Missale 1962 417

Sabbato

III classis

Statio ad S. Tryphonem


Ant. ad Introitum Ps. 29, 11

udívit Dóminus, et misertus est mihi: Dóminus factus est adiutor meus. Ps. ibid., 2 Exaltabo te, Domine, quoniam suscepisti me: nec delectasti inimicos meos super me. V. Glória Patri.

Oratio
419 Adésto, Domine, supplicationibus nostris: et concede; ut hoc solemne ieiunium, quod animabus corporibúsque curandis salubriter institutum est, devoto servitio celebremus. Per Dóminum nostrum.

Léctio Isaiae Prophetae. Isai. 58, 9-14
420 Haec dicit Dóminus Deus: Si abstúleris de medio tui catenam, et desieris extendere dígitum, et loqui quod non prodest. Cum effuderis esurienti animam tuam, et animam afflictam repléveris, orietur in tenebris lux tua, et ténebrae tuae erunt sicut meridies. Et requiem tibi dabit Dóminus semper, et implebit splendoribus animam tuam, et ossa tua liberabit, et eris quasi hortus irriguus, et sicut fons aquarum, cuius non deficient aquae. Et aedificabúntur in te deserta saeculorum: fundamenta generationis et generationis suscitabis: et vocaberis aedificátor sépium, avertens semitas in quietem. Si averteris a sabbato pedem tuum, facere voluntatem tuam in die sancto meo, et vocaveris sabbatum delicátum, et sanctum Dómini gloriosum, et glorificaveris eum, dum non facis vias tuas, et non inyenítur volúntas tua, ut loquaris sermonem: tunc delectaberis super Domino: et sustóllam te super altitudines terrae, et cibabo te hereditate Iacob patris tui. Os enim Dómini locutum est.

Graduale Ps. 26, 4
421 Unam pétii a Domino, hanc requiram, ut inhabitem in domo Dómini. V. Ut videam voluptatem Dómini, et protegar a templo sancto eius.

+ Sequentia sancti Evangelii secúndum Marcum.      Marc. 6,47-56
422 In illo témpore: Cum sero esset, erat navis in medio mari, et Iesus solus in terra. Et videns discipulos suos laborantes in remigando (erat enim ventus contrarius eis), et circa quartam vigiliam noctis venit ad eos ambulans supra mare: et volebat praeteríre eos. At illi, ut viderunt eum ambulantem supra mare, putaverunt phantasma esse, et exclamaverunt. Omnes enim viderunt eum, et conturbati sunt. Et statim locútus est cum eis, et dixit eis: Confidite, ego sum, nolite timere. Et ascendit ad illos in navim, et cessavit ventus. Et plus magis intra se stupebant: non enim intellexerunt de panibus: erat enim cor eórum obcaecátum. Et cum transfretassent, venerunt in terram Genesareth, et applicuerunt. Cumque egressi essent de navi,continuo cognoverunt eum: et percurrentes universam regionem illam, coeperunt in grabatis eos, qui se male habebant, circumferre ubi audiebant eum esse. Et quocumque introibat, in vicos, vel in villas, aut civitates, in plateis ponebant infirmos, et deprecabantur eum, ut vel fimbriam vestimenti eius tangerent: et quotquot tangebant eum, salvi fiebant.

Antiphona ad Offertorium
423 Ps. 118, 154 et 125 Domine, vivifica me secúndum eloquium tuum: ut sciam testimonia tua.

Secreta
424 Súscipe, Domine, sacrificium, cuius te voluisti dignánter immolatione placári: praesta, quaesumus; ut, huius operatione mundati, beneplacitum tibi nostrae mentis offeramus affectum. Per Dóminum nostrum Iesum Christum, Fílium tuum: Qui tecum vivit et regnat in unitate.

Praefatio de Quadragesima.

Ant. ad Communionem    Ps. 2, 11-12
425 Servite Domino in timore, et exsultate ei cum tremore: apprehendite disciplinam, ne pereatis de via iusta.

Postcommunio
426 Caelestis vitae munere vegetáti, quaesumus, Domine: ut, quod est nobis in praesénti vita mysterium, fiat aeternitátis auxilium. Per Dóminum.

Super populum: Oremus. Humiliáte capita vestra Deo.

Oratio
427 Fideles tui, Deus, per tua dona firméntur: ut eadem et percipiéndo requirant, et quaeréndo sine fine percipiant. Per Dóminum.


DOMINICA I IN QUADRAGESIMA

I classis

Statio ad S. Ioannem in Laterano


Ant. ad Introitum       Ps. 90, 15 et 16
428 Invocabit me, et ego exaudiam eum: eripiam eum, et glorificabo eum: longitudine dierum adimplébo eum. Ps. ibid., 1 Qui habitat in adiutorio Altissimi, in protectione Dei caeli commorabitur. V. Glória Patri.

Oratio
429 Deus, qui Ecclesiam tuam annua quadragesimáli observatione puríficas: praesta familiae tuae; ut, quod a te obtinere abstinéndo nititur, hoc bonis operibus exsequátur. Per Dóminum.

Léctio Epistolae beáti Pauli Apostoli ad Corinthios. 2 Cor. 6, 1-10
430 Fratres: Exhortamur vos, ne in vácuum gratiam Dei recipiatis. Ait enim: Témpore accepto exaudivi te, et in die salutis adiuvi te. Ecce nunc tempus acceptabile, ecce nunc dies salutis. Nemini dantes ullam offensionem, ut non vituperetur ministerium nostrum: sed in omnibus exhibeamus nosmetipsos sicut Dei ministros in multa patientia, in tribulationibus, in necessitatibus, in angustiis, in plagis, in carceribus, in seditionibus, in laboribus, in vigiliis, in ieiuniis, in castitate, in scientia, in longanimitate, in suavitate, in Spiritu Sancto, in caritate non ficta, in verbo veritatis, in virtute Dei, per arma iustítiae a dextris et a sinistris: per gloriam et ignobilitatem: per infamiam et bonam famam: ut seductores, et veraces: sicut qui ignoti, et cogniti: quasi morientes, et ecce vivimus: ut castigati, et non mortificati: quasi tristes, semper autem gaudentes: sicut egentes, multos autem locupletantes: tamquam nihil habentes, et ómnia possidentes.

Graduale Ps. 90, 11-12
431 Angelis suis Deus mandavit de te, ut custodiant te in omnibus viis tuis. V. In manibus portabunt te, ne unquam offendas ad lapidem pedem tuum.

Tractus Ibid., 1-7 et 11-16
432 Qui habitat in adiutorio Altissimi, in protectione Dei caeli commorabitur. V. Dicet Domino: Susceptor meus es tu, et refugium meum: Deus meus, sperabo in eum. V. Quoniam ipse liberavit me de laqueo venantium, et a verbo aspero. V. Scipulis suis obumbrabit tibi, et sub pennis eius sperábis. V. Scuto circumdabit te veritas eius: non timebis a timore nocturno. V. A sagitta volante per diem, a negotio perambulante in tenebris, a ruína et daemónio meridiano. V. Cadent a latere tuo mille, et decem milia a dextris tuis: tibi autem non appropinquabit. V. Quoniam Angelis suis mandavit de te, ut custodiant te in omnibus viis tuis. V. In manibus portabunt te, ne unquam offendas ad lapidem pedem tuum. V. Super aspidem et basiliscum ambulabis, et conculcabis leonem et draconem. V. Quoniam in me speravit, liberabo eum: protegam eum, quoniam cognovit nomen meum. V. Invocabit me, et ego exaudiam eum: cum ipso sum in tribulatione. V. Eripiam eum, et glorificabo eum: longitudine dierum adimplébo eum, et ostendam illi salutare meum.

+ Sequentia sancti Evangelii secúndum Matthaeum.       Mt. 4,1-11
433 In illo témpore: Ductus est Iesus in desertum a Spiritu, ut tentaretur a diabolo. Et cum ieiunasset quadraginta diebus et quadraginta noctibus, postea esuriit. Et accedens tentator, dixit ei: Si Filius Dei es, dic ut lapides isti panes fiant. Qui respondens, dixit: Scriptum est: Non in solo pane vivit homo: sed in omni verbo, quod procedit de ore Dei. Tunc assumpsit eum diabolus in sanctam civitatem, et statuit eum super pinnaculum templi, et dixit ei: Si Filius Dei es, mitte te deorsum. Scriptum est enim: Quia Angelis suis mandavit de te, et in manibus tollent te, ne forte offendas ad lapidem pedem tuum. Ait illi Iesus: Rursum scriptum est: Non tentabis Dóminum Deum tuum. Iterum assumpsit eum diabolus in montem excelsum valde: et ostendit ei ómnia regna mundi, et gloriam eórum, et dixit ei: Haec ómnia tibi dabo, si cadens adoraveris me. Tunc dicit ei Iesus: Vade, Satana: scriptum est enim: Dóminum Deum tuum adorabis, et illi soli servies. Tunc reliquit eum diabolus: et ecce Angeli accesserunt, et ministrabant ei. Credo.

Ant. ad Offertorium Ps. 90, 4-5
434 Scápulis suis obumbrabit tibi Dóminus, et sub pennis eius sperábis: scuto circumdabit te veritas eius.

Secreta
435 Sacrificium quadragesimalis inítii solemniter immolámus, te, Domine, deprecantes : ut, cum epularum restrictione carnálium, a nóxiis quoque voluptatibus temperémus. Per Dóminum.

Praefatio de Quadragesima.

Ant. ad Communionem      Ps. 90, 4-5
436 Scápulis suis obumbrabit tibi Dóminus, et sub pennis eius sperábis: scuto circumdabit te veritas eius.

Postcommunio
437 Tui nos, Domine, sacramenti libatio sancta restauret: et, a vetustate purgatos, in mysterii salutaris faciat transire consortium. Per Dóminum.

Feria secunda

III classis

Statio ad S. Petrum ad Vincula


Ant. ad Introitum Ps. 122, 2
438 Sicut óculi servorum in manibus dominorum suorum: ita óculi nostri ad Dóminum Deum nostrum, donec misereatur nobis: miserere nobis, Domine, miserere nobis. Ps. ibid., 1 Ad te levavi oculos meos: qui habitas in caelis. V. Glória Patri.

Oratio
439 Convérte nos, Deus salutaris noster: et, ut nobis ieiunium quadragesimále proficiat, mentes nostras caeléstibus instrue disciplinis. Per Dóminum nostrum Iesum Christum.

Léctio Ezechiélis Prophetae. Ezech. 34, 11-16
440 Haec dicit Dóminus Deus: Ecce ego ipse requiram oves meas, et visitabo eas. Sicut visitat pastor gregem suum in die, quando fuerit in medio ovium suarum dissipatarum: sic visitabo oves meas, et liberabo eas de omnibus locis, in quibus dispérsae fuerant in die nubis et caliginis. Et educam eas de populis, et congregabo eas de terris, et inducam eas in terram suam: et pascam eas in montibus Israel, in rivis, et in cunctis sedibus terrae. In pascuis uberrimis pascam eas, et in montibus excelsis Israel erunt páscua earum: ibi requiescent in herbis virentibus, et in pascuis pinguibus pascentur super montes Israel. Ego pascam oves meas, et ego eas accubare faciam, dicit Dóminus Deus. Quod perierat, requiram; et quod abiectum erat, reducam ; et quod confractum fuerat, alligabo; et quod infirmum fuerat, consolidabo; et quod pingue et forte, custodiam: et pascam illas in iudicio, dicit Dóminus omnípotens.

Graduale Ps. 83, 10 et 9
441 Protector noster, aspice, Deus, et réspice super servos tuos. V. Domine Deus virtutum, exaudi preces servorum tuorum.

Tractus Ps. 102, 10
442 Domine, non secúndum peccata nostra, quae fecimus nos: neque secúndum iniquitates nostras retríbuas nobis. V. Ps. 78, 8-9 Domine, ne memineris iniquitatum nostrarum antiquarum: cito anticipent nos misericordiae tuae, quia pauperes facti sumus nimis. (Hic genuflectitur) V. Adiuva nos, Deus salutaris noster: et propter gloriam nominis tui, Domine, libera nos: et propitius esto peccatis nostris, propter nomen tuum.

+ Sequentia sancti Evangelii secúndum Matthaeum.    Mt. 25,31-46
443 In illo témpore: Dixit Iesus discipulis suis: Cum venerit Filius hominis in maiestáte sua, et omnes Angeli cum eo, tunc sedebit super sedem maiestatis suae: et congregabuntur ante eum omnes gentes, et separabit eos ab invicem, sicut pastor segregat oves ab haedis : et statuet oves quidem a dextris suis, haedos autem a sinistris. Tunc dicet Rex his, quia dextris eius erunt'.Venite benedicti Patris mei, possidete paratum vobis regnum a constitutione mundi. Esurivi enim, et dedistis mihi manducare: sitivi, et dedistis mihi bibere: hospes eram, et collegistis me: nudus,et cooperuístis me: infirmus, et visitastis me: in carcere eram, et venistis ad me. Tunc respondebunt ei iusti, dicentes: Domine, quando te vídimus esurientem, et pavimus te: sitientem, et dedimus tibi potum ? quando autem te vídimus hospitem, et collegimus te: aut nudum, et cooperuimus te? aut quando te vídimus infirmum, aut in carcere, et venimus ad te ? Et respondens Rex, dicet illis: Amen dico vobis: quamdiu fecistis uni ex his fratribus meis minimis, mihi fecistis. Tunc dicet et his, qui a sinistris erunt: Discedite a me maledicti in ignem aetérnum, qui paratus est diabolo et angelis eius. Esurivi enim, et non dedistis mihi manducare: sitivi, et non dedistis mihi potum : hospes eram, et non collegistis me: nudus, et non cooperuístis me: infirmus, et in carcere, et non visitastis me. Tunc respondebunt ei et ipsi, dicentes: Domine, quando te vídimus esurientem, aut sitientem, aut hospitem, aut nudum, aut infirmum, aut in carcere, et non ministravimus tibi? Tunc respondebit illis, dicens: Amen dico vobis: Quamdiu non fecistis uni de minoribus his, nec mihi fecistis. Et ibunt hi in supplicium aetérnum: iusti autem in vitam aeternam.

Antiphona ad Offertorium Ps. 118, 18, 26 et 73
444 Levabo oculos meos, et considerabo mirabilia tua, Domine, ut doceas me iustitias tuas: da mihi intellectum, et discam mandata tua.

Secreta
445 Munera tibi, Domine, oblata sanctifica: nosque a peccatorum nostrorum maculis emúnda. Per Dóminum nostrum Iesum Christum. Praefatio de Quadragesima.

Antiphona ad Communionem Matth. 25, 40 et 34
446 Amen dico vobis: 446 quod uni ex minimis meis fecistis, mihi fecistis: venite, benedicti Patris mei, possidete paratum vobis regnum ab initio saeculi.

Postcommunio
447 Salutaris tui, Domine, munere satiati supplices exorámus: ut, cuius laetamur gustu, renovemur effectu. Per Dóminum nostrum.

Super populum: Oremus. Humiliáte capita vestra Deo.

Oratio
448 Absólve, quaesumus, Domine, nostrórum vincula peccatorum: et, quidquid pro eis merémur, propitiátus averte. Per Dóminum nostrum Iesum Christum, Fílium tuum: Qui tecum vivit et regnat in unitate.

Feria tertia

III classis

Statio ad S. Anastasiam


Ant. ad Introitum Ps. 89, 1 et 2
449 Domine, refugium factus es nobis a generatione et progenie: a saeculo, et in saeculum tu es. Ps. ibid., 2 Priusquam montes fierent, aut formarétur terra, et orbis: a saeculo, et usque in saeculum tu es, Deus. V. Glória Patri.

Oratio
450 Réspice, Domine, familiam tuam: et praesta; ut apud te mens nostra tuo desiderio fulgeat, quae se carnis maceratióne castigat. Per Dóminum.

Léctio Isaiae Prophetae. Isai. 55, 6-11
451 In diebus illis: Locútus est Isaias propheta, dicens: Quaerite Dóminum, dum inveniri potest: invocate eum, dum prope est. Derelinquat impius viam suam, et vir iniquus cogitationes suas, et revertatur ad Dóminum: et miserebitur eius, et ad Deum nostrum: quoniam multus est ad ignoscendum. Non enim cogitationes meae, cogitationes vestrae: neque viae vestrae, viae meae, dicit Dóminus. Quia sicut exaltantur caeli a terra, sic exaltátae sunt viae meae a viis vestris, et cogitationes meae a cogitationibus vestris. Et quómodo descendit imber et nix de caelo, et illuc ultra non revertitur, sed inebriat terram, et infundit eam, et germinare eam facit, et dat semen serenti, et panem comedenti: sic erit verbum meum, quod egredietur de ore meo: non revertetur ad me vacuum, sed faciet quaecúmque volui, et prosperabitur in his, ad quae misi illud: ait Dóminus omnípotens.

Graduale Ps. 140, 2
452 Dirigatur oratio mea sicut incensum in conspectu tuo, Domine. V. Elevatio manuum mearum sacrificium vespertinum.

+ Sequentia sancti Evangelii secúndum Matthaeum.    Mt. 21,10-17
453 In illo témpore: Cum intrasset Iesus Ierosólymam, commota est universa civitas, dicens: Quis est hic? Populi autem dicebant: Hic est Iesus Propheta a Nazareth Galilaeae. Et intravit Iesus in templum Dei, et eiciebat omnes vendentes et ementes in templo; et mensas nummulariorum, et cathedras vendentium columbas evertit: et dicit eis: Scriptum est: Domus mea domus orationis vocabitur: vos autem fecistis illam speluncam latronum. Et accesserunt ad eum caeci et claudi in templo: et sanavit eos. Videntes autem principes sacerdotum et scribae mirabilia, quae fecit, et pueros clamantes in templo, et dicentes: Hosanna filio David: indignati sunt, et dixerunt ei: Audis quid isti dicunt? Iesus autem dixit eis: Utique. Numquam legistis: Quia ex ore infantium et lacténtium perfecisti laudem? Et relictis illis, abiit foras extra civitatem in Bethaniam: ibique mansit.

Ant. ad Offertorium        Ps. 30, 15-16
454 In te speravi, Domine; dixi: Tu es Deus meus, in manibus tuis tempora mea.

Secreta
455 Oblatis, quaesumus, Domine, placáre muneribus: et a cunctis nos defénde periculis. Per Dóminum. Praefatio de Quadragesima.

Ant. ad Communionem Ps. 4, 2
456 Cum invocarem te, exaudisti me, Deus iustítiae meae: in tribulatione dilatasti me: miserere mihi, Domine, et exaudi orationem meam.

Postcommunio
457 Quaesumus, omnípotens Deus: ut illíus salutaris capiamus effectum, cuius per haec mysteria pignus accepimus. Per Dóminum.

Super populum: Oremus. Humiliáte capita vestra Deo.

Oratio
458 Ascendant ad te, Domine, preces nostrae: et ab Ecclesia tua cunctam repelle nequitiam. Per Dóminum.


FERIA QUARTA

Quatuor Temporum Quadragesimae

II classis

Statio ad S. Mariam maiorem


Ant. ad Introitum      Ps. 24,6,3 et 22
459 Reminíscere miserationum tuarum, Domine, et misericordiae tuae, quae a saeculo sunt: ne unquam dominentur nobis inimici nostri: libera nos, Deus Israel, ex omnibus angustiis nostris. Ps. ibid., 1-2 Ad te, Domine, levavi animam meam : Deus meus, in te confido, non erubescam. V. Glória Patri.
Post Kyrie, eléison, dicitur: Oremus. Flectamus génua. — Levate.

Oratio
460 Preces nostras, quaesumus, Domine, clementer exaudi: et contra cuncta nobis adversántia, dexteram tuae maiestatis extende. Per Dóminum.

§ Praecedens oratio sine Flectamus génua sumitur ad commemorandam feriam IV Quatuor Temporum.


Léctio libri Exodi. Exodi 24, 12-18
461 In diebus illis: Dixit Dóminus ad Moysen: Ascende ad me in montem, et esto ibi: daboque tibi tabulas lapideas, et legem ac mandata quae scripsi: ut doceas filios Israel. Surrexerunt Moyses et Iósue minister eius: ascendensque Moyses in montem Dei, senioribus ait: Exspectate hic donec revertamur ad vos. Habetis Aaron et Hur vobiscum: si quid natum fuerit quaestiónis, referetis ad eos. Cumque ascendisset Moyses, operuit nubes montem, et habitavit glória Dómini super Sínai, tegens illum nube sex diebus: septimo autem die vocavit eum de medio caliginis. Erat autem species glóriae Dómini, quasi ignis ardens super verticem montis, in conspectu filiorum Israel. Ingressusque Moyses medium nebulae, ascendit in montem: et fuit ibi quadraginta diebus, et quadraginta noctibus.

Graduale Ps. 24, 17-18
462 Tribulationes cordis mei dilatátae sunt: de necessitatibus meis éripe me, Domine. V. Vide humilitatem meam, et laborem meum: et dimitte ómnia peccata mea.

Hic dicitur V. Dóminus vobiscum, sine Flectamus génua.

Oremus. Oratio
463 Devotionem populi tui, quaesumus, Domine, benignus intende: ut, qui per abstinéntiam macerántur in corpore, per fructum boni operis reficiantur in mente. Per Dóminum nostrum Iesum Christum, Fílium tuum: Qui tecum vivit et regnat in unitate.

Et dicuntur aliae orationes forte occurrentes.

Léctio libri Regum. 3 Reg. 19, 3-8
464 In diebus illis: Venit Elías in Bersabee Iuda, et dimisit ibi puerum suum, et perrexit in desertum, viam unius diei. Cumque venisset, et sederet subter unam iuniperum, petivit animae suae ut moreretur, et ait: Sufficit mihi, Domine, tolle animam meam: neque enim melior sum, quam patres mei. Proiecitque se, et obdormivit in umbra iuniperi: et ecce Angelus Dómini tetigit eum, et dixit illi: Surge et comede. Respexit, et ecce ad caput suum subcinericius panis, et vas aquae: comedit ergo et bibit, et rursum obdormivit. Reversusque est Angelus Dómini secundo, et tetigit eum, dixitque illi: Surge, comede: grandis enim tibi restat via. Qui cum surrexisset, comedit, et bibit, et ambulavit in fortitudine cibi illius quadraginta diebus, et quadraginta noctibus, usque ad montem Dei Horeb.

Tractus Ps. 24, 17, 18 et 1-4
465 De necessitatibus meis éripe me, Domine: vide humilitatem meam, et laborem meum: et dimitte ómnia peccata mea. V. Ad te, Domine, levavi animam meam: Deus meus, in te confido, non erubescam : neque irrídeant me inimici mei. V. Etenim universi qui te exspectant, non confundentur: confundantur omnes facientes vana.

+ Sequentia sancti Evangelii secúndum Matthaeum.    Mt. 12, 38-50
466 In illo témpore: Responderunt Iesu quidam de scribis et pharisaeis, dicentes: Magister, volumus a te signum videre. Qui respondens, ait illis: Generatio mala et adultera signum quaerit: et signum non dabitur ei, nisi signum Ionae prophetae. Sicut enim fuit Ionas in ventre ceti tribus diebus et tribus noctibus: sic erit Filius hominis in corde terrae tribus diebus et tribus noctibus. Viri Ninivítae surgent in iudicio cum generatione ista, et condemnabunt eam: quia paeniténtiam egerunt in praedicatióne Ionae. Et ecce plus quam Ionas hic. Regina Austri surget in iudicio cum generatione ista, et condemnabit eam: quia venit a finibus terrae audire sapientiam Salomonis. Et ecce plus quam Salomon hic. Cum autem immundus spiritus exierit ab homine, ambulat per loca árida, quaerens requiem, et non ínvenit. Tunc dicit: Revertar in domum meam, unde exívi. Et veniens ínvenit eam vacantem, scopis mundatam, et ornatam. Tunc vadit, et assumit septem alios spiritus secum nequiores se, et intrantes habitant ibi: et fiunt novissima hominis illius peiora prioribus. Sic erit et generationi huic péssimae. Adhuc eo loquente ad turbas, ecce mater eius et fratres stabant foris, quaeréntes loqui ei. Dixit autem ei quidam: Ecce mater tua et fratres tui foris stant quaeréntes te. At ipse respondens dicenti sibi, ait: Quae est mater mea, et qui sunt fratres mei? Et extendens manum in discipulos suos, dixit: Ecce mater mea et fratres mei. Quicumque enim fecerit voluntatem Patris mei, qui in caelis est: ipse meus frater, et soror, et mater est.

Ant. ad Offertorium   Ps. 118, 47 et 48 Meditabor in mandatis tuis, quae dilexi valde: et levabo manus meas ad mandata tua, quae dilexi.

Secreta
468 Hóstias tibi, Domine, placatiónis offerimus: ut et delicta nostra miseratus absólvas, et nutántia corda tu dirigas. Per Dóminum.

Praefatio de Quadragesima.

Ant. ad Communionem       Ps. 5, 2-4
469 Intellege clamorem meum: intende voci orationis meae, Rex meus, et Deus meus: quoniam ad te orabo, Domine.

Postcommunio
470 Tui, Domine, perceptione sacraménti, et a nostris mundémur occultis, et ab hostium liberemur insidiis. Per Dóminum nostrum.

Super populum: Oremus. Humiliáte capita vestra Deo.

Oratio
471 Mentes nostras, quaesumus, Dómine, lumine tuae claritatis illustra: ut videre possimus, quae agenda sunt; et, quae recta sunt, agere valeamus. Per Dóminum nostrum.

Feria quinta

III classis

Statio ad S. Laurentium in Paneperna


Ant. ad Introitum Ps. 95, 6
472 Conféssio et pulchritudo in conspectu eius: sanctitas et magnificéntia in sanctificatione eius. Ps. ibid., 1 Cantate Domino canticum novum: cantate Domino, omnis terra. V. Glória Patri.

Oratio
473 Devotiónem populi tui, quaesumus, Domine, benignus intende: ut, qui per abstinéntiam macerántur in corpore, per fructum boni operis reficiantur in mente. Per Dóminum nostrum Iesum Christum, Fílium tuum: Qui tecum vivit et regnat in unitate.

Léctio Ezechiélis Prophetae. Ezech. 18, 1-9
474 In diebus illis: Factus est sermo Dómini ad me, dicens: Quid est, quod inter vos parabolam vértitis in proverbium istud in terra Israel, dicentes: Patres comederunt uvam acerbam, et dentes filiorum obstupescunt ? Vivo ego, dicit Dóminus Deus, si erit ultra vobis parabola haec in proverbium in Israel. Ecce omnes animae, meae sunt: ut anima patris, ita et anima filii, mea est: anima, quae peccaverit, ipsa morietur. Et vir si fuerit iustus, et fecerit iudicium et iustitiam, in montibus non comederit, et oculos suos non levaverit ad idola domus Israel: et uxorem proximi sui non violaverit, et ad mulierem menstruatam non accesserit: et hominem non contristáverit: pignus debitori reddiderit, per vim nihil rapuerit: panem suum esurienti dederit, et nudum operuerit vestimento: ad usuram non commodaverit, et amplius non acceperit: ab iniquitate averterit manum suam, et iudicium verum fecerit inter virum et virum: in praeceptis meis ambulaverit, et iudicia mea custodierit, ut faciat veritatem: hic iustus est, vita vivet, ait Dóminus omnípotens.

Graduale Ps. 16, 8 et 2
475 Custodi me, Domine, ut pupillam óculi: sub umbra alarum tuarum protege me. V. De vultu tuo iudicium meum prodeat: óculi tui videant aequitatem.

+ Sequentia sancti Evangelii secúndum Matthaeum.    Mt. 15,21-28
476 In illo témpore: Egressus Iesus secessit in partes Tyri et Sidonis. Et ecce mulier Chananaea a finibus illis egressa clamavit, dicens ei: Miserere mei, Domine, fili David : fília mea male a daemónio vexatur. Qui non respondit ei verbum. Et accedentes discipuli eius rogabant eum, dicentes: Dimitte eam ; quia clamat post nos. Ipse autem respondens, ait: Non sum missus nisi ad oves, quae perierunt domus Israel. At illa venit, et adoravit eum, dicens: Domine, adiuva me. Qui respondens, ait: Non est bonum sumere panem filiorum, et mittere canibus. At illa dixit: Etiam, Domine : nam et catelli edunt de micis, quae cadunt de mensa dominorum suorum. Tunc respondens Iesus, ait illi : O mulier, magna est fides tua: fiat tibi sicut vis. Et sanáta est fília eius ex illa hora.

Ant. ad Offertorium Ps. 33, 8-9
477 Immittet Angelus Dómini in circuitu timentium eum, et eripiet eos: gustate, et vidéte, quoniam suavis est Dóminus.

Secreta
478 Sacrificia, Domine, quaesumus, propénsius ista nos salvent, quae medicinálibus sunt instituta ieiuniis. Per Dóminum nostrum.

Praefatio de Quadragesima.

479 Ant. ad Communionem Io. 6, 5 2

Panis, quem ego dedero, caro mea est pro saeculi vita.

Postcommunio
480 Tuorum nos, Domine, largitate donorum, et temporalibus attólle praesidiis, et renova sempiternis. Per Dóminum nostrum Iesum Christum, Fílium tuum: Qui tecum vivit et regnat in unitate.

Super populum : Oremus. Humiliáte capita vestra Deo.

Oratio
481 Da, quaesumus,  Domine,  populis christianis: et, quae profitentur, agnoscere, et caeléste munus diligere, quod frequentant. Per Dóminum.


FERIA SEXTA

Quatuor Temporum Quadragesimae


II classis

Statio ad Ss. duodecim Apostolos


Ant. ad Introitum        Ps. 24, 17 et 18
482 De necessitatibus meis éripe me, Domine: vide humilitatem meam et laborem meum, et dimitte ómnia peccata mea. Ps. ibid., 1-2 Ad te, Domine, levavi animam meam: Deus meus, in te confido, non erubescam. V. Glória Patri.

Oratio
483 Esto, Domine, propitius plebi tuae: et, quam tibi facis esse devotam, benigno réfove miseratus auxilio. Per Dóminum nostrum.

Léctio Ezechiélis Prophetae. Ezech. 18, 20-28
484 Haec dicit Dóminus Deus: Anima, quae peccaverit, ipsa morietur: filius non portabit iniquitatem patris, et pater non portabit iniquitatem filii: iustitia iusti super eum erit, et impietas ímpii erit super eum. Si autem impius egerit paeniténtiam ab omnibus peccatis suis, quae operatus est, et custodierit ómnia praecépta mea, et fecerit iudicium et iustitiam: vita vivet, et non morietur. Omnium iniquitatum eius, quas operatus est, non recordabor: in iustitia sua, quam operatus est, vivet. Numquid voluntatis meae est mors ímpii, dicit Dóminus Deus, et non ut convertatur a viis suis, et vivat ? Si autem averterit se iustus a iustitia sua, et fecerit iniquitatem secúndum omnes abominationes, quas operari solet impius, numquid vivet? omnes iustítiae eius, quas fecerat, non recordabuntur: in praevaricatione, qua praevaricátus est, et in peccato suo, quod peccavit, in ipsis morietur. Et dixistis: Non est aequa via Dómini. Audite ergo, domus Israel: Numquid via mea non est aequa, et non magis viae vestrae pravae sunt? Cum enim averterit se iustus a iustitia sua, et fecerit iniquitatem, morietur in eis: in iniustitia, quam operatus est, morietur. Et cum averterit se impius ab impietate sua, quam operatus est, et fecerit iudicium et iustitiam: ipse animam suam vivificabit. Considerans enim, et avertens se ab omnibus iniquitatibus suis, quas operatus est, vita vivet, et non morietur, ait Dóminus omnípotens.

Graduale Ps. 85, 2 et 6
485 Salvum fac servum tuum, Deus meus, sperantem in te. V. Auribus percipe, Domine, orationem meam.

Tractus Ps. 102, 10
486 Domine, non secúndum peccata nostra, quae fecimus nos: neque secúndum iniquitates nostras retríbuas nobis. V. Ps. 78, 8-9 Domine, ne memineris iniquitatum nostrarum antiquarum: cito anticipent nos misericordiae tuae, quia pauperes facti sumus nimis. (Hic genuflectitur) V. Adiuva nos, Deus salutaris noster: et propter gloriam nominis tui, Domine, libera nos: et propitius esto peccatis nostris, propter nomen tuum.

Sequentia sancti Evangelii secúndum Ioannem. 10.5,1-15
487 In illo témpore: Erat dies festus Iudaeórum, et ascendit Iesus Ierosólymam. Est autem Ierosolymis Probatica piscina, quae cognominatur hebraice Bethsaida, quinque porticus habens. In his iacebat multitudo magna languentium, caecórum, claudorum, aridorum exspectántium aquae motum. Angelus autem Dómini descendebat secúndum tempus in piscinam, et movebatur aqua. Et qui prior descendisset in piscinam post motiónem aquae, sanus fiebat a quacumque detinebátur infirmitate. Erat autem quidam homo ibi, triginta et octo annos habens in infirmitate sua. Hunc cum vidisset Iesus iacentem, et cognovisset quia iam multum tempus haberet, dicit ei: Vis sanus fieri? Respondit ei languidus: Domine, hominem non habeo, ut cum turbata fuerit aqua, mittat me in piscinam: dum venio enim ego, alius ante me descendit. Dicit ei Iesus: Surge, tolle grabatum tuum, et ámbula. Et statim sanus factus est homo ille: et sustulit grabatum suum, et ambulabat. Erat autem sabbatum in die illo. Dicebant ergo Iudaei illi qui sanatus fuerat: Sabbatum est, non licet tibi tollere grabatum tuum. Respondit eis: Qui me sanum fecit, ille mihi dixit: Tolle grabatum tuum, et ámbula. Interrogaverunt ergo eum: Quis est ille homo, qui dixit tibi: Tolle grabatum tuum, et ámbula? Is autem, qui sanus fuerat effectus, nesciebat quis esset. Iesus enim declinavit a turba constituta in loco. Postea invenit eum Iesus in templo, et dixit illi: Ecce sanus factus es: iam noli peccare, ne deterius tibi aliquid contingat. Abiit ille homo, et nuntiavit Iudaeis, quia Iesus esset, qui fecit eum sanum.

488 Ant. ad Offertorium      Ps. 102, 2 et 5

Benedic, anima mea, Domino, et noli oblivisci omnes retributiones eius: et renovabitur, sicut áquilae, iuventus tua.

Secreta

489 Suscipe, quaesumus, Domine, munera O nostris oblata servitiis: et tua propitius dona sanctifica. Per Dóminum.

Praefatio de Quadragesima.

490 Ant. ad Communionem Ps. 6, 11

Erubescant, et conturbentur omnes inimici mei: avertantur retrorsum, et erubescant valde velociter.

Postcommunio
491 Per huius, Domine, operationem mystérii, et vitia nostra purgentur, et iusta desideria compleantur. Per Dóminum nostrum.

Super populum: Oremus. Humiliáte capite vestra Deo.

Oratio
492 Exáudi nos, misericors Deus : et méntibus nostris grátiae tuae lumen ostende. Per Dóminum.


SABBATO

Quatuor Temporum Quadragesimae

II classis

Statio ad S. Petrum


FORMA MISSAE LONGIOR

§ Haec forma adhibenda est in Missa conventuali et in Missa, in qua Ordines conferuntur; in ceteris Missis adhiberi potest forma brevior, ut infra 77 .

In sabbato Quatuor Temporum, Missa, in qua Ordines conferuntur, dicenda est de sabbato, etiam festo I vel II classis occurrente, et in ea additur oratio ritualis «In collatione Ordinum» sub unica conclusione cum oratione quae sequitur Dóminus vobiscum, et omittuntur omnes commemorationes, nisi sint privilegiatae.

Ant. ad Introitum Ps. 87, 3
493 Intret oratio mea in conspectu tuo: inclina aurem tuam ad precem meam, Domine. Ps. ibid., 2 Dómine, Deus salutis meae : in die clamavi, et nocte coram te. V. Glória Patri.

Post Kyrie, eléison, dicitur: Oremus. Flectamus génua. — Levate.

Oratio
494 Populum tuum, quaesumus, Domine, propitius respice: atque ab eo flagella tuae iracúndiae clementer averte. Per Dóminum.

§ Praecedens oratio sine Flectamus génua sumitur ad commemorandum sabbatum Quatuor Temporum.

Léctio libri Deuteronómii. Deut. 26, 12-19
495 In diebus illis: Locútus est Moyses ad populum, dicens: Quando compleveris decimam cunctarum frugum tuarum, loqueris in conspectu Dómini Dei tui: Abstuli quod sanctificatum est de domo mea, et dedi illud levitae, et ádvenae, et pupillo, ac víduae, sicut iussisti mihi : non praeterívi mandata tua, nec sum oblitus imperii tui. Oboedívi voci Dómini Dei mei, et feci ómnia sicut praecepísti mihi. Respice de sanctuario tuo, et de excelso caelórum habitaculo, et benedic populo tuo Israel, et terrae, quam dedisti nobis, sicut iurasti patribus nostris, terrae lacte et melle mananti. Hodie Dóminus Deus tuus praecepit tibi, ut facias mandata haec atque iudicia: et custodias, et impleas ex toto corde tuo, et ex tota anima tua. Dóminum elegisti hodie, ut sit tibi Deus, et ambules in viis eius, et custodias caeremonias illius, et mandata atque iudicia, et oboedias eius imperio. Et Dóminus elegit te hodie, ut sis ei populus peculiaris, sicut locútus est tibi, et custodias ómnia praecépta illius: et faciat te excelsiorem cunctis gentibus, quas creavit in laudem, et nomen, et gloriam suam: ut sis populus sanctus Dómini Dei tui, sicut locútus est.

Graduale Ps. 78, 9 et 10
496 Propitius esto, Domine, peccatis nostris: ne quando dicant gentes: Ubi est Deus eórum ? V. Adiuva nos, Deus salutaris noster: et propter honorem nominis tui, Domine, libera nos.

Oremus. Flectamus génua. —Levate.

Oratio
497 Protéctor noster, aspice, Deus: ut, qui malorum nostrorum pondere prémimur, percepta misericordia, libera tibi mente famulémur. Per Dóminum nostrum Iesum Christum.

Léctio libri Deuteronómii. Deut. 11, 22-25
498 In diebus illis : Dixit Moyses filiis Israel : Si custodieritis mandata, quae ego praecípio vobis, et feceritis ea, ut diligatis Dóminum Deum vestrum, et ambuletis in omnibus viis eius, adhaeréntes ei, disperdet Dóminus omnes gentes istas ante fáciem vestram, et possidebitis eas, quae maiores et fortiores vobis sunt. Omnis locus quem calcaverit pes vester, vester erit. A deserto, et a Libano, a flumine magno Euphrate usque ad mare Occidentale, erunt termini vestri. Nullus stabit contra vos: terrorem vestrum et formidinem dabit Dóminus Deus vester super omnem terram, quam calcaturi estis, sicut locútus est vobis Dóminus Deus vester.

Graduale Ps. 83, 10 et 9 499

Protector noster, aspice, Deus, et respice super servos tuos. V. Domine Deus virtutum, exaudi preces servorum tuorum.

Oremus. Flectamus génua. —Levate. Oratio
500 Adesto, quaesumus, Domine, supplicatiónibus nostris: ut esse, te largiente, mereamur, et inter prospera humiles, et inter adversa securi. Per Dóminum nostrum.

Léctio libri Machabaeórum. 2 Mach. 1, 23-26 et 27
501 In diebus illis: Orationem faciebant omnes sacerdotes, dum consummaretur sacrificium, Ionatha inchoante, ceteris autem respondentibus. Et Nehemiae erat oratio hunc habens modum: Domine, Deus omnium creator, terribilis et fortis, iustus et misericors, qui solus es bonus rex, solus praestans, solus iustus, et omnípotens, et aetérnus, qui liberas Israel de omni malo, qui fecisti patres electos, et sanctificasti eos : accipe sacrificium pro universo populo tuo Israel, et custodi partem tuam, et sanctifica: ut sciant gentes, quia tu es Deus noster.

Graduale Ps. 89, 13 et 1
502 Convertere, Domine, aliquantulum, et deprecare super servos tuos. V. Dómine, refugium factus es nobis, a generatione et progenie.

Oremus. Flectamus génua. —Levate.

Oratio
503 Preces populi tui, quaesumus, Dómine, clementer exaudi: ut, qui iuste pro peccatis nostris affligimur, pro tui nominis glória misericorditer liberemur. Per Dóminum nostrum Iesum Christum, Fílium tuum: Qui tecum vivit et regnat in unitate.

Léctio libri Sapientiae. Eccli. 36, i-io
504 Miserere nostri, Deus omnium, et respice nos, et ostende nobis lucem miserationum tuarum: et immitte timorem tuum super gentes, quae non exquisierunt te, ut cognoscant, quia non est Deus nisi tu, et enarrent magnalia tua. Alleva manum tuam super gentes alienas, ut videant potentiam tuam. Sicut enim in conspectu eórum sanctificatus es in nobis, sic in conspectu nostro magnificaberis in eis, ut cognoscant te, sicut et nos cognovimus, quoniam non est Deus praeter te, Domine. Innova signa, et immúta mirabilia. Glorifica manum, et brácchium dextrum. Excita furorem, et effunde iram. Tolle adversarium, et afflíge inimicum. Festina tempus, et memento finis, ut enarrent mirabilia tua, Domine Deus noster.

Graduale Ps. 140, 2
505 Dirigatur oratio mea sicut incensum in conspectu tuo, Domine. V. Elevatio manuum mearum sacrificium vespertinum.

Oremus. Flectamus génua. — Levate.

Oratio
506 Actiones nostras, quaesumus, Dómine, aspirándo praeveni, et adiuvando proséquere: ut cuncta nostra oratio et operatio a te semper incipiat, et per te coepta finiátur. Per Dóminum.

Léctio Danielis Prophetae. Dan. 3,47-51
507 In diebus illis: Angelus Dómini descendit cum Azaria, et sociis eius in fornacem: et excussit flammam ignis de fornace, et fecit medium fornacis quasi ventum roris flantem. Flamma autem effundebatur super fornacem cubitis quadraginta novem: et erupit, et incendit quos reperit iuxta fornacem de Chaldaeis ministros regis, qui eam incendebant. Et non tetigit eos omnino ignis, neque contristavit, nec quidquam moléstiae intulit. Tunc hi tres quasi ex uno ore laudabant, et glorificabant, et benedicebant Deum in fornace, dicentes:

Hic non respondetur Deo gratias.

Hymnus Ibid., 52-56

Benedíctus es, Domine Deus patrum 508 nostrorum. Et laudabilis, et gloriosus in saecula.

Et benedíctum nomen glóriae tuae, quod est sanctum. Et laudabile, et gloriosum in saecula.

Benedíctus es in templo sancto glóriae tuae. Et laudabilis, et gloriosus in saecula.

Benedíctus es super thronum sanctum regni tui. Et laudabilis, et gloriosus in saecula.

Benedíctus es super sceptrum divinitatis tuae. Et laudabilis, et gloriosus in saecula.

Benedíctus es, qui sedes super Chérubim, intuens abyssos. Et laudabilis, et gloriosus in saecula.

Benedíctus es, qui ambulas super pennas ventorum, et super undas maris. Et laudabilis, et gloriosus in saecula.

Benedicant te omnes Angeli et Sancti tui. Et laudent te, et glorificent in saecula.

Benedicant te caeli, terra, mare, et ómnia quae in eis sunt. Et laudent te, et glorificent in saecula.

Glória Patri, et Filio, et Spiritui Sancto. Et laudabili, et glorioso in saecula.

Sicut erat in principio, et nunc, et semper: et in saecula saeculorum. Amen. Et laudabili, et glorioso in saecula.

Benedíctus es, Domine Deus patrum nostrorum. Et laudabilis, et gloriosus in saecula.

Hic dicitur V. Dóminus vobiscum, sine Flectamus génua.

Oremus. Oratio
509 Deus, qui tribus pueris mitigásti flammas ignium: concede propitius; ut nos famulos tuos non exúrat flamma vitiórum. Per Dóminum.

Et dicuntur aliae orationes forte occurrentes.

Léctio Epistolae beáti Pauli Apostoli ad Thessalonicenses.
1Th 5,14-23
510 Fratres: Rogamus vos, corripite inquiétos, consolamini pusillanimes, suscipite infirmos, patientes estote ad omnes. Vidéte ne quis malum pro malo alicui reddat: sed semper quod bonum est sectamini in invicem, et in omnes. Semper gaudete. Sine intermissione orate. In omnibus gratias ágite: haec est enim volúntas Dei in Christo Iesu in omnibus vobis.  Spiritum nolite exstinguere. Prophetias nolite spernere. Omnia autem probate: quod bonum est tenete. Ab omni specie mala abstinete vos. Ipse autem Deus pacis sanctificet vos per ómnia: ut integer spiritus vester, et anima, et corpus sine querela, in adventu Dómini nostri Iesu Christi servetur.

Tractus Ps. 116, 1-2
511 Laudate Dóminum, omnes gentes: et collaudate eum, omnes populi. V. Quoniam confirmata est super nos misericordia eius: et veritas Dómini manet in aetérnum.

Sequentia sancti Evangelii secúndum Matthaeum.       Mt. 17, 1-9
512 In illo témpore: Assumpsit Iesus Petrum, et Iacobum, et Ioannem fratrem eius, et duxit illos in montem excelsum seorsum: et transfiguratus est ante eos. Et resplenduit facies eius sicut sol: vestimenta autem eius facta sunt alba sicut nix. Et ecce apparuerunt illis Moyses et Elías cum eo loquentes. Respondens autem Petrus, dixit ad Iesum: Domine, bonum est nos hic esse: si vis, faciamus hic tria tabernacula, tibi unum, Moysi unum, et Eliae unum. Adhuc eo loquente, ecce nubes lucida obumbravit eos. Et ecce vox de nube, dicens: Hic est Filius meus dilectus, in quo mihi bene complacui: ipsum audite. Et audientes discipuli, ceciderunt in faciem suam, et timuerunt valde. Et accessit Iesus, et tetigit eos, dixitque eis: Súrgite, et nolite timere. Levantes autem oculos suos, neminem viderunt, nisi solum Iesum. Et descendentibus illis de monte, praecepit eis Iesus, dicens: Nemini dixeritis visionem, donec Filius hominis a mortuis resurgat.

Ant. ad Offertorium Ps. 87, 2-3
513 Domine, Deus salutis meae, in die clamavi, et nocte coram te: intret oratio mea in conspectu tuo, Domine.

Secreta
514 Praeséntibus sacrificiis, quaesumus, Domine, ieiunia nostra sanctifica: ut, quod observantia nostra profitetur extrinsecus, interius operetur. Per Dóminum nostrum.

Praefatio de Quadragesima.

Ant. ad Communionem Ps. 7, 2
515 Domine Deus meus, in te speravi: libera me ab omnibus persequentibus me, et éripe me.

Postcommunio
516 Sanctificationibus tuis, omnípotens Deus, et vitia nostra curéntur, et remedia nobis aeterna provéniant. Per Dóminum nostrum.

Super populum: Oremus. Humiliáte capita vestra Deo.

Oratio
517 Fidéles tuos, Deus, benedictio desideráta confirmet: quae eos, et a tua voluntate numquam faciat discrepáre, et tuis semper indulgeat beneficiis gratulari. Per Dóminum.

FORMA MISSAE BREVIOR


§ Haec forma adhiberi potest extra Missam conventualem et Missam, in qua Ordines conferuntur.

Ant. ad Introitum Ps. 87, 3
518 Intret oratio mea in conspectu tuo: inclina aurem tuam ad precem . meam, Domine. Ps. ibid., 2 Domine, Deus salutis meae: in die clamavi, et nocte coram te. V. Glória Patri.

Post Kyrie, eléison, dicitur: Oremus. Flectamus génua. — Levate.

Oratio
519 Populum tuum, quaesumus, Domine, propitius respice: atque ab eo flagella tuae iracúndiae clementer averte. Per Dóminum.

§ Praecedens oratio sine Flectamus génua sumitur ad commemorandum sabbatum Quatuor Temporum.

Léctio libri Deuteronómii. Deut. 26, 12-19
520 In diebus illis: Locútus est Moyses ad populum, dicens: Quando compleveris decimam cunctarum frugum tuarum, loqueris in conspectu Dómini Dei tui: Abstuli quod sanctificatum est de domo mea, et dedi illud levítae, et ádvenae, et pupillo, ac víduae, sicut iussisti mihi : non praeterívi mandata tua, nec sum oblitus imperii tui. Oboedivi voci Dómini Dei mei, et feci ómnia sicut praecepisti mihi. Respice de sanctuario tuo, et de excelso caelórum habitaculo, et benedic populo tuo Israel, et terrae, quam dedisti nobis, sicut iurasti patribus nostris, terrae lacte et melle mananti. Hodie Dóminus Deus tuus praecepit tibi, ut facias mandata haec atque iudicia: et custodias, et impleas ex toto corde tuo et ex tota anima tua. Dóminum elegisti hodie, ut sit tibi Deus, et ambules in viis eius, et custodias caeremonias illius, et mandata atque iudicia, et oboedias eius imperio. Et Dóminus elegit te hodie, ut sis ei populus peculiaris, sicut locútus est tibi, et custodias ómnia praecépta illius: et faciat te excelsiorem cunctis gentibus, quas creavit in laudem, et nomen, et gloriam suam: ut sis populus sanctus Dómini Dei tui, sicut locútus est.

Graduale Ps. 78, 9 et 10
521 Propitius esto, Domine, peccatis nostris: ne quando dicant gentes: Ubi est Deus eórum? V. Adiuva nos, Deus salutaris noster: et propter honorem nominis tui, Domine, libera nos.

Hic dicitur V. Dóminus vobiscum, sine Flectamus génua.

Oremus. Oratio
522 Protéctor noster, aspice, Deus : ut, qui JL malorum nostrorum pondere prémimur, percepta misericordia, libera tibi mente famulémur. Per Dóminum nostrum Iesum Christum.

Et dicuntur aliae orationes forte occurrentes.

Léctio Epistolae beáti Pauli Apostoli ad Thessalonicenses. 1 Thess. 5, 14-23
523 Fratres: Rogamus vos, corripite inquietos, consolamini pusillanimes, suscipite infirmos, patientes estote ad omnes. Vidéte ne quis malum pro malo alicui reddat: sed semper quod bonum est sectamini in invicem, et in omnes. Semper gaudete. Sine intermissione orate. In omnibus gratias ágite: haec est enim volúntas Dei in Christo Iesu in omnibus vobis. Spiritum nolite exstinguere. Prophetias nolite spernere. Omnia autem probate: quod bonum est tenete. Ab omni specie mala abstinete vos. Ipse autem Deus pacis sanctificet vos per ómnia: ut integer spiritus vester, et anima, et corpus sine querela, in adventu Dómini nostri Iesu Christi servetur.

Tractus Ps. 116, 1-2
524 Laudate Dóminum, omnes gentes: et collaudate eum, omnes populi. V. Quoniam confirmata est super nos misericordia eius: et veritas Dómini manet in aetérnum.

Sequentia sancti Evangelii secúndum Matthaeum.       Mt. 17, 1-9
525 In illo témpore: Assumpsit Iesus Petrum, et Iacobum, et Ioannem fratrem eius, et duxit illos in montem excelsum seorsum: et transfiguratus est ante eos. Et resplenduit facies eius sicut sol: vestimenta autem eius facta sunt alba sicut nix. Et ecce apparuerunt illis Moyses et Elías cum eo loquentes. Respondens autem Petrus, dixit ad Iesum: Domine, bonum est nos hic esse: si vis, faciamus hic tria tabernacula, tibi unum, Moysi unum, et Eliae unum. Adhuc eo loquente, ecce nubes lucida obumbravit eos. Et ecce vox de nube, dicens: Hic est Filius meus dilectus, in quo mihi bene complacui: ipsum audite. Et audientes discipuli, ceciderunt in fáciem suam, et timuerunt valde. Et accessit Iesus, et tetigit eos, dixitque eis: Súrgite, et nolite timere. Levantes autem oculos suos, neminem viderunt, nisi solum Iesum. Et descendentibus illis de monte, praecepit eis Iesus, dicens: Nemini dixeritis visionem, donec Filius hominis a mortuis resurgat.

Ant. ad Offertorium Ps. 87, 2-3
526 Domine, Deus salutis meae, in die clamavi, et nocte coram te: intret oratio mea in conspectu tuo, Domine.

Secreta

Praesentibus sacrificiis, quaesumus, 527 Domine, ieiunia nostra sanctifica: ut, quod observantia nostra profitetur extrinsecus, interius operetur. Per Dóminum nostrum.

Praefatio de Quadragesima.

Ant. ad Communionem Ps. 7, 2
528 Domine Deus meus, in te speravi: libera me ab omnibus persequentibus me, et éripe me.

Postcommunio
529 Sanctificationibus tuis, omnípotens O Deus, et vitia nostra curéntur, et remedia nobis aeterna provéniant. Per Dóminum nostrum.

Super populum: Oremus. Humiliáte capita vestra Deo.

Oratio
530 Fidéles tuos, Deus, benedictio desideráta confirmet: quae eos, et a tua voluntate numquam faciat discrepáre, et tuis semper indulgeat beneficiis gratulari. Per Dóminum nostrum Iesum Christum.


Missale 1962 417