Missale Romanum 1957 - PURITATIS B. MARIAE VIRGINIS


MISSAE PRO ALIQUIBUS LOCIS

Die 23 Octobris

SANCTISSIMI REDEMPTORIS


Introitus Isai. 61, 10
GAUDENS gaudébo in Dómino, et exsultábit ánima mea in Deo meo: quia índuit me vestiméntis salútis: et induménto justítiae circúmdedit me. Ps. 88, 2 Misericórdias Dómini in aetérnum cantábo: in generatiónem et generatiónem annuntiábo veritátem tuam in ore meo. V/. Glória Patri.


Oratio


DEUS, qui Unigénitum tuum mundi Redemptórem constituísti, et per eum, devícta morte, nos misericórditer ad vitam reparásti: concéde ; ut, haec benefícia recoléntes, tibi perpétua caritáte adhaerére et ejúsdem redemptiónis fructum percípere mereámur. Per eúmdem Dóminum nostrum.


Léctio Epístolae beáti Pauli Apóstoli ad Ephésios.

Ephes. 1, 3-9


BENEDÍCTUS Deus et Pater Dómini nostri Jesu Christi, qui benedíxit nos in omni benedictióne spirituáli in caeléstibus in Christo, sicut elégit nos in ipso ante mundi constitutiónem, ut essémus sancti et immaculáti in conspéctu ejus in caritáte. Qui praedestinávit nos in adoptiónem filiórum per Jesum Christum in ipsum: secúndum propósitum voluntátis suae, in laudem glóriae grátiae suae, in qua gratificávit nos in dilécto Fílio suo. In quo habémus redemptiónem per sánguinem ejus, remissiónem peccatórum secúndum divítias grátiae ejus, quae superabundávit in nobis in omni sapiéntia, et prudéntia: ut notum fáceret nobis sacraméntum voluntátis suae, secúndum beneplácitum ejus, quod propósuit in eo.


Graduale Ps. 85, 9-10 Omnes gentes, quascúmque fecísti, vénient, et adorábunt coram te, Dómine: et glorificábunt nomen tuum. V/. Quóniam magnus es tu, et fáciens mirabília: tu es Deus solus.
Allelúja , allelúja. V/. Ps. 73, 12 Deus autem Rex noster ante saécula: operátus est salútem in médio terrae. Allelúja.



Post Septuagesimam, omissis Allelúja et Versu sequenti, dicitur

Tractus Isai. 53, 4-5 Vere languóres nostros ipse tulit, et dolóres nostros ipse portávit. V/. Et nos putávimus eum quasi leprósum, et percússum a Deo, et humiliátum. V/. Ipse autem vulnerátus est propter iniquitátes nostras, attrítus est propter scélera nostra. V/. Disciplína pacis nostrae super eum: et livóre ejus sanáti sumus.

Tempore autem Paschali omittitur Graduale, et ejus loco dicitur:


Allelúja, allelúja. V/. Ave, Rex noster: tu solus nostros es miserátus erróres: Patri obédiens, ductus es ad crucifigéndum, ut agnus mansuétus ad occisiónem. Allelúja. V/. Tibi glória, hosánna: tibi triúmphus et victória: tibi summae laudis et honóris coróna. Allelúja.



+ Sequéntia sancti Evangélii secúndum Joánnem.

Joann. 3, 13-18


IN illo témpore: Dixit Jesus Nicodémo: Nemo ascéndit in caelum, nisi qui descéndit de caelo, Fílius hóminis, qui est in caelo. Et sicut Móyses exaltávit serpéntem in desérto ; ita exaltári opórtet Fílium hóminis: ut omnis, qui credit in ipsum, non péreat, sed hábeat vitam aetérnam. Sic enim Deus diléxit mundum, ut Fílium suum unigénitum daret: ut omnis, qui credit in eum, non péreat, sed hábeat vitam aetérnam. Non enim misit Deus Fílium suum in mundum, ut júdicet mundum, sed ut salvétur mundus per ipsum. Qui credit in eum, non judicátur ; qui autem non credit, jam judicátus est: quia non credit in nómine unigéniti Fílii Dei.


Credo.


Offertorium Salus pópuli ego sum, dicit Dóminus: de quacúmque tribulatióne clamáverint ad me, exáudiam eos: et ero illórum Deus in perpétuum, (allelúja).


Secreta


SÚSCIPE, quaésumus, Dómine, oblátum redemptiónis aetérnae mystérium: et praesta ; ut, unigéniti Fílii tui gloriósis méritis intercedéntibus, vivíficet nos semper, et múniat. Per eúmdem Dóminum.


Praefatio de Cruce.


Communio Ps. 106, 8 Confiteántur Dómino misericórdiae ejus, et mirabília ejus fíliis hóminum, (allelúja).


Postcommunio


CÓRPORIS tui sacri, ac pretiósi sánguinis, quo redémpti sumus, Dómine Jesu Christe, partícipes effécti: quaésumus ; ut in nobis tua múnera tueáris, atque a praeséntis vitae malis eréptos, ad bona perdúcas sempitérna: Qui vivis.



MISSAE PRO ALIQUIBUS LOCIS

FESTA NOVEMBRIS

Die 5 Novembris

SACRARUM RELIQUIARUM


Introitus Ps. 33, 20-21
MULTAE tribulatiónes justórum, et de his ómnibus liberávit eos Dóminus: Dóminus custódit ómnia ossa eórum: unum ex his non conterétur. Ps. ibid., 2 Benedícam Dóminum in omni témpore: semper laus ejus in ore meo. V/. Glória Patri.


Oratio


AUGE in nobis, Dómine, resurrectiónis fidem, qui in Sanctórum tuórum Relíquiis mirabília operáris: et fac nos immortális glóriae partícipes ; cujus in eórum cinéribus pígnora venerámur. Per Dóminum.


Léctio libri Sapiéntiae.

Eccli. 44, 10-15


HI viri misericórdiae sunt, quorum pietátes non defuérunt: cum sémine eórum pérmanent bona, heréditas sancta nepótes eórum, et in testaméntis stetit semen eórum: et fílii eórum propter illos usque in aetérnum manent: semen eórum et glória eórum non derelinquétur. Córpora ipsórum in pace sepúlta sunt, et nomen eórum vivit in generatiónem et generatiónem. Sapiéntiam ipsórum narrent pópuli, et laudem eórum núntiet Ecclésia.


Graduale Ps. 149, 5 et 1 Exsultábunt sancti in glória: laetabúntur in cubílibus suis. V/. Cantáte Dómino cánticum novum: laus ejus in ecclésia sanctórum.
Allelúja, allelúja. V/. Ps. 67, 4 Justi epuléntur, et exsúltent in conspéctu Dei: et delecténtur in laetítia. Allelúja.



Post Septuagesimam, omissis Allelúja et Versu sequenti, dicitur

Tractus Ps. 125, 5-6 Qui séminant in lácrimis, in gáudio metent. V/. Eúntes ibant et flebant, mitténtes sémina sua. V/. Veniéntes autem vénient cum exsultatióne, portántes manípulos suos.

Tempore autem Paschali omittitur Graduale, et ejus loco dicitur:


Allelúja , allelúja. V/. Eccli. 39, 19 Sancti tui, Dómine, florébunt sicut lílium, et sicut odor bálsami erunt ante te. Allelúja. V/. Ps. 115, 15 Pretiósa in conspéctu Dómini mors sanctórum ejus. Allelúja.



+ Sequéntia sancti Evangélii secúndum Lucam.

Luc. 6, 17-23


IN illo témpore: Descéndens Jesus de monte, stetit in loco campéstri, et turba discipulórum ejus, et multitúdo copiósa plebis ab omni Judaéa, et Jerúsalem, et marítima, et Tyri, et Sidónis, qui vénerant, ut audírent eum, et sanaréntur a languóribus suis. Et qui vexabántur a spirítibus immúndis, curabántur. Et omnis turba quaerébat eum tángere: quia virtus de illo exíbat, et sanábat omnes. Et ipse elevátis óculis in discípulos suos, dicébat: Beáti páuperes: quia vestrum est regnum Dei. Beáti, qui nunc esurítis: quia saturabímini. Beáti, qui nunc fletis: quia ridébitis. Beáti éritis, cum vos óderint hómines, et cum separáverint vos, et exprobráverint, et ejécerint nomen vestrum tamquam malum, propter Fílium hóminis. Gaudéte in illa die, et exsultáte: ecce enim merces vestra multa est in caelo.


Offertorium Ps. 67, 36 Mirábilis Deus in sanctis suis: Deus Israël, ipse dabit virtútem et fortitúdinem plebi suae: benedíctus Deus, allelúja.


Secreta


IMPLORÁMUS, Dómine, cleméntiam tuam: ut Sanctórum tuórum, quorum Relíquias venerámur, suffragántibus méritis, hóstia, quam offérimus, nostrórum sit expiátio delictórum. Per Dóminum.


Communio Ps. 32, 1 Gaudéte, justi, in Dómino: rectos decet collaudátio.


Postcommunio


MULTÍPLICA super nos, quaésumus, Dómine, per haec sancta, quae súmpsimus, misericórdiam tuam: ut, sicut in tuórum solemnitáte Sanctórum, quorum Relíquias cólimus, pia devotióne laetámur ; ita eórum perpétua societáte, te largiénte, fruámur. Per Dóminum.



MISSAE PRO ALIQUIBUS LOCIS

Die 13 Novembris

S. STANISLAI KOSTKAE

Confessoris



Introitus Sap. 4, 13-14
CONSUMMÁTUS in brevi explévit témpora multa: plácita enim erat Deo ánima illíus: propter hoc properávit edúcere illum de médio iniquitátum. Ps. 112, 1 Laudáte, púeri, Dóminum: laudáte nomen Dómini. V/. Glória Patri.


Oratio


DEUS, qui inter cétera sapiéntiae tuae mirácula, étiam in ténera aetáte matúra sanctitátis grátiam contulísti: da, quaésumus ; ut, beáti Stanislái exémplo, tempus instánter operándo rediméntes, in aetérnam íngredi réquiem festinémus. Per Dóminum.


Léctio libri Sapiéntiae.

Sap. 4, 7-16


JUSTUS, si morte praeoccupátus fúerit, in refrigério erit. Senéctus enim venerábilis est non diutúrna, neque annórum número computáta: cani autem sunt sensus hóminis, et aetas senectútis vita inmaculáta. Placens Deo factus est diléctus, et vivens inter peccatóres translátus est. Raptus est ne malítia mutáret intelléctum ejus, aut ne fíctio decíperet ánimam illíus. Fascinátio enim nugacitátis obscúrat bona, et inconstántia concupiscéntiae transvértit sensum sine malítia. Consummátus in brevi explévit témpora multa: plácita enim erat Deo ánima illíus: propter hoc properávit edúcere illum de médio iniquitátum: pópuli autem vidéntes, et non intelligéntes, nec ponéntes in praecórdiis tália: quóniam grátia Dei, et misericórdia est in sa nctos ejus, et respéctus in eléctos illíus. Condémnat autem justus mórtuus vivos ímpios, et juvéntus celérius consummáta longam vitam injústi.


Graduale Ps. 20, 3-4 Desidérium cordis ejus tribuísti ei: et voluntáte labiórum ejus non fraudásti eum. V/. Quóniam praevenísti eum in benedictiónibus dulcédinis.
Allelúja , allelúja. V/. Ps. 118, 152 Inítio cognóvi de testimóniis tuis, quia in aetérnum fundásti ea. Allelúja.



Post Septuagesimam, omissis Allelúja et Versu sequenti, dicitur

Tractus Ps. 111, 1-3 Beátus vir, qui timet Dóminum: in mandátis ejus cupit nimis. V/. Potens in terra erit semen ejus: generátio rectórum benedicétur. V/. Glória et divítiae in domo ejus: et justítia ejus manet in saéculum saéculi.

Tempore autem Paschali omittitur Graduale, et ejus loco dicitur:


Allelúja, allelúja. V/. Jac. 1, 12 Beátus vir, qui suffert tentatiónem: quóniam, cum probátus fúerit, accípiet corónam vitae. Allelúja. V/. Eccli. 45, 9 Amávit eum Dóminus, et ornávit eum: stolam glóriae índuit eum. Allelúja.



+ Sequéntia sancti Evangélii secúndum Matthaéum.

Matth. 19, 13-21


IN illo témpore: Obláti sunt Jesu párvuli, ut manus eis impóneret, et oráret. Discípuli autem increpábant eos. Jesus vero ait eis: Sínite párvulos, et nolíte eos prohibére ad me veníre: tálium est enim regnum caelórum. Et cum imposuísset eis manus, ábiit inde. Et ecce unus accédens, ait illi: Magíster bone, quid boni fáciam ut hábeam vitam aetérnam ? Qui dixit ei: Quid me intérrogas de bono ? Unus est bonus, Deus. Si autem vis ad vitam íngredi, serva mandáta. Dicit illi: Quae ? Jesus autem dixit: Non homicídium fácies: Non adulterábis: Non fácies furtum: Non falsum testimónium dices: Honóra patrem tuum, et matrem tuam, et díliges próximum tuum sicut teípsum. Dicit illi adoléscens: Omnia haec custodívi a juventúte mea: quid adhuc mihi deest ? Ait illi Jesus: Si vis perféctus esse, vade, vende quae habes, et da paupéribus, et habébis thesáurum in caelo: et veni, séquere me.


Offertorium Ps. 42, 4 Introíbo ad altáre Dei: ad Deum, qui laetíficat juventútem meam.


Secreta


ANGELÓRUM pane, quaésumus, Dómine, beáti Stanislái nos intercéssio dignos effíciat, qui eo méruit angélica manu recreári. Per Dóminum.


Communio Eccli. 15, 3 Cibávit illum Dóminus pane vitae et intelléctus, et aqua sapiéntiae salutáris potávit illum.


Postcommunio


UT nobis, Dómine, caeléstis, quem súmpsimus, panis sit vitae: beáto Stanisláo Confessóre tuo intercedénte, quaésumus ; ut panis sit intelléctus, et potus aqua sapiéntiae salutáris. Per Dóminum.



MISSAE PRO ALIQUIBUS LOCIS

Sabbato

ante Dominicam tertiam Novembris

B. MARIAE VIRGINIS

DIVINAE PROVIDENTIAE MATRIS


Introitus Joann. 19, 26-27
MÚLIER, ecce fílius tuus, dixit Jesus matri: deínde dixit discípulo quem diligébat: Ecce mater tua. Ps. 105, 1 Confitémini Dómino, quóniam bonus: quóniam in saéculum misericórdia ejus. V/. Glória Patri.


Oratio


DEUS, cujus providéntia in sui dispositióne non fállitur, te súpplices exorámus: ut, intercedénte beáta Vírgine ac Genitríce Fílii tui María ; nóxia cuncta submóveas, et ómnia nobis profutúra concédas. Per eúmdem Dóminum.


Léctio libri Sapiéntiae.

Eccli. 24, 1 et 4-13


SAPIÉNTIA laudábit ánimam suam, et in Deo honorábitur, et in médio pópuli sui gloriábitur. Et in multitúdine electórum habébit laudem et inter benedíctos benedicétur, dicens: Ego ex ore Altíssimi prodívi primogénita ante omnem creatúram: Ego feci in caelis ut orirétur lumen indefíciens, et sicut nébula texi omnem terram: Ego in altíssimis habitávi, et thronus meus in colúmna nubis. Gyrum caeli circuívi sola, et profúndum abýssi penetrávi, in flúctibus maris ambulávi, et in omni terra steti: et in omni pópulo, et in omni gente primátum hábui: et ómnium excelléntium et humílium corda virtúte calcávi: et in his ómnibus réquiem quaesívi, et in hereditáte Dómini morábor. Tunc praecépit, et dixit mihi Creátor ómnium: et qui creávit me, requiévit in tabernáculo meo, et dixit mihi: In Jacob inhábita, et in Israël hereditáre, et in eléctis meis mitte radíces.


Graduale Isai. 49, 15 Numquid oblivísci potest múlier infántem suum, ut non misereátur fílio úteri sui ? V/. Et si illa oblíta fúerit, ego tamen non oblivíscar tui.
Allelúja , allelúja. V/. Tob. 13, 17 Tu autem laetáberis in fíliis tuis, quóniam omnes benedicéntur, et congregabúntur ad Dóminum. Allelúja.



Post Septuagesimam, omissis Allelúja et Versu sequenti, dicitur

Tractus Prov. 8, 32-35 Nunc ergo, fílii, audíte me: Beáti, qui custódiunt vias meas. V/. Audíte disciplínam, et estóte sapiéntes, et nolíte abjícere eam. V/. Beátus homo qui audit me, et qui vígilat ad fores meas quotídie, et obsérvat ad postes óstii mei. V/. Qui me invénerit, invéniet vitam, et háuriet salútem a Dómino.

Tempore autem Paschali omittitur Graduale, et ejus loco dicitur:


Allelúja, allelúja. V/. Isai. 66, 10 et 13 Laetámini et exsultáte, omnes qui dilígitis eam. Allelúja. V/. Quómodo si cui mater blandiátur, ita ego consolábor vos. Allelúja.



+ Sequéntia sancti Evangélii secúndum Joánnem.

Joann. 2, 1-11


IN illo témpore: Núptiae factae sunt in Cana Galilaéae: et erat mater Jesu ibi. Vocátus est autem et Jesus, et discípuli ejus ad núptias. Et deficiénte vino, dicit mater Jesu ad eum: Vinum non habent. Et dicit ei Jesus: Quid mihi et tibi est, múlier ? nondum venit hora mea. Dicit mater ejus minístris: Quodcúmque díxerit vobis, fácite. Erant autem ibi lapídeae hýdriae sex pósitae secúndum purificatiónem Judaeórum, capiéntes síngulae metrétas binas vel ternas. Dicit eis Jesus: Impléte hýdrias aqua. Et implevérunt eas usque ad summum. Et dicit eis Jesus: Hauríte nunc, et ferte architriclíno. Et tulérunt. Ut autem gustávit architriclínus aquam vinum factam, et non sciébat unde esset, minístri autem sciébant, qui háuserant aquam: vocat sponsum architriclínus, et dicit ei: Omnis homo primum bonum vinum ponit: et cum inebriáti fúerint, tunc id, quod detérius est. Tu autem servásti bonum vinum usque adhuc. Hoc fecit inítium signórum Jesus in Cana Galilaéae: et manifestávit glóriam suam, et credidérunt in eum discípuli ejus.


Credo.


Offertorium Sap. 14, 3 Tua autem, Pater, providéntia gubérnat: quóniam dedísti et in mari viam, et inter fluctus sémitam firmíssimam.


Secreta


ADEÚNTIBUS cum fidúcia ad thronum grátiae, propitiáre nobis, Dómine Deus: ut, benigníssima divínae providéntiae, Matre intercedénte, misericórdiam consequámur, et grátiam inveniámus in auxílio opportúno. Per Dóminum.


Praefatio de beata Maria Virgine Et te in Festivitáte.


Communio Ps. 127, 3 Fílii tui sicut novéllae olivárum in circúitu mensae tuae.


Postcommunio


CAELÉSTIS mensae vírtus, miséricors Deus, in fámulis tuis júgiter persevéret: ut, divínae providéntiae Matris intercessióne, regnum et justítiam tuam ante ómnia quaeréntes, temporálibus non destituántur auxíliis. Per Dóminum.



MISSAE PRO ALIQUIBUS LOCIS

Die 26 Novembris

S. LEONARDI A PORTU MAURITIO

Confessoris



Introitus Isai. 58, 11
DÓMINUS implébit splendóribus ánimam tuam, et ossa tua liberábit, et eris quasi hortus irríguus, et sicut fons aquárum, cujus non defícient aquae. Ps. 80, 2 Exsultáte Deo adjutóri nostro: jubiláte Deo Jacob. V/. Glória Patri.


Oratio


DEUS, qui in obstinátis peccatórum córdibus ad paeniténtiam flecténdis beátum Leonárdum Confessórem tuum ópere ac sermóne poténtem effecísti: da, quaésumus ; ut per ejus preces et mérita e córdibus nostris contritiónis lácrimas elícere valeámus. Per Dóminum.


Léctio Epístolae beáti Pauli Apóstoli ad Ephésios.

Ephes. 1, 3-14


BENEDÍCTUS Deus et Pater Dómini nostri Jesu Christi, qui benedíxit nos in omni benedictióne spirituáli in caeléstibus in Christo, sicut elégit nos in ipso ante mundi constitutiónem, ut essémus sancti et immaculáti in conspéctu ejus in caritáte. Qui praedestinávit nos in adoptiónem filiórum per Jesum Christum in ipsum: secúndum propósitum voluntátis suae, in laudem glóriae grátiae suae, in qua gratificávit nos in dilécto Fílio suo. In quo habémus redemptiónem per sánguinem ejus, remissiónem peccatórum secúndum divítias grátiae ejus, quae superabundávit in nobis in omni sapiéntia et prudéntia: ut notum fáceret nobis sacraméntum voluntátis suae, secúndum beneplácitum ejus, quod propósuit in eo, in dispensatióne plenitúdinis témporum, instauráre ómnia in Christo, quae in caelis, et quae in terra sunt, in ipso. In quo étiam et nos sorte vocáti sumus praedestináti secúndum propósitum ejus, qui operátur ómnia secúndum consílium voluntátis suae: ut simus in laudem glóriae ejus nos, qui ante sperávimus in Christo. In quo et vos, cum audissétis verbum veritátis, (Evangélium salútis vestrae) in quo et credéntes signáti estis Spíritu promissiónis Sancto, qui est pignus hereditátis nostrae, in redemptiónem acquisitiónis, in laudem glóriae ipsíus.


Graduale Ps. 91, 13 et 14 Justus ut palma florébit: sicut cedrus Líbani multiplicábitur in domo Dómini. V/. Ibid., 3 Ad annuntiándum mane misericórdiam tuam, et veritátem tuam per noctem.
Allelúja, allelúja. V/. Isai. 52, 7 Quam pulchri super montes pedes annuntiántis et praedicántis pacem: annuntiántis bonum, praedicántis salútem. Allelúja.



Post Septuagesimam, omissis Allelúja et Versu sequenti, dicitur

Tractus Ps. 111, 1-3 Beátus vir, qui timet Dóminum: in mandátis ejus cupit nimis. V/. Potens in terra erit semen ejus: generátio rectórum benedicétur. V/. Glória et divítiae in domo ejus: et justítia ejus manet in saéculum saéculi.

Tempore autem Paschali omittitur Graduale, et ejus loco dicitur:


Allelúja, allelúja. V/. Ps. 111, 1 Beátus vir, qui timet Dóminum: in mandátis ejus cupit nimis. Allelúja. V/. Osee 14, 6 Justus germinábit sicut lílium: et florébit in aetérnum ante Dóminum. Allelúja.



+ Sequéntia sancti Evangélii secúndum Lucam.

Luc. 10, 1-9


IN illo témpore: Designávit Dóminus et álios septuagínta duos: et misit illos binos ante fáciem suam in omnem civitátem et locum, quo erat ipse ventúrus. Et dicébat illis: Messis quidem multa, operárii autem pauci. Rogáte ergo dóminum messis, ut mittat operários in messem suam. Ite: ecce ego mitto vos sicut agnos inter lupos. Nolíte portáre sácculum, neque peram, neque calceaménta, et néminem per viam salutavéritis. In quamcúmque domum intravéritis, primum dícite: Pax huic dómui: et si ibi fúerit fílius pacis, requiéscet super illum pax vestra: sin autem, ad vos revertétur. In eádem autem domo manéte, edéntes et bibéntes quae apud illos sunt: dignus est enim operárius mercéde sua. Nolíte transíre de domo in domum. Et in quamcúmque civitátem intravéritis, et suscéperint vos, manducáte quae apponúntur vobis: et curáte infírmos, qui in illa sunt, et dícite illis: Appropinquávit in vos regnum Dei.


Offertorium 2 Cor. 3, 5-6 Non sumus sufficiéntes cogitáre áliquid a nobis, quasi ex nobis: sed sufficiéntia nostra ex Deo est, qui et idóneos nos fecit minístros novi testaménti.


Secreta


IMMACULÁTAM hóstiam tibi, Dómine, offérimus deprecántes: ut, sancti Leonárdi Confessóris interveniénte suffrágio, semper in nobis dilécti Fílii tui passiónis memória persevéret et fructus. Per eúmdem Dóminum.


Communio 2 Cor. 5, 20 Pro Christo legatióne fúngimur, tamquam Deo exhortánte per nos: obsecrámus pro Christo, reconciliámini Deo.


Postcommunio


CITO antícipent nos miséricórdiae tuae, quaésumus, Dómine, intercedénte sancto Confessóre tuo Leonárdo: ut, a culpis expiáti, in electórum número esse mereámur. Per Dóminum.



MISSAE PRO ALIQUIBUS LOCIS

Eadem die 26 Novembris

S. JOANNIS BERCHMANS

Confessoris



Missa Custodívit, ut supra, die 13 Augusti.



MISSAE PRO ALIQUIBUS LOCIS

Die 27 Novembris

B. MARIAE VIRGINIS IMMACULATAE

A SACRO NUMISMATE


Introitus Exodi 13, 9
ERIT quasi signum in manu tua, et quasi monuméntum ante óculos tuos, et ut lex Dómini semper sit in ore tuo. Ps. 104, 1 Confitémini Dómino, et invocáte nomen ejus: annuntiáte inter gentes ópera ejus. V/. Glória Patri.


Oratio


DÓMINE Jesu Christe, qui beatíssimam Vírginem Maríam Matrem tuam ab orígine immaculátam innúmeris miráculis claréscere voluísti: concéde ; ut, ejúsdem patrocínium semper implorántes, gáudia consequámur aetérna: Qui vivis.


Léctio libri Apocalýpsis beáti Joánnis Apóstoli.

Apoc. 12, 1, 5, 14 et 15-16


SIGNUM magnum appáruit in caelo: Múlier amícta sole, et luna sub pédibus ejus, et in cápite ejus coróna stellárum duódecim. Et péperit fílium másculum, qui rectúrus erat omnes gentes in virga férrea: et raptus est fílius ejus ad Deum, et ad thronum eius. Et datae sunt mulíeri alae duae áquilae magnae ut voláret in desértum in locum suum. Et misit serpens ex ore suo post mulíerem, aquam tamquam flumen, ut eam fáceret trahi a flúmine. Et adjúvit terra mulíerem, et apéruit terra os suum, et absórbuit flumen, quod misit draco de ore suo.


Graduale Ps. 104, 5 et 27 Mementóte mirabílium ejus, quae fecit: prodígia ejus, et judícia oris ejus. V/. Pósuit in ea verba signórum suórum, et prodigiórum suórum in terra.
Allelúja, allelúja. V/. Ps. 18, 7 A summo caelo egréssio ejus, nec est qui se abscóndat a calóre ejus. Allelúja.



Post Septuagesimam, omissis Allelúja et Versu sequenti, dicitur

Tractus Ps. 86, 1-2 Fundaménta ejus in móntibus sanctis: díligit Dóminus portas Sion super ómnia tabernácula Jacob. V/. Ibid., 3 Gloriósa dicta sunt de te, cívitas Dei. V/. Ibid., 5 Homo natus est in ea, et ipse fundávit eam Altíssimus.

Tempore autem Paschali omittitur Graduale, et ejus loco dicitur:


Allelúja, allelúja. V/. Judith 15, 10 Tu glória Jerúsalem, tu laetítia Israël, tu honorificéntia pópuli nostri. Allelúja. V/. Cant. 4, 7 Tota pulchra es, María: et mácula originális non est in te. Allelúja.



+ Sequéntia sancti Evangélii secúndum Joánnem.

Joann. 2, 1-11


IN illo témpore: Núptiae factae sunt in Cana Galilaéae: et erat mater Jesu ibi. Vocátus est autem et Jesus, et discípuli ejus ad núptias. Et deficiénte vino, dicit mater Jesu ad eum: Vinum non habent. Et dicit ei Jesus: Quid mihi et tibi est, múlier ? nondum venit hora mea. Dicit mater ejus minístris: Quodcúmque díxerit vobis, fácite. Erant autem ibi lapídeae hýdriae sex pósitae secúndum purificatiónem Judaeórum, capiéntes síngulae metrétas binas vel ternas. Dicit eis Jesus: Impléte hýdrias aqua. Et implevérunt eas usque ad summum. Et dicit eis Jesus: Hauríte nunc, et ferte architriclíno. Et tulérunt. Ut autem gustávit architriclínus aquam vinum factam, et non sciébat unde esset, minístri autem sciébant, qui háuserant aquam: vocat sponsum architriclínus, et dicit ei: Omnis homo primum bonum vinum ponit: et cum inebriáti fúerint, tunc id, quod detérius est. Tu autem servásti bonum vinum usque adhuc. Hoc fecit inítium signórum Jesus in Cana Galilaéae: et manifestávit glóriam suam, et credidérunt in eum discípuli ejus.


Credo.


Offertorium Joann. 19, 27 Dixit Jesus discípulo: Ecce mater tua. Et ex illa hora accépit eam discípulus in sua.


Secreta


BEÁTA Vírgine María intercedénte, cujus précibus exorátus Jesus Christus Fílius tuus fecit inítium signórum: da nobis, Dómine Deus, sacraméntum córporis et sánguinis ejúsdem Fílii tui pura mente confícere ; ut aetérni convívii mereámur esse partícipes. Per eúmdem Dóminum.


Praefatio de beata Maria Virgine Et te in Conceptióne immaculata.


Communio Eccli. 36, 6-7 et 10 Innova signa, et immúta mirabília. Glorífica manum tuam, et bráchium déxterum. Festína tempus, et meménto finis, ut enárrent mirabília tua.


Postcommunio


DÓMINE Deus omnípotens, qui per immaculátam Genitrícem Fílii tui ómnia nos habére voluísti: da nobis tantae Matris auxílio, praeséntis témporis perícula devitáre ; ut vitam consequámur aetérnam. Per eúmdem Dóminum.



II

COMMUNE SANCTORUM

PRO ALIQUIBUS LOCIS

JUXTA DECRETUM S. R. C. DIEI 22 MAJI 1914



MISSAE PRO ALIQUIBUS LOCIS

COMMUNE PLURIUM

CONFESSORUM PONTIFICUM


Introitus Ps. 131, 16-17
SACERDÓTES Sion índuam salutári, et sancti ejus exsultatióne exsultábunt, dicit Dóminus: illuc prodúcam cornu David, parávi lucérnam Christo meo. (T. P. Allelúja, allelúja.) Ps. ibid., 1 Meménto, Dómine, David: et omnis mansuetúdinis ejus. V/. Glória Patri.


Oratio


DEUS, qui nos beatórum N. et N. Confessórum tuórum atque Pontíficum confessiónibus gloriósis circúmdas et prótegis: da nobis, et eórum imitatióne profícere, et intercessióne gaudére. Per Dóminum.

Alia Oratio


ECCLÉSIAM tuam, Dómine, beatórum N. et N. Confessórum tuórum atque Pontíficum contínua protectióne custódi: ut, sicut illos pastorális sollicitúdo gloriósos réddidit ; ita nos eórum intercéssio in tuo semper fáciat amóre fervéntes. Per Dóminum.


Léctio Epístolae beáti Pauli Apóstoli ad Hebraéos.

Hebr. 13, 7-17


FRATRES: Mementóte praepositórum vestrórum, qui vobis locúti sunt verbum Dei: quorum intuéntes éxitum conversatiónis, imitámini fidem. Jesus Christus heri, et hódie: ipse et in saécula. Doctrínis váriis et peregrínis nolíte abdúci. Optimum est enim grátia stabilíre cor, non escis, quae non profuérunt ambulántibus in eis. Habémus altáre, de quo édere non habent potestátem, qui tabernáculo desérviunt. Quorum enim animálium infértur sanguis pro peccáto in Sancta per pontíficem, horum córpora cremántur extra castra. Propter quod et Jesus, ut sanctificáret per suum sánguinem pópulum, extra portam passus est. Exeámus ígitur ad eum extra castra, impropérium ejus portántes. Non enim habémus hic manéntem civitátem, sed futúram inquírimus. Per ipsum ergo offerámus hóstiam laudis semper Deo, id est, fructum labiórum confiténtium nómini ejus. Beneficéntiae autem, et communiónis nolíte oblivísci: tálibus enim hóstiis promerétur Deus. Obedíte praepósitis vestris, et subjacéte eis. Ipsi enim pervígilant, quasi ratiónem pro animábus vestris redditúri.


Graduale Ps. 106, 22 et 32 Sacríficent Dómino sacrifícium laudis: et annúntient ópera ejus in exsultatióne. V/. Et exáltent eum in ecclésia plebis: et in cáthedra seniórum laudent eum.
Allelúja , allelúja. V/. 2 Paral. 6, 41 Sacerdótes tui, Dómine Deus, induántur salútem, et sancti tui laeténtur in bonis. Allelúja.



Post Septuagesimam, omissis Allelúja et Versu sequenti, dicitur

Tractus Ps. 131, 8-10 Surge, Dómine, in réquiem tuam: tu et arca sanctificatiónis tuae. V/. Sacerdótes tui induántur justítiam, et sancti tui exsúltent. V/. Propter David servum tuum, non avértas fáciem Christi tui.

Tempore autem Paschali omittitur Graduale, et ejus loco dicitur:


Allelúja , allelúja. V/. 2 Paral. 6, 41 Sacerdótes tui, Dómine Deus, induántur salútem, et sancti tui laeténtur in bonis. Allelúja. V/. Jerem. 31, 14 Ego Dóminus inebriábo ánimam sacerdótum pinguédine: et pópulus meus bonis meis adimplébitur. Allelúja.



+ Sequéntia sancti Evangélii secúndum Marcum.

Marc. 13, 33-37


IN illo témpore: Dixit Jesus discípulis suis: Vidéte, vigiláte, et oráte: nescítis enim quando tempus sit. Sicut homo, qui péregre proféctus relíquit domum suam, et dedit servis suis potestátem cujúsque óperis, et janitóri praecépit ut vígilet. Vigiláte ergo, (nescítis enim quando dóminus domus véniat: sero, an média nocte, an galli cantu, an mane) ne cum vénerit repénte, invéniat vos dormiéntes. Quod autem vobis dico, ómnibus dico: Vigiláte.


Offertorium Ps. 105, 3 Beáti, qui custódiunt judícium, et fáciunt justítiam in omni témpore. (T. P. Allelúja.)


Secreta


MÚNERA nostra, Dómine, sacris altáribus offeréntes, quaésumus cleméntiam tuam: ut éadem, suffragántibus beatórum N. et N. Pontíficum méritis, et suprémam tibi glóriam operéntur, et ubérrimam nobis grátiam assequántur. Per Dóminum.

Alia Secreta


HANC nostrae oblatiónis hóstiam, Deus, gratam óculis tuae majestátis effíciant beatórum N. et N. Pontíficum expetíta suffrágia: qui digne in hoc saéculo sacrifícia tibi, ac preces in salútem pópuli obtulérunt. Per Dóminum.


Communio Marc. 13, 34 Homo péregre proféctus relíquit domum suam, et dedit servis suis potestátem cujúsque óperis, et janitóri praecépit ut vígilet. (T. P. Allelúja.).


Postcommunio


REFECTIÓNE sacra enutrítos, fac nos, omnípotens Deus, vestígiis beatórum N. et N. Pontíficum semper insístere: qui studuérunt pérpeti devotióne te cólere, et indeféssa ómnibus caritáte profícere. Per Dóminum.


Alia Postcommunio


MENSA caeléstis, omnípotens Deus, intercedéntibus beatórum N. et N. Pontíficum méritis, supérnas in ómnibus vires firmet et áugeat: ut et fídei donum íntegrum custodiámus, et per osténsum salútis trámitem ambulémus. Per Dóminum.



MISSAE PRO ALIQUIBUS LOCIS

COMMUNE PLURIUM

CONFESSORUM NON PONTIFICUM


Introitus Ps. 144, 10-11
CONFITEÁNTUR tibi, Dómine, ómnia ópera tua, et sancti tui benedícant tibi: glóriam regni tui dicent, et poténtiam tuam loquéntur. (T. P. Allelúja, allelúja.) Ps. ibid., 1 Exaltábo te, Deus meus Rex: et benedícam nómini tuo in saéculum, et in saéculum saéculi. V/. Glória Patri.


Oratio


CONCÉDE, quaésumus, omnípotens Deus: ut ad meliórem vitam beatórum N. et N. Confessórum tuórum exémpla nos próvocent ; quátenus, quorum memóriam ágimus, étiam actus imitémur. Per Dóminum.

Alia Oratio


DEUS, qui nos beatórum N. et N. Confessórum tuórum méritis et intercéssióne laetíficas: concéde propítius ; ut, qui tua per eos benefícia póscimus, dono tuae grátiae consequámur. Per Dóminum.


Léctio libri Sapiéntiae.

Eccli. 2, 7-13


METUÉNTES Dóminum, sustinéte misericórdiam ejus: et non deflectátis ab illo ne cadátis. Qui timétis Dóminum, crédite illi: et non evacuábitur merces vestra. Qui timétis Dóminum, speráte in illum: et in oblectatiónem véniet vobis misericórdia. Qui timétis Dóminum, dilígite illum: et illuminabúntur corda vestra. Respícite, fílii, natiónes hóminum: et scitóte quia nullus sperávit in Dómino, et confúsus est. Quis enim permánsit in mandátis ejus, et derelíctus est ? aut quis invocávit eum, et despéxit illum ? Quóniam pius et miséricors est Deus, et remíttet in die tribulatiónis peccáta: et protéctor est ómnibus exquiréntibus se in veritáte.


Graduale Ps. 30, 24-25 Dilígite Dóminum, omnes sancti ejus, quóniam veritátem requíret Dóminus, et retríbuet abundánter faciéntibus supérbiam. V/. Viríliter ágite, et confortétur cor vestrum, omnes qui sperátis in Dómino.
Allelúja , allelúja. V/. Ps. 9, 11 Sperent in te qui novérunt nomen tuum: quóniam non dereliquísti quaeréntes te, Dómine. Allelúja.



Post Septuagesimam, omissis Allelúja et Versu sequenti, dicitur

Tractus Ps. 33, 9-11 Gustáte, et vidéte, quóniam suávis est Dóminus: beátus vir, qui sperat in eo. V/. Timéte Dóminum, omnes sancti ejus: quóniam non est inópia timéntibus eum. V/. Dívites eguérunt et esuriérunt: inquiréntes autem Dóminum non minuéntur omni bono.

Tempore autem Paschali omittitur Graduale, et ejus loco dicitur:


Allelúja , allelúja. V/. Ps. 9, 11 Sperent in te qui novérunt nomen tuum: quóniam non dereliquísti quaeréntes te, Dómine. Allelúja. Ps. 139, 14 Justi confitebúntur nómini tuo, Dómine: et habitábunt recti cum vultu tuo. Allelúja.



+ Sequéntia sancti Evangélii secúndum Lucam.

Luc. 12, 35-40


IN illo témpore: Dixit Jesus discípulis suis: Sint lumbi vestri praecíncti, et lucérnae ardéntes in mánibus vestris, et vos símiles homínibus exspectántibus dóminum suum, quando revertátur a núptiis: ut, cum vénerit, et pulsáverit, conféstim apériant ei. Beáti servi illi, quos, cum vénerit dóminus, invénerit vigilántes: amen dico vobis, quod praecínget se, et fáciet illos discúmbere, et tránsiens ministrábit illis. Et si vénerit in secúnda vigília, et si in tértia vigília vénerit, et ita invénerit, beáti sunt servi illi. Hoc autem scitóte, quóniam si sci ret paterfamílias, qua hora fur veníret, vigiláret útique, et non síneret pérfodi domum suam. Et vos estóte paráti: quia qua hora non putátis, Fílius hóminis véniet.


Offertorium Ps. 67, 4 Justi epuléntur, et exsúltent in conspéctu Dei, et delecténtur in laetítia. (T. P. Allelúja.)


Secreta


HÓSTIAS ad altáre tuum offeréntibus, Dómine, da nobis illum pietátis afféctum, quem beátis N. et N. Confessóribus tuis infudísti: ut pura mente ac férvido corde rei sacrae attendámus, et sacrifícium tibi plácitum nobísque profícuum immolémus. Per Dóminum.

Alia Secreta


MÚNERA, Dómine, obláta sanctífica: et intercedéntibus beátis N. et N. Confessóribus tuis, nos per haec a peccatórum nostrórum máculis emúnda. Per Dóminum.


Communio Luc. 12, 37 Beáti servi illi, quos, cum vénerit Dóminus, invénerit vigilántes: amen dico vobis, quod praecínget se, et fáciet illos discúmbere, et tránsiens ministrábit illis. (T. P. Allelúja.)


Postcommunio


TRÍBUAT nobis, omnípotens Deus, suffragántibus beatórum N. et N. Confessórum tuórum précibus, reféctio sacra subsídium: ut et castitátis mundítiam observémus in córpore, et lumen veritátis exhibeámus in ópere. Per Dóminum.

Alia Postcommunio


SÚPPLICES te rogámus, omnípotens Deus: ut, quos tuis réficis sacraméntis, intercedéntibus beátis N. et N. Confessóribus tuis, tibi étiam plácitis móribus dignánter tríbuas deservíre. Per Dóminum.



Missale Romanum 1957 - PURITATIS B. MARIAE VIRGINIS