Missale Romanum 1957 - BEATAE MARIAE VIRGINIS


Die 2 Maji

S. ATHANASII

Episcopi, Confessoris et Ecclesiae Doctoris


Duplex



Introitus Eccli. 15, 5
IN médio Ecclésiae apéruit os ejus: et implévit eum Dóminus spíritu sapiéntiae, et intelléctus: stolam glóriae índuit eum, allelúja, allelúja. Ps. 91, 2 Bonum est confitéri Dómino: et psállere nómini tuo, Altíssime. V/. Glória Patri.


Oratio


EXÁUDI, quaésumus, Dómine, preces nostras, quas in beáti Athanásii Confessóris tui atque Pontíficis solemnitáte deférimus: et, qui tibi digne méruit famulári, ejus intercedéntibus méritis, ab ómnibus nos absólve peccátis. Per Dóminum.


Léctio Epístolae beáti Pauli Apóstoli ad Corínthios.

2 Cor. 4, 5-14


FRATRES: Non nosmetípsos praedicámus, sed Jesum Christum Dóminum nostrum: nos autem servos vestros per Jesum: quóniam Deus, qui dixit de ténebris lucem splendéscere, ipse illúxit in córdibus nostris ad inluminatiónem sciéntiae claritátis Dei, in fácie Christi Jesu. Habémus autem thesáurum istum in vasis fictílibus: ut sublímitas sit virtútis Dei, et non ex nobis. In ómnibus tribulatiónem pátimur, sed non angustiámur: aporiámur, sed non destitúimur: persecutiónem pátimur, sed non derelínquimur: dejícimur, sed non perímus: semper mortificatiónem Jesu in córpore nostro circumferéntes, ut et vita Jesu manifestétur in corpóribus nostris. Semper enim nos, qui vívimus, in mortem trádimur propter Jesum: ut et vita Jesu manifestétur in carne nostra mortáli. Ergo mors in nobis operátur, vita autem in vobis. Habéntes autem eúmdem spíritum fídei, sicut scriptum est: Crédidi, propter quod locútus sum: et nos crédimus, propter quod et lóquimur: sciéntes, quóniam qui suscitávit Jesum, et nos cum Jesu suscitábit, et constítuet vobíscum.


Allelúja, allelúja. V/. Ps. 109, 4 Tu es sacérdos in aetérnum, secúndum órdinem Melchísedech. Allelúja. V/. Jac. 1, 12 Beátus vir, qui suffert tentatiónem: quóniam cum probátus fúerit, accípiet corónam vitae. Allelúja.



In Missis votivis extra Tempus Paschale dicitur

Graduale Eccli. 44, 16 Ecce sacérdos magnus, qui in diébus suis plácuit Deo. V/. Ibid., 20 Non est invéntus símilis illi, qui conserváret legem Excélsi.
Allelúja, allelúja. V/. Jac. 1, 12 Beátus vir, qui suffert tentatiónem: quóniam cum probátus fúerit, accípiet corónam vitae. Allelúja.



+ Sequéntia sancti Evangélii secúndum Matthaéum.

Matth. 10, 23-28


IN illo témpore: Dixit Jesus discípulis suis: Cum persequéntur vos in civitáte ista, fúgite in áliam. Amen dico vobis, non consummábitis civitátes Israël, donec véniat Fílius hóminis. Non est discípulus super magístrum, nec servus super dóminum suum. Súfficit discípulo, ut sit sicut magíster ejus: et servo, sicut dóminus ejus. Si patremfamílias Beélzebub vocavérunt ; quanto magis domésticos ejus ? Ne ergo timuéritis eos. Nihil enim est opértum, quod non revelábitur: et occúltum, quod non sciétur. Quod dico vobis in ténebris, dícite in lúmine: et quod in aure audítis, praedicáte super tecta. Et nolíte timére eos, qui occídunt corpus, ánimam autem non possunt occídere: sed pótius timéte eum, qui potest et ánimam et corpus pérdere in gehénnam.


Credo.


Offertorium Ps. 88, 21-22 Invéni David servum meum, óleo sancto meo unxi eum: manus enim mea auxiliábitur ei, et bráchium meum confortábit eum, allelúja.


Secreta


SANCTI Athanásii Confessóris tui atque Pontíficis, quaésumus, Dómine, ánnua solémnitas pietáti tuae nos reddat accéptos: ut per haec piae placatiónis offícia, et illum beáta retribútio comitétur, et nobis grátiae tuae dona concíliet. Per Dóminum.


Communio Matth. 10, 27 Quod dico vobis in ténebris, dícite in lúmine: dicit Dóminus: et quod in aure audítis, praedicáte super tecta, allelúja.


Postcommunio


DEUS, fidélium remunerátor animárum: praesta ; ut beáti Athanásii Confessóris tui atque Pontíficis, cujus venerándam celebrámus fe stivitátem, précibus indulgéntiam consequámur. Per Dóminum.



Die 3 Maji

IN INVENTIONE S. CRUCIS

Duplex II classis



* Hodie, occurrente una ex tribus Feriis Rogationum, juxta Rubricas: 1 in Choro, post Tertiam semper dicitur Missa conventualis de Festo et, si fiat Processio, post Nonam Missa de Rogationibus ; 2 extra Chorum, in Feria II, si omittatur Processio, post Nonam legitur Missa de Rogationibus, et in Feria IV post Sextam semper Missa de Vigilia. De Feria autem et de Vigilia prohibentur Missae privatae.


Introitus Gal. 6, 14
NOS autem gloriári opórtet in Cruce Dómini nostri Jesu Christi: in quo est salus, vita et resurréctio nostra: per quem salváti et liberáti sumus, allelúja, allelúja. Ps. 66, 2 Deus misereátur nostri, et benedícat nobis: illúminet vultum suum super nos, et misereátur nostri. V/. Glória Patri.


Oratio


DEUS, qui in praeclára salutíferae Crucis Inventióne, passiónis tuae mirácula suscitásti: concéde ; ut vitális ligni prétio, aetérnae vitae suffrágia consequámur: Qui vivis.

Et, in Missis privatis tantum, fit Commemoratio Ss. Alexandri I Papae et Martyris, Eventii et Theoduli Martyrum, ac Juvenalis Episcopi et Confessoris.

Oratio


PRAESTA, quaésumus, omnípotens Deus: ut, qui sanctórum tuórum Alexándri, Evéntii, Theodúli, atque Juvenális natalítia cólimus ; a cunctis malis imminéntibus, eórum intercessiónibus, liberémur. Per Dóminum.


Léctio Epístolae beáti Pauli Apóstoli ad Philippénses.

Phil. 2, 5-11


FRATRES: Hoc enim sentíte in vobis, quod et in Christo Jesu: qui, cum in forma Dei esset, non rapínam arbitrátus est esse se aequálem Deo: sed semetípsum exinanívit, formam servi accípiens, in similitúdinem hóminum factus, et hábitu invéntus ut homo. Humiliávit semetípsum, factus obédiens usque ad mortem, mortem autem crucis. Propter quod et Deus exaltávit illum: et donávit illi nomen, quod est super omne nomen: (hic genuflectitur) ut in nómine Jesu omne genu flectátur caeléstium, terréstrium et infernórum: et omnis lingua confiteátur, quia Dóminus Jesus Christus in glória est Dei Patris.


Allelúja, allelúja. V/. Ps. 95, 10 Dícite in géntibus, quia Dóminus regnávit a ligno. Allelúja. V/. Dulce lignum, dulces clavos, dúlcia ferens póndera: quae sola fuísti digna sustinére Regem caelórum et Dóminum. Allelúja.


+ Sequéntia sancti Evangélii secúndum Joánnem.

Joann. 3, 1-15


IN illo témpore: Erat homo ex pharisaéis, Nicodémus nómine, princeps Judaeórum. Hic venit ad Jesum nocte, et dixit ei: Rabbi, scimus quia a Deo venísti magíster, nemo enim potest haec signa fácere, quae tu facis, nisi fúerit Deus cum eo. Respóndit Jesus, et dixit ei: Amen, amen dico tibi, nisi quis renátus fúerit dénuo, non potest vidére regnum Dei. Dicit ad eum Nicodémus: Quómodo potest homo nasci, cum sit senex ? numquid potest in ventrem matris suae iteráto introíre, et renásci ? Respóndit Jesus: Amen, amen dico tibi, nisi quis renátus fúerit ex aqua, et Spíritu Sancto, non potest introíre in regnum Dei. Quod natum est ex carne, caro est: et quod natum est ex spíritu, spíritus est. Non miréris quia dixi tibi: opórtet vos nasci dénuo. Spíritus ubi vult spirat, et vocem ejus audis, sed nescis unde véniat, aut quo vadat: sic est omnis qui natus est ex spíritu. Respóndit Nicodémus, et dixit ei: Quómodo possunt haec fíeri ? Respóndit Jesus, et dixit ei: Tu es magíster in Israël, et haec ignóras ? Amen, amen dico tibi, quia quod scimus lóquimur, et quod vídimus testámur, et testimónium nostrum non accípitis. Si terréna dixi vobis et non créditis: quómodo, si díxero vobis caeléstia, credétis ? Et nemo ascéndit in caelum, nisi qui descéndit de caelo, Fílius hominis, qui est in caelo. Et sicut Móyses exaltávit serpéntem in desérto ; ita exaltári opórtet Fílium hóminis: ut omnis qui credit in ipsum, non péreat, sed hábeat vitam aetérnam.


Credo.


Offertorium Ps. 117, 16 et 17 Déxtera Dómini fecit virtútem, déxtera Dómini exaltávit me: non móriar, sed vivam, et narrábo ópera Dómini, allelúja.


Secreta


SACRIFÍCIUM, Dómine, quod tibi immolámus, placátus inténde: ut ab omni nos éruat bellórum nequítia, et per vexíllum sanctae Crucis Fílii tui, ad conteréndas potestátis advérsae insídias, nos in tuae protectiónis securitáte constítuat. Per eúmdem Dóminum.

Pro Ss. Alexandro, Eventio, Theodulo ac Juvenale

Secreta


SUPER has hóstias, quaésumus, Dómine, benedíctio copiósa descéndat: quae et sanctificatiónem nobis cleménter operétur, et de Sanctórum nos solemnitáte laetíficet. Per Dóminum.


Praefatio de Cruce.


Communio Per signum Crucis de inimícis nostris líbera nos, Deus noster, allelúja.


Postcommunio


REPLÉTI alimónia caelésti, et spiritáli póculo recreáti, quaésumus, omnípotens Deus: ut ab hoste malígno deféndas, quos per lignum sanctae Crucis Fílii tui, arma justítiae pro salúte mundi, triumpháre jussísti. Per eúmdem Dóminum.

Pro Ss. Alexandro, Eventio, Theodulo ac Juvenale

Postcommunio


REFÉCTI participatióne múneris sacri, quaésumus, Dómine Deus noster: ut, cujus exséquimur cultum, intercedéntibus sanctis tuis Alexándro, Evéntio, Theodúlo et Juvenále sentiámus efféctum. Per Dóminum.


* Pro votiva de S. Cruce dicitur Missa Nos autem, quae habetur inter Missas votivas circa finem Missalis.



Eadem die 3 Maji

Pro SS. ALEXANDRO I

Papa et Martyre,

EVENTIO et THEODULO

Martyribus

ac JUVENALE

Episcopo et Confessore



Missa Sancti tui, de Communi Martyrum Tempore Paschali 2 loco, vel pro votiva extra Tempus Paschale Sapiéntiam, de Communi plurimorum Martyrum 2 loco, cum Orationibus ut infra:


Oratio
P


PRAESTA, quaésumus, omnípotens Deus: ut, qui sanctórum tuórum Alexándri, Evéntii, Theodúli, atque Juvenális natalítia cólimus ; a cunctis malis imminéntibus, eórum intercessiónibus, liberémur. Per Dóminum.


Secreta
P


SUPER has hóstias, quaésumus, Dómine, benedíctio copiósa descéndat: quae et sanctificatiónem nobis cleménter operétur, et de Sanctórum nos solemnitáte laetíficet. Per Dóminum.


Postcommunio
P


REFÉCTI participatióne múneris sacri, quaésumus, Dómine Deus noster: ut, cujus exséquimur cultum, intercedéntibus sanctis tuis Alexándro, Evéntio, Theodúlo et Juvenále sentiámus efféctum. Per Dóminum.



Die 4 Maji

S. MONICAE

Viduae


Duplex



Introitus Ps. 118, 75 et 120
COGNÓVI, Dómine, quia aéquitas judícia tua, et in veritáte tua humiliásti me: confíge timóre tuo carnes meas, a mandátis tuis tímui, allelúja, allelúja. Ps. ibid., 1 Beáti immaculáti in via: qui ámbulant in lege Dómini. V/. Glória Patri.


Oratio


DEUS, maeréntium consolátor et in te sperántium salus, qui beátae Mónicae pias lácrimas in conversióne fílii sui Augustíni misericórditer suscepísti: da nobis utriúsque intervéntu ; peccáta nostra deploráre, et grátiae tuae indulgéntiam inveníre. Per Dóminum.


Léctio Epístolae beáti Pauli Apóstoli ad Timótheum.

1 Tim. 5, 3-10


CARÍSSIME: Víduas honóra, quae vere víduae sunt. Si qua autem vídua fílios, aut nepótes habet: discat primum domum suam régere, et mútuam vicem réddere paréntibus: hoc enim accéptum est coram Deo. Quae autem vere vídua est, et desoláta, speret in Deum, et instet obsecratiónibus, et oratiónibus nocte ac die. Nam quae in delíciis est, vivens mórtua est. Et hoc praécipe ut irreprehensíbiles sint. Si quis autem suórum, et máxime domesticórum curam non habet, fidem negávit, et est infidéli detérior. Vídua eligátur non minus sexagínta annórum, quae fúerit uníus viri uxor, in opéribus bonis testimónium habens, si fílios educávit, si hospítio recépit, si sanctórum pedes lavit, si tribulatiónem patiéntibus subministrávit, si omne opus bonum subsecúta est.


Allelúja, allelúja . V/. Ps. 44, 5 Spécie tua, et pulchritúdine tua inténde, próspere procéde et regna. Allelúja. V/. Propter veritátem, et mansuetúdinem, et justítiam: et dedúcet te mirabíliter déxtera tua. Allelúja.


+ Sequéntia sancti Evangélii secúndum Lucam.

Luc. 7, 11-16


IN illo témpore: Ibat Jesus in civitátem, quae vocátur Naim: et ibant cum eo discípuli ejus, et turba copiósa. Cum autem appropinquáret portae civitátis, ecce defúnctus efferebátur fílius únicus matris suae: et haec vídua erat: et turba civitátis multa cum illa. Quam cum vidísset Dóminus, misericórdia motus super eam, dixit illi: Noli flere. Et accéssit, et tétigit lóculum. (Hi autem, qui portábant, stetérunt). Et ait: Adoléscens, tibi dico, surge. Et resédit qui erat mórtuus, et coepit loqui. Et dedit illum matri suae. Accépit autem omnes timor: et magnificábant Deum, dicéntes: Quia prophéta magnus surréxit in nobis: et quia Deus visitávit plebem suam.


Offertorium Ps. 44, 3 Diffúsa est grátia in lábiis tuis: proptérea benedíxit te Deus in aetérnum, et in saéculum saéculi, allelúja.


Secreta


ACCÉPTA tibi sit, Dómine, sacrátae plebis oblátio pro tuórum honóre Sanctórum: quorum se méritis de tribulatióne percepísse cognóscit auxílium. Per Dóminum.


Communio Ps. 44, 8 Dilexísti justítiam, et odísti iniquitátem: proptérea unxit te Deus, Deus tuus, óleo laetítiae prae consórtibus tuis, allelúja.


Postcommunio


SATIÁSTI, Dómine, famíliam tuam munéribus sacris: ejus, quaésumus, semper interventióne nos réfove, cujus solémnia celebrámus. Per Dóminum.



Die 5 Maji

S. PII V

Papae et Confessoris


Duplex



Missa Si díligis me, de Communi Summorum Pontificum, praeter Orationem sequentem.


Oratio
P


DEUS, qui ad conteréndos Ecclésiae tuae hostes, et ad divínum cultum reparándum, beátum Pium Pontíficem máximum elígere dignátus es: fac nos ipsíus deféndi praesídiis, et ita tuis inhaerére obséquiis ; ut, ómnium hóstium superátis insídiis, perpétua pace laetémur. Per Dóminum.


Secreta
C


OBLÁTIS munéribus, quaésumus, Dómine, Ecclésiam tuam benígnus illúmina: ut, et gregis tui profíciat ubíque succéssus, et grati fiant nómini tuo, te gubernánte, pastóres. Per Dóminum.


Postcommunio
C


REFECTIÓNE sancta enutrítam gubérna, quaésumus, Dómine, tuam placátus Ecclésiam: ut poténti moderatióne dirécta, et increménta libertátis accípiat, et in religiónis integritáte persístat. Per Dóminum.



Die 6 Maji

S. JOANNIS

Apostoli et Evangelistae

ante Portam Latinam


Duplex majus



Introitus Ps. 63, 3
PROTEXÍSTI me, Deus, a convéntu malignántium, allelúja: a multitúdine operántium iniquitátem, allelúja, allelúja. Ps. ibid., 2 Exáudi, Deus, oratiónem meam cum déprecor: a timóre inimíci éripe ánimam meam. V/. Glória Patri.


Oratio


DEUS, qui cónspicis quia nos úndique mala nostra pertúrbant: praesta, quaésumus ; ut beáti Joánnis Apóstoli tui et Evangelístae intercéssio gloriósa nos prótegat. Per Dóminum.


Léctio libri Sapiéntiae.

Sap. 5, 1-5


STABUNT justi in magna constántia advérsus eos, qui se angustiavérunt, et qui abstulérunt labóres eórum. Vidéntes turbabúntur timóre horríbili, et mirabúntur in subitatióne insperátae salútis, dicéntes intra se, paeniténtiam agéntes, et prae angústia spíritus geméntes: Hi sunt, quos habúimus aliquándo in derísum et in similitúdinem impropérii. Nos insensáti vitam illórum aestimabámus insániam, et finem illórum sine honóre: ecce quómodo computáti sunt inter fílios Dei, et inter sanctos sors illórum est.


Allelúja, allelúja. V./ Ps. 91, 13 Justus ut palma florébit: sicut cedrus Líbani multiplicábitur. Allelúja. V/. Osee 14, 6 Justus germinábit sicut lílium: et florébit in aetérnum ante Dóminum. Allelúja.


+ Sequéntia sancti Evangélii secúndum Matthaéum.

Matth. 20, 20-23


IN illo témpore: Accéssit ad Jesum mater filiórum Zebedaéi cum fíliis suis, adórans et petens áliquid ab eo. Qui dixit ei: Quid vis ? Ait illi: Dic ut sédeant hi duo fílii mei, unus ad déxteram tuam, et unus ad sinístram in regno tuo. Respóndens autem Jesus, dixit: Nescítis quid petátis. Potéstis bíbere cálicem, quem ego bibitúrus sum ? Dicunt ei: Póssumus. Ait illis: Cálicem quidem meum bibétis: sedére autem ad déxteram meam, vel sinístram, non est meum dare vobis, sed quibus parátum est a Patre meo.


Credo.


Offertorium Ps. 88, 6 Confitebúntur caeli mirabília tua, Dómine: et veritátem tuam in ecclésia sanctórum, allelúja, allelúja.


Secreta


MUNÉRIBUS nostris, quaésumus, Dómine, precibúsque suscéptis: et caeléstibus nos munda mystériis, et cleménter exáudi. Per Dóminum.


Praefatio de Apostolis.


Communio Ps. 63, 11 Laetábitur justus in Dómino, et sperábit in eo: et laudabúntur omnes recti corde, allelúja, allelúja.


Postcommunio


REFÉCTI, Dómine, pane caelésti: ad vitam, quaésumus, nutriámur aetérnam. Per Dóminum.


* Pro votiva de S. Joanne, Missa dicitur ut in Festo, die 27 Decembris, at in Oratione Secreta immutatur vox solemnitáte in commemoratióne.



Die 7 Maji

S. STANISLAI

Episcopi et Martyris


Duplex



Missa Protexísti, de Communi Martyrum Tempore Paschali 1 loco, cum Orationibus ut infra.


Oratio
P


DEUS, pro cujus honóre gloriósus Póntifex Stanisláus gládiis impiórum occúbuit: praesta, quaésumus ; ut omnes, qui ejus implórant auxílium, petitiónis suae salutárem consequántur efféctum. Per Dóminum.


Secreta
C


MÚNERA tibi, Dómine, dicáta sanctífica: et, intercedénte beáto Stanisláo Mártyre tuo atque Pontífice, per éadem nos placátus inténde. Per Dóminum.


Postcommunio
C


HAEC nos commúnio, Dómine, purget a crímine: et, intercedénte beáto Stanisláo Mártyre tuo atque Pontífice, caeléstis remédii fáciat esse consórtes. Per Dóminum.


* Pro votiva e xtra Tempus Paschale, Missa Sacerdótes Dei, de Communi unius Martyris 2 loco, cum Orationibus ut supra.



Die 8 Maji

IN APPARITIONE

S. MICHAELIS

Archangeli


Duplex majus



Introitus Ps. 102, 20
BENEDÍCITE Dóminum, omnes Angeli ejus: poténtes virtúte, qui fácitis verbum ejus, ad audiéndam vocem sermónum ejus, allelúja, allelúja. Ps. ibid., 1 Bénedic, ánima mea, Dómino: et ómnia, quae intra me sunt, nómini sancto ejus. V/. Glória Patri.


Oratio


DEUS, qui, miro órdine, Angelórum ministéria hominúmque dispénsas: concéde propítius ; ut, a quibus tibi ministrántibus in caelo semper assístitur, ab his in terra vita nostra muniátur. Per Dóminum.


Léctio libri Apocalýpsis beáti Joánnis Apóstoli.

Apoc. 1, 1-5


IN diébus illis: Significávit Deus quae opórtet fíeri cito, mittens per Angelum suum servo suo Joánni, qui testimónium perhíbuit verbo Dei, et testimónium Jesu Christi, quaecúmque vidit. Beátus qui legit et audit verba prophetíae hujus: et servat ea, quae in ea scripta sunt: tempus enim prope est. Joánnes septem ecclésiis, quae sunt in Asia. Grátia vobis, et pax ab eo, qui est, et qui erat, et qui ventúrus est: et a septem spirítibus, qui in conspéctu throni ejus sunt: et a Jesu Christo, qui est testis fidélis, primogénitus mortuórum, et princeps regum terrae, qui diléxit nos, et lavit nos a peccátis nostris in sánguine suo.


Allelúja , allelúja. V/. Sancte Míchaël Archángele, defénde nos in praélio: ut non pereámus in treméndo judício. Allelúja. V/. Concússum est mare, et contrémuit terra, ubi Archángelus Míchaël descéndit de caelo. Allelúja.


+ Sequéntia sancti Evangélii secúndum Matthaéum.

Matth. 18, 1-10


IN illo témpore: Accessérunt discípuli ad Jesum, dicéntes: Quis, putas, major est in regno caelórum ? Et ádvocans Jesus párvulum státuit eum in médio eórum, et dixit: Amen dico vobis, nisi convérsi fuéritis, et efficiámini sicut párvuli, non intrábitis in regnum caelórum. Quicúmque ergo humiliáverit se sicut párvulus iste, hic est major in regno caelórum. Et qui suscéperit unum párvulum talem in nómine meo, me súscipit. Qui autem scandalizáverit unum de pusíllis istis, qui in me credunt, éxpedit ei ut suspendátur mola asinária in collo ejus, et demergátur in profúndum maris. Vae mundo a scándalis. Necésse est enim ut véniant scándala: verúmtamen vae hómini illi, per quem scándalum venit. Si autem manus tua, vel pes tuus scandalízat te, abscíde eum, et prójice abs te: bonum tibi est ad vitam íngredi débilem, vel claudum, quam duas manus, vel duos pedes habéntem, mitti in ignem aetérnum. Et si óculus tuus scandalízat te, érue eum, et prójice abs te: bonum tibi est cum uno óculo in vitam intráre, quam duos óculos habéntem mitti in gehénnam ignis. Vidéte ne contemnátis unum ex his pusíllis: dico enim vobis quia Angeli eórum in caelis semper vident fáciem Patris mei, qui in caelis est.


Credo.


Offertorium Apoc. 8, 3 et 4 Stetit Angelus juxta aram templi, habens thuríbulum áureum in manu sua, et data sunt ei incénsa multa: et ascéndit fumus arómatum in conspéctu Dei, allelúja.


Secreta


HÓSTIAS tibi, Dómine, laudis offérimus, supplíciter deprecántes: ut eásdem, angélico pro nobis interveniénte suffrágio, et placátus accípias, et ad salútem nostram proveníre concédas. Per Dóminum.


Communio Dan. 3, 58 Benedícite, omnes Angeli Dómini, Dóminum: hymnum dícite, et superexaltáte eum in saécula, allelúja.


Postcommunio


BEÁTI Archángeli tui Michaélis intercessióne suffúlti: súpplices te, Dómine, deprecámur ; ut, quod ore proséquimur, contingámus et mente. Per Dóminum.


* Pro votiva de S. Michaële, Tempore Paschali, Missa dicitur ut supra ; e xtra Tempus Paschale, ut in ejus Dedicatione, die 29 Septembris.



Die 9 Maji

S. GREGORII NAZIANZENI

Episcopi, Confessoris et Ecclesiae Doctoris


Duplex



Missa In médio, de Communi Doctorum, cum Epistola Justus 2 loco, et dicitur Credo.


Oratio
C


DEUS, qui pópulo tuo aetérnae salútis beátum Gregórium minístrum tribuísti: praesta, quaésumus ; ut, quem Doctórem vitae habúimus in terris, intercessórem habére mereámur in caelis. Per Dóminum.


Secreta
C


SANCTI Gregórii Pontíficis tui atque Doctóris nobis, Dómine, pia non desit orátio: quae et múnera nostra concíliet ; et tuam nobis indulgéntiam semper obtíneat. Per Dóminum.


Postcommunio
C


UT nobis, Dómine, tua sacrifícia dent salútem: beátus Gregórius Póntifex tuus et Doctor egrégius, quaésumus, precátor accédat. Per Dóminum.



Die 10 Maji

S. ANTONINI

Episcopi et Confessoris


Duplex



Missa Státuit, de Communi Confessoris Pontificis 1 loco, praeter Orationem sequentem.


Oratio
P


SANCTI Antoníni, Dómine, Confessóris tui atque Pontíficis méritis adjuvémur: ut, sicut te in illo mirábilem praedicámus, ita in nos misericórdem fuísse gloriémur. Per Dóminum.

Et fit Commemoratio Ss. Gordiani et Epimachi Martyrum.

Oratio


DA, quaésumus, omnípotens Deus: ut, qui beatórum Mártyrum tuórum Gordiáni et Epímachi solémnia cólimus, eórum apud te intercessiónibus adjuvémur. Per Dóminum.


Secreta
C


SANCTI tui, quaésumus, Dómine, nos ubíque laetíficent: ut, dum eórum mérita recólimus, patrocínia sentiámus. Per Dóminum.

Pro Ss. Gordiano et Epimacho

Secreta


HÓSTIAS tibi, Dómine, beatórum Mártyrum tuórum Gordiáni et Epímachi dicátas méritis, benígnus assúme: et ad perpétuum nobis tríbue proveníre subsídium. Per Dóminum.


Postcommunio
C


PRAESTA, quaésumus, omnípotens Deus: ut, de percéptis munéribus grátias exhibéntes, intercedénte beáto Antoníno Confessóre tuo atque Pontífice, benefícia potióra sumámus. Per Dóminum.


Pro Ss. Gordiano et Epimacho

Postcommunio


QUSUMUS, omnípotens Deus: ut, qui caeléstia aliménta percépimus, intercedéntibus sanctis Martýribus tuis Gordiáno et Epímacho, per haec contra ómnia advérsa muniámur. Per Dóminum.



Eadem die 10 Maji

Pro SS. GORDIANO et EPIMACHO

Martyribus



Missa Sancti tui, de Communi Martyrum Tempore Paschali 2 loco, cum Orationibus et Epistola ut infra.


Oratio
P


DA, quaésumus, omnípotens Deus: ut, qui beatórum Mártyrum tuórum Gordiáni et Epímachi solémnia cólimus, eórum apud te intercessiónibus adjuvémur. Per Dóminum.


Léctio libri Apocalýpsis beáti Joánnis Apóstoli.

Apoc. 19, 1-9


IN diébus illis: Post haec ego Joánnes audívi quasi vocem turbárum multárum in caelo, dicéntium: Allelúja: salus, et glória, et virtus Deo nostro est: quia vera et justa judícia sunt ejus, qui judicávit de meretríce magna, quae corrúpit terram in prostitutióne sua, et vindicávit sánguinem servórum suórum de mánibus ejus. Et íterum dixérunt: Allelúja. Et fumus ejus ascéndit in saécula saeculórum. Et cecidérunt senióres vigintiquátuor, et quátuor animália, et adoravérunt Deum sedéntem super thronum, dicéntes: Amen: Allelúja. Et vox de throno exívit, dicens: Laudem dícite Deo nostro omnes servi ejus ; et qui timétis eum, pusílli et magni. Et audívi quasi vocem turbae magnae, et sicut vocem aquárum multárum, et sicut vocem tonitruórum magnórum dicéntium: Allelúja: quóniam regnávit Dóminus Deus noster omnípotens. Gaudeámus, et exsultémus, et demus glóriam ei: quia venérunt núptiae Agni, et uxor ejus praeparávit se. Et datum est illi ut coopériat se býssino splendénti, et cándido. Býssinum enim justificatiónes sunt Sanctórum. Et dixit mihi: Scribe: Beáti, qui ad cenam nuptiárum Agni vocáti sunt.


Secreta
P


HÓSTIAS tibi, Dómine, beatórum Mártyrum tuórum Gordiáni et Epímachi dicátas méritis, benígnus assúme: et ad perpétuum nobis tríbue proveníre subsídium. Per Dóminum.


Postcommunio
P


QUSUMUS, omnípotens Deus: ut, qui caeléstia aliménta percépimus, intercedéntibus sanctis Martýribus tuis Gordiáno et Epímacho, per haec contra ómnia advérsa muniámur. Per Dóminum.


* Pro votiva extra Tempus Paschale, Missa Sapiéntiam, de Communi plurimorum Martyrum 2 loco, cum Orationibus ut supra.



Die 11 Maji

SS. PHILIPPI ET JACOBI

Apostolorum


Duplex II classis



* Hodie, occurrente una ex tribus Feriis Rogationum, juxta Rubricas: 1 in Choro, post Tertiam semper dicitur Missa conventualis de Festo et, si fiat Processio, post Nonam Missa de Rogationibus ; 2 extra Chorum, in Feria II, si omittatur Processio, post Nonam legitur Missa de Rogationibus, et in Feria IV post Sextam semper Missa de Vigilia. De Feria autem et de Vigilia prohibentur Missae privatae.


Introitus Neh. vel 2 Esdr. 9, 27
CLAMAVÉRUNT ad te, Dómine, in témpore afflictiónis suae, et tu de caelo exaudísti eos, allelúja, allelúja. Ps. 32, 1 Exsultáte, justi, in Dómino: rectos decet collaudátio. V/. Glória Patri.


Oratio


DEUS, qui nos ánnua Apostolórum tuórum Philíppi et Jacóbi solemnitáte laetíficas: praesta, quaésumus ; ut, quorum gaudémus méritis, instruámur exémplis. Per Dóminum.


Léctio libri Sapiéntiae.

Sap. 5, 1-5


STABUNT justi in magna constántia advérsus eos, qui se angustiavérunt, et qui abstulérunt labóres eórum. Vidéntes turbabúntur timóre horríbili, et mirabúntur in subitatióne insperátae salútis, dicéntes intra se, paeniténtiam agéntes, et prae angústia spíritus geméntes: Hi sunt, quos habúimus aliquándo in derísum et in similitúdinem impropérii. Nos insensáti vitam illórum aestimabámus insániam, et finem illórum sine honóre: ecce quómodo computáti sunt inter fílios Dei, et inter sanctos sors illórum est.


Allelúja, allelúja. V/. Ps. 88, 6 Confitebúntur caeli mirabília tua, Dómine: étenim veritátem tuam in ecclésia sanctórum. Allelúja. V/. Joann. 14, 9 Tanto témpore vobíscum sum, et non cognovístis me ? Philíppe, qui videt me, videt et Patrem meum. Allelúja.


+ Sequéntia sancti Evangélii secúndum Joánnem.

Joann. 14, 1-13


IN illo témpore: Dixit Jesus discípulis suis: Non turbétur cor vestrum. Créditis in Deum, et in me crédite. In domo Patris mei mansiónes multae sunt. Si quo minus dixíssem vobis: Quia vado paráre vobis locum. Et si abíero, et praeparávero vobis locum: íterum vénio, et accípiam vos ad meípsum, ut ubi sum ego, et vos sitis. Et quo ego vado scitis, et viam scitis. Dicit ei Thomas: Dómine, nescímus quo vadis: et quómodo póssumus viam scire ? Dicit ei Jesus: Ego sum via, et véritas, et vita. Nemo venit ad Patrem nisi per me. Si cognovissétis me, et Patrem meum útique cognovissétis: et ámodo cognoscétis eum, et vidístis eum. Dicit ei Philíppus: Dómine, osténde nobis Patrem, et súfficit nobis. Dicit ei Jesus: Tanto témpore vobíscum sum, et non cognovístis me ? Philíppe, qui videt me, videt et Patrem. Quómodo tu dicis: Osténde nobis Patrem ? Non créditis quia ego in Patre, et Pater in me est ? Verba, quae ego loquor vobis, a meípso non loquor. Pater autem in me manens, ipse facit ópera. Non créditis quia ego in Patre, et Pater in me est ? Alióquin propter ópera ipsa crédite. Amen, amen dico vobis, qui credit in me, ópera, quae ego fácio, et ipse fáciet, et majóra horum fáciet: quia ego ad Patrem vado. Et quodcúmque petiéritis Patrem in nómine meo, hoc fáciam.


Credo.


Offertorium Ps. 88, 6 Confitebúntur caeli mirabília tua, Dómine: et veritátem tuam in ecclésia sanctórum, allelúja, allelúja.


Secreta


MÚNERA, Dómine, quae pro Apostolórum tuórum Philíppi et Jacóbi solemnitáte deférimus, propítius súscipe: et mala ómnia, quae merémur, avérte. Per Dóminum.


Praefatio de Apostolis.


Communio Joann. 14, 9 et 10 Tanto témpore vobíscum sum, et non cognovístis me ? Philíppe, qui videt me, videt et Patrem meum: allelúja: non credis, quia ego in Patre, et Pater in me est ? Allelúja, allelúja.


Postcommunio


QUSUMUS, Dómine, salutáribus repléti mystériis: ut, quorum solémnia celebrámus, eórum oratiónibus adjuvémur. Per Dóminum.




* Pro votiva e xtra Tempus Paschale dicitur sequens Missa:


Introitus Neh. vel 2 Esdr. 9, 27
CLAMAVÉRUNT ad te, Dómine, in témpore afflictiónis suae, et tu de caelo exaudísti eos. Ps. 32, 1 Exsultáte, justi, in Dómino: rectos decet collaudátio. V/. Glória Patri.


Oratio


DEUS, qui nos Apostolórum tuórum Philíppi et Jacóbi commemoratióne laetíficas: praesta, quaésumus ; ut, quorum gaudémus méritis, instruámur exémplis. Per Dóminum.


Léctio Epístolae beáti Pauli Apóstoli ad Ephésios.

Ephes. 4, 7-13


FRATRES: Unicuíque nostrum data est grátia secúndum mensúram donatiónis Christi. Propter quod dicit: Ascéndens in altum, captívam duxit captivitátem: dedit dona homínibus. Quod autem ascéndit, quid est, nisi quia et descéndit primum in inferióres partes terrae ? Qui descéndit, ipse est et qui ascéndit super omnes caelos, ut impléret ómnia. Et ipse dedit quosdam quidem apóstolos, quosdam autem prophétas, álios vero evangelístas, álios autem pastóres, et doctóres, ad consummatiónem sanctórum in opus ministérii, in aedificatiónem córporis Christi: donec occurrámus omnes in unitátem fídei et agnitiónis Fílii Dei, in virum perféctum, in mensúram aetátis plenitúdinis Christi.


Graduale Ps. 44, 17-18 Constítues eos príncipes super omnem terram: mémores erunt nóminis tui, Dómine. V/. Pro pátribus tuis nati sunt tibi fílii: proptérea pópuli confitebúntur tibi.
Allelúja, allelúja. V/. Joann. 14, 9 Tanto témpore vobíscum sum, et non cognovístis me ? Philíppe, qui videt me, videt et Patrem meum. Allelúja.

Post Septuagesimam, omissis Allelúja et Versu sequenti, dicitur

Tractus Ps. 125, 5-6 Qui séminant in lácrimis, in gáudio metent. V/. Eúntes ibant et flebant, mitténtes sémina sua. V/. Veniéntes autem vénient cum exsultatióne, portántes manípulos suos.


Evangelium ut supra.


Offertorium Ps. 18, 5 In omnem terram exívit sonus eórum: et in fines orbis terrae verba eórum.


Secreta


MÚNERA, Dómine, quae pro Apostolórum tuórum Philíppi et Jacóbi commemoratióne deférimus, propítius súscipe: et mala ómnia, quae merémur, avérte. Per Dóminum.


Praefatio de Apostolis.


Communio Joann. 14, 9 et 10 Tanto témpore vobíscum sum, et non cognovístis me ? Philíppe, qui videt me, videt et Patrem meum: non credis, quia ego in Patre, et Pater in me est ?


Postcommunio


QUSUMUS, Dómine, salutáribus repléti mystériis: ut, quorum memóriam celebrámus, eórum oratiónibus adjuvémur. Per Dóminum.



Die 12 Maji

SS. NEREI et ACHILLEI

Martyrum,

DOMITILLAE

Virginis et Martyris,

atque PANCRATII

Martyris


Semiduplex



Introitus Ps. 32, 18, 19 et 20
ECCE óculi Dómini super timéntes eum, sperántes in misericórdia ejus, allelúja: ut erípiat a morte ánimas eórum: quóniam adjútor, et protéctor noster est, allelúja, allelúja. Ps. ibid., 1 Exsultáte, justi, in Dómino: rectos decet collaudátio. V/. Glória Patri.


Oratio


SEMPER nos, Dómine, Mártyrum tuórum Nérei, Achíllei, Domitíllae atque Pancrátii fóveat, quaésumus, beáta solémnitas: et tuo dignos reddat obséquio. Per Dóminum.


Léctio libri Sapiéntiae.

Sap. 5, 1-5


STABUNT justi in magna constántia advérsus eos, qui se angustiavérunt, et qui abstulérunt labóres eórum. Vidéntes turbabúntur timóre horríbili, et mirabúntur in subitatióne insperátae salútis, dicéntes intra se, paeniténtiam agéntes, et prae angústia spíritus geméntes: Hi sunt, quos habúimus aliquándo in derísum et in similitúdinem impropérii. Nos insensáti vitam illórum aestimabámus insániam, et finem illórum sine honóre: ecce quómodo computáti sunt inter fílios Dei, et inter sanctos sors illórum est.


Allelúja, allelúja. V/. Haec est vera fratérnitas, quae vicit mundi crímina: Christum secúta est, ínclita tenens regna caeléstia. Allelúja. V/. Te Mártyrum candidátus laudat exércitus, Dómine. Allelúja.


+ Sequéntia sancti Evangélii secúndum Joánnem.

Joann. 4, 46-53


IN illo témpore: Erat quidam régulus, cujus fílius infirmabátur Caphárnaum. Hic cum audísset, quia Jesus adveníret a Judaéa in Galilaéam, ábiit ad eum, et rogábat eum ut descénderet, et sanáret fílium ejus: incipiébat enim mori. Dixit ergo Jesus ad eum: Nisi signa et prodígia vidéritis, non créditis. Dicit ad eum régulus: Dómine, descénde priúsquam moriátur fílius meus. Dicit ei Jesus: Vade, fílius tuus vivit. Crédidit homo sermóni, quem dixit ei Jesus, et ibat. Jam autem eo descendénte, servi occurrérunt ei, et nuntiavérunt dicéntes, quia fílius ejus víveret. Interrogábat ergo horam ab eis, in qua mélius habúerit. Et dixérunt ei: Quia heri hora séptima relíquit eum febris. Cognóvit ergo pater, quia illa hora erat, in qua dixit ei Jesus: Fílius tuus vivit: et crédidit ipse, et domus ejus tota.


Offertorium Ps. 88, 6 Confitebúntur caeli mirabília tua, Dómine: et veritátem tuam in ecclésia sanctórum, allelúja, allelúja.


Secreta


SANCTÓRUM Mártyrum tuórum, quaésumus, Dómine, Nérei, Achíllei, Domitíllae atque Pancrátii sit tibi grata conféssio: quae et múnera nostra comméndet, et tuam nobis indulgéntiam semper implóret. Per Dóminum.


Communio Ps. 32, 1 Gaudéte, justi, in Dómino, allelúja: rectos decet collaudátio, allelúja.


Postcommunio


QUSUMUS, Dómine, ut beatórum Mártyrum tuórum, Nérei, Achíllei, Domitíllae atque Pancrátii deprecatiónibus, sacraménta sancta, quae súmpsimus, ad tuae nobis profíciant placatiónis augméntum. Per Dóminum.




* Pro votiva e xtra Tempus Paschale dicitur sequens Missa:


Introitus Ps. 36, 39
SALUS autem justórum a Dómino: et protéctor eórum est in témpore tribulatiónis. Ps. ibid., 1 Noli aemulári in malignántibus: neque zeláveris faciéntes iniquitátem. V/. Glória Patri.


Oratio


SEMPER nos, Dómine, Mártyrum tuórum Nérei, Achíllei, Domitíllae atque Pancrátii fóveat, quaésumus, beáta solémnitas: et tuo dignos reddat obséquio. Per Dóminum.


Léctio Epístolae beáti Petri Apóstoli.

1 Petr. 4, 13-19


CARÍSSIMI: Communicántes Christi passiónibus gaudéte, ut et in revelatióne glóriae ejus gaudeátis exsultántes. Si exprobrámini in nómine Christi, beáti éritis: quóniam quod est honóris, glóriae, et virtútis Dei, et qui est ejus Spíritus, super vos requiéscit. Nemo autem vestrum patiátur ut homicída, aut fur, aut malédicus, aut alienórum appetítor. Si autem ut christiánus, non erubéscat: gloríficet autem Deum in isto nómine. Quóniam tempus est, ut incípiat judícium a domo Dei. Si autem primum a nobis: quis finis eórum, qui non credunt Dei Evangélio ? Et si justus vix salvábitur, ímpius et peccátor ubi parébunt ? Itaque et hi, qui patiúntur secúndum voluntátem Dei, fidéli Creatóri comméndent ánimas suas in benefáctis.


Graduale Exodi 15, 11 Gloriósus Deus in sanctis suis: mirábilis in majestáte, fáciens prodígia. V/. Ibid., 6 Déxtera tua, Dómine, glorificáta est in virtúte: déxtera manus tua confrégit inimícos.
Allelúja, allelúja. V/. Haec est vera fratérnitas, quae vicit mundi crímina: Christum secúta est, ínclita tenens regna caeléstia. Allelúja.


Evangelium Erat quidam régulus, ut supra.


Offertorium Ps. 123, 7 Anima nostra sicut passer erépta est de láqueo venántium: láqueus contrítus est, et nos liberáti sumus.


Secreta


SANCTÓRUM Mártyrum tuórum, quaésumus, Dómine, Nérei, Achíllei, Domitíllae atque Pancrátii sit tibi grata conféssio: quae et múnera nostra comméndet, et tuam nobis indulgéntiam semper implóret. Per Dóminum.


Communio Matth. 25, 40 et 34 Amen dico vobis: quod uni ex mínimis meis fecístis, mihi fecístis: veníte, benedícti Patris mei, possidéte parátum vobis regnum ab inítio saéculi.


Postcommunio


QUSUMUS, Dómine, ut beatórum Mártyrum tuórum, Nérei, Achíllei, Domitíllae atque Pancrátii deprecatiónibus, sacraménta sancta, quae súmpsimus, ad tuae nobis profíciant placatiónis augméntum. Per Dóminum.



Missale Romanum 1957 - BEATAE MARIAE VIRGINIS