Missale Romanum 1957 - CONFESSORUM NON PONTIFICUM


MISSAE PRO ALIQUIBUS LOCIS

COMMUNE PLURIUM VIRGINUM

I

Pro Virginibus et Martyribus


Introitus Ps. 17, 31
DEUS meus, impollúta via ejus: elóquia Dómini igne examináta: protéctor est ómnium sperántium in se. (T. P. Allelúja, allelúja.) Ps. ibid., 2-3 Díligam te, Dómine, fortitúdo mea: Dóminus firmaméntum meum, et refúgium meum, et liberátor meus. V/. Glória Patri.


Oratio


DA nobis, quaésumus, Dómine Deus noster, beatárum N. et N. Vírginum et Mártyrum tuárum palmas incessábili devotióne venerári: ut, quas digna mente celebráre non póssumus, humílibus saltem frequentémus obséquiis. Per Dóminum.

Alia Oratio


OMNÍPOTENS sempitérne Deus, qui beátas N. et N. virginitátis et martýrii glória decorásti: da nobis eárum précibus ita córporis et mentis seváre puritátem ; ut nec blandítiis carnis, nec malórum acerbitáte vincámur. Per Dóminum.


Léctio Epístolae beáti Pauli Apóstoli ad Corínthios.

2 Cor. 4, 6-11 et 16-17


FRATRES: Deus illúxit in córdibus nostris ad illuminatiónem sciéntiae claritátis Dei, in fácie Christi Jesu. Habémus autem thesáurum istum in vasis fictílibus: ut sublímitas sit virtútis Dei, et non ex nobis. In ómnibus tribulatiónem pátimur, sed non angustiámur: aporiámur, sed non destitúimur: persecutiónem pátimur, sed non derelínquimur: dejícimur, sed non perímus: semper mortificatiónem Jesu in córpore nostro circumferéntes, ut et vita Jesu manifestétur in corpóribus nostris. Semper enim nos, qui vívimus, in mortem trádimur propter Jesum: ut et vita Jesu manifestétur in carne nostra mortáli. Propter quod non defícimus: sed licet is, qui foris est, noster homo corrumpátur: tamen is, qui intus est, renovátur de die in diem. Id enim, quod in praesénti est momentáneum et leve tribulatiónis nostrae, supra modum in sublimitáte aetérnum glóriae pondus operátur in nobis.


Graduale Ps. 43, 8-9 Salvásti enim nos, Deus, de affligéntibus nos: et odiéntes nos confudísti. V/. In Deo laudábimur tota die: et in nómine tuo confitébimur in saéculum.
Allelúja, allelúja. V/. Apoc. 12, 11 Vicérunt dracónem propter sánguinem Agni, et propter verbum testimónii sui. Allelúja.



Post Septuagesimam, omissis Allelúja et Versu sequenti, dicitur

Tractus Ps. 144, 5-7 Magnificéntiam glóriae sanctitátis tuae, Dómine, loquéntur: et mirabília tua narrábunt. V/. Et virtútem terribílium tuórum dicent: et magnitúdinem tuam narrábunt. V/. Memóriam abundántiae suavitátis tuae eructábunt: et justítia tua exsultábunt.

Tempore autem Paschali omittitur Graduale, et ejus loco dicitur:


Allelúja, allelúja. V/. Apoc. 12, 11 Vicérunt dracónem propter sánguinem Agni, et propter verbum testimónii sui. Allelúja. V/. Sap. 4, 1 et 2 Casta generátio in perpétuum coronáta triúmphat, incoinquinatórum certáminum praémium vincens. Allelúja.



+ Sequéntia sancti Evangélii secúndum Matthaéum.

Matth. 25, 1-13


IN illo témpore: Dixit Jesus discípulis suis parábolam hanc: Símile erit regnum caelórum decem virgínibus: quae accipiéntes lámpadas suas, exiérunt óbviam sponso et sponsae. Quinque autem ex eis erant fátuae, et quinque prudéntes: sed quinque fátuae, accéptis lampádibus, non sumpsérunt óleum secum: prudéntes vero accepérunt óleum in vasis suis cum lampádibus. Moram autem faciénte sponso, dormitavérunt omnes, et dormiérunt. Média autem nocte clamor factus est: Ecce sponsus venit, exíte óbviam ei. Tunc surrexérunt omnes vírgines illae, et ornavérunt lámpades suas. Fátuae autem sapiéntibus dixérunt: Date nobis de óleo vestro: quia lámpades nostrae exstinguúntur. Respondérunt prudéntes, dicéntes: Ne forte non suffíciat nobis, et vobis, ite pótius ad vendéntes, et émite vobis. Dum autem irent émere, venit sponsus: et quae parátae erant, intravérunt cum eo ad núptias, et clausa est jánua. Novíssime vero véniunt et réliquae vírgines, dicéntes: Dómine, Dómine, áperi nobis. At ille respóndens, ait: Amen dico vobis, néscio vos. Vigiláte ítaque, quia nescítis diem, neque horam.


Offertorium Ps. 88, 16-17 Dómine, in lúmine vultus tui ambulábunt, et in nómine tuo exsultábunt tota die: et in justítia tua exaltabúntur. (T. P. Allelúja.)


Secreta


INTÉNDE, quaésumus, Dómine, múnera altáribus tuis pro beatárum Vírginum et Mártyrum tuárum N. et N. honóre propósita: ut, sicut per haec sacra mystéria illis glóriam contulísti, ita nobis indulgéntiam largiáris. Per Dóminum.

Alia Secreta


HÓSTIA nómini tuo, Dómine, reverénter exhíbita, glorióso beatárum Vírginum et Mártyrum tuárum N. et N. suffrágio commendétur: quae se tibi gratas pudóris et fídei víctimas immolárunt. Per Dóminum.


Communio Matth. 25, 4 et 6 Prudéntes vírgines accepérunt óleum in vasis suis cum lampádibus: média autem nocte clamor factus est: Ecce sponsus venit, exíte óbviam ei. (T. P. Allelúja.)


Postcommunio


PRAESTA nobis, quaésumus, Dómine: intercedéntibus beátis Virgínibus et Martýribus tuis N. et N. ; ut, quod ore contíngimus, pura mente capiámus. Per Dóminum.

Alia Postcommunio


CAELÉSTIA sacraménta, quaésumus, Dómine, suffragántibus beátis Virgínibus et Martýribus tuis N. et N., sua nos virtúte commúniant: ut, quarum pie venerámur in fídei confessióne victóriam, imitémur in morum puritáte constántiam. Per Dóminum.



MISSAE PRO ALIQUIBUS LOCIS

COMMUNE PLURIUM VIRGINUM

II

Pro Virginibus tantum


Introitus Ps. 148, 12-14
VÍRGINES laudent nomen Dómini, quia exaltátum est nomen ejus solíus: conféssio ejus super caelum et terram. (T. P. Allelúja, allelúja.) Ps. ibid., 1 Laudáte Dóminum de caelis: laudáte eum in excélsis. V/. Glória Patri.


Oratio


CONCÉDE, quaésumus, omnípotens Deus: ut qui beatárum Vírginum N. et N. puritátem húmili venerámur obséquio ; étiam piae conversatiónis imitémur exémplum. Per Dóminum.

Alia Oratio


FIDÉLES tuos, quaésumus, Dómine, intercedéntibus beátis Virgínibus N. et N., ita córpore et mente purífica: ut a nóxiis delectatiónibus elongéntur, ac tua júgiter suavitáte pascántur. Per Dóminum.


Léctio Epístolae beáti Pauli Apóstoli ad Corínthios.

1 Cor. 7, 25-34


FRATRES: De virgínibus praecéptum Dómini non hábeo: consílium autem do, tamquam misericórdiam consecútus a Dómino, ut sim fidélis. Exístimo ergo hoc bonum esse propter instántem necessitátem, quóniam bonum est hómini sic esse. Alligátus es uxóri ? noli quaérere solutiónem. Solútus es ab uxóre ? noli quaérere uxórem. Si autem accéperis uxórem, non peccásti. Et si núpserit virgo, non peccávit: tribulatiónem tamen carnis habébunt hujúsmodi. Ego autem vobis parco. Hoc ítaque dico, fratres: Tempus breve est: réliquum est, ut et qui habent uxóres, tamquam non habéntes sint: et qui flent, tamquam non flentes: et qui gaudent, tamquam non gaudéntes: et qui emunt, tamquam non possidéntes, et qui utúntur hoc mundo, tamquam non utántur: praéterit enim figúra hujus mundi. Volo autem vos sine sollicitúdine esse. Qui sine uxóre est, sollícitus est, quae Dómini sunt, quómodo pláceat Deo. Qui autem cum uxóre est, sollícitus est, quae sunt mundi, quómodo pláceat uxóri, et divísus est. Et múlier innúpta, et virgo cógitat quae Dómini sunt, ut sit sancta córpore, et spíritu: in Christo Jesu Dómino nostro.


Graduale Ps. 44, 3 et 10 Speciósus forma prae fíliis hóminum: diffúsa est grátia in lábiis tuis. V/. Fíliae regum in honóre tuo: ástitit regína a dextris tuis in vestítu deauráto, circúmdata varietáte.
Allelúja, allelúja. V/. Sap. 4, 1 O quam pulchra est casta generátio cum claritáte: immortális est enim memória illíus. Allelúja.



Post Septuagesimam, omissis Allelúja et Versu sequenti, dicitur

Tractus Ps. 44, 14-16 Omnis glória ejus fíliae Regis ab intus, in fímbriis áureis, circumamícta varietátibus. V/. Adducéntur Regi vírgines post eam, próximae ejus afferéntur tibi. V/. Afferéntur in laetítia et exsultatióne, adducéntur in templum Regis.

Tempore autem Paschali omittitur Graduale, et ejus loco dicitur:


Allelúja, allelúja. V/. Sap. 4, 1 O quam pulchra est casta generátio cum claritáte: immortális est enim memória illíus. Allelúja. V/. Isai. 56, 5 Ego Dóminus dabo eis nomen mélius a fíliis et filiábus: nomen sempitérnum dabo eis, quod non períbit. Allelúja.



+ Sequéntia sancti Evangélii secúndum Matthaéum.

Matth. 25, 1-13


IN illo témpore: Dixit Jesus discípulis suis parábolam hanc: Símile erit regnum caelórum decem virgínibus: quae accipiéntes lámpadas suas, exiérunt óbviam sponso et sponsae. Quinque autem ex eis erant fátuae, et quinque prudéntes: sed quinque fátuae, accéptis lampádibus, non sumpsérunt óleum secum: prudéntes vero accepérunt óleum in vasis suis cum lampádibus. Moram autem faciénte sponso, dormitavérunt omnes, et dormiérunt. Média autem nocte clamor factus est: Ecce sponsus venit, exíte óbviam ei. Tunc surrexérunt omnes vírgines illae, et ornavérunt lámpades suas. Fátuae autem sapiéntibus dixérunt: Date nobis de óleo vestro: quia lámpades nostrae exstinguúntur. Respondérunt prudéntes, dicéntes: Ne forte non suffíciat nobis, et vobis, ite pótius ad vendéntes, et émite vobis. Dum autem irent émere, venit sponsus: et quae parátae erant, intravérunt cum eo ad núptias, et clausa est jánua. Novíssime vero véniunt et réliquae vírgines, dicéntes: Dómine, Dómine, áperi nobis. At ille respóndens, ait: Amen dico vobis, néscio vos. Vigiláte ítaque, quia nescítis diem, neque horam.


Offertorium Ps. 33, 6 Accédite ad Dóminum, et illuminámini: et fácies vestrae non confundéntur. (T. P. Allelúja.)


Secreta


MUNÉRIBUS tibi, Dómine, pro beatárum Vírginum N. et N. honóre dicátis, benedictiónem tuam propitiátus effúnde: ut per éadem, et a vítiis ómnibus emundémur, et caeléstibus delíciis impleámur. Per Dóminum.

Alia Secreta


OFFERÉNTES tibi hóstiam laudis, miséricors Deus, apud majestátem tuam beatárum Vírginum N. et N. suffrágio commendémur: quae cónsonis opéribus in sua virginitáte jucúndum tibi habitáculum praeparárunt. Per Dóminum.


Communio Matth. 25, 10 Venit sponsus: et vírgines, quae parátae erant, intravérunt cum eo ad núptias, et clausa est jánua. (T. P. Allelúja.)


Postcommunio


SUMPTA mystéria, quaésumus, Dómine, suffragántibus beatárum Vírginum N. et N. méritis, íncitent nos júgiter et illústrent: ut digne advéntum Fílii tui praestolémur, et ad supérnas ejus núptias admittámur. Per eúmdem Dóminum.

Alia Postcommunio


CÓRPORIS et sánguinis tui sacra libátio, Dómine, intercedéntibus beátis Virgínibus N. et N., ab ómnibus nos cadúcis rebus avértat: ut valeámus tui et sincéra in terris caritáte profícere, et perpétua in caelis visióne gaudére: Qui vivis.



MISSAE PRO ALIQUIBUS LOCIS

COMMUNE PLURIUM NON VIRGINUM

I

Pro Martyribus


Introitus Ps. 107, 13-14
DA nobis, Deus, auxílium de tribulatióne, quia vana salus hóminis: in Deo faciémus virtútem: et ipse ad níhilum dedúcet inimícos nostros. (T. P. Allelúja, allelúja.) Ps. ibid., 2 Parátum cor meum, Deus, parátum cor meum: cantábo, et psallam in glória mea. V/. Glória Patri.


Oratio


DEUS, cujus múnere virtus in infirmitáte perfícitur: da ómnibus, beatárum N. et N. Mártyrum tuárum glóriam recoléntibus ; ut quae abs te sumpsérunt robur ut víncerent, abs te quoque nobis vincéndi grátiam semper obtíneant. Per Dóminum.

Alia Oratio


DA nobis, quaésumus, Dómine Deus noster, beatárum N. et N. Mártyrum tuárum palmas incessábili devotióne venerári: ut, quas digna mente celebráre non póssumus, humílibus saltem frequentémus obséquiis. Per Dóminum.


Léctio Epístolae beáti Pauli Apóstoli ad Corínthios.

2 Cor. 4, 6-11 et 16-17


FRATRES: Deus illúxit in córdibus nostris ad illuminatiónem sciéntiae claritátis Dei, in fácie Christi Jesu. Habémus autem thesáurum istum in vasis fictílibus: ut sublímitas sit virtútis Dei, et non ex nobis. In ómnibus tribulatiónem pátimur, sed non angustiámur: aporiámur, sed non destitúimur: persecutiónem pátimur, sed non derelínquimur: dejícimur, sed non perímus: semper mortificatiónem Jesu in córpore nostro circumferéntes, ut et vita Jesu manifestétur in corpóribus nostris. Semper enim nos, qui vívimus, in mortem trádimur propter Jesum: ut et vita Jesu manifestétur in carne nostra mortáli. Propter quod non defícimus: sed licet is, qui foris est, noster homo corrumpátur: tamen is, qui intus est, renovátur de die in diem. Id enim, quod in praesénti est momentáneum et leve tribulatiónis nostrae, supra modum in sublimitáte aetérnum glóriae pondus operátur in nobis.


Graduale Ps. 59, 13-14 Da nobis, Deus, auxílium de tribulatióne, quia vana salus hóminis. V/. In Deo faciémus virtútem: et ipse ad níhilum dedúcet tribulántes nos.
Allelúja , allelúja. V/. Apoc. 7, 14 Venérunt de tribulatióne magna, et lavérunt stolas suas, et dealbavérunt eas in sánguine Agni. Allelúja.



Post Septuagesimam, omissis Allelúja et Versu sequenti, dicitur

Tractus Ps. 65, 10-12 Probásti nos, Deus: igne nos examinásti sicut examinátur argéntum. V/. Induxísti nos in láqueum, posuísti tribulatiónes in dorso nostro: imposuísti hómines super cápita nostra. V/. Transívimus per ignem et aquam: et eduxísti nos in refrigérium.

Tempore autem Paschali omittitur Graduale, et ejus loco dicitur:


Allelúja , allelúja. V/. Apoc. 7, 14 Venérunt de tribulatióne magna, et lavérunt stolas suas, et dealbavérunt eas in sánguine Agni. Allelúja. V/. Apoc. 12, 11-12 Non dilexérunt ánimas suas usque ad mortem: proptérea laetámini, caeli, et qui habitátis in eis. Allelúja.



+ Sequéntia sancti Evangélii secúndum Matthaéum.

Matth. 13, 44-52


IN illo témpore: Dixit Jesus discípulis suis parábolam hanc: Símile est regnum caelórum thesáuro abscóndito in agro: quem qui invénit homo, abscóndit, et prae gáudio illíus vadit, et vendit univérsa, quae habet, et emit agrum illum. Iterum símile est regnum caelórum hómini negotiatóri, quaerénti bonas margarítas. Invénta autem una pretiósa margaríta, ábiit, et véndidit ómnia, quae hábuit, et emit eam. Iterum símile est regnum caelórum sagénae missae in mare, et ex omni génere píscium congregánti. Quam, cum impléta esset, educéntes, et secus littus sedéntes, elegérunt bonos in vasa, malos autem foras misérunt. Sic erit in consummatióne saéculi: exíbunt Angeli, et separábunt malos de médio justórum, et mittent eos in camínum ignis: ibi erit fletus, et stridor déntium. Intellexístis haec ómnia ? Dicunt ei: Etiam. Ait illis: Ideo omnis scriba doctus in regno caelórum símilis est hómini patrifamílias, qui profert de thesáuro suo nova et vétera.


Offertorium Ps. 104, 4 Quaérite Dóminum, et confirmámini: quaérite fáciem ejus semper. (T. P. Allelúja.)


Secreta


OBLÁTA tibi, Dómine Deus, in honórem beatárum N. et N. Mártyrum tuárum dona intuére propítius: ut accéptum nostrae tibi fáciant servitútis obséquium, et opportúnum nobis tríbuant tuae protectiónis auxílium. Per Dóminum.

Alia Secreta


INTÉNDE, quaésumus, Dómine, múnera altáribus tuis pro beatárum Mártyrum tuárum N. et N. honóre propósita: ut, sicut per haec sacra mystéria illis glóriam contulísti ; ita nobis indulgéntiam largiáris. Per Dóminum.


Communio Matth. 13, 44 Símile est regnum caelórum thesáuro abscóndito in agro: quem qui invénit homo, abscóndit, et prae gáudio illíus vadit, et vendit univérsa, quae habet, et emit agrum illum. (T. P. Allelúja.)


Postcommunio


SANCTÍFICET et róboret nos, quaésumus, Dómine, supernórum múnerum fructuósa recéptio: ut, suffragántibus beátis Martýribus tuis N. et N., et vitiórum aéstibus obsistámus, et contra ómnium ímpetus hóstium repugnémus. Per Dóminum.

Alia Postcommunio


PRAESTA nobis, quaésumus, Dómine: intercedéntibus beátis Martýribus tuis N. et N.: ut, quod ore contíngimus, pura mente capiámus. Per Dóminum.



MISSAE PRO ALIQUIBUS LOCIS

COMMUNE PLURIUM NON VIRGINUM

II

Pro non Martyribus


Introitus Ps. 79, 19
DÓMINE Deus virtútum, non discédimus a te: vivificábis nos, et nomen tuum invocábimus. (T. P. Allelúja, allelúja.) Ps. ibid., 2 Qui regis Israël, inténde: qui dedúcis velut ovem Joseph. V/. Glória Patri.


Oratio


CONCÉDE, quaésumus, omnípotens Deus: ut veneránda nobis beatárum N. et N. intercéssio tríbuat caeléste subsídium ; quarum vita mirábilis ómnibus salutáre praestat exémplum. Per Dóminum.

Alia Oratio


TUÓRUM corda fidélium, Deus miserátor, illústra: et, beatárum N. et N. précibus ac méritis gloriósis ; fac nos terréna cuncta despícere, et dona caeléstia possidére. Per Dóminum.


Léctio Epístolae beáti Pauli Apóstoli ad Timótheum.

1 Tim. 2, 9-15 ; 5, 3-6


CARÍSSIME: Volo mulíeres oráre in hábitu ornáto, cum verecúndia, et sobrietáte ornántes se, et non in tortis crínibus, aut auro, aut margarítis, vel veste pretiósa: sed quod decet mulíeres, promitténtes pietátem per ópera bona. Múlier in siléntio discat cum omni subjectióne. Docére autem mulíeri non permítto, neque dominári in virum: sed esse in siléntio. Adam enim primus formátus est: deínde Heva. Et Adam non est sedúctus: múlier autem sedúcta in praevaricatióne fuit. Salvábitur autem per filiórum generatiónem, si permánserit in fide, et dilectióne, et sanctificatióne cum sobrietáte. Víduas honóra, quae vere víduae sunt. Si qua autem vídua fílios aut nepótes habet: discat primum domum suam régere, et mútuam vicem réddere paréntibus: hoc enim accéptum est coram Deo. Quae autem vere vídua est, et desoláta, speret in Deum, et instet obsecratiónibus, et oratiónibus nocte ac die. Nam quae in delíciis est, vivens mórtua est. Et hoc praécipe ut irreprehensíbiles sint: in Christo Jesu Dómino nostro.


Graduale Ps. 32, 20-21 Anima nostra sústinet Dóminum: quóniam adjútor et protéctor noster est. V/. Quia in eo laetábitur cor nostrum: et in nómine sancto ejus sperávimus.
Allelúja, allelúja. V/. Eccli. 1, 16 Inítium sapiéntiae timor Dómini: cum eléctis féminis gráditur, et cum justis et fidélibus agnóscitur. Allelúja.



Post Septuagesimam, omissis Allelúja et Versu sequenti, dicitur

Tractus Ps. 47, 10-12 Suscépimus Deus, misericórdiam tuam in médio templi tui. V/. Secúndum nomen tuum, Deus, sic et laus tua in fines terrae: justítia plena est déxtera tua. V/. Laetétur mons Sion, et exsúltent fíliae Judae, propter judícia tua, Dómine.

Tempore autem Paschali omittitur Graduale, et ejus loco dicitur:


Allelúja , allelúja. V/. Eccli. 1, 16 Inítium sapiéntiae timor Dómini: cum eléctis féminis gráditur, et cum justis et fidélibus agnóscitur. Allelúja. V/. Ps. 23, 6 Haec est generátio quaeréntium Dóminum, quaeréntium fáciem Dei Jacob. Allelúja



+ Sequéntia sancti Evangélii secúndum Matthaéum.

Matth. 13, 44-52


IN illo témpore: Dixit Jesus discípulis suis parábolam hanc: Símile est regnum caelórum thesáuro abscóndito in agro: quem qui invénit homo, abscóndit, et prae gáudio illíus vadit, et vendit univérsa, quae habet, et emit agrum illum. Iterum símile est regnum caelórum hómini negotiatóri, quaerénti bonas margarítas. Invénta autem una pretiósa margaríta, ábiit, et véndidit ómnia, quae hábuit, et emit eam. Iterum símile est regnum caelórum sagénae missae in mare, et ex omni génere píscium congregánti. Quam, cum impléta esset, educéntes, et secus littus sedéntes, elegérunt bonos in vasa, malos autem foras misérunt. Sic erit in consummatióne saéculi: exíbunt Angeli, et separábunt malos de médio justórum, et mittent eos in camínum ignis: ibi erit fletus, et stridor déntium. Intellexístis haec ómnia ? Dicunt ei: Etiam. Ait illis: Ideo omnis scriba doctus in regno caelórum símilis est hómini patrifamílias, qui profert de thesáuro suo nova et vétera.


Offertorium Ps. 104, 3 Laudámini in nómine sancto ejus: laetétur cor quaeréntium Dóminum. (T. P. Allelúja.)


Secreta


OFFERÉNTES tibi, Dómine Deus, hóstiam pro beatárum N. et N. honóre propósitam, te súpplices exorámus: ut spem nostram in te fírmiter collocémus, et pias petitiónes cordis nostri abs te júgiter habeámus. Per Dóminum.

Alia Secreta


SACRIFÍCIUM nostrum, Dómine, suffragántibus beatárum N. et N. précibus, tibi reddátur accéptum: ut nobis idem et culpárum véniam largiátur, et meritórum cópiam operétur. Per Dóminum.


Communio Matth. 13, 45-46 Símile est regnum caelórum hómini negotiatóri, quaerénti bonas margarítas: invénta autem una pretiósa margaríta, ábiit, et véndidit ómnia quae hábuit, et emit eam. (T. P. Allelúja.)


Postcommunio


DIVÍNI operátio sacraménti, omnípotens Deus, suffragántibus beatárum N. et N. méritis, illúminet nos páriter et inflámmet: ut et sanctis júgiter desidériis ferveámus, et bonis opéribus abundémus. Per Dóminum.

Alia Postcommunio


ACCEPTÓRUM múnerum virtus, Dómine Deus, intercedéntibus beátis N. et N., suos in nobis efféctus ímpleat: ut simul et mortális vitae subsídium cónferat, et gáudium perpétuae felicitátis obtíneat. Per Dóminum.







MISSAE PROPRIAE


SANCTORUM



ECCLESIAE CATHEDRALIS

ET


DIOECESIS



LEODIENSIS




(Concordat cum originali approbato. In fidem, etc.

Ex Secretaria S. R. C., die 27 Augusti 1930.

Nihil obstat. Leodii, die 1 Decembris 1958.

Imprimatur. Leodii, die 2 Decembris 1958.)


MISSAE PROPRIAE SANCTORUM

ECCLESIAE CATHEDRALIS ET DIOECESIS

LEODIENSIS



PRAEFATIONES PROPRIAE

I DE ADVENTU


VERE dignum et justum est, aequum et salutáre, nos tibi semper et ubíque grátias ágere: Dómine, sancte Pater, omnípotens aetérne Deus: per Christum Dóminum nostrum. Quem pérdito hóminum géneri Salvatórem miséricors et fidélis promisísti, cujus véritas instrúeret ínscios, sánctitas justificáret ímpios, virtus adjuváret infírmos. Dum ergo prope est ut véniat quem missúrus es, et dies affúlget liberatiónis nostrae, in hac promissiónum tuárum fide piis gáudiis exsultámus. Et ídeo cum Angelis et Archángelis, cum Thronis et Dominatiónibus, cumque omni milítia caeléstis exércitus, hymnum glóriae tuae cánimus, sine fine dicéntes: Sanctus



MISSAE PROPRIAE SANCTORUM

ECCLESIAE CATHEDRALIS ET DIOECESIS

LEODIENSIS

PRAEFATIONES PROPRIAE

II

DE SS. SACRAMENTO


VERE dignum et justum est, aequum et salutáre, nos tibi semper et ubíque grátias ágere: Dómine, sancte Pater, omnípotens aetérne Deus: pe r Christum Dóminum nostrum. Qui, remótis carnálium victimárum umbris, Corpus et Sánguinem suum nobis in sacrifícium commendávit, ut in omni loco offerátur nómini tuo, quae tibi sola complácuit, oblátio munda. In hoc ígitur inscrutábilis sapiéntiae et imménsae caritátis mystério, idípsum quod semel in Cruce perfécit, non cessat mirabíliter operári, ipse ófferens, ipse et oblátio. Et nos, unam secum hóstiam efféctos, ad sacrum invítat convívium, in quo ipse cibus noster súmitur, recólitur memória Passiónis ejus, mens implétur grátia, et futúrae glóriae nobis pignus datur. Et ídeo cum Angelis et Archángelis, cum Thronis et Dominatiónibus, cumque omni milítia caeléstis exércitus, hymnum glóriae tuae cánimus, sine fine dicéntes: Sanctus



MISSAE PROPRIAE SANCTORUM

ECCLESIAE CATHEDRALIS ET DIOECESIS

LEODIENSIS


FESTA DECEMBRIS

Die 1 Decembris

SS. LANDOALDI ET SOCIORUM

Confessorum


Simplex



Introitus Ps. 144, 10-11
CONFITEÁNTUR tibi, Dómine, ómnia ópera tua, et sancti tui benedícant tibi: glóriam regni tui dicent, et poténtiam tuam loquéntur. Ps. ibid., 1 Exaltábo te, Deus meus Rex: et benedícam nómini tuo in saéculum, et in saéculum saéculi. V/. Glória Patri.


Oratio


ADÉSTO, Dómine, pópulo tuo cum Sanctórum tuórum Landoáldi et Sociórum patrocínio supplicánti: ut quod própria fidúcia non praesúmit, suffragántium méritis consequámur. Per Dóminum.

Et in Adventu fit Commemoratio Feriae.


Léctio libri Sapiéntiae.

Eccli. 2, 7-13


METUÉNTES Dóminum, sustinéte misericórdiam ejus: et non deflectátis ab illo ne cadátis. Qui timétis Dóminum, crédite illi: et non evacuábitur merces vestra. Qui timétis Dóminum, speráte in illum: et in oblectatiónem véniet vobis misericórdia. Qui timétis Dóminum, dilígite illum: et illuminabúntur corda vestra. Respícite, fílii, natiónes hóminum: et scitóte quia nullus sperávit in Dómino, et confúsus est. Quis enim permánsit in mandátis ejus, et derelíctus est ? aut quis invocávit eum, et despéxit illum ? Quóniam pius et miséricors est Deus, et remíttet in die tribulatiónis peccáta: et protéctor est ómnibus exquiréntibus se in veritáte.


Graduale Ps. 30, 24-25 Dilígite Dóminum, omnes sancti ejus, quóniam veritátem requíret Dóminus, et retríbuet abundánter faciéntibus supérbiam. V/. Viríliter ágite, et confortétur cor vestrum, omnes qui sperátis in Dómino.
Allelúja , allelúja. V/. Ps. 9, 11 Sperent in te qui novérunt nomen tuum: quóniam non dereliquísti quaeréntes te, Dómine. Allelúja.



* In Missis votivis post Septuagesimam, omissis Allelúja et Versu sequenti, dicitur

Tractus Ps. 33, 9-11 Gustáte, et vidéte, quóniam suávis est Dóminus: beátus vir, qui sperat in eo. V/. Timéte Dóminum, omnes sancti ejus: quóniam non est inópia timéntibus eum. V/. Dívites eguérunt et esuriérunt: inquiréntes autem Dóminum non minuéntur omni bono.

Tempore autem Paschali omittitur Graduale, et ejus loco dicitur:


Allelúja , allelúja. V/. Ps. 9, 11 Sperent in te qui novérunt nomen tuum: quóniam non dereliquísti quaeréntes te, Dómine. Allelúja. Ps. 139, 14 Justi confitebúntur nómini tuo, Dómine: et habitábunt recti cum vultu tuo. Allelúja.



+ Sequéntia sancti Evangélii secúndum Lucam.

Luc. 12, 35-40


IN illo témpore: Dixit Jesus discípulis suis: Sint lumbi vestri praecíncti, et lucérnae ardéntes in mánibus vestris, et vos símiles homínibus exspectántibus dóminum suum, quando revertátur a núptiis: ut, cum vénerit, et pulsáverit, conféstim apériant ei. Beáti servi illi, quos, cum vénerit dóminus, invénerit vigilántes: amen dico vobis, quod praecínget se, et fáciet illos discúmbere, et tránsiens ministrábit illis. Et si vénerit in secúnda vigília, et si in tértia vigília vénerit, et ita invénerit, beáti sunt servi illi. Hoc autem scitóte, quóniam si sciret paterfamílias, qua hora fur veníret, vigiláret útique, et non síneret pérfodi domum suam. Et vos estóte paráti: quia qua hora non putátis, Fílius hóminis véniet.


Offertorium Ps. 67, 4 Justi epuléntur, et exsúltent in conspéctu Dei, et delecténtur in laetítia.


Secreta
C


HÓSTIAS ad altáre tuum offeréntibus, Dómine, da nobis illum pietátis afféctum, quem beátis Landoáldo et Sóciis Confessóribus tuis infudísti: ut pura mente ac férvido corde rei sacrae attendámus, et sacrifícium tibi plácitum nobísque profícuum immolémus. Per Dóminum.


In Adventu, dicitur Praefatio de Adventu.


Communio Luc. 12, 37 Beáti servi illi, quos, cum vénerit Dóminus, invénerit vigilántes: amen dico vobis, quod praecínget se, et fáciet illos discúmbere, et tránsiens ministrábit illis.


Postcommunio
C


TRÍBUAT nobis, omnípotens Deus, suffragántibus beatórum Landoáldi et Sociórum Confessórum tuórum précibus, reféctio sacra subsídium: ut et castitátis mundítiam observémus in córpore, et lumen veritátis exhibeámus in ópere. Per Dóminum.



MISSAE PROPRIAE SANCTORUM

ECCLESIAE CATHEDRALIS ET DIOECESIS

LEODIENSIS

Die 4 Decembris

S. BARBARAE

Virginis et Martyris


Duplex



Missa Loquébar, de Communi Virginum 1 loco, cum Oratione ut infra:


Oratio
C


DEUS, qui inter cétera poténtiae tuae mirácula étiam in sexu frágili victóriam martýrii contulísti: concéde propítius ; ut, qui beátae Bárbarae Vírginis et Mártyris tuae natalítia cólimus, per ejus ad te exémpla gradiámur. Per Dóminum.

Et fit Commemoratio Feriae.


Praefatio de Adventu.



MISSAE PROPRIAE SANCTORUM

ECCLESIAE CATHEDRALIS ET DIOECESIS

LEODIENSIS


FESTA JANUARII

Die 10 Januarii

B. GREGORII X

Papae et Confessoris


Duplex



Missa Si díligis me, de Communi Summorum Pontificum, praeter Orationem sequentem:


Oratio


DEUS, qui Ecclésiam tuam beáti Gregórii Confessóris atque Pontíficis religiónis zelo et apostólicis curis amplificásti: ejus méritis et intercessióne concéde, ut fídei et sanctitátis nova semper increménta suscípiat. Per Dóminum.


Dicitur Praefatio de Epiphaniae.



MISSAE PROPRIAE SANCTORUM

ECCLESIAE CATHEDRALIS ET DIOECESIS

LEODIENSIS

Die 25 Januarii

CONVERSIO S. PAULI

Apostoli

Titularis Ecclesiae Cathedralis


Duplex I classis



Missa ut in Missali.
Et dicitur Credo ; item, juxta Rubricas, Commemoratio Octavae et S. Petri et Praefatio Apostolorum.



MISSAE PROPRIAE SANCTORUM

ECCLESIAE CATHEDRALIS ET DIOECESIS

LEODIENSIS

Die 28 Januarii

S. POPPONIS

Abbatis


Duplex



Missa Os justi, de Communi Abbatum, cum Oratione ut infra:


Oratio
C


INTERCÉSSIO nos, quaésumus, Dómine, beáti Poppónis Abbátis comméndet: ut, quod nostris méritis non valémus, ejus patrocínio assequámur. Per Dóminum.



MISSAE PROPRIAE SANCTORUM

ECCLESIAE CATHEDRALIS ET DIOECESIS

LEODIENSIS


FESTA FEBRUARII

Die 3 Februarii

S. HADELINI

Confessoris


Duplex



Missa Os justi, de Communi Confessoris non Pontificis 1 loco, praeter Orationem et Evangelium, ut infra:


Oratio


OMNÍPOTENS sempitérne Deus, tuórum remunerátor servórum, qui nobis beátum Hadelínum aetérnae salútis minístrum praestáre voluísti: concéde nobis fámulis tuis, ut ejus adjuvémur méritis ; cujus laetámur virtútibus et exémplis. Per Dóminum.


+ Sequéntia sancti Evangélii secúndum Matthaéum.

Matth. 19, 27-29


IN illo témpore: Dixit Petrus ad Jesum: Ecce nos relíquimus ómnia, et secúti sumus te: quid ergo erit nobis ? Jesus autem dixit illis: Amen dico vobis, quod vos, qui secúti estis me, in regeneratióne, cum séderit Fílius hóminis in sede majestátis suae, sedébitis et vos super sedes duódecim, judicántes duódecim tribus Israël. Et omnis, qui relíquerit domum, vel fratres, aut soróres, aut patrem, aut matrem, aut uxórem, aut fílios, aut agros, propter nomen meum, céntuplum accípiet, et vitam aetérnam possidébit.



MISSAE PROPRIAE SANCTORUM

ECCLESIAE CATHEDRALIS ET DIOECESIS

LEODIENSIS

Die 6 Februarii

S. AMANDI

Episcopi et Confessoris


Duplex



Missa Státuit, de Communi Confessoris Pontificis 1 loco praeter Orationem sequentem:


Oratio


SANCTI Confessóris atque Pontíficis Amándi nos, quaésumus, Dómine, fóveat pretiósa conféssio, et pia júgiter intercéssio tueátur. Per Dóminum.



MISSAE PROPRIAE SANCTORUM

ECCLESIAE CATHEDRALIS ET DIOECESIS

LEODIENSIS

Die 8 Februarii

Commemoratio

S. MENGOLDI

Martyris



Missa In virtúte, de Communi unius Martyris 3 loco, cum Orationibus ut infra:


Oratio


CONCÉDE, quaésumus, omnípotens Deus, ut qui beáti Mengóldi Mártyris tui solémnia cólimus, ejus précibus et méritis mereámur vultus tui lúmine decorári. Per Dóminum.


Secreta
C


MUNÉRIBUS nostris, quaésumus, Dómine, precibúsque suscéptis: et caeléstibus nos munda mystériis, et cleménter exáudi. Per Dóminum.


Postcommunio
C


DA, quaésumus, Dómine Deus noster: ut, sicut tuórum commemoratióne Sanctórum temporáli gratulámur offício ; ita perpétuo laetémur aspéctu. Per Dóminum.



MISSAE PROPRIAE SANCTORUM

ECCLESIAE CATHEDRALIS ET DIOECESIS

LEODIENSIS

Die 13 Februarii

SS. HARLINDIS et RELINDIS

Virginum


Duplex



Introitus Ps. 148, 12-14
VÍRGINES laudent nomen Dómini, quia exaltátum est nomen ejus solíus: conféssio ejus super caelum et terram. Ps. ibid., 1 Laudáte Dóminum de caelis: laudáte eum in excélsis. V/. Glória Patri.


Oratio


PROPITIÁRE, quaésumus, Dómine, nobis fámulis tuis, per sanctárum Vírginum tuárum Harlíndis atque Relíndis mérita gloriósa, ut eárum pia intercessióne ab ómnibus semper protegámur advérsis. Per Dóminum.

Et in Quadragesima fit Commemoratio Feriae.


Léctio Epístolae beáti Pauli Apóstoli ad Corínthios.

1 Cor. 7, 25-34


FRATRES: De virgínibus praecéptum Dómini non hábeo: consílium autem do, tamquam misericórdiam consecútus a Dómino, ut sim fidélis. Exístimo ergo hoc bonum esse propter instántem necessitátem, quóniam bonum est hómini sic esse. Alligátus es uxóri ? noli quaérere solutiónem. Solútus es ab uxóre ? noli quaérere uxórem. Si autem accéperis uxórem, non peccásti. Et si núpserit virgo, non peccávit: tribulatiónem tamen carnis habébunt hujúsmodi. Ego autem vobis parco. Hoc ítaque dico, fratres: Tempus breve est: réliquum est, ut et qui habent uxóres, tamquam non habéntes sint: et qui flent, tamquam non flentes: et qui gaudent, tamquam non gaudéntes: et qui emunt, tamquam non possidéntes, et qui utúntur hoc mundo, tamquam non utántur: praéterit enim figúra hujus mundi. Volo autem vos sine sollicitúdine esse. Qui sine uxóre est, sollícitus est, quae Dómini sunt, quómodo pláceat Deo. Qui autem cum uxóre est, sollícitus est, quae sunt mundi, quómodo pláceat uxóri, et divísus est. Et múlier innúpta, et virgo cógitat quae Dómini sunt, ut sit sancta córpore et spíritu: in Christo Jesu Dómino nostro.


Graduale Ps. 44, 3 et 10 Speciósus forma prae fíliis hóminum: diffúsa est grátia in lábiis tuis. V/. Fíliae regum in honóre tuo: ástitit regína a dextris tuis in vestítu deauráto, circúmdata varietáte.
Allelúja, allelúja. V/. Sap. 4, 1 O quam pulchra est casta generátio cum claritáte: immortális est enim memória illíus. Allelúja.



* In Missis votivis post Septuagesimam, omissis Allelúja et Versu sequenti, dicitur

Tractus Ps. 44, 14-16 Omnis glória ejus fíliae Regis ab intus, in fímbriis áureis, circumamícta varietátibus. V/. Adducéntur Regi vírgines post eam, próximae ejus afferéntur tibi. V/. Afferéntur in laetítia et exsultatióne, adducéntur in templum Regis.

Tempore autem Paschali omittitur Graduale, et ejus loco dicitur:


Allelúja, allelúja. V/. Sap. 4, 1 O quam pulchra est casta generátio cum claritáte: immortális est enim memória illíus. Allelúja. V/. Isai. 56, 5 Ego Dóminus dabo eis nomen mélius a fíliis et filiábus: nomen sempitérnum dabo eis, quod non períbit. Allelúja.



+ Sequéntia sancti Evangélii secúndum Matthaéum.

Matth. 25, 1-13


IN illo témpore: Dixit Jesus discípulis suis parábolam hanc: Símile erit regnum caelórum decem virgínibus: quae accipiéntes lámpadas suas, exiérunt óbviam sponso et sponsae. Quinque autem ex eis erant fátuae, et quinque prudéntes: sed quinque fátuae, accéptis lampádibus, non sumpsérunt óleum secum: prudéntes vero accepérunt óleum in vasis suis cum lampádibus. Moram autem faciénte sponso, dormitavérunt omnes, et dormiérunt. Média autem nocte clamor factus est: Ecce sponsus venit, exíte óbviam ei. Tunc surrexérunt omnes vírgines illae, et ornavérunt lámpades suas. Fátuae autem sapiéntibus dixérunt: Date nobis de óleo vestro: quia lámpades nostrae exstinguúntur. Respondérunt prudéntes, dicéntes: Ne forte non suffíciat nobis et vobis, ite pótius ad vendéntes, et émite vobis. Dum autem irent émere, venit sponsus: et quae parátae erant, intravérunt cum eo ad núptias, et clausa est jánua. Novíssime vero véniunt et réliquae vírgines, dicéntes: Dómine, Dómine, áperi nobis. At ille respóndens, ait: Amen dico vobis, néscio vos. Vigiláte ítaque, quia nescítis diem, neque horam.


Offertorium Ps. 33, 6 Accédite ad Dóminum, et illuminámini: et fácies vestrae non confundéntur.


Secreta
C


MUNÉRIBUS tibi, Dómine, pro beatárum Vírginum Harlíndis atque Relíndis honóre dicátis, benedictiónem tuam propitiátus effúnde: ut per éadem, et a vítiis ómnibus emundémur, et caeléstibus delíciis impleámur. Per Dóminum.


Communio Matth. 25, 10 Venit sponsus: et vírgines, quae parátae erant, intravérunt cum eo ad núptias, et clausa est jánua.


Postcommunio
C


SUMPTA mystéria, quaésumus, Dómine, suffragántibus beatárum Vírginum Harlíndis atque Relíndis méritis, íncitent nos júgiter et illústrent: ut digne advéntum Fílii tui praestolémur, et ad supérnas ejus núptias admittámur. Per eúmdem Dóminum.



Missale Romanum 1957 - CONFESSORUM NON PONTIFICUM