Missale Romanum 1957 - S. LUDOVICI


Die 26 Augusti

S. ZEPHYRINI

Papae et Martyris


Simplex



Missa Si díligis me, de Communi Summorum Pontificum.


Oratio
C


GREGEM tuum, Pastor aetérne, placátus inténde: et per beátum Zephyrínum Mártyrem tuum atque Summum Pontíficem, perpétua protectióne custódi ; quem totíus Ecclésiae praestitísti esse pastórem. Per Dóminum.


Secreta
C


OBLÁTIS munéribus, quaésumus, Dómine, Ecclésiam tuam benígnus illúmina: ut, et gregis tui profíciat ubíque succéssus, et grati fiant nómini tuo, te gubernánte, pastóres. Per Dóminum.


Postcommunio
C


REFECTIÓNE sancta enutrítam gubérna, quaésumus, Dómine, tuam placátus Ecclésiam: ut poténti moderatióne dirécta, et increménta libertátis accípiat, et in religiónis integritáte persístat. Per Dóminum.



Die 27 Augusti

S. JOSEPHI CALASANCTII

Confessoris


Duplex



Introitus Ps. 33, 12
VENÍTE, fílii, audíte me: timórem Dómini docébo vos. Ps. ibid., 2 Benedícam Dóminum in omni témpore: semper laus ejus in ore meo. V/. Glória Patri.


Oratio


DEUS, qui per sanctum Joséphum Confessórem tuum, ad erudiéndam spíritu intelligéntiae ac pietátis juventútem, novum Ecclésiae tuae subsídium providére dignátus es: praesta, quaésumus ; nos, ejus exémplo et intercessióne, ita fácere et docére, ut praémia consequámur aetérna. Per Dóminum.


Léctio libri Sapiéntiae.

Sap. 10, 10-14


JUSTUM dedúxit Dóminus per vias rectas, et osténdit illi regnum Dei, et dedit illi sciéntiam sanctórum: honestávit illum in labóribus, et complévit labóres illíus. In fraude circumveniéntium illum áffuit illi, et honéstum fecit illum. Custodívit illum ab inimícis, et a seductóribus tutávit illum, et certámen forte dedit illi, ut vínceret, et sciret, quóniam ómnium poténtior est sapiéntia. Haec vénditum justum non derelíquit, sed a peccatóribus liberávit eum: descendítque cum illo in fóveam, et in vínculis non derelíquit illum, donec afférret illi sceptrum regni, et poténtiam advérsus eos, qui eum deprimébant: et mendáces osténdit, qui maculavérunt illum, et dedit illi claritátem aetérnam. Dóminus Deus noster.


Graduale Ps. 36, 30-31 Os justi meditábitur sapiéntiam, et lingua ejus loquétur judícium. V/. Lex Dei ejus in corde ipsíus: et non supplantabúntur gressus ejus.
Allelúja, allelúja. V/. Jac. 1, 12 Beátus vir, qui suffert tentatiónem: quóniam cum probátus fúerit, accípiet corónam vitae. Allelúja.


+ Sequéntia sancti Evangélii secúndum Matthaéum.

Matth. 18, 1-5


IN illo témpore: Accessérunt discípuli ad Jesum dicéntes: Quis putas major est in regno caelórum ? Et ádvocans Jesus párvulum státuit eum in médio eórum, et dixit: Amen dico vobis, nisi convérsi fuéritis, et efficiámini sicut párvuli, non intrábitis in regnum caelórum. Quicúmque ergo humiliáverit se sicut párvulus iste, hic est major in regno caelórum. Et qui suscéperit unum párvulum talem in nómine meo, me súscipit.


Offertorium Ps. 9, 17 Desidérium páuperum exaudívit Dóminus: praeparatiónem cordis eórum audívit auris tua.


Secreta


ALTÁRE tuum, Dómine, munéribus cumulámus oblátis: ut ejus nobis fiant supplicatióne propítia, cujus nos donásti patrocínio adjuvári. Per Dóminum.


Communio Marc. 10, 14 Sínite párvulos veníre ad me, et ne prohibuéritis eos: tálium est enim regnum Dei.


Postcommunio


SANCTIFICÁTI, Dómine, salutári mystério: quaésumus ; ut, intercedénte sancto Josépho Confessóre tuo, ad majus semper proficiámus pietátis increméntum. Per Dóminum.



Die 28 Augusti

S. AUGUSTINI

Episcopi, Confessoris et Ecclesiae Doctoris


Duplex



Introitus Eccli. 15, 5
IN médio Ecclésiae apéruit os ejus: et implévit eum Dóminus spíritu sapiéntiae, et intelléctus: stolam glóriae índuit eum. Ps. 91, 2 Bonum est confitéri Dómino: et psállere nómini tuo, Altíssime. V/. Glória Patri.


Oratio


ADÉSTO supplicatiónibus nostris, omnípotens Deus: et, quibus fidúciam sperándae pietátis indúlges, intercedénte beáto Augustíno Confessóre tuo atque Pontífice, consuétae misericórdiae tríbue benígnus efféctum. Per Dóminum.

Et fit Commemoratio S. Hermetis Martyris.

Oratio


DEUS, qui beátum Hermétem Mártyrem tuum virtúte constántiae in passióne roborásti: ex ejus nobis imitatióne tríbue ; pro amóre tuo próspera mundi despícere, et nulla ejus advérsa formidáre. Per Dóminum.


Léctio Epístolae beáti Pauli Apóstoli ad Timótheum.

2 Tim. 4, 1-8


CARÍSSIME: Testíficor coram Deo, et Jesu Christo, qui judicatúrus est vivos et mórtuos, per advéntum ipsíus, et regnum ejus: praédica verbum, insta opportúne, importúne: árgue, óbsecra, íncrepa in omni patiéntia et doctrína. Erit enim tempus, cum sanam doctrínam non sustinébunt, sed ad sua desidéria coacervábunt sibi magístros, pruriéntes áuribus, et a veritáte quidem audítum avértent, ad fábulas autem converténtur. Tu vero vígila, in ómnibus labóra, opus fac Evangelístae, ministérium tuum imple. Sóbrius esto. Ego enim jam delíbor, et tempus resolutiónis meae instat. Bonum certámen certávi, cursum consummávi, fidem servávi. In réliquo repósita est mihi coróna justítiae, quam reddet mihi Dóminus in illa die, justus judex: non solum autem mihi, sed et iis, qui díligunt advéntum ejus.


Graduale Ps. 36, 30-31 Os justi meditábitur sapiéntiam, et lingua ejus loquétur judícium. V/. Lex Dei ejus in corde ipsíus: et non supplantabúntur gressus ejus.
Allelúja , allelúja. V/. Ps. 88, 21 Invéni David servum meum, óleo sancto meo unxi eum. Allelúja.


+ Sequéntia sancti Evangélii secúndum Matthaéum.

Matth. 5, 13-19


IN illo témpore: Dixit Jesus discípulis suis: Vos estis sal terrae. Quod si sal evanúerit, in quo saliétur ? Ad níhilum valet ultra, nisi ut mittátur foras, et conculcétur ab homínibus. Vos estis lux mundi. Non potest cívitas abscóndi supra montem pósita. Neque accéndunt lucérnam, et ponunt eam sub módio, sed super candelábrum, ut lúceat ómnibus qui in domo sunt. Sic lúceat lux vestra coram homínibus, ut vídeant ópera vestra bona, et gloríficent Patrem vestrum, qui in caelis est. Nolíte putáre, quóniam veni sólvere legem, aut prophétas: non veni sólvere, sed adimplére. Amen quippe dico vobis, donec tránseat caelum et terra, jota unum, aut unus apex non praeteríbit a lege, donec ómnia fiant. Qui ergo sólverit unum de mandátis istis mínimis, et docúerit sic hómines, mínimus vocábitur in regno caelórum: qui autem fécerit, et docúerit, hic magnus vocábitur in regno caelórum.


Credo.


Offertorium Ps. 91, 13 Justus ut palma florébit: sicut cedrus, quae in Líbano est, multiplicábitur.


Secreta


SANCTI Augustíni Pontíficis tui atque Doctóris nobis, Dómine, pia non desit orátio: quae, et múnera nostra concíliet ; et tuam nobis indulgéntiam semper obtíneat. Per Dóminum.

Pro S. Hermete

Secreta


SACRIFÍCIUM tibi, Dómine, laudis offérimus in tuórum commemoratióne Sanctórum: da, quaésumus ; ut, quod illis cóntulit glóriam, nobis prosit ad salútem. Per Dóminum.


Communio Luc. 12, 42 Fidélis servus et prudens, quem constítuit dóminus super famíliam suam: ut det illis in témpore trítici mensúram.


Postcommunio


UT nobis, Dómine, tua sacrifícia dent salútem: beátus Augustínus Póntifex tuus et Doctor egrégius, quaésumus, precátor accédat. Per Dóminum.

Pro S. Hermete

Postcommunio


REPLÉTI, Dómine, benedictióne caelésti, quaésumus cleméntiam tuam: ut, intercedénte beáto Herméte Mártyre tuo, quae humíliter gérimus, salúbriter sentiámus. Per Dóminum.



Eadem die 28 Augusti

Pro S. HERMETE

Mart.


Semiduplex



Missa Laetábitur, de Communi unius Martyris 4 loco, cum Orationibus ut infra.


Oratio
P


DEUS, qui beátum Hermétem Mártyrem tuum virtúte constántiae in passióne roborásti: ex ejus nobis imitatióne tríbue ; pro amóre próspera mundi despícere, et nulla ejus advérsa formidáre. Per Dóminum.


Secreta
P


SACRIFÍCIUM tibi, Dómine, laudis offérimus in tuórum commemoratióne Sanctórum: da, quaésumus ; ut, quod illis cóntulit glóriam, nobis prosit ad salútem. Per Dóminum.


Postcommunio
P


REPLÉTI, Dómine, benedictióne caelésti, quaésumus cleméntiam tuam: ut, intercedénte beáto Herméte Mártyre tuo, quae humíliter gérimus, salúbriter sentiámus. Per Dóminum.



Die 29 Augusti

IN DECOLLATIONE

S. JOANNIS BAPTISTAE

Duplex majus



Introitus Ps. 118, 46-47
LOQUÉBAR de testimóniis tuis in conspéctu regum, et non confundébar: et meditábar in mandátis tuis, quae diléxi nimis. Ps. 91, 2 Bonum est confitéri Dómino: et psállere nómini tuo, Altíssime. V/. Glória Patri.


Oratio


SANCTI Joánnis Baptístae Praecursóris et Mártyris tui, quaésumus, Dómine, veneránda festívitas: salutáris auxílii nobis praestet efféctum: Qui vivis.

Et fit Commemoratio S. Sabinae Martyris.

Oratio


DEUS, qui inter cétera poténtiae tuae mirácula étiam in sexu frágili victóriam martýrii contulísti: concéde propítius ; ut, qui beátae Sabínae Mártyris tuae natalítia cólimus, per ejus ad te exémpla gradiámur. Per Dóminum.


Léctio Jeremíae Prophétae.

Jerem. 1, 17-19


IN diébus illis: Factum est verbum Dómini ad me, dicens: Accínge lumbos tuos, et surge, et lóquere ad Juda ómnia, quae ego praecípio tibi. Ne formídes a fácie eórum: nec enim timére te fáciam vultum eórum. Ego quippe dedi te hódie in civitátem munítam, et in colúmnam férream, et in murum aéreum, super omnem terram, régibus Juda, princípibus ejus, et sacerdótibus, et pópulo terrae. Et bellábunt advérsum te, et non praevalébunt: quia ego tecum sum, ait Dóminus, ut líberem te.


Graduale Ps. 91, 13 et 14 Justus ut palma florébit: sicut cedrus Líbani multiplicábitur in domo Dómini. V/. Ibid., 3 Ad annuntiándum mane misericórdiam tuam, et veritátem tuam per noctem.
Allelúja , allelúja. V/. Osee 14, 6 Justus germinábit sicut lílium: et florébit in aetérnum ante Dóminum. Allelúja.


+ Sequéntia sancti Evangélii secúndum Marcum.

Marc. 6, 17-29


IN illo témpore: Misit Heródes, ac ténuit Joánnem, et vinxit eum in cárcere propter Herodíadem uxórem Philíppi fratris sui, quia dúxerat eam. Dicébat enim Joánnes Heródi: Non licet tibi habére uxórem fratris tui. Heródias autem insidiabátur illi, et volébat occídere eum, nec póterat. Heródes enim metuébat Joánnem, sciens eum virum justum et sanctum: et custodiébat eum, et audíto eo multa faciébat, et libénter eum audiébat. Et cum dies opportúnus accidísset, Heródes natális sui cenam fecit princípibus, et tribúnis, et primis Galilaéae. Cumque introísset fília ipsíus Herodíadis, et saltásset, et placuísset Heródi, simúlque recumbéntibus ; rex ait puéllae: Pete a me quod vis, et dabo tibi. Et jurávit illi: Quia quidquid petíeris dabo tibi, licet dimídium regni mei. Quae cum exiísset, dixit matri suae: Quid petam ? At illa dixit: Caput Joánnis Baptístae. Cumque introísset statim cum festinatióne ad regem, petívit dicens: Volo ut prótinus des mihi in disco caput Joánnis Baptístae. Et contristátus est rex: propter jusjurándum, et propter simul recumbéntes nóluit eam contristáre: sed misso spiculatóre, praecépit afférri caput ejus in disco. Et decollávit eum in cárcere. Et áttulit caput ejus in disco: et dedit illud puéllae, et puélla dedit matri suae. Quo audíto, discípuli ejus venérunt, et tulérunt corpus ejus: et posuérunt illud in monuménto.


Offertorium Ps. 20, 2-3 In virtúte tua, Dómine, laetábitur justus, et super salutáre tuum exsultábit veheménter: desidérium ánimae ejus tribuísti ei.


Secreta


MÚNERA, quae tibi, Dómine, pro sancti Mártyris tui Joánnis Baptístae passióne deférimus: quaésumus ; ut ejus obténtu nobis profíciant ad salútem. Per Dóminum.

Pro S. Sabina

Secreta


HÓSTIAS tibi, Dómine, beátae Sabínae Mártyris tuae dicátas méritis, benígnus assúme: et ad perpétuum nobis tríbue proveníre subsídium. Per Dóminum.


Communio Ps. 20, 4 Posuísti, Dómine, in cápite ejus corónam de lápide pretióso.


Postcommunio


CÓNFERAT nobis, Dómine, sancti Joánnis Baptístae solémnitas: ut et magnífica sacraménta, quae súmpsimus, significáta venerémur, et in nobis pótius édita gaudeámus. Per Dóminum.

Pro S. Sabina

Postcommunio


DIVÍNI múneris largitáte satiáti, quaésumus, Dómine Deus noster: ut, intercedénte beáta Sabína Mártyre tua, in ejus semper participatióne vivámus. Per Dóminum.



Eadem die 29 Augusti

Pro S. SABINA

Martyre



Missa Me exspectavérunt, de Communi non Virginum 1 loco, cum Orationibus ut infra.


Oratio
P


DEUS, qui inter cétera poténtiae tuae mirácula étiam in sexu frágili victóriam martýrii contulísti: concéde propítius ; ut, qui beátae Sabínae Mártyris tuae natalítia cólimus, per ejus ad te exémpla gradiámur. Per Dóminum.


Secreta
P


HÓSTIAS tibi, Dómine, beátae Sabínae Mártyris tuae dicátas méritis, benígnus assúme: et ad perpétuum nobis tríbue proveníre subsídium. Per Dóminum.


Postcommunio
P


DIVÍNI múneris largitáte satiáti, quaésumus, Dómine Deus noster: ut, intercedénte beáta Sabína Mártyre tua, in ejus semper participatióne vivámus. Per Dóminum.



Die 30 Augusti

S. ROSAE A S. MARIA

Virginis Limanae


Duplex



Missa Dilexísti, de Communi Virginum 3 loco, praeter Orationem sequentem.


Oratio
P


BONÓRUM ómnium largítor, omnípotens Deus, qui beátam Rosam, caeléstis grátiae rore praevéntam, virginitátis et patiéntiae decóre Indis floréscere voluísti: da nobis fámulis tuis ; ut in odórem suavitátis ejus curréntes, Christi bonus odor éffici mereámur. Qui tecum vivit.

Et fit Commemoratio Ss. Felicis et Adaucti Martyrum.

Oratio


MAJESTÁTEM tuam, Dómine, súpplices exorámus: ut, sicut nos júgiter Sanctórum tuórum commemoratióne laetíficas: ita semper supplicatióne deféndas. Per Dóminum.


Secreta
C


ACCÉPTA tibi sit, Dómine, sacrátae plebis oblátio pro tuórum honóre Sanctórum: quorum se méritis de tribulatióne percepísse cognóscit auxílium. Per Dóminum.

Pro Ss. Martyribus

Secreta


HÓSTIAS, Dómine, tuae plebis inténde: et, quas in honóre Sanctórum tuórum devóta mente célebrat, profícere sibi séntiat ad salútem. Per Dóminum.


Postcommunio
C


SATIÁSTI, Dómine, famíliam tuam munéribus sacris: ejus, quaésumus, semper interventióne nos réfove, cujus solémnia celebrámus. Per Dóminum.

Pro Ss. Martyribus

Postcommunio


REPLÉTI, Dómine, munéribus sacris: quaésumus ; ut, intercedéntibus Sanctis tuis, in gratiárum semper actióne maneámus. Per Dóminum.



Eadem die 30 Augusti

Pro SS. FELICE et ADAUCTO

Martyribus



Introitus Eccli. 44, 15 et 14
SAPIÉNTIAM sanctórum narrent pópuli, et laudes eórum núntiet ecclésia: nómina autem eórum vivent in saéculum saéculi. Ps. 32, 1 Exsultáte, justi, in Dómino: rectos decet collaudátio. V/. Glória Patri.


Oratio


MAJESTÁTEM tuam, Dómine, súpplices exorámus: ut, sicut nos júgiter Sanctórum tuórum commemoratióne laetíficas: ita semper supplicatióne deféndas. Per Dóminum.


Léctio libri Sapiéntiae.

Sap. 10, 17-20


RÉDDIDIT Deus justis mercédem labórum suórum, et dedúxit illos in via mirábili: et fuit illis in velaménto diéi, et in luce stellárum per noctem: tránstulit illos per Mare Rubrum, et transvéxit illos per aquam nímiam. Inimícos autem illórum demérsit in mare, et ab altitúdine inferórum edúxit illos. Ideo justi tulérunt spólia impiórum, et decantavérunt, Dómine, nomen sanctum tuum, et victrícem manum tuam laudavérunt páriter, Dómine Deus noster.


Graduale Sap. 3, 1-2 et 3 Justórum ánimae in manu Dei sunt, et non tanget illos torméntum malítiae. V/. Visi sunt óculis insipiéntium mori: illi autem sunt in pace.
Allelúja , allelúja. V/. Fulgébunt justi, et tamquam scintíllae in arundinéto discúrrent in aetérnum. Allelúja.


+ Sequéntia sancti Evangélii secúndum Lucam.

Luc. 10, 16-20


IN illo témpore: Dixit Jesus discípulis suis: Qui vos audit, me audit, et qui vos spernit, me spernit. Qui autem me spernit, spernit eum, qui misit me. Revérsi sunt autem septuagínta duo cum gáudio, dicéntes: Dómine, étiam daemónia subjiciúntur nobis in nómine tuo. Et ait illis: Vidébam Sátanan sicut fulgur de caelo cadéntem. Ecce dedi vobis potestátem calcándi supra serpéntes, et scorpiónes, et super omnem virtútem inimíci: et nihil vobis nocébit. Verúmtamen in hoc nolíte gaudére, quia spíritus vobis subjiciúntur: gaudéte autem, quod nómina vestra scripta sunt in caelis.


Offertorium Ps. 31, 11 Laetámini in Dómino, et exsultáte, justi: et gloriámini, omnes recti corde.


Secreta


HÓSTIAS, Dómine, tuae plebis inténde: et, quas in honóre Sanctórum tuórum devóta mente célebrat, profícere sibi séntiat ad salútem. Per Dóminum.


Communio Matth. 10, 27 Quod dico vobis in ténebris, dícite in lúmine, dicit Dóminus: et quod in aure audítis, praedicáte super tecta.


Postcommunio


REPLÉTI, Dómine, munéribus sacris: quaésumus ; ut, intercedéntibus Sanctis tuis, in gratiárum semper actióne maneámus. Per Dóminum.



Die 31 Augusti

S. RAYMUNDI NONNATI

Confessoris


Duplex



Missa Os justi, de Communi Confessoris non Pontificis 1 loco, praeter Orationem sequentem.


Oratio
P


DEUS, qui in liberándis fidélibus tuis ab impiórum captivitáte beátum Raymúndum Confessórem tuum mirábilem effecísti: ejus nobis intercessióne concéde ; ut, a peccatórum vínculis absolúti, quae tibi sunt plácita, líberis méntibus exsequámur. Per Dóminum.


Secreta
C


LAUDIS tibi, Dómine, hóstias immolámus in tuórum commemoratióne Sanctórum: quibus nos et praeséntibus éxui malis confídimus, et futúris. Per Dóminum.


Postcommunio
C


REFÉCTI cibo potúque caelésti, Deus noster, te súpplices exorámus: ut, in cujus haec commemoratióne percépimus, ejus muniámur et précibus. Per Dóminum.



FESTA SEPTEMBRIS


* Prima die mensis in qua fiat Officium de Feria communi, et primo resumenda non sit Missa praecedentis Dominicae impedita, in Choro post Primam dicitur Missa conventualis pro Defunctis, juxta Rubricas, et in Missis privatis, quae non sint Defunctorum, paenultimo loco dicitur Oratio Fidélium.



Die 1 Septembris

S. AEGIDII

Abbatis


Simplex



Missa Os justi, de Communi Abbatum.


Oratio
C


INTERCÉSSIO nos, quaésumus, Dómine, beáti AEgídii Abbátis comméndet: ut, quod nostris méritis non valémus, ejus patrocínio assequámur. Per Dóminum.

Et fit Commemoratio Ss. duodecim Fratrum Martyrum.

Oratio


FRATÉRNA nos, Dómine, Mártyrum tuórum coróna laetíficet: quae et fídei nostrae praébeat increménta virtútum, et multíplici nos suffrágio consolétur. Per Dóminum.


Secreta
C


SACRIS altáribus, Dómine, hóstias superpósitas sanctus AEgídius Abbas, quaésumus, in salútem nobis proveníre depóscat. Per Dóminum.

Pro S. Martyribus

Secreta


MYSTÉRIA tua, Dómine, pro sanctórum Mártyrum tuórum commemoratióne devóta mente tractémus: quibus nobis et praesídium crescat, et gáudium. Per Dóminum.


Postcommunio
C


PRÓTEGAT nos, Dómine, cum tui perceptióne sacraménti beátus AEgídius Abbas, pro nobis intercedéndo: ut et conversatiónis ejus experiámur insígnia, et intercessiónis percipiámus suffrágia. Per Dóminum.

Pro S. Martyribus

Postcommunio


PRAESTA, quaésumus, omnípotens Deus: ut, quorum memóriam sacraménti participatióne recólimus, fidem quoque proficiéndo sectémur. Per Dóminum.



Eadem die 1 Septembris

Pro SS. DUODECIM FRATRIBUS

Martyribus



Missa ut in Festo Ss. Symphorosae et septem Filiorum ejus Martyrum, die 18 Julii, cum Orationibus ut supra.



Die 2 Septembris

S. STEPHANI

Regis, Confessoris


Semiduplex



Introitus Ps. 36, 30-31
OS justi meditábitur sapiéntiam, et lingua ejus loquétur judícium: lex Dei ejus in corde ipsíus. Ps. ibid., 1 Noli aemulári in malignántibus: neque zeláveris faciéntes iniquitátem. V/. Glória Patri.


Oratio


CONCÉDE, quaésumus, Ecclésiae tuae, omnípotens Deus: ut beátum Stéphanum Confessórem tuum, quem regnántem in terris propagatórem hábuit, propugnatórem habére mereátur gloriósum in caelis. Per Dóminum.


Léctio libri Sapiéntiae.

Eccli. 31, 8-11


BEÁTUS vir, qui invéntus est sine mácula, et qui post aurum non ábiit, nec sperávit in pecúnia et thesáuris. Quis est hic, et laudábimus eum ? fecit enim mirabília in vita sua. Qui probátus est in illo, et perféctus est, erit illi glória aetérna: qui pótuit tránsgredi, et non est transgréssus: fácere mala, et non fecit: ídeo stabilíta sunt bona illíus in Dómino, et eleemósynas illíus enarrábit omnis ecclésia Sanctórum.


Graduale Ps. 91, 13 et 14 Justus ut palma florébit: sicut cedrus Líbani multiplicábitur in domo Dómini. V/. Ibid., 3 Ad annuntiándum mane misericórdiam tuam, et veritátem tuam per noctem.
Allelúja, allelúja. V/. Jac. 1, 12 Beátus vir, qui suffert tentatiónem: quóniam cum probátus fúerit, accípiet corónam vitae. Allelúja.


+ Sequéntia sancti Evangélii secúndum Lucam.

Luc. 19, 12-26


IN illo témpore: Dixit Jesus discípulis suis parábolam hanc: Homo quidam nóbilis ábiit in regiónem longínquam accípere sibi regnum, et revérti. Vocátis autem decem servis suis, dedit eis decem mnas, et ait ad illos: Negotiámini dum vénio. Cives autem ejus óderant eum: et misérunt legatiónem post illum, dicéntes: Nólumus hunc regnáre super nos. Et factum est, ut redíret accépto regno: et jussit vocári servos, quibus dedit pecúniam, ut sciret quantum quisque negotiátus esset. Venit autem primus, dicens: Dómine, mna tua decem mnas acquisívit. Et ait illi: Euge, bone serve, quia in módico fuísti fidélis, eris potestátem habens super decem civitátes. Et alter venit, dicens: Dómine, mna tua fecit quinque mnas. Et huic ait: Et tu esto super quinque civitátes. Et alter venit, dicens: Dómine, ecce mna tua, quam hábui repósitam in sudário: tímui enim te, quia homo austérus es: tollis quod non posuísti, et metis quod non seminásti. Dicit ei: De ore tuo te júdico, serve nequam. Sciébas quod ego homo austérus sum, tollens quod non pósui, et metens quod non seminávi: et quare non dedísti pecúniam meam ad mensam, ut ego véniens, cum usúris útique exegíssem illam ? Et astántibus dixit: Auférte ab illo mnam, et date illi, qui decem mnas habet. Et dixérunt ei: Dómine, habet decem mnas. Dico autem vobis: Quia omni habénti dábitur, et abundábit: ab eo autem, qui non habet, et quod habet, auferétur ab eo.


Offertorium Ps. 88, 25 Véritas mea, et misericórdia mea cum ipso: et in nómine meo exaltábitur cornu ejus.


Secreta


RÉSPICE, quas offérimus, hóstias, omnípotens Deus: et praesta ; ut, qui passiónis Domínicae mystéria celebrámus, imitémur quod ágimus. Per eúmdem Dóminum.


Communio Matth. 24, 46-47 Beátus servus, quem, cum vénerit dóminus, invénerit vigilántem: amen dico vobis, super ómnia bona sua constítuet eum.


Postcommunio


PRAESTA, quaésumus, omnípotens Deus: ut beáti Stéphani Confessóris tui fidem cóngrua devotióne sectémur ; qui pro ejúsdem fídei dilatatióne, de terréno regno ad caeléstis regni glóriam méruit perveníre. Per Dóminum.



Die 3 Septembris

S. PII X

Papae et Confessoris


Duplex



Introitus Ps. 88, 20-22
INVÉNI David, servum meum, óleo sancto meo unxi eum: manus mea auxiliábitur ei, et bráchium meum confortábit eum. Ps. ibid., 2 Misericórdias Dómini in aetérnum cantábo: in generatiónem et generatiónem annuntiábo veritátem tuam in ore meo. V/. Glória Patri.


Oratio


DEUS, qui, ad tuéndam cathólicam fidem et univérsa in Christo instauránda, sanctum Pium summum Pontíficem caelésti sapiéntia et apostólica fortitúdine replevísti: concéde propítius ; ut, ejus institúta et exémpla sectántes, praémia consequámur aetérna. Per eúmdem Dóminum.


Léctio Epístolae beáti Pauli Apóstoli ad Thessalonicénses.

1 Thess. 2, 2-8


FRATRES: Fidúciam habúimus in Deo nostro loqui ad vos evangélium Dei in multa sollicitúdine. Exhortátio enim nostra non de erróre, neque de immundítia, neque in dolo, sed sicut probáti sumus a Deo ut crederétur nobis evangélium, ita lóquimur ; non quasi homínibus placéntes, sed Deo, qui probat corda nostra. Neque enim aliquándo fúimus in sermóne adulatiónis, sicut scitis: neque in occasióne avarítiae, Deus testis est, nec quaeréntes ab homínibus glóriam, neque a vobis, neque ab áliis. Cum possémus vobis óneri esse ut Christi apóstoli, sed facti sumus párvuli in médio vestrum, tamquam si nutrix fóveat fílios suos. Ita desiderántes vos, cúpide volebámus trádere vobis non solum evangélium Dei, sed étiam ánimas nostras, quóniam caríssimi nobis facti estis.


Graduale Ps. 39, 10-11 Annuntiávi justítiam tuam in ecclésia magna ; ecce lábia mea non prohibébo: Dómine, tu scisti. V/. Justítiam tuam non abscóndi in corde meo ; veritátem tuam et salutáre tuum dixi.
Allelúja, allelúja. V/. Ps. 22, 5-6 Parásti in conspéctu meo mensam, impinguásti in óleo caput meum: et calix meus inébrians quam praeclárus est ! Allelúja.



In Missis votivis post Septuagesimam, omissis Allelúja et Versu sequenti, dicitur:


Tractus Ps. 131, 16-18 Sacerdótes ejus índuam salutári: et sancti ejus exsultatióne exsultábunt. V/. Illuc prodúcam cornu David: parávi lucérnam Christo meo. V/. Inimícos ejus índuam confusióne, super ipsum autem efflorébit sanctificátio mea.

Tempore autem Paschali, omittitur Graduale, et ejus loco dicitur:

Allelúja, allelúja. V/. Ps. 22, 5-6 Parásti in conspéctu meo mensam, impinguásti in óleo caput meum: et calix meus inébrians quam praeclárus est ! Allelúja. V/. Ps. 25, 8 Dómine, diléxi decórem domus tuae et locum habitatiónis glóriae tuae. Allelúja.



+ Sequéntia sancti Evangélii secúndum Joánnem.

Joann. 21, 15-17


IN illo témpore: Dixit Jesus Simóni Petro: Simon Joánnis, díligis me plus his ? Dicit ei: Etiam, Dómine, tu scis quia amo te. Dicit ei: Pasce agnos meos. Dicit ei íterum: Simon Joánnis, díligis me ? Ait illi: Etiam, Dómine, tu scis quia amo te. Dicit ei: Pasce agnos meos. Dicit ei tértio: Simon Joánnis, amas me ? Contristátus est Petrus, quia dixit ei tértio, Amas me ? et dixit ei: Dómine, tu ómnia nosti: tu scis quia amo te. Dixit ei: Pasce oves meas.


Offertorium Ps. 33, 12 Veníte, fílii, audíte me ; timórem Dómini docébo vos.


Secreta


OBLATIÓNIBUS nostris, quaésumus, Dómine, benígne suscéptis, da nobis: ut haec divína mystéria, sancto Pio summo Pontífice intercedénte, sincéris tractémus obséquiis et fidéli mente sumámus. Per Dóminum.


Praefatio de Apostolis.


Communio Joann. 6, 56-57 Caro mea vere est cibus, et sanguis meus vere est potus. Qui mandúcat meam carnem et bibit meum sánguinem, in me manet, et ego in illo.


Postcommunio


MENSAE caeléstis virtúte refécti, quaésumus, Dómine Deus noster: ut, interveniénte sancto Pio summo Pontífice, fortes efficiámur in fide, et in tua simus caritáte concórdes. Per Dóminum.



Die 5 Septembris

S. LAURENTII JUSTINIANI

Episcopi et Confessoris


Semiduplex



Missa Státuit, de Communi Confessoris Pontificis 1 loco.


Oratio
C


DA, quaésumus, omnípotens Deus: ut beáti Lauréntii Confessóris tui atque Pontíficis veneránda solémnitas, et devotiónem nobis áugeat, et salútem. Per Dóminum.


Secreta
C


SANCTI tui, quaésumus, Dómine, nos ubíque laetíficent: ut, dum eórum mérita recólimus, patrocínia sentiámus. Per Dóminum.


Postcommunio
C


PRAESTA, quaésumus, omnípotens Deus: ut, de percéptis munéribus grátias exhibéntes, intercedénte beáto Lauréntio Confessóre tuo atque Pontífice, benefícia potióra sumámus. Per Dóminum.



Die 8 Septembris

IN NATIVITATE

BEATAE MARIAE VIRGINIS

Duplex II classis cum Octava Simplici



Introitus Sedulius
SALVE, sancta parens, eníxa puérpera Regem: qui caelum terrámque regit in saécula saeculórum. Ps. 44, 2 Eructávit cor meum verbum bonum: dico ego ópera mea Regi. V/. Glória Patri.


Oratio


FÁMULIS tuis, quaésumus, Dómine, caeléstis grátiae munus impertíre: ut, quibus beátae Vírginis partus éxstitit salútis exórdium ; Nativitátis ejus votíva solémnitas pacis tríbuat increméntum. Per Dóminum.

Et, in Missis privatis tantum, fit Commemoratio S. Hadriani Martyris.

Oratio


PRAESTA, quaésumus, omnípotens Deus: ut, qui beáti Hadriáni Mártyris tui natalítia cólimus, intercessióne ejus, in tui nóminis amóre roborémur. Per Dóminum.


Léctio libri Sapiéntiae.

Prov. 8, 22-35


DÓMINUS possédit me in inítio viárum suárum, ántequam quidquam fáceret a princípio. Ab aetérno ordináta sum, et ex antíquis, ántequam terra fíeret. Nondum erant abýssi, et ego jam concépta eram: necdum fontes aquárum erúperant: necdum montes gravi mole constíterant: ante colles ego parturiébar: adhuc terram non fécerat, et flúmina, et cárdines orbis terrae. Quando praeparábat caelos, áderam: quando certa lege et gyro vallábat abýssos: quando aéthera firmábat sursum, et librábat fontes aquárum: quando circúmdabat mari términum suum, et legem ponébat aquis, ne transírent fines suos: quando appendébat fundaménta terrae. Cum eo eram cuncta compónens: et delectábar per síngulos dies, ludens coram eo omni témpore: ludens in orbe terrárum: et delíciae meae esse cum fíliis hóminum. Nunc ergo, fílii, audíte me: Beáti, qui custódiunt vias meas. Audíte disciplínam, et estóte sapiéntes, et nolíte abjícere eam. Beátus homo, qui audit me, et qui vígilat ad fores meas quotídie, et obsérvat ad postes óstii mei. Qui me invénerit, invéniet vitam, et háuriet salútem a Dómino.


Graduale Benedícta et venerábilis es, Virgo María: quae sine tactu pudóris invénta es mater Salvatóris. V/. Virgo Dei Génitrix, quem totus non capit orbis, in tua se clausit víscera factus homo.
Allelúja, allelúja. V/. Felix es, sacra Virgo María, et omni laude digníssima: quia ex te ortus est sol justítiae, Christus Deus noster. Allelúja.


+ Inítium sancti Evangélii secúndum Matthaéum.

Matth. 1, 1-16


LIBER generatiónis Jesu Christi fílii David, fílii Abraham. Abraham génuit Isaac. Isaac autem génuit Jacob. Jacob autem génuit Judam, et fratres ejus. Judas autem génuit Phares, et Zaram de Thamar. Phares autem génuit Esron. Esron autem génuit Aram. Aram autem génuit Amínadab. Amínadab autem génuit Naásson. Naásson autem génuit Salmon. Salmon autem génuit Booz de Rahab. Booz autem génuit Obed ex Ruth. Obed autem génuit Jesse. Jesse autem génuit David regem. David autem rex génuit Salomónem ex ea, quae fuit Uríae. Sálomon autem génuit Róboam. Róboam autem génuit Abíam. Abías autem génuit Asa. Asa autem génuit Jósaphat. Jósaphat autem génuit Joram. Joram autem génuit Ozíam. Ozías autem génuit Jóatham. Jóatham autem génuit Achaz. Achaz autem génuit Ezechíam Ezechías autem génuit Manássen. Manásses autem génuit Amon. Amon autem génuit Josíam. Josías autem génuit Jechoníam, et fratres ejus in transmigratióne Babylónis. Et post transmigratiónem Babylónis: Jechonías génuit Saláthiel. Saláthiel autem génuit Zoróbabel. Zoróbabel autem génuit Abiud. Abiud autem génuit Elíacim. Elíacim autem génuit Azor. Azor autem génuit Sadoc. Sadoc autem génuit Achim. Achim autem génuit Eliud. Eliud autem génuit Eleázar. Eleázar autem génuit M athan. Mathan autem génuit Jacob. Jacob autem génuit Joseph virum Maríae, de qua natus est Jesus, qui vocátur Christus.


Credo.


Offertorium Beáta es, Virgo María, quae ómnium portásti Creatórem: genuísti qui te fecit, et in aetérnum pérmanes Virgo.


Secreta


UNIGÉNITI tui, Dómine, nobis succúrrat humánitas: ut, qui natus de Vírgine, matris integritátem non mínuit, sed sacrávit ; in Nativitátis ejus solémniis, nostris nos piáculis éxuens, oblatiónem nostram tibi fáciat accéptam Jesus Christus Dóminus noster: Qui tecum vivit et regnat in unitáte Spíritus Sancti Deus.


Pro S. Hadriano

Secreta


MUNÉRIBUS nostris, quaésumus, Dómine, precibúsque suscéptis: et caeléstibus nos munda mystériis, et cleménter exáudi. Per Dóminum.


Praefatio de beata Maria Virgine Et te in Nativitáte.


Communio Beáta víscera Maríae Vírginis, quae portavérunt aetérni Patris Fílium.


Postcommunio


SÚMPSIMUS, Dómine, celebritátis ánnuae votíva sacraménta: praesta, quaésumus ; ut et temporális vitae nobis remédia praébeant, et aetérnae. Per Dóminum.


Pro S. Hadriano

Postcommunio


DA, quaésumus, Dómine Deus noster: ut, sicut tuórum commemoratióne Sanctórum temporáli gratulámur offício ; ita perpétuo laetémur aspéctu. Per Dóminum.


* Infra Octavam nihil fit de ea ; sed Missae votivae de beata M aria Virgine et Missa de Officio ejus in Sabbato, dicuntur ut in Festo, cum Glória in excélsis, 2a Oratione de Spiritu Sancto, et 3a contra persecutores Ecclesiae, vel pro Papa, et omittitur Credo.
* Item si, ratione alterius Octavae alicubi celebratae, dicenda sit 2a vel 3a Oratio de sancta Maria, dicitur de ejus Nativitate, ut supra.



Missale Romanum 1957 - S. LUDOVICI