Missale Romanum 1957 - S. MARIAE AD NIVES
Duplex II classis
Introitus Ps. 76, 19
ILLUXÉRUNT coruscatiónes tuae orbi terrae: commóta est, et contrémuit terra. Ps. 83, 2-3 Quam dilécta tabernácula tua, Dómine virtutum ! concupíscit, et déficit ánima mea in átria Dómini. V/. Glória Patri.
Oratio
DEUS, qui fídei sacraménta in Unigéniti tui gloriósa Transfiguratióne, patrum testimónio roborásti, et adoptiónem filiórum perféctam, voce delápsa in nube lúcida, mirabíliter praesignásti: concéde propítius ; ut ipsíus Regis glóriae nos coherédes effícias, et ejúsdem glóriae tríbuas esse consórtes. Per eúmdem Dóminum.
Et, in Missis privatis tantum, fit Commemoratio Ss. Xysti II Papae et Martyre ac Felicissimi et Agapiti Martyrum.
Oratio
DEUS, qui nos concédis sanctórum Mártyrum tuórum Xysti, Felicíssimi et Agapíti natalítia cólere: da nobis in aetérna beatitúdine de eórum societáte gaudére. Per Dóminum.
Léctio Epístolae beáti Petri Apóstoli.
2 Petr. 1, 16-19
CARÍSSIMI: Non doctas fábulas secúti notam fécimus vobis Dómini nostri Jesu Christi virtútem et praeséntiam: sed speculatóres facti illíus magnitúdinis. Accípiens enim a Deo Patre honórem et glóriam, voce delápsa ad eum hujuscémodi a magnífica glória: Hic est Fílius meus diléctus, in quo mihi complácui, ipsum audíte. Et hanc vocem nos audívimus de caelo allátam, cum essémus cum ipso in monte sancto. Et habémus firmiórem prophéticum sermónem: cui bene fácitis attendéntes, quasi lucérnae lucénti in caliginóso loco, donec dies elucéscat, et lúcifer oriátur in córdibus vestris.
Graduale Ps. 44, 3 et 2 Speciósus forma prae fíliis hóminum: diffúsa est grátia in lábiis tuis. V/. Eructávit cor meum verbum bonum, dico ego ópera mea Regi.
Allelúja, allelúja. V/. Sap. 7, 26 Candor est lucis aetérnae, spéculum sine mácula, et imágo bonitátis illíus. Allelúja.
+ Sequéntia sancti Evangélii secúndum Matthaéum.
Matth. 17, 1-9
IN illo témpore: Assúmpsit Jesus Petrum, et Jacóbum, et Joánnem fratrem ejus, et duxit illos in montem excélsum seórsum: et transfigurátus est ante eos. Et resplénduit fácies ejus sicut sol: vestiménta autem ejus facta sunt alba sicut nix. Et ecce apparuérunt illis Móyses et Elías cum eo loquéntes. Respóndens autem Petrus, dixit ad Jesum: Dómine, bonum est nos hic esse: si vis, faciámus hic tria tabernácula, tibi unum, Móysi unum, et Elíae unum. Adhuc eo loquénte, ecce nubes lúcida obumbrávit eos. Et ecce vox de nube, dicens: Hic est Fílius meus diléctus, in quo mihi bene complácui: ipsum audíte. Et audiéntes discípuli, cecidérunt in fáciem suam, et timuérunt valde. Et accéssit Jesus, et tétigit eos, dixítque eis: Súrgite, et nolíte timére. Levántes autem óculos suos, néminem vidérunt, nisi solum Jesum. Et descendéntibus illis de monte, praecépit eis Jesus, dicens: Némini dixéritis visiónem, donec Fílius hóminis a mórtuis resúrgat.
Credo.
Secreta
OBLATA, quaésumus, Dómine, múnera gloriósa Unigéniti tui Transfiguratióne sanctífica: nosque a peccatórum máculis, splendóribus ipsíus illustratiónis emúnda. Per eúmdem Dóminum.
Pro Ss. Martyribus
Secreta
MÚNERA tibi, Dómine, nostrae devotiónis offérimus: quae et pro tuórum tibi grata sint honóre justórum, et nobis salutária, te miseránte, reddántur. Per Dóminum.
Praefatio de Nativitate.
Communio Matth. 17, 9 Visiónem quam vidístis, némini dixéritis, donec a mórtuis resúrgat Fílius hóminis.
Postcommunio
PRAESTA, quaésumus, omnípotens Deus: ut, sacrosáncta Fílii tui Transfiguratiónis mystéria quae solémni celebrámus offício, purificátae mentis intelligéntia consequámur. Per eúmdem Dóminum.
Pro Ss. Martyribus
Postcommunio
PRAESTA nobis, quaésumus, Dómine: intercedéntibus sanctis Martýribus tuis Xysto, Felicíssimo et Agapíto ; ut, quod ore contíngimus, pura mente capiámus. Per Dóminum.
Pro SS. XYSTO II
Papa et Martyre
ac FELICISSIMO et AGAPITO
Martyribus
Missa Sapientiam, de Communi plurimorum Martyrum 2 loco.
Confessoris
Duplex
Introitus Ps. 36, 30-31
OS justi meditábitur sapiéntiam, et lingua ejus loquétur judícium: lex Dei ejus in corde ipsíus. Ps. ibid., 1 Noli aemulári in malignántibus: neque zeláveris faciéntes iniquitátem. V/. Glória Patri.
DEUS, qui beáto Cajetáno Confessóri tuo apostólicam vivéndi formam imitári tribuísti: da nobis, ejus intercessióne et exémplo, in te semper confídere, et sola caeléstia desideráre. Per Dóminum.
Et fit Commemoratio S. Donati Episcopi et Martyris.
Oratio
DEUS, tuórum glória sacerdótum: praesta, quaésumus ; ut sancti Mártyris tui et Epíscopi Donáti, cujus festa gérimus, sentiámus auxílium. Per Dóminum.
Léctio libri Sapiéntiae.
Eccli. 31, 8-11
BEÁTUS vir, qui invéntus est sine mácula, et qui post aurum non ábiit, nec sperávit in pecúnia et thesáuris. Quis est hic, et laudábimus eum ? fecit enim mirabília in vita sua. Qui probátus est in illo, et perféctus est, erit illi glória aetérna: qui pótuit tránsgredi, et non est transgréssus: fácere mala, et non fecit: ídeo stabilíta sunt bona illíus in Dómino, et eleemósynas illíus enarrábit omnis ecclésia sanctórum.
Graduale Ps. 91, 13 et 14 Justus ut palma florébit: sicut cedrus Líbani multiplicábitur in domo Dómini. V/. Ibid., 3 Ad annuntiándum mane misericórdiam tuam, et veritátem tuam per noctem.
Allelúja, allelúja. V/. Jac. 1, 12 Beátus vir, qui suffert tentatiónem: quóniam cum probátus fúerit, accípiet corónam vitae. Allelúja.
+ Sequéntia sancti Evangélii secúndum Matthaéum.
Matth. 6, 24-33
IN illo témpore: Dixit Jesus discípulis suis: Nemo potest duóbus dóminis servíre: aut enim unum ódio habébit, et álterum díliget: aut unum sustinébit, et álterum contémnet. Non potéstis Deo servíre, et mammónae. Ideo dico vobis, ne sollíciti sitis ánimae vestrae quid manducétis, neque córpori vestro quid induámini. Nonne ánima plus est quam esca: et corpus plus quam vestiméntum ? Respícite volatília caeli, quóniam non serunt, neque metunt, neque cóngregant in hórrea: et Pater vester caeléstis pascit illa. Nonne vos magis pluris estis illis ? Quis autem vestrum cógitans potest adjícere ad statúram suam cúbitum unum ? Et de vestiménto quid sollíciti estis ? Consideráte lília agri quómodo crescunt: non labórant, neque nent. Dico autem vobis, quóniam nec Sálomon in omni glória sua coopértus est sicut unum ex istis. Si autem fenum agri, quod hódie est, et cras in clíbanum míttitur, Deus sic vestit: quanto magis vos módicae fídei ? Nolíte ergo sollíciti esse, dicéntes: Quid manducábimus, aut quid bibémus, aut quo operiémur ? Haec enim ómnia gentes inquírunt. Scit enim Pater vester, quia his ómnibus indigétis. Quaérite ergo primum regnum Dei, et justítiam ejus: et haec ómnia adjiciéntur vobis.
Offertorium Ps. 88, 25 Véritas mea, et misericórdia mea cum ipso: et in nómine meo exaltábitur cornu ejus.
Secreta
PRAESTA nobis, quaésumus, omnípotens Deus: ut nostrae humilitátis oblátio, et pro tuórum tibi grata sit honóre Sanctórum, et nos córpore páriter et mente puríficet. Per Dóminum.
Pro S. Donato
Secreta
PRAESTA, quaésumus, Dómine: ut sancti Mártyris tui et Epíscopi Donáti intercessióne, quem ad laudem nóminis tui dicátis munéribus honorámus, piae nobis fructus devotiónis accréscat. Per Dóminum.
Communio Matth. 24, 46-47 Beátus servus, quem, cum vénerit dóminus, invénerit vigilántem: amen dico vobis, super ómnia bona sua constítuet eum.
Postcommunio
QUSUMUS, omnípotens Deus: ut, qui caeléstia aliménta percépimus, intercedénte beáto Cajetáno Confessóre tuo, per haec contra ómnia advérsa muniámur. Per Dóminum.
Pro S. Donato
Postcommunio
OMNÍPOTENS et miséricors Deus, qui nos sacramentórum tuórum et partícipes éfficis, et minístros: praesta, quaésumus ; ut, intercedénte beáto Donáto Mártyre tuo atque Pontífice, ejúsdem proficiámus et fídei consórtio, et digno servítio. Per Dóminum.
Pro S. DONATO
Episcopo et Martyre
Introitus Dan. 3, 84 et 87
SACERDÓTES Dei, benedícite Dóminum: sancti et húmiles corde, laudáte Deum. Ibid., 57 Benedícite, ómnia ópera Dómini, Dómino: laudáte et superexaltáte eum in saécula. V/. Glória Patri.
Oratio
DEUS, tuórum glória sacerdótum: praesta, quaésumus ; ut sancti Mártyris tui et Epíscopi Donáti, cujus festa gérimus, sentiámus auxílium. Per Dóminum.
Léctio Epístolae beáti Jacóbi Apóstoli.
Jac. 1, 2-12
CARÍSSIMI: Omne gáudium existimáte, cum in tentatiónes várias incidéritis: sciéntes quod probátio fídei vestrae patiéntiam operátur. Patiéntia autem opus perféctum habet: ut sitis perfécti et íntegri in nullo deficiéntes. Si quis autem vestrum índiget sapiéntia, póstulet a Deo, qui dat ómnibus affluénter, et non impróperat: et dábitur ei. Póstulet autem in fide nihil haésitans: qui enim haésitat, símilis est flúctui maris, qui a vento movétur et circumfértur. Non ergo aéstimet homo ille quod accípiat áliquid a Dómino. Vir duplex ánimo incónstans est in ómnibus viis suis. Gloriétur autem frater húmilis in exaltatióne sua: dives autem in humilitáte sua, quóniam sicut flos feni transíbit: exórtus est enim sol cum ardóre, et arefécit fenum, et flos ejus décidit, et decor vultus ejus depériit: ita et dives in itinéribus suis marcéscet. Beátus vir, qui suffert tentatiónem: quóniam cum probátus fúerit, accípiet corónam vitae, quam repromísit Deus diligéntibus se.
Graduale Ps. 36, 30-31 Os justi meditábitur sapiéntiam, et lingua ejus loquétur judícium. V/. Lex Dei ejus in corde ipsíus: et non supplantabúntur gressus ejus.
Allelúja , allelúja. V/. Justus non conturbábitur, quia Dóminus firmat manum ejus. Allelúja.
+ Sequéntia sancti Evangélii secúndum Marcum.
Marc. 13, 33-37
IN illo témpore: Dixit Jesus discípulis suis: Vidéte, vigiláte, et oráte: nescítis enim quando tempus sit. Sicut homo, qui péregre proféctus relíquit domum suam, et dedit servis suis potestátem cujúsque óperis, et janitóri praecépit ut vígilet. Vigiláte ergo, (nescítis enim quando dóminus domus véniat: sero, an média nocte, an galli cantu, an mane) ne cum vénerit repénte, invéniat vos dormiéntes. Quod autem vobis dico, ómnibus dico: Vigiláte.
Offertorium Ps. 88, 21-22 Invéni David servum meum, óleo sancto meo unxi eum: manus enim mea auxiliábitur ei, et bráchium meum confortábit eum.
Secreta
PRAESTA, quaésumus, Dómine: ut sancti Mártyris tui et Epíscopi Donáti intercessióne, quem ad laudem nóminis tui dicátis munéribus honorámus, piae nobis fructus devotiónis accréscat. Per Dóminum.
Communio Luc. 12, 42 Fidélis servus et prudens, quem constítuit dóminus super famíliam suam: ut det illis in témpore trítici mensúram.
Postcommunio
OMNÍPOTENS et miséricors Deus, qui nos sacramentórum tuórum et partícipes éfficis, et minístros: praesta, quaésumus ; ut, intercedénte beáto Donáto Mártyre tuo atque Pontífice, ejúsdem proficiámus et fídei consórtio, et digno servítio. Per Dóminum.
SS. CYRIACI, LARGI et SMARAGDI
Martyrum
Semiduplex
Introitus Ps. 33, 10-11
TIMÉTE Dóminum, omnes sancti ejus, quóniam nihil deest timéntibus eum: dívites eguérunt et esuriérunt: inquiréntes autem Dóminum non defícient omni bono. Ps. ibid., 2 Benedícam Dóminum in omni témpore: semper laus ejus in ore meo. V/. Glória Patri.
Oratio
DEUS, qui nos ánnua sanctórum Mártyrum tuórum Cyríaci, Largi et Smarágdi solemnitáte laetíficas: concéde propítius ; ut, quorum natalítia cólimus, virtútem quoque passiónis imitémur. Per Dóminum.
Léctio Epístolae beáti Pauli Apóstoli ad Thessalonicénses.
1 Thess. 2, 13-16
FRATRES: Grátias ágimus Deo sine intermissióne: quóniam cum accepissétis a nobis verbum audítus Dei, accepístis illud, non ut verbum hóminum, sed (sicut est vere) verbum Dei, qui operátur in vobis, qui credidístis. Vos enim imitatóres facti estis, fratres, ecclesiárum Dei, quae sunt in Judaéa in Christo Jesu: quia éadem passi estis et vos a contribúlibus vestris, sicut et ipsi a Judaéis: qui et Dóminum occidérunt Jesum, et prophétas: et nos persecúti sunt, et Deo non placent, et ómnibus homínibus adversántur, prohibéntes nos géntibus loqui, ut salvae fiant, ut ímpleant peccáta sua semper: pervénit autem ira Dei super illos usque in finem.
Graduale Ps. 33, 10 et 11 Timéte Dóminum, omnes sancti ejus: quóniam nihil deest timéntibus eum. V/. Inquiréntes autem Dóminum, non defícient omni bono.
Allelúja , allelúja. V/. Sap. 3, 7 Fulgébunt justi, et tamquam scintíllae in arundinéto discúrrent in aetérnum. Allelúja.
+ Sequéntia sancti Evangélii secúndum Marcum.
Marc. 16, 15-18
IN illo témpore: Dixit Jesus discípulis suis: Eúntes in mundum univérsum, praedicáte Evangélium omni creatúrae. Qui credíderit, et baptizátus fúerit, salvus erit: qui vero non credíderit, condemnábitur. Signa autem eos, qui credíderint, haec sequéntur: In nómine meo daemónia ejícient: linguis loquéntur novis: serpéntes tollent: et si mortíferum quid bíberint, non eis nocébit: super aegros manus impónent, et bene habébunt.
Offertorium Ps. 31, 11 Laetámini in Dómino, et exsultáte, justi: et gloriámini, omnes recti corde.
Secreta
ACCÉPTA sit in conspéctu tuo, Dómine, nostra devótio: et eórum nobis fiat supplicatióne salutáris, pro quorum solemnitáte defértur. Per Dóminum.
Communio Marc. 16, 17 et 18 Signa autem eos, qui in me credunt, haec sequéntur: daemónia ejícient: super aegros manus impónent, et bene habébunt.
Postcommunio
REFÉCTI participatióne múneris sacri, quaésumus, Dómine Deus noster: ut, cujus exséquimur cultum, intercedéntibus sanctis Martýribus tuis Cyríaco, Largo et Smarágdo, sentiámus efféctum. Per Dóminum.
* In Missis votivis omnia dicuntur ut supra, sed post S eptuagesimam, omissis Allelúja et Versu sequenti, dicitur
Tractus Ps. 125, 5-6 Qui séminant in lácrimis, in gáudio metent. V/. Eúntes ibant et flebant, mitténtes sémina sua. V/. Veniéntes autem vénient cum exsultatióne, portántes manípulos suos.
Tempore autem Paschali, omittitur Graduale, et ejus loco dicitur:
Allelúja , allelúja. V/. Sap. 3, 7 Fulgébunt justi, et tamquam scintíllae in arundinéto discúrrent in aetérnum. Allelúja. V/. Ps. 88, 6 Confitebúntur caeli mirabília tua, Dómine: étenim veritátem tua m in ecclésia sanctórum. Allelúja.
* Si hodie fuerit Sabbatum, in Missis non conventualibus fit Commemoratio Vigiliae anticipatae S. Laurentii, ut in Missa sequenti ; deinde dicitur 3a Oratio de S. Maria Concéde, et legitur Evangelium Vigiliae in fine, juxta Rubricas.
* Si hodie fuerit Sabbatum, ubi adest obligatio Chori, lecta post Tertiam extra Chorum Missa de Festo sine Commemoratione Vigiliae, in Choro post Nonam dicitur Missa de Vigilia, cum 2a Oratione Concéde, et 3a contra persecutores Ecclesiae, vel pro Papa ; et de Vigilia item dici possunt Missae privatae, cum 2a tamen Oratione Festi, et 3a Concéde.
Confessoris
Duplex
Missa Os justi, de Communi Confessoris non Pontificis 1 loco, praeter Orationem sequentem.
Oratio P
OMNÍPOTENS et miséricors Deus, qui sanctum Joánnem Maríam pastoráli stúdio et jugi oratiónis ac paeniténtiae ardóre mirábilem effecísti: da quaésumus, ut ejus exémplo et intercessióne, ánimas fratrum lucrári Christo, et cum eis aetérnam glóriam cónsequi valeámus. Per eúmdem Dóminum.
Et, in Missis non conventualibus, fit Commemoratio Vigiliae.
Oratio
ADÉSTO, Dómine, supplicatiónibus nostris: et intercessióne beáti Lauréntii Mártyris tui, cujus praevenímus festivitátem ; perpétuam nobis misericórdiam benígnus impénde. (Per Dóminum.)
Deinde, etiam in Missa conventuali, Commemoratio S. Romani Martyris.
Oratio
PRAESTA, quaésumus, omnípotens Deus: ut, intercedénte beáto Románo Mártyre tuo, et a cunctis adversitátibus liberémur in córpore, et a pravis cogitatiónibus mundémur in mente. Per Dóminum.
Secreta C
LAUDIS tibi, Dómine, hóstias immolámus in tuórum commemoratióne Sanctórum: quibus nos et praeséntibus éxui malis confídimus et futúris. Per Dóminum.
In Missis non conventualibus
Pro Vigilia
Secreta
HÓSTIAS, Dómine, quas tibi offérimus, propítius súscipe: et, intercedénte beáto Lauréntio Mártyre tuo, víncula peccatórum nostrórum absólve. (Per Dóminum.)
Pro S. Romano
Secreta
MUNÉRIBUS nostris, quaésumus, Dómine, precibúsque suscéptis: et caeléstibus nos munda mystériis, et cleménter exáudi. Per Dóminum.
Postcommunio C
REFÉCTI cibo potúque caelésti, Deus noster, te súpplices exorámus: ut, in cujus haec commemoratióne percépimus, ejus muniámur et précibus. Per Dóminum.
In Missis non conventualibus
Pro Vigilia
Postcommunio
DA, quaésumus, Dómine Deus noster: ut, sicut beáti Lauréntii Mártyris tui commemoratióne, temporáli gratulámur offício ; ita perpétuo laetémur aspéctu. (Per Dóminum.)
Pro S. Romano
Postcommunio
QUSUMUS, omnípotens Deus: ut, qui caeléstia aliménta percépimus, intercedénte beáto Románo Mártyre tuo, per haec contra ómnia advérsa muniámur. Per Dóminum.
Et in fine Missae, non tamen conventualis, legitur Evangelium Vigiliae, ut infra.
* Ubi adest obligatio Chori, lecta post Tertiam extra Chorum Missa conventuali de Festo cum Commemoratione S. Romani Martyris, sed sine Commemoratione Vigiliae, ut supra, in Choro post Nonam dicitur Missa de ipsa Vigilia sine Commemoratione Festi et S. Romani, ut infra ; quae item sumi potest, pro Missis privatis, sed cum 2a Oratione Festi et 3a S. Romani.
Martyris
Semiduplex
Introitus Ps. 111, 9
DISPÉRSIT, dedit paupéribus: justítia ejus manet in saéculum saéculi: cornu ejus exaltábitur in glória. Ps. ibid., 1 Beátus vir, qui timet Dóminum: in mandátis ejus cupit nimis. V/. Glória Patri.
Non dicitur Glória in excélsis.
Oratio
ADÉSTO, Dómine, supplicatiónibus nostris: et intercessióne beáti Lauréntii Mártyris tui, cujus praevenímus festivitátem ; perpétuam nobis misericórdiam benígnus impénde. Per Dóminum.
In Missis privatis
Pro S. Joanne
2a Oratio
OMNÍPOTENS et miséricors Deus, qui sanctum Joánnem Maríam pastoráli stúdio et jugi oratiónis ac paeniténtiae ardóre mirábilem effecísti: da quaésumus, ut ejus exémplo et intercessióne, ánimas fratrum lucrári Christo, et cum eis aetérnam glóriam cónsequi valeámus. (Per eúmdem Dóminum.)
Pro S. Romano
3a Oratio
PRAESTA, quaésumus, omnípotens Deus: ut, intercedénte beáto Románo Mártyre tuo, et a cunctis adversitátibus liberémur in córpore, et a pravis cogitatiónibus mundémur in mente. Per Dóminum.
Léctio libri Sapiéntiae.
Eccli. 51, 1-8 et 12
CONFITÉBOR tibi, Dómine rex, et collaudábo te Deum salvatórem meum. Confitébor nómini tuo: quóniam adjútor, et protéctor factus es mihi, et liberásti corpus meum a perditióne, a láqueo linguae iníquae, et a lábiis operántium mendácium, et in conspéctu astántium factus es mihi adjútor. Et liberásti me secúndum multitúdinem misericórdiae nóminis tui a rugiéntibus, praeparátis ad escam, de mánibus quaeréntium ánimam meam, et de portis tribulatiónum, quae circumdedérunt me: a pressúra flammae, quae circúmdedit me, et in médio ignis non sum aestuátus: de altitúdine ventris ínferi, et a lingua coinquináta, et a verbo mendácii, a rege iníquo, et a lingua injústa: laudábit usque ad mortem ánima mea Dóminum: quóniam éruis sustinéntes te, et líberas eos de mánibus géntium, Dómine Deus noster.
Graduale Ps. 111, 9 et 2 Dispérsit, dedit paupéribus: justítia ejus manet in saéculum saéculi. V/. Potens in terra erit semen ejus: generátio rectórum benedicétur.
+ Sequéntia sancti Evangélii secúndum Matthaéum.
Matth. 16, 24-27
IN illo témpore: Dixit Jesus discípulis suis: Si quis vult post me veníre, ábneget semetípsum, et tollat crucem suam, et sequátur me. Qui enim volúerit ánimam suam salvam fácere, perdet eam: qui autem perdíderit ánimam suam propter me, invéniet eam. Quid enim prodest hómini, si mundum univérsum lucrétur, ánimae vero suae detriméntum patiátur ? Aut quam dabit homo commutatiónem pro ánima sua ? Fílius enim hóminis ventúrus est in glória Patris sui cum Angelis suis: et tunc reddet unicuíque secúndum ópera ejus.
Offertorium Job 16, 20 Orátio mea munda est: et ídeo peto, ut detur locus voci meae in caelo: qu ia ibi est judex meus, et cónscius meus in excélsis: ascéndat ad Dóminum deprecátio mea.
Secreta
HÓSTIAS, Dómine, quas tibi offérimus, propítius súscipe: et, intercedénte beáto Lauréntio Mártyre tuo, víncula peccatórum nostrórum absólve. Per Dóminum.
In Missis privatis
Pro S. Joanne
2a Secreta
LAUDIS tibi, Dómine, hóstias immolámus in tuórum commemoratióne Sanctórum: quibus nos et praeséntibus éxui malis confídimus et futúris. (Per Dóminum.)
Pro S. Romano
3a Secreta
MUNÉRIBUS nostris, quaésumus, Dómine, precibúsque suscéptis: et caeléstibus nos munda mystériis, et cleménter exáudi. Per Dóminum.
Communio Matth. 16, 24 Qui vult veníre post me, ábneget semetípsum, et tollat crucem suam, et sequátur me.
Postcommunio
DA, quaésumus, Dómine Deus noster: ut, sicut beáti Lauréntii Mártyris tui commemoratióne, temporáli gratulámur offício ; ita perpétuo laetémur aspéctu. Per Dóminum.
In Missis privatis
Pro S. Joanne
2a Postcommunio
REFÉCTI cibo potúque caelésti, Deus noster, te súpplices exorámus: ut, in cujus haec commemoratióne percépimus, ejus muniámur et précibus. (Per Dóminum.)
Pro S. Romano
3a Postcommunio
QUSUMUS, omnípotens Deus: ut, qui caeléstia aliménta percépimus, intercedénte beáto Románo Mártyre tuo, per haec contra ómnia advérsa muniámur. Per Dóminum.
Pro S. ROMANO
Martyre
Missa Laetábitur, de Communi unius Martyris 4 loco, cum Orationibus ut supra.
Martyris
Duplex II classis cum Octava simplici
Introitus Ps. 95, 6
CONFÉSSIO et pulchritúdo in conspéctu ejus: sánctitas et magnificéntia in sanctificatióne ejus. Ps. ibid., 1 Cantáte Dómino cánticum novum: cantáte Dómino, omnis terra. V/. Glória Patri.
Oratio
DA nobis, quaésumus, omnípotens Deus: vitiórum nostrórum flammas exstínguere ; qui beáto Lauréntio tribuísti tormentórum suórum incéndia superáre. Per Dóminum.
Léctio Epístolae beáti Pauli Apóstoli ad Corínthios.
2 Cor. 9, 6-10
FRATRES: Qui parce séminat, parce et metet: et qui séminat in benedictiónibus, de benedictiónibus et metet. Unusquísque prout destinávit in corde suo, non ex tristítia, aut ex necessitáte: hílarem enim datórem díligit Deus. Potens est autem Deus omnem grátiam abundáre fácere in vobis, ut in ómnibus semper omnem sufficiéntiam habéntes, abundétis in omne opus bonum, sicut scriptum est: Dispérsit, dedit paupéribus: justítia ejus manet in saéculum saéculi. Qui autem adminístrat semen seminánti: et panem ad manducándum praestábit, et multiplicábit sem en vestrum, et augébit increménta frugum justítiae vestrae.
Graduale Ps. 16, 3 Probásti, Dómine, cor meum, et visitásti nocte. V/. Igne me examinásti, et non est invénta in me iníquitas.
Allelúja, allelúja. V/. Levíta Lauréntius bonum opus operátus est: qui per signum Crucis caecos illuminávit. Allelúja.
+ Sequéntia sancti Evangélii secúndum Joánnem.
Joann. 12, 24-26
IN illo témpore: Dixit Jesus discípulis suis: Amen, amen dico vobis, nisi granum fruménti cadens in terram, mórtuum fúerit, ipsum solum manet: si autem mórtuum fúerit, multum fructum affert. Qui amat ánimam suam, perdet eam: et qui odit ánimam suam in hoc mundo, in vitam aetérnam custódit eam. Si quis mihi minístrat, me sequátur: et ubi sum ego, illic et miníster meus erit. Si quis mihi ministráverit, honorificábit eum Pater meus.
Offertorium Ps. 95, 6 Conféssio et pulchritúdo in cospéctu ejus: sánctitas et magnificéntia in sanctificatióne ejus.
Secreta
ACCIPE, quaésumus, Dómine, múnera dignánter obláta: et beáti Lauréntii suffragántibus méritis, ad nostrae salútis auxílium proveníre concéde. Per Dóminum.
Communio Joann. 12, 26 Qui mihi minístrat, me sequátur: et ubi ego sum, illic et miníster meus erit.
Postcommunio
SACRO múnere satiáti, súpplices te, Dómine, deprecámur: ut, quod débitae servitútis celebrámus offício, intercedénte beáto Lauréntio Mártyre tuo, salvatiónis tuae sentiámus augméntum. Per Dóminum.
* In Missis votivis omnia dicuntur ut supra, sed post Septuagesimam, omissis Allelúja et Versu sequenti, dicitur
Tractus Ps. 20, 3-4 Desidérium ánimae ejus tribuísti ei: et voluntáte labiórum ejus non fraudásti eum. V/. Quóniam praevenísti eum in benedictiónibus dulcédinis. V/. Posuísti in cápite ejus corónam de lápide pretióso.
Tempore autem Paschali, omittitur Graduale, et ejus loco dicitur:
Allelúja, allelúja. V/. Levíta Lauréntius bonum opus operátus est: qui per signum Crucis caecos illuminávit. Allelúja. V/. Ps. 20, 4 Posuísti, Dómine, super caput ejus corónam de lápide pretióso. Allelúja.
* Infra Octavam S. Laurentii nihil fit de ea ; sed, si celebretur Missa votiva de eodem S. Laurentio, in ea dicitur Glória in excélsis.
Martyris
et SUSANNAE
Virginis et Martyris
Simplex
Introitus Ps. 36, 39
SALUS autem justórum a Dómino: et protéctor eórum est in témpore tribulatiónis. Ps. ibid., 1 Noli aemulári in malignántibus: neque zeláveris faciéntes iniquitátem. V/. Glória Patri.
Oratio
SANCTÓRUM Mártyrum tuórum Tibúrtii et Susánnae nos, Dómine, fóveant continuáta praesídia: quia non désinis propítius intuéri ; quos tálibus auxíliis concésseris adjuvári. Per Dóminum.
Léctio Epístolae beáti Pauli Apóstoli ad Hebraéos.
Hebr. 11, 33-39
FRATRES: Sancti per fidem vicérunt regna, operáti sunt justítiam adépti sunt repromissiónes, obturavérunt ora leónum, exstinxérunt ímpetum ignis, effugérunt áciem gládii, convaluérunt de infirmitáte, fortes facti sunt in bello, castra vertérunt exterórum: accepérunt mulíeres de resurrectióne mórtuos suos: álii autem disténti sunt, non suscipiéntes redemptiónem, ut meliórem invenírent resurrectiónem: álii vero ludíbria et vérbera expérti, ínsuper et víncula, et cárceres: lapidáti sunt, secti sunt, tentáti sunt, in occisióne gládii mórtui sunt: circuiérunt in melótis, in péllibus caprínis, egéntes, angustiáti, afflícti: quibus dignus non erat mundus: in solitudínibus errántes, in móntibus et spelúncis, et in cavérnis terrae. Et hi omnes testimónio fídei probáti, invénti sunt in Christo Jesu Dómino nostro.
Graduale Ps. 33, 18-19 Clamavérunt justi, et Dóminus exaudívit eos: et ex ómnibus tribulatiónibus eórum liberávit eos. V/. Juxta est Dóminus his, qui tribuláto sunt corde: et húmiles spíritu salvábit.
Allelúja, allelúja . V/. Te Mártyrum candidátus laudat exércitus, Dómine. Allelúja.
In Missis votivis post Septuagesimam, omissis Allelúja et Versu sequenti, dicitur
Tractus Ps. 125, 5-6 Qui séminant in lácrimis, in gáudio metent. V/. Eúntes ibant et flebant, mitténtes sémina sua. V/. Veniéntes autem vénient cum exsultatióne, portántes manípulos suos.
+ Sequéntia sancti Evangélii secúndum Lucam.
Luc. 12, 1-8
IN illo témpore: Dixit Jesus discípulis suis: Atténdite a ferménto pharisaeórum, quod est hypócrisis. Nihil autem opértum est, quod non revelétur: neque abscónditum, quod non sciátur. Quóniam, quae in ténebris dixístis, in lúmine dicéntur: et quod in aurem locúti estis in cubículis, praedicábitur in tectis. Dico autem vobis amícis meis: Ne terreámini ab his qui occídunt corpus, et post haec non habent ámplius quid fáciant. Osténdam autem vobis quem timeátis: timéte eum, qui postquam occíderit, habet potestátem míttere in gehénnam. Ita dico vobis: hunc timéte. Nonne quinque pásseres véneunt dipóndio, et unus ex illis non est in oblivióne coram Deo ? Sed et capílli cápitis vestri omnes numeráti sunt. Nolíte ergo timére: multis passéribus pluris estis vos. Dico autem vobis: Omnis, quicúmque conféssus fúerit me coram homínibus, et Fílius hóminis confitébitur illum coram Angelis Dei.
Offertorium Sap. 3, 1, 2 et 3 Justórum ánimae in manu Dei sunt, et non tanget illos torméntum malítiae: visi sunt óculis insipiéntium mori: illi autem sunt in pace, allelúja.
Secreta
ADÉSTO, Dómine, précibus pópuli tui, adésto munéribus: ut, quae sacris sunt obláta mystériis, tuórum tibi pláceant intercessióne Sanctórum. Per Dóminum.
Communio Matth. 10, 27 Quod dico vobis in ténebris, dícite in lúmine, dicit Dóminus: et quod in aure audítis, praedicáte super tecta.
Postcommunio
SÚMPSIMUS, Dómine, pignus redemptiónis aetérnae: quod sit nobis, quaésumus, interveniéntibus sanctis Martýribus tuis, vitae praeséntis auxílium páriter et futúrae. Per Dóminum.
Virginis
Duplex
Missa Dilexísti, de Communi Virginum 3 loco.
Oratio C
EXÁUDI nos, Deus salutáris noster: ut, sicut de beátae Clarae Vírginis tuae festivitáte gaudémus ; ita piae devotiónis erudiámur afféctu. Per Dóminum.
Secreta C
ACCÉPTA tibi sit, Dómine, sacrátae plebis oblátio pro tuórum honóre Sanctórum: quorum se méritis de tribulatióne percepísse cognóscit auxílium. Per Dóminum.
Postcommunio C
SATIÁSTI, Dómine, famíliam tuam munéribus sacris: ejus, quaésumus, semper interventióne nos réfove, cujus solémnia celebrámus. Per Dóminum.
SS. HIPPOLYTI et CASSIANI
Martyrum
Simplex
Missa Salus autem, de Communi plurimorum Martyrum 3 loco, cum Orationibus ut infra.
Oratio P
DA, quaésumus, omnípotens Deus: ut beatórum Mártyrum tuórum Hippólyti et Cassiáni veneránda solémnitas, et devotiónem nobis áugeat, et salútem. Per Dóminum.
Secreta P
RÉSPICE, Dómine, propítius múnera pópuli tui, Sanctórum festivitáte votíva: et tuae testificátio veritátis nobis profíciat ad salútem. Per Dóminum.
Postcommunio P
SACRAMENTÓRUM tuórum, Dómine, commúnio sumpta nos salvet: et in tuae veritátis luce confírmet. Per Dóminum.
* Si hodie fuerit Sabbatum, fit de Vigilia anticipata Assumptionis beatae Mariae Virginis, ut die sequenti notatur, sed loco Commemorationis S. Eusebii, fit Commemoratio Ss. Hippolyti et Cassiani Martyrum.
Simplex
Introitus Ps. 44, 13 et 15-16
VULTUM tuum deprecabúntur omnes dívites plebis: adducéntur Regi vírgines post eam: próximae ejus adducéntur tibi in laetítia et exsultatióne. Ps. ibid., 2 Eructávit cor meum verbum bonum: dico ego ópera mea Regi. V/. Glória Patri.
Non dicitur Glória in excélsis.
Oratio
DEUS, qui virginálem aulam beátae Maríae, in qua habitáres, elígere dignátus es: da, quaésumus ; ut sua nos defensióne munítos, jucúndos fácias suae interésse festivitáti. Qui vivis.
Et fit Commemoratio S. Eusebii Confessoris.
Oratio
DEUS, qui nos beáti Eusébii Confessóris tui ánnua solemnitáte laetíficas: concéde propítius ; ut, cujus natalítia cólimus, per ejus ad te exémpla gradiámur. (Per Dóminum.)
3a de Spiritu Sancto.
Léctio libri Sapiéntiae.
Eccli. 24, 23-31
EGO quasi vitis fructificávi suavitátem odóris: et flores mei, fructus honóris et honestátis. Ego mater pulchrae dilectiónis, et timóris, et agnitiónis, et sanctae spei. In me grátia omnis viae et veritátis: in me omnis spes vitae et virtútis. Transíte ad me, omnes qui concupíscitis me, et a generatiónibus meis implémini. Spíritus enim meus super mel dulcis, et heréditas mea super mel et favum. Memória mea in generatiónes saeculórum. Qui edunt me, adhuc esúrient: et qui bibunt me, adhuc sítient. Qui audit me, non confundétur: et qui operántur in me, non peccábunt. Qui elúcidant me, vitam aetérnam habébunt.
Graduale Benedícta et venerábilis es, Virgo María: quae sine tactu pudóris invénta es mater Salvatóris. V/. Virgo Dei Génitrix, quem totus non capit orbis, in tua se clausit víscera factus homo.
+ Sequéntia sancti Evangélii secúndum Lucam.
Luc. 11, 27-28
IN illo témpore: Loquénte Jesu ad turbas, extóllens vocem quaedam múlier de turba, dixit illi: Beátus venter, qui te portávit, et úbera, quae suxísti. At ille dixit: Quinímmo beáti, qui áudiunt verbum Dei, et custódiunt illud.
Offertorium Beáta es, Virgo María, quae ómnium portásti Creatórem: genuísti qui te fecit, et in aetérnum pérmanes Virgo.
Secreta
MÚNERA nostra, Dómine, apud cleméntiam tuam Dei Genitrícis comméndet orátio: quam idcírco de praesénti saéculo transtulísti ; ut pro peccátis nostris apud te fiduciáliter intercédat. Per eúmdem Dóminum.
Pro S. Eusebio
Secreta
LAUDIS tibi, Dómine, hóstias immolámus in tuórum commemoratióne Sanctórum: quibus nos et praeséntibus éxui malis confídimus, et futúris. (Per Dóminum.)
3a de Spiritu Sancto.
Praefatio communis.
Communio Beáta víscera Maríae Vírginis, quae portavérunt aetérni Patris Fílium.
Postcommunio
CONCÉDE, miséricors Deus, fragilitáti nostrae praesídium: ut, qui sanctae Dei Genitrícis festivitátem praevenímus ; intercessiónis ejus auxílio, a nostris iniquitátibus resurgámus. Per eúmdem Dóminum.
Pro S. Eusebio
Postcommunio
REFÉCTI cibo potúque caelésti, Deus noster, te súpplices exorámus: ut, in cujus haec commemoratióne percépimus, ejus muniámur et précibus. (Per Dóminum.)
3a de Spiritu Sancto.
Missale Romanum 1957 - S. MARIAE AD NIVES