Missale Romanum 1957 - BEATAE MARIAE VIRGINIS REGINAE
Pro S. PETRONILLA
Virgine
Missa Vultum tuum, de Communi Virginum 4 loco.
* Post Octavam Pentecostes, prima die mensis in qua fiat Officium de Feria communi, et primo resumenda non sit Missa praecedentis Dominicae impedita, in Choro, post Primam dicitur Missa conventualis pro Defunctis, juxta Rubricas, et in Missis priva tis, quae non sint Defunctorum, paenultimo loco dicitur Oratio Fidélium.
Virginis
Duplex
Missa Dilexísti, de Communi Virginum 3 loco, cum Orationibus ut infra.
Oratio P
DEUS, qui novum per beátam Angelam sacrárum Vírginum collégium in Ecclésia tua floréscere voluísti: da nobis, ejus intercessióne, angélicis móribus vívere ; ut, terrénis ómnibus abdicátis, gáudiis pérfrui mereámur aetérnis. Per Dóminum.
Secreta P
HÓSTIA, Dómine, quam tibi beátae Angelae memóriam recoléntes offérimus, et nostrae pravitátis véniam implóret, et grátiae tuae nobis dona concíliet. Per Dóminum.
Postcommunio P
CAELÉSTI alimónia refécti, súpplices te, Dómine, deprecámur: ut beátae Angelae précibus et exémplo, ab ómni labe mundáti, et córpore tibi placeámus, et mente. Per Dóminum.
SS. MARCELLINI et PETRI
Martyrum
atque ERASMI
Episcopi et Martyris
Simplex
Extra Tempus Paschale
Introitus Ps. 33, 18
CLAMAVÉRUNT justi, et Dóminus exaudívit eos: et ex ómnibus tribulatiónibus eórum liberávit eos. Ps. ibid., 2 Benedícam Dóminum in omni témpore: semper laus ejus in ore meo. V/. Glória Patri.
Oratio
DEUS, qui nos ánnua beatórum Mártyrum tuórum Marcellíni, Petri atque Erásmi solemnitáte laetíficas: praesta, quaésumus ; ut, quorum gaudémus méritis, accendámur exémplis. Per Dóminum.
Léctio Epístolae beáti Pauli Apóstoli ad Romános.
Rom. 8, 18-23
FRATRES: Exístimo quod non sunt condígnae passiónes hujus témporis ad futúram glóriam, quae revelábitur in nobis. Nam exspectátio creatúrae, revelatiónem filiórum Dei exspéctat. Vanitáti enim creatúra subjécta est non volens, sed propter eum, qui subjécit eam in spe: quia et ipsa creatúra liberábitur a servitúte corruptiónis, in libertátem glóriae filiórum Dei. Scimus enim quod omnis creatúra ingemíscit, et párturit usque adhuc. Non solum autem illa, sed et nos ipsi primítias spíritus habéntes: et ipsi intra nos gémimus adoptiónem filiórum Dei exspectántes, redemptiónem córporis nostri: in Christo Jesu Dómino nostro.
Graduale Ps. 33, 18-19 Clamavérunt justi, et Dóminus exaudívit eos: et ex ómnibus tribulatiónibus eórum liberávit eos. V/. Juxta est Dóminus his, qui tribuláto sunt corde: et húmiles spíritu salvábit.
Allelúja, allelúja. V/. Joann. 15, 16 Ego vos elégi de mundo, ut eátis, et fructum afferátis, et fructus vester máneat. Allelúja.
+ Sequéntia sancti Evangélii secúndum Lucam.
Luc. 21, 9-19
IN illo témpore: Dixit Jesus discípulis suis: Cum audiéritis praélia et seditiónes, nolíte terréri: opórtet primum haec fíeri, sed nondum statim finis. Tunc dicébat illis: Surget gens contra gentem, et regnum advérsus regnum. Et terraemótus magni erunt per loca, et pestiléntiae, et fames, terrorésque de caelo, et signa magna erunt. Sed ante haec ómnia injícient vobis manus suas, et persequéntur tradéntes in synagógas et custódias, trahéntes ad reges et praésides propter nomen meum: contínget autem vobis in testimónium. Pónite ergo in córdibus vestris non praemeditári quemádmodum respondeátis. Ego enim dabo vobis os et sapiéntiam, cui non póterunt resístere et contradícere omnes adversárii vestri. Tradémini autem a paréntibus, et frátribus, et cognátis, et amícis, et morte affícient ex vobis: et éritis ódio ómnibus propter nomen meum: et capíllus de cápite vestro non períbit. In patiéntia vestra possidébitis ánimas vestras.
Offertorium Ps. 31, 11 Laetámini in Dómino, et exsultáte, justi: et gloriámini, omnes recti corde.
Secreta
HAEC hóstia, quaésumus, Dómine, quam sanctórum Mártyrum tuórum natalítia recenséntes offérimus: et víncula nostrae pravitátis absólvat, et tuae nobis misericórdiae dona concíliet. Per Dóminum.
Communio Sap. 3, 1, 2 et 3 Justórum ánimae in manu Dei sunt, et non tanget illos torméntum malítiae: visi sunt óculis insipiéntium mori: illi autem sunt in pace.
Postcommunio
SACRO múnere satiáti, súpplices te, Dómine, deprecámur: ut, quod débitae servitútis celebrámus offício, salvatiónis tuae sentiámus augméntum. Per Dóminum.
* Tempore Paschali Missa Sancti tui, de Communi Martyrum 2 loco, cum Orationibus et Epistola ut in Missa praecedenti, et post Epistolam dicitur:
Allelúja, allelúja. V/. Joann. 15, 16 Ego vos elégi de mundo, ut eátis, et fructum afferátis, et fructus vester máneat. Allelúja. V/. Ps. 115, 15 Pretiósa in conspéctu Dómini mors Sanctórum ejus. Allelúja.
Confessoris
Duplex
Introitus Ps. 21, 15 ; 68, 10
FACTUM est cor meum tamquam cera liquéscens in médio ventris mei: quóniam zelus domus tuae comédit me. (T. P. Allelúja, allelúja.) Ps. 72, 1 Quam bonus Israël Deus: his, qui recto sunt corde ! V/. Glória Patri.
Oratio
DEUS, qui beátum Francíscum, novi órdinis institutiónem, orándi stúdio et paeniténtiae amóre decorásti: da fámulis tuis in ejus imitatióne ita profícere ; ut, semper orántes et corpus in servitútem redigéntes, ad caeléstem glóriam perveníre mereántur. Per Dóminum.
Léctio libri Sapiéntiae.
Sap. 4, 7-14
JÚSTUS, si morte praeoccupátus fúerit, in refrigério erit. Senéctus enim venerábilis est non diutúrna, neque annórum número computáta: cani autem sunt sensus hóminis, et aetas senectútis vita inmaculáta. Placens Deo factus est diléctus, et vivens inter peccatóres translátus est. Raptus est, ne malítia mutáret intelléctum ejus, aut ne fíctio decíperet ánimam illíus. Fascinátio enim nugacitátis obscúrat bona, et inconstántia concupiscéntiae transvértit sensum sine malítia. Consummátus in brevi explévit témpora multa, plácita enim erat Deo ánima illíus: propter hoc properávit edúcere illum de médio iniquitátum.
Graduale Ps. 41, 2 Quemádmodum desíderat cervus ad fontes aquárum: ita desíderat ánima mea ad te Deus. V/. Ps. ibid., 3 Sitívit ánima mea ad Deum fortem vivum.
Allelúja, allelúja. V/. Ps. 72, 26 Defécit caro mea, et cor meum: Deus cordis mei, et pars mea Deus in aetérnum. Allelúja.
Tempore Paschali omittitur Graduale, et ejus loco dicitur:
Allelúja, allelúja. V/. Ps. 64, 5 Beátus quem elegísti, et assumpsísti: inhabitábit in átriis tuis. Allelúja. V/. Ps. 111, 9 Dispérsit, dedit paupéribus: justítia ejus manet in saéculum saéculi. Allelúja.
+ Sequéntia sancti Evangélii secúndum Lucam.
Luc. 12, 35-40
IN illo témpore: Dixit Jesus discípulis suis: Sint lumbi vestri praecíncti, et lucérnae ardéntes in mánibus vestris, et vos símiles homínibus exspectántibus dóminum suum, quando revertátur a núptiis: ut, cum vénerit et pulsáverit, conféstim apériant ei. Beáti servi illi, quos, cum vénerit dóminus, invénerit vigilántes: amen dico vobis, quod praecínget se, et fáciet illos discúmbere, et tránsiens ministrábit illis. Et si vénerit in secúnda vigília, et si in tértia vigília vénerit, et ita invénerit, beáti sunt servi illi. Hoc autem scitóte, quóniam si sciret paterfamílias, qua hora fur veníret, vigiláret útique, et non síneret pérfodi domum suam. Et vos estóte paráti, quia qua hora non putátis, Fílius hóminis véniet.
Offertorium Ps. 91, 13 Justus ut palma florébit: sicut cedrus Líbani multiplicábitur. (T. P. Allelúja.)
Secreta
DA nobis, clementíssime Jesu: ut praeclára beáti Francísci mérita recoléntes, eódem nos, ac ille, caritátis igne succénsi, digne in circúitu sacrae hujus mensae tuae esse valeámus: Qui vivis.
Communio Ps. 30, 20 Quam magna multitúdo dulcédinis tuae, Dómine, quam abscondísti timéntibus te ! (T. P. Allelúja.)
Postcommunio
SACROSÁNCTI sacrifícii, quaésumus, Dómine, quod hódie in solemnitáte beáti Francísci tuae obtúlimus majestáti, grata semper in méntibus nostris memória perséveret, et fructus. Per Dóminum.
Episcopi et Martyris
Duplex
Introitus Isai. 65, 19 et 23
EXSULTÁBO in Jerúsalem, et gaudébo in pópulo meo: et non audiétur in eo ultra vox fletus et vox clamóris. Elécti mei non laborábunt frustra, neque generábunt in conturbatióne: quia semen benedictórum Dómini est, et nepótes eórum cum eis. (T. P. Allelúja, allelúja.) Ps. 43, 2 Deus, áuribus nostris audívimus: patres nostri narravérunt opus, quod operátus es in diébus eórum. V/. Glória Patri.
Oratio
DEUS, qui multitúdinem populórum, beáti Bonifátii Mártyris tui atque Pontíficis zelo, ad agnitiónem tui nóminis vocáre dignátus es: concéde propítius ; ut, cujus solémnia cólimus, étiam patrocínia sentiámus. Per Dóminum.
Léctio libri Sapiéntiae.
Eccli. 44, 1-15
LAUDÉMUS viros gloriósos, et paréntes nostros in generatióne sua. Multam glóriam fecit Dóminus magnificéntia sua a saéculo. Dominántes in potestátibus suis, hómines magni virtúte, et prudéntia sua praéditi, nuntiántes in prophétis dignitátem prophetárum, et imperántes in praesénti pópulo, et virtúte prudéntiae pópulis sanctíssima verba. In perítia sua requiréntes modos músicos, et narrántes cármina scripturárum. Hómines dívites in virtúte, pulchritúdinis stúdium habéntes: pacificántes in dómibus suis. Omnes isti in generatiónibus gentis suae glóriam adépti sunt, et in diébus suis habéntur in láudibus. Qui de illis nati sunt, reliquérunt nomen narrándi laudes eórum. Et sunt quorum non est memória: periérunt quasi qui non fúerint: et nati sunt, quasi non nati, et fílii ipsórum cum ipsis. Sed illi viri misericórdiae sunt, quorum pietátes non defuérunt: cum sémine eórum pérmanent bona, heréditas sancta nepótes eórum, et in testaméntis stetit semen eórum: et fílii eórum propter illos usque in aetérnum manent: semen eórum et glória eórum non derelinquétur. Córpora ipsórum in pace sepúlta sunt, et nomen eórum vivit in generatiónem et generatiónem. Sapiéntiam ipsórum narrent pópuli, et laudem eórum núntiet Ecclésia.
Graduale 1 Petri 4, 13-14 Communicántes Christi passiónibus gaudéte, ut in revelatióne glóriae ejus gaudeátis exsultántes. V/. Si exprobrámini in nómine Christi, beáti éritis: quóniam quod est honóris, glóriae et virtútis Dei, et qui est ejus Spíritus, super vos requiéscet.
Allelúja, allelúja. V/. Isai. 66, 12 Declinábo super eum quasi flúvium pacis, et quasi torréntem inundántem glóriam. Allelúja.
Tempore Paschali omittitur Graduale, et ejus loco dicitur:
Allelúja, allelúja. V/. Isai. 66, 10 et 14 Laetámini cum Jerúsalem, et exsultáte in ea omnes, qui dilígitis Dóminum. Allelúja. V/. Vidébitis, et gaudébit cor vestrum: cognoscétur manus Dómini servis ejus. Allelúja.
+ Sequéntia sancti Evangélii secúndum Matthaéum.
Matth. 5, 1-12
IN illo témpore: Videns Jesus turbas, ascéndit in montem, et cum sedísset, accessérunt ad eum discípuli ejus, et apériens os suum, docébat eos, dicens: Beáti páuperes spíritu: quóniam ipsórum est regnum caelórum. Beáti mites: quóniam ipsi possidébunt terram. Beáti qui lugent: quóniam ipsi consolabúntur. Beáti qui esúriunt et sítiunt justítiam: quóniam ipsi saturabúntur. Beáti misericórdes: quóniam ipsi misericórdiam consequéntur. Beáti mundo corde: quóniam ipsi Deum vidébunt. Beáti pacífici: quóniam fílii Dei vocabúntur. Beáti qui persecutiónem patiúntur propter justítiam: quóniam ipsórum est regnum caelórum. Beáti estis cum maledíxerint vobis, et persecúti vos fúerint, et díxerint omne malum advérsum vos, mentiéntes, propter me: gaudéte, et exsultáte, quóniam merces vestra copiósa est in caelis.
Offertorium Ps. 15, 7 et 8 Benedícam Dóminum, qui tríbuit mihi intelléctum: providébam Deum in conspéctu meo semper: quóniam a dextris est mihi, ne commóvear. (T. P. Allelúja.)
Secreta
SUPER has hóstias, Dómine, quaésumus, benedíctio copiósa descéndat: quae et sanctificatiónem nostram misericórditer operétur ; et de sancti Bonifátii Mártyris tui atque Pontíficis fáciat solemnitáte gaudére. Per Dóminum.
Communio Apoc. 3, 21 Qui vícerit, dabo ei sedére mecum in throno meo: sicut et ego vici, et sedi cum Patre meo in throno ejus. (T. P. Allelúja.)
Postcommunio
SANCTIFICÁTI, Dómine, salutári mystério: quaésumus ; ut nobis sancti Bonifátii Mártyris tui atque Pontíficis non desit orátio, cujus nos donásti patrocínio gubernári. Per Dóminum.
Episcopi et Confessoris
Duplex
Missa Státuit, de Communi Confessoris Pontificis 1 loco, praeter Orationem sequentem.
Oratio P
DEUS, qui beátum Norbértum Confessórem tuum atque Pontíficem, verbi tui praecónem exímium effecísti, et per eum Ecclésiam tuam nova prole fecundásti: praesta, quaésumus ; ut, ejúsdem suffragántibus méritis, quod ore simul et ópere dócuit, te adjuvánte, exercére valeámus. Per Dóminum.
Secreta C
SANCTI tui, quaésumus, Dómine, nos ubíque laetíficent: ut, dum eórum mérita recólimus, patrocínia sentiámus. Per Dóminum.
Postcommunio C
PRAESTA, quaésumus, omnípotens Deus: ut, de percéptis munéribus grátias exhibéntes, intercedénte beáto Norbérto Confessóre tuo atque Pontífice, benefícia potióra sumámus. Per Dóminum.
SS. PRIMI et FELICIANI
Martyrum
Simplex
Extra Tempus Paschale
Introitus Eccli. 44, 15 et 14
SAPIÉNTIAM sanctórum narrent pópuli, et laudes eórum núntiet ecclésia: nómina autem eórum vivent in saéculum saéculi. Ps. 32, 1 Exsultáte, justi, in Dómino: rectos decet collaudátio. V/. Glória Patri.
Oratio
FAC nos, quaésumus, Dómine, sanctórum Mártyrum tuórum Primi et Feliciáni semper festa sectári: quorum suffrágiis protectiónis tuae dona sentiámus. Per Dóminum.
Léctio libri Sapiéntiae.
Sap. 5, 16-20
JUSTI autem in perpétuum vivent, et apud Dóminum est merces eórum, et cogitátio illórum apud Altíssimum. Ideo accípient regnum decóris, et diadéma speciéi de manu Dómini: quóniam déxtera sua teget eos, et bráchio sancto suo deféndet illos. Accípiet armatúram zelus illíus, et armábit creatúram ad ultiónem inimicórum. Induet pro thoráce justítiam, et accípiet pro gálea judícium certum. Sumet scutum inexpugnábile, aequitátem.
Graduale Ps. 88, 6 et 2 Confitebúntur caeli mirabília tua, Dómine: étenim veritátem tuam in ecclésia sanctórum. V/. Misericórdias tuas, Dómine, in aetérnum cantábo: in generatióne et progénie.
Allelúja, allelúja. V/. Haec est vera fratérnitas, quae vicit mundi crímina: Christum secúta est, ínclita tenens regna caeléstia. Allelúja.
+ Sequéntia sancti Evangélii secúndum Matthaéum.
Matth. 11, 25-30
IN illo témpore: Respóndens Jesus, dixit: Confíteor tibi, Pater, Dómine caeli et terrae, quia abscondísti haec a sapiéntibus et prudéntibus, et revelásti ea párvulis. Ita Pater: quóniam sic fuit plácitum ante te. Omnia mihi trádita sunt a Patre meo. Et nemo novit Fílium, nisi Pater: neque Patrem quis novit, nisi Fílius, et cui volúerit Fílius reveláre. Veníte ad me omnes, qui laborátis, et oneráti estis, et ego refíciam vos. Tóllite jugum meum super vos, et díscite a me, quia mitis sum, et húmilis córde: et inveniétis réquiem animábus vestris. Jugum enim meum suáve est, et onus meum leve.
Offertorium Ps. 67, 36 Mirábilis Deus in sanctis suis: Deus Israël, ipse dabit virtútem et fortitúdinem plebi suae: benedíctus Deus, allelúja.
Secreta
FIAT tibi, quaésumus, Dómine, hóstia sacránda placábilis, pretiósi celebritáte martýrii: quae et peccáta nostra puríficet, et tuórum tibi vota concíliet famulórum. Per Dóminum.
Communio Joann. 15, 16 Ego vos elégi de mundo, ut eátis, et fructum afferátis ; et fructus vester máneat.
Postcommunio
QUSUMUS, omnípotens Deus: ut sanctórum Mártyrum tuórum Primi et Feliciáni caeléstibus mystériis celebráta solémnitas, indulgéntiam nobis tuae propitiatiónis acquírat. Per Dóminum.
* Tempore Paschali Missa Sancti tui, de Communi Martyrum 2 loco, cum Orationibus et Evangelio ut in Missa praecedenti ; sed post Epistolam dicitur:
Allelúja, allelúja. V/. Haec est vera fratérnitas, quae vicit mundi crímina: Christum secúta est, ínclita tenens regna caeléstia. Allelúja. V/. Te Mártyrum candidátus laudat exércitus, Dómine. Allelúja.
Reginae, Viduae
Semiduplex
Missa Cognóvi, de Communi non Virginum 2 loco, praeter Orationem sequentem.
Oratio P
DEUS, qui beátam Margarítam regínam exímia in páuperes caritáte mirábilem effecísti: da, ut ejus intercessióne et exémplo, tua in córdibus nostris cáritas júgiter augeátur. Per Dóminum.
Secreta C
ACCÉPTA tibi sit, Dómine, sacrátae plebis oblátio pro tuórum honóre Sanctórum: quorum se méritis de tribulatióne percepísse cognóscit auxílium. Per Dóminum.
Postcommunio C
SATIÁSTI, Dómine, famíliam tuam munéribus sacris: ejus, quaésumus, semper interventióne nos réfove, cujus solémnia celebrámus. Per Dóminum.
Apostoli
Duplex majus
Extra Tempus Paschale
Introitus Ps. 138, 17
MIHI autem nimis honoráti sunt amíci tui, Deus: nimis confortátus est principátus eórum. Ps. ibid., 1-2 Dómine, probásti me, et cognovísti me: tu cognovísti sessiónem meam, et resurrectiónem meam. V/. Glória Patri.
Oratio
DEUS, qui nos beáti Bárnabae Apóstoli tui méritis et intercessióne laetíficas: concéde propítius ; ut, qui tua per eum benefícia póscimus, dono tuae grátiae consequámur. Per Dóminum.
Léctio Actuum Apostolórum.
Act. 11, 21-26 ; 13, 1-3
IN diébus illis: Multus númerus credéntium Antiochíae convérsus est ad Dóminum. Pervénit autem sermo ad aures ecclésiae, quae erat Jerosólymis, super istis: et misérunt Bárnabam usque ad Antiochíam. Qui cum pervenísset, et vidísset grátiam Dei, gavísus est: et hortabátur omnes in propósito cordis permanére in Dómino: quia erat vir bonus, et plenus Spíritu Sancto, et fide. Et appósita est multa turba Dómino. Proféctus est autem Bárnabas Tarsum, ut quaéreret Saulum: quem cum invenísset, perdúxit Antiochíam. Et annum totum conversáti sunt ibi in ecclésia: et docuérunt turbam multam, ita ut cognominaréntur primum Antiochíae discípuli, Christiáni. Erant autem in ecclésia, quae erat Antiochíae, prophétae et doctóres, in quibus Bárnabas, et Simon, qui vocabátur Niger, et Lúcius Cyrenénsis, et Mánahen, qui erat Heródis Tetrárchae collactáneus, et Saulus. Ministrántibus autem illis Dómino, et jejunántibus, dixit illis Spíritus Sanctus: Segregáte mihi Saulum et Bárnabam in opus, ad quod assúmpsi eos. Tunc jejunántes et orántes, imponentésque eis manus, dimisérunt illos.
Graduale Ps. 18, 5 et 2 In omnem terram exívit sonus eórum: et in fines orbis terrae verba eórum. V/. Caeli enárrant glóriam Dei: et ópera mánuum ejus annúntiat firmaméntum.
Allelúja, allelúja. V/. Joann. 15, 16 Ego vos elégi de mundo, ut eátis, et fructum afferátis: et fructus vester máneat. Allelúja.
+ Sequéntia sancti Evangélii secúndum Matthaéum.
Matth. 10, 16-22
IN illo témpore: Dixit Jesus discípulis suis: Ecce ego mitto vos sicut oves in médio lupórum. Estóte ergo prudéntes sicut serpéntes, et símplices sicut colúmbae. Cavéte autem ab homínibus. Tradent enim vos in concíliis, et in synagógis suis flagellábunt vos: et ad praésides, et ad reges ducémini propter me in testimónium illis et géntibus. Cum autem tradent vos, nolíte cogitáre quómodo, aut quid loquámini: dábitur enim vobis in illa hora quid loquámini. Non enim vos estis qui loquímini, sed Spíritus Patris vestri, qui lóquitur in vobis. Tradet autem frater fratrem in mortem, et pater fílium: et insúrgent fílii in paréntes, et morte eos affícient: et éritis ódio ómnibus propter nomen meum: qui autem perseveráverit usque in finem, hic salvus erit.
Credo.
Offertorium Ps. 44, 17-18 Constítues eos príncipes super omnem terram: mémores erunt nóminis tui, Dómine, in omni progénie et generatióne.
Secreta
MÚNERA, Dómine, obláta sanctífica, et intercedénte beáto Bárnaba Apóstolo tuo, nos per haec a peccatórum nostrórum máculis emúnda. Per Dóminum.
Praefatio de Apostolis.
Communio Matth. 19, 28 Vos, qui secúti estis me, sedébitis super sedes, judicántes duódecim tribus Israël.
Postcommunio
SÚPPLICES te rogámus, omnípotens Deus: ut, quos tuis réficis sacraméntis, intercedénte beáto Bárnaba Apóstolo tuo, tibi étiam plácitis móribus dignánter tríbuas deservíre. Per Dóminum.
* Tempore Paschali Missa Protexísti, de Communi Martyrum 1 loco, cum Orationibus, Epistola et Evangelio, ut in Missa praecedenti.
Confessoris
Duplex
Missa Os justi, de Communi Confessoris non Pontificis 1 loco, praeter Orationem sequentem.
Oratio P
DEUS, auctor pacis et amátor caritátis, qui beátum Joánnem Confessórem tuum mirífica dissidéntes componéndi grátia decorásti: ejus méritis et intercessióne concéde ; ut, in tua caritáte firmáti, nullis a te tentatiónibus separémur. Per Dóminum.
Et fit Commemoratio Ss. Basilidis, Cyrini, Naboris et Nazarii Mm.
Oratio
SANCTÓRUM Mártyrum tuórum Basílidis, Cyríni, Náboris atque Nazárii, quaésumus, Dómine, natalítia nobis votíva respléndeant: et, quod illis cóntulit excelléntia sempitérna, frúctibus nostrae devotiónis accréscat. Per Dóminum.
Secreta C
LAUDIS tibi, Dómine, hóstias immolámus in tuórum commemoratióne Sanctórum: quibus nos et praeséntibus éxui malis confídimus et futúris. Per Dóminum.
Pro Ss. Martyribus
Secreta
PRO sanctórum tuórum Basílidis, Cyríni, Náboris atque Nazárii sánguine venerándo, hóstias tibi, Dómine, solémniter immolámus, tua mirabília pertractántes: per quem talis est perfécta victória. Per Dóminum.
Postcommunio C
REFÉCTI cibo potúque caelésti, Deus noster, te súpplices exorámus: ut, in cujus haec commemoratióne percépimus, ejus muniámur et précibus. Per Dóminum.
Pro Ss. Martyribus
Postcommunio
SEMPER, Dómine, sanctórum Mártyrum tuórum Basílidis, Cyríni, Náboris atque Nazárii solémnia celebrántes: praesta, quaésumus ; ut eórum patrocínia júgiter sentiámus. Per Dóminum.
Pro SS. BASILIDE, CYRINO,
NABORE et NAZARIO
Martyribus
Extra Tempus Paschale
Introitus Ps. 78, 11, 12 et 10
INTRET in conspéctu tuo, Dómine, gémitus compeditórum: redde vicínis nostris séptuplum in sinu eórum: víndica sánguinem sanctórum tuórum, qui effúsus est. Ps. ibid., 1 Deus, venérunt gentes in hereditátem tuam: polluérunt templum sanctum tuum: posuérunt Jerúsalem in pomórum custódiam. V/. Glória Patri.
Oratio
SANCTÓRUM Mártyrum tuórum Basílidis, Cyríni, Náboris atque Nazárii, quaésumus, Dómine, natalítia nobis votíva respléndeant: et, quod illis cóntulit excelléntia sempitérna, frúctibus nostrae devotiónis accréscat. Per Dóminum.
Léctio Epístolae beáti Pauli Apóstoli ad Hebraéos.
Hebr. 10, 32-38
FRATRES: Rememorámini prístinos dies, in quibus illumináti, magnum certámen sustinuístis passiónum: et in áltero quidem oppróbriis, et tribulatiónibus spectáculum facti: in áltero autem sócii táliter conversántium effécti. Nam et vinctis compássi estis, et rapínam bonórum vestrórum cum gáudio suscepístis, cognoscéntes vos habére meliórem, et manéntem substántiam. Nolíte ítaque amíttere confidéntiam vestram, quae magnam habet remuneratiónem. Patiéntia enim vobis necessária est: ut voluntátem Dei faciéntes, reportétis promissiónem. Adhuc enim módicum aliquántulum, qui ventúrus est, véniet, et non tardábit. Justus autem meus ex fide vivit.
Graduale Ps. 78, 10 et 2 Víndica, Dómine, sánguinem sanctórum tuórum, qui effúsus est. V/. Posuérunt mortália servórum tuórum escas volatílibus caeli: carnes sanctórum tuórum béstiis terrae.
Allelúja, allelúja. V/. Eccli. 44, 14 Córpora sanctórum in pace sepúlta sunt: et nómina eórum vivent in generatiónem et generatiónem. Allelúja.
+ Sequéntia sancti Evangélii secúndum Matthaéum.
Matth. 24, 3-13
IN illo témpore: Sedénte Jesu super montem Olivéti, accessérunt ad eum discípuli secréto, dicéntes: Dic nobis, quando haec erunt ? et quod signum advéntus tui, et consummatiónis saéculi ? Et respóndens Jesus, dixit eis: Vidéte, ne quis vos sedúcat. Multi enim vénient in nómine meo, dicéntes: Ego sum Christus: et multos sedúcent. Auditúri enim estis praélia, et opiniónes praeliórum. Vidéte, ne turbémini. Opórtet enim haec fíeri, sed nondum est finis. Consúrget enim gens in gentem, et regnum in regnum, et erunt pestiléntiae, et fames, et terraemótus per loca. Haec autem ómnia, inítia sunt dolórum. Tunc tradent vos in tribulatiónem, et occídent vos: et éritis ódio ómnibus géntibus propter nomen meum. Et tunc scandalizabúntur multi, et ínvicem tradent, et ódio habébunt ínvicem. Et multi pseudoprophétae surgent, et sedúcent multos. Et quóniam abundávit iníquitas, refrigéscet cáritas multórum. Qui autem perseveráverit usque in finem, hic salvus erit.
Offertorium Ps. 149, 5-6 Exsultábunt sancti in glória, laetabúntur in cubílibus suis: exaltatiónes Dei in fáucibus eórum.
Secreta
PRO sanctórum tuórum Basílidis, Cyríni, Náboris atque Nazárii sánguine venerándo, hóstias tibi, Dómine, solémniter immolámus, tua mirabília pertractántes: per quem talis est perfécta victória. Per Dóminum.
Communio Ps. 78, 2 et 11 Posuérunt mortália servórum tuórum, Dómine, escas volatílibus caeli, carnes sanctórum tuórum béstiis terrae: secúndum magnitúdinem bráchii tui pósside fílios morte punitórum.
Postcommunio
SEMPER, Dómine, sanctórum Mártyrum tuórum Basílidis, Cyríni, Náboris atque Nazárii solémnia celebrántes: praesta, quaésumus ; ut eórum patrocínia júgiter sentiámus. Per Dóminum.
* Tempore Paschali Missa Sancti tui, de Communi Martyrum 2 loco, cum Orationibus ut in Missa praecedenti.
Confessoris et Ecclesiae Doctoris
Duplex
Missa In médio, de Communi Doctorum, praeter Orationes sequentes, et dicitur Credo.
Oratio P
ECCLÉSIAM tuam, Deus, beáti Antónii Confessóris tui atque Doctóris solémnitas votíva laetíficet: ut spirituálibus semper muniátur auxíliis et gáudiis pérfrui mereátur aetérnis. Per Dóminum.
Secreta P
PRAESENS oblátio fiat, Dómine, pópulo tuo salutáris: pro quo dignátus es Patri tuo te vivéntem hóstiam immoláre: Qui cum eódem Deo Patre, et Spíritu Sancto vivis et regnas Deus, per ómnia saécula saeculórum.
Postcommunio P
DIVÍNIS, Dómine, munéribus satiáti: quaésumus ; ut beáti Antónii Confessóris tui atque Doctóris méritis et intercessióne, salutáris sacrifícii sentiámus efféctum Per Dóminum.
Episcopi, Confessoris et Ecclesiae Doctoris
Duplex
Introitus Eccli. 15, 5
IN médio Ecclésiae apéruit os ejus: et implévit eum Dóminus spíritu sapiéntiae, et intelléctus: stolam glóriae índuit eum. Ps. 91, 2 Bonum est confitéri Dómino: et psállere nómini tuo, Altíssime. V/. Glória Patri.
Oratio
EXÁUDI, quaésumus, Dómine, preces nostras, quas in beáti Basilíi Confessóris tui atque Pontíficis solemnitáte deférimus: et, qui tibi digne méruit famulári, ejus intercedéntibus méritis, ab ómnibus nos absólve peccátis. Per Dóminum.
Léctio Epístolae beáti Pauli Apóstoli ad Timótheum.
2 Tim. 4, 1-8
CARÍSSIME: Testíficor coram Deo, et Jesu Christo, qui judicatúrus est vivos et mórtuos, per advéntum ipsíus, et regnum ejus: praédica verbum, insta opportúne, importúne: árgue, óbsecra, íncrepa in omni patiéntia, et doctrína. Erit enim tempus, cum sanam doctrínam non sustinébunt, sed ad sua desidéria coacervábunt sibi magístros, pruriéntes áuribus, et a veritáte quidem audítum avértent, ad fábulas autem converténtur. Tu vero vígila, in ómnibus labóra, opus fac Evangelístae, ministérium tuum imple. Sóbrius esto. Ego enim jam delíbor, et tempus resolutiónis meae instat. Bonum certámen certávi, cursum consummávi, fidem servávi. In réliquo repósita est mihi coróna justítiae, quam reddet mihi Dóminus in illa die, justus judex: non solum autem mihi, sed et iis, qui díligunt advéntum ejus.
Graduale Ps. 36, 30-31 Os justi meditábitur sapiéntiam, et lingua ejus loquétur judícium. V/. Lex Dei ejus in corde ipsíus: et non supplantabúntur gressus ejus.
Allelúja , allelúja. V/. Ps. 88, 21 Invéni David servum meum, óleo sancto meo unxi eum. Allelúja.
+ Sequéntia sancti Evangélii secúndum Lucam.
Luc. 14, 26-35
IN illo témpore: Dixit Jesus turbis: Si quis venit ad me, et non odit patrem suum, et matrem, et uxórem, et fílios, et fratres, et soróres, adhuc autem et ánimam suam, non potest meus esse discípulus. Et qui non bájulat crucem suam, et venit post me, non potest meus esse discípulus. Quis enim ex vobis volens turrim aedificáre, non prius sedens cómputat sumptus, qui ne cessárii sunt, si hábeat ad perficiéndum ; ne, posteáquam posúerit fundaméntum, et non potúerit perfícere, omnes, qui vident, incípiant illúdere ei, dicentes: Quia hic homo coepit aedificáre, et non pótuit consummáre ? Aut quis rex itúrus commíttere bellum advérsus álium regem, non sedens prius cógitat, si possit cum decem míllibus occúrrere ei, qui cum vigínti míllibus venit ad se ? Alióquin, adhuc illo longe agénte, legatiónem mittens, rogat ea, quae pacis sunt. Sic ergo omnis ex vobis, qui non renúntiat ómnibus, quae póssidet, non potest meus esse discípulus. Bonum est sal. Si autem sal evanúerit, in quo condiétur ? Neque in terram, neque in sterquilínium útile est, sed foras mittétur. Qui habet aures audiéndi, áudiat
Credo.
Offertorium Ps. 88, 25 Véritas mea, et misericórdia mea cum ipso: et in nómine meo exaltábitur cornu ejus.
Secreta
SANCTI Basilíi Confessóris tui atque Pontíficis, quaésumus, Dómine, ánnua solémnitas pietáti tuae nos reddat accéptos: ut per haec piae placatiónis offícia, et illum beáta retribútio comitétur, et nobis grátiae tuae dona concíliet. Per Dóminum.
Communio Luc. 12, 42 Fidélis servus et prudens, quem constítuit dóminus super famíliam suam: ut det illis in témpore trítici mensúram.
Postcommunio
DEUS, fidélium remunerátor animárum: praesta ; ut beáti Basilíi Confessóris tui atque Pontíficis, cujus venerándam celebrámus festivitátem, précibus indulgéntiam consequámur. Per Dóminum.
atque CRESCENTIAE
Martyrum
Simplex
Introitus Ps. 33, 20-21
MULTAE tribulatiónes justórum, et de his ómnibus liberávit eos Dóminus: Dóminus custódit ómnia ossa eórum: unum ex his non conterétur. Ps. ibid., 2 Benedícam Dóminum in omni témpore: semper laus ejus in ore meo. V/. Glória Patri.
Oratio
DA Ecclésiae tuae, quaésumus, Dómine, sanctis Martýribus tuis Vito, Modésto atque Crescéntia intercedéntibus, supérbe non sápere, sed tibi plácita humilitáte profícere: ut, prava despíciens, quaecúmque recta sunt, líbera exérceat caritáte. Per Dóminum.
Léctio libri Sapiéntiae.
Sap. 3, 1-8
JUSTÓRUM ánimae in manu Dei sunt, et non tanget illos torméntum mortis. Visi sunt óculis insipiéntium mori: et aestimáta est afflíctio éxitus illórum: et quod a nobis est iter, extermínium: illi autem sunt in pace. Et si coram homínibus torménta passi sunt, spes illórum immortalitáte plena est. In paucis vexáti, in multis bene disponéntur: quóniam Deus tentávit eos, et invénit illos dignos se. Tamquam aurum in fornáce probávit illos, et quasi holocáusti hóstiam accépit illos, et in témpore erit respéctus illórum. Fulgébunt justi, et tamquam scintíllae in arundinéto discúrrent. Judicábunt natiónes, et dominabúntur pópulis, et regnábit Dóminus illórum in perpétuum.
Graduale Ps. 149, 5 et 1 Exsultábunt sancti in glória, laetabúntur in cubílibus suis. V/. Cantáte Dómino cánticum novum: laus ejus in ecclésia sanctórum.
Allelúja, allelúja. V/. Ps. 144, 10-11 Sancti tui, Dómine, benedícent te: glóriam regni tui dicent. Allelúja.
+ Sequéntia sancti Evangélii secúndum Lucam.
Luc. 10, 16-20
IN illo témpore: Dixit Jesus discípulis suis: Qui vos audit, me audit: et qui vos spernit, me spernit. Qui autem me spernit, spernit eum, qui misit me. Revérsi sunt autem septuagínta duo cum gáudio, dicéntes: Dómine, étiam daemónia subjiciúntur nobis in nómine tuo. Et ait illis: Vidébam sátanan sicut fulgur de caelo cadéntem. Ecce dedi vobis potestátem calcándi supra serpéntes et scorpiónes, et super omnem virtútem inimíci: et nihil vobis nocébit. Verúmtamen in hoc nolíte gaudére, quia spíritus vobis subjiciúntur: gaudéte autem, quod nómina vestra scripta sunt in caelis.
Offertorium Ps. 67, 36 Mirábilis Deus in sanctis suis: Deus Israël, ipse dabit virtútem et fortitúdinem plebi suae: benedíctus Deus.
Secreta
SICUT glóriam divínae poténtiae múnera pro Sanctis obláta testántur: sic nobis efféctum, Dómine, tuae salvatiónis impéndant. Per Dóminum.
Communio Sap. 3, 1-2 et 3 Justórum ánimae in manu Dei sunt, et non tanget illos torméntum malítiae: visi sunt óculis insipiéntium mori: illi autem sunt in pace.
Postcommunio
REPLÉTI, Dómine, benedictióne solémni: quaésumus ; ut per intercessiónem sanctórum Mártyrum tuórum Viti, Modésti et Crescéntiae, medicína sacraménti et corpóribus nostris prosit, et méntibus. Per Dóminum.
* Tempore Paschali Missa Sancti tui, de Communi Martyrum 2 loco, cum Orationibus et Evangelio ut in Missa praecedenti.
Missale Romanum 1957 - BEATAE MARIAE VIRGINIS REGINAE