Missale Romanum 1957 - S. MARGARITAE DE CORTONA
post Dominicam in Septuagesima
Introitus Ps. 54, 5-6
COR meum conturbátum est in me, et formído mortis cécidit super me. Timor et tremor venérunt super me. Ps. 68, 2 Salvum me fac, Deus: quóniam intravérunt aquae usque ad ánimam meam. V/. Glória Patri.
Oratio
DÓMINE Jesu Christe, qui in horto verbo et exémplo nos oráre docuísti, ad tentatiónum perícula superánda: concéde propítius ; ut nos, oratióni semper inténti, ejus copiósum fructum cónsequi mereámur: Qui vivis et regnas cum Deo Patre in unitáte Spíritus Sancti Deus.
Léctio Epístolae beáti Pauli Apóstoli ad Hebraéos.
Hebr. 5, 5-10
FRATRES: Christus non semetípsum clarificávit ut póntifex fíeret: sed qui locútus est ad eum: Fílius meus es tu, ego hódie génui te. Quemádmodum et in álio loco dicit: Tu es sacérdos in aetérnum, secúndum órdinem Melchísedech. Qui in diébus carnis suae preces, supplicationésque ad eum, qui possit illum salvum fácere a morte, cum clamóre válido et lácrimis ófferens, exaudítus est pro sua reveréntia: et quidem cum esset Fílius Dei, dídicit ex iis, quae passus est, obediéntiam: et consummátus, factus est ómnibus obtemperántibus sibi, causa salútis aetérnae, appellátus a Deo póntifex juxta órdinem Melchísedech.
Graduale Ps. 87, 4-5 Repléta est malis ánima mea, et vita mea inférno appropinquávit. V/. AEstimátus sum cum descendéntibus in lacum, factus sum sicut homo sine adjutório.
Tractus Ps. 68, 17 et 18 Exáudi me, Dómine, quóniam benígna est misericórdia tua. V/. Et ne avértas fáciem tuam a púero tuo: quóniam tríbulor, velóciter exáudi me. V/. Ps. 21, 12 Ne discésseris a me: quóniam tribulátio próxima est: quóniam non est qui ádjuvet.
In Missis per annum Graduale ut supra, et omisso Tractu, dicitur:
Allelúja, allelúja . V/. Ps. 21, 25 Dóminus non avértit fáciem suam a me: et cum clamárem ad eum, exaudívit me. Allelúja.
Tempore autem Paschali, omissis Graduali et Tractu, dicitur:
Allelúja, allelúja . V/. Ps. 27, 6-7 Benedíctus Dóminus: quóniam exaudívit vocem deprecatiónis meae. V/. Dóminus adjútor meus et protéctor meus: in ipso sperávit cor meum, et adjútus sum. Allelúja.
+ Sequéntia sancti Evangélii secúndum Lucam.
Luc. 22, 39-44
IN illo témpore: Egréssus Jesus ibat, secúndum consuetúdinem, in montem Olivárum. Secúti sunt autem illum et discípuli. Et cum pervenísset ad locum, dixit illis: Oráte, ne intrétis in tentatiónem. Et ipse avúlsus est ab eis quantum jactus est lápidis, et pósitis génibus orábat, dicens: Pater, si vis, transfer cálicem istum a me: verúmtamen non mea volúntas, sed tua fiat. Appáruit autem illi Angelus de caelo, confórtans eum. Et factus in agonía, prolíxius orábat. Et factus est sudor ejus, sicut guttae sánguinis decurréntis in terram.
Credo.
Offertorium Ps. 68, 2 Salvum me fac, Deus: quóniam intravérunt aquae usque ad ánimam meam.
Secreta
HUJUS sancti sacrifícii méritis fac nos, quaésumus, Dómine, divína institutióne formátos curam oratióni tam efficáciter impéndere: ut Jesus Christus Fílius tuus in éxitu nostro vígiles nos et a culpa solútos invéniat: Qui tecum.
Praefatio de Cruce.
Communio Matth. 26, 41 Vigiláte et oráte, ut non intrétis in tentatiónem: spíritus quidem promptus est, caro autem infírma.
Postcommunio
REFÉCTI alimónia caelésti, súpplices te rogámus, Pater omnípotens: ut, per unigéniti Fílii tui oratiónis virtútem, nos in tantis córporis et ánimae perículis constitúti, ad caeléstia regna secúre perveníre mereámur. Per eúmdem Dóminum.
post Dominicam in Sexagesima
Missa Humiliávit, quae habetur inter votivas circa finem Missalis, praeter Orationem sequentem:
Oratio P
OMNÍPOTENS sempitérne Deus, qui humáno géneri, ad imitándum humilitátis exémplum, Salvatórem nostrum carnem súmere et crucem subíre fecísti: concéde propítius ; ut, sicut solémnem Commemoratiónem Passiónis ejus celebrámus, ita et patiéntiae ipsíus habére documénta, et resurrectiónis consórtia mereámur. Per eúmdem Dóminum nostrum.
Et dicitur Credo.
post Cineres
Introitus Cant. 3, 11
EGREDÍMINI et vidéte, fíliae Sion, regem Salomónem in diadémate, quo coronávit eum mater sua, parans crucem Salvatóri suo. Ps. 8, 6-7 Glória et honóre coronásti eum, Dómine: et constituísti eum super ópera mánuum tuárum. V/. Glória Patri.
Oratio
PRAESTA, quaésumus, omnípotens Deus: ut, qui in memóriam passiónis Dómini nostri Jesu Christi Corónam ejus spíneam venerámur in terris, ab ipso glória et honóre conorári mereámur in caelis: Qui tecum vivit.
Léctio libri Sapiéntiae.
Cant. 3, 7-11 ; 4, 1 et 8
LÉCTULUM Salomónis sexagínta fortes ámbiunt ex fortíssimis Israël: omnes tenéntes gládios, et ad bella doctíssimi: uniuscujúsque ensis super femur suum propter timóres noctúrnos. Férculum fecit sibi rex Sálomon de lignis Líbani: colúmnas ejus fecit argénteas, reclinatórium áureum, ascénsum purpúreum: média caritáte constrávit propter fílias Jerúsalem. Egredímini et vidéte, fíliae Sion, regem Salomónem in diadémate, quo coronávit illum mater sua in die desponsatiónis illíus, et in die laetítiae cordis ejus. Quam pulchra es, amíca mea, quam pulchra es ! Oculi tui columbárum, absque eo quod intrínsecus latet. Veni de Líbano, sponsa mea, veni de Líbano, veni: coronáberis.
Graduale Eccli. 45, 14 Coróna áurea super caput ejus: expréssa signo sanctitátis, glória honóris, et opus fortitúdinis. V/. Ps. 20, 4 Quóniam praevenísti eum in benedictiónibus dulcédinis: posuísti in cápite ejus corónam de lápide pretióso.
Tractus Isai. 61, 10 Induit eum Dóminus vestiméntis salútis, et induménto justítiae, quasi sponsum decorátum coróna. V/. Isai. 28, 5 Coróna tribulatiónis efflóruit in corónam glóriae, et sertum exsultatiónis. V/. Sap. 5, 17 Accépit regnum decóris, diadéma speciéi.
In Missis per annum post Graduale, omisso Tractu, dicitur:
Allelúja , allelúja. V/. Isai. 28, 5 Coróna tribulatiónis efflóruit in corónam glóriae, et sertum exsultatiónis. Allelúja.
Tempore autem Paschali, omissis Graduali et Tractu, dicitur:
Allelúja, allelúja. V/. Eccli. 45, 14 Coróna áurea super caput ejus: expréssa signo sanctitátis, glória honóris, et opus fortitúdinis. Allelúja. V/. Tibi glória, hosánna: tibi triúmphus et victória: tibi summae laudis et honóris coróna. Allelúja.
+ Sequéntia sancti Evangélii secúndum Joánnem.
Joann. 19, 1-5
IN illo témpore: Apprehéndit Pilátus Jesum, et flagellávit. Et mílites plecténtes corónam de spinis, imposuérunt cápiti ejus: et veste purpúrea circumdedérunt eum. Et veniébant ad eum, et dicébant: Ave, Rex Judaeórum: et dabant ei álapas. Exívit ergo íterum Pilátus foras, et dicit eis: Ecce addúco vobis eum foras, ut cognoscátis, quia nullam invénio in eo causam. Exívit ergo Jesus portans corónam spíneam, et purpúreum vestiméntum.
Credo.
Offertorium Tuam Corónam adorámus, Dómine: tuam gloriósam recólimus passiónam.
Secreta
TUÓRUM mílitum, Rex omnípotens, virtútem róbora: ut, quos in hujus mortalitátis stádio unigéniti Fílii tui Coróna laetíficat ; consummáto cursu certáminis, immortalitátis bravíum apprehéndant. Per eúmdem Dóminum.
Praefatio de Cruce.
Communio Prov. 4, 9 Laetáre, mater nostra, quia dabit Dóminus cápiti tuo augménta gratiárum, et coróna ínclita próteget te.
Postcommunio
SÚPPLICES te rogámus, omnípotens Deus: ut haec sacraménta quae súmpsimus, per sacrosánctae Fílii tui Corónae, cujus solémnia recensémus, virtútem, nobis profíciant ad medélam. Per eúmdem Dóminum.
post Dominicam primam Quadragesimae
Introitus Ps. 21, 17-18 et 15
FODÉRUNT manus meas, et pedes meos: dinumeravérunt ómnia ossa mea: et sicut aqua effúsus sum. Ps. ibid., 15 Factum est cor meum tamquam cera liquéscens, in médio ventris mei. V/. Glória Patri.
Oratio
DEUS, qui in assúmptae carnis infirmitáte Clavis affígi et Láncea vulnerári pro mundi salúte voluísti: concéde propítius ; ut, qui eorúmdem Clavórum et Lánceae solémnia venerámur in terris, de glorióso victóriae tuae triúmpho gratulémur in caelis: Qui vivis.
Léctio Zacharíae Prophétae.
Zach. 12, 10-11 ; 13, 6-7
HAEC dicit Dóminus: Effúndam super domum David, et super habitatóres Jerúsalem spíritum grátiae et precum: et aspícient ad me, quem confixérunt: et plangent eum planctu quasi super unigénitum, et dolébunt super eum, ut doléri solet in morte primogéniti. In die illa magnus erit planctus in Jerúsalem, et dicétur: Quid sunt plagae istae in médio mánuum tuárum ? Et dicet: His plagátus sum in domo eórum, qui diligébant me. Frámea, suscitáre super pastórem meum, et super virum cohaeréntem mihi, dicit Dóminus exercítuum: pércute pastórem, et dispergéntur oves: ait Dóminus omnípotens.
Graduale Ps. 68, 21-22 Impropérium exspectávit cor meum, et misériam: et sustínui, qui simul mecum contristarétur, et non fuit: consolántem me quaesívi, et non invéni. V/. Dedérunt in escam meam fel, et in siti mea potavérunt me acéto.
Tractus Isai. 53, 4-5 Vere languóres nostros ipse tulit, et dolóres nostros ipse portávit. V/. Et nos putávimus eum quasi leprósum, et percússum a Deo, et humiliátum. V/. Ipse autem vulnerátus est propter iniquitátes nostras, attrítus est propter scélera nostra. V/. Disciplína pacis nostrae super eum: et livóre ejus sanáti sumus.
In Missis per annum post Graduale, omisso Tractu, dicitur:
Allelúja, allelúja. V/. Ave, Rex noster: tu solus nostros es miserátus erróres: Patri obédiens, ductu s es ad crucifigéndum, ut agnus mansuétus ad occisiónem. Allelúja.
Tempore autem Paschali, omissis Graduali et Tractu, dicitur:
Allelúja, allelúja. V/. Ave, Rex noster: tu solus nostros es miserátus erróres: Patri obédiens, ductus es ad crucifigéndum, ut agnus mansuétus ad occisiónem. Allelúja. V/. Tibi glória, hosánna: tibi triúmphus et victória: tibi summae laudis et honóris coróna. Allelúja.
+ Sequéntia sancti Evangélii secúndum Joánnem.
Joann. 19, 28-35
IN illo témpore: Sciens Jesus, quia ómnia consummáta sunt, ut consummarétur Scriptúra, dixit: Sítio. Vas ergo erat pósitum acéto plenum. Illi autem spóngiam plenam acéto, hyssópo circumponéntes, obtulérunt ori ejus. Cum ergo accepísset Jesus acétum, dixit: Consummátum est. Et inclináto cápite trádidit spíritum. Judaéi ergo (quóniam Parascéve erat) ut non remanérent in cruce córpora sábbato (erat enim magnus dies ille sábbati), rogavérunt Pilátum, ut frangeréntur eórum crura, et tolleréntur. Venérunt ergo mílites: et primi quidem fregérunt crura, et altérius, qui crucifíxus est cum eo. Ad Jesum autem cum veníssent, ut vidérunt eum jam mórtuum, non fregérunt ejus crura, sed unus mílitum láncea latus ejus apéruit, et contínuo exívit sanguis, et aqua. Et qui vidit, testimónium perhíbuit: et verum est testimónium ejus.
Credo.
Offertorium Insurrexérunt in me viri iníqui: absque misericórdia quaesiérunt me interfícere: et non pepercérunt in fáciem meam spúere: lánceis suis vulneravérunt me, et concússa sunt ómnia ossa mea.
Secreta
SANCTÍFICET nos, quaésumus, Dómine, hoc sanctum et immaculátum sacrifícium vespertínum: quod unigénitus Fílius tuus in Cruce óbtulit pro salúte mundi: Qui tecum.
Praefatio de Cruce.
Communio Vidébunt in quem transfixérunt, cum moveréntur fundaménta terrae.
Postcommunio
DÓMINE Jesu Christe, qui temetípsum in Cruce holocáustum immaculátum et spontáneum Deo Patri obtulísti: quaésumus ; ut ejúsdem sacrifícii oblátio veneránda indulgéntiam nobis obtíneat, et glóriam sempitérnam: Qui vivis et regnas cum eódem Deo Patre.
post Dominicam II Quadragesimae
Introitus Philipp. 2, 8-9
HUMILIÁVIT semetípsum Dóminus Jesus Christus usque ad mortem, mortem autem crucis: propter quod et Deus exaltávit illum, et donávit illi nomen, quod est super omne nomen. Ps. 88, 2 Misericórdias Dómini in aetérnum cantábo: in generatiónem et generatiónem annuntiábo veritátem tuam in ore meo. V/. Glória Patri.
Oratio
DEUS, qui nobis in sancta Síndone, qua corpus tuum sacratíssimum, e Cruce depósitum, a Joseph involútum fuit, passiónis tuae vestígia reliquísti: concéde propítius ; ut per mortem et sepultúram tuam, ad resurrectiónis glóriam perducámur: Qui vivis.
Léctio Isaíae Prophétae.
Isai. 62, 11 ; 63, 1-7
HAEC dicit Dóminus Deus: Dícite fíliae Sion: Ecce Salvátor tuus venit: ecce merces ejus cum eo. Quis est iste, qui venit de Edom, tinctis véstibus de Bosra ? Iste formósus in stola sua, grádiens in multitúdine fortitúdinis suae. Ego, qui loquor justítiam, et propugnátor sum ad salvándum. Quare ergo rubrum est induméntum tuum, et vestiménta tua sicut calcántium in torculári ? Tórcular calcávi solus, et de géntibus non est vir mecum: calcávi eos in furóre meo, et conculcávi eos in ira mea: et aspérsus est sanguis eórum super vestiménta mea, et ómnia induménta mea inquinávi. Dies enim ultiónis in corde meo, annus redemptiónis meae venit. Circumspéxi, et non erat auxiliátor: quaesívi, et non fuit qui adjuváret: et salvávit mihi bráchium meum, et indignátio mea ipsa auxiliáta est mihi. Et conculcávi pópulos in furóre meo, et inebriávi eos in indignatióne mea, et detráxi in terram virtútem eórum. Miseratiónum Dómini recordábor, laudem Dómini super ómnibus, quae réddidit nobis Dóminus Deus noster.
Graduale Ps. 68, 21-22 Impropérium exspectávit cor meum, et misériam: et sustínui, qui simul mecum contristarétur, et non fuit: consolántem me quaesívi, et non invéni. V/. Dedérunt in escam meam fel, et in siti mea potavérunt me acéto.
Tractus Isai. 53, 4-5 Vere languóres nostros ipse tulit, et dolóres nostros ipse portávit. V/. Et nos putávimus eum quasi leprósum, et percússum a Deo, et humiliátum. V/. Ipse autem vulnerátus est propter iniquitátes nostras, attrítus est propter scélera nostra. V/. Disciplína pacis nostrae super eum: et livóre ejus sanáti sumus.
In Missis per annum post Graduale, omisso Tractu, dicitur:
Allelúja, allelúja. V/. Ave, Rex noster: tu solus nostros es miserátus erróres: Patri obédiens, ductus es ad crucifigéndum, ut agnus mansuétus ad occisiónem. Allelúja.
Tempore autem Paschali, omissis Graduali et Tractu, dicitur:
Allelúja, allelúja. V/. Ave, Rex noster: tu solus nostros es miserátus erróres: Patri obédiens, ductus es ad crucifigéndum, ut agnus mansuétus ad occisiónem. Allelúja. V/. Tibi glória, hosánna: tibi triúmphus et victória: tibi summae laudis et honóris coróna. Allelúja.
+ Sequéntia sancti Evangélii secúndum Marcum.
Marc. 15, 42-46
IN illo témpore: Cum jam sero esset factum (quia erat Parascéve, quod est ante sábbatum) venit Joseph ab Arimathaéa, nóbilis decúrio, qui et ipse erat exspéctans regnum Dei, et audácter introívit ad Pilátum, et pétiit corpus Jesu. Pilátus autem mirabátur si jam obiísset. Et accersíto centurióne, interrogávit eum si jam mórtuus esset. Et cu m cognovísset a centurióne, donávit corpus Joseph. Joseph autem mercátus síndonem, et depónens eum invólvit síndone, et pósuit eum in monuménto, quod erat excísum de petra, et advólvit lápidem ad óstium monuménti.
Credo.
Offertorium Levit. 16, 2 et 5 Ingréssus Aaron tabernáculum, ut holocáustum offérret super altáre pro peccátis filiórum Israël, túnica línea indútus est.
Secreta
ACCÉPTA tibi, Dómine, sint haec múnera: cui pro mundi salúte grata éxstitit Fílii tui pássio gloriósa: Qui tecum vivit.
Praefatio de Cruce.
Communio Marc. 15, 46 Joseph autem mercátus síndonem, et depónens eum invólvit síndone.
Postcommunio
SATIÁSTI, Dómine, famíliam tuam munéribus sacris: quaésumus ; ut, per temporálem Fílii tui mortem, quam mystéria veneránda testántur, vitam te nobis dedísse perpétuam confidámus. Per eúmdem Dóminum.
post Dominicam III Quadragesimae
Missa Humiliávit, quae habetur inter votivas circa finem Missalis, cum Orationibus ut infra ; et dicitur Credo.
Oratio P
DEUS, qui unigéniti Fílii tui passióne et, per quinque Vúlnera ejus, sánguinis effusióne, humánam natúram peccáto pérditam reparásti: tríbue nobis, quaésumus ; ut, qui ab eo suscépta Vúlnera venerámur in terris, ejúsdem pretiosíssimi sánguinis fructum cónsequi mereámur in caelis. Per eúmdem Dóminum.
Secreta P
MAJESTÁTI tuae, quaésumus, Dómine, accépta sint dona: in quibus ipsa Unigéniti tui Vúlnera tibi offérimus, nostrae prétia libertátis. Per eúmdem Dóminum.
Postcommunio P
REFÉCTI vitálibus alimóniis, quaésumus, Dómine Deus noster: ut qui Vúlnera Dómini nostri Jesu Christi hódie devóte cólimus ; haec in nostris córdibus impréssa, móribus et vita teneámus. Per eúmdem Dóminum.
post Dominicam IV Quadragesimae
Missa Redemísti, ut in Missali, die 1 Julii.
Die 22 Martii
Viduae
Introitus Ps. 41, 3
SITÍVIT ánima mea ad Deum fortem vivum: quando véniam et apparébo ante fáciem Dei ? Ps. ibid., 2 Quemádmodum desíderat cervus ad fontes aquárum: ita desíderat ánima mea ad te, Deus. V/. Glória Patri.
Oratio
DEUS, qui beátam Catharínam, in contemplánda Fílii tui passióne, divíni amóris igne flagráre fecísti: quaésumus ; ut, ipsa intercedénte, tuae in nobis flammam caritátis accéndas, et ejúsdem passiónis, partícipes dignánter effícias. Per eúmdem Dóminum.
Léctio libri Sapiéntiae.
Prov. 31, 10-31
MULÍEREM fortem quis invéniet ? Procul, et de últimis fínibus prétium ejus. Confídit in ea cor viri sui, et spóliis non indigébit. Reddet ei bonum, et non malum, ómnibus diébus vitae suae. Quaesívit lanam et linum, et operáta est consílio mánuum suárum. Facta est quasi navis institóris, de longe portans panem suum. Et de nocte surréxit, dedítque praedam domésticis suis, et cibária ancíllis suis. Considerávit agrum, et emit eum: de fructu mánuum suárum plantávit víneam. Accínxit fortitúdine lumbos suos, et roborávit bráchium suum. Gustávit, et vidit quia bona est negotiátio ejus: non exstinguétur in nocte lucérna ejus. Manum suam misit ad fórtia, et dígiti ejus apprehendérunt fusum. Manum suam apéruit ínopi, et palmas suas exténdit ad páuperem. Non timébit dómui suae a frigóribus nivis: omnes enim doméstici ejus vestíti sunt duplícibus. Stragulátam vestem fecit sibi: byssus, et púrpura induméntum ejus. Nóbilis in portis vir ejus, quando séderit cum senatóribus terrae. Síndonem fecit et véndidit, et cíngulum trádidit Chananaéo. Fortitúdo et decor induméntum ejus, et ridébit in die novíssimo. Os suum apéruit sapiéntiae, et lex cleméntiae in lingua ejus. Considerávit sémitas domus suae, et panem otiósa non comédit. Surrexérunt fílii ejus, et beatíssimam praedicavérunt: vir ejus, et laudávit eam. Multae fíliae congregavérunt divítias: tu supergréssa es univérsas. Fallax grátia, et vana est pulchritúdo: múlier timens Dóminum, ipsa laudábitur. Date ei de fructu mánuum suárum: et laudent eam in portis ópera ejus.
Graduale Ps. 44, 3 Diffúsa est grátia in lábiis tuis: proptérea benedíxit te Deus in aetérnum. V/. Ibid., 5 Propter veritátem, et mansuetúdinem, et justítiam: et dedúcet te mirabíliter déxtera tua.
Allelúja, allelúja . V/. Ps. 72, 25-26 Quid mihi est in caelo ? et a te quid vólui super terram ? Defécit caro mea, et cor meum: Deus cordis mei et pars mea Deus in aetérnum. Allelúja.
Post Septuagesimam, omissis Allelúja et Versu sequenti, dicitur
Tractus Veni, sponsa Christi, áccipe corónam, quam tibi Dóminus praeparávit in aetérnum. V/. Ps. 44, 8 et 5 Dilexísti justítiam, et odísti iniquitátem: proptérea unxit te Deus, Deus tuus, óleo laetítiae prae consórtibus tuis. V/. Spécie tua et pulchritúdine tua inténde, próspere procéde, et regna.
Tempore autem Paschali omittitur Graduale, et ejus loco dicitur:
Allelúja, allelúja . V/. Ps. 72, 25-26 Quid mihi est in caelo ? et a te quid vólui super terram ? Defécit caro mea, et cor meum: Deus cordis mei et pars mea Deus in aetérnum. Allelúja. V/. Concáluit cor meum intra me: et in meditatióne mea exardéscet ignis. Allelúja.
+ Sequéntia sancti Evangélii secúndum Matthaéum.
Matth. 13, 44-52
IN illo témpore: Dixit Jesus discípulis suis parábolam hanc: Símile est regnum caelórum thesáuro abscóndito in agro: quem, qui invénit homo, abscóndit, et prae gáudio illíus vadit, et vendit univérsa, quae habet, et emit agrum illum. Iterum símile est regnum caelórum hómini negotiatóri, quaerénti bonas margarítas. Invénta autem una pretiósa margaríta, ábiit, et véndidit ómnia, quae hábuit, et emit eam. Iterum símile est regnum caelórum sagénae missae in mare, et ex omni génere píscium congregánti. Quam, cum impléta esset, educéntes, et secus littus sedéntes, elegérunt bonos in vasa, malos autem foras misérunt. Sic erit in consummatióne saéculi: exíbunt Angeli, et separábunt malos de médio justórum, et mittent eos in camínum ignis: ibi erit fletus, et stridor déntium. Intellexístis haec ómnia ? Dicunt ei: Etiam. Ait illis: Ideo omnis scriba doctus in regno caelórum símilis est hómini patrifamílias, qui profert de thesáuro suo nova et vétera.
Offertorium Ps. 107, 2 Parátum cor meum, Deus, parátum cor meum: cantábo, et psállam in glória mea.
Secreta
HIS sacrifíciis, quaésumus, omnípotens Deus, propitiátus inténde: et, beáta Catharína intercedénte, spíritum in nobis tuae dilectiónis accénde. Per Dóminum.
Communio Ps. 83, 3 Cor meum et caro mea exsultavérunt in Deum vivum.
Postcommunio
SÚPPLICES te rogámus, omnípotens Deus: ut, quos tuis refícere dignátus es sacraméntis, intercedénte beáta Catharína, tríbuas pro tui amóre terréna despícere ; et caeléstium semper participatióne gaudére. Per Dóminum.
Die 16 Aprilis
Confessoris
Introitus Jer. 12, 7 ; Ps. 85, 1 ; 26, 10
RELÍQUI domum meam: dimísi hereditátem meam: inops et pauper ego sum: Dóminus autem assúmpsit me. (T. P. Allelúja, allelúja.) Ps. 41, 2 Quemádmodum desíderat cervus ad fontes aquárum, ita desíderat ánima mea ad te, Deus. V/. Glória Patri.
Oratio
DEUS, qui sanctum Benedíctum Joséphum Confessórem tuum, humilitátis stúdio et paupertátis amóre, tibi uni adhaerére fecísti: da nobis ejus suffragántibus méritis ; terréna cuncta despícere, et caeléstia semper inquírere. Per Dóminum.
Léctio Epístolae beáti Pauli Apóstoli ad Timótheum.
1 Tim. 6, 6-12
CARÍSSIME: Est quaestus magnus píetas cum sufficiéntia. Nihil enim intúlimus in hunc mundum: haud dúbium quod nec auférre quid póssumus. Habéntes autem aliménta, et quibus tegámur, his conténti simus. Nam qui volunt dívites fíeri, íncidunt in tentatiónem, et in láqueum diáboli, et desidéria multa inutília et nocíva, quae mergunt hómines in intéritum et perditiónem. Radix enim ómnium malórum est cupíditas: quam quidam appeténtes, erravérunt a fide, et inseruérunt se dolóribus multis. Tu autem, o homo Dei, haec fuge: sectáre vero justítiam, pietátem, fidem, caritátem, patiéntiam, mansuetúdinem. Certa bonum certámen fídei, apprehénde vitam aetérnam.
Graduale Ps. 39, 5 et 18 Beátus vir, cujus est nomen Dómini spes ejus, et non respéxit in vanitátes et insánias falsas. V/. Ego autem mendícus sum et pauper: Dóminus sollícitus est mei. Adjútor meus, et protéctor meus tu es.
Allelúja, allelúja. V/. Ps. 38, 13 Exáudi oratiónem meam, Dómine, et deprecatiónem meam: áuribus pércipe lácrimas meas: quóniam ádvena ego sum apud te, et peregrínus. Allelúja.
Post Septuagesimam, omissis Allelúja et Versu sequenti, dicitur
Tractus 1 Joann 2, 15, 16 et 17 Nolíte dilígere mundum, neque ea quae in mundo sunt. Si quis díligit mundum, non est cáritas Patris in eo. V/. Omne, quod est in mundo, concupiscéntia carnis est, et concupiscéntia oculórum, et supérbia vitae. V/. Et mundus transit, et concupiscéntia ejus: qui autem facit voluntátem Dei, manet in aetérnum.
Tempore autem Paschali omittitur Graduale, et ejus loco dicitur:
Allelúja , allelúja. V/. Ps. 112, 5-6 Quis sicut Dóminus Deus noster, qui in altis hábitat, et humília réspicit in caelo et in terra ? Allelúja. V/. Ibid., 7-8 Súscitans a terra ínopem, et de stércore érigens páuperem: ut cóllocet eum cum princípibus, cum princípibus pópuli sui. Allelúja.
+ Sequéntia sancti Evangélii secúndum Matthaéum.
Matth. 16, 24-27
IN illo témpore: Dixit Jesus discípulis suis: Si quis vult post me veníre, ábneget semetípsum, et tollat crucem suam, et sequátur me. Qui enim volúerit ánimam suam salvam fácere, perdet eam: qui autem perdíderit ánimam suam propter me, invéniet eam. Quid enim prodest hómini, si mundum univérsum lucrétur, ánimae vero suae detriméntum patiátur ? Aut quam dabit homo commutatiónem pro ánima sua ? Fílius enim hóminis ventúrus est in glória Patris sui cum Angelis suis: et tunc reddet unicuíque secúndum ópera ejus.
Offertorium Hebr. 13, 14 et 15 Non habémus hic manéntem civitátem, sed futúram inquírimus: offerámus ergo hóstiam laudis semper Deo, fructum labiórum confiténtium nómini ejus. (T. P. Allelúja.)
Secreta
OBLÁTA múnera, clementíssime Deus, propítius réspice: et, sancti Benedícti Joséphi Confessóris tui interveniénte suffrágio, in salútem nobis proveníre concéde. Per Dóminum.
Communio Matth. 5, 3 et 8 Beáti páuperes spíritu, quóniam ipsórum est regnum caelórum: beáti mundo corde, quóniam ipsi Deum vidébunt. (T. P. Allelúja.)
Postcommunio
SACRIS, Dómine, refécti munéribus ; quaésumus ; ut sancti Benedícti Joséphi Confessóris tui virtútes imitémur, cujus póscimus méritis adjuvári. Per Dóminum.
Die 26 Aprilis
Introitus
GAUDEÁMUS omnes in Dómino, diem festum celebrántes sub honóre beátae Maríae Vírginis, Boni Consílii Matris: de cujus solemnitáte gaudent Angeli, et colláudant Fílium Dei. (T. P. Allelúja, allelúja.) Ps. 44, 2 Eructávit cor meum verbum bonum: dico ego ópera mea Regi. V/. Glória Patri.
Oratio
DEUS, qui Genitrícem dilécti Fílii tui matrem nobis dedísti, ejúsque speciósam Imáginem mira apparitióne clarificáre dignátus es: concéde, quaésumus ; ut, ejúsdem mónitis júgiter inhaeréntes, secúndum cor tuum vívere, et ad caeléstem pátriam felíciter perveníre valeámus. Per eúmdem Dóminum.
Léctio libri Sapiéntiae.
Eccli. 24, 23-31
EGO quasi vitis fructificávi suavitátem odóris: et flores mei, fructus honóris et honestátis. Ego mater pulchrae dilectiónis, et timóris, et agnitiónis, et sanctae spei. In me grátia omnis viae et veritátis: in me omnis spes vitae et virtútis. Transíte ad me, omnes qui concupíscitis me, et a generatiónibus meis implémini. Spíritus enim meus super mel dulcis, et heréditas mea super mel et favum. Memória mea in generatiónes saeculórum. Qui edunt me, adhuc esúrient: et qui bibunt me, adhuc sítient. Qui audit me, non confundétur: et qui operántur in me, non peccábunt. Qui elúcidant me, vitam aetérnam habébunt.
Graduale Prov. 8, 12 et 34 Ego sapiéntia hábito in consílio, et erudítis intérsum cogitatiónibus. V/. Beátus homo qui audit me, et vígilat ad fores meas quotídie, et obsérvat ad postes óstii mei.
Allelúja, allelúja. V/. Ibid., 35 Qui me invénerit, invéniet vitam, et háuriet salútem a Dómino. Allelúja.
Post Septuagesimam, omissis Allelúja et Versu sequenti, dicitur
Tractus Prov. 8, 14, 17, et 20-21 Meum est consílium et aéquitas, mea est prudéntia, mea est fortitúdo. V/. Ego diligéntes me díligo: et qui mane vígilant ad me, invénient me. V/. In viis justítiae ámbulo, in médio semitárum judícii. V/. Ut ditem diligéntes me, et thesáuros eórum répleam.
Tempore autem Paschali omittitur Graduale, et ejus loco dicitur:
Allelúja , allelúja. V/. Luc. 1, 28 Ave, María, grátia plena: Dóminus tecum: benedícta tu in muliéribus. Allelúja. V/. Per te, Dei Génitrix, nobis est vita pérdita data: quae de caelo suscepísti prolem, et mundo genuísti Salvatórem. Allelúja.
+ Sequéntia sancti Evangélii secúndum Lucam.
Luc. 1, 26-33
IN illo témpore: Missus est Angelus Gábriel a Deo in civitátem Galilaéae, cui nomen Názareth, ad Vírginem desponsátam viro, cui nomen erat Joseph, de domo David, et nomen Vírginis María. Et ingréssus Angelus ad eam, dixit: Ave, grátia plena: Dóminus tecum: benedícta tu in muliéribus. Quae cum audísset, turbáta est in sermóne ejus: et cogitábat qualis esset ista salutátio. Et ait Angelus ei: Ne tímeas, María, invenísti enim grátiam apud Deum: ecce concípies in útero, et páries fílium, et vocábis nomen ejus Jesum. Hic erit magnus, et Fílius Altíssimi vocábitur, et dabit illi Dóminus Deus sedem David patris ejus: et regnábit in domo Jacob in aetérnum, et regni ejus non erit finis.
Credo.
Offertorium Jerem. 18, 20 Recordáre, Virgo Mater, in conspéctu Dei, ut loquáris pro nobis bona, et ut avértat indignatiónem suam a nobis. (T. P. Allelúja.)
Secreta
SANCTÍFICA, Dómine, quaésumus, obláta libámina: et beátae Dei Genitrícis Maríae, Boni Consílii Matris, salubérrima intercessióne, nobis salutária fore concéde. Per eúmdem Dóminum.
Praefatio de beata Maria Virgine Et te in Festivitáte.
Communio Regína mundi digníssima, María Virgo perpétua, intercéde pro nostra pace et salúte, quae genuísti Christum Dóminum Salvatórem ómnium. (T. P. Allelúja.)
Postcommunio
ADJUVET nos, quaésumus, Dómine, gloriósae tuae Genitrícis sempérque Vírginis Maríae, Matris Boni Consílii, intercéssio veneránda: ut, quos perpétuis cumulávit benefíciis ; ea quae agénda sunt júgiter vidére fáciat, et ad implénda quae víderint convaléscere: Qui vivis.
Die 15 Maji
Confessoris
Introitus Ps. 91, 13-14
JUSTUS ut palma florébit: sicut cedrus Líbani multiplicábitur: plantátus in domo Dómini: in átriis domus Dei nostri. (T. P. Allelúja, allelúja.) Ps. ibid., 2 Bonum est confitéri Dómino: et psállere nómini tuo, Altíssime. V/. Glória Patri.
Oratio
DA nobis, quaésumus, miséricors Deus: beáto Isidóro agrícola Confessóre tuo intercedénte, supérbe non sápere ; sed ejus méritis et exémplis, plácita tibi semper humilitáte deservíre. Per Dóminum.
Léctio Epístolae beáti Jacóbi Apóstoli.
Jac. 5, 7-8, 11 et 16-18
PATIÉNTES estóte, fratres, usque ad advéntum Dómini. Ecce agrícola exspéctat pretiósum fructum terrae, patiénter ferens donec accípiat temporáneum et serótinum. Patiéntes ígitur estóte et vos, et confirmáte corda vestra: quóniam advéntus Dómini appropinquávit. Ecce beatificámus eos, qui sustinuérunt. Sufferéntiam Job audístis, et finem Dómini vidístis, quóniam miséricors Dóminus est, et miserátor. Confitémini ergo altérutrum peccáta vestra, et oráte pro ínvicem, ut salvémini: multum enim valet deprecátio justi assídua. Elías homo erat símilis nobis passíbilis: et oratióne orávit ut non plúeret super terram, et non pluit annos tres et menses sex. Et rursum orávit: et caelum dedit plúviam, et terra dedit fructum suum.
Graduale Ps. 36, 30-31 Os justi meditábitur sapiéntiam, et lingua ejus loquétur judícium. V/. Lex Dei ejus in corde ipsíus: et non supplantabúntur gressus ejus.
Allelúja, allelúja. V/. Ps. 111, 1 Beátus vir, qui timet Dóminum: in mandátis ejus cupit nimis. Allelúja.
Post Septuagesimam, omissis Allelúja et Versu sequenti, dicitur
Tractus Ps. 111, 1-3 Beátus vir, qui timet Dóminum: in mandátis ejus cupit nimis. V/. Potens in terra erit semen ejus: generátio rectórum benedicétur. V/. Glória et divítiae in domo ejus: et justítia ejus manet in saéculum saéculi.
Tempore autem Paschali omittitur Graduale, et ejus loco dicitur:
Allelúja, allelúja. V/. Ps. 111, 1 Beátus vir, qui timet Dóminum: in mandátis ejus cupit nimis. Allelúja. V/. Osee 14, 6 Justus germinábit sicut lílium: et florébit in aetérnum ante Dóminum. Allelúja.
+ Sequéntia sancti Evangélii secúndum Joánnem.
Joann. 15, 1-7
IN illo témpore: Dixit Jesus discípulis suis: Ego sum vitis vera: et Pater meus agrícola est. Omnem pálmitem in me non feréntem fructum, tollet eum: et omnem, qui fert fructum, purgábit eum, ut fructum plus áfferat. Jam vos mundi estis propter sermónem, quem locútus sum vobis. Manéte in me: et ego in vobis. Sicut palmes non potest ferre fructum a semetípso, nisi mánserit in vite: sic nec vos, nisi in me manséritis. Ego sum vitis, vos pálmites: qui manet in me, et ego in eo, hic fert fructum multum: quia sine me nihil potéstis fácere. Si quis in me non mánserit, mittétur foras sicut palmes, et aréscet, et cólligent eum, et in ignem mittent, et ardet. Si manséritis in me, et verba mea in vobis mánserint: quodcúmque voluéritis petétis, et fiet vobis.
Offertorium Ps. 20, 2-3 In virtúte tua, Dómine, laetábitur justus, et super salutáre tuum exsultábit veheménter: desidérium ánimae ejus tribuísti ei. (T. P. Allelúja.)
Secreta
PROPITIÁRE, Dómine, supplicatiónibus nostris, et has pópuli tui oblatiónes benígnus assúme: ut, intercedénte beáto Isidóro Confessóre tuo, quod fidéliter pétimus, efficáciter consequámur. Per Dóminum.
Communio Matth. 19, 28 et 29 Amen dico vobis, quod vos, qui reliquístis ómnia et secúti estis me, céntuplum accipiétis, et vitam aetérnam possidébitis. (T. P. Allelúja.)
Postcommunio
SIT nobis, Dómine, reparátio mentis et córporis caeléste mystérium: et praesta ; ut, cujus exséquimur cultum, intercedénte sancto Isidóro Confessóre tuo, sentiámus efféctum. Per Dóminum.
Missale Romanum 1957 - S. MARGARITAE DE CORTONA