obláta servítiis: et tua propítius dona sanctífica. Per Dóminum.
Praefatio de Quadragesima.
Communio Ps. 6, 11 Erubéscant, et conturbéntur omnes inimíci mei: avertántur retrórsum, et erubéscant valde velóciter.
Postcommunio
PER hujus, Dómine, operatiónem mystérii, et vítia nostra purgéntur, et justa desidéria compleántur. Per Dóminum.
Super populum: Orémus. Humiliáte cápita vestra Deo.
Oratio
EXÁUDI nos, miséricors Deus: et méntibus nostris grátiae tuae lumen osténde. Per Dóminum.
Simplex
Statio ad S. Petrum
Introitus Ps. 87, 3
INTRET orátio mea in conspéctu tuo: inclína aurem tuam ad precem meam, Dómine. Ps. ibid., 2 Dómine, Deus salútis meae: in die clamávi, et nocte coram te. V/. Glória Patri.
Post Kýrie, eléison, dicitur: Orémus. Flectámus génua.
R/. Leváte.
Oratio
PÓPULUM tuum, quaésumus, Dómine, propítius réspice: atque ab eo flagélla tuae iracúndiae cleménter avérte. Per Dóminum.
Léctio libri Deuteronómii.
Deut. 26, 12-19
IN diébus illis: Locútus est Móyses ad pópulum, dicens: Quando compléveris décimam cunctárum frugum tuárum, loquéris in conspéctu Dómini Dei tui: Abstuli quod sanctificátum est de domo mea, et dedi illud levítae, et ádvenae, et pupíllo, ac víduae, sicut jussísti mihi: non praeterívi mandáta tua, nec sum oblítus impérii tui. Obedívi voci Dómini Dei mei, et feci ómnia sicut praecepísti mihi. Réspice de sanctuário tuo, et de excélso caelórum habitáculo, et bénedic pópulo tuo Israël, et terrae, quam dedísti nobis, sicut jurásti pátribus nostris, terrae lacte et melle manánti. Hódie Dóminus Deus tuus praecépit tibi, ut fácias mandáta haec atque judícia: et custódias, et ímpleas ex toto corde tuo, et ex tota ánima tua. Dóminum elegísti hódie, ut sit tibi Deus, et ámbules in viis ejus, et custódias caerimónias illíus, et mandáta atque judícia, et obédias ejus império. Et Dóminus elégit te hódie, ut sis ei pópulus peculiáris, sicut locútus est tibi, et custódias ómnia praecépta illíus: et fáciat te excelsiórem cunctis géntibus, quas creávit in laudem, et nomen, et glóriam suam: ut sis pópulus sanctus Dómini Dei tui, sicut locútus est.
Graduale Ps. 78, 9 et 10 Propítius esto, Dómine, peccátis nostris: ne quando dicant gentes: Ubi est Deus eórum ? V/. Adjuva nos, Deus salutáris noster: et propter honórem nóminis tui, Dómine, líbera nos.
Orémus. Flectámus génua.
R/. Leváte.
Oratio
PROTÉCTOR noster áspice, Deus: ut, qui malórum nostrórum póndere prémimur, percépta misericórdia, líbera tibi mente famulémur. Per Dóminum.
Léctio libri Deuteronómii.
Deut. 11, 22-25
IN diébus illis: Dixit Móyses fíliis Israël: Si custodiéritis mandáta, quae ego praecípio vobis, et fecéritis ea, ut diligátis Dóminum Deum vestrum, et ambulétis in ómnibus viis ejus, adhaeréntes ei, dispérdet Dóminus omnes gentes istas ante fáciem vestram, et possidébitis eas, quae majóres et fortióres vobis sunt. Omnis locus quem calcáverit pes vester, vester erit. A desérto, et a Líbano, a flúmine magno Euphráte usque ad mare Occidentále, erunt términi vestri. Nullus stabit contra vos: terrórem vestrum et formídinem dabit Dóminus Deus vester super omnem terram, quam calcatúri estis, sicut locútus est vobis Dóminus Deus vester.
Graduale Ps. 83, 10 et 9 Protéctor noster, áspice, Deus, et réspice super servos tuos. V/. Dómine Deus virtútum, exáudi preces servórum tuórum.
Orémus. Flectámus génua.
R/. Leváte.
Oratio
ADÉSTO, quaésumus, Dómine, supplicatiónibus nostris: ut esse, te largiénte, mereámur et inter próspera húmiles, et inter advérsa secúri. Per Dóminum.
Léctio libri Machabaeórum.
2 Mach. 1, 23-26 et 27
IN diébus illis: Oratiónem faciébant omnes sacerdótes, dum consummarétur sacrifícium. Jónatha inchoánte, céteris autem respondéntibus. Et Nehemíae erat orátio hunc habens modum: Dómine, Deus ómnium creátor, terríbilis et fortis, justus et miséricors, qui solus es bonus rex, solus praestans, solus justus, et omnípotens, et aetérnus, qui líberas Israël de omni malo, qui fecísti patres eléctos, et sanctificásti eos: áccipe sacrifícium pro univérso pópulo tuo Israël, et custódi partem tuam, et sanctífica: ut sciant gentes, quia tu es Deus noster.
Graduale Ps. 89, 13 et 1 Convértere, Dómine, aliquántulum, et deprecáre super servos tuos. V/. Dómine, refúgium factus es nobis, a generatióne et progénie.
Orémus. Flectámus génua.
R/. Leváte.
Oratio
PRECES pópuli tui, quaésumus, Dómine, cleménter exáudi: ut, qui juste pro peccátis nostris afflígimur, pro tui nóminis glória misericórditer liberémur. Per Dóminum.
Léctio libri Sapiéntiae.
Eccli. 36, 1-10
MISERÉRE nostri, Deus ómnium, et réspice nos, et osténde nobis lucem miseratiónum tuárum: et immítte timórem tuum super gentes, quae non exquisiérunt te, ut cognóscant, quia non est Deus nisi tu, et enárrent magnália tua. Alleva manum tuam super gentes aliénas, ut vídeant poténtiam tuam. Sicut enim in conspéctu eórum sanctificátus es in nobis, sic in conspéctu nostr o magnificáberis in eis, ut cognóscant te, sicut et nos cognóvimus, quóniam non est Deus praeter te, Dómine. Innova signa, et immúta mirabília. Glorífica manum, et bráchium dextrum. Excita furórem, et effúnde iram. Tolle adversárium, et afflíge inimícum. Festína tempus, et meménto finis, ut enárrent mirabília tua, Dómine, Deus noster.
Graduale Ps. 140, 2 Dirigátur orátio mea, sicut incénsum in conspéctu tuo, Dómine. V/. Elevátio mánuum meárum sacrifícium vespertínum.
Orémus. Flectámus génua.
R/. Leváte.
Oratio
ACTIÓNES nostras, quaésumus, Dómine, aspirándo praéveni, et adjuvándo proséquere: ut cuncta nostra orátio et operátio a te semper incípiat, et per te coepta finiátur. Per Dóminum.
Léctio Daniélis Prophétae.
Dan. 3, 47-51
IN diébus illis: Angelus Dómini descéndit cum Azaría, et sóciis ejus in fornácem: et excússit flammam ignis de fornáce, et fecit médium fornácis quasi ventum roris flantem. Flamma autem effundebátur super fornácem cúbitis quadragínta novem: et erúpit, et incéndit quos réperit juxta fornácem de Chaldaéis minístros regis, qui eam incendébant. Et non tétigit eos omníno ignis, neque contristávit, nec quidquam moléstiae íntulit. Tunc hi tres quasi ex uno ore laudábant, et glorificábant, et benedicébant Deum in fornáce, dicéntes:
Hic non respondetur Deo grátias.
Hymnus Dan. ibid., 52-56
BENEDÍCTUS es, Dómine Deus patrum nostrórum. Et laudábilis et gloriósus in saécula.
Et benedíctum nomen glóriae tuae, quod est sanctum. Et laudábile et gloriósum in saécula.
Benedíctus es in templo sancto glóriae tuae. Et laudábilis et gloriósus in saécula.
Benedíctus es super thronum sanctum regni tui. Et laudábilis et gloriósus in saécula.
Benedíctus es super sceptrum divinitátis tuae. Et laudábilis et gloriósus in saécula.
Benedíctus es, qui sedes super Chérubim, íntuens abýssos. Et laudábilis et gloriósus in saécula.
Benedíctus es, qui ámbulas super pennas ventórum et super undas maris. Et laudábilis et gloriósus in saécula.
Benedícant te omnes Angeli et Sancti tui. Et laudent te et gloríficent in saécula.
Benedícant te caeli, terra, mare et ómnia quae in eis sunt. Et laudent te et gloríficent in saécula.
Glória Patri, et Fílio, et Spirítui Sancto. Et laudábili et glorióso in saécula.
Sicut erat in princípio, et nunc, et semper: et in saécula saeculórum. Amen. Et laudábili et glorióso in saécula.
Benedíctus es, Dómine Deus patrum nostrórum. Et laudábilis et gloriósus in saécula.
Hic dicitur V/. Dóminus vobíscum, sine Flectámus génua.
Orémus Oratio
DEUS, qui tribus púeris mitigásti flammas ígnium: concéde propítius ; ut nos fámulos tuos non exúrat flamma vitiórum. Per Dóminum.
Orationes pro diversitate Temporum assignatae, ut supra. (Vide post benedictionem cinerum.)
Léctio Epístolae beáti Pauli Apóstoli ad Thessalonicénses.
1 Thess. 5, 14-23
FRATRES: Rogámus vos, corrípite inquiétos, consolámini pusillánimes, suscípite infírmos, patiéntes estóte ad omnes. Vidéte ne quis malum pro malo alícui reddat: sed semper quod bonum est sectámini in ínvicem, et in omnes. Semper gaudéte. Sine intermissióne oráte. In ómnibus grátias ágite: haec est enim volúntas Dei in Christo Jesu in ómnibus vobis. Spíritum nolíte exstínguere. Prophetías nolíte spérnere. Omnia autem probáte: quod bonum est tenéte. Ab omni spécie mala abstinéte vos. Ipse autem Deus pacis sanctíficet vos per ómnia: ut ínteger spíritus vester, et ánima, et corpus sine queréla, in advéntu Dómini nostri Jesu Christi servétur.
Tractus Ps. 116, 1-2 Laudáte Dóminum, omnes gentes: et collaudáte eum, omnes pópuli. V/. Quóniam confirmáta est super nos misericórdia ejus: et véritas Dómini manet in aetérnum.
+ Sequéntia sancti Evangélii secúndum Matthaéum.
Matth. 17, 1-9
IN illo témpore: Assúmpsit Jesus Petrum, et Jacóbum, et Joánnem fratrem ejus, et duxit illos in montem excélsum seórsum: et transfigurátus est ante eos. Et resplénduit fácies ejus sicut sol: vestiménta autem ejus facta sunt alba sicut nix. Et ecce apparuérunt illis Móyses et Elías cum eo loquéntes. Respóndens autem Petrus, dixit ad Jesum: Dómine, bonum est nos hic esse: si vis, faciámus hic tria tabernácula, tibi unum, Móysi unum, et Elíae unum. Adhuc eo loquénte, ecce nubes lúcida obumbrávit eos. Et ecce vox de nube, dicens: Hic est Fílius meus diléctus, in quo mihi bene complácui: ipsum audíte. Et audiéntes discípuli, cecidérunt in fáciem suam, et timuérunt valde. Et accéssit Jesus, et tétigit eos, dixítque eis: Súrgite, et nolíte timére. Levántes autem óculos suos, néminem vidérunt, nisi solum Jesum. Et descendéntibus illis de monte, praecépit eis Jesus, dicens: Némini dixéritis visiónem, donec Fílius hóminis a mórtuis resúrgat.
Offertorium Ps. 87, 2-3 Dómine, Deus salútis meae, in die clamávi, et nocte coram te: intret orátio mea in conspéctu tuo, Dómine.
Secreta
PRAESÉNTIBUS sacrifíciis, quaésumus, Dómine, jejúnia nostra sanctífica: ut, quod observántia nostra profitétur extrínsecus, intérius operétur. Per Dóminum.
Praefatio de Quadragesima.
Communio Ps. 7, 2 Dómine Deus meus, in te sperávi: líbera me ab ómnibus persequéntibus me, et éripe me.
Postcommunio
SANCTIFICATIÓNIBUS tuis, omnípotens Deus, et vítia nostra curéntur, et remédia nobis aetérna provéniant. Per Dóminum.
Super populum: Orémus. Humiliáte cápita vestra Deo.
Oratio
FIDÉLES tuos, Deus, benedíctio desideráta confírmet: quae eos, et a tua voluntáte numquam fáciat discrepáre, et tuis semper indúlgeat benefíciis gratulári. Per Dóminum.
Missale Romanum 1957 - IN QUADRAGESIMA