Missale Romanum 1957 - AD MISSAM


Die 3 Februarii

S. BLASII

Episcopi et Martyris


Simplex



Missa Sacerdótes Dei, de Communi unius Martyris 2 loco.


Oratio
C


DEUS, qui nos beáti Blásii Mártyris tui atque Pontíficis ánnua solemnitáte laetíficas: concéde propítius ; ut, cujus natalítia cólimus, de ejúsdem étiam protectióne gaudeámus. Per Dóminum.


Secreta
C


MÚNERA tibi, Dómine, dicáta sanctífica: et, intercedénte beáto Blásio Mártyre tuo atque Pontífice, per éadem nos placátus inténde. Per Dóminum.


Postcommunio
C


HAEC nos commúnio, Dómine, purget a crímine: et, intercedénte beáto Blásio Mártyre tuo atque Pontífice, caeléstis remédii fáciat esse consórtes. Per Dóminum.



Die 4 Februarii

S. ANDREAE CORSINI

Episcopi et Confessoris


Duplex



Missa Státuit, de Communi Confessoris Pontificis 1 loco, praeter Orationem sequentem.


Oratio
P


DEUS, qui in Ecclésia tua nova semper instáuras exémpla virtútum: da pópulo tuo beáti Andréae Confessóris tui atque Pontíficis ita sequi vestígia ; ut assequátur et praémia. Per Dóminum.


Secreta
C


SANCTI tui, quaésumus, Dómine, nos ubíque laetíficent: ut, dum eórum mérita recólimus, patrocínia sentiámus. Per Dóminum.


Postcommunio
C


PRAESTA, quaésumus, omnípotens Deus: ut, de percéptis munéribus grátias exhibéntes, intercedénte beáto Andréa Confessóre tuo atque Pontífice, benefícia potióra sumámus. Per Dóminum.




* Per Quadragesimam, a Feria V post Cineres et a Feria II usque ad Sabbatum infra Hebdomadam Passionis inclusive, occurrente quolibet Festo Duplici vel Semiduplici, in Missis non conventualibus de Festo fit Commemoratio Feriae, et legitur ejus Evangelium in fine. Ubi autem adest obligatio Chori, lecta post Tertiam extra Chorum Missa de Festo sine Commemoratione Feriae, in Choro post Nonam dicitur Missa conventualis de Feria sine Commemoratione Festi. Missae vero privatae dici possunt vel de Festo, cum Commemoratione et ultimo Evangelio Feriae, vel de Feria cum Commemoratione Festi, juxta Rubricas. Si tamen Festum fuerit Duplex I aut II classis, in Choro d icitur Missa conventualis de Festo, et extra Chorum legitur Missa de Feria, de qua tamen prohibentur Missae privatae.
* Item per Quadragesimam a Feria IV Cinerum usque ad Sabbatum infra Hebdomadam IV inclusive, in omnibus Missis de Festo Semiduplici, et in M issis votivis, quae pro re gravi et publica simul causa non sint, in cantu celebrandis, post Commemorationem Feriae, dicitur, juxta Rubricas, Oratio pro diversitate Temporum assignata, nempe ad poscenda suffragia Sanctorum A cunctis. In Missis tamen conventualibus vel cantatis, si Commemoratio Feriae sit omittenda, post Orationem A cunctis, dicitur 3a Oratio pro diversitate Temporum assignata, nempe pro vivis et defunctis Omnípotens.



Die 5 Februarii

S. AGATHAE

Virginis et Martyris


Duplex



Introitus
GAUDEÁMUS omnes in Dómino, diem festum celebrántes sub honóre beátae Agathae Vírginis et Mártyris: de cujus passióne gaudent Angeli, et colláudant Fílium Dei. Ps. 44, 2 Eructávit cor meum verbum bonum: dico ego ópera mea Regi. V/. Glória Patri.


Oratio


DEUS, qui inter cétera poténtiae tuae mirácula étiam in sexu frágili victóriam martýrii contulísti: concéde propítius ; ut, qui beátae Agathae Vírginis et Mártyris tuae natalítia cólimus, per ejus ad te exémpla gradiámur. Per Dóminum.

Et, in Quadragesima, fit Commemoratio Feriae in Missis non conventualibus.


Léctio Epístolae beáti Pauli Apóstoli ad Corínthios.

1 Cor. 1, 26-31


FRATRES: Vidéte vocatiónem vestram, quia non multi sapiéntes secúndum carnem, non multi poténtes, non multi nóbiles: sed quae stulta s unt mundi elégit Deus, ut confúndat sapiéntes: et infírma mundi elégit Deus, ut confúndat fórtia: et ignobília mundi, et contemptibília elégit Deus, et ea quae non sunt, ut ea quae sunt destrúeret: ut non gloriétur omnis caro in conspéctu ejus. Ex ipso autem vos estis in Christo Jesu, qui factus est nobis sapiéntia a Deo, et justítia, et sanctificátio, et redémptio: ut quemádmodum scriptum est: Qui gloriátur, in Dómino gloriétur.


Graduale Ps. 45, 6 Adjuvábit eam Deus vultu suo: Deus in médio ejus, non commovébitur. V/. Ibid., 5 Flúminis ímpetus laetíficat civitátem Dei: sanctificávit tabernáculum suum Altíssimus.
Allelúja , allelúja. V/. Ps. 118, 46 Loquébar de testimóniis tuis in conspéctu regum, et non confundébar. Allelúja.

Post Septuagesimam, omissis Allelúja et Versu sequenti, dicitur

Tractus Ps. 125, 5-6 Qui séminant in lácrimis, in gáudio metent. V/. Eúntes ibant et flebant, mitténtes sémina sua. V/. Veniéntes autem vénient cum exsultatióne, portántes manípulos suos.


+ Sequéntia sancti Evangélii secúndum Matthaéum.

Matth. 19, 3-12


IN illo témpore: Accessérunt ad Jesum pharisaéi tentántes eum, et dicéntes: Si licet hómini dimíttere uxórem suam quacúmque ex causa ? Qui respóndens, ait eis: Non legístis, quia, qui fecit hóminem ab inítio, másculum et féminam fecit eos ? et dixit: Propter hoc dimíttet homo patrem et matrem, et adhaerébit uxóri suae, et erunt duo in carne una. Itaque jam non sunt duo, sed una caro. Quod ergo Deus conjúnxit, homo non séparet. Dicunt illi: Quid ergo Móyses mandávit dare libéllum repúdii, et dimíttere ? Ait illis: Quóniam Móyses ad durítiam cordis vestri permísit vobis dimíttere uxóres vestras: ab inítio autem non fuit sic. Dico autem vobis, quia quicúmque dimíserit uxórem suam, nisi ob fornicatiónem, et áliam dúxerit, moechátur: et qui dimíssam dúxerit, moechátur. Dicunt ei discípuli ejus: Si ita est causa hóminis cum uxóre, non éxpedit núbere. Qui dixit illis: Non omnes cápiunt verbum istud, sed quibus datum est. Sunt enim eunúchi, qui de matris útero sic nati sunt: et sunt eunúchi, qui facti sunt ab homínibus: et sunt eunúchi, qui seípsos castravérunt propter regnum caelórum. Qui potest cápere, cápiat.


Offertorium Ps. 44, 15 Afferéntur Regi vírgines post eam: próximae ejus afferéntur tibi.


Secreta


SÚSCIPE, Dómine, múnera, quae in beátae Agathae Vírginis et Mártyris tuae solemnitáte deférimus: cujus nos confídimus patrocínio liberári. Per Dóminum.

Et, in Quadragesima, fit Commemoratio Feriae, ut supra.


Communio Qui me dignátus est ab omni plaga curáre, et mamíllam meam meo péctori restitúere, ipsum ínvoco Deum vivum.


Postcommunio


AUXILIÉNTUR nobis, Dómine, sumpta mystéria: et, intercedénte beáta Agatha Vírgine et Mártyre tua, sempitérna protectióne confírment. Per Dóminum.

Et, in Quadragesima, fit Commemoratio Feriae, ut supra ; et de ea legitur Evangelium in fine, juxta Rubricas.



Die 6 Februarii

S. TITI

Episcopi et Confessoris


Duplex



Introitus Eccli. 45, 30
STÁTUIT ei Dóminus testaméntum pacis, et príncipem fecit eum: ut sit illi sacerdótii dígnitas in aetérnum. Ps. 131, 1 Meménto, Dómine, David: et omnis mansuetúdinis ejus. V/. Glória Patri.


Oratio


DEUS, qui beátum Titum Confessórem tuum atque Pontíficem apostólicis virtútibus decorásti: ejus méritis et intercessióne concéde ; ut juste et pie vivéntes in hoc saéculo, ad caeléstem pátriam perveníre mereámur. Per Dóminum.

Et, in Quadragesima, fit Commemoratio Feriae in Missis non conventualibus.
Deinde Commemoratio S. Dorotheae Virginis et Martyris.

Oratio


INDULGÉNTIAM nobis, quaésumus, Dómine, beáta Doróthea Virgo et Martyr implóret: quae tibi grata semper éxstitit, et mérito castitátis, et tuae professióne virtútis. Per Dóminum.


Léctio libri Sapiéntiae.

Eccli. 44, 16-27 et 45, 3-20


ECCE sacérdos magnus, qui in diébus suis plácuit Deo, et invéntus est justus: et in témpore iracúndiae factus est reconciliátio. Non est invéntus símilis illi, qui conservávit legem Excélsi. Ideo jurejurándo fecit illum Dóminus créscere in plebem suam. Benedictiónem ómnium géntium dedit illi, et testaméntum suum confirmávit super caput ejus. Agnóvit eum in benedictiónibus suis: conservávit illi misericórdiam suam: et invénit grátiam coram óculis Dómini. Magnificávit eum in conspéctu regum: et dedit illi corónam glóriae. Státuit illi testaméntum aetérnum, et dedit illi sacerdótium magnum: et beatificávit illum in glória. Fungi sacerdótio, et habére laudem in nómine ipsíus: et offérre illi incénsum dignum in odórem suavitátis.


Graduale Eccli. 44, 16 Ecce sacérdos magnus, qui in diébus suis plácuit Deo. V/. Ibid., 20 Non est invéntus símilis illi, qui conserváret legem Excélsi.
Allelúja, allelúja. V/. Ps. 109, 4 Tu es sacérdos in aetérnum, secúndum órdinem Melchísedech. Allelúja.

Post Septuagesimam, omissis Allelúja et Versu sequenti, dicitur

Tractus Ps. 111, 1-3 Beátus vir, qui timet Dóminum: in mandátis ejus cupit nimis. V/. Potens in terra erit semen ejus: generátio rectórum benedicétur. V/. Glória et divítiae in domo ejus: et justítia ejus manet in saéculum saéculi.


+ Sequéntia sancti Evangélii secúndum Lucam.

Luc. 10, 1-9


IN illo témpore: Designávit Dóminus et álios septuagínta duos: et misit illos binos ante fáciem suam in omnem civitátem et locum, quo erat ipse ventúrus. Et dicébat illis: Messis quidem multa, operárii autem pauci. Rogáte ergo Dóminum messis, ut mittat operários in messem suam. Ite: ecce ego mitto vos sicut agnos inter lupos. Nolíte portáre sácculum, neque peram, neque calceaménta, et néminem per viam salutavéritis. In quamcúmque domum intravéritis, primum dícite: Pax huic dómui: et si ibi fúerit fílius pacis, requiéscet super illum pax vestra: sin autem, ad vos revertétur. In eádem autem domo manéte, edéntes et bibéntes quae apud illos sunt: dignus est enim operárius mercéde sua. Nolíte transíre de domo in domum. Et in quamcúmque civitátem intravéritis, et suscéperint vos, manducáte quae apponúntur vobis: et curáte infírmos, qui in illa sunt, et dícite illis: Appropinquávit in vos regnum Dei.


Offertorium Ps. 88, 21-22 Invéni David servum meum, óleo sancto meo unxi eum: manus enim mea auxiliábitur ei, et bráchium meum confortábit eum.


Secreta


SANCTI tui, quaésumus, Dómine, nos ubíque laetíficent: ut, dum eórum mérita recólimus, patrocínia sentiámus. Per Dóminum.

Et, in Quadragesima, fit Commemoratio Feriae, ut supra.

Pro S. Dorothea

Secreta


HÓSTIAS tibi, Dómine, beátae Dorótheae Vírginis et Mártyris tuae dicátas méritis, benígnus assúme: et ad perpétuum nobis tríbue proveníre subsídium. Per Dóminum.


Communio Luc. 12, 42 Fidélis servus et prudens, quem constítuit dóminus super famíliam suam: ut det illis in témpore trítici mensúram.


Postcommunio


PRAESTA, quaésumus, omnípotens Deus: ut, de percéptis munéribus grátias exhibéntes, intercedénte beáto Tito Confessóre tuo atque Pontífice, benefícia potióra sumámus. Per Dóminum.

Et, in Quadragesima, fit Commemoratio Feriae, ut supra ; et de ea legitur Evangelium in fine, juxta Rubricas.

Pro S. Dorothea

Postcommunio


DIVÍNI múneris largitáte satiáti, quaésumus, Dómine Deus noster: ut, intercedénte beáta Doróthea Vírgine et Mártyre tua, in ejus semper participatióne vivámus. Per Dóminum.



Eadem die 6 Februarii

Pro S. DOROTHEA

Virgine et Martyre



Missa Me exspectavérunt, de Communi Virginum 2 loco.



Die 7 Februarii

S. ROMUALDI

Abbatis


Duplex



Missa Os justi, de Communi Abbatum.


Oratio
C


INTERCÉSSIO nos, quaésumus, Dómine, beáti Romuáldi Abbátis comméndet: ut, quod nostris méritis non valémus, ejus patrocínio assequámur. Per Dóminum.

Et, in Quadragesima, fit Commemoratio Feriae in Missis non conventualibus.


Secreta
C


SACRIS altáribus, Dómine, hóstias superpósitas sanctus Romuáldus Abbas, quaésumus, in salútem nobis proveníre depóscat. Per Dóminum.

Et, in Quadragesima, fit Commemoratio Feriae, ut supra.


Postcommunio
C


PRÓTEGAT nos, Dómine, cum tui perceptióne sacraménti beátus Romuáldus Abbas, pro nobis intercedéndo: ut et conversatiónis ejus experiámur insígnia, et intercessiónis percipiámus suffrágia. Per Dóminum.

Et, in Quadragesima, fit Commemoratio Feriae, ut supra ; et de ea legitur Evangelium in fine, juxta Rubricas.



Die 8 Februarii

S. JOANNIS DE MATHA

Confessoris


Duplex



Missa Os justi, de Communi Confessoris non Pontificis 1 loco, praeter Orationem sequentem.


Oratio
P


DEUS, qui per sanctum Joánnem órdinem sanctíssimae Trinitátis ad rediméndum de potestáte Saracenórum captívos caélitus institúere dignátus es: praesta, quaésumus ; ut, ejus suffragántibus méritis, a captivitáte córporis et ánimae, te adjuvánte, liberémur. Per Dóminum.

Et, in Quadragesima, fit Commemoratio Feriae in Missis non conventualibus.


Secreta
C


LAUDIS tibi, Dómine, hóstias immolámus in tuórum commemoratióne Sanctórum: quibus nos et praeséntibus éxui malis confídimus, et futúris. Per Dóminum.

Et, in Quadragesima, fit Commemoratio Feriae, ut supra.


Postcommunio
C


REFÉCTI cibo potúque caelésti, Deus noster, te súpplices exorámus: ut, in cujus haec commemoratióne percépimus, ejus muniámur et précibus. Per Dóminum.

Et, in Quadragesima, fit Commemoratio Feriae, ut supra ; et de ea legitur Evangelium in fine, juxta Rubricas.



Die 9 Februarii

S. CYRILLI

Episcopi Alexandrini,

Confessoris et Ecclesiae Doctoris


Duplex



Missa In médio, de Communi Doctorum, cum Orationibus ut infra, et dicitur Credo.


Oratio
P


DEUS, qui beátum Cyríllum Confessórem tuum atque Pontíficem divínae maternitátis beatíssimae Vírginis Maríae assertórem invíctum effecísti: concéde, ipso intercedénte ; ut, qui vere eam Genitrícem Dei crédimus, matérna ejúsdem protectióne salvémur. Per eúmdem Dóminum.

Et, in Quadragesima, fit Commemoratio Feriae in Missis non conventualibus.
Deinde Commemoratio S. Apolloniae Virginis et Martyris.

Oratio


DEUS, qui inter cétera poténtiae tuae mirácula étiam in sexu frágili victóriam martýrii contulísti: concéde propítius ; ut, qui beátae Apollóniae Vírginis et Mártyris tuae natalítia cólimus, per ejus ad te exémpla gradiámur. Per Dóminum.


Secreta
P


MÚNERA nostra, omnípotens Deus, benígnus réspice: et, intercedénte beáto Cyríllo, praesta ; ut unigénitum tuum Jesum Christum Dóminum nostrum in tua tecum glória coaetérnum, in córdibus nostris digne suscípere mereámur: Qui tecum vivit.

Et, in Quadragesima, fit Commemoratio Feriae, ut supra.

Pro S. Apollonia

Secreta


SÚSCIPE, Dómine, múnera, quae in beátae Apollóniae Vírginis et Mártyris tuae solemnitáte deférimus: cujus nos confídimus patrocínio liberári. Per Dóminum.


Postcommunio
P


DIVÍNIS, Dómine, refécti mystériis, te súpplices deprecámur: ut exémplis et méritis beáti Cyrílli Pontíficis adjúti, sanctíssimae Genitríci Unigéniti tui digne famulári valeámus: Qui tecum vivit.

Et, in Quadragesima, fit Commemoratio Feriae, ut supra ; et de ea legitur Evangelium in fine, juxta Rubricas.

Pro S. Apollonia

Postcommunio


AUXILIÉNTUR nobis, Dómine, sumpta mystéria: et, intercedénte beáta Apollónia Vírgine et Mártyre tua, sempitérna fáciant protectióne gaudére. Per Dóminum.



Eadem die 9 Februarii

Pro S. APOLLONIA

Virgine et Martyre



Missa Loquébar, de Communi Virginum 1 loco.



Die 10 Februarii

S. SCHOLASTICAE

Virginis


Duplex



Missa Dilexísti, de Communi Virginum 3 loco, praeter Orationem sequentem.


Oratio
P


DEUS, qui ánimam beátae Vírginis tuae Scholásticae ad ostendéndam innocéntiae viam in colúmbae spécie caelum penetráre fecísti: da nobis ejus méritis et précibus ita innocénter vívere ; ut ad aetérna mereámur gáudia perveníre. Per Dóminum.

Et, in Quadragesima, fit Commemoratio Feriae in Missis non conventualibus.


Secreta
C


ACCÉPTA tibi sit, Dómine, sacrátae plebis oblátio pro tuórum honóre Sanctórum: quorum se méritis de tribulatióne percepísse cognóscit auxílium. Per Dóminum.

Et, in Quadragesima, fit Commemoratio Feriae, ut supra.


Postcommunio
C


SATIÁSTI, Dómine, famíliam tuam munéribus sacris: ejus, quaésumus, semper interventióne nos réfove, cujus solémnia celebrámus. Per Dóminum.

Et, in Quadragesima, fit Commemoratio Feriae, ut supra ; et de ea legitur Evangelium in fine, juxta Rubricas.



Die 11 Februarii

IN APPARITIONE

B. MARIAE V. IMMACULATAE

Duplex majus



Introitus Apoc. 21, 2
VIDI civitátem sanctam, Jerúsalem novam, descendéntem de caelo a Deo, parátam sicut sponsam ornátam viro suo. Ps. 44, 2 Eructávit cor meum verbum bonum: dico ego ópera mea Regi. V/. Glória Patri.


Oratio


DEUS, qui per immaculátam Vírginis Conceptiónem dignum Fílio tuo habitáculum praeparásti: súpplices a te quaésumus ; ut ejúsdem Vírginis Apparitiónem celebrántes, salútem mentis et córporis consequámur. Per eúmdem Dóminum.

Et, in Quadragesima, fit Commemoratio Feriae in Missis non conventualibus.


Léctio libri Apocalýpsis beáti Joánnis Apóstoli.

Apoc. 11, 19 ; 12, 1 et 10


APÉRTUM est templum Dei in caelo: et visa est arca testaménti ejus in templo ejus, et facta sunt fúlgura, et voces, et terraemótus, et gr ando magna. Et signum magnum appáruit in caelo: Múlier amícta sole, et luna sub pédibus ejus, et in cápite ejus coróna stellárum duódecim. Et audívi vocem magnam in caelo dicéntem: Nunc facta est salus, et virtus, et regnum Dei nostri et potéstas Christi ejus.


Graduale Cant. 2, 12 Flores apparuérunt in terra nostra, tempus putatiónis advénit, vox túrturis audíta est in terra nostra. V/. Ibid., 10 et 14 Surge, amíca mea, speciósa mea, et veni: colúmba mea in foramínibus petrae, in cavérna macériae.
Allelúja, allelúja. V/. Osténde mihi fáciem tuam, sonet vox tua in áuribus meis: vox enim tua dulcis, et fácies tua decóra. Allelúja.

Post Septuagesimam, omissis Allelúja et Versu sequenti, dicitur

Tractus Judith 15, 10 Tu glória Jerúsalem, tu laetítia Israël, tu honorificéntia pópuli nostri. V/. Cant. 4, 7 Tota pulchra es, María: et mácula originális non est in te. V/. Felix es, sacra Virgo María, et omni laude digníssima, quae serpéntis caput virgíneo pede contrivísti.


+ Sequéntia sancti Evangélii secúndum Lucam.

Luc. 1, 26-31


IN illo témpore: Missus est Angelus Gábriel a Deo in civitátem Galilaéae, cui nomen Názareth, ad Vírginem desponsátam viro, cui nomen erat Joseph, de domo David, et nomen Vírginis María. Et ingréssus Angelus ad eam dixit: Ave, grátia plena: Dóminus tecum: benedícta tu in muliéribus. Quae cum audísset, turbáta est in sermóne ejus, et cogitábat qualis esset ista salutátio. Et ait Angelus ei: Ne tímeas, María, invenísti enim grátiam apud Deum: ecce concípies in útero, et páries fílium, et vocábis nomen ejus Jesum.


Credo.


Offertorium Luc. 1, 28 Ave, grátia plena: Dóminus tecum: benedícta tu in muliéribus.


Secreta


HÓSTIA laudis, quam tibi, Dómine, per mérita gloriósae et immaculátae Vírginis offérimus, sit tibi in odórem suavitátis, et nobis optátam cónferat córporis et ánimae sanitátem. Per Dóminum.

Et, in Quadragesima, fit Commemoratio Feriae, ut supra.


Praefatio de beata Maria Virgine Et te in Conceptióne immaculata.


Communio Ps. 64, 10 Visitásti terram et inebriásti eam, multiplicásti locupletáre eam.


Postcommunio


QUOS caelésti, Dómine, aliménto satiásti, súblevet déxtera Genitrícis tuae immaculátae: ut ad aetérnam pátriam, ipsa adjuvánte, perveníre mereámur: Qui vivis.

Et, in Quadragesima, fit Commemoratio Feriae, ut supra ; et de ea legitur Evangelium in fine, juxta Rubricas.



Die 12 Februarii

SS. SEPTEM FUNDATORUM

ORDINIS SERVORUM B. M. V.

Confessorum


Duplex



Introitus Sap. 10, 20-21
JUSTI decantavérunt, Dómine, nomen sanctum tuum, et victrícem manum tuam laudavérunt páriter: quóniam sapiéntia apéruit os mutum, et linguas infántium fecit disértas. Ps. 8, 2 Dómine, Dóminus noster, quam admirábile est nomen tuum in univérsa terra ! V/. Glória Patri.


Oratio


DÓMINE Jesu Christe, qui ad recoléndam memóriam dolórum sanctíssimae Genitrícis tuae, per septem beátos Patres nova Servórum ejus família Ecclésiam tuam fecundásti: concéde propítius ; ita nos eórum consociári flétibus, ut perfruámur et gáudiis: Qui vivis.

Et, in Quadragesima, fit Commemoratio Feriae in Missis non conventualibus.


Léctio libri Sapiéntiae.

Eccli. 44, 1-15


LAUDÉMUS viros gloriósos, et paréntes nostros in generatióne sua. Multam glóriam fecit Dóminus magnificéntia sua a saéculo. Dominántes in potestátibus suis, hómines magni virtúte, et prudéntia sua praéditi, nuntiántes in prophétis dignitátem prophetárum, et imperántes in praesénti pópulo, et virtúte prudéntiae pópulis sanctíssima verba. In perítia sua requiréntes modos músicos, et narrántes cármina scripturárum. Hómines dívites in virtúte, pulchritúdinis stúdium habéntes: pacificántes in dómibus suis. Omnes isti in generatiónibus gentis suae glóriam adépti sunt, et in diébus suis habéntur in láudibus. Qui de illis nati sunt, reliquérunt nomen narrándi laudes eórum. Et sunt quorum non est memória: periérunt quasi qui non fúerint: et nati sunt, quasi non nati, et fílii ipsórum cum ipsis. Sed illi viri misericórdiae sunt, quorum pietátes non defuérunt: cum sémine eórum pérmanent bona, heréditas sancta nepótes eórum, et in testaméntis stetit semen eórum: et fílii eórum propter illos usque in aetérnum manent: semen eórum et glória eórum non derelinquétur. Córpora ipsórum in pace sepúlta sunt, et nomen eórum vivit in generatiónem et generatiónem. Sapiéntiam ipsórum narrent pópuli, et laudem eórum núntiet Ecclésia.


Graduale Isai. 65, 23 Elécti mei non laborábunt frustra, neque germinábunt in conturbatióne: quia semen benedictórum Dómini est, et nepótes eórum cum eis. V/. Eccli. 44, 14 Córpora ipsórum in pace sepúlta sunt, et nómen eórum vivit in generatiónem et generatiónem.
Allelúja, allelúja. V/. Ibid., 15 Sapiéntiam ipsórum narrent pópuli, et laudem eórum núntiet Ecclésia. Allelúja.

Post Septuagesimam, omissis Allelúja et Versu sequenti, dicitur

Tractus Ps. 125, 5-6 Qui séminant in lácrimis, in exsultátio metent. V/. Eúntes ibant et flebant, mitténtes sémina sua. V/. Veniéntes autem vénient cum exsultatióne, portántes manípulos suos.



In Missis votivis Tempore Paschali omittitur Graduale, et ejus loco dicitur:

Allelúja, allelúja. V/. Eccli. 44, 15 Sapiéntiam ipsórum narrent pópuli, et laudem eórum núntiet Ecclésia. Allelúja. V/. Ps. 36, 28 Non derelínquet Dóminus sanctos suos: in aetérnum conservabúntur. Allelúja.



+ Sequéntia sancti Evangélii secúndum Matthaéum.

Matth. 19, 27-29


IN illo témpore: Dixit Petrus ad Jesum: Ecce nos relíquimus ómnia, et secúti sumus te: quid ergo erit nobis ? Jesus autem dixit illis: Amen dico vobis, quod vos, qui secúti estis me, in regeneratióne, cum séderit Fílius hóminis in sede majestátis suae, sedébitis et vos super sedes duódecim, judicántes duódecim tribus Israël. Et omnis, qui relíquerit domum, vel fratres, aut soróres, aut patrem, aut matrem, aut uxórem, aut fílios, aut agros, propter nomen meum, céntuplum accípiet, et vitam aetérnam possidébit.


Offertorium Isai. 56, 7 Addúcam eos in montem sanctum meum, et laetificábo eos in domo oratiónis meae: holocáusta eórum, et víctimae eórum placébunt mihi super altáre meum.


Secreta


ACCIPE, quaésumus, Dómine, hóstias quas tibi offérimus: et praesta ; ut, intercedéntibus Sanctis tuis, líbera tibi mente serviámus, et perdoléntis Vírginis Genitrícis Fílii tui amóre inflammémur. Per eúmdem Dóminum.

Et, in Quadragesima, fit Commemoratio Feriae, ut supra.


Communio Joann. 15, 16 Ego vos elégi de mundo, ut eátis, et fructum afferátis ; et fructus vester máneat.


Postcommunio


CAELÉSTIBUS refécti mystériis te, Dómine, deprecámur: ut quorum festa percólimus imitántes exémpla ; juxta Crucem Jesu cum María Matre ejus fidéliter adstémus, et ejúsdem redemptiónis fructum percípere mereámur. Per eúmdem Dóminum.

Et, in Quadragesima, fit Commemoratio Feriae, ut supra ; et de ea legitur Evangelium in fine, juxta Rubricas.



Die 14 Februarii

S. VALENTINI

Presbyteri et Martyris


Simplex



Missa In virtúte, de Communi unius Martyris 3 loco, cum Orationibus ut infra.


Oratio
P


PRAESTA, quaésumus, omnípotens Deus: ut, qui beáti Valentíni Mártyris tui natalítia cólimus, a cunctis malis imminéntibus, ejus intercessióne, liberémur. Per Dóminum.


Secreta
P


SÚSCIPE, quaésumus, Dómine, múnera dignánter obláta: et beáti Valentíni Mártyris tui suffragántibus méritis, ad nostrae salútis auxílium proveníre concéde. Per Dóminum.


Postcommunio
P


SIT nobis, Dómine, reparátio mentis et córporis caeléste mystérium: ut, cujus exséquimur actiónem, intercedénte beáto Valentíno Mártyre tuo, sentiámus efféctum. Per Dóminum.



Die 15 Februarii

SS. FAUSTINI ET JOVITAE

Martyrum


Simplex



Missa Salus autem, de Communi plurimorum Martyrum 3 loco, cum Orationibus ut infra.


Oratio
C


DEUS, qui nos ánnua sanctórum Mártyrum tuórum Faustíni et Jovítae solemnitáte laetíficas: concéde propítius ; ut, quorum gaudémus méritis, accendámur exémplis. Per Dóminum.


Secreta
P


ADÉSTO, Dómine, supplicatiónibus nostris, quas in Sanctórum tuórum commemoratióne deférimus: ut, qui nostrae justítiae fidúciam non habémus, eórum qui tibi placuérunt, méritis adjuvémur. Per Dóminum.


Postcommunio
P


QUSUMUS, Dómine, salutáribus repléti mystériis: ut, quorum solémnia celebrámus, eórum oratiónibus adjuvémur. Per Dóminum.



Die 18 Februarii

S. SIMEONIS

Episcopi et Martyris


Simplex



Missa Státuit, de Communi unius Martyris 1 loco.


Oratio
C


INFIRMITÁTEM nostram réspice, omnípotens Deus: et, quia pondus própriae actiónis gravat, beáti Simeónis Mártyris tui atque Pontíficis intercéssio gloriósa nos prótegat. Per Dóminum.


Secreta
C


HÓSTIAS tibi, Dómine, beáti Simeónis Mártyris tui atque Pontíficis dicátas méritis, benígnus assúme: et ad perpétuum nobis tríbue proveníre subsídium. Per Dóminum.


Postcommunio
C


REFÉCTI participatióne múneris sacri, quaésumus, Dómine Deus noster: ut, cujus exséquimur cultum, intercedénte beáto Simeóne Mártyre tuo atque Pontífice, sentiámus efféctum. Per Dóminum.



Die 22 Februarii

IN CATHEDRA S. PETRI

Apostoli

ANTIOCHAE

Duplex majus



Introitus Eccli. 45, 30
STÁTUIT ei Dóminus testaméntum pacis, et príncipem fecit eum: ut sit illi sacerdótii dígnitas in aetérnum. Ps. 131, 1 Meménto, Dómine, David: et omnis mansuetúdinis ejus. V/. Glória Patri.


Oratio


DEUS, qui beáto Petro Apóstolo tuo, collátis clávibus regni caeléstis, ligándi atque solvéndi pontifícium tradidísti: concéde ; ut, intercessiónis ejus auxílio, a peccatórum nostrórum néxibus liberémur: Qui vivis.

Et fit Commemoratio S. Pauli Apostoli, ante omnes alias Commemorationes.

Oratio


DEUS, qui multitúdinem géntium beáti Pauli Apóstoli praedicatióne docuísti: da nobis, quaésumus: ut, cujus commemoratiónem cólimus, ejus a pud te patrocínia sentiámus. (Per Dóminum.)

Deinde, in Quadragesima, fit Commemoratio Feriae in Missis non conventualibus.


Léctio Epístolae beáti Petri Apóstoli.

1 Petr. 1, 1-7


PETRUS Apóstolus Jesu Christi, eléctis ádvenis dispersiónis Ponti, Galátiae, Cappadóciae, Asiae et Bithýniae, secúndum praesciéntiam Dei Patris, in sanctificatiónem Spíritus, in obediéntiam, et aspersiónem sánguinis Jesu Christi: grátia vobis, et pax multiplicétur. Benedíctus Deus, et Pater Dómini nostri Jesu Christi, qui secúndum misericórdiam suam magnam regenerávit nos in spem vivam, per resurrectiónem Jesu Christi ex mórtuis, in hereditátem incorruptíbilem, et incontaminátam, et immarcescíbilem, conservátam in caelis in vobis, qui in virtúte Dei custodímini per fidem in salútem, parátam revelári in témpore novíssimo. In quo exsultábitis, módicum nunc si opórtet contristári in váriis tentatiónibus: ut probátio vestrae fídei multo pretiósior sit auro (quod per ignem probátur) inveniátur in laudem, et glóriam, et honórem, in revelatióne Jesu Christi Dómini nostri.


Graduale Ps. 106, 32 et 31 Exáltent eum in ecclésia plebis: et in cáthedra seniórum laudent eum. V/. Confiteántur Dómino misericórdiae ejus ; et mirabília ejus fíliis hóminum.
Tractus Matth. 16, 18-19 Tu es Petrus, et super hanc petram aedificábo Ecclésiam meam. V/. Et portae ínferi non praevalébunt advérsus eam: et tibi dabo claves regni caelórum. V/. Quodcúmque ligáveris super terram, erit ligátum et in caelis. V/. Et quodcúmque sólveris super terram, erit solútum et in caelis.


+ Sequéntia sancti Evangélii secúndum Matthaéum.

Matth. 16, 13-19


IN illo témpore: Venit Jesus in partes Caesaréae Philíppi, et interrogábat discípulos suos, dicens: Quem dicunt hómines esse Fílium hóminis ? At illi dixérunt: Alii Joánnem Baptístam, álii autem Elíam, álii vero Jeremíam, aut unum ex prophétis. Dicit illis Jesus: Vos autem quem me esse dícitis ? Respóndens Simon Petrus, dixit: Tu es Christus Fílius Dei vivi. Respóndens autem Jesus, dixit ei: Beátus es, Simon Bar Jona: quia caro et sanguis non revelávit tibi, sed Pater meus, qui in caelis est. Et ego dico tibi, quia tu es Petrus, et super hanc petram aedificábo Ecclésiam meam, et portae ínferi non praevalébunt advérsus eam. Et tibi dabo claves regni caelórum. Et quodcúmque ligáveris super terram, erit ligátum et in caelis: et quodcúmque sólveris super terram, erit solútum et in caelis.


Credo.


Offertorium Matth. 16, 18-19 Tu es Petrus, et super hanc petram aedificábo Ecclésiam meam: et portae ínferi non praevalébunt advérsus eam: et tibi dabo claves regni caelórum.


Secreta


ECCLÉSIAE tuae, quaésumus, Dómine, preces et hóstias beáti Petri Apóstoli comméndet orátio: ut, quod pro illíus glória celebrámus, nobis prosit ad véniam. Per Dóminum.

Pro S. Paulo

Secreta


APÓSTOLI tui Pauli précibus, Dómine, plebis tuae dona sanctífica: ut, quae tibi tuo grata sunt institúto, gratióra fiant patrocínio supplicántis. (Per Dóminum).

Deinde, in Quadragesima, fit Commemoratio Feriae, ut supra.


Praefatio de Apostolis.


Communio Matth. 16, 18 Tu es Petrus, et super hanc petram aedificábo Ecclésiam meam.


Postcommunio


LAETÍFICET nos, Dómine, munus oblátum: ut, sicut in Apóstolo tuo Petro te mirábilem praedicámus ; sic per illum tuae sumámus indulgéntiae largitátem. Per Dóminum.

Pro S. Paulo

Postcommunio


SANCTIFICÁTI, Dómine, salutári mystério: quaésumus ; ut nobis ejus non desit orátio, cujus nos donásti patrocínio gubernári. (Per Dóminum).

Deinde, in Quadragesima, fit Commemoratio Feriae, ut supra ; et de ea legitur Evangelium in fine, juxta Rubricas.


* In Sabbato, nisi annus fuerit bissextilis, additur Commemoratio Vigiliae anticipatae S. Matthiae, ut die sequenti notatur. Haec autem Commemoratio Vigiliae in Sabbato, ut supra, fit etiam extra Quadragesimam, addito tamen ultimo Evangelio de Vigilia. Et hoc in casu, post Tertiam extra Chorum legitur Missa de Festo sine Commemoratione Vigiliae, et in Choro post Nonam dicitur Missa de Vigilia sine Commemoratione Festi, additis in Missa Vigiliae 2a Oratione de sancta Maria Concéde, et 3a contra persecutores Ecclesiae, vel pro Papa. Missae vero privatae in Quadragesima ad libitum dici possunt, vel de Festo, vel de Feria, vel de Vigilia ; extra Quadragesimam, vel de Festo, vel de Vigilia, juxta Rubricas.



Die 23 Februarii

S. PETRI DAMIANI

Episcopi, Confessoris et Ecclesiae Doctoris


Duplex



Missa In médio, de Communi Doctorum, praeter Orationem sequentem, et dicitur Credo.


Oratio
P


CONCÉDE nos , quaésumus, omnípotens Deus: beáti Petri Cónfessóris tui atque Pontíficis mónita et exémpla sectári ; ut per terréstrium rerum contémptum aetérna gáudia conseqámur. Per Dóminum.

Et, in Quadragesima, fit Commemoratio Feriae in Missis non conventualibus.


Secreta
C


SANCTI Petri Pontíficis tui atque Doctóris nobis, Dómine, pia non desit orátio: quae et múnera nostra concíliet ; et tuam nobis indulgéntiam semper obtíneat. Per Dóminum.

Et fit Commemoratio Feriae, si venerit in Quadragesima, et Vigiliae, ut supra.

Postcommunio
C


UT nobis, Dómine, tua sacrifícia dent salútem: beátus Petrus Póntifex tuus et Doctor egrégius, quaésumus, precátor accédat. Per Dóminum.

Et fit Commemoratio Feriae, si venerit in Quadragesima, et Vigiliae, ut supra ; ac de ea legitur Evangelium in fine, juxta Rubricas.


* Nisi annus fuerit bissextilis, vel etiam in anno bissextili si hodie fuerit Sabbatum, additur Commemoratio Vigiliae, ut in Missa sequenti. Haec autem Commemoratio Vigiliae in utroque casu fit etiam extra Quadragesimam, addito ultimo Evangelio de ipsa Vigilia. Et, in utroque pariter casu, extra Quadragesimam, Missa conventualis de Festo legitur extra Chorum post Tertiam sine Commemoratione Vigiliae, et in Choro post Nonam dicitur Missa de Vigilia sine Commemoratione Festi. Missae vero privatae in Quadragesima ad libitum dici possunt, vel de Festo, vel de Feria, vel de Vigilia ; extra Quadragesimam, vel de Festo, vel de Vigilia, juxta Rubricas.



Missale Romanum 1957 - AD MISSAM