Missale Romanum 1957 - SS. VITI, MODESTI


Die 18 Junii

S. EPHRAEM SYRI

Diaconi, Confessoris et Ecclesiae Doctoris


Duplex



Missa In médio, de Communi Doctorum, praeter Orationem sequentem, et dicitur Credo.


Oratio
P


DEUS, qui Ecclésiam tuam beáti Ephraem Confessóris tui et Doctóris mira eruditióne et praecláris vitae méritis illustráre voluísti: te súpplices exorámus ; ut, ipso intercedénte, eam advérsus erróris et pravitátis insídias perénni tua virtúte deféndas. Per Dóminum.

Et fit Commemoratio Ss. Marci et Marcelliani Martyrum.

Oratio


PRAESTA, quaésumus, omnípotens Deus: ut, qui sanctórum Mártyrum tuórum Marci et Marcelliáni natalítia cólimus ; a cunctis malis imminéntibus eórum intercessiónibus liberémur. Per Dóminum.


Secreta
C


SANCTI Ephraem Confessóris tui atque Doctóris nobis, Dómine, pia non desit orátio: quae et múnera nostra concíliet ; et tuam nobis indulgéntiam semper obtíneat. Per Dóminum.

Pro Ss. Martyribus

Secreta


MÚNERA tibi, Dómine, dicáta sanctífica: et, intercedéntibus sanctis Martýribus tuis Marco et Marcelliáno, per éadem nos placátus inténde. Per Dóminum.


Postcommunio
C


UT nobis, Dómine, tua sacrifícia dent salútem: beátus Ephraem Conféssor tuus et Doctor egrégius, quaésumus, precátor accédat. Per Dóminum.


Pro Ss. Martyribus

Postcommunio


SALUTÁRIS tui, Dómine, múnere satiáti, súpplices exorámus: ut, cujus laetámur gustu, intercedéntibus sanctis Martýribus tuis Marco et Marcelliáno, renovémur efféctu. Per Dóminum.



Eadem die 18 Junii

Pro SS. MARCO et MARCELLIANO

Martyribus



Introitus Ps. 36, 39
SALUS autem justórum a Dómino: et protéctor eórum est in témpore tribulatiónis. Ps. ibid., 1 Noli aemulári in malignántibus: neque zeláveris faciéntes iniquitátem. V/. Glória Patri.


Oratio


PRAESTA, quaésumus, omnípotens Deus: ut, qui sanctórum Mártyrum tuórum Marci et Marcelliáni natalítia cólimus ; a cunctis malis imminéntibus eórum intercessiónibus liberémur. Per Dóminum.


Léctio Epístolae beáti Pauli Apóstoli ad Romános.

Rom. 5, 1-5


FRATRES: Justificáti ex fide, pacem habeámus ad Deum per Dóminum nostrum Jesum Christum: per quem et habémus accéssum per fidem in grátiam istam, in qua stamus, et gloriámur in spe glóriae filiórum Dei. Non solum autem, sed et gloriámur in tribulatiónibus: sciéntes quod tribulátio patiéntiam operátur, patiéntia autem probatiónem, probátio vero spem, spes autem non confúndit: quia cáritas Dei diffúsa est in córdibus nostris per Spíritum Sanctum, qui datus est nobis.


Graduale Sap. 3, 1-2 et 3 Justórum ánimae in manu Dei sunt, et non tanget illos torméntum malítiae. V/. Visi sunt óculis insipiéntium mori: illi autem sunt in pace.
Allelúja, allelúja. V/. Haec est vera fratérnitas, quae numquam pótuit violári certámine: qui, effúso sánguine, secúti sunt Dóminum. Allelúja.


+ Sequéntia sancti Evangélii secúndum Lucam.

Luc. 11, 47-51


IN illo témpore: Dicébat Jesus scribis et pharisaéis: Vae vobis, qui aedificátis monuménta prophetárum: patres autem vestri occidérunt illos. Profécto testificámini quod consentítis opéribus patrum vestrórum: quóniam ipsi quidem eos occidérunt, vos autem aedificátis eórum sepúlcra. Proptérea et sapiéntia Dei dixit: Mittam ad illos prophétas et apóstolos, et ex illis occídent, et persequéntur: ut inquirátur sanguis ómnium prophetárum, qui effúsus est a constitutióne mundi a generatióne ista, a sánguine Abel usque ad sánguinem Zacharíae, qui périit inter altáre et aedem. Ita dico vobis, requirétur ab hac generatióne.


Offertorium Ps. 123, 7 Anima nostra sicut passer erépta est de láqueo venántium: láqueus contrítus est, et nos liberáti sumus.


Secreta


MÚNERA tibi, Dómine, dicáta sanctífica: et, intercedéntibus sanctis Martýribus tuis Marco et Marcelliáno, per éadem nos placátus inténde. Per Dóminum.


Communio Matth. 25, 40 et 34 Amen dico vobis: quod uni ex mínimis meis fecístis, mihi fecístis: veníte, benedícti Patris mei, possidéte parátum vobis regnum ab inítio saéculi.


Postcommunio


SALUTÁRIS tui, Dómine, múnere satiáti, súpplices exorámus: ut, cujus laetámur gustu, intercedéntibus sanctis Martýribus tuis Marco et Marcelliáno, renovémur efféctu. Per Dóminum.



* Tempore Paschali Missa Sancti tui, de Communi Martyrum 2 loco, cum Orationibus et Evangelio ut in Missa praecedenti ; sed post Epistolam dicitur:

Allelúja, allelúja. V/. Haec est vera fratérnitas, quae numquam pótuit violári certámine: qui, effúso sánguine, secúti sunt Dóminum. Allelúja. V/. Te Mártyrum candidátus laudat exércitus, Dómine. Allelúja.



Die 19 Junii

S. JULIANAE DE FALCONERIIS

Virginis


Duplex



Missa Dilexísti, de Communi Virginum 3 loco, praeter Orationem sequentem.


Oratio
P


DEUS, qui beátam Juliánam Vírginem tuam extrémo morbo laborántem, pretióso Fílii tui córpore mirabíliter recreáre dignátus es: concéde, quaésumus ; ut, ejus intercedéntibus méritis, nos quoque eódem in mortis agóne refécti ac roboráti, ad caeléstem pátriam perducámur. Per eúmdem Dóminum.

Et fit Commemoratio Ss. Gervasii et Protasii Martyrum.

Oratio


DEUS, qui nos ánnua sanctórum Mártyrum tuórum Gervásii et Protásii solemnitáte laetíficas: concéde propítius ; ut, quorum gaudémus méritis, accendámur exémplis. Per Dóminum.

Secreta
C


ACCÉPTA tibi sit, Dómine, sacrátae plebis oblátio pro tuórum honóre Sanctórum: quorum se méritis de tribulatióne percepísse cognóscit auxílium. Per Dóminum.

Pro Ss. Martyribus

Secreta


OBLÁTIS, quaésumus, Dómine, placáre munéribus: et, intercedéntibus sanctis Martýribus tuis, a cunctis nos defénde perículis. Per Dóminum.


Postcommunio
C


SATIÁSTI, Dómine, famíliam tuam munéribus sacris: ejus, quaésumus, semper interventióne nos réfove, cujus solémnia celebrámus. Per Dóminum.

Pro Ss. Martyribus

Postcommunio


HAEC nos commúnio, Dómine, purget a crímine: et, intercedéntibus sanctis Martýribus tuis Gervásio et Protásio, caeléstis remédii fáciat esse consórtes. Per Dóminum.



Eadem die 19 Junii

Pro SS. GERVASIO ET PROTASIO

Martyribus



Introitus Ps. 84, 9
LOQUÉTUR Dóminus pacem in plebem suam: et super sanctos suos, et in eos, qui convertúntur ad ipsum. Ps. ibid., 2 Benedixísti, Dómine, terram tuam, avertísti captivitátem Jacob. V/. Glória Patri.


Oratio


DEUS, qui nos ánnua sanctórum Mártyrum tuórum Gervásii et Protásii solemnitáte laetíficas: concéde propítius ; ut, quorum gaudémus méritis, accendámur exémplis. Per Dóminum.


Léctio Epístolae beáti Petri Apóstoli.

1 Petr. 4, 13-19


CARÍSSIMI: Communicántes Christi passiónibus gaudéte, ut et in revelatióne glóriae ejus gaudeátis exsultántes. Si exprobrámini in nómine Christi, beáti éritis: quóniam quod est honóris, glóriae et virtútis Dei, et qui est ejus Spíritus, super vos requiéscit. Nemo autem vestrum patiátur ut homicída, aut fur, aut malédicus, aut alienórum appetítor. Si autem ut christiánus, non erubéscat: gloríficet autem Deum in isto nómine. Quóniam tempus est, ut incípiat judícium a domo Dei. Si autem primum a nobis: quis finis eórum, qui non credunt Dei Evangélio ? Et si justus vix salvábitur, ímpius et peccátor ubi parébunt ? Itaque et hi, qui patiúntur secúndum voluntátem Dei, fidéli Creatóri comméndent ánimas suas in benefáctis.


Graduale Exodi 15, 11 Gloriósus Deus in sanctis suis: mirábilis in majestáte, fáciens prodígia. V/. Ibid., 6 Déxtera tua, Dómine, glorificáta est in virtúte: déxtera manus tua confrégit inimícos.
Allelúja, allelúja. V/. Haec est vera fratérnitas, quae vicit mundi crímina: Christum secúta est, ínclita tenens regna caeléstia. Allelúja.


+ Sequéntia sancti Evangélii secúndum Lucam.

Luc. 6, 17-23


IN illo témpore: Descéndens Jesus de monte, stetit in loco campéstri, et turba discipulórum ejus, et multitúdo copiósa plebis ab omni Judaéa, et Jerúsalem, et marítima, et Tyri, et Sidónis, qui vénerant ut audírent eum, et sanaréntur a languóribus suis. Et qui vexabántur a spirítibus immúndis, curabántur. Et omnis turba quaerébat eum tángere: quia virtus de illo exíbat, et sanábat omnes. Et ipse elevátis óculis in discípulos suos, dicébat: Beáti páuperes: quia vestrum est regnum Dei. Beáti, qui nunc esurítis: quia saturabímini. Beáti, qui nunc fletis: quia ridébitis. Beáti éritis cum vos óderint hómines, et cum separáverint vos, et exprobráverint, et ejécerint nomen vestrum tamquam malum propter Fílium hóminis. Gaudéte in illa die, et exsultáte: ecce enim merc es vestra multa est in caelo.


Offertorium Ps. 31, 11 Laetámini in Dómino, et exsultáte, justi: et gloriámini, omnes recti corde.


Secreta


OBLÁTIS, quaésumus, Dómine, placáre munéribus: et, intercedéntibus sanctis Martýribus tuis, a cunctis nos defénde perículis. Per Dóminum.


Communio Ps. 78, 2 et 11 Posuérunt mortália servórum tuórum, Dómine, escas volatílibus caeli, carnes sanctórum tuórum béstiis terrae: secúndum magnitúdinem bráchii tui pósside fílios morte punitórum.


Postcommunio


HAEC nos commúnio, Dómine, purget a crímine: et, intercedéntibus sanctis Martýribus tuis Gervásio et Protásio, caeléstis remédii fáciat esse consórtes. Per Dóminum.



* Tempore Paschali Missa Sancti tui, de Communi Martyrum 2 loco, cum Orationibus ut in Missa praecedenti ; sed post Epistolam dicitur:

Allelúja, allelúja. V/. Haec est vera fratérnitas, quae vicit mundi crímina: Christum secúta est, ínclita tenens regna caeléstia. Allelúja. V/. Te Mártyrum candidátus laudat exércitus, Dómine. Allelúja.



Die 20 Junii

S. SILVERII

Papae et Martyris


Simplex



Missa Si díligis me, de Communi Summorum Pontificum.


Oratio
C


GREGEM tuum, Pastor aetérne, placátus inténde: et per beátum Silvérium Mártyrem tuum atque Summum Pontíficem, perpétua protectióne custódi ; quem totíus Ecclésiae praestitísti esse pastórem. Per Dóminum.


Secreta
C


OBLÁTIS munéribus, quaésumus, Dómine, Ecclésiam tuam benígnus illúmina: ut, et gregis tui profíciat ubíque succéssus, et grati fiant nómini tuo, te gubernánte, pastóres. Per Dóminum.


Postcommunio
C


REFECTIÓNE sancta enutrítam gubérna, quaésumus, Dómine, tuam placátus Ecclésiam: ut poténti moderatióne dirécta, et increménta libertátis accípiat, et in religiónis integritáte persístat. Per Dóminum.



Die 21 Junii

S. ALOISII GONZAGAE

Confessoris


Duplex



Introitus Ps. 8, 6
MINUÍSTI eum paulo minus ab Angelis: glória et honóre coronásti eum. Ps. 148, 2 Laudáte Dóminum, omnes Angeli ejus: laudáte eum, omnes virtútes ejus. V/. Glória Patri.


Oratio


CAELÉSTIUM donórum distribútor, Deus, qui in angélico júvene Aloísio miram vitae innocéntiam pari cum paeniténtia sociásti: ejus méritis et précibus concéde ; ut, innocéntem non secúti, paeniténtem imitémur. Per Dóminum.


Léctio libri Sapiéntiae.

Eccli. 31, 8-11


BEÁTUS vir, qui invéntus est sine mácula: et qui post aurum non ábiit, nec sperávit in pecúnia et thesáuris. Quis est hic, et laudábimus eum ? fecit enim mirabília in vita sua. Qui probátus est in illo, et perféctus est, erit illi glória aetérna: qui pótuit tránsgredi, et non est transgréssus: fácere mala, et non fecit: ídeo stabilíta sunt bona illíus in Dómino.


Graduale Ps. 70, 5-6 Dómine, spes mea a juventúte mea: in te confirmátus sum ex útero: de ventre matris meae tu es protéctor meus. V/. Ps. 40, 13 Me autem propter innocéntiam suscepísti: et confirmásti me in conspéctu tuo in aetérnum.
Allelúja, allelúja. V/. Ps. 64, 5 Beátus quem elegísti, et assumpsísti: inhabitábit in átriis tuis. Allelúja.



In Missis votivis Tempore Paschali omittitur Graduale, et ejus loco dicitur:

Allelúja, allelúja. V/. Ps. 64, 5 Beátus quem elegísti, et assumpsísti: inhabitábit in átriis tuis. Allelúja. V/. Ps. 70, 18 Deus, docuísti me a juventúte mea: et usque nunc pronuntiábo mirabília tua. Allelúja.



+ Sequéntia sancti Evangélii secúndum Matthaéum.

Matth. 22, 29-40


IN illo témpore: Respóndens Jesus, ait sadducaéis: Errátis, nesciéntes Scriptúras, neque virtútem Dei. In resurrectióne enim neque nubent, neque nubéntur: sed erunt sicut Angeli Dei in caelo. De resurrectióne autem mortuórum non legístis quod dictum est a Deo dicénte vobis: Ego sum Deus Abraham, et Deus Isaac, et Deus Jacob ? Non est Deus mortuórum, sed vivéntium. Et audiéntes turbae, mirabántur in doctrína ejus. Pharisaéi autem audiéntes quod siléntium inposuísset sadducaéis, convenérunt in unum: et interrogávit eum unus ex eis legis doctor, tentans eum: Magíster, quod est mandátum magnum in lege ? Ait illi Jesus: Díliges Dóminum Deum tuum ex toto corde tuo, et in tota ánima tua, et in tota mente tua. Hoc est máximum et primum mandátum. Secúndum autem símile est huic: Díliges próximum tuum, sicut teípsum. In his duóbus mandátis univérsa lex pendet, et prophétae.


Offertorium Ps. 23, 3-4 Quis ascéndet in montem Dómini, aut quis stabit in loco sancto ejus ? Innocens mánibus, et mundo corde.


Secreta


CAELÉSTI convívio fac nos, Dómine, nuptiáli veste indútos accúmbere: quam beáti Aloísii pia praeparátio, et juges lácrimae inaestimabílibus ornábant margarítis. Per Dóminum.


Communio Ps. 77, 24-25 Panem caeli dedit eis: panem Angelórum manducávit homo.


Postcommunio


ANGELÓRUM esca nutrítos, angélicis étiam, Dómine, da móribus vívere: et ejus, quem hódie cólimus, exémplo, in gratiárum semper actióne manére. Per Dóminum nostrum.



Die 22 Junii

S. PAULINI

Episcopi et Confessoris


Duplex



Introitus Ps. 131, 9-10
SACERDÓTES tui, Dómine, índuant justítiam, et sancti tui exsúltent: propter David servum tuum, non avértas fáciem Christi tui. Ps. ibid., 1 Meménto, Dómine, David: et omnis mansuetúdinis ejus. V/. Glória Patri.


Oratio


DEUS, qui ómnia pro te in hoc saéculo relinquéntibus, céntuplum in futúro et vitam aetérnam promisísti: concéde propítius ; ut, sancti Pontíficis Paulíni vestígiis inhaeréntes, valeámus terréna despícere, et sola caeléstia desideráre: Qui vivis.


Léctio Epístolae beáti Pauli Apóstoli ad Corínthios.

2 Cor. 8, 9-15


FRATRES: Scitis grátiam Dómini nostri Jesu Christi, quóniam propter vos egénus factus est, cum esset dives, ut illíus inópia vos dívites essétis. Et consílium in hoc do: hoc enim vobis útile est, qui non solum fácere, sed et velle coepístis ab anno prióre: nunc vero et facto perfícite: ut quemádmodum promptus est ánimus voluntátis, ita sit et perficiéndi ex eo quod habétis. Si enim volúntas prompta est, secúndum id quod habet, accépta est, non secúndum id quod non habet. Non enim ut áliis sit remíssio, vobis autem tribulátio, sed ex aequalitáte. In praesénti témpore vestra abundántia illórum inópiam súppleat: ut et illórum abundántia vestrae inópiae sit suppleméntum, ut fiat aequálitas, sicut scriptum est: Qui multum, non abundávit: et qui módicum, non minorávit.


Graduale Eccli. 44, 16 Ecce sacérdos magnus, qui in diébus suis plácuit Deo. V/. Ibid., 20 Non est invéntus símilis illi, qui conserváret legem Excélsi.
Allelúja, allelúja. V/. Ps. 109, 4 Tu es sacérdos in aetérnum, secúndum órdinem Melchísedech. Allelúja.


+ Sequéntia sancti Evangélii secúndum Lucam.

Luc. 12, 32-34


IN illo témpore: Dixit Jesus discípulis suis: Nolíte timére, pusíllus grex, quia complácuit Patri vestro dare vobis regnum. Véndite quae possidétis, et date eleemósynam. Fácite vobis sácculos, qui non veteráscunt, thesáurum non deficiéntem in caelis: quo fur non apprópiat, neque tínea corrúmpit. Ubi enim thesáurus vester est, ibi et cor vestrum erit.


Offertorium Ps. 88, 21-22 Invéni David servum meum, óleo sancto meo unxi eum: manus enim mea auxiliábitur ei, et bráchium meum confortábit eum.


Secreta


DA nobis, Dómine, perféctae caritátis sacrifícium, exémplo sancti Pontíficis Paulíni, cum altáris oblatióne conjúngere: et beneficéntiae stúdio sempitérnam misericórdiam promeréri. Per Dóminum.


Communio Luc. 12, 42 Fidélis servus et prudens, quem constítuit dóminus super famíliam suam: ut det illis in témpore trítici mensúram.


Postcommunio


TRÍBUE nobis per haec sancta, Dómine, illum pietátis et humilitátis afféctum, quem ex hoc divíno fonte hausit sanctus Póntifex tuus Paulínus: et, ipsíus intercessióne, in omnes, qui te deprecántur, grátiae tuae divítias benígnus effúnde. Per Dóminum.


* Si hodie fuerit Sabbatum, in Missis non conventualibus fit Commemoratio Vigiliae anticipatae S. Joannis Baptistae, ut die sequenti habetur, et de ea legitur Evangelium in fine, juxta Rubricas.
* Si hodie fuerit Sabbatum, ubi adest obligatio Chori, lecta post Tertiam extra Chorum Missa de Festo sine Commemoratione Vigiliae, in Choro post Nonam dicitur Missa de Vigilia sine Commemoratione Festi, ut die sequenti notatur ; et de Vigilia item legi possunt Missae privatae, cum 2a tamen Oratione Festi.



Die 23 Junii

IN VIGILIA

NATIVITATIS S. JOANNIS BAPTISTAE

Simplex




Introitus Luc. 1, 13, 15 et 14
NE tímeas, Zacharía, exaudíta est orátio tua: et Elísabeth uxor tua páriet tibi fílium, et vocábis nomen ejus Joánnem: et erit magnus coram Dómino: et Spíritu Sancto replébitur adhuc ex útero matris suae: et multi in nativitáte ejus gaudébunt. Ps. 20, 2 Dómine, in virtúte tua laetábitur rex: et super salutáre tuum exsultábit veheménter. V/. Glória Patri.


Non dicitur Glória in excélsis.


Oratio


PRAESTA, quaésumus, omnípotens Deus: ut família tua per viam salútis incédat ; et, beáti Joánnis Praecursóris hortaménta sectándo, ad eum quem praedíxit, secúra pervéniat, Dóminum nostrum Jesum Christum Fílium tuum: Qui tecum vivit.

2a Oratio de S. Maria Concéde, 3a contra persecutores Ecclesiae vel pro Papa.


Léctio Jeremíae Prophétae.

Jerem. 1, 4-10


IN diébus illis: Factum est verbum Dómini ad me, dicens: Priúsquam te formárem in útero, novi te: et ántequam exíres de vulva, sanctificávi te, et prophétam in géntibus dedi te. Et dixi: A a a, Dómine Deus: ecce néscio loqui, quia puer ego sum. Et dixit Dóminus ad me: Noli dícere: Puer sum: quóniam ad ómnia, quae mittam te, ibis: et univérsa, quaecúmque mandávero tibi, loquéris. Ne tímeas a fácie eórum: quia tecum ego sum, ut éruam te, dicit Dóminus. Et misit Dóminus manum suam, et tétigit os meum: et dixit Dóminus ad me: Ecce dedi verba mea in ore tuo: ecce constítui te hódie super gentes, et super regna, ut evéllas et déstruas, et dispérdas, et díssipes, et aedífices, et plantes: dicit Dóminus omnípotens.


Graduale Joann. 1, 6-7 Fuit homo missus a Deo, cui nomen erat Joánnes. V/. Hic venit ut testimónium perhibéret de lúmine, paráre Dómino plebem perféctam.


+ Sequéntia sancti Evangélii secúndum Lucam.

Luc. 1, 5-17


FUIT in diébus Heródis, regis Judaéae, sacérdos quidam nómine Zacharías, de vice Abía, et uxor illíus de filiábus Aaron, et nomen ejus Elísabeth. Erant autem justi ambo ante Deum, incedéntes in ómnibus mandátis, et justificatiónibus Dómini sine queréla, et non erat illis fílius, eo quod esset Elísabeth stérilis, et ambo processíssent in diébus suis. Factum est autem, cum sacerdótio fungerétur in órdine vicis suae ante Deum, secúndum consuetúdinem sacerdótii, sorte éxiit ut incénsum póneret, ingréssus in templum Dómini: et omnis multitúdo pópuli erat orans foris hora incénsi. Appáruit autem illi Angelus Dómini, stans a dextris altáris incénsi. Et Zacharías turbátus est videns, et timor írruit super eum. Ait autem ad illum Angelus: Ne tímeas, Zacharía, quóniam exaudíta est deprecátio tua: et uxor tua Elísabeth páriet tibi fílium, et vocábis nomen ejus Joánnem: et erit gáudium tibi, et exsultátio, et multi in nativitáte ejus gaudébunt: erit enim magnus coram Dómino: et vinum, et síceram non bibet, et Spíritu Sancto replébitur adhuc ex útero matris suae: et multos filiórum Israël convértet ad Dóminum Deum ipsórum ; et ipse praecédet ante illum in spíritu et virtúte Elíae: ut convértat corda patrum in fílios, et incrédulos ad prudéntiam justórum, paráre Dómino plebem perféctam.


Offertorium Ps. 8, 6-7 Glória et honóre coronásti eum: et constituísti eum super ópera mánuum tuárum, Dómine.


Secreta


MÚNERA, Dómine, obláta sanctífica: et, intercedénte beáto Joánne Baptísta, nos per haec a peccatórum nostrórum máculis emúnda. Per Dóminum.


Communio Ps. 20, 6 Magna est glória ejus in salutári tuo: glóriam et magnum decórem impónes super eum, Dómine.


Postcommunio


BEÁTI Joánnis Baptístae nos, Dómine, praeclára comitétur orátio: et quem ventúrum esse praedíxit, poscat nobis fore placátum, Dóminum nostrum Jesum Christum Fílium tuum: Qui tecum vivit.



Die 24 Junii

IN NATIVITATE

S. JOANNIS BAPTISTAE

Duplex I classis cum Octava communi



Introitus Isai. 49, 1 et 2
DE ventre matris meae vocávit me Dóminus nómine meo: et pósuit os meum ut gládium acútum: sub teguménto manus suae protéxit me, et pósuit me quasi sagíttam eléctam. Ps. 91, 2 Bonum est confitéri Dómino: et psállere nómini tuo, Altíssime. V/. Glória Patri.


Oratio


DEUS, qui praeséntem diem honorábilem nobis in beáti Joánnis nativitáte fecísti: da pópulis tuis spirituálium grátiam gaudiórum ; et ómnium fidélibum mentes dírige in viam salútis aetérnae. Per Dóminum.


Léctio Isaíae Prophétae.

Isai. 49, 1-3, 5, 6 et 7


AUDÍTE ínsulae, et atténdite pópuli de longe: Dóminus ab útero vocávit me, de ventre matris meae recordátus est nóminis mei. Et pósuit os meum quasi gládium acútum: in umbra manus suae protéxit me, et pósuit me sicut sagíttam eléctam: in pháretra sua abscóndit me. Et dixit mihi: Servus meus es tu, Israël, quia in te gloriábor. Et nunc dicit Dóminus, formans me ex útero servum sibi: Ecce dedi te in lucem géntium, ut sis salus mea usque ad extrémum terrae. Reges vidébunt, et consúrgent príncipes, et adorábunt propter Dóminum, et sanctum Israël, qui elégit te.


Graduale Jerem. 1, 5 et 9 Priúsquam te formárem in útero, novi te: et ántequam exíres de ventre, sanctificávi te. V/. Misit Dóminus manum suam, et tétigit os meum, et dixit mihi.
Allelúja, allelúja. V/. Luc. 1, 76 Tu, puer, prophéta Altíssimi vocáberis: praeíbis ante Dóminum paráre vias ejus. Allelúja.


+ Sequéntia sancti Evangélii secúndum Lucam.

Luc. 1, 57-68


ELÍSABETH implétum est tempus pariéndi, et péperit fílium. Et audiérunt vicíni et cognáti ejus, quia magnificávit Dóminus misericórdiam suam cum illa, et congratulabántur ei. Et factum est in die octávo, venérunt circumcídere púerum, et vocábant eum nómine patris sui Zacharíam. Et respóndens mater ejus, dixit: Nequáquam, sed vocábitur Joánnes. Et dixérunt ad illam: Quia nemo est in cognatióne tua, qui vocétur hoc nómine. Innuébant autem patri ejus, quem vellet vocári eum. Et póstulans pugillárem, scripsit, dicens: Joánnes est nomen ejus. Et miráti sunt univérsi. Apértum est autem íllico os ejus, et lingua ejus, et loquebátur benedícens Deum. Et factus est timor super omnes vicínos eórum: et super ómnia montána Judaéae divulgabántur ómnia verba haec: et posuérunt omnes, qui audíerant, in corde suo, dicéntes: Quis, putas, puer iste erit ? Etenim manus Dómini erat cum illo. Et Zacharías pater ejus replétus est Spíritu Sancto, et prophetávit, dicens: Benedíctus Dóminus Deus Israël, quia visitávit, et fecit redemptiónem plebis suae.


Offertorium Ps. 91, 13 Justus ut palma florébit: sicut cedrus, quae in Líbano est, multiplicábitur.


Secreta


TUA, Dómine, munéribus altária cumulámus: illíus nativitátem honóre débito celebrántes, qui Salvatórem mundi et cécinit adfutúrum, et adésse monstrávit, Dóminum nostrum Jesum Christum Fílium tuum: Qui tecum.


Communio Luc. 1, 76 Tu, puer, prophéta Altíssimi vocáberis: praeíbis enim ante fáciem Dómini paráre vias ejus.


Postcommunio


SUMAT Ecclésia tua, Deus, beáti Joánnis Baptístae generatióne laetítiam: per quem suae regeneratiónis cognóvit auctórem, Dóminum nostrum Jesum Christum Fílium tuum: Qui tecum vivit.




* In Missis votivis omnia dicuntur ut supra, cum Orationibus tamen de Vigilia ; et post Septuagesimam, omissis Allelúja, et Versu sequenti, dicitur Tractus Desidérium ex Missa Státuit, de Communi unius Martyris 1 loco.
Tempore autem Paschali omittitur Graduale, et ejus loco dicitur:


Allelúja, allelúja. V/. Luc. 1, 76 Tu, puer, prophéta Altíssimi vocáberis: praeíbis ante Dóminum paráre vias ejus. Allelúja. V/. Osee 14, 6 Justus germinábit sicut lílium: et florébit in aetérnum ante Dóminum. Allelúja.


* Infra Octavam Missa dicitur ut in Festo ; et pro Orationibus ju xta diversitatem Temporum assignatis, dicitur 2a Oratio de sancta Maria Concéde, et 3a contra persecutores Ecclesiae vel pro Papa.



Die 25 Junii

S. GULIELMI

Abbatis


Duplex



Missa Os justi, de Communi Abbatum, praeter Orationem sequentem.


Oratio
P


DEUS, qui infirmitáti nostrae ad teréndam salútis viam in Sanctis tuis exémplum et praesídium collocásti: da nobis, ita beáti Guliélmi Abbátis mérita venerári ; ut ejúsdem excipiámus suffrágia, et vestígia prosequámur. Per Dóminum.

Et fit Commemoratio Octavae.


Secreta
C


SACRIS altáribus, Dómine, hóstias superpósitas sanctus Guliélmus Abbas, quaésumus, in salútem nobis proveníre depóscat. Per Dóminum.


Postcommunio
C


PRÓTEGAT nos, Dómine, cum tui perceptióne sacraménti beátus Guliélmus Abbas, pro nobis intercedéndo: ut et conversatiónis ejus experiámur insígnia, et intercessiónis percipiámus suffrágia. Per Dóminum.



Die 26 Junii

SS. JOANNIS et PAULI

Martyrum


Duplex



Introitus Ps. 33, 20-21
MULTAE tribulatiónes justórum, et de his ómnibus liberávit eos Dóminus: Dóminus custódit ómnia ossa eórum: unum ex his non conterétur. Ps. ibid., 2 Benedícam Dóminum in omni témpore: semper laus ejus in ore meo. V/. Glória Patri.


Oratio


QUSUMUS, omnípotens Deus: ut nos gemináta laetítia hodiérna festivitátis excípiat, quae de beatórum Joánnis et Pauli glorificatióne procédit ; quos éadem fides et pássio vere fecit esse germános. Per Dóminum.

Et fit Commemoratio Octavae.


Léctio libri Sapiéntiae.

Eccli. 44, 10-15


HI viri misericórdiae sunt, quorum pietátes non defuérunt: cum sémine eórum pérmanent bona, heréditas sancta nepótes eórum, et in testaméntis stetit semen eórum: et fílii eórum propter illos usque in aetérnum manent: semen eórum et glória eórum non derelinquétur. Córpora ipsórum in pace sepúlta sunt, et nomen eórum vivit in generatiónem et generatiónem. Sapiéntiam ipsórum narrent pópuli, et laudem eórum núntiet Ecclésia.


Graduale Ps. 132, 1-2 Ecce quam bonum, et quam jucúndum, habitáre fratres in unum ! V/. Sicut unguéntum in cápite, quod descéndit in barbam, barbam Aaron.
Allelúja, allelúja. V/. Haec est vera fratérnitas, quae vicit mundi crímina: Christum secúta est, ínclita tenens regna caeléstia. Allelúja.


+ Sequéntia sancti Evangélii secúndum Lucam.

Luc. 12, 1-8


IN illo témpore: Dixit Jesus discípulis suis: Atténdite a ferménto pharisaeórum, quod est hypócrisis. Nihil autem opértum est, quod non revelétur: neque abscónditum, quod non sciátur. Quóniam, quae in ténebris dixístis, in lúmine dicéntur: et quod in aurem locúti estis in cubículis, praedicábitur in tectis. Dico autem vobis amícis meis: Ne terreámini ab his qui occídunt corpus, et post haec non habent ámplius quid fáciant. Osténdam autem vobis quem timeátis: timéte eum, qui, postquam occíderit, habet potestátem míttere in gehénnam. Ita dico vobis, hunc timéte. Nonne quinque pásseres véneunt dipóndio, et unus ex illis non est in oblivióne coram Deo ? Sed et capílli cápitis vestri omnes numeráti sunt. Nolíte ergo timére: multis passéribus pluris estis vos. Dico autem vobis: Omnis, quicúmque conféssus fúerit me coram homínibus, et Fílius hóminis confitébitur illum coram Angelis Dei.


Offertorium Ps. 5, 12-13 Gloriabúntur in te omnes, qui díligunt nomen tuum: quóniam tu, Dómine, benedíces justo: Dómine, ut scuto bonae voluntátis tuae coronásti nos.


Secreta


HÓSTIAS tibi, Dómine, sanctórum Mártyrum tuórum Joánnis et Pauli dicátas méritis, benígnus assúme: et ad perpétuum nobis tríbue proveníre subsídium. Per Dóminum.


Communio Sap. 3, 4, 5 et 6 Et si coram homínibus torménta passi sunt, Deus tentávit eos: tamquam aurum in fornáce probávit eos, et quasi holocáusta accépit eos.


Postcommunio


SÚMPSIMUS, Dómine, sanctórum Mártyrum tuórum Joánnis et Pauli solémnia celebrántes, sacraménta caeléstia: praesta, quaésumus ; ut, quod temporáliter gérimus, aetérnis gáudiis consequámur. Per Dóminum.



Die 27 Junii


* Si hodie fuerit Sabbatum, Missa dicitur de Vigilia anticipata Ss. Petri et Pauli Apostolorum, cum Commemoratione Octavae, et 3a Oratione de sancta Maria Concéde. Missae vero privatae dici possunt etiam de Octava, cum Commemoratione et ultimo Evangelio Vigiliae, et 3a Oratione pariter Concéde.



Die 28 Junii

S. IRENAEI

Episcopi et Martyris


Duplex



Introitus Malach. 2, 6
LEX veritátis fuit in ore ejus, et iníquitas non est invénta in lábiis ejus: in pace et in aequitáte ambulávit mecum, et multos avértit ab iniquitáte. Ps. 77, 1 Atténdite, pópule meus, legem meam: inclináte aurem vestram in verba oris mei. V/. Glória Patri.


Oratio


DEUS, qui beáto Irenaéo Mártyri tuo atque Pontífici tribuísti, ut et veritáte doctrínae expugnáret haéreses, et pacem Ecclésiae felíciter confirmáret: da, quaésumus, plebi tuae in sancta religióne constántiam ; et pacem tuam nostris concéde tempóribus. Per Dóminum.

Et fit Commemoratio Octavae.
Deinde, in Missis non conventualibus, Commemoratio Vigiliae Ss. Petri et Pauli Apostolorum juxta Rubricas.

PRAESTA, quaésumus, omnípotens Deus: ut nullis nos permíttas perturbatiónibus cóncuti: quos in apostólicae confessiónis petra solidásti. Per Dóminum.


Léctio Epístolae beáti Pauli Apóstoli ad Timótheum.

2 Tim. 3, 14-17 ; 4, 1-5


CARÍSSIME: Pérmane in iis, quae didicísti, et crédita sunt tibi: sciens a quo didíceris: et quia ab infántia sacras lítteras nosti, quae te possunt instrúere ad salútem, per fidem, quae est in Christo Jesu. Omnis Scriptúra divínitus inspiráta útilis est ad docéndum, ad arguéndum, ad corripiéndum, ad erudiéndum in justítia: ut perféctus sit homo Dei, ad omne opus bonum instrúctus. Testíficor coram Deo, et Jesu Christo, qui judicatúrus est vivos et mórtuos, per advéntum ipsíus, et regnum ejus: praédica verbum, insta opportúne, importúne: árgue, óbsecra, íncrepa in omni patiéntia, et doctrína. Erit enim tempus, cum sanam doctrínam non sustinébunt, sed ad sua desidéria coacervábunt sibi magístros, pruriéntes áuribus, et a veritáte quidem audítum avértent, ad fábulas autem converténtur. Tu vero vígila, in ómnibus labóra, opus fac Evangelístae, ministérium tuum imple.


Graduale Ps. 121, 8 Propter fratres meos, et próximos meos loquébar pacem de te. V/. Ps. 36, 37 Custódi innocéntiam, et vide aequitátem: quóniam sunt relíquiae hómini pacífico.
Allelúja, allelúja. V/. Eccli. 6, 35 In multitúdine presbytórum prudéntium sta, et sapiéntiae illórum ex corde conjúngere, ut omnem narratiónem Dei possis audíre. Allelúja.



In Missis votivis post Septuagesimam, omissis Allelúja et Versu sequenti, dicitur

Tractus Ps. 36, 23 et 30-31 Apud Dóminum gressus hóminis dirigéntur: et viam ejus volet. V/. Os justi meditábitur sapiéntiam, et lingua ejus loquétur judícium. V/. Lex Dei ejus in corde ipsíus: et non supplantabúntur gressus ejus.

Tempore autem Paschali, omittitur Graduale, et ejus loco dicitur:

Allelúja, allelúja. V/. Ps. 36, 37 Custódi innocéntiam, et vide aequitátem: quóniam sunt relíquiae hómini pacífico. Allelúja. V/. Eccli. 6, 35 In multitúdine presbytórum prudéntium sta, et sapiéntiae illórum ex corde conjúngere, ut omnem narratiónem Dei possis audíre. Allelúja.



+ Sequéntia sancti Evangélii secúndum Matthaéum.

Matth. 10, 28-33


IN illo témpore: Dixit Jesus discípulis suis: Nolíte timére eos, qui occídunt corpus, ánimam autem non possunt occídere ; sed pótius timéte eum, qui potest et ánimam et corpus pérdere in gehénnam. Nonne duo pásseres asse véneunt: et unus ex illis non cadet super terram sine Patre vestro ? Vestri autem capílli cápitis omnes numeráti sunt. Nolíte ergo timére: multis passéribus melióres estis vos. Omnis ergo, qui confitébitur me coram homínibus, confitébor et ego eum coram Patre meo, qui in caelis est. Qui autem negáverit me coram homínibus, negábo et ego eum coram Patre meo, qui in caelis est.


Offertorium Eccli. 24, 44 Doctrínam quasi antelucánum illúmino ómnibus, et enarrábo illam usque ad longínquum.


Secreta


DEUS, qui credéntes in te pópulos nullis sinis cóncuti terróribus: dignáre preces et hóstias dicátae tibi plebis suscípere ; ut pax a tua pietáte concéssa, christianórum fines ab omni hoste fáciat esse secúros. Per Dóminum.

Pro Vigilia Ss. Apostolorum, in Missis non conventualibus.

Secreta


MUNUS pópuli tui, quaésumus, Dómine, apostólica intercessióne sanctífica: nosque a peccatórum nostrórum máculis emúnda. Per Dóminum.


Communio Eccli. 24, 47 Vidéte quóniam non soli mihi laborávi, sed ómnibus exquiréntibus veritátem.


Postcommunio


DEUS, auctor pacis et amátor, quem nosse, vívere, cui servíre, regnáre est: prótege ab ómnibus impugnatiónibus súpplices tuos ; ut, qui in defensióne tua confídimus, beáti Irenaéi Mártyris tui atque Pontíficis intercessióne, nullíus hostilitátis arma timeámus. Per Dóminum.


Pro Vigilia Ss. Apostolorum, in Missis non conventualibus.

Postcommunio


QUOS caelésti, Dómine, aliménto satiásti: apostólicis intercessiónibus ab omni adversitáte custódi. Per Dóminum.


Et in fine Missae, non tamen conventualis, legitur Evangelium Vigiliae, ut infra ; de qua dici possunt Missae privatae, juxta Rubricas.
* Ubi adest obligatio Chori, lecta post Tertiam extra Chorum Missa conventuali de Festo sine Commemoratione Vigiliae, ut supra, in Choro post Nonam dicitur Missa de ipsa Vigilia sine Commemoratione Festi et Octavae, ut infra notatur.



Missale Romanum 1957 - SS. VITI, MODESTI