Ordo Initiationis Christianae 182
183 Prima occurrit "traditio Symboli", quod electi memoriae commendabunt, deinde publice reddent (cf. nn. 194-199), antequam iuxta illud fidem suam die Baptismi profiteantur.
184 Traditio Symboli fit infra hebdomadam post primum scrutinium. Pro opportunitate etiam tempore catechumenatus celebrari potest(cf. nn. 125-126).
185 Loco lectionum, quali feriae assignantur, legantur pericopae congruentes. Sequitur homilia, in qua celebrans, in textu sacro innixus, exponit significationem et momentum Symboli tum respectu catechesis traditae, tum pro fidei professione in Baptismo elicienda et tota vita servanda.
186 Post homiliam diaconus dicit: Accedant electi, ut ab Ecclesia Symbolum fidei recipiant.
Tunc celebrans eos alloquitur, his vel similibus verbis: Dilectissimi nobis, audite verba fidei, per quam iustificationem accipietis. Pauca quidem sunt, sed magna continent mysteria. Corde sincero ea suscipite atque servate.
Deinde celebrans incipit Symbolum, dicens: Credo in Deum, et prosequitur vel solus vel una cum communitate fidelium: Patrem omnipotentem, creatorem caeli et terrae. Et in Iesum Christum, Filium eius unicum, Dominum nostrum: qui conceptus est de Spiritu Sancto, natus ex Maria Virgine, passus sub Pontio Pilato, crucifixus, mortuus et sepultus; descendit ad Inferos; tertia die resurrexit, a mortuis; ascendit ad caelos, sedet ad dexteram Dei Patris omnipotentis; inde venturus est iudicare vivos et mortuos. Credo in Spiritum Sanctum, sanctam Ecclesiam catholicam, Sanctorum communionem, remissionem peccatorum, carnis resurrectionem, vitam aeternam. Amen.
Pro opportunitate, adhiberi potest etiam Symbolum Nicaeno-Constantinopolitanum: Credo in unum Deum, Patrem omnipotentem, factorem caeli et terrae, visibiIium omnium et invisibilium. Et in unum Dominum Iesum Christum, Filium Dei unigenitum, et ex Patre natum ante omnia saecula. Deum de Deo, lumen de lumine, Deum verum de Deo vero, genitum, non factum, consubstantialem Patri: per quem omnia facta sunt. Qui propter nos homines et propter nostram salutem descendit de caelis. Et incarnatus est de Spiritu Sancto ex Maria Virgine, et homo factus est. Crucifixus Etiam pro nobis sub Pontio Pilato; passus et sepultus est, et resurrexit tertia die, secundum Scripturas, et ascendit in caelum, sedet ad dexteram Patris. Et Iterum venturus est cum gloria, iudicare vivos et mortuos, cuius regni non erit finis. Et in Spiritum Sanctum, Dominum et vivificantem: qui ex Patre Filioque procedit.
Qui cum Patre et Filio simul adoratur et conglorificatur: qui locutus est per prophetas. Et unam, sanctam, catholicam et apostolicam Ecclesiam. Confiteor unum baptisma in remissionem peccatorum. Et exspecto resurrectionem mortuorum, et vitam venturi saeculi. Amen.
187 Postea celebrans fideles ad orandum invitat his vel similibus verbis:
Oremus pro electis nostris, ut Deus et Dominus noster adaperiat aures praecordiorum ipsorum ianuamque misericordiae, ut per lavacrum regenerationis, accepta remissione omnium peccatorum. et ipsi inveniantur in Christo Iesu Domino nostro.
Omnes orant in silentio.
Deinde celebrans, manibus super electos extensis, ait:
Aeternam ac iustissimam pietatem tuam deprecamur, Domine, fons luminis et veritatis, pro his famulis tuis N. et N.: munda eos et sanctifica; da eis scientiam veram, firmam spem, sanctamque doctrinam ut digni efficiantur accedere ad gratiam Baptismi. Per Christum Dominum nostrum.
Omnes: Amen.
188 Electis etiam "Oratio dominica" traditur, quae ab antiquitate propria est eorum qui Spiritum adoptionis filiorum Baptismate acceperunt, et quam neophyti in prima celebratione Eucharistiae, cuius partem habebunt, una cum ceteris baptizatis dicent.
189 Traditio Orationis dominicae fit infra hebdomadam post tertium scrutinium. Pro opportunitate etiam celebrari potest intra tempus catechumenatus (cf. nn. 125-126). Pro necessitate insuper eam differre licet cum ritibus immediate praeparatoriis (cf. nn. 193 ss).
190 Loco lectionum, quae feriae assignantur, legantur pericopae congruentes, v. g.:
191 Diaconus dicit:
Accedant qui accepturi sunt Orationem dominicam.
Tunc celebrans electos alloquitur his vel similibus verbis: Nunc audite quomodo Dominus discipulos suos docuit orare.
Lectio sancti Evangelii secundum Matthaeum 6, 9-13 / In illo tempore: Dixit Iesus discipulis suis: "Sic vos orabitis: Pater noster, qui es in caelis, sanctificetur nomen tuum; adveniat regnum tuum; fiat voluntas tua, sicut in caelo, et in terra. Panem nostrum cotidianum da nobis hodie; et dimitte nobis debita nostra, sicut et nos dimittimus debitoribus nostris; et ne nos inducas in tentationem; sed libera nos a malo".
Sequitur homilia, in qua celebrans exponit significationem et momentum Orationis dominicae.
192 Postea celebrans, his vel similibus verbis, fideles invitat ad orandum:
Oremus pro electis nostris, ut Deus et Dominus noster adaperiat aures praecordiorum ipsorum ianuamque misericordiae, ut per lavacrum regenerationis, accepta remissione omnium peccatorum, et ipsi Inveniantur in Christo Iesu Domino nostro.
Omnes orant in silentio.
Deinde celebrans, manibus super electos extensis, dicit: Omnipotens sempiterne Deus, qui Ecclesiam tuam nova semper prole fecundas, auge fidem et intellectum electis nostris, ut, renati fonte Baptismatis, adoptionis tuae filiis aggregentur. Per Christum Dominum nostrum.
Omnes: Amen.
193 Sicubi Sabbato sancto congregari possunt electi, ut recollectione mentis et oratione, ad recipienda sacramenta se disponant, proponuntur ritus sequentes, quos, pro opportunitate, vel omnes vel ex parte adhibere licet.
194 Hoc ritu ad professionem fidei baptismalem praeparantur electi et edocentur de officio verbum Evangelii annuntiandi.
195 Si propter necessitatem Symbolum tradi non potuerit, non reddetur.
196 In principio peragitur cantus aptus. Deinde legitur una ex pericopis sequentibus vel alia congruens: Et fit brevis homilia.
197 Si insimul peragitur ritus "Ephphetha", celebratio incipit ab iis quae infra, nn. 200-202, habentur.
198 Manibus ante pectus extensis, celebrans dicit orationem hanc:
Oremus. Da, quaesumus, Domine, electis nostris, qui consilium caritatis tuae et mysteria vitae Christi tui acceperunt, ut eadem ore profiteantur ac fide teneant, et Voluntatem tuam opere compleant. Per Christum Dominum nostrum.
Omnes: Amen.
199 Deinde electi reddunt Symbolum:
Credo in Deum, Patrem omnipotentem, creatorem caeli et terrae. Et in Iesum Christum, Filium eius unicum, Dominum nostrum: qui conceptus est de Spiritu Sancto, natus ex Maria Virgine, passus sub Pontio Pilato, crucifixus, mortuus et sepultus; descendit ad Inferos; tertia die resurrexit a mortuis; ascendit ad caelos, sedet ad dexteram Dei Patris omnipotentis; inde venturus est iudicare vivos et mortuos. Credo in Spiritum Sanctum, sanctam Ecclesiam catholicam, Sanctorum communionem, remissionem peccatorum, carnis resurrectionem, vitam aeternam. Amen.
Si in traditione Symboli adhibitum est Symbolum Nicaeno-Constantinopolitanum, idem dicitur in redditione (cf. p. 69).
200 Hoc ritu, vi proprii symbolismi, inculcatur necessitas gratiae, ut quis verbum Dei audire et ad salutem profiteri valeat.
201 Post cantum aptum legitur Mc 7, 31-37, quod celebrans breviter explanat.
202 Tunc celebrans, pollice tangens dexteram et sinistram aurem singulorum electorum necnon os labiis clausum, ait:
Ephphetha, quod est adaperire, ut profitearis fidem, quam audisti, in laudem et gloriam Dei.
Si autem numerosiores sunt, pro primo tantum electorum adhibeatur integra formula; pro ceteris solummodo dicatur:
Ephphetha, quod est adaperire.
203 Nomen novum, nisi antea datum sit ad normam n. 88, nunc imponi potest vel christianum vel secundum civilem cultum regionis usitatum, dummodo christiano sensu indui queat. Interdum, si casus fert et si pauci sunt electi, satis erit ut electo explanetur significatio christiana nominis antea a parentibus accepti.
204 Post cantum aptum, pro opportunitate fit lectio, quam celebrans breviter exponit, v. g.:
205 Celebrans electum interrogat de nomine, quod ipse sibi forte elegerit. Deinde, pro opportunitate (cf. n. 203), ait:
N., deinceps vocaberis N.
Electus: Amen (vel aliud verbum conveniens).
Si autem casus ferat, explanat significationem christianam nominis antea a parentibus accepti.
206 Unctio Olei catechumenorum, si de iudicio Conferentiae Episcopalis servanda sit, et propter exiguitatem temporis nequeat in ipsa Vigilia paschali celebrari, die Sabbati sancti conferri potest. Ministrari licet separatim vel etiam una cum redditione Symboli sive ante, ad eam praeparandam, sive post, ad eam confirmandam.
207 Oleum ab Episcopo in Missa chrismatis benedictum adhibeatur. Ob rationes pastorales sacerdos illud benedicit dicens sequentem orationem:
Deus, plebis tuae virtus et praesidium, qui signum roboris in olei creatura posuisti, hoc oleum benedicere digneris; et catechumenis, qui eo linientur, concede fortitudinem, ut, divinam sapientiam et virtutem accipientes, Evangelium Christi tui altius intellegant, magno animo labores, vitae christinae aggrediantur, et, digni adoptionis filiorum effecti, se in ecclesia tua renasci et vivere laetentur. Per Christum Dominum nostrum.
Omnes: Amen.
Postea celebrans, ad electos conversus, dicit:
Muniat vos virtus Christi Salvatoris, in cuius signum vos oleo linimus salutis, in eodem Christo Domino nostro, qui vivit et regnat in saecula saeculorum.
Electi: Amen.
Singuli electi liniuntur Oleo catechumenorum in pectore vel in ambabus manibus vel etiam in aliis partibus corporis, si opportunum esse videtur. Si numerosiores sunt electi, plures ministros adhibere licet.
208 Cum ex more initiatio adultorum in sancta nocte Vigiliae paschalis celebretur, sacramenta ipsa conferuntur post benedictionem aquae, ut in Ordine Vigiliae paschalis indicatur, n. 44.
209 Si autem extra tempora consueta peragitur (cf. Praenotanda nn. 58-59), curetur ut celebratio indole paschali refulgeat (cf. Praenotanda generalia de initiatione christiana, n. 6), adhibita Missa rituali, quali in Missali proponitur, p. 732 (cf. etiam infra, n. 388).
210 Etiam quando sacramenta initiationis celebrantur extra sollemnitatem paschalem, habeatur ritus benedictionis aquae (cf. Praenotanda generalia de initiatione christiana, n. 21), in quo per commemorationem magnalium Dei recolitur inde ab initio mundi et creatione generis humani mysterium caritatis Dei; ac deinde, per invocationem Spiritus Sancti et annuntiationem mortis et resurrectionis Christi, inculcatur novitas lavacri regenerationis Domini, quo mortem et resurrectionem eius participamus et divinam sanctitatem accipimus.
211 Abrenuntiatio Satanae et professio fidei unus ritus sunt, qui in adultorum Baptismo plenam vim consequitur. Cum enim Baptismus sit sacramentum fidei, qua catechumeni Deo adhaerent et insimul ab eo regenerantur, apte lavacro praemittitur singulorum actus, quo, sicut in primo patriarcharun foedere praefigurabatur, ita nunc peccato et Satanae prorsus abrenuntiant, ut in perpetuum promissioni Salvatoris et mysterio Trinitatis inhaereant. Hac professione, quam coram celebrante et communitate peragunt, significant voluntatem tempore catechumenatus maturatam, novum cum Christo foedus ineundi. In hac fide, quam, ab Ecclesia divinitus traditam, amplexi sunt baptizantur adulti.
212 Olei catechumenorum unctio, quae inter abrenuntiationem et professionem fidei occurrit, potest, pro necessitate pastorali et opportunitate liturgica, anticipari (cf. nn. 206-207). Quo in casu attendatur per eam significari necessitatem divini roboris, ut baptizandus, non obstantibus vitae praeteritae vinculis et superata diaboli adversitate, gressum professionis fidei strenue peragat eamque totius vitae decursu indefectibiliter teneat.
213 Ante litaniam baptizandi cum patrinis et matrinis accedunt ad fontem, circa quem ita consistunt, ut prospectui fidelium non officiant. Si vero baptizandi permulti sunt, accedere possunt dum cantantur litaniae.
Celebrans, astantes alloquens, hanc vel similem monitionem habet:
Fratres dilectissimi, misericordiam Dei Patris omnipotentis obsecremus pro his famulis Dei N. et N., qui sanctum Baptismum postulant. Quos ipse vocavit et ad hanc horam adduxit, eis lumen et robur largiatur, ut forti animo adaereant Christo, et fidem Ecclesiae profiteantur. Et det eis renovationem Spiritus sancti, quem instanter super hanc aquam sumus invocaturi.
214 Deinde cantantur litaniae, in quibus addi possunt aliqua nomina Sanctorum, praesertim vero Titularis Ecclesiae vel Patronorum loci et eorum qui sunt baptizandi. Cognomina Sanctorum parenthesibus inclusa, pro opportunitate, omitti possunt, quando litaniae lingua latina canuntur.
Kyrie, eleison - Kyrie, eleison //Christe, eleison - Christe, eleison // Kyrie, eleison - Kyrie, eleison
Sancta Maria, Mater Dei - ora pro nobis // Sancte Michael - ora pro nobis // Sancti Angeli Dei - orate pro nobis // Sancte Ioannes Baptista - ora pro nobis // Sancte Ioseph - ora pro nobis // Sancti Petre et Paule - orate pro nobis. // Sancte Andrea - ora pro nobis // Sancte Ioannes - ora pro nobis // Sancta Maria Magdalena - ora pro nobis // Sancte Stephane - ora pro nobis // Sancte Ignati Antiochene - ora pro nobis // Sancte Laurenti - ora pro nobis // Sanctae Perpetua et Felicitas - orate pro nobis // Sancta Agnes - ora pro nobis // Sancte Gregori - ora pro nobis // Sancte Augustine - ora pro nobis // Sancte Athanasi - ora pro nobis // Sancte Basili - ora pro nobis // Sancte Martine - ora pro nobis // Sancte Benedicte - ora pro nobis // Sancti Francisce et Dominice - orate pro nobis // Sancte Francisce (Xavier)- ora pro nobis
// Sancte Ioannes MarIa (Vianney)- ora pro nobis // Sancta Catharina (Senensi)- ora pro nobis // Sancta Teresia (de Avila)- ora pro nobis // Omnes Sancti et Sanctae Dei - orate pro nobis
Propitius esto libera nos, Domine // Ab omni malo libera nos, Domine // Ab omni peccato libera nos, Domine // A morte perpetua libera nos, Domine // Per incarnationem tuam libera nos, Domine // Per mortem et resurrectionem tuam libera nos, Domine // Per effusionem Spiritus Sancti libera nos, Domine //
Peccatores te rogamus, audi nos // Ut hos electos per gratiam Baptismi // regenerare digneris te rogamus, audi nos // Iesu, Fili Dei vivite rogamus, audi nos // // Christe, audi nos // Christe, audi nos // // Christe, exaudi nos // Christe, exaudi nos
215 Tunc celebrans, ad fontem conversus, profert benedictionem hanc: Deus, qui invisibili potentia per sacramentorum signa mirabilem operaris effectum, et creaturam aquae multis modis preparasti, ut Baptismi gratiam demonstraret; Deus, cuius Spiritus super aquas inter ipsa mundi primordia ferebatur, ut iam tunc virtutem sanctificandi aquarum natura conciperet; Deus, qui regenerationis speciem in ipsa diluvii effusione signasti, ut unius eiusdemque elementi mysterio et finis esset vitiis et origo virtutum; Deus, qui Abrahae filios per mare Rubrum sicco vestigio transire fecisti, ut plebs, a Pharaonis servitute liberata, populum baptizatorum praefiguraret; Deus, cuius Filius, in aqua Iordanis a Ioanne baptizatus, Sancto Spiritu est inunctus, et, in cruce pendens, una cum sanguine aquam de latere suo produxit, ac, post resurrectionem suam, discipulis iussit:
"Ite, docete omnes gentes, baptizantes eos in nomine Patris, et Filii, et Spiritus Sancti": Respice in faciem Ecclesiae tuae, eique dignare fontem Baptismatis aperire. Sumat haec aqua Unigeniti tui gratiam de Spiritu Sancto, ut homo, ad imaginem tuam conditus, sacramento Baptismatis a cunctis squaloribus vetustatis ablutus, in novam infantiam ex aqua et Spiritu Sancto resurgere mereatur.
Celebrans manu dextera tangit aquam et pergit: Descendat, quaesumus, Domine, in hanc plenitudinem fontis per Filium tuum virtus Spiritus Sancti, ut omnes, cum Christo consepulti per Baptismum in mortem, ad vitam cum ipso resurgant. Per Christum Dominum nostrum.
Omnes: Amen.
Aliae formula ad libitum, n. 389.
216 Tempore autem paschali, si praesto est aqua baptismalis in Vigilia paschali benedicta, ne desit Baptismo elementum gratiarum actionis et deprecationis, fit benedictio et invocatio Dei super aquam secundum formulas, quae inveniuntur n. 389, ratione habita variationis textus in fine earundem formularum.
217 Consecratione fontis peracta, celebrans electos omnes simul interrogat:
Formula A // Abrenuntiatis Satanae et omnibus operibus et seductionibus eius? Electi: Abrenuntio.
Vel Formula B // Abrenuntiatis Satanae? Electi: Abrenuntio. - Celebrans: Et omnibus operibus eius? - Electi: Abrenuntio. - Celebrans: Et omnibus pompis eius? - Electi: Abrenuntio.
Vel Formula C // Abrenuntiatis peccato, ut in libertate filiorum Dei vivatis? - Electi: Abrenuntio. - Celebrans: Abrenuntiatis seductionibus iniquitatis, ne peccatum vobis dominetur? - Electi: Abrenuntio. - Celebrans: Abrenuntiatis Satanae, qui est auctor et princeps peccati. - Electi: Abrenuntio.
Pro opportunitate, celebrans, de nomine baptizandorum a patrinis (vel a matrinis)certior factus, unumquemque interrogat ad libitum eligens unam ex tribus formulis supradictis. Praeterea haec tres formulae, si casus ferat, pressius accommodari possunt a Conferentiis Episcopalibus, praesertim ubi necesse est ut electi abrenuntient superstitionibus, divinationibus et magicis artibus (cf. supra n. 80).
218 Nisi unctio cum Oleo catechumenorum antea, inter ritus immediate praeparatorios (nn. 206-207), facta sit celebrans dicit:
Muniat vos virtus Christi Salvatoris, in cuius signum vos oleo linimus salutis, in eodem Christo Domino nostro, qui vivit et regnat in saecula saeculorum.
Electi: Amen.
Singuli electi liniuntur Oleo catechumenorum in pectore vel in ambabus manibus vel etiam in aliis partibus corporis, si opportunum esse videtur. Si numerosiores sunt electi, plures ministros adhibere licet. Unctio haec omitti potest de iudicio Conferentiae Episcopalis.
219 Deinde celebrans, de nomine uniuscuiusque baptizandi tempestive iterum certior factus a patrino (vel a matrina), unumquemque interrogat:
N., credis in Deum Patrem omnipotentem, creatorem caeli et terrae?
Electus: Credo.
Celebrans: Credis in Iesum Christum, Filium eius unicum, Dominum nostrum, natum ex Maria Virgine, passum et sepultum, qui a mortuis resurrexit et sedet ad dexteram Patris?
Electus: Credo.
Celebrans: Credis in Spiritum Sanctum, sanctam Ecclesiam catholicam, Sanctorum communionem, remissionem peccatorum, carnis resurrectionem et vitam aeternam?
Electus: Credo.
Post professionem fidei quisque statim immergitur vel abluitur. Quando baptizandi numerosiores sunt, professio fidei ab omnibus simul vel a pluribus simul fieri potest.
220 Si Baptismus fit per immersionem sive totius corporis sive capitis tantum, provideatur ut iura pudicitia et decoris serventur. Celebrans, electum tangens, eum vel caput eius ter immergendo et toties erigendo, baptizat, sanctissimam Trinitatem semel tantum invocans:
N., ego te baptizo in nomine Patris, immergit primo
et Filii, immergit secondo
et Spiritus Sancti. immergit tertio
Patrinus vel matrina vela ambo baptizandum tangunt. Post Baptismum uniuscuiusque adulti opportune profertur brevis acclamatio populi (cf. nn. 391-411).
221 Si autem Baptismus fit per infusionem, celebrans haurit aquam baptismalem e fonte et, eam terinfundens supra caput electi inclinatum, baptizat cum in nomine sanctissimae Trinitatis:
N., ego te baptizo in nomine Patris, fundit primo
et Filii, fundit secondo
et Spiritus Sancti. fundit tertio
Patrinus vel matrina vel ambo manum dexteram super dexterum electi umerum imponit.
Post Baptismum uniuscuiusque adulti opportune profertur brevis acclamatio populi (cf. nn. 391-411).
222 Quando numerosiores sunt electi, si plures adsunt sacerdotes vel diaconi, baptizandi possunt inter singulos ministros distribui, qui immergunt eos vel abluunt, quorum singuli formulam in singolari pronuntiant dum agunt. Dum peragitur ritus, optatur cantus populi. Licet etiam lectiones facere vel sacrum silentium servare.
223 Post Baptismum continuo peraguntur ritus explanativi (nn. 224-226). Quibus expletis, ex more, celebratur Confirmatio, ut infra (nn. 227-231), quo in casu unctio post Baptismum omittitur.
224 Si autem celebratio Confirmationis, peculiari de causa, a Baptismo separatur, tunc, post immersionem vel infusionem aquae, celebrans unctionem chrismatis modo consueto ministrat, dicens super omnes insimul baptizatos:
Deus Omnipotens, Pater Domini nostri Iesu Christi, qui vos regeneravit ex aqua et Spiritu Sancto, quique dedit vobis remissionem omnium peccatorum, ipse vos linit chrismate salutis, ut, eius aggregati populo, Christi sacerdotis, prophetae et regis membra permaneatis in vitam aeternam.
Baptizati: Amen.
Postea celebrans singulos sacro Chrismate in vertice capitis linit, nihil dicens. Si autem baptizati numerosiores sunt et plures adsunt presbiteri vel diaconi, singuli possunt aliquos baptizatos Chrismate linire.
225 Celebrans dicit:
N. et N., nova creatura facti estis et Christum induistis. Accipite ergo vestem candidam, quam perferatis immaculatam ante tribunal Domini nostri Iesu Christi, ut habeatis vitam aeternam.
Baptizati: Amen.
Ad verba Accipite ergo vestem candidam, patrini vel matrinae neophytis imponunt vestem albam, nisi color aptior consuetudinibus loci requiratur. Pro opportunitate, hic ritus omitti potest.
226 Postea celebrans cereum paschalem manibus accipit vel tangit, dicens:
Accedite, patrini et matrinae, ut lumen neophytis tradatis.
Accedunt patrini ac matrinae et cereum e cereo paschali accendunt, eumque neophyto porrigunt. Deinde celebrans ait:
Lux in Christo facti estis. Ut Filii lucis indesinenter ambulate, ut, in fide perseverantes, advenienti Domino occurrere valeatis cum ominibus Sanctis in aula caelesti.
Baptizati: Amen.
227 Inter celebrationem Baptismi et Confirmationis, pro opportunitate, peragitur a congregatione cantus aptus. Celebratio Confirmationis fieri potest aut in presbiterio aut in ipso baptisterio, prouti locorum adiuncta suadent.
228 Si Baptismus ab Episcopo collatus est, expedit ut ipse Confirmationem quoque statim ministret. Absente vero Episcopo, Confirmatio dari potest a presbytero, qui Baptismum contulit. Quando confirmandi numerosiores sunt, Confirmationis ministro ad sacramentum ministrandum sociari possunt presbiteri qui ad hoc munus designari valent (cf. n. 46).
229 Celebrans breviter alloquitur neophytos, his vel similibus verbis:
Dilectissimi neophyti, in Christo regenerati et membra Christi eiusque populi sacerdotalis effecti, vobis nunc superest ut in nos effusum accipiatis Spiritum Sanctum, qui, super Apostolos die Pentecostes a Domino missus, ab ipsis eorumque successoribus datus est baptizatis. Vos ergo pariter accipietis promissam Spiritus Sancti virtutem, qua, perfectius Christo conformati, dominicae passionis et resurrectionis testimonium perhibeatis et actuosa Ecclesiae membra efficiamini, in aedificationem Corporis Christi in fide et caritate.
Deinde celebrans (habens apud se presbyteros qui ipsi sociantur)stans, manibus iunctis, versus ad populum dicit: Oremus, dilectissimi, Deum Patrem omnipotentem, ut super hos neophytos Spiritum Sanctum benignus effundat, qui illos abundantia suorum confirmet donorum, et unctione sua Christi, Filii Dei, conformes perficiat.
Et omnes per aliquod temporis spatium in silentio orant.
230 Deinde celebrans (et presbyteri qui ipsi sociantur)manus super omnes confirmandos imponunt. Solus autem celebrans dicit:
Deus Omnipotens, Pater Domini nostri Iesu Christi, qui hos famulos tuos rigenerasti ex aqua et Spiritu Sancto, liberans eos a peccato, tu, Domine, immitte in eos Spiritum Sanctum Paraclitum; da eis Spiritum sapientiae et intellectus, Spiritum consilii et fortitudinis, Spiritum scientiae et pietatis; adimple eos spiritu timoris tui. Per Christum Dominum nostrum.
Omnes: Amen.
231 Tunc celebranti offertur a ministro sanctum Chrisma. Unusquisque confirmandorum accedit ad celebrantem; vel pro opportunitate ipse celebrans accedit ad singulos confirmandos. Patrinus autem (vel matrina)ponit manum dexteram super umerum eius et dicit celebranti nomen eius, vel confirmandus sua sponte nomen profert. Celebrans, summitate pollicis dexterae manus Chrismate intincta, ducit pollice signum crucis in fronte confirmandi, dicens:
N, Accipe signaculum Doni Spiritus Sancti.
Confirmatus: Amen.
Celebrans subdit: Pax tibi.
Confiirmatus: Et cum spiritu tuo.
Si autem alii presbiteri ad sacramentum conferendum celebranti sociantur, ipsis omnia vascula sancti Chrismatis ab Episcopo, si adest, praebentur. Confirmandi accedunt ad celebrantem vel ad presbyteros; aut, pro opportunitate, celebrans et presbiteri accedunt ad confirmandos, qui unguntur modo supra descripto. Inter unctionem cani potest aliquis cantus aptus.
232 Omisso Symbolo, statim fit oratio universalis, quam neophyti primum participant. Dum oblata ad altare portantur, nonnulli ex eis ea deferunt.
233 In Prece eucharistica I, mentio fiat neophytorum in Hanc Igitur, et patrinorum in memento (n. 377). Si sumatur Prex eucharistica Il, III vel IV, addantur pro neophytis verba inserendo, quae inveniuntur n. 391.
234 Expedit ut neophyti sacram communionem recipiant sub utraque specie, una cum patrinis, matrinis, parentibus et coniugibus, necnon catechistis laicis. Ante communionem, id est ante Ecce Agnus Dei, celebrans neophytos breviter monere potest de pretio tanti mysterii, quod est initiationis culmen et totius vitae christianae centrum.
235 Ut primi gressus neophytorum firmiores sint, optatur ut in omnibus adiunctis a communitate fidelium, a patrinis suis et a pastoribus attente et familiariter adiuventur. Omnino curetur, ut plenam et iucundam insertionem in communitatem assequantur.
236 Per totum tempus paschale, in Missis dominicalibus, loca particularia neophytis propria inter fideles serventur. Omnes neophyti studeant Missas cum patrinis suis participare. In homilia et, pro opportunitate, etiam in oratione universali de illis ratio habeatur.
237 Ad claudendum tempus mystagogiae, in fine temporis paschalis, circa dominicam Pentecostes, habeatur aliqua celebratio, additis etiam externis festivitatibus iuxta consuetudines regionis.
238 In anniversario Baptismi optandum est ut neophyti iterum congregentur ad gratias Deo agendas, spiritualem experientiam inter se conferendam et novas sumendas vires.
239 Ad ineundum cum novis Ecclesiae suae membris pastorale commercium, curam habeat Episcopus, praesertim si ipse sacramentis initiationis praesidere nequierit, ut semel saltem in anno, quantum fieri potest, neophytos nuper baptizatos conveniat celebrationique Eucharisticae praesideat, in qua ipsis sub utraque specie communicare licet.
370 Ad n. 76: Formulae monitionis ante primam adhaesionem candidati, qui fit catechumenus:
Celebrans: Deus, qui mundum nosque homines condidit et in quo moventur viventia, mentes nostras illuminat, ut ipsum agnoscamus et colamus. Testem etiam suum fidelem misit Iesum Christum, ut quae vidit, caelestia et terrestria, nobis nuntiaret. Vobis ergo, qui de Christi adventu laetamini, tempus est ipsum addiedi, ut, nobiscum incipientes Deum cognoscere vestrumque diligere proximum, caelestem vitam habeatis. Parati estis cum auxilio Dei hanc vitam ducere?
Candidati:Paratus sum.
Celebrans: Vita aeterna haec est, ut cognoscatis Deum verum et quem misit Iesum Christum. Ipse enim, a mortuis suscitatus, a Deo constitutus est vitae princeps et universorum, visibilium atque invisibilium, Dominus. Si ergo exoptatis eius fieri discipuli et Ecclesiae membra, oportet ut inducamini in omnem, quam nobis revelavit, veritatem; ut in vobis hoc sentire discatis quod et in Christo Iesu, et conversationem vestram? evangelicis praeceptis confermare studeatis, et ideo Dominum Deum et proximum vestrum diligatis, sicut Christus nobis mandavit et ostendit. Haec omnia suo quisque vestrum assensu approbat?
Candidati: Approbo.
371 Ad n. 80: Forma alia abrenuntiandi gentilitiis cultibus:
Celebrans: Dilectissimi candidati, Deum verum, qui vos vocavit et hucusque adduxit, praeoptastis colere eique soli servire eiusque Filio Iesu Christo. Nunc igitur, coram tota congregatione, abrenuntiate ritibus et cultibus, quibus verus non colitur Deus. Ipsum autem eiusque Filium Iesum Christum ne deseratis, ut aliis iterum dominis serviatis.
Candidati: Absit a nobis ut aliis dominis quam vero Deo serviamus.
Celebrans: Christum Iesum, vivorum et mortuorum Dominum, qui omnibus spiritibus et daemonibus imperat, ne, deseratis, ut N.(hic mentio fit numinum, quae in falsis ritibus coluntur, V.g. 1/2 fetiches ) Iterum colatis.
Candidati: Absit a nobis.
Celebrans: Christum Iesum, qui solus homines protegere valet, ne desertis, ut iterum N. (hic nominantur res, quae superstitiose usurpantur, v.g.: amuletti, amulettes, amulets), quaeratis (vel: portetis, adhibeatis).
Candidati: Absit a nobis.
Celebrans: Christum Iesum qui solus veritas est, ne deseratis, ut hariolos, magos et praestigiatores iterum adeatis.
Candidati: Absit a nobis.
Formula supradicta, pro opportunitate, accommodari potest.
372 Ad n. 92: Lectiones biblicae pro Ordine ad catechumenos faciendos: Psalmi responsorii
373 Ad nn. 113-118: Aliae orationes exorcismi ad libitum:
Oremus. Domine Iesu Christe, hominum amator et redemptor, in cuius nomine omnes salvos fieri oportet, cui omne genu flectitur caelestium, terrestrium et infernorum, pro his famulis tuis, qui te verum Deum adorant, te supplices deprecamur: eorum corda illumina et perspice; omnem inimici tentationem et invidiam ab eis amove; eorum peccata et infirmitates sana, ut, voluntatem tuam beneplacentem et perfectam probantes, evangelio tuo perseveranter oboediant et commoratione Spiritus Sancti digni efficiantur. Qui vivis et regnas in saecula saeculorum. Amen.
Oremus. Domine Iesu Christe, qui, a Patre missus et a Spiritu Sancto unctus, prophetae oraculum in synagoga adimplere voluisti, captivis libertatem praedicando annumque Deo placabilem, te supplices exoramus pro his famulis tuis, qui aures ad te et corda intendunt: praesta, ut opportunum gratiae tempus recipiant. Ne mente angustiati permaneant neque, in carnis coversantes desideriis, a spe promissionum alienati et spiritui diffidentiae oboedientes; sed potius, in te credentes, cui Pater omnia subiecit et quem super omnes, constitut, Spiritui fidei et gratiae se submittant, ut spem vocationis suae servantes, dignitatem populi sacerdotalis consequantur, et novae Ierusalem affluenter exsultent laetitia. Qui vivis et regnas in saecula saeculorum. Amen.
Oremus. Domine Iesu Christe, qui sedata tempestate et demoniacis liberatis, publicanum Matthaeum ad te vocasti, ut misericordia tuae redderetur exemplum et in saecula memoraret mandatum tuum omnes docendi gentes, supplices te rogamus pro his famulis tuis, qui se peccatores profitetur. Adversam inimici potestatem cohibere digneris, et praesta, ut ipsi, tuam experti misericordiam, a vulneribus peccati sanentur pacemque cordis inveniant, novitate Evangelii delectentur et vocationem tuam pleno corde sequantur. Qui vivis et regnas in saecula saeculorum. Amen.
Oremus. Deus altissimae sapientiae, qui Paulum apostolum vocasti, ut inter gentes Filium tuum evangelizaret, te supplices deprecamur pro his famulis tuis, qui Baptismum sanctum exoptant: praesta, ut, Apostolum gentium imitantes, non acquiescat carni et sanguini, sed gratiae tuae valeant assentiri. Scrutare Igitur et purifica corda eorum, ut, ab omni fallacia liberati, quae retro sunt obliviscentes et ad futura sese extendentes, existiment omnia detrimentum esse propter eminentem scientiam Christi Filii tui, eumque lucrifaciant. Qui vivit et regnat in saecula saeculorum. Amen.
Oremus. Deus, populi tui sancti auctor et redemptor, qui hos catechumenos, mirabili dilectione, ad te attraxisti, hodie, respiciens eos eorumque corda purificans, dispensationem mysterii tui in eis adimpleas, ut, Christum sincero corde sequentes, aquam salutis haurire mereantur.
Per Christum Dominum nostrum. Amen.
374 Ad nn. 121-124: Aliae orationes benedictionis catechumenorum: Oremus. Domine Deus noster, qui in altis habitas et humilia respicis, qui ad salutem humani generis misisti Filium tuum, Deum ac Dominum nostrum Iesum Christum, respice servos tuos catechumenos, suas tibi cervices humiliter inclinantes: dignos fac ipsos lavacro regenerationis, remissione peccatorum et indumento incorruptionis; aggrega eos sanctae tuae catholicae et apostolicae Ecclesiae, ut ipsi nobiscum nomen tuum glorificent. Per Christum Dominum nostrum. Amen.
Oremus. Deus, omnium Dominus, qui per unigenitum Filium tuum deturbasti Satanam et, solutis vinculis eius, homines liberasti captivos, gratias tibi agimus pro catechumenis, quos vocasti: confirmentur in fide ut cognoscant te solum Deum verum, et quem misisti Iesum Christum; serventur mundi corde et virtute proficiant, ut lavacro regenerationis sanctisque mysteriis digni fiant. Per Christum Dominum nostrum. Amen.
Oremus. Deus, qui omnes homines vis salvos fieri et ad agnitionem veritatis venire, fidem tuam cordibus eorum, qui ad Baptismum praeparantur, benignus infunde, eosque Ecclesiae tuae sanctae aggrega miseratus, ut immortalitatis dono digni efficiantur. Per Christum Dominum nostrum. Amen.
Oremus. Domine Deus Omnipotens, Pater Salvatoris nostri Iesu Christi, pro his famulis tuis clementer aspice: omnes idololatriae a mentibus eorum expelle reliquias; in cordibus eorum legem tuam et praecepta tua confirma; adduc eos ad plenam agnitionem veritatis, et praepara eos, ut, per regenerationem Baptismi, fiant templum Spiritus Sancti. Per Christum Dominum nostrum. R. Amen.
Oremus. Respice, Domine, famulos tuos, qui adhaerent nomini tuo sancto et inclinant capita sua coram te: adiuva eos in omne opus bonum; corda eorum ut, memores operum et mandatorum tuorum, ad omnia, quae tua sunt, alacriter festinent. Per Christum Dominum nostrum. Amen.
bis Ad n. 141: Textus Missae ritualis pro electione: Ant. ad introitum Ps 104, 3-4. Laetetur cor quaerentium Dominum. Quaerite Dominum et confirmamini, quaerite faciem eius semper.
Collecta. Deus, qui, licet salutem hominum semper operaris, nunc tamen populum tuum gratia abundantiore laetificas, respice propitius ad electionem tuam, ut piae, protectionis auxilium et regenerandos muniat et renatos. Per Dominum.
Super oblata. Omnipotens sempiterne Deus, qui nos ad aeternam vitam in confessione tui nominis baptismatis reparas sacramento, suscipe tuorum munera et vota famulorum, ut in te sperantium et desideria iubeas perfici et peccata deleri. Per Christum.
Ant. ad communionem Eph 1, 7. In Christo habemus redemptionem per sanguinem eius, remissionem peccatorum, secundum divitias gratiae eius.
Post communionem .Puricent nos, quaesumus, Domine, sacramenta quae sumpsimus, et famulos tuos ab omni culpa liberos esse concede, ut, qui conscientiae reatu constringuntur, caelestis remedii plenitudine glorientur. Per Christum.
Sumi potest etiam Missa feriae sextae, hebdomadae IV in Quadragesima.
375 Ad n. 148: Forma alia deprecationis post electionem: Ut electi nostri gaudium in cotidiana oratione hauriant: Te rogamus, audi nos.
Ut, frequenter te orantes, magis ac magis tecum coniuncti vivant: Te rogamus, audi nos. // Ut verbum tuum legere et corde gaudeant meditari: Te rogamus, audi nos // Ut, defectus suos humiliter agnoscentes, strenue eos incipiant emendare: Te rogamus, audi nos
// Ut opus cotidianum in oblationem tibi gratam convertant: Te rogamus, audi nos // Ut singulis diebus Quadragesimae aliquid tibi devoveant: Te rogamus, audi nos // Ut a qualibet macula, qua cordis munditia inquinatur, forti animo abstineant: Te rogamus, audi nos // Ut virtutem et sanctitatem vitae diligere et servare assuescant: Te rogamus, audi nos // Ut, sui ipsius amori abrenuntiantes, aliis magis quam sibi consulant: Te rogamus, audi nos // Ut eorum familias benigne custodias et benedicas: Te rogamus, audi nos // Ut laetitiam ex fide comparatam cum ceteris communicent: Te rogamus, audi nos.
376 Ad n. 160: Lectiones pro 1 scrutinio: Psalmus responsorius: Lectio II. Evangelium.
377 Ad n. 160: Textus pro Missa in qua celebratur I scrutinium:
Collecta. Da, quaesumus, Domine, electis nostris digne atque sapienter ad confessionem tuoi laudis accedere, ut dignitate pristina, quam originali transgressione perdiderunt, per tuam gloriam reformentur. Per Dominum.
Super oblata. Miseratio tua, Deus, ad haec percipienda mysteria famulos tuos, quaesumus, et praeveniat competenter et devota conversatione perducat. Per Christum.
memento de patrinis (in Canone Romano): Memento, Domine, famulorum famularumque tuarum, qui electos tuos suscepturi sunt ad sanctam gratiam Baptismi tui et recitantur nomina patrinorum et matrinarum, et omnium circumstantium, quorum tibi fides cognita est...
Hanc Igitur proprium: Hanc Igitur oblationem, Domine, ut propitius suscipias deprecamur, quam tibi offerimus pro famulis et famulobus tuis, quos ad aeternam vitam et beatum gratiae tuae donum numerare, eligere atque vocare dignatus es. (Per Christum Dominum nostrum. Amen).
Post communionem. Adesto, Domine, quaesumus, redemptionis effectibus, ut quos sacramentis aeternitatis institues, eosdem protegas dignanter aptandos. Per Christum.
378 Ad n. 163: Forma alia deprecationis ad libitum pro I scrutinio
Ut electi nostri, sicut Samaritana mulier, vitam suam coram Christo recolant et propria peccata agnoscant, Dominum precemur. Exaudi, Domine.
// Ut a spiritu diffidentiae, qui a via Christi gressus hominum abducit, liberentur, Dominum precemur. Exaudi, Domine. // Ut, donum Dei exspectantes, aquam vivam, in vitam aeternam salientem, toto corde exoptent, Dominum precemur. Exaudi, Domine. // Ut, Filium Dei suscipientes, magistrum, veri adoratores Dei Patris in spiritu et veritate evadant, Dominum precemur. Exaudi, Domine. // Ut, mirabilem Christi occursum experti, amicis etiam et civibus laetum eius nuntium perferant, Dominum precemur. Exaudi, Domine. // Ut omnes in orbe pauperes et verbo Dei egentes ad Evangelium Christi valeant accedere, Dominum precemur. Exaudi, Domine. // Ut nos omnes a Christo edoceamur et, voluntatem Patris diligentes, opus eius amanter perficiamus, Dominum precemur. Exaudi, Domine.
379 Ad n. 164: Forma alia exorcismi pro I scrutinio:
Oremus. Misericordiarum Pater, qui per Filium tuum benignus Samaritanae misertus es et, eadem paterna sollicitudine permotus, omnibus peccatoribus salutem obtulisti, eximia dilectione tua hos respice electos, qui adoptionem filiorum per sacramenta exoptant accipere: solve eos a peccati servitute et a gravi iugo Satanae, ut suave Iesu iugum suscipiant; protege eos in omnibus periculis, ut, tibi in pace et gaudio fideliter servientes, tibi Etiam gratias in perpetuum valeant referre. Per Christum Dominum nostrum. Amen.
Domine Iesu, qui miro misericordia tuae consilio mulierem peccatricem convertisti, ut in spiritu deinceps et in veritate Patrem adoraret, nunc a perniciosis Satanae fraudibus hos electos potenter libera, qui ad fontem aquae vivere propinquant; corda eorum in virtute Spiritus Sancti converte, ut in sincera fide, quae per caritatem operatur, Patrem tuum agnoscant. Qui vivis et regnas in saecula saeculorum. Amen.
380 Ad n. 167: Lectiones pro II scrutinio:
381 Ad n. 167: Textus pro Missa in qua celebratur II scrutinium:
Collecta. Omnipotens sempiterne Deus, Ecclesiam tuam spiritali iucunditate multiplica, ut, qui sunt generatione terreni, fiant regeneratione caelestes. Per Dominum.
Super oblata. Remedii sempiterni munera, Domine, laetantes offerimus, suppliciter exorantes, ut eadem nos et digne venerari et pro salvandis congruenter exhibere perficias. Per Christum.
memento pro patrinis et Hanc Igitur proprium, ut supra, n. 377.
Post communionem. Tu semper, quaesumus, Domine, tuam attolle benignus familiam, tu dispone correctam, tu propitius tuere subiectam, tu guberna perpetua bonitate salvandam. Per Christum.
382 Ad n. 170: Forma alia deprecationis pro II scrutinio:
Ut, fugatis tenebris, cordibus electorum nostrorum ipse illucescat, Dominum precemur. Exaudi, Domine. // Ut ipse eos ad Christum suum, lumen huius mundi factum, benignus adducat, Dominum precemur. Exaudi, Domine. // Ut electi nostri, corda sua aperientes, Deum confiteantur principem luminis et testem veritatis, Dominum precemur. Exaudi, Domine. // Ut, ab eodem sanati, ab incredulitate huius mundi serventur, Dominum precemur. Exaudi, Domine. // Ut, ab illo salvati, qui tollit peccatum mundi, ab huius peccati contagione et pressura liberentur, Dominum precemur. Exaudi, Domine.
// Ut, a Spiritu Sancto illuminati, Evangelium salutis indesinenter profiteantur ceterisque tradant, Dominum precemur. Exaudi, Domine. // Ut nos omnes, morum exemplo nostrorum, lux mundi et ipsi in Christo inveniamur, Dominum precemur. Exaudi, Domine. // Ut omnes terrae habitatores verum Deum, creatorem omnium agnoscant, qui nobis hominibus spiritum et vitam largitur, Dominum precemur. Exaudi, Domine.
383 Ad n. 171: Forma alia exorcismi pro II scrutinio:
Oremus. Deus, lumen indeficiens et pater luminum, qui per Christi tui mortem et resurrectionem tenebras mendacii et odii exturbasti et lucem veritatis et amoris in humanam familiam efundisti, concede, quaesumus, ut electi tui, quos inter adoptionis filios vocasti, a tenebris ad claritatem valeant transire et, ab omni potestate principis tenebrarum liberati, indesinenter maneant filii lucis. Per Christum Dominum nostrum. Amen.
Domine Iesu, qui ipse baptizatus de caelis apertis accepisti Spiritum Sanctum, ut in eo pauperes evangelizares et caecis restitueres visum hunc Spiritum effunde in eos, qui sacramenta tua cupiunt, ut, a contagione erroris, dubii et incredulitatis preservati rectaque fide ducti, oculis sanatis et erectis te valeant contemplari. Qui vivis et regnas in saecula saeculorum. Amen.
384 Ad n. 174: Lectiones pro III scrutinio:
385 Ad n. 174. Textus pro Missa in qua celebratur III scrutinium:
Collecta. Concede, Domine, electis nostris, ut, sanctis edocti mysteriis, et renoventur fonte baptismatis et inter Ecclesiae tuae membra numerentur. Per Dominum.
Super oblata. Exaudi nos, Omnipotens Deus, et famulos tuos, quos fidei christianae primitiis imbuisti, huius sacrificii tribuas operatione mundari. Per Christum.
Memento pro patrinis et Hanc Igitur proprium, ut supra, n. 377.
Post communionem. Concurrat, Domine, quaesumus, populus tuus et toto tibi corde subiectus obtineat, ut, ab omni perturbatione securus, et salvationis suae gaudia promptus exerceat et pro regenerandis benignus exoret. Per Christum.
386 Ad n. 177: Forma alia deprecationis pro III scrutinio:
Ut his electis fides donetur, qua Christum resurrectionem et vitam esse fateantur, Dominum precemur. Exaudi, Domine. // Ut, a peccatis liberati, fructum habeant in sanctificationem et vitam aeternam, Dominum precemur. Exaudi, Domine. // Ut, solutis per paenitentiam vinculis peccati, Christo conformes per Baptismum evadant et, peccato mortui, Deo semper vivant, Dominum precemur. Exaudi, Domine. // Ut, vivificantis Spiritus spem habentes, ad renovationem vitae strenue se disponant, Dominum precemur. Exsaudi, Domine.
// Ut per cibum eucharisticum, quem proxime gustabunt, cum ipso auctore vitae et resurrectionis socientur, Dominum precemur. Exaudi, Domine. // Ut nos omnes, in novitate vitae ambulantes, virtutem resurrectionis Christi mundo ostendamus, Dominum precemur. Exaudi, Domine. // Ut omnes terrae habitatores, Christum invenientes, in ipso promissiones vitae aeternae agnoscant, Dominum precemur. Exaudi, Domine.
387 Ad n. 178: Forma alia exorcismi pro III scrutinio:
Oremus. Pater, omnis vitae fons, qui in homine vivente gloriam tuam quaeris et in resurrectione mortuorum omnipotentiam tuam revelas hos electos a mortis imperio eripere digneris, qui per Baptismum ad vitam accedere cupiunt. Libera eos a diaboli servitute, qui per peccatum mortem induxit et mundum, quem bonum creasti, corrumpere satagit. Subice eos potestati filii dilectionis tuae, ut resurrectionis virtutem ab eo accipiant et gloriam tuam coram hominibus testificentur. Per Christum Dominum nostrum. Amen.
Domine Iesu Christe, qui Lazarum e tumulo vivum exire iussisti et resurrectione tua omnes a morte homines liberasti, te humiliter deprecamur pro famulis tuis, qui ad aquam regenerationis et ad cenam vitae festinant: ne permittas eos mortis imperio detineri, qui fide sua in victoria resurrectionis tuae partem habebunt. Qui vivis et regnas in saecula saeculorum. Amen.
Ordo Initiationis Christianae 182