Missale Romanum 1957 - MATRIS MISERICORDIAE
Die 11 Augusti
Episcopi et Martyris
Introitus Ps. 17, 8
COMMÓTA est, et contrémuit terra: fundaménta móntium conturbáta sunt, quóniam irátus est eis. Ps. 49, 15 Invoca me in die tribulatiónis: éruam te, et honorificábis me. V/. Glória Patri.
Oratio
DEUS, qui beátum Emígdium, Mártyrem tuum atque Pontíficem, idolórum victória et miraculórum glória decorásti: concéde propítius ; ut, eo interveniénte, malórum spirítuum fraudes víncere et coruscáre virtútibus mereámur. Per Dóminum.
Léctio libri Apocalýpsis beáti Joánnis Apóstoli.
Apoc. 11, 13-17
IN illa hora factus est terraemótus magnus, et décima pars civitátis cécidit: et occísa sunt in terraemótu nómina hóminum septem míllia: et réliqui in timórem sunt missi, et dedérunt glóriam Deo caeli. Vae secúndum ábiit: et ecce vae tértium véniet cito. Et séptimus Angelus tuba cécinit: et factae sunt voces magnae in caelo, dicéntes: Factum est regnum hujus mundi, Dómini nostri et Christi ejus, et regnábit in saécula saeculórum: Amen. Et vigintiquátuor senióres, qui in conspéctu Dei sedent in sédibus suis, cecidérunt in fácies suas, et adoravérunt Deum, dicéntes: Grátias ágimus tibi, Dómine Deus omnípotens, qui es, et qui eras, et qui ventúrus es: quia accepísti virtútem tuam magnam, et regnásti.
Graduale Ps. 59, 6-7 Dedísti metuéntibus te significatiónem: ut fúgiant a fácie arcus. V/. Ut liberéntur dilécti tui: salvum fac déxtera tua, et exáudi me.
Allelúja, allelúja. V/. Ps. 88, 22 Manus mea auxiliábitur ei: et bráchium meum confortábit eum. Allelúja.
Post Septuagesimam, omissis Allelúja et Versu sequenti, dicitur
Tractus Jerem. 3, 12 Non avértam fáciem meam a vobis: et non iráscar in perpétuum. V/. Isai. 42, 6 Dedi te in foedus pópuli, et in lucem géntium. V/. Ibid., 25, 4 Factus est fortitúdo páperi, fortitúdo egéno in tribulatióne sua.
Tempore autem Paschali omittitur Graduale, et ejus loco dicitur:
Allelúja, allelúja. V/. Jerem. 1, 18 Dedi te in civitátem munítam, et in colúmnam férream, et in murum aéreum. Allelúja. V/. Eccli. 39, 20 Date nómini ejus magnificéntiam, et confitémini illi. Allelúja.
+ Sequéntia sancti Evangélii secúndum Lucam.
Luc. 21, 9-19
IN illo témpore: Dixit Jesus discípulis suis: Cum audiéritis praélia et seditiónes, nolíte terréri: opórtet primum haec fíeri, sed nondum statim finis. Tunc dicébat illis: Surget gens contra gentem, et regnum advérsus regnum. Et terraemótus magni erunt per loca, et pestiléntiae, et fames, terrorésque de caelo, et signa magna erunt. Sed ante haec ómnia injícient vobis manus suas, et persequéntur, tradéntes in synagógas et custódias, trahéntes ad reges et praésides propter nomen meum: contínget autem vobis in testimónium. Pónite ergo in córdibus vestris non praemeditári quemádmodum respondeátis. Ego enim dabo vobis os et sapiéntiam, cui non póterunt resístere et contradícere omnes adversárii vestri. Tradémini autem a paréntibus, et frátribus, et cognátis, et amícis, et morte affícient ex vobis: et éritis ódio ómnibus propter nomen meum: et capíllus de cápite vestro non períbit. In patiéntia vestra possidébitis ánimas vestras.
Offertorium Ps. 59, 4 Commovísti, Dómine, terram, et conturbásti eam: sana contritiónes ejus, quia commóta est.
Secreta
MÚNERA tibi, Dómine, obláta sanctífica: ut per ea, intercedénte beáto Emígdio Mártyre tuo atque Pontífice, ab ómnibus ánimae et córporis perículis liberémur. Per Dóminum.
Communio Ps. 32, 8 Tímeat Dóminum omnis terra: ab eo autem commoveántur omnes inhabitántes orbem.
Postcommunio
SACRAMÉNTA, quae súmpsimus, Dómine: per intercessiónem beáti Emígdii Mártyris tui atque Pontíficis sint nobis ad tutaméntum mentis et córporis, et ad misericórdiam tuam efficáciter consequéndam. Per Dóminum.
Eadem die 11 Augusti Virginis et Martyris
Missa Loquébar, de Communi Virginum 1 loco.
Die 13 Augusti
Missa Salve, de Communi Festorum B. Mariae Virginis, praeter Orationem sequentem ; et dicitur Credo.
Oratio P
OMNÍPOTENS et miséricors Deus, qui in beáta semper Vírgine María peccatórum refúgium, et auxílium collocásti: concéde ; ut, ipsa protegénte, a culpis ómnibus absolúti, misericórdiae tuae efféctum felícem consequámur. Per Dóminum.
Secreta C
TUA, Dómine, propitiatióne, et beátae Maríae semper Vírginis intercessióne, ad perpétuam atque praeséntem haec oblátio nobis profíciat prosperitátem et pacem. Per Dóminum.
Praefatio de beata Maria Virgine Et te in Festivitáte.
Postcommunio C
SUMPTIS, Dómine, salútis nostrae subsídiis: da, quaésumus, beátae Maríae semper Vírginis patrocíniis nos ubíque prótegi ; in cujus veneratióne haec tuae obtúlimus majestáti. Per Dóminum.
Eadem die 13 Augusti Confessoris
Introitus Ps. 118, 167
CUSTODÍVIT ánima mea testimónia tua, Dómine: et diléxit ea veheménter. Ps. ibid., 1 Beáti immaculáti in via: qui ámbulant in lege Dómini. V/. Glória Patri.
Oratio
CONCÉDE, quaésumus, fámulis tuis, Dómine Deus: ea innocéntiae ac fidelitátis exémpla in tuo servítio sectári ; quibus angélicus júvenis Joánnes aetátis suae florem consecrávit. Per Dóminum.
Léctio libri Sapiéntiae.
Eccli. 51, 17-25, 27-28 et 35
CONFITÉBOR, et laudem dicam tibi, Dómine Rex, et benedícam nómini Dómini. Cum adhuc júnior essem, priúsquam oberrárem, quaesívi sapiéntiam palam in oratióne mea. Ante templum postulábam pro illa, et usque in novíssimis inquíram eam. Et efflóruit tamquam praecox uva, laetátum est cor meum in ea. Ambulávit pes meus iter rectum, a juventúte mea investigábam eam. Inclinávi módice aurem meam, et excépi illam. Multam invéni in meípso sapiéntiam, et multum proféci in ea. Danti mihi sapiéntiam, dabo glóriam. Consiliátus sum enim ut fácerem illam: zelátus sum bonum, et non confúndar. Colluctáta est ánima mea in illa, et in faciéndo eam confirmátus sum. Animam meam diréxi ad illam, et in agnitióne invéni eam. Possédi cum ipsa cor ab inítio: propter hoc non derelínquar. Vidéte óculis vestris quia módicum laborávi, et invéni mihi multam réquiem.
Graduale Sap. 4, 13-14 Consummátus in brevi explévit témpora multa. V/. Plácita enim erat Deo ánima illíus: propter hoc properávit edúcere illum de médio iniquitátum.
Allelúja , allelúja. V/. Ibid., 16 Condémnat autem justus mórtuus vivos ímpios, et juvéntus celérius consummáta longam vitam injústi. Allelúja.
Post Septuagesimam, omissis Allelúja et Versu sequenti, dicitur
Tractus Ps. 70, 17 Deus, docuísti me a juventúte mea: et usque nunc pronuntiábo mirabília tua. V/. Ps. 118, 103 et 101 Quam dúlcia fáucibus meis elóquia tua, super mel ori meo ! V/. Ab omni via mala prohíbui pedes meos: ut custódiam verba tua.
Tempore autem Paschali omittitur Graduale, et ejus loco dicitur:
Allelúja, allelúja. V/. Ps. 118, 106 Jurávi, et státui custódíre judícia justítiae tuae. Allelúja. V/. Ibid., 74 Qui timent te vidébunt me, et laetabúntur: quia in verba tua supersperávi. Allelúja.
+ Sequéntia sancti Evangélii secúndum Matthaéum.
Matth. 19, 16-21
IN illo témpore: Ecce unus accédens ad Jesum, ait illi: Magíster bone, quid boni fáciam ut hábeam vitam aetérnam ? Qui dixit ei: Quid me intérrogas de bono ? Unus est bonus, Deus. Si autem vis ad vitam íngredi, serva mandáta. Dicit illi: Quae ? Jesus autem dixit: Non homicídium fácies: Non adulterábis: Non fácies furtum: Non falsum testimónium dices: Honóra patrem tuum, et matrem tuam, et díliges próximum tuum sicut teípsum. Dicit illi adoléscens: Omnia haec custodívi a juventúte mea, quid adhuc mihi deest ? Ait illi Jesus: Si vis perféctus esse, vade, vende quae habes, et da paupéribus, et habébis thesáurum in caelo: et veni, séquere me.
Offertorium Ps. 115, 16-17 O Dómine, quia ego servus tuus: ego servus tuus et fílius ancíllae tuae: dirupísti víncula mea: tibi sacrificábo hóstiam laudis.
Secreta
RÉSPICE, miséricors Deus, dona quae offérimus, recoléntes ánimo caritátem: qua beátus Joánnes inter haec mystéria flagrábat. Per Dóminum.
Communio Cant. 6, 2 ; 3, 4 Ego dilécto meo, et diléctus meus mihi, qui páscitur inter lília. Invéni quem díligit ánima mea: ténui eum, nec dimíttam.
Postcommunio
CAELÉSTI épulo reféctis praesta nobis, quaésumus, miséricors Deus: ut, beáti Joánnis vestígia sequéntes, viam mandatórum tuórum dilatáto corde currámus. Per Dóminum.
Die 16 Augusti Confessoris
Missa Justus, de Communi Confessoris non Pontificis 2 loco, praeter Orationem sequentem:
Oratio P
PÓPULUM tuum, quaésumus, Dómine, contínua pietáte custódi: et, beáti Rochi suffragántibus méritis, ab omni fac ánimae et córporis contagióne secúrum. Per Dóminum.
Secreta C
PRAESTA nobis, quaésumus, omnípotens Deus: ut nostrae humilitátis oblátio et pro tuórum tibi grata sit honóre Sanctórum, et nos córpore páriter et mente puríficet. Per Dóminum.
Postcommunio C
QUSUMUS, omnípotens Deus: ut, qui caeléstia aliménta percépimus, intercedénte beáto Rocho Confessóre tuo, per haec contra ómnia advérsa muniámur. Per Dóminum.
Die 18 Augusti Viduae
Introitus Gal. 6, 14
MIHI autem absit gloriári, nisi in Cruce Dómini nostri Jesu Christi: per quem mihi mundus crucifíxus est, et ego mundo. Ps. 22, 4 Virga tua et báculus tuus: ipsa me consoláta sunt. V/. Glória Patri.
Oratio
DÓMINE Jesu Christe, qui locum, ubi Crux tua latébat, beátae Hélenae revelásti, ut, per eam, Ecclésiam tuam hoc pretióso thesáuro ditáres: ejus nobis intercessióne concéde ; ut vitális ligni prétio, aetérnae vitae praémia consequámur: Qui vivis.
Léctio libri Sapiéntiae.
Prov. 31, 10-31
MULÍEREM fortem quis invéniet ? Procul, et de últimis fínibus prétium ejus. Confídit in ea cor viri sui, et spóliis non indigébit. Reddet ei bonum, et non malum ómnibus diébus vitae suae. Quaesívit lanam et linum, et operáta est consílio mánuum suárum. Facta est quasi navis institóris, de longe portans panem suum. Et de nocte surréxit, dedítque praedam domésticis suis, et cibária ancíllis suis. Considerávit agrum, et emit eum: de fructu mánuum suárum plantávit víneam. Accínxit fortitúdine lumbos suos, et roborávit bráchium suum. Gustávit, et vidit quia bona est negotiátio ejus: non exstinguétur in nocte lucérna ejus. Manum suam misit ad fórtia, et dígiti ejus apprehendérunt fusum. Manum suam apéruit ínopi, et palmas suas exténdit ad páuperem. Non timébit dómui suae a frigóribus nivis: omnes enim doméstici ejus vestíti sunt duplícibus. Stragulátam vestem fecit sibi: byssus, et púrpura induméntum ejus. Nóbilis in portis vir ejus, quando séderit cum senatóribus terrae. Síndonem fecit, et véndidit, et cíngulum trádidit Chananaéo. Fortitúdo et decor induméntum ejus, et ridébit in die novíssimo. Os suum apéruit sapiéntiae, et lex cleméntiae in lingua ejus. Considerávit sémitas domus suae, et panem otiósa non comédit. Surrexérunt fílii ejus, et beatíssimam praedicavérunt: vir ejus, et laudávit eam. Multae fíliae congregavérunt divítias: tu supergréssa es univérsas. Fallax grátia, et vana est pulchritúdo: múlier timens Dóminum, ipsa laudábitur. Date ei de fructu mánuum suárum: et laudent eam in portis ópera ejus.
Graduale Ps. 44, 13, 10 et 15-16 Vultum tuum deprecabúntur omnes dívites plebis: fíliae regum in honóre tuo. V/. Adducéntur Regi vírgines post eam: próximae ejus afferéntur tibi. Afferéntur in laetítia, et exsultatióne: adducéntur in témplum Regis.
Allelúja , allelúja. V/. Ps. 111, 9 Dispérsit, dedit paupéribus: justítia ejus manet in saéculum saéculi. Allelúja.
Post Septuagesimam, omissis Allelúja et Versu sequenti, dicitur
Tractus Veni, sponsa Christi, áccipe corónam, quam tibi Dóminus praeparávit in aetérnum. V/. Ps. 44, 8 Dilexísti justítiam, et odísti iniquitátem: proptérea unxit te Deus, Deus tuus, óleo laetítiae prae consórtibus tuis. V/. Ibid., 5 Spécie tua, et pulchritúdine tua inténde, próspere procéde, et regna.
Tempore autem Paschali omittitur Graduale, et ejus loco dicitur:
Allelúja, allelúja. V/. Ps. 111, 9 Dispérsit, dedit paupéribus: justítia ejus manet in saéculum saéculi. Allelúja. V/. Ps. 44, 5 Spécie tua, et pulchritúdine tua inténde, próspere procéde, et regna. Allelúja.
+ Sequéntia sancti Evangélii secúndum Matthaéum.
Matth. 13, 44-52
IN illo témpore: Dixit Jesus discípulis suis parábolam hanc: Símile est regnum caelórum thesáuro abscóndito in agro: quem qui invénit homo, abscóndit, et prae gáudio illíus vadit, et vendit univérsa, quae habet, et emit agrum illum. Iterum símile est regnum caelórum hómini negotiatóri, quaerénti bonas margarítas. Invénta autem una pretiósa margaríta, ábiit, et véndidit ómnia, quae hábuit, et emit eam. Iterum símile est regnum caelórum sagénae missae in mare, et ex omni génere píscium congregánti. Quam, cum impléta esset, educéntes, et secus littus sedéntes, elegérunt bonos in vasa, malos autem foras misérunt. Sic erit in consummatióne saéculi: exíbunt Angeli, et separábunt malos de médio justórum, et mittent eos in camínum ignis: ibi erit fletus, et stridor déntium. Intellexístis haec ómnia ? Dicunt ei: Etiam. Ait illis: Ideo omnis scriba doctus in regno caelórum símilis est hómini patrifamílias, qui profert de thesáuro suo nova et vétera.
Offertorium 1 Cor. 2, 2 Non enim judicávi me scire áliud, nisi Jesum Christum, et hunc crucifíxum.
Secreta
PER haec sacra mystéria concéde nobis, Dómine: ut, sicut beátae Hélenae misericórditer tribuísti, ut Fílium tuum crucifíxum in corde semper gestáret ; ita et nos eum in córdibus nostris perpétuo deferámus: Qui tecum vivit.
Communio Cant. 7, 8 Ascéndam in palmam, et apprehéndam fructus ejus.
Postcommunio
CONCÉDE nobis , miséricors Deus: ut, qui salutíferae Crucis tuae fructu in terra sumus recreáti ; per intercessiónem beátae Hélenae, eódem júgiter pérfrui mereámur in caelis: Qui vivis.
Episcopi, Confessoris et Ecclesiae Doctoris
Introitus Ps. 44, 10
ASTITIT Regína a dextris tuis in vestítu deauráto: circúmdata varietáte. Ps. ibid., 2 Eructávit cor meum verbum bonum: dico ego ópera mea Regi. V/. Glória Patri.
Oratio
DÓMINE Jesu Christe, pater misericordiárum, et Deus totíus consolatiónis: concéde propítius ; ut, sicut lumbos praecíncti, puríssimam Genitrícem tuam Maríam sub Consolatiónis título gaudéntes venerámur in terris, ita perénni ejúsdem consórtio pérfrui mereámur in caelis: Qui vivis.
Léctio Isaíae Prophétae.
Isai. 11, 1-5
HAEC dicit Dóminus Deus: Egrediétur virga de radíce Jesse, et flos de radíce ejus ascéndet. Et requiéscet super eum spíritus Dómini: spíritus sapiéntiae et intelléctus, spíritus consílii et fortitúdinis, spíritus sciéntiae et pietátis ; et replébit eum spíritus timóris Dómini. Non secúndum visiónem oculórum judicábit: neque secúndum audítum áurium árguet: sed judicábit in justítia páuperes, et árguet in aequitáte pro mansuétis terrae: et percútiet terram virga oris sui, et spíritu labiórum suórum interfíciet ímpium. Et erit justítia cíngulum lumbórum ejus: et fides cinctórium renum ejus.
Graduale Ps. 44, 8-9 Unxit te Deus, Deus tuus, óleo laetítiae prae consórtibus tuis. V/. Myrrha, et gutta, et cásia a vestiméntis tuis.
Allelúja , allelúja. V/. Cant. 2, 14 Sonet vox tua in áuribus meis: vox enim tua dulcis, et fácies tua decóra. Allelúja.
Post Septuagesimam, omissis Allelúja et Versu sequenti, dicitur
Tractus Ps. 44, 12 et 18 Concupíscet Rex decórem tuum: quóniam ipse est Dóminus Deus tuus, et adorábunt eum. V/. Mémores erunt nóminis tui in omni generatióne et generatiónem. V/. Proptérea pópuli confitebúntur tibi in aetérnum: et in saéculum saéculi.
Tempore autem Paschali omittitur Graduale, et ejus loco dicitur:
Allelúja, allelúja. V/. Ps. 44, 9 Myrrha, et gutta, et cásia a vestiméntis tuis. Allelúja. V/. Cant. 2, 14 Sonet vox tua in áuribus meis: vox enim tua dulcis, et fácies tua decóra. Allelúja.
+ Sequéntia sancti Evangélii secúndum Lucam.
Luc. 1, 39-47
IN illo témpore: Exsúrgens María ábiit in montána cum festinatióne in civitátem Juda: et intrávit in domum Zacharíae, et salutávit Elísabeth. Et factum est, ut audívit salutatiónem Maríae Elísabeth, exsultávit infans in útero ejus: et repléta est Spíritu Sancto Elísabeth: et exclamávit voce magna, et dixit: Benedícta tu inter mulíeres, et benedíctus fructus ventris tui. Et unde hoc mihi, ut véniat mater Dómini mei ad me ? Ecce enim, ut facta est vox salutatiónis tuae in áuribus meis, exsultávit in gáudio infans in útero meo. Et beáta, quae credidísti, quóniam perficiéntur ea, quae dicta sunt tibi a Dómino. Et ait María: Magníficat ánima mea Dóminum: et exsultávit spíritus meus in Deo salutári meo.
Credo.
Offertorium Jerem. 18, 20 Recordáre, Virgo Mater, in conspéctu Dei, ut loquáris pro nobis bona, et ut avértat indignatiónem suam a nobis.
Secreta
SÚSCIPE, Dómine, munus, quod tibi offérimus, memóriam recoléntes puríssimae Vírginis Maríae, quae consolátur nos in omni tribulatióne nostra: et praesta ; ut mens nostra supérno lúmine Sancti Spíritus irradiáta, terréna despíciat, et ad caeléstia semper aspíret. Per Dóminum in unitáte ejúsdem.
Praefatio de beata Maria Virgine Et te in Festivitáte.
Communio Jerem. 2, 32 Numquid obliviscétur virgo ornaménti sui, aut sponsa fásciae pectorális suae ?
Postcommunio
FONS vitae, Dómine Jesu, reple mentem nostram torrénte voluptátis tuae: ut, beatíssimae semper Vírginis Maríae Consolatiónis Matris praesídio terréna calcántes, caeléstibus semper recreári valeámus: Qui vivis.
ante Dominicam ultimam Augusti
Introitus
SALUS pópuli ego sum: de quacúmque tribulatióne clamáverint ad me, exáudiam eos. Ps. 33, 2 Benedícam Dóminum in omni témpore: semper laus ejus in ore meo. V/. Glória Patri.
Oratio
CONCÉDE nos fámulos tuos, quaésumus, Dómine Deus, perpétua mentis et córporis sanitáte gaudére: et, gloriósa beátae Maríae semper Vírginis intercessióne, a praesénti liberári tristítia, et aetérna pérfrui laetítia. Per Dóminum.
Léctio libri Sapiéntiae.
Prov. 8, 22-35
DÓMINUS possédit me in inítio viárum suárum, ántequam quidquam fáceret a princípio. Ab aetérno ordináta sum, et ex antíquis, ántequam terra fíeret. Nondum erant abýssi, et ego jam concépta eram: necdum fontes aquárum erúperant: necdum montes gravi mole constíterant: ante colles ego parturiébar: adhuc terram non fécerat, et flúmina, et cárdines orbis terrae. Quando praeparábat caelos, áderam: quando certa lege et gyro vallábat abýssos: quando aéthera firmábat sursum, et librábat fontes aquárum: quando circúmdabat mari términum suum, et legem ponébat aquis, ne transírent fines suos: quando appendébat fundaménta terrae. Cum eo eram cuncta compónens: et delectábar per síngulos dies, ludens coram eo omni témpore: ludens in orbe terrárum: et delíciae meae esse cum fíliis hóminum. Nunc ergo, fílii, audíte me: Beáti, qui custódiunt vias meas. Audíte disciplínam, et estóte sapiéntes, et nolíte abjícere eam. Beátus homo, qui audit me, et qui vígilat ad fores meas quotídie, et obsérvat ad postes óstii mei. Qui me invénerit, invéniet vitam, et háuriet salútem a Dómino.
Graduale Ps. 102, 1 et 3-4 Bénedic, ánima mea, Dómino: et ómnia interióra mea nómini sancto ejus. Qui sanat omnes infirmitátes tuas, qui rédimit de intéritu vitam tuam. V/. Ps. 117, 14 Fortitúdo mea, et laus mea Dóminus: et factus est mihi in salútem.
Allelúja, allelúja. V/. Ps. 59, 13 Da nobis, Dómine, auxílium de tribulatióne: quia vana salus hóminis. Allelúja.
Post Septuagesimam, omissis Allelúja et Versu sequenti, dicitur
Tractus Ps. 117, 16-17 Déxtera Dómini fecit virtútem, déxtera Dómini exaltávit me, déxtera Dómini fecit virtútem. V/. Non móriar, sed vivam: et narrábo ópera Dómini. V/. Ps. 59, 13 Da nobis, Dómine, auxílium de tribulatióne: quia vana salus hóminis.
Tempore autem Paschali omittitur Graduale, et ejus loco dicitur:
Allelúja, allelúja. V/. Ps. 117, 14 Fortitúdo mea, et laus mea Dóminus: et factus est mihi in salútem. Allelúja. V/. Ps. 59, 13 Da nobis, Dómine, auxílium de tribulatióne: quia vana salus hóminis. Allelúja.
+ Sequéntia sancti Evangélii secúndum Joánnem.
Joann. 2, 1-11
IN illo témpore: Núptiae factae sunt in Cana Galilaéae: et erat mater Jesu ibi. Vocátus est autem et Jesus, et discípuli ejus ad núptias. Et deficiénte vino, dicit mater Jesu ad eum: Vinum non habent. Et dicit ei Jesus: Quid mihi et tibi est, múlier ? nondum venit hora mea. Dicit mater ejus minístris: Quodcúmque díxerit vobis, fácite. Erant autem ibi lapídeae hýdriae sex pósitae secúndum purificatiónem Judaeórum, capiéntes síngulae metrétas binas vel ternas. Dicit eis Jesus: Impléte hýdrias aqua. Et implevérunt eas usque ad summum. Et dicit eis Jesus: Hauríte nunc, et ferte architriclíno. Et tulérunt. Ut autem gustávit architriclínus aquam vinum factam, et non sciébat unde esset, minístri autem sciébant, qui háuserant aquam: vocat sponsum architriclínus, et dicit ei: Omnis homo primum bonum vinum ponit: et cum inebriáti fúerint, tunc id, quod detérius est. Tu autem servásti bonum vinum usque adhuc. Hoc fecit inítium signórum Jesus in Cana Galilaéae: et manifestávit glóriam suam, et credidérunt in eum discípuli ejus.
Credo.
Offertorium Jerem. 18, 20 Recordáre, Virgo Mater, dum stéteris in conspéctu Dei, ut loquáris pro nobis bona, et ut avértat indignatiónem suam a nobis.
Secreta
HAEC oblátio, Dómine, per salutíferam beatíssimae unigéniti Fílii tui Genitrícis intercessiónem, nos in tua grátia confírmet, et a malis ómnibus reddat immúnes. Per eúmdem Dóminum.
Praefatio de beata Maria Virgine Et te in Festivitáte.
Communio Isai. 46, 13 Dabo in Sion salútem, et in Israël glóriam meam.
Postcommunio
DIVÍNA libátio córporis et sánguinis tui, Dómine Jesu Christe, quam in honórem Genitrícis tuae devóte suscépimus, temporális vitae páriter et aetérnae múnera largiátur: Qui vivis.
Missa Salve, de Communi Festorum beatae Mariae Virginis, praeter Orationem sequentem, et dicitur Credo.
Oratio P
DÓMINE Jesu Christe, pastor bone, qui pro óvibus tuis ánimam dedísti, nosque pópulum tuum et oves páscuae tuae in cruce pendens Matri Vírgini commendásti: ipsa interveniénte concéde ; ut, te pastórem nostrum sequéntes in terris, ad páscua aetérnae vitae perducámur in caelis: Qui vivis.
Secreta C
TUA, Dómine, propitiatióne, et beátae Maríae semper Vírginis intercessióne, ad perpétuam atque praeséntem haec oblátio nobis profíciat prosperitátem et pacem. Per Dóminum.
Praefatio de beata Maria Virgine Et te in Festivitáte.
Postcommunio C
SUMPTIS, Dómine, salútis nostrae subsídiis: da, quaésumus, beátae Maríae semper Vírginis patrocíniis nos ubíque prótegi ; in cujus veneratióne haec tuae obtúlimus majestáti. Per Dóminum.
Die 4 Septembris Virginis
Missa Dilexísti, de Communi Virginum 3 loco, praeter Orationem sequentem.
Oratio P
DEUS, qui beátam Rosam sanctárum tuárum Vírginum collégio aggregáre dignátus es: tríbue nobis, quaésumus ; ut ejus précibus et méritis a culpis ómnibus expiémur, et tuae majestátis consórtio perfruámur aetérno. Per Dóminum.
Secreta C
ACCÉPTA tibi sit, Dómine, sacrátae plebis oblátio pro tuórum honóre Sanctórum: quorum se méritis de tribulatióne percepísse cognóscit auxílium. Per Dóminum.
Postcommunio C
SATIÁSTI, Dómine, famíliam tuam munéribus sacris: ejus, quaésumus, semper interventióne nos réfove, cujus solémnia celebrámus. Per Dóminum.
Die 9 Septembris Confessoris
Introitus Ps. 106, 9-10
SATIÁVIT Dóminus ánimam inánem: sedéntes in ténebris et umbra mortis, vinctos in mendicitáte et ferro. Ps. ibid., 8 Confiteántur Dómino misericórdiae ejus: et mirabília ejus fíliis hóminum. V/. Glória Patri.
Oratio
DEUS, qui abréptos in servitútem Nigrítas ad agnitiónem tui nóminis vocatúrus, beátum Petrum mira in eis juvándis caritáte et patiéntia roborásti: ejus nobis intercessióne concéde ; ut, quae Jesu Christi sunt quaeréntes, próximos ópere et veritáte diligámus. Per eúmdem Dóminum.
Léctio Isaíae Prophétae.
Isai. 58, 6-9 et 10
HAEC dicit Dóminus: Dissólve colligatiónes impietátis, solve fascículos depriméntes: dimítte eos, qui confrácti sunt, líberos, et omne onus dirúmpe. Frange esuriénti panem tuum, et egénos, vagósque induc in domum tuam: cum víderis nudum, óperi eum, et carnem tuam ne despéxeris. Tunc erúmpet quasi mane lumen tuum, et sánitas tua cítius oriétur, et anteíbit fáciem tuam justítia tua, et glória Dómini cólliget te. Tunc invocábis, et Dóminus exáudiet: clamábis, et dicet: Ecce adsum. Cum effúderis esuriénti ánimam tuam, et ánimam afflíctam repléveris, oriétur in ténebris lux tua, et ténebrae tuae erunt sicut merídies.
Graduale Ps. 71, 12-14 Liberábit páuperem a poténte, et páuperem cui non erat adjútor: parcet páuperi et ínopi, et ánimas páuperum salvas fáciet. V/. Ex usúris et iniquitáte rédimet ánimas eórum: et honorábile nomen eórum coram illo.
Allelúja, allelúja. V/. Ps. 9, 33 et 35 Exsúrge, Dómine Deus, exaltétur manus tua: ne obliviscáris páuperum: tibi derelíctus est páuper: órphano tu eris adjútor. Allelúja.
Post Septuagesimam, omissis Allelúja et Versu sequenti, dicitur
Tractus Isai. 61, 1 Misit me Dóminus ut medérer contrítis corde, et praedicárem captívis indulgéntiam. V/. 1 Cor. 9, 22 Factus sum infírmis infírmus, ut infírmos lucrifácerem. V/. Omnibus ómnia factus sum, ut omnes fácerem salvos.
Tempore autem Paschali omittitur Graduale, et ejus loco dicitur:
Allelúja, allelúja. V/. Ps. 123, 7 Anima nostra, sicut passer, erépta est de láqueo venántium: láqueus contrítus est, et nos liberáti sumus. Allelúja. V/. Ps. 84, 10 Prope timéntes Dóminum Deum salutáre ipsíus: ut inhábitet glória in terra nostra. Allelúja.
+ Sequéntia sancti Evangélii secúndum Lucam.
Luc. 10, 29-37
IN illo témpore: Legisperítus quidam, volens justificáre seípsum, dixit ad Jesum: Et quis est meus próximus ? Suscípiens autem Jesus, dixit: Homo quidam descendébat ab Jerúsalem in Jéricho, et íncidit in latrónes, qui étiam despoliavérunt eum: et plagis impósitis abiérunt, semivívo relícto. Accidit autem, ut sacérdos quidam descénderet eádem via: et viso illo praeterívit. Simíliter et levíta, cum esset secus locum, et vidéret eum, pertránsiit. Samaritánus autem quidam iter fáciens, venit secus eum: et videns eum, misericórdia motus est. Et ap própians alligávit vúlnera ejus, infúndens óleum et vinum: et impónens illum in juméntum suum, duxit in stábulum, et curam ejus egit. Et áltera die prótulit duos denários, et dedit stabulário, et ait: Curam illíus habe: et quodcúmque supererogáveris, ego cum redíero, reddam tibi. Quis horum trium vidétur tibi próximus fuísse illi, qui íncidit in latrónes ? At ille dixit: Qui fecit misericórdiam in illum. Et ait illi Jesus: Vade, et tu fac simíliter.
Offertorium Job. 29, 12-13 et 15-16 Eo quod liberássem páuperem vociferántem, et pupíllum, cui non esset adjútor, benedíctio peritúri super me veniébat, et cor víduae consolátus sum: oculus fui caeco, et pes claudo: pater eram páuperum.
Secreta
CARITÁTIS víctima, quam immolántes offérimus, sit nobis, Dómine, te miseránte, propitiábilis: et, beáti Petri précibus et méritis, ad obtinéndum patiéntiae et caritátis augméntum, éfficax et salutáris. Per eúmdem Dóminum.
Communio Ezech. 34, 15-16 Ego pascam oves meas: et ego eas accubáre fáciam, dicit Dóminus Deus. Quod períerat requíram, et quod abjéctum erat redúcam, et quod confráctum fúerat alligábo, et quod infírmum fúerat consolidábo.
Postcommunio
CRESCAT in nobis, Dómine, tuae pietátis efféctus salutáris: ut, caelésti pábulo nutríti, aetérnae vitae corónam, beáto Petro intercedénte, felíciter assequámur. Per Dóminum.
Die 1 Octobris
Episcopi majoris Armeniae et Martyris
Extra Tempus Paschale Missa Státuit, de Communi unius Martyris 1 loco, praeter Orationem sequentem.
Tempore autem Paschali Missa Protexísti, de Communi Martyrum 1 loco, cum Orationibus ut infra.
Oratio P
DEUS, qui per beátum Gregórium Pontíficem et Mártyrem tuum Arméniae gentis pópulum, regémque verae fídei lucem recípere tribuísti: da Ecclésiae tuae de tantis gaudére triúmphis, et apud te méritis ejúsdem et précibus adjuvári. Per Dóminum.
Secreta C
HÓSTIAS tibi, Dómine, beáti Gregórii Mártyris tui atque Pontíficis dicátas méritis, benígnus assúme: et ad perpétuum nobis tríbue proveníre subsídium. Per Dóminum.
Postcommunio C
REFÉCTI participatióne múneris sacri, quaésumus, Dómine Deus noster: ut, cujus exséquimur cultum, intercedénte beáto Gregório Mártyre tuo atque Pontífice, sentiámus efféctum. Per Dóminum.
Die 16 Octobris
Introitus Sedulius
SALVE, sancta parens, eníxa puérpera Regem: qui caelum terrámque regit in saécula saeculórum. Ps. 44, 2 Eructávit cor meum verbum bonum: dico ego ópera mea Regi. V/. Glória Patri.
Oratio
DA, quaésumus, omnípotens aetérne Deus: ut puríssimae Vírginis Maríae integérrimam Virginitátem festíva celebritáte venerántes, ejus intercessióne, puritátem mentis et córporis consequámur. Per Dóminum.
Léctio libri Sapiéntiae.
Cant. 2, 10-14
EN diléctus meus lóquitur mihi: Surge, própera, amíca mea, colúmba mea, formósa mea, et veni. Jam enim hiems tránsiit, imber ábiit, et recéssit. Flores apparuérunt in terra nostra, tempus putatiónis advénit: vox túrturis audíta est in terra nostra: ficus prótulit grossos suos: víneae floréntes dedérunt odórem suum. Surge, amíca mea, speciósa mea, et veni: colúmba mea in foramínibus petrae, in cavérna macériae, osténde mihi fáciem tuam, sonet vox tua in áuribus meis: vox enim tua dulcis, et fácies tua decóra.
Graduale Cant. 2, 2 et 16 Sicut lílium inter spinas, sic amíca mea inter fílias. V/. Diléctus meus mihi, et ego illi, qui páscitur inter lília.
Allelúja, allelúja. V/. Cant. 6, 9 Quae est ista, quae progréditur quasi auróra consúrgens, pulchra ut luna, elécta ut sol, terríbilis ut castrórum ácies ordináta ? Allelúja.
Post Septuagesimam, omissis Allelúja et Versu sequenti, dicitur
Tractus Judith 13, 23 Benedícta es tu, Virgo María, a Dómino Deo excélso, prae ómnibus muliéribus super terram. V/. Ibid. 15, 10 Tu glória Jerúsalem, tu laetítia Israël, tu honorificéntia pópuli nostri. V/. Cant. 4, 7 Tota pulchra es, María: et mácula originális non est in te.
Tempore autem Paschali omittitur Graduale, et ejus loco dicitur:
Allelúja, allelúja. V/. Judith 15, 10 Tu glória Jerúsalem, tu laetítia Israël, tu honorificéntia pópuli nostri. Allelúja. V/. Cant. 4, 7 Tota pulchra es, María: et mácula originális non est in te. Allelúja.
+ Sequéntia sancti Evangélii secúndum Lucam.
Luc. 1, 26-35
IN illo témpore: Missus est Angelus Gábriel a Deo in civitátem Galilaéae, cui nomen Názareth, ad Vírginem desponsátam viro, cui nomen erat Joseph, de domo David, et nomen Vírginis María. Et ingréssus Angelus ad eam, dixit: Ave, grátia plena: Dóminus tecum: benedícta tu in muliéribus. Quae cum audísset, turbáta est in sermóne ejus, et cogitábat qualis esset ista salutátio. Et ait Angelus ei: Ne tímeas, María, invenísti enim grátiam apud Deum: ecce concípies in útero, et páries fílium, et vocábis nomen ejus Jesum. Hic erit magnus, et Fílius Altíssimi vocábitur, et dabit illi Dóminus Deus sedem David patris ejus: et regnábit in domo Jacob in aetérnum, et regni ejus non erit finis. Dixit autem María ad Angelum: Quómodo fiet istud, quóniam virum non cognósco ? Et respóndens Angelus, dixit ei: Spíritus Sanctus supervéniet in te, et virtus Altíssimi obumbrábit tibi.
Credo.
Offertorium Post partum, Virgo, invioláta permansísti: Dei Génitrix, intercéde pro nobis.
Secreta
UNIGÉNITI tui, Dómine, nobis succúrrat humánitas: ut, qui natus de Vírgine, matris integritátem non mínuit, sed sacrávit ; in Puritátis ejus solémniis, nostris nos piáculis éxuens, oblatiónem nostram tibi fáciat accéptam Jesus Christus Dóminus noster: Qui tecum vivit.
Praefatio de beata Maria Virgine Et te in Festivitáte.
Communio Benedícta et venerábilis es, Virgo María, quae sine tactu pudóris invénta es mater Salvatóris.
Postcommunio
SUMPTIS, Dómine, salútis nostrae subsídiis: da, quaésumus, puríssimae Vírginis Maríae patrocíniis nos ubíque prótegi ; in cujus veneratióne haec tuae obtúlimus majestáti. Per Dóminum.
Missale Romanum 1957 - MATRIS MISERICORDIAE