Missale Romanum 1957 - OMNIUM GRATIARUM MEDIATRICIS
Die 3 Septembris
Episcopi et Confessoris
Duplex
Missa Státuit, de Communi Confessoris Pontificis 1 loco, praeter Orationes et Evangelium.
Oratio
DEUS, mundi auctor et creátor, qui hodiérnam festivitátem beáti Remácli Confessóris tui atque Pontíficis migratióne in caelum consecrásti: praesta, quaésumus ; ut cujus ánnua celebritáte devótis exsultámus obséquiis, ejus suffrágiis tuae pietátis consequámur auxílium. Per Dóminum nostrum.
+ Sequéntia sancti Evangélii secúndum Lucam.
Luc. 10, 1-9
IN illo témpore: Designávit Dóminus et álios septuagínta duos et misit illos binos ante fáciem suam in omnem civitátem et locum, quo erat ipse ventúrus. Et dicébat illis: Messis quidem multa, operárii autem pauci. Rogáte ergo dóminum messis ut mittat operários in messem suam. Ite: ecce ego mitto vos sicut agnos inter lupos. Nolíte portáre sácculum, neque peram, neque calceaménta, et néminem per viam salutavéritis. In quamcúmque domum intravéritis, primum dícite: Pax huic dómui: et si ibi fúerit fílius pacis, requiéscet super illum pax vestra: sin autem, ad vos revertétur. In eádem autem domo manéte edéntes et bibéntes quae apud illos sunt: dignus est enim operárius mercéde sua. Nolíte transíre de domo in domum. Et in quamcúmque civitátem intravéritis, et suscéperint vos, manducáte quae apponúntur vobis: et curáte infírmos, qui in illa sunt, et dícite illis: Appropinquávit in vos regnum Dei.
Secreta
INTERVÉNTU precum beáti Remácli Confessóris tui atque Pontíficis, Dómine, quaésumus, his munéribus oblátis benedictiónem infúnde caeléstem: et praesta ; ut per haec ómnibus careámus culpis, et caeléstibus inserámur gáudiis. Per Dóminum.
Postcommunio
EXÍSTAT, quaésumus, Dómine, beátus Remáclus Conféssor tuus et Póntifex pro nobis perpétuus intercéssor: ut mystéria quae súmpsimus, non sint nobis reátus ad poenam, sed sint fortitúdo nostrae infirmitátis, et ad vitam capesséndam aetérnam praeparátio salutáris. Per Dóminum.
Virginis
Duplex
Missa Dilexísti, de Communi Virginum 3 loco, praeter Orationem sequentem:
Oratio
DEUS, innocéntiae auctor et amátor, qui beátam Madelbértam Vírginem tuam hodiérna die ad caelos transvexísti: concéde nobis fámulis tuis, ipsíus sacra solémnia celebrántibus, ejúsdem pia intercessióne nostrórum véniam cónsequi peccatórum. Per Dóminum.
Episcopi et Martyris
Duplex
Missa Státuit, ut in Communi unius Martyris Pontificis , praeter Orationes sequentes:
Oratio
DEUS, qui nos beáti Theodárdi Mártyris tui atque Pontíficis gloriósa solemnitáte laetíficas: sólita pietátis tuae largitáte concéde benígnus ; ut cujus victóriae triúmphum pio amóre venerámur in terris, societátis ejus laetítiam adipísci, te largiénte, mereámur in caelis. Per Dóminum.
Secreta
HANC in conspéctu glóriae magnitúdinis tuae oblatiónis hóstiam, quaésumus, Deus Pater omnípotens, beáti Mártyris tui atque Pontíficis Theodárdi comméndet orátio, qui sanctae caritátis tuae devíctus amóre, própriam sui córporis hóstiam in odórem suavitátis tibi óbtulit vivam. Per Dóminum.
Postcommunio
SANCTA nos, quaésumus, Dómine, sacraménti caeléstis participátio et ab hóstium tueátur incúrsu, et sancto intercedénte Theodárdo Mártyre tuo atque Pontífice, animárum nobis remédia cónferat sempitérna. Per Dóminum.
Episcopi et Confessoris
Duplex majus
Introitus Eccli. 45, 30
STÁTUIT ei Dóminus testaméntum pacis, et príncipem fecit eum: ut sit illi sacerdótii dígnitas in aetérnum. Ps. 131, 1 Meménto, Dómine, David: et omnis mansuetúdinis ejus. V/. Glória Patri.
Oratio
DEUS, qui pópulo tuo sanctum dedísti Matérnum praedicatórem: concéde ; ut tanti Pontíficis intercessióne et tuae pietátis defensióne, ab ómnibus liberémur advérsis, et tranquílla prosperitáte in tua laude laetémur. Per Dóminum.
Léctio Epístolae beáti Pauli Apóstoli ad Romános.
Rom. 10, 10-18
FRATRES: Corde enim créditur ad justítiam: ore autem conféssio fit ad salútem. Dicit enim Scriptúra: Omnis, qui credit in illum, non confundétur. Non enim est distínctio Judaéi et Graeci: nam idem Dóminus ómnium, dives in omnes, qui ínvocant illum. Omnis enim, quicúmque invocáverit nomen Dómini, salvus erit. Quómodo ergo invocábunt, in quem non credidérunt ? Aut quómodo credent ei, quem non audiérunt ? Quómodo autem áudient sine praedicánte ? Quómodo vero praedicábunt, nisi mittántur ? Sicut scriptum est: Quam speciósi pedes evangelizántium pacem, evangelizántium bona ! Sed non omnes obédiunt Evangélio. Isaías enim dicit: Dómine, quis crédidit audítui nostro ? Ergo fides ex audítu, audítus autem per verbum Christi. Sed dico: Numquid non audiérunt ? Et quidem in omnem terram exívit sonus eórum, et in fines orbis terrae verba eórum.
Graduale Eccli. 44, 16 Ecce sacérdos magnus, qui in diébus suis plácuit Deo. V/. Ibid., 20 Non est invéntus símilis illi, qui conserváret legem Excélsi.
Allelúja, allelúja. V/. Ps. 109, 4 Tu es sacérdos in aetérnum, secúndum órdinem Melchísedech. Allelúja.
+ Sequéntia sancti Evangélii secúndum Marcum.
Marc. 16, 15-18
IN illo témpore: Dixit Jesus discípulis suis: Eúntes in mundum univérsum, praedicáte Evangélium omni creatúrae. Qui credíderit, et baptizátus fúerit, salvus erit: qui vero non credíderit, condemnábitur. Signa autem eos, qui credíderint, haec sequéntur: In nómine meo daemónia ejícient: linguis loquéntur novis: serpéntes tollent: et si mortíferum quid bíberint, non eis nocébit: super aegros manus impónent, et bene habébunt.
Offertorium Ps. 88, 21-22 Invéni David servum meum, óleo sancto meo unxi eum: manus enim mea auxiliábitur ei, et bráchium meum confortábit eum.
Secreta
SANCTI Confessóris tui Matérni nos, Dómine, quaésumus, ánnua festívitas pietáti tuae reddat accéptos: ut, per haec piae placatiónis offícia, et illum beáta retribútio comitétur, et nobis grátiae tuae dona concíliet. Per Dóminum.
Communio Luc. 12, 42 Fidélis servus et prudens, quem constítuit dóminus super famíliam suam: ut det illis in témpore trítici mensúram.
Postcommunio
SANCTI Matérni Confessóris tui atque Pontíficis supplicatiónibus, Dómine, tríbue nos fovéri: ut cujus solemnitátem ánnuo celebrámus obséquio, ejus apud te intercessiónibus commendémur et méritis. Per Dóminum.
Duplex I classis
Introitus
GAUDEÁMUS omnes in Dómino, diem festum celebrántes sub honóre beáti Lambérti Mártyris: de cujus solemnitáte gaudent Angeli, et colláudant Fílium Dei. Ps. 32, 1 Exsultáte, justi, in Dómino: rectos decet collaudátio. V/. Glória Patri.
Oratio
INTERCÉSSIO, quaésumus, Dómine, beáti Lambérti Mártyris tui atque Pontíficis, tuam nobis non désinat placáre justítiam, et nostrum tibi devótum effícere famulátum. Per Dóminum.
Léctio Epístolae beáti Pauli Apóstoli ad Hebraéos.
Hebr. 5, 1-6
FRATRES: Omnis póntifex ex homínibus assúmptus, pro homínibus constitúitur in iis, quae sunt ad Deum: ut ófferat dona et sacrifícia pro peccátis: qui condolére possit iis, qui ignórant, et errant: quóniam et ipse circúmdatus est infirmitáte: et proptérea debet, quemádmodum pro pópulo, ita étiam et pro semetípso offérre pro peccátis. Nec quisquam sumit sibi honórem, sed qui vocátur a Deo, tamquam Aaron. Sic et Christus non semetípsum clarificávit ut póntifex fíeret: sed qui locútus est ad eum: Fílius meus es tu, ego hódie génui te. Quemádmodum et in álio loco dicit: Tu es sacérdos in aetérnum, secúndum órdinem Melchísedech.
Graduale Eccli. 44, 16 Ecce sacérdos magnus, qui in diébus suis plácuit Deo. V/. Ibid., 20 Non est invéntus símilis illi, qui conserváret legem Excélsi.
Allelúja , allelúja. V/. Joann. 10, 14 Ego sum pastor bonus: et cognósco oves meas, et cognóscunt me meae. Allelúja.
Sequentia
CHRISTI nómine laetémur,
Et Lambérto gratulémur,
Inclyto Pontífici.
Cujus fidem, passiónem,
Tot labóres et agónem,
Digne decet récoli.
Hic ad glóriam paréntum
Pulchrum dedit ornaméntum:
Sanctus ab infántia.
Clarus per progenitóres,
Cláruit per pios mores,
Amplióri grátia.
Ad honórem praesulátus
Est Trajécti postulátus:
Fungens sacerdótio.
Gregem salvat, splendet signis,
Tungros lustrat vir insígnis
Novae lucis rádio.
Cum de sede deturbátum,
Septem annos exsulátum
Pellit hostis ínvidus.
Monachórum petit aedem,
Post in primam redit sedem
Suo juri rédditus.
Reprobátus et abjéctus
Lapis iste nunc eréctus
Ad se traxit ómnia.
Taxándriam illustrávit,
Idolórum quam mundávit
Ab omni spurcítia.
Turba credit, fides crescit,
Error cedit, et claréscit
Nomen tanti Praésulis.
Qui constrúcto Dei templo,
Verbo docens et exémplo,
Corúscat miráculis.
Tandem orans immolátur:
Hasta dum transverberátur,
Subit caeli gáudia.
Mox Trajecti fuit curae
Dare corpus sepultúrae,
Terra procul ália.
Angelórum dulce melos
Audítur, dum intrat caelos
Cum palma victóriae.
Amen dicat plebs devóta,
Psallat ei mente tota
Qui triúmphat hódie.
Clerus omnis jucundétur,
Et Lambértus commendétur
Solémni melódia.
Légia quem venerátur,
Cujus sacri decorátur
Córporis custódia.
Mors est justi pretiósa,
Quam praecéssit gloriósa
Vitae conversátio.
Hujus actus imitémur,
Ut ne frustra gloriémur
Ejus patrocínio.
Tu nos ex hac mortis valle
Duc ad vitam recto calle
Ejus per vestígia.
Jesu, nobis da benígne,
Ut cum sanctis te condígne
Laudémus in pátria.
Amen. Allelúja.
+ Sequéntia sancti Evangélii secúndum Joánnem.
Joann. 10, 11-16
IN illo témpore: Dixit Jesus pharisaéis: Ego sum pastor bonus. Bonus pastor ánimam suam dat pro óvibus suis. Mercenárius autem, et qui non est pastor, cujus non sunt oves própriae, videt lupum veniéntem, et dimíttit oves, et fugit: et lupus rapit, et dispérgit oves: mercenárius autem fugit, quia mercenárius est, et non pértinet ad eum de óvibus. Ego sum pastor bonus: et cognósco meas, et cognóscunt me meae. Sicut novit me Pater, et ego agnósco Patrem: et ánimam meam pono pro óvibus meis. Et álias oves hábeo, quae non sunt ex hoc ovíli: et illas opórtet me addúcere, et vocem meam áudient, et fiet unum ovíle, et unus pastor.
Credo.
Offertorium Ps. 20, 4-5 Posuísti, Dómine, in cápite ejus corónam de lápide pretióso: vitam pétiit a te, et tribuísti ei, allelúja.
Secreta
ADÉSTO, quaésumus , Dómine, famulórum tuórum hóstiis, adésto munéribus, sancti Lambérti, Mártyris tui atque Pontíficis, précibus placátus ac méritis: et ejus gaudéntes solemnitáte, ab hóstium infestatiónibus cleménter tuére. Per Dóminum.
Communio Joann. 10, 14 Ego sum pastor bonus: et cognósco oves meas, et cognóscunt me meae.
Postcommunio
BEÁTI Pontíficis Lambérti, Mártyris tui, Dómine, mérita gloriósa recoléntibus, da nobis per haec sacraménta, quae súmpsimus, ut a culpis ómnibus expiáti, vitam consequámur aetérnam. Per Dóminum nostrum.
Missa ut in festo, sed omittitur Sequentia. Introitus, et post Septuagesimam etiam Tractus sumuntur e Missa Státuit, de Communi unius Martyris 1 loco. Tempore autem Paschali Introitus sumitur e Missa Protexísti, de Communi Martyrum 1 loco, et post Epistolam, omisso Graduali, dicitur:
Allelúja , allelúja. V/. Joann. 10, 14 Ego sum pastor bonus: et cognósco oves meas, et cognóscunt me meae. Allelúja. V/. Ps. 109, 4 Tu es sacérdos in aetérnum, secúndum órdinem Melchísedech. Allelúja.
Martyrum
Duplex
Missa Intret, de Communi plurimorum Martyrum, praeter Orationes et Epistolam.
Oratio
ANNUE, quaésumus, omnípotens Deus: ut sanctórum Mártyrum tuórum Maurítii et Sociórum ejus nos laetíficet festíva solémnitas ; ut, quorum suffrágiis nítimur, eórum natalítiis gloriémur. Per Dóminum.
Léctio libri Apocalýpsis beáti Joánnis Apóstoli.
Apoc. 7, 13-17
IN diébus illis: Respóndit unus de senióribus, et dixit mihi: Hi, qui amícti sunt stolis albis, qui sunt ? et unde venérunt ? Et dixi illi: Dómine mi, tu scis. Et dixit mihi: Hi sunt, qui venérunt de tribulatióne magna, et lavérunt stolas suas, et dealbavérunt eas in sánguine Agni. Ideo sunt ante thronum Dei, et sérviunt ei die ac nocte in templo ejus: et qui sedet in throno, habitábit super illos: non esúrient, neque sítient ámplius, nec cadet super illos sol, neque ullus aestus: quóniam Agnus, qui in médio throni est, reget illos, et dedúcet eos ad vitae fontes aquárum: et abstérget Deus omnem lácrimam ab óculis eórum.
Secreta
RÉSPICE, quaésumus, Dómine, múnera, quae in sanctórum Mártyrum tuórum Maurítii et Sociórum ejus commemoratióne deférimus: et praesta ; ut, quorum honóre sunt grata, eórum nobis fiant intercessióne perpétua. Per Dóminum.
Postcommunio
CAELÉSTIBUS refécti sacraméntis et gáudiis: súpplices te rogámus, Dómine ; ut, quorum gloriámur triúmphis, protegámur auxíliis. Per Dóminum.
Die 1 Octobris
Commemoratio
Confessoris
Missa Os justi, de Communi Confessoris non Pontificis 1 loco, praeter Orationem sequentem:
Oratio
DEUS, qui beátum Bavónem Confessórem tuum, calcáto mundo, crucifíxo Fílio tuo militáre tribuísti: da nobis, quaésumus, ejus patrocínio, ab ómnibus hóstibus prótegi ; et post peráctam felíciter hujus vitae milítiam, aetérna glória coronári. Per Dóminum.
Secreta C
LAUDIS tibi, Dómine, hóstias immolámus in tuórum commemoratióne Sanctórum: quibus nos et praeséntibus éxui malis confídimus et futúris. Per Dóminum.
Postcommunio C
REFÉCTI cibo potúque caelésti, Deus noster, te súpplices exorámus: ut, in cujus haec commemoratióne percépimus, ejus muniámur et précibus. Per Dóminum.
Commemoratio Abbatis
Missa Os justi, de Communi Abbatum, praeter Orationem sequentem:
Oratio
DEUS, quo vocánte, beátus Beregísus quae retro erant oblítus est: fac nos, ipso intercedénte, ad destinátum pérsequi brávium supérnae vocatiónis, in Christo Jesu Dómino nostro: Qui tecum vivit.
Secreta C
SACRIS altáribus, Dómine, hóstias superpósitas sanctus Beregísus Abbas, quaésumus, in salútem nobis proveníre depóscat. Per Dóminum.
Postcommunio C
PRÓTEGAT nos, Dómine, cum tui perceptióne sacraménti beátus Beregísus Abbas, pro nobis intercedéndo: ut et conversatiónis ejus experiámur insígnia, et intercessiónis percipiámus suffrágia. Per Dóminum.
Commemoratio Confessoris
Missa Justus, de Communi Confessoris non Pontificis 2 loco, cum Orationibus ut infra:
Oratio C
ADÉSTO, Dómine, supplicatiónibus nostris, quas in beáti Amóris Confessóris tui solemnitáte deférimus: ut, qui nostrae justítiae fidúciam non habémus, ejus, qui tibi plácuit, précibus adjuvémur. Per Dóminum.
Secreta C
PRAESTA nobis, quaésumus, omnípotens Deus: ut nostrae humilitátis oblátio, et pro tuórum tibi grata sit honóre Sanctórum, et nos córpore páriter et mente puríficet. Per Dóminum.
Postcommunio C
QUSUMUS, omnípotens Deus: ut, qui caeléstia aliménta percépimus, intercedénte beáto Amóre Confessóre tuo, per haec contra ómnia advérsa muniámur. Per Dóminum.
In Ecclesiis consecratis excepta Cathedrali
Duplex I classis
Missa Terríbilis, de Communi Dedicationis. Credo.
Festum Maternitatis Beatae Mariae Virginis fit die 12 Octobris.
In Ecclesiis consecratis excepta Cathedrali Duplex II classis
Missa Ecce Virgo, ut in Missali.
SS. URSULAE ac SOCIARUM
Virginum et Martyrum
Duplex
Missa Deus meus, de Communi plurium Virginum et Martyrum, ut infra, praeter Orationes sequentes:
Oratio
DA nobis, quaésumus, Dómine Deus noster, sanctárum Vírginum et Mártyrum tuárum Ursulae et Sociárum ejus palmas incessábili devotióne venerári: ut, quas digna mente non póssumus celebráre, humílibus saltem frequentémus obséquiis. Per Dóminum.
Secreta
INTÉNDE, quaésumus, Dómine, múnera altáribus tuis pro sanctárum Vírginum et Mártyrum tuárum Ursulae et Sociárum ejus festivitáte propósita: ut, sicut per haec beáta mystéria illis glóriam contulísti ; ita nobis indulgéntiam largiáris. Per Dóminum.
Postcommunio
PRAESTA nobis, quaésumus, Dómine, intercedéntibus sanctis Virgínibus et Martýribus tuis Ursula et Sociábus ejus ; ut, quod ore contíngimus, pura mente capiámus. Per Dóminum.
Viduae
Simplex
Missa Cognóvi, Dómine, de Communi nec Virginis nec Martyris, praeter Orationem sequentem:
Oratio
DEUS, qui beátam Odam génere nóbilem, sed virtútibus nobiliórem, viduáli sanctimónia decorásti: da nobis, quaésumus, ipsíus méritis et exémplis, sic fíeri virtútibus dívites, ut ejus hic patrocínium sentiámus, et glóriae, qua frúitur in caelis, partícipes esse mereámur. Per Dóminum.
Secreta C
ACCÉPTA tibi sit, Dómine, sacrátae plebis oblátio pro tuórum honóre Sanctórum: quorum se méritis de tribulatióne percepísse cognóscit auxílium. Per Dóminum.
Postcommunio C
SATIÁSTI, Dómine, famíliam tuam munéribus sacris: ejus, quaésumus, semper interventióne nos réfove, cujus solémnia celebrámus. Per Dóminum.
Commemoratio Episcopi et Confessoris
Missa Státuit, de Communi Confessoris Pontificis 1 loco, praeter Orationem sequentem:
Oratio
DEUS, qui beátum Severínum, Confessórem tuum atque Pontíficem, hodiérna die suscepísti atque remunerásti: concéde propítius ; ut qui ejus gaudémus méritis, provocémur exémplis, et ejus intercessióne véniam et vitam mereámur aetérnam. Per Dóminum.
Secreta C
SANCTI tui, quaésumus, Dómine, nos ubíque laetíficent: ut, dum eórum mérita recólimus, patrocínia sentiámus. Per Dóminum.
Postcommunio C
PRAESTA, quaésumus, omnípotens Deus: ut, de percéptis munéribus grátias exhibéntes, intercedénte beáto Severíno Confessóre tuo atque Pontífice, benefícia potióra sumámus. Per Dóminum nostrum.
Commemoratio Episcopi et Martyris
Missa Sacerdótes Dei, de Communi unius Martyris Pontificis 2 loco, cum Orationibus ut infra:
Oratio C
DEUS, qui nos beáti Evergísli Mártyris tui atque Pontíficis ánnua solemnitáte laetíficas: concéde propítius ; ut, cujus natalítia cólimus, de ejúsdem étiam protectióne gaudeámus. Per Dóminum.
Secreta C
MÚNERA tibi, Dómine, dicáta sanctífica: et, intercedénte beáto Evergíslo Mártyre tuo atque Pontífice, per éadem nos placátus inténde. Per Dóminum.
Postcommunio C
HAEC nos commúnio, Dómine, purget a crímine: et, intercedénte beáto Evergíslo Mártyre tuo atque Pontífice, caeléstis remédii fáciat esse consórtes. Per Dóminum.
Die 3 Novembris
Episcopi et Confessoris
Patroni Civitatis Leodiensis
In Civitate: Duplex I classis
In Dioecesi: Duplex majus
Missa Státuit, ut in Communi Confessoris Pontificis 1 loco, praeter Orationes sequentes.
Oratio
DEUS, qui perénnem glóriam sanctíssimi Confessóris tui atque Pontíficis Hubérti ánimae contulísti: praesta, quaésumus ; nos ejus apud te ita patrocíniis adjuvári, ut cum eo vitam possideámus aetérnam. Per Dóminum.
In Civitate dicitur Credo.
Secreta
OBLÁTA, quaésumus, Dómine, múnera fidélis pópuli méritis beatíssimi Hubérti reddántur accépta ; ut abjécta cogitatióne peccáti, eísdem quibus famulámur mystériis, clementer emundári mereámur. Per Dóminum nostrum.
Postcommunio
MENSAE caeléstis participatióne vegetáti, súpplices te rogámus, omnípotens Deus ; ut sicut de beáti Hubérti perpétua glorificatióne gaudémus, ita ipsíus apud te intercessióne ab omni mereámur adversitáte deféndi. Per Dóminum.
Episcopi et Confessoris
Duplex
Missa Sacerdótes tui, ut in Communi Confessoris Pontificis 2 loco, praeter Orationem sequentem:
Oratio
PROPITIÁRE, quaésumus, Dómine, nobis indígnis fámulis tuis, per sancti Perpétui, Confessóris tui atque Pontíficis, mérita gloriósa ; ut ejus pia intercessióne, ab ómnibus semper protegámur advérsis. Per Dóminum nostrum.
quae in Ecclesiis Dioecesis asservantur
Duplex majus
Introitus Ps. 33, 20-21
MULTAE tribulatiónes justórum, et de his ómnibus liberávit eos Dóminus: Dóminus custódit ómnia ossa eórum: unum ex his non conterétur. Ps. ibid., 2 Benedícam Dóminum in omni témpore: semper laus ejus in ore meo. V/. Glória Patri.
Oratio
AUGE in nobis, Dómine, resurrectiónis fidem, qui in Sanctórum tuórum Relíquiis mirabília operáris: et fac nos immortális glóriae partícipes ; cujus in eórum cinéribus pígnora venerámur. Per Dóminum.
Léctio libri Sapiéntiae.
Eccli. 44, 10-15
HI viri misericórdiae sunt, quorum pietátes non defuérunt: cum sémine eórum pérmanent bona, heréditas sancta nepótes eórum, et in testaméntis stetit semen eórum: et fílii eórum propter illos usque in aetérnum manent: semen eórum et glória eórum non derelinquétur. Córpora ipsórum in pace sepúlta sunt, et nomen eórum vivit in generatiónem et generatiónem. Sapiéntiam ipsórum narrent pópuli, et laudem eórum núntiet Ecclésia.
Graduale Ps. 149, 5 et 1 Exsultábunt sancti in glória: laetabúntur in cubílibus suis. V/. Cantáte Dómino cánticum novum: laus ejus in ecclésia sanctórum.
Allelúja, allelúja. V/. Ps. 67, 4 Justi epuléntur, et exsúltent in conspéctu Dei: et delecténtur in laetítia. Allelúja.
+ Sequéntia sancti Evangélii secúndum Lucam.
Luc. 6, 17-23
IN illo témpore: Descéndens Jesus de monte, stetit in loco campéstri, et turba discipulórum ejus, et multitúdo copiósa plebis ab omni Judaéa, et Jerúsalem, et marítima, et Tyri, et Sidónis, qui vénerant, ut audírent eum, et sanaréntur a languóribus suis. Et qui vexabántur a spirítibus immúndis, curabántur. Et omnis turba quaerébat eum tángere: quia virtus de illo exíbat, et sanábat omnes. Et ipse elevátis óculis in discípulos suos, dicébat: Beáti páuperes: quia vestrum est regnum Dei. Beáti, qui nunc esurítis: quia saturabímini. Beáti, qui nunc fletis: quia ridébitis. Beáti éritis, cum vos óderint hómines, et cum separáverint vos, et exprobráverint, et ejécerint nomen vestrum tamquam malum, propter Fílium hóminis. Gaudéte in illa die, et exsultáte: ecce enim merces vestra multa est in caelo.
Offertorium Ps. 67, 36 Mirábilis Deus in sanctis suis: Deus Israël, ipse dabit virtútem et fortitúdinem plebi suae: benedíctus Deus, allelúja.
Secreta
IMPLORÁMUS, Dómine, cleméntiam tuam: ut Sanctórum tuórum, quorum Relíquias venerámur, suffragántibus méritis, hóstia, quam offérimus, nostrórum sit expiátio delictórum. Per Dóminum.
Communio Ps. 32, 1 Gaudéte, justi, in Dómino: rectos decet collaudátio.
Postcommunio
MULTÍPLICA super nos, quaésumus, Dómine, per haec sancta, quae súmpsimus, misericórdiam tuam: ut, sicut in tuórum solemnitáte Sanctórum, quorum Relíquias cólimus, pia devotióne laetámur ; ita eórum perpétua societáte, te largiénte, fruámur. Per Dóminum.
Confessoris
Duplex
Missa Os justi, de Communi Abbatum, praeter Orationem sequentem:
Oratio
MAJESTÁTI tuae, quaésumus, omnípotens Deus, nos sanctíssimi Confessóris tui Leonárdi pia comméndet orátio: ut quem venerámur offício, ipsíus suffrágiis sublevémur. Per Dóminum.
Confessoris
Duplex
Missa Os justi, de Communi Abbatum, praeter Orationes sequentes:
Oratio
SANCTI Trudónis Confessóris tui nos, Dómine, precátio sancta tueátur: ut quod consciéntia nostra non merétur, nobis ejus qui tibi plácuit oratióne donétur. Per Dóminum.
Secreta
IN conspéctu tuo, Dómine, quaésumus, tália nostra sint múnera, quae intercedénte beáto Trudóne, Confessóre tuo, et placáre te váleant, et nos tibi placére perfíciant. Per Dóminum nostrum.
Postcommunio
SÚPPLICES te rogámus, omnípotens Deus: ut quos donis caeléstibus satiásti ; intercedénte beáto Trudóne, Confessóre tuo, perpétua protectióne custódias. Per Dóminum.
Confessoris
Duplex
Introitus Ps. 118, 167
CUSTODÍVIT ánima mea testimónia tua, Dómine: et diléxit ea veheménter. Ps. ibid., 1 Beáti immaculáti in via: qui ámbulant in lege Dómini. V/. Glória Patri.
Oratio
CONCÉDE, quaésumus, fámulis tuis, Dómine Deus: ea innocéntiae ac fidelitátis exémpla in tuo servítio sectári ; quibus angélicus júvenis Joánnes aetátis suae florem consecrávit. Per Dóminum.
Léctio libri Sapiéntiae.
Eccli. 51, 17-25, 27-28 et 35
CONFITÉBOR, et laudem dicam tibi, Dómine Rex, et benedícam nómini Dómini. Cum adhuc júnior essem, priúsquam oberrárem, quaesívi sapiéntiam palam in oratióne mea. Ante templum postulábam pro illa, et usque in novíssimis inquíram eam. Et efflóruit tamquam praecox uva, laetátum est cor meum in ea. Ambulávit pes meus iter rectum, a juventúte mea investigábam eam. Inclinávi módice aurem meam, et excépi illam. Multam invéni in meípso sapiéntiam, et multum proféci in ea. Danti mihi sapiéntiam, dabo glóriam. Consiliátus sum enim ut fácerem illam: zelátus sum bonum, et non confúndar. Colluctáta est ánima mea in illa, et in faciéndo eam confirmátus sum. Animam meam diréxi ad illam, et in agnitióne invéni eam. Possédi cum ipsa cor ab inítio: propter hoc non derelínquar. Vidéte óculis vestris quia módicum laborávi, et invéni mihi multam réquiem.
Graduale Sap. 4, 13-14 Consummátus in brevi explévit témpora multa. V/. Plácita enim erat Deo ánima illíus: propter hoc properávit edúcere illum de médio iniquitátum.
Allelúja , allelúja. V/. Ibid., 16 Condémnat autem justus mórtuus vivos ímpios, et juvéntus celérius consummáta longam vitam injústi. Allelúja.
* In Missis votivis post Septuagesimam, omissis Allelúja et Versu sequenti, dicitur
Tractus Ps. 70, 17 Deus, docuísti me a juventúte mea: et usque nunc pronuntiábo mirabília tua. V/. Ps. 118, 103 et 101 Quam dúlcia fáucibus meis elóquia tua, super mel ori meo ! V/. Ab omni via mala prohíbui pedes meos: ut custódiam verba tua.
Tempore autem Paschali omittitur Graduale, et ejus loco dicitur:
Allelúja, allelúja. V/. Ps. 118, 106 Jurávi, et státui custódíre judícia justítiae tuae. Allelúja. V/. Ibid., 74 Qui timent te vidébunt me, et laetabúntur: quia in verba tua supersperávi. Allelúja.
+ Sequéntia sancti Evangélii secúndum Matthaéum.
Matth. 19, 16-21
IN illo témpore: Ecce unus accédens ad Jesum, ait illi: Magíster bone, quid boni fáciam ut hábeam vitam aetérnam ? Qui dixit ei: Quid me intérrogas de bono ? Unus est bonus, Deus. Si autem vis ad vitam íngredi, serva mandáta. Dicit illi: Quae ? Jesus autem dixit: Non homicídium fácies: Non adulterábis: Non fácies furtum: Non falsum testimónium dices: Honóra patrem tuum, et matrem tuam, et díliges próximum tuum sicut teípsum. Dicit illi adoléscens: Omnia haec custodívi a juventúte mea, quid adhuc mihi deest ? Ait illi Jesus: Si vis perféctus esse, vade, vende quae habes, et da paupéribus, et habébis thesáurum in caelo: et veni, séquere me.
Offertorium Ps. 115, 16-17 O Dómine, quia ego servus tuus: ego servus tuus et fílius ancíllae tuae: dirupísti víncula mea: tibi sacrificábo hóstiam laudis.
Secreta
RÉSPICE, miséricors Deus, dona quae offérimus, recoléntes ánimo caritátem: qua beátus Joánnes inter haec mystéria flagrábat. Per Dóminum.
Communio Cant. 6, 2 ; 3, 4 Ego dilécto meo, et diléctus meus mihi, qui páscitur inter lília. Invéni quem díligit ánima mea: ténui eum, nec dimíttam.
Postcommunio
CAELÉSTI épulo reféctis praesta nobis, quaésumus, miséricors Deus: ut, beáti Joánnis vestígia sequéntes, viam mandatórum tuórum dilatáto corde currámus. Per Dóminum.
Episcopi et Martyris
Duplex
Missa Sacerdótes Dei, de Communi unius Martyris Pontificis 2 loco, praeter Orationem sequentem:
Oratio
DEUS, qui beátum Albértum Pontíficem martýrii coróna decorásti, et ecclesiásticae libertátis constituísti defensórem: ejus méritis nobis concéde ; ut per hujus vitae tribulatiónes ad promíssam perveníre valeámus felicitátem. Per Dóminum nostrum.
Introitus Ps. 131, 16-17
SACERDÓTES Sion índuam salutári, et sancti ejus exsultatióne exsultábunt, dicit Dóminus: illuc prodúcam cornu David, parávi lucérnam Christo meo. (T. P. Allelúja, allelúja.) Ps. ibid., 1 Meménto, Dómine, David: et omnis mansuetúdinis ejus. V/. Glória Patri.
Oratio
DEUS, qui nos beatórum N. et N. Confessórum tuórum atque Pontíficum confessiónibus gloriósis circúmdas et prótegis: da nobis, et eórum imitatióne profícere, et intercessióne gaudére. Per Dóminum.
Alia Oratio
ECCLÉSIAM tuam, Dómine, beatórum N. et N. Confessórum tuórum atque Pontíficum contínua protectióne custódi: ut, sicut illos pastorális sollicitúdo gloriósos réddidit ; ita nos eórum intercéssio in tuo semper fáciat amóre fervéntes. Per Dóminum.
Léctio Epístolae beáti Pauli Apóstoli ad Hebraéos.
Hebr. 13, 7-17
FRATRES: Mementóte praepositórum vestrórum, qui vobis locúti sunt verbum Dei: quorum intuéntes éxitum conversatiónis, imitámini fidem. Jesus Christus heri, et hódie: ipse et in saécula. Doctrínis váriis et peregrínis nolíte abdúci. Optimum est enim grátia stabilíre cor, non escis, quae non profuérunt ambulántibus in eis. Habémus altáre, de quo édere non habent potestátem, qui tabernáculo desérviunt. Quorum enim animálium infértur sanguis pro peccáto in Sancta per pontíficem, horum córpora cremántur extra castra. Propter quod et Jesus, ut sanctificáret per suum sánguinem pópulum, extra portam passus est. Exeámus ígitur ad eum extra castra, impropérium ejus portántes. Non enim habémus hic manéntem civitátem, sed futúram inquírimus. Per ipsum ergo offerámus hóstiam laudis semper Deo, id est, fructum labiórum confiténtium nómini ejus. Beneficéntiae autem, et communiónis nolíte oblivísci: tálibus enim hóstiis promerétur Deus. Obedíte praepósitis vestris, et subjacéte eis. Ipsi enim pervígilant, quasi ratiónem pro animábus vestris redditúri.
Graduale Ps. 106, 22 et 32 Sacríficent Dómino sacrifícium laudis: et annúntient ópera ejus in exsultatióne. V/. Et exáltent eum in ecclésia plebis: et in cáthedra seniórum laudent eum.
Allelúja , allelúja. V/. 2 Paral. 6, 41 Sacerdótes tui, Dómine Deus, induántur salútem, et sancti tui laeténtur in bonis. Allelúja.
Post Septuagesimam, omissis Allelúja et Versu sequenti, dicitur
Tractus Ps. 131, 8-10 Surge, Dómine, in réquiem tuam: tu et arca sanctificatiónis tuae. V/. Sacerdótes tui induántur justítiam, et sancti tui exsúltent. V/. Propter David servum tuum, non avértas fáciem Christi tui.
Tempore autem Paschali omittitur Graduale, et ejus loco dicitur:
Allelúja , allelúja. V/. 2 Paral. 6, 41 Sacerdótes tui, Dómine Deus, induántur salútem, et sancti tui laeténtur in bonis. Allelúja. V/. Jerem. 31, 14 Ego Dóminus inebriábo ánimam sacerdótum pinguédine: et pópulus meus bonis meis adimplébitur. Allelúja.
+ Sequéntia sancti Evangélii secúndum Marcum.
Marc. 13, 33-37
IN illo témpore: Dixit Jesus discípulis suis: Vidéte, vigiláte, et oráte: nescítis enim quando tempus sit. Sicut homo, qui péregre proféctus relíquit domum suam, et dedit servis suis potestátem cujúsque óperis, et janitóri praecépit ut vígilet. Vigiláte ergo, (nescítis enim quando dóminus domus véniat: sero, an média nocte, an galli cantu, an mane) ne cum vénerit repénte, invéniat vos dormiéntes. Quod autem vobis dico, ómnibus dico: Vigiláte.
Offertorium Ps. 105, 3 Beáti, qui custódiunt judícium, et fáciunt justítiam in omni témpore. (T. P. Allelúja.)
Secreta
MÚNERA nostra, Dómine, sacris altáribus offeréntes, quaésumus cleméntiam tuam: ut éadem, suffragántibus beatórum N. et N. Pontíficum méritis, et suprémam tibi glóriam operéntur, et ubérrimam nobis grátiam assequántur. Per Dóminum.
Alia Secreta
HANC nostrae oblatiónis hóstiam, Deus, gratam óculis tuae majestátis effíciant beatórum N. et N. Pontíficum expetíta suffrágia: qui digne in hoc saéculo sacrifícia tibi, ac preces in salútem pópuli obtulérunt. Per Dóminum.
Communio Marc. 13, 34 Homo péregre proféctus relíquit domum suam, et dedit servis suis potestátem cujúsque óperis, et janitóri praecépit ut vígilet. (T. P. Allelúja.).
Postcommunio
REFECTIÓNE sacra enutrítos, fac nos, omnípotens Deus, vestígiis beatórum N. et N. Pontíficum semper insístere: qui studuérunt pérpeti devotióne te cólere, et indeféssa ómnibus caritáte profícere. Per Dóminum.
Alia Postcommunio
MENSA caeléstis, omnípotens Deus, intercedéntibus beatórum N. et N. Pontíficum méritis, supérnas in ómnibus vires firmet et áugeat: ut et fídei donum íntegrum custodiámus, et per osténsum salútis trámitem ambulémus. Per Dóminum.
Missale Romanum 1957 - OMNIUM GRATIARUM MEDIATRICIS