Missale Romanum 1957 - ORDO MISSAE

Sacerdos paratus cum ingreditur ad Altare, facta illi debita reverentia, signat se signo crucis a fronte ad pectus, et clara voce dicit:

IN nómine Patris, et Fílii, et Spíritus Sancti. Amen.
Deinde, junctis manibus ante pectus, incipit Antiphonam:
Introíbo ad altáre Dei.
Ministri respondent:
Ad Deum qui laetíficat juventútem meam.
Postea alternatim cum Ministris dicit sequentem

Ps. 42, 1-5


JÚDICA me, Deus, et discérne causam meam de gente non sancta: ab hómine iníquo et dolóso érue me.
M. Quia tu es, Deus, fortitúdo mea: quare me repulísti, et quare tristis incédo, dum afflígit me inimícus ?
S. Emítte lucem tuam, et veritátem tuam: ipsa me deduxérunt et adduxérunt in montem sanctum tuum, et in tabernácula tua.
M. Et introíbo ad altáre Dei: ad Deum qui laetíficat juventútem meam.
S. Confitébor tibi in cíthara, Deus, Deus meus: quare tristis es, ánima mea, et quare contúrbas me ?
M. Spera in Deo, quóniam adhuc confitébor illi: salutáre vultus mei, et Deus meus.
S. Glória Patri, et Fílio, et Spirítui Sancto.
M. Sicut erat in princípio, et nunc, et semper: et in saécula saeculórum. Amen.
S. repetit Antiphonam:
Introíbo ad altáre Dei.
R/. Ad Deum qui laetíficat juventútem meam.
Signat se, dicens:
V/. Adjutórium nostrum in nómine Dómini.
R/. Qui fecit caelum et terram.
Deinde junctis manibus profunde inclinatus facit Confessionem.
* In Missis Defunctorum, et in Missis de Tempore a Dominica Passionis usque ad Sabbatum sanctum exclusive, omittitur Psalmus Júdica me, Deus, cum Glória Patri, et repetitione Antiphonae, sed dicto In nómine Patris, Introíbo, et Adjutórium, fit Confessio, ut sequitur:

CONFÍTEOR Deo omnipoténti, beátae Maríae semper Vírgini, beáto Michaéli Archángelo, beáto Joánni Baptístae, sanctis Apóstolis Petro et Paulo, ómnibus Sanctis, et vobis, fratres: quia peccávi nimis, cogitatióne, verbo, et ópere: (Percutit sibi pectus ter, dicens:) mea culpa, mea culpa, mea máxima culpa. Ideo precor beátam Maríam semper Vírginem, beátum Michaélem Archángelum, beátum Joánnem Baptístam, sanctos Apóstolos Petrum et Paulum, omnes Sanctos, et vos, fratres, oráre pro me ad Dóminum Deum nostrum.

Ministri respondent:


MISEREÁTUR tui omnípotens Deus, et, dimíssis peccátis tuis, perdúcat te ad vitam aetérnam.

Sacerdos dicit: Amen et erigit se.
Deinde Ministri repetunt Confessionem: et ubi a Sacerdote dicebatur vobis, fratres, et vos, fratres, a Ministris dicitur tibi, pater, et te, pater.


CONFÍTEOR Deo omnipoténti, beátae Maríae semper Vírgini, beáto Michaéli Archángelo, beáto Joánni Baptístae, sanctis Apóstolis Petro et Paulo, ómnibus Sanctis, et tibi, pater: quia peccávi nimis, cogitatióne, verbo, et ópere: percutiunt sibi pectus ter, dicentes: mea culpa, mea culpa, mea máxima culpa. Ideo precor beátam Maríam semper Vírginem, beátum Michaélem Archángelum, beátum Joánnem Baptístam, sanctos Apóstolos Petrum et Paulum, omnes Sanctos, et te, pater, oráre pro me ad Dóminum Deum nostrum.

)Postea Sacerdos, junctis manibus, facit absolutionem, dicens:

MISEREÁTUR vestri omnípotens Deus, et, dimíssis peccátis vestris, perdúcat vos ad vitam aetérnam. R/. Amen.

Signat se signo crucis, dicens:

INDULGÉNTIAM, absolutiónem et remissiónem peccatórum nostrórum tríbuat nobis omnípotens et miséricors Dóminus. R/. Amen.

Et inclinatus prosequitur:
V/. Deus, tu convérsus vivificábis nos.
R/. Et plebs tua laetábitur in te.
V/. Osténde nobis, Dómine, misericórdiam tuam.
R/. Et salutáre tuum da nobis.
V/. Dómine, exáudi oratiónem meam.
R/. Et clamor meus ad te véniat.
V/. Dóminus vobíscum.
R/. Et cum spíritu tuo.

Et extendens, ac jungens manus, clara voce dicit: Orémus, et ascendens ad Altare, dicit secreto:

AUFER a nobis, quaésumus, Dómine, iniquitátes nostras: ut ad Sancta sanctórum puris mereámur méntibus introíre. Per Christum Dóminum nostrum. Amen.

Deinde, manibus junctis super Altare, inclinatus dicit:

ORÁMUS te, Dómine, per mérita Sanctórum tuórum, (Osculatur Altare in medio) quorum relíquiae hic sunt, et ómnium Sanctórum: ut indulgére dignéris ómnia peccáta mea. Amen.

* In Missa solemni, Celebrans, antequam legat Introitum, benedicit incensum, dicens: Ab illo bene+dicáris, in cujus honóre cremáberis. Amen. Et, accepto thuribulo a Diacono, incensat Altare, nihil dicens. Postea Diaconus, recepto thuribulo a Celebrante, incensat illum tantum. Deinde Celebrans signans se signo crucis incipit Introitum: quo finito, junctis manibus, al ternatim cum Ministris dicit:

KÝRIE, eléison. Kýrie, eléison. Kýrie, eléison. Christe, eléison. Christe, eléison. Christe, eléison. Kýrie, eléison. Kýrie, eléison. Kýrie, eléison.

Postea in medio Altaris extendens et jungens manus, caputque aliquantulum inclinans, dicit, si dicendum est, Glória in excélsis Deo, et prosequitur junctis manibus. Cum dicit Adorámus te, Grátias ágimus tibi, et Jesu Christe, et Súscipe deprecatiónem, inclinat caput: et in fine dicens: Cum Sancto Spíritu, signat se a fronte ad pectus.

I. In Duplicibus, et solemnibus diebus


II. In Missis beatae Mariae Virginis


III. In Dominicis et in Festis Semiduplicibus, atque infra Octavas, quae non sint beatae Mariae Virginis


IV. In Festis Simplicibus


GLÓRIA in excélsis Deo. Et in terra pax homínibus bonae voluntátis. Laudámus te. Benedícimus te. Adorámus te. Glorificámus te. Grátias ágimus tibi propter magnam glóriam tuam. Dómine Deus, Rex caeléstis, Deus Pater omnípotens. Dómine Fili unigénite, Jesu Christe. Dómine Deus, Agnus Dei, Fílius Patris. Qui tollis peccáta mundi, miserére nobis. Qui tollis peccáta mundi, súscipe deprecatiónem nostram. Qui sedes ad déxteram Patris, miserére nobis. Quóniam tu solus Sanctus. Tu solus Dóminus. Tu solus Altíssimus, Jesu Christe. Cum Sancto Spíritu, in glória Dei Patris. Amen.

Deinde osculatur Altare in medio, et versus ad populum dicit: V/. Dóminus vobíscum. R/. Et cum spíritu tuo. Postea dicit: Orémus, et Orationes, unam aut plures, ut ordo Officii postulat. Sequitur Epistola, Graduale, Tractus, vel Allelúja cum Versu, aut Sequentia, prout Tempus aut qualitas Missae postulat.
His finitis, si est Missa solemnis, Diaconus deponit librum Evangeliorum super medium Altaris, et Celebrans benedicit incensum, ut supra: deinde Diaconus genuflexus ante Altare, manibus junctis, dicit:

MUNDA cor meum ac lábia mea, omnípotens Deus, qui lábia Isaíae Prophétae cálculo mundásti igníto: ita me tua grata miseratióne dignáre mundáre, ut sanctum Evangélium tuum digne váleam nuntiáre. Per Christum Dóminum nostrum. Amen.

Postea accipit librum de Altari, et rursus genuflexus petit benedictionem a Sacerdote, dicens: Jube, domne benedícere.

Sacerdos respondet:


DÓMINUS sit in corde tuo et in lábiis tuis: ut digne et competénter annúnties Evangélium suum: In nómine Patris, et Fílii, + et Spíritus Sancti. Amen.

Et, accepta benedictione, osculatur manum Celebrantis: et cum aliis Ministris, incenso et luminaribus, accedens ad locum Evangelii, stans junctis manibus, dicit: V/. Dóminus vobíscum. R/. Et cum spíritu tuo. Et pronuntians: Sequéntia sancti Evangélii secúndum N., sive Inítium, pollice dexterae manus signat librum in principio Evangelii, quod est lecturus, deinde seipsum in fronte, ore et pectore: et dum Ministri respondent Glória tibi, Dómine, incensat ter librum, postea prosequitur Evangelium junctis manibus. Quo finito, Subdiaconus defert librum Sacerdoti, qui osculatur Evangelium, dicens: Per evangélica dicta deleántur nostra delícta.
Deinde Sacerdos incensatur a Diacono.
Si vero Sacerdos sine Diacono et Subdiacono celebrat, delato libro ad aliud cornu Altaris, inclinatus in medio, junctis manibus dicit:
Munda cor meum, ut supra, et Jube, Dómine benedícere. Dóminus sit in corde meo et in lábiis meis: ut digne et competénter annúntiem Evangélium suum. Amen.

Deinde, conversus ad librum, junctis manibus, dicit: V/. Dóminus vobíscum. R/. Et cum spíritu tuo.
Et pronuntians: Inítium, sive Sequéntia sancti Evangélii, signat librum, et se in fronte, ore et pectore, et legit Evangelium, ut dictum est. Quo finito, respondet Minister: Laus tibi, Christe, et Sacerdos osculatur Evangelium, dicens: Per evangélica dicta, ut supra.

* In Missis Defunctorum dicitur Munda cor meum, sed non petitur benedictio, non deferuntur liminaria, nec Celebrans osculatur librum.

Deinde ad medium Altaris extendens, elevans, et jungens manus, dicit, si dicendum est, Credo in unum Deum, et prosequitur junctis manibus. Cum dicit Deum, caput Cruci inclinat: quod similiter facit, cum dicit Jesum Christum, et simul adorátur. Ad illa autem verba Et incarnátus est, genuflectit usque dum dicatur Et homo factus est. In fine ad Et vitam ventúri saéculi, signat se signo crucis a fronte ad pectus.

CREDO in unum Deum. Patrem omnipoténtem, factórem caeli et terrae, visibílium ómnium, et invisibílium. Et in unum Dóminum Jesum Christum, Fílium Dei unigénitum. Et ex Patre natum ante ómnia saécula. Deum de Deo, lumen de lúmine, Deum verum de Deo vero. Génitum, non factum, consubstantiálem Patri: per quem ómnia facta sunt. Qui propter nos hómines, et propter nostram salútem descéndit de caelis. (Hic genuflectitur) Et incarnátus est de Spíritu Sancto ex María Vírgine: Et homo factus est. Crucifíxus étiam pro nobis: sub Póntio Piláto passus et sepúltus est. Et resurréxit tértia die, secúndum Scriptúras. Et ascéndit in caelum: sedet ad déxteram Patris. Et íterum ventúrus est cum glória judicáre vivos et mórtuos: cujus regni non erit finis. Et in Spíritum Sanctum, Dóminum et vivificántem: qui ex Patre Filióque procédit. Qui cum Patre, et Fílio simul adorátur, et conglorificátur: qui locútus est per Prophétas. Et unam sanctam, cathólicam et apostólicam Ecclésiam. Confíteor unum baptísma in remissiónem peccatórum. Et exspécto resurrectiónem mortuórum. Et vitam ventúri saéculi. Amen.

Deinde osculatur Altare, et versus ad populum, dicit: V/. Dóminus vobíscum. R/. Et cum spíritu tuo. Postea dicit: Orémus, et Offertorium. Quo dicto, si est Missa solemnis, Diaconus porrigit Celebranti Patenam cum Hostia: si privata, Sacerdos ipse accipit Patenam cum Hostia, quam offerens, dicit:

SÚSCIPE, sancte Pater, omnípotens aetérne Deus, hanc immaculátam hóstiam, quam ego indígnus fámulus tuus óffero tibi Deo meo vivo et vero, pro innumerabílibus peccátis et offensiónibus et negligéntiis meis, et pro ómnibus circumstántibus, sed et pro ómnibus fidélibus christiánis vivis atque defúnctis: ut mihi et illis profíciat ad salútem in vitam aetérnam. Amen.

Deinde faciens crucem cum eadem Patena, deponit Hostiam super Corporale. Diaconus ministrat vinum, Subdiaconus aquam in Calice: vel si privata est Missa, utrumque infundit Sacerdos, et aquam miscendam in Calice benedicit signo crucis, dicens:

DEUS, qui humánae substántiae dignitátem mirabíliter condidísti, et mirabílius reformásti: da nobis per hujus aquae et vini mystérium, ejus divinitátis esse consórtes, qui humanitátis nostrae fíeri dignátus est párticeps Jesus Christus Fílius tuus Dóminus noster: Qui tecum vivit et regnat in unitáte Spíritus Sancti Deus: per ómnia saécula saeculórum. Amen.

* In Missis Defunctorum dicitur praedicta Oratio: sed aqua non benedicitur.
Postea accipit Calicem, et offert dicens:

OFFÉRIMUS tibi, Dómine, cálicem salutáris, tuam deprecántes cleméntiam: ut in conspéctu divínae majestátis tuae, pro nostra et totíus mundi salúte cum odóre suavitátis ascéndat. Amen.

Deinde facit signum crucis cum Calice, et illum ponit super Corporale, et Palla cooperit: tum, junctis manibus super Altare, aliquantulum inclinatus, dicit:

IN spíritu humilitátis, et in ánimo contríto suscipiámur a te, Dómine: et sic fiat sacrifícium nostrum in conspéctu tuo hódie, ut pláceat tibi, Dómine Deus.

Erectus expandit manus, easque in altum porrectas jungens, elevatis ad caelum oculis, et statim demissis, dicit:

VENI, sanctificátor, omnípotens aetérne Deus: Benedicit oblata, prosequendo: et béne+dic hoc sacrifícium, tuo sancto nómini praeparátum.

Postea, si solemniter celebrat, benedicit incensum, dicens:

PER intercessiónem beáti Michaélis Archángeli, stantis a dextris altáris incénsi, et ómnium electórum suórum, incénsum istud dignétur Dóminus bene+dícere, et in odórem suavitátis accípere. Per Christum Dóminum nostrum. Amen.

Et, accepto thuribulo a Diacono, incensat oblata, modo in Rubricis generalibus praescripto, dicens:

INCÉNSUM istud a te benedíctum, ascéndat ad te, Dómine: et descéndat super nos misericórdia tua.

Deinde incensat Altare, dicens:

Ps. 140, 2-4


DIRIGÁTUR, Dómine, orátio mea, sicut incénsum, in conspéctu tuo: elevátio mánuum meárum sacrifícium vespertínum. Pone, Dómine, custódiam ori meo, et óstium circumstántiae lábiis meis: ut non declínet cor meum in verba malítiae, ad excusándas excusatiónes in peccátis.

Dum reddit thuribulum Diacono, dicit:

ACCÉNDAT in nobis Dóminus ignem sui amóris, et flammam aetérnae caritátis. Amen.

Postea incensatur Sacerdos a Diacono, deinde alii per ordinem. Interim Sacerdos lavat manus, dicens :

Ps. 25, 6-12


LAVÁBO inter innocéntes manus meas: et circúmdabo altáre tuum, Dómine:
Ut áudiam vocem laudis, et enárrem univérsa mirabília tua.
Dómine, diléxi decórem domus tuae: et locum habitatiónis glóriae tuae.
Ne perdas cum ímpiis, Deus, ánimam meam, et cum viris sánguinum vitam meam:
In quorum mánibus iniquitátes sunt: déxtera eórum repléta est munéribus.
Ego autem in innocéntia mea ingréssus sum: rédime me, et miserére mei.
Pes meus stetit in dirécto: in ecclésiis benedícam te, Dómine.
Glória Patri, et Fílio, et Spirítui Sancto.
Sicut erat in princípio, et nunc, et semper: et in saécula saeculórum. Amen.

* In Missis Defunctorum, et Tempore Passionis in Missis de Tempore omittitur Glória Patri.

Deinde, aliquantulum inclinatus in medio Altaris, junctis manibus super eo, dicit :

SÚSCIPE, sancta Trínitas, hanc oblatiónem, quam tibi offérimus ob memóriam passiónis, resurrectiónis, et ascensiónis Jesu Christi Dómini nostri: et in honórem beátae Maríae semper Vírginis, et beáti Joánnis Baptístae, et sanctórum Apostólorum Petri et Pauli, et istórum, et ómnium Sanctórum: ut illis profíciat ad honórem, nobis autem ad salútem: et illi pro nobis intercédere dignéntur in caelis, quorum memóriam ágimus in terris. Per eúmdem Christum Dóminum nostrum. Amen.

Postea osculatur Altare, et versus ad populum extendens, et jungens manus, voce paululum elevata, dicit:

ORÁTE, fratres: ut meum ac vestrum sacrifícium acceptábile fiat apud Deum Patrem omnipoténtem.

Minister, seu circumstantes respondent: alioquin ipsemet Sacerdos:

SUSCÍPIAT Dóminus sacrifícium de mánibus tuis (vel meis) ad laudem, et glóriam nóminis sui, ad utilitátem quoque nostram, totiúsque Ecclésiae suae sanctae.

Sacerdos submissa voce dicit: Amen.
Deinde, manibus extensis, absolute sine Orémus subjungit Orationes secretas. Quibus finitis, cum pervenerit ad conclusionem, clara voce dicit: Per ómnia saécula saeculórum, cum Praefatione, ut in sequentibus.
Praefationem incipit ambabus manibus positis hinc inde super Altare: quas aliquantulum elevat, cum dicit: Sursum corda. Jungit eas ante pectus, et caput inclinat, cum dicit: Grátias agámus Dómino Deo nostro.
Deinde disjungit manus, et disjunctas tenet usque ad finem Praefationis: qua finita, iterum jungit eas, et inclinatus dicit: Sanctus. Et cum dicit: Benedíctus qui venit, signum crucis sibi producit a fronte ad pectus.


PRAEFATIONES

IN CANTU SOLEMNI

adhibendae in omnibus Missis de quodlibet Officio Duplici, aut Semiduplici, et in Missis votivis pro re gravi et publica simul causa. Numquam tamen adhibentur in Missis ritus Simplicis, et in Missis votivis quae pro r e gravi et publica simul causa non sint. Commemoratio autem aut Octava, Praefatione propria gaudens, licet, juxta Rubricas, servet jus ad illam quoad textum, non servat quoad cantum solemnem, nisi talis cantus Missae, quae celebratur, conveniat.


PRAEFATIONES

IN CANTU FERIALI

adhibendae in omnibus Missis ritus Simplicis, et in Missis votivis quae pro re gravi et publica simul causa non sint. Commemoratio tamen aut Octava, Praefatione propria gaudens, licet, juxta Rubricas, servet jus ad illam quoad textum, non servat quoad cantum solemnem, nisi talis cantus Missae, quae celebratur, conveniat. Quod si cantus ferialis adhibendus sit infra Octavas Nativitatis, Paschatis et Ascensionis, Orationes Communicántes et Hanc ígitur (ut infra in Canone) dicuntur in omnibus Missis in quibus Commemoratio Octavae vel Dominicae infra Octavam non sit omittenda.


PRAEFATIONES SINE CANTU


DE NATIVITATE DOMINI

Sequens Praefatio: 1. Dicitur in Missis de Nativitate Domini, de Dominica infra Octavam, quamvis post diem 1 Januarii resumenda, de die infra Octavam ipsius Nativitatis, ac de Vigilia Epiphaniae Domini, necnon in Missis de Circumcisione Domini, de Ssmo Nomine Jesu, de Ssmo Eucharistiae Sacramento, de Transfiguratione Domini, ac de Purificatione beatae Mariae Virginis. 2. Dicitur etiam, juxta Rubricas, in omnibus Missis quae infra Octavam ejusdem Nativitatis celebrentur, inclusis iis quae secus Praefationem propriam haberent, dummodo et de Octava vel de Dominica infra Octavam fiat Commemoratio, et ipsa Missa, aut Commemoratio prius habita, aliam de divinis Mysteriis vel Personis non exigant Praefationem. 3. Dicitur item, juxta Rubricas, in omnibus Missis, in quibus alicujus ex recensitis Christi ac beatae Mariae Virginis Mysteriis fiat Commemoratio, dummodo pariter ipsa Missa, aut Commemoratio prius habita, aliam non exigant Praefationem ; ac dicitur, juxta eamdem normam, et disjunctim quoque a sua Commemoratione, infra Octavam communem cujusvis ex indicatis Christi ac beatae Mariae Virginis Mysteriis, necnon a die 2 ad diem 4 Januarii inclu sive, dummodo insuper, si agatur de Missis cantatis et conventualibus, alia conventualiter vel in cantu Missa de Tempore vel de Octava, aut cum ejus Commemoratione, non habeatur, neque Praefatio Octavae vel Temporis pro iisdem tribus Januarii diebus in una ex Missis cantatis vel conventualibus fuerit admissa.



DE EPIPHANIA DOMINI

Sequens Praefatio: 1. Dicitur in Missis de Epiphania Domini, de Dominica infra Octavam ac de die Octava ipsius Epiphaniae, necnon in Missis de Sancta Familia Jesu, Mariae, Joseph, quamvis infra Octavam Nativitatis Domini celebrandis. 2. Dicitur etiam, juxta Rubricas, in omnibus Missis quae infra Octavam Epiphaniae celebrentur, dummodo et de Octava vel de Dominica infra Octavam fiat Commemoratio, et ipsa Missa, aut Commemoratio prius h abita, aliam non exigant Praefationem. 3. Dicitur item, juxta Rubricas, in omnibus Missis, quae cum Commemoratione ejusdem Sanctae Familiae celebrentur, dummodo pariter ipsa Missa, aut Commemoratio prius habita, aliam non exigant Praefationem ; ac dicitur, juxta eamdem normam, et disjunctim quoque a sua Commemoratione, infra Octavam communem ipsius Sanctae Familiae alicubi celebratam, dummodo insuper, si agatur de Missis cantatis et conventualibus, alia conventualiter vel in cantu Missa de Sancta Familia, aut cum ejus Commemoratione non habeatur, neque Praefatio Octavae in una ex Missis cantatis vel conventualibus fuerit admissa.



DE QUADRAGESIMA

Sequens Praefatio: 1. Dicitur in Missis de Tempore a Feria IV Cinerum usque ad Sabbatum infra Hebdomadam IV Quadragesimae inclusive. 2. Dicitur etiam, juxta Rubricas, in omnibus Missis quae eo Tempore celebrentur, et ad nullum Domini Festum vel Mysterium referantur, dummodo et de Tempore fiat Commemoratio, et ipsa Missa, aut Commemoratio prius habita, aliam non exigant Praefationem.



DE SANCTA CRUCE

Sequens Praefatio: 1. Dicitur in Missis de Tempore a Dominica Passione usque ad Feriam V in Cena Domini inclusive ; atque in omnibus Missis, quamvis infra Octavam Nativitatis Domini celebrandis, de sancta Cruce, de Passione Dom ini, de pretiosissimo Sanguine Domini nostri Jesu Christi et de Domino nostro Jesu Christo Summo et AEterno Sacerdote. 2. Dicitur etiam, juxta Rubricas, in omnibus Missis in quibus fiat Commemoratio ejusdem Temporis vel alicujus ex recensitis Mysteriis, dummodo ipsa Missa, aut Commemoratio prius habita, aliam non exigant Praefationem ; ac dicitur, juxta eamdem normam, et disjunctim quoque a sua Commemoratione, infra Octavam communem cujusvis ex indicatis Mysteriis alicubi celebratam, dummodo insuper, si agatu r de Missis cantatis et conventualibus, alia conventualiter vel in cantu Missa de Octava, aut cum ejus Commemoratione, non habeatur, neque Praefatio Octavae in una ex Missis cantatis vel conventualibus fuerit admissa.



PASCHALIS

Sequens Praefatio: 1. Dicit ur in Missis de Tempore a Sabbato sancto usque ad Vigiliam Ascensionis Domini inclusive, atque in Missis Litaniarum majorum et minorum. 2. Dicitur etiam, juxta Rubricas, in omnibus Missis quae eo Tempore celebrentur, dummodo ipsa Missa, aut Commemoratio prius habita, aliam non exigant Praefationem, et dummodo, si agatur de Missis cantatis et conventualibus, alia conventualiter vel in cantu Missa de ipso Tempore, aut cum ejus Commemoratione, non habeatur, neque ipsius Temporis Praefatio in una ex Missis cantati s vel conventualibus fuerit admissa.



DE ASCENSIONE DOMINI

Sequens Praefatio: 1. Dicitur in Missis de Ascensione Domini, de Dominica infra Octavam ac de Feria VI post Octavam ipsius Ascensionis. 2. Dicitur etiam, juxta Rubricas, in omnibus Missis quae i nfra eamdem Octavam celebrentur, dummodo et de Octava vel de Dominica infra Octavam fiat Commemoratio, et ipsa Missa, aut Commemoratio prius habita, aliam non exigant Praefationem ; ac dicitur, juxta eamdem normam, et disjunctim quoque a sua Commemoratione, Feria VI post Octavam, dummodo insuper, si agatur de Missis cantatis et conventualibus, alia conventualiter vel in cantu Missa de Feria, aut cum ejus Commemoratione, non habeatur, neque Praefatio de Ascensione Domini in una ex Missis cantatis vel conventualibus fuerit admissa.



DE SACRATISSIMO CORDE JESU

Sequens Praefatio: 1. Dicitur in Missis de Sacratissimo Corde Jesu. 2. Dicitur etiam, juxta Rubricas, in omnibus Missis quae infra Octavam ipsius Sacratissimi Cordis Jesu celebrentur, dummodo et de Octava fiat Commemoratio, et ipsa Missa, aut Commemoratio prius habita, aliam non exigant Praefationem. 3. Dicitur item, juxta Rubricas, in omnibus Missis quae cum Commemoratione ejusdem Sacratissimi Cordis Jesu celebrentur, dummodo pariter ipsa Missa, aut Comme moratio prius habita, aliam non exigant Praefationem.



DE JESU CHRISTO REGE

Sequens Praefatio: 1. Dicitur in Missis D. N. Jesu Christi Regis, quamvis infra Octavam Nativitatis Domini celebrandis. 2. Dicitur etiam, juxta Rubricas, in omnibus Missis quae cum Commemoratione ejusdem Jesu Christi Regis celebrentur, dummodo ipsa Missa, aut Commemoratio prius habita, aliam non exigant Praefationem ; ac dicitur, juxta eamdem normam, et disjunctim quoque a sua Commemoratione, infra Octavam communem ipsius Jesu Chr isti Regis alicubi celebratam, dummodo insuper, si agatur de Missis cantatis et conventualibus, alia conventualiter vel in cantu Missa de Octava, aut cum ejus Commemoratione non habeatur, neque Praefatio Octavae in una ex Missis cantatis vel conventualibus fuerit admissa.



DE SPIRITU SANCTO

Sequens Praefatio: 1. Dicitur in Missis de Tempore a Vigilia Pentecostes usque ad sequens Sabbatum inclusive ; et in Missis votivis de Spiritu Sancto, quamvis infra Octavam Nativitatis Domini celebrandis, in quibus tamen, extra Vigiliam et Octavam Pentecostes, omittuntur verba: hodiérna die. 2. Dicitur etiam, juxta Rubricas, in omnibus Missis quae in Vigilia et infra Octavam Pentecostes celebrentur, dummodo et de Vigilia vel de Octava fiat Commemoratio, et ipsa Missa, a ut Commemoratio prius habita, aliam non exigant Praefationem ; ac dicitur, juxta eamdem normam, in Missis, in quibus de Spiritu Sancto agenda sit Commemoratio.



DE SANCTISSIMA TRINITATE

Sequens Praefatio: 1. Dicitur in Missis de sanctissima Trinitate, q uamvis infra Octavam Nativitatis Domini celebrandis, de Dominicis majoribus Adventus, Septuagesimae, Sexagesimae et Quinquagesimae, ac de Dominicis minoribus, licet Sabbato anticipatis, post Octavam Epiphaniae et Pentecostes ; exclusis Missis alicujus ex recensitis Dominicis infra Hebdomadam resumendis, in quibus, si alia Missae vel Officii, etsi commemorati, Praefatio propria desit, ponitur Praefatio communis ; et exclusa pariter Missa Dominicae II et III post Pentecosten, in qua, si omittenda non sit Commemoratio Octavae sanctissimi Corporis Christi vel sacratissimi Cordis Jesu, sumitur Praefatio de respectiva Octava. 2. Dicitur etiam, juxta Rubricas, in omnibus Missis quae cum Commemoratione sanctissimae Trinitatis, aut cujusvis ex indicatis Dominicis occurrentibus e t Sabbato anticipatis celebrentur, dummodo ipsa Missa, aut Commemoratio prius habita, aliam non exigant Praefationem ; ac dicitur, juxta eamdem normam, et disjunctim quoque a sua Commemoratione, infra Octavam communem ipsius sanctissimae Trinitatis alicubi celebratam, dummodo insuper, si agatur de Missis cantatis et conventualibus, alia conventualiter vel in cantu Missa de Octava, aut cum ejus Commemoratione non habeatur, neque Praefatio Octavae in una ex Missis cantatis vel conventualibus fuerit admissa.



DE BEATA MARIA VIRGINE

Sequens Praefatio, extra Octavam Nativitatis Domini, si ejusdem Octavae vel Dominicae infra Octavam omittenda non sit Commemoratio, et extra Festum et Octavam Purificationis beatae Mariae Virginis alicubi celebratam, quibus in casibus sumitur Praefatio de ipsa Nativitate, necnon extra Vigilias ejusdem beatae Mariae Virginis, et extra Missas de Feriis Adventus, in quibus, si alterius Missae vel Officii, etsi commemorati, aut Octavae communis, aut, pro Vigiliis, etiam Temporis Praefatio propria desit, ponitur Praefatio communis: 1. Dicitur in Missis beatae Mariae Virginis. 2. Dicitur etiam, juxta Rubricas, in omnibus Missis quae cum Commemoratione ipsius beatae Mariae Virginis celebrentur, et ad nullum Domini Festum vel Mysterium referantur, dummodo ipsa Missa, aut Commemoratio prius habita, aliam non exigant Praefationem ; ac dicitur, juxta eamdem normam, et disjunctim quoque a sua Commemoratione, infra Octavam communem ejusdem beatae Mariae Virginis, dummodo insuper, si agatur de Missis cantatis et conve ntualibus, alia conventualiter vel in cantu Missa de Octava, aut cum ejus Commemoratione, non habeatur, neque Praefatio Octavae in una ex Missis cantatis vel conventualibus fuerit admissa.



DE S. JOSEPH SPONSO B. M. V.

Sequens Praefatio, extra Octavam Nativitatis Domini, in qua, si ejusdem Octavae vel Dominicae infra Octavam omittenda non sit Commemoratio, sumitur Praefatio de ipsa Nativitate: 1. Dicitur in Missis S. Joseph, Sponsi beatae Mariae Virginis. 2. Dicitur etiam, juxta Rubricas, in omnibus Missis quae cum Commemoratione ipsius S. Joseph celebrentur, et ad nullum Domini Festum vel Mysterium referantur, dummodo ipsa Missa, aut Commemoratio prius habita, aliam non exigant Praefationem ; ac dicitur, juxta eamdem normam, et disjunctim quoque a sua Commemor atione, infra Octavam communem ejusdem S. Joseph, dummodo insuper, si agatur de Missis cantatis et conventualibus, alia conventualiter vel in cantu Missa de Octava, aut cum ejus Commemoratione, non habeatur, neque Praefatio Octavae in una ex Missis cantatis vel conventualibus fuerit admissa.



DE APOSTOLIS

Sequens Praefatio, extra Octavam Nativitatis Domini, in qua, si ejusdem Octavae vel Dominicae infra Octavam omittenda non sit Commemoratio, sumitur Praefatio de ipsa Nativitate, necnon extra Vigilias Apostolorum aut Evangelistarum, in quibus, si alterius Missae vel Officii, etsi commemorati, aut Octavae communis, aut Temporis Praefatio propria desit, ponitur Praefatio communis: 1. Dicitur in Missis Apostolorum aut Evangelistarum, in Missa de Communi unius aut plurium Summorum Pontificum, necnon in Missa Creationis et Coronationis Papae et utriusque Anniversarii. 2. Dicitur etiam, juxta Rubricas, in omnibus Missis quae cum Commemoratione ipsorum Apostolorum aut Evangelistarum, cum Commemoratione Missae Summorum Pontificum, vel cum Commemoratione Missae pro Papa superius indicatae et eo die impeditae celebrentur, et ad nullum Domini Festum vel Mysterium referantur, dummodo ipsa Missa, aut Commemoratio prius habita, aliam non exigant Praefationem ; ac dicitur, juxta eamdem n ormam, et disjunctim quoque a sua Commemoratione, infra Octavam communem eorumdem Apostolorum aut Evangelistarum, et infra Octavam communem Summorum Pontificum alicubi celebratam, dummodo insuper, si agatur de Missis cantatis et conventualibus, alia conve ntualiter vel in cantu Missa de Octava, aut cum ejus Commemoratione, non habeatur, neque Praefatio Octavae in una ex Missis cantatis vel conventualibus fuerit admissa.



COMMUNIS

Sequens Praefatio dicitur, juxta Rubricas: 1. In omnibus Missis quae Praefationem propriam non habeant, et in quibus adhibenda non sit Praefatio alicujus Missae vel Officii etsi commemorati, aut Octavae communis, aut Temporis occurentis propria. 2. In Missis de Dedicatione Ecclesiae et de alio Festo vel Mysterio Domini alicubi celebrato, quod Praefatione propria careat, in quibus numquam adhibetur Praefatio de Tempore Quadragesimae, neque Missae vel Officii commemorati vel Octavae, quae non sint de ipso Domino. 3. In Missis de Feriis Adventus et de Vigilia Nativitatis Domini extra Dominicam occurente, in quibus agenda sit Commemoratio de beata Maria Virgine, et Praefatio alterius Missae aut Officii commemorati propria non habeatur.



DEFUNCTORUM

Sequens Praefatio dicitur in omnibus Missis Defunctorum.


PRAEFATIO

DE NATIVITATE DOMINI

V/. Per ómnia saécula saeculórum.
R/. Amen.
V/. Dóminus vobíscum.
R/. Et cum spíritu tuo.
V/. Sursum corda.
R/. Habémus ad Dóminum.
V/. Grátias agámus Dómino Deo nostro.
R/. Dignum et justum est.

VERE dignum et justum est, aequum et salutáre, nos tibi semper et ubíque grátias ágere: Dómine, sancte Pater, omnípotens aetérne Deus: Quia per incarnáti Verbi mystérium, nova mentis nostrae óculis lux tuae claritátis infúlsit: ut dum visibíliter Deum cognóscimus, per hunc in invisibílium amórem rapiámur. Et ídeo cum Angelis et Archángelis, cum Thronis et Dominatiónibus, cumque omni milítia caeléstis exércitus, hymnum glóriae tuae cánimus, sine fine dicéntes:

SANCTUS, Sanctus, Sanctus, Dóminus Deus Sábaoth. Pleni sunt caeli et terra glória tua. Hosánna in excélsis. Benedíctus, qui venit in nómine Dómini. Hosánna in excélsis.

Infra Actionem Communicántes proprium, ut infra in Canone.
In prima vero Missa Nativitatis Domini dicitur: et noctem sacratíssimam celebrántes, qua etc. ; deinde semper dicitur: diem sacratíssimum celebrántes, quo etc. usque ad Octavam Nativitatis Domini inclusive, in omnibus Missis, quae de Octava vel de Dominica infra Octavam celebrentur, aut cum utriusque vel alterutrius Commemoratione habeantur.



PRAEFATIO

DE EPIPHANIA DOMINI

V/. Per ómnia saécula saeculórum.
R/. Amen.
V/. Dóminus vobíscum.
R/. Et cum spíritu tuo.
V/. Sursum corda.
R/. Habémus ad Dóminum.
V/. Grátias agámus Dómino Deo nostro.
R/. Dignum et justum est.

VERE dignum et justum est, aequum et salutáre, nos tibi semper et ubíque grátias ágere: Dómine, sancte Pater, omnípotens aetérne Deus: Quia, cum Unigénitus tuus in substántia nostrae mortalitátis appáruit, nova nos immortalitátis suae luce reparávit. Et ídeo cum Angelis et Archángelis, cum Thronis et Dominatiónibus, cumque omni milítia caeléstis exércitus, hymnum glóriae tuae cánimus, sine fine dicéntes:

SANCTUS, Sanctus, Sanctus, Dóminus Deus Sábaoth. Pleni sunt caeli et terra glória tua. Hosánna in excélsis. Benedíctus, qui venit in nómine Dómini. Hosánna in excélsis.

Infra Actionem Communicántes proprium, ut infra in Canone.
Et dicitur per totam Octavam in omnibus Missis, quae de Octava vel de Dominica infra Octavam celebrentur, aut cum utriusque vel alterutrius Commemoratione habeantur.



Missale Romanum 1957 - ORDO MISSAE