Missale Romanum 1957 - S. PETRI CHRYSOLOGI
Pro S. BARBARA
Virgine et Martyre
Missa Loquébar, de Communi Virginum 1 loco.
Pro S. SABBA
Abbate
Missa Os justi, de Communi Abbatum.
Oratio C
INTERCÉSSIO nos, quaésumus, Dómine, beáti Sabbae Abbátis comméndet: ut, quod nostris méritis non valémus, ejus patrocínio assequámur. Per Dóminum.
Secreta C
SACRIS altáribus, Dómine, hóstias superpósitas sanctus Sabbas, quaésumus, in salútem nobis proveníre depóscat. Per Dóminum.
Postcommunio C
PRÓTEGAT nos, Dómine, cum tui perceptióne sacraménti beátus Sabbas pro nobis intercedéndo: ut et conversatiónis ejus experiámur insígnia, et intercessiónis percipiámus suffrágia. Per Dóminum.
* Si hodie fuerit Sabbatum, Missae privatae dicuntur de Dominica praecedenti cum 2a Oratione S. Sabbae et 3a de sancta Maria Deus, qui de beátae ; Missa vero conventualis dicitur in choro post Sextam de sancta Maria in Sabbato cum 2a Oratione Feriae et 3a S. Sabbae, juxta Rubricas.
Episcopi et Confessoris
Duplex
Introitus Eccli. 45, 30
STÁTUIT ei Dóminus testaméntum pacis, et príncipem fecit eum: ut sit illi sacerdótii dígnitas in aetérnum. Ps. 131, 1 Meménto, Dómine, David: et omnis mansuetúdinis ejus. V/. Glória Patri.
Oratio
DEUS, qui beátum Nicoláum Pontíficem innúmeris decorásti miráculis: tríbue, quaésumus ; ut ejus méritis et précibus a gehénnae incéndiis liberémur. Per Dóminum.
Et fit Commemoratio Feriae, praeterquam in Missa conventuali, si hodie fuerit Sabbatum.
Léctio Epístolae beáti Pauli Apóstoli ad Hebraéos.
Hebr. 13, 7-17
FRATRES: Mementóte praepositórum vestrórum, qui vobis locúti sunt verbum Dei: quorum intuéntes éxitum conversatiónis, imitámini fidem. Jesus Christus heri et hódie: ipse et in saécula. Doctrínis váriis et peregrínis nolíte abdúci. Optimum est enim grátia stabilíre cor, non escis, quae non profuérunt ambulántibus in eis. Habémus altáre, de quo édere non habent potestátem, qui tabernáculo desérviunt. Quorum enim animálium infértur sanguis pro peccáto in Sancta per pontíficem, horum córpora cremántur extra castra. Propter quod et Jesus, ut sanctificáret per suum sánguinem pópulum, extra portam passus est. Exeámus ígitur ad eum extra castra, impropérium ejus portántes. Non enim habémus hic manéntem civitátem, sed futúram inquírimus. Per ipsum ergo offerámus hóstiam laudis semper Deo, id est, fructum labiórum confiténtium nómini ejus. Beneficéntiae autem, et communiónis nolíte oblivísci: tálibus enim hóstiis promerétur Deus. Obedíte praepósitis vestris, et subjacéte eis. Ipsi enim pervígilant, quasi ratiónem pro animábus vestris redditúri.
Graduale Ps. 88, 21-23 Invéni David servum meum, óleo sancto meo unxi eum: manus enim mea auxiliábitur ei, et bráchium meum confortábit eum. V/. Nihil profíciet inimícus in eo, et fílius iniquitátis non nocébit ei.
Allelúja, allelúja. V./ Ps. 91, 13 Justus ut palma florébit: sicut cedrus Líbani multiplicábitur. Allelúja.
+ Sequéntia sancti Evangélii secúndum Matthaéum.
Matth. 25, 14-23
IN illo témpore: Dixit Jesus discípulis suis parábolam hanc: Homo péregre proficíscens, vocávit servos suos, et trádidit illis bona sua. Et uni dedit quinque talénta, álii autem duo, álii vero unum, unicuíque secúndum própriam virtútem, et proféctus est statim. Abiit autem qui quinque talénta accéperat, et operátus est in eis, et lucrátus est ália quinque. Simíliter qui duo accéperat, lucrátus est ália duo. Qui autem unum accéperat, ábiens fodit in terram, et abscóndit pecúniam dómini sui. Post multum vero témporis venit dóminus servórum illórum, et pósuit ratiónem cum eis. Et accédens qui quinque talénta accéperat, óbtulit ália quinque talénta, dicens: Dómine, quinque talénta tradidísti mihi, ecce ália quinque superlucrátus sum. Ait illi dóminus ejus: Euge serve bone, et fidélis, quia super pauca fuísti fidélis, super multa te constítuam: intra in gáudium dómini tui. Accéssit autem et qui duo talénta accéperat, et ait: Dómine, duo talénta tradidísti mihi, ecce ália duo lucrátus sum. Ait illi dóminus ejus: Euge serve bone, et fidélis, quia super pauca fuísti fidélis, super multa te constítuam: intra in gáudium dómini tui.
Offertorium Ps. 88, 25 Véritas mea, et misericórdia mea cum ipso: et in nómine meo exaltábitur cornu ejus.
Secreta
SANCTÍFICA, quaésumus, Dómine Deus, haec múnera, quae in solemnitáte sancti Antístitis tui Nicolái offérimus: ut per ea, vita nostra inter advérsa et próspera ubíque dirigátur. Per Dóminum.
Et fit Commemoratio Feriae, ut supra.
Communio Ps. 88, 36-38 Semel jurávi in sancto meo: semen ejus in aetérnum manébit, et sedes ejus sicut sol in conspéctu meo, et sicut luna perfécta in aetérnum, et testis in caelo fidélis.
Postcommunio
SACRIFÍCIA, quae súmpsimus, Dómine, pro solemnitáte sancti Pontíficis tui Nicolái, sempitérna nos protectióne consérvent. Per Dóminum.
Et fit Commemoratio Feriae, ut supra.
* Si hodie fuerit Sabbatum, fit de Vigilia anticipata Conceptionis immaculatae B. Mariae Virginis, ut die sequenti notatur.
Episcopi, Confessoris et Ecclesiae Doctoris
Duplex
Introitus Eccli. 15, 5
IN médio Ecclésiae apéruit os ejus: et implévit eum Dóminus spíritu sapiéntiae, et intelléctus: stolam glóriae índuit eum. Ps. 91, 2 Bonum est confitéri Dómino: et psállere nómini tuo, Altíssime. V/. Glória Patri.
Oratio
DEUS, qui pópulo tuo aetérnae salútis beátum Ambrósium minístrum tribuísti: praesta, quaésumus ; ut, quem Doctórem vitae habúimus in terris, intercessórem habére mereámur in caelis. Per Dóminum.
Et, in Missis non conventualibus, fit Commemoratio Feriae.
Deinde Commemoratio Vigiliae.
Léctio Epístolae beáti Pauli Apóstoli ad Timótheum.
2 Tim. 4, 1-8
CARÍSSIME: Testíficor coram Deo, et Jesu Christo, qui judicatúrus est vivos et mórtuos, per advéntum ipsíus, et regnum ejus: praédica verbum, insta opportúne, importúne: árgue, óbsecra, íncrepa in omni patiéntia, et doctrína. Erit enim tempus, cum sanam doctrínam non sustinébunt, sed ad sua desidéria coacervábunt sibi magístros, pruriéntes áuribus, et a veritáte quidem audítum avértent, ad fábulas autem converténtur. Tu vero vígila, in ómnibus labóra, opus fac Evangelístae, ministérium tuum imple. Sóbrius esto. Ego enim jam delíbor, et tempus resolutiónis meae instat. Bonum certámen certávi, cursum consummávi, fidem servávi. In réliquo repósita est mihi coróna justítiae, quam reddet mihi Dóminus in illa die, justus judex: non solum autem mihi, sed et iis, qui díligunt advéntum ejus.
Graduale Eccli. 44, 16 Ecce sacérdos magnus, qui in diébus suis plácuit Deo. V/. Ibid., 20 Non est invéntus símilis illi, qui conserváret legem Excélsi.
Allelúja , allelúja. V/. Ps. 109, 4 Jurávit Dóminus, et non paenitébit eum: Tu es sacérdos in aetérnum, secúndum órdinem Melchísedech. Allelúja.
+ Sequéntia sancti Evangélii secúndum Matthaéum.
Matth. 5, 13-19
IN illo témpore: Dixit Jesus discípulis suis: Vos estis sal terrae. Quod si sal evanúerit, in quo saliétur ? Ad níhilum valet ultra, nisi ut mittátur foras, et conculcétur ab homínibus. Vos estis lux mundi. Non potest cívitas abscóndi supra montem pósita. Neque accéndunt lucérnam, et ponunt eam sub módio, sed super candelábrum, ut lúceat ómnibus qui in domo sunt. Sic lúceat lux vestra coram homínibus, ut vídeant ópera vestra bona, et gloríficent Patrem vestrum, qui in caelis est. Nolíte putáre, quóniam veni sólvere legem aut prophétas: non veni sólvere, sed adimplére. Amen quippe dico vobis, donec tránseat caelum et terra, jota unum, aut unus apex non praeteríbit a lege, donec ómnia fiant. Qui ergo sólverit unum de mandátis istis mínimis, et docúerit sic hómines, mínimus vocábitur in regno caelórum: qui autem fécerit, et docúerit, hic magnus vocábitur in regno caelórum.
Credo.
Offertorium Ps. 88, 25 Véritas mea, et misericórdia mea cum ipso: et in nómine meo exaltábitur cornu ejus.
Secreta
OMNÍPOTENS sempitérne Deus, múnera tuae majestáti obláta, per intercessiónem beáti Ambrósii Confessóris tui atque Pontíficis, ad perpétuam nobis fac proveníre salútem. Per Dóminum.
Et, in Missis non conventualibus, fit Commemoratio Feriae.
Communio Ps. 88, 36-38 Semel jurávi in sancto meo: semen ejus in aetérnum manébit, et sedes ejus sicut sol in conspéctu meo, et sicut luna perfécta in aetérnum, et testis in caelo fidélis.
Postcommunio
SACRAMÉNTA salútis nostrae suscipiéntes, concéde, quaésumus, omnípotens Deus: ut beáti Ambrósii Confessóris tui atque Pontíficis, nos ubíque orátio ádjuvet ; in cujus veneratióne haec tuae obtúlimus majestáti. Per Dóminum.
Et, in Missis non conventualibus, fit Commemoratio Feriae.
Legitur Evangelium ejusdem Vigiliae in fine.
* Ubi adest obligatio Chori, lecta post Tertiam extra Chorum Missa de Festo sine Commemoratione Feriae et Vigiliae, et sine ejusdem Evangelio in fine, in Choro post Nonam dicitur Missa de ipsa Vigilia, ut infra ; quae item sumi potest pro Missis privatis, sed cum 2a Oratione Festi, 3a Feriae.
Introitus Ps. 65, 16
VENÍTE, audíte, et narrábo, omnes qui timétis Deum, quanta fecit Dóminus ánimae meae. Ps. ibid., 1-2 Jubiláte Deo, omnis terra: psalmum dícite nómini ejus, date glóriam laudi ejus. V/. Glória Patri.
Non dicitur Glória in excélsis.
Oratio
DEUS, qui Unigéniti tui Matrem ab origináli culpa in sua Conceptióne mirabíliter praeservásti: da, quaésumus ; ut sua nos intercessióne munítos, corde mundos fácias suae interésse festivitáti. Per eúmdem Dóminum.
Et fit Commemoratio Feriae ; et pro 3a Oratione, juxta diversitate Temporum assignata, dicitur Oratio de Spiritu Sancto.
Léctio libri Sapiéntiae.
Eccli. 24, 23-31
EGO quasi vitis fructificávi suavitátem odóris: et flores mei, fructus honóris et honestátis. Ego mater pulchrae dilectiónis, et timóris, et agnitiónis, et sanctae spei. In me grátia omnis viae et veritátis: in me omnis spes vitae et virtútis. Transíte ad me omnes qui concupíscitis me, et a generatiónibus meis implémini. Spíritus enim meus super mel dulcis, et heréditas mea super mel et favum. Memória mea in generatiónes saeculórum. Qui edunt me, adhuc esúrient: et qui bibunt me, adhuc sítient. Qui audit me, non confundétur: et qui operántur in me, non peccábunt. Qui elúcidant me, vitam aetérnam habébunt.
Graduale Prov. 9, 1 Sapiéntia aedificávit sibi domum, excídit colúmnas septem. V/. Ps. 86, 1-2 Fundaménta ejus in móntibus sanctis: díligit Dóminus portas Sion super ómnia tabernácula Jacob.
+ Inítium sancti Evangélii secúndum Matthaéum.
Matth. 1, 1-16
LIBER generatiónis Jesu Christi fílii David, fílii Abraham. Abraham génuit Isaac. Isaac autem génuit Jacob. Jacob autem génuit Judam, et fratres ejus. Judas autem génuit Phares, et Zaram de Thamar. Phares autem génuit Esron. Esron autem génuit Aram. Aram autem génuit Amínadab. Amínadab autem génuit Naásson. Naásson autem génuit Salmon. Salmon autem génuit Booz de Rahab. Booz autem génuit Obed ex Ruth. Obed autem génuit Jesse. Jesse autem génuit David regem. David autem rex génuit Salomónem ex ea, quae fuit Uríae. Sálomon autem génuit Róboam. Róboam autem génuit Abíam. Abías autem génuit Asa. Asa autem génuit Jósaphat. Jósaphat autem génuit Joram. Joram autem génuit Ozíam. Ozías autem génuit Jóatham. Jóatham autem génuit Achaz. Achaz autem génuit Ezechíam Ezechías autem génuit Manássen. Manásses autem génuit Amon. Amon autem génuit Josíam. Josías autem génuit Jechoníam et fratres ejus in transmigratióne Babylónis. Et post transmigratiónem Babylónis: Jechonías génuit Saláthiel. Saláthiel autem génuit Zoróbabel. Zoróbabel autem génuit Abiud. Abiud autem génuit Elíacim. Elíacim autem génuit Azor. Azor autem génuit Sadoc. Sadoc autem génuit Achim. Achim autem génuit Eliud. Eliud autem génuit Eleázar. Eleázar autem génuit Mathan. Mathan autem génuit Jacob. Jacob autem génuit Joseph virum Maríae, de qua natus est Jesus, qui vocátur Christus.
Offertorium Cant. 6, 2 Ego dilécto meo, et diléctus meus mihi, qui páscitur inter lília.
Secreta
MÚNERA nostra, Dómine, apud tuam cleméntiam immaculátae Dei Genitrícis comméndet orátio: quam ab omni origináli labe praeservásti ; ut dignum Fílii tui habitáculum éffici mererétur: Qui tecum.
2a Secreta de Feria.
Praefatio communis, juxta Rubricas.
Communio Cant. 6, 9 Quae est ista, quae progréditur quasi auróra consúrgens, pulchra ut luna, elécta ut sol, terríbilis ut castrórum ácies ordináta ?
Postcommunio
CONCÉDE, miséricors Deus, fragilitáti nostrae praesídium: ut, qui immaculátae Conceptiónis Genitrícis unigéniti Fílii tui festivitátem praevenímus ; intercessiónis ejus auxílio a nostris iniquitátibus resurgámus. Per eúmdem Dóminum.
2a Postcommunio de Feria.
Duplex I classis cum Octava communi
Introitus Isai. 61, 10
GAUDENS gaudébo in Dómino, et exsultábit ánima mea in Deo meo: quia índuit me vestiméntis salútis: et induménto justítiae circúmdedit me, quasi sponsam ornátam monílibus suis. Ps. 29, 2 Exaltábo te, Dómine, quóniam suscepísti me: nec delectásti inimícos meos super me. V/. Glória Patri.
Oratio
DEUS, qui per immaculátam Vírginis Conceptiónem dignum Fílio tuo habitáculum praeparásti: quaésumus ; ut, qui ex morte ejúsdem Fílii tui praevísa, eam ab omni labe praeservásti, nos quoque mundos ejus intercessióne ad te perveníre concédas. Per eúmdem Dóminum.
Et fit Commemoratio Feriae.
Léctio libri Sapiéntiae.
Prov. 8, 22-35
DÓMINUS possédit me in inítio viárum suárum, ántequam quidquam fáceret a princípio. Ab aetérno ordináta sum, et ex antíquis, ántequam terra fíeret. Nondum erant abýssi, et ego jam concépta eram: necdum fontes aquárum erúperant: necdum montes gravi mole constíterant: ante colles ego parturiébar: adhuc terram non fécerat, et flúmina, et cárdines orbis terrae. Quando praeparábat caelos, áderam: quando certa lege et gyro vallábat abýssos: quando aéthera firmábat sursum, et librábat fontes aquárum: quando circúmdabat mari términum suum, et legem ponébat aquis, ne transírent fines suos: quando appendébat fundaménta terrae. Cum eo eram cuncta compónens: et delectábar per síngulos dies, ludens coram eo omni témpore: ludens in orbe terrárum: et delíciae meae esse cum fíliis hóminum. Nunc ergo, fílii, audíte me: Beáti, qui custódiunt vias meas. Audíte disciplínam, et estóte sapiéntes, et nolíte abjícere eam. Beátus homo, qui audit me, et qui vígilat ad fores meas quotídie, et obsérvat ad postes óstii mei. Qui me invénerit, invéniet vitam, et háuriet salútem a Dómino.
Graduale Judith 13, 23 Benedícta es tu, Virgo María, a Dómino Deo excélso, prae ómnibus muliéribus super terram. V/. Ibid. 15, 10 Tu glória Jerúsalem, tu laetítia Israël, tu honorificéntia pópuli nostri.
Allelúja, allelúja. V/. Cant. 4, 7 Tota pulchra es, María: et mácula originális non est in te. Allelúja.
In Missis votivis post Septuagesimam, omissis Allelúja et Versu sequenti, dicitur:
Tractus Ps. 86, 1-2 Fundaménta ejus in móntibus sanctis: díligit Dóminus portas Sion super ómnia tabernácula Jacob. V/. Ibid., 3 Gloriósa dicta sunt de te, cívitas Dei. V/. Ibid., 5 Homo natus est in ea, et ipse fundávit eam Altíssimus.
Tempore autem Paschali, omittitur Graduale, et ejus loco dicitur:
Allelúja, allelúja. V/. Judith 15, 10 Tu glória Jerúsalem, tu laetítia Israël, tu honorificéntia pópuli nostri. Allelúja. V/. Cant. 4, 7 Tota pulchra es, María: et mácula originális non est in te. Allelúja.
+ Sequéntia sancti Evangélii secúndum Lucam.
Luc. 1, 26-28
IN illo témpore: Missus est Angelus Gábriel a Deo in civitátem Galilaéae, cui nomen Názareth, ad Vírginem desponsátam viro, cui nomen erat Joseph, de domo David, et nomen Vírginis María. Et ingréssus Angelus ad eam dixit: Ave, grátia plena: Dóminus tecum: benedícta tu in muliéribus.
Credo, per totam Octavam.
Offertorium Luc. 1, 28 Ave, María, grátia plena: Dóminus tecum: benedícta tu in muliéribus, allelúja.
Secreta
SALUTÁREM hóstiam, quam in solemnitáte immaculátae Conceptiónis beátae Vírginis Maríae tibi, Dómine, offérimus, súscipe et praesta: ut, sicut illam tua grátia praeveniénte ab omni labe immúnem profitémur ; ita ejus intercessióne a culpis ómnibus liberémur. Per Dóminum.
Et fit Commemoratio Feriae.
* Praefatio de B. Maria Virg. Et te in Conceptióne immaculata: quae dicitur per totam Octavam in omnibus Missis, quae non sint de Tempore, neque aliam Praefationem exigant, juxta Rubricas.
Communio Gloriósa dicta sunt de te, María: quia fecit tibi magna qui potens est.
Postcommunio
SACRAMÉNTA quae súmpsimus, Dómine Deus noster: illíus in nobis culpae vúlnera réparent ; a qua immaculátam beátae Maríae Conceptiónem singuláriter praeservásti. Per Dóminum.
Et fit Commemoratio Feriae.
* Infra Octavam Missa dicitur ut in Festo, sed pro 3a Oratione, juxta diversitatem Temporum assignata, dicitur Oratio de Spiritu Sancto.
Pro S. MELCHIADE
Papa et Martyre
Missa Si díligis me, de Communi Summorum Pontificum.
Oratio C
GREGEM tuum, Pastor aetérne, placátus inténde: et per beátum Melchíadem, Mártyrem tuum atque Summum Pontíficem, perpétua protectióne custódi ; quem totíus Ecclésiae praestitísti esse pastórem. Per Dóminum.
Secreta C
OBLÁTIS munéribus, quaésumus, Dómine, Ecclésiam tuam benígnus illúmina: ut, et gregis tui profíciat ubíque succéssus, et grati fiant nómini tuo, te gubernánte, pastóres. Per Dóminum.
Postcommunio C
REFECTIÓNE sancta enutrítam gubérna, quaésumus, Dómine, tuam placátus Ecclésiam: ut poténti moderatióne dirécta, et increménta libertátis accípiat, et in religiónis integritáte persístat. Per Dóminum.
Papae et Confessoris
Semiduplex
Missa Si díligis me, de Communi Summorum Pontificum.
Oratio C
GREGEM tuum, Pastor aetérne, placátus inténde: et per beátum Dámasum Summum Pontíficem, perpétua protectióne custódi ; quem totíus Ecclésiae praestitísti esse pastórem. Per Dóminum.
Et fit Commemoratio Octavae.
Deinde Commemoratio Feriae.
Credo, ratione Octavae.
Secreta C
OBLÁTIS munéribus, quaésumus, Dómine, Ecclésiam tuam benígnus illúmina: ut, et gregis tui profíciat ubíque succéssus, et grati fiant nómini tuo, te gubernánte, pastóres. Per Dóminum.
Et fit Commemoratio Octavae.
Deinde Commemoratio Feriae.
Praefatio de Apostolis.
Postcommunio C
REFECTIÓNE sancta enutrítam gubérna, quaésumus, Dómine, tuam placátus Ecclésiam: ut poténti moderatióne dirécta, et increménta libertátis accípiat, et in religiónis integritáte persístat. Per Dóminum.
Et fit Commemoratio Octavae.
Deinde Commemoratio Feriae.
Virginis et Martyris
Duplex
Introitus Ps. 44, 8
DILEXÍSTI justítiam, et odísti iniquitátem: proptérea unxit te Deus, Deus tuus, óleo laetítiae prae consórtibus tuis. Ps. ibid., 2 Eructávit cor meum verbum bonum: dico ego ópera mea Regi. V/. Glória Patri.
Oratio
EXÁUDI nos, Deus, salutáris noster: ut, sicut de beátae Lúciae Vírginis et Mártyris tuae festivitáte gaudémus ; ita piae devotiónis erudiámur afféctu. Per Dóminum.
Et fit Commemoratio Octavae.
Deinde Commemoratio Feriae.
Léctio Epístolae beáti Pauli Apóstoli ad Corínthios.
2 Cor. 10, 17-18 ; 11, 1-2
FRATRES: Qui gloriátur, in Dómino gloriétur. Non enim qui seípsum comméndat, ille probátus est: sed quem Deus comméndat. Utinam sustinerétis módicum quid insipiéntiae meae, sed et supportáte me: aémulor enim vos Dei aemulatióne. Despóndi enim vos uni viro vírginem castam exhibére Christo.
Graduale Ps. 44, 8 Dilexísti justítiam, et odísti iniquitátem. V/. Proptérea unxit te Deus, Deus tuus, óleo laetítiae.
Allelúja , allelúja. V/. Ibid., 3 Diffúsa est grátia in lábiis tuis: proptérea benedíxit te Deus in aetérnum. Allelúja.
* In Missis votivis, post Septuagesimam, Tractus, et Tempore Paschali Allelúja cum suis Versibus, ex Missa Dilexísti, de Communi Virginum 3 loco.
+ Sequéntia sancti Evangélii secúndum Matthaéum.
Matth. 13, 44-52
IN illo témpore: Dixit Jesus discípulis suis parábolam hanc: Símile est regnum caelórum thesáuro abscóndito in agro: quem qui invénit homo, abscóndit, et prae gáudio illíus vadit, et vendit univérsa, quae habet, et emit agrum illum. Iterum símile est regnum caelórum hómini negotiatóri, quaerénti bonas margarítas. Invénta autem una pretiósa margaríta, ábiit, et véndidit ómnia, quae hábuit, et emit eam. Iterum símile est regnum caelórum sagénae missae in mare, et ex omni génere píscium congregánti. Quam, cum impléta esset, educéntes, et secus littus sedéntes, elegérunt bonos in vasa, malos autem foras misérunt. Sic erit in consummatióne saéculi: exíbunt Angeli, et separábunt malos de médio justórum, et mittent eos in camínum ignis: ibi erit fletus et stridor déntium. Intellexístis haec ómnia ? Dicunt ei: Etiam. Ait illis: Ideo omnis scriba doctus in regno caelórum símilis est hómini patrifamílias, qui profert de thesáuro suo nova et vétera.
Credo, ratione Octavae.
Offertorium Ps. 44, 15 et 16 Afferéntur Regi vírgines post eam: próximae ejus afferéntur tibi in laetítia et exsultatióne: adducéntur in templum Regi Dómino.
Secreta
ACCÉPTA tibi sit, Dómine, sacrátae plebis oblátio pro tuórum honóre Sanctórum: quorum se méritis de tribulatióne percepísse cognóscit auxílium. Per Dóminum.
Et fit Commemoratio Octavae.
Deinde Commemoratio Feriae.
Praefatio de Octava.
Communio Ps. 118, 161-162 Príncipes persecúti sunt me gratis, et a verbis tuis formidávit cor meum: laetábor ego super elóquia tua, quasi qui invénit spólia multa.
Postcommunio
SATIÁSTI, Dómine, famíliam tuam munéribus sacris: ejus, quaésumus, semper interventióne nos réfove, cujus solémnia celebrámus. Per Dóminum.
Et fit Commemoratio Octavae.
Deinde Commemoratio Feriae.
* Si hodie occurrat Feria IV Quatuor Temp orum, unica dicitur Missa conventualis, quae erit de Feria cum Commemoratione Octavae, et, pro 3a Oratione, juxta diversitatem Temporum assignata, sumitur Oratio de Spiritu Sancto ; ac dicitur Praefatio communis. Missae vero privatae dici etiam possunt de Octava, cum 2a Oratione Feriae, 3a pariter de Spiritu Sancto ; et non legitur Evangelium Feriae in fine.
* Si in aliquo ex sequentibus Festis occurrat Feria Quatuor Temporum, in Missa conventuali de Festo omittitur Commemoratio Feriae, de qua dicitur alia Missa conventualis, ut in Proprio de Tempore. Missae vero privatae, nisi aliter notetur, ad libitum dici possunt de Festo cum Commemoratione et ultimo Evangelio Feriae, aut de Feria cum Commemoratione Festi, et ejusdem Praefatione, si propria habeatur. In hujusmodi autem Missis de Feria Adventus, numquam dicitur Praefatio de B. Maria Virg.
Duplex majus
Missa ut in Festo ; et, occurrente Feria IV Quatuor Temporum, ejus Evangelium non legitur in fine, sed, loco Evangelii de Feria, dicitur Evangelium S. Joannis In princípio erat Verbum. In Missa tamen conventuali de Festo non fit Commemoratio Feriae, neque legitur ejus Evangelium in fine.
Episcopi et Martyris
Semiduplex
Missa Sacerdótes Dei, de Communi unius Martyris 2 loco.
Et fit Commemoratio Feriae, praeterquam in Missa conventuali, si occurrat Feria Quatuor Temporum.
Oratio C
DEUS, qui nos beáti Eusébii Mártyris tui atque Pontíficis ánnua solemnitáte laetíficas: concéde propítius ; ut, cujus natalítia cólimus, de ejúsdem étiam protectióne gaudeámus. Per Dóminum.
Secreta C
MÚNERA tibi, Dómine, dicáta sanctífica: et, intercedénte beáto Eusébio, Mártyre tuo atque Pontífice, per éadem nos placátus inténde. Per Dóminum.
Postcommunio C
HAEC nos commúnio, Dómine, purget a crímine: et, intercedénte beáto Eusébio Mártyre tuo atque Pontífice, caeléstis remédii fáciat esse consórtes. Per Dóminum.
* Si hodie fuerit Sabbatum, in Missa Quatuor Temporum fit Commemoratio Vigiliae anticipatae S. Thomae, et de ea legitur Evangelium in fine ; 3a autem Oratio dicitur de sancta Maria Deus, qui de beátae. Missae vero privatae dici etiam possunt de Vigilia cum Commemoratione et ultimo Evangelio Sabbati, et 3a Oratione pariter Deus, qui de beátae.
Apostoli
Missa Ego autem, de Communi in Vigiliis Apostolorum, cum Commemoratione Feriae Adventus et 3a Oratione de sancta Maria Deus, qui de beátae. Si vero occurrat Feria Quatuor Temporum, de Vigilia fit Commemoratio in Missa de Feria, et Missae privatae dici possunt etiam de Vigilia, ut die praecedenti notatur.
Apostoli
Duplex II classis
* Si hodie occurrat Feria Quatuor Temporu m, in Choro post Tertiam dicitur Missa conventualis de Festo, et extra Chorum post Nonam legitur Missa de Feria, de qua tamen prohibentur Missae privatae.
Introitus Ps. 138, 17
MIHI autem nimis honoráti sunt amíci tui, Deus: nimis confortátus est principátus eórum. Ps. ibid., 1-2 Dómine, probásti me, et cognovísti me: tu cognovísti sessiónem meam, et resurrectiónem meam. V/. Glória Patri.
Oratio
DA nobis, quaésumus, Dómine, beáti Apóstoli tui Thomae solemnitátibus gloriári: ut ejus semper et patrocíniis sublevémur ; et fidem cóngrua devotióne sectémur. Per Dóminum.
Et fit Commemoratio Feriae, praeterquam in Missa conventuali, si occurrat Feria Quatuor Temporum.
Léctio Epístolae beáti Pauli Apóstoli ad Ephésios.
Ephes. 2, 19-22
FRATRES: Jam non estis hóspites, et ádvenae: sed estis cives sanctórum, et doméstici Dei: superaedificáti super fundaméntum Apostolórum, et Prophetárum, ipso summo angulári lápide Christo Jesu: in quo omnis aedificátio constrúcta crescit in templum sanctum in Dómino, in quo et vos coaedificámini in habitáculum Dei in Spíritu.
Graduale Ps. 138, 17-18 Nimis honoráti sunt amíci tui, Deus: nimis confortátus est principátus eórum. V/. Dinumerábo eos, et super arénam multiplicabúntur.
Allelúja , allelúja. V/. Ps. 32, 1 Gaudéte, justi, in Dómino: rectos decet collaudátio. Allelúja.
+ Sequéntia sancti Evangélii secúndum Joánnem.
Joann. 20, 24-29
IN illo témpore: Thomas, unus ex duódecim, qui dícitur Dídymus, non erat cum eis, quando venit Jesus. Dixérunt ergo ei álii discípuli: Vídimus Dóminum. Ille autem dixit eis: Nisi vídero in mánibus ejus fixúram clavórum, et mittam dígitum meum in locum clavórum, et mittam manum meam in latus ejus, non credam. Et post dies octo, íterum erant discípuli ejus intus, et Thomas cum eis. Venit Jesus jánuis clausis, et stetit in médio, et dixit: Pax vobis. Deínde dicit Thomae: Infer dígitum tuum huc, et vide manus meas, et affer manum tuam, et mitte in latus meum: et noli esse incrédulus, sed fidélis. Respóndit Thomas, et dixit ei: Dóminus meus, et Deus meus. Dixit ei Jesus: Quia vidísti me, Thoma, credidísti: beáti, qui non vidérunt, et credidérunt.
Credo, ratione Octavae.
Offertorium Ps. 18, 5 In omnem terram exívit sonus eórum: et in fines orbis terrae verba eórum.
Secreta
DÉBITUM tibi, Dómine, nostrae réddimus servitútis, supplíciter exorántes: ut, suffrágiis beáti Thomae Apóstoli, in nobis tua múnera tueáris, cujus honoránda confessióne laudis hóstias immolámus. Per Dóminum.
Et fit Commemoratio Feriae, ut supra.
Praefatio de Apostolis.
Communio Joann. 20, 27 Mitte manum tuam, et cognósce loca clavórum: et noli esse incrédulus, sed fidélis.
Postcommunio
ADÉSTO nobis, miséricors Deus: et, intercedénte pro nobis beáto Thoma Apóstolo, tua circa nos propitiátus dona custódi. Per Dóminum.
Et fit Commemoratio Feriae, ut supra ; et de ea legitur Evangelium in fine in Missis non conventualibus, si occurrat Feria Quatuor Temporum.
* In Missis votivis post Septuagesimam omnia dicuntur ut supra, sed post Graduale, omissis Allelúja, et Versu sequenti, dicitur Tractus Desidérium ex Missa Státuit, de Communi unius Martyris 1 loco.
Tempore autem Paschali Introitus et Offertorium sumuntur ex Missa Protexísti, de Communi Martyrum 1 loco , reliqua dicuntur ut supra ; sed post Epistolam omittitur Graduale, et ejus loco dicitur:
Allelúja , allelúja. V/. Ps. 32, 1 Gaudéte, justi, in Dómino: rectos decet collaudátio. Allelúja V/. Ps. 88, 6 Confitebúntur caeli mirabília tua, Dómine: étenim veritátem tuam in ecclésia sanctórum. Allelúja.
Post Octavam Epiphaniae occurrentia
* In omnibus Missis de Officio Semiduplici aut Simplici et in Missis votivis, quae pro re gravi et publica simul causa non sint, usque ad diem 2 Februarii inclusive, dicuntur, juxta Rubricas, Orationes pro diversitate Temporum assignatae, nempe 2a
de sancta Maria Deus, qui salútis, et 3a contra persecutores Ecclesiae, vel pro Papa.
Episcopi, Confessoris et Ecclesiae Doctoris
Duplex
Missa In médio, de Communi Doctorum. Et fit Commemoratio S. Felicis Presbyteri et Martyris, ac dicitur Credo.
Oratio C
DEUS, qui pópulo tuo aetérnae salútis beátum Hilárium minístrum tribuísti: praesta, quaésumus ; ut, quem Doctórem vitae habúimus in terris, intercessórem habére mereámur in caelis. Per Dóminum.
Pro S. Felice
Oratio
CONCÉDE, quaésumus, omnípotens Deus: ut ad meliórem vitam Sanctórum tuórum exémpla nos próvocent ; quátenus, quorum solémnia ágimus, étiam actus imitémur. Per Dóminum.
Secreta C
SANCTI Hilárii Pontíficis tui atque Doctóris nobis, Dómine, pia non desit orátio: quae et múnera nostra concíliet ; et tuam nobis indulgéntiam semper obtíneat. Per Dóminum.
Pro S. Felice
Secreta
HÓSTIAS tibi, Dómine, beáti Felícis Mártyris tui dicátas méritis, benígnus assúme: et ad perpétuum nobis tríbue proveníre subsídium. Per Dóminum.
Postcommunio C
UT nobis, Dómine, tua sacrifícia dent salútem: beátus Hilárius Póntifex tuus et Doctor egrégius, quaésumus, precátor accédat. Per Dóminum.
Pro S. Felice
Postcommunio
QUSUMUS, Dómine, salutáribus repléti mystériis: ut, beáti Felícis Mártyris tui, cujus solémnia celebrámus, oratiónibus adjuvémur. Per Dóminum.
Pro S. FELICE
Presbytero et Martyre
Missa Laetábitur, de Communi unius Martyris 4 loco, cum Orationibus ut supra.
Primi Eremitae, Confessoris
Duplex
Introitus Ps. 91, 13-14
JUSTUS ut palma florébit: sicut cedrus Líbani multiplicábitur: plantátus in domo Dómini: in átriis domus Dei nostri. Ps. ibid., 2 Bonum est confitéri Dómino: et psállere nómini tuo, Altíssime. V/. Glória Patri.
Oratio
DEUS, qui nos beáti Pauli Confessóris tui ánnua solemnitáte laetíficas: concéde propítius ; ut, cujus natalítia cólimus, étiam actiónes imitémur. Per Dóminum.
Et fit Commemoratio S. Mauri Abbatis.
Oratio
INTERCÉSSIO nos, quaésumus, Dómine, beáti Mauri Abbátis comméndet: ut, quod nostris méritis non valémus, ejus patrocínio assequámur. Per Dóminum.
Léctio Epístolae beáti Pauli Apóstoli ad Philippénses.
Phil. 3, 7-12
FRATRES: Quae mihi fuérunt lucra, haec arbitrátus sum propter Christum detriménta. Verúmtamen exístimo ómnia detriméntum esse propter eminéntem sciéntiam Jesu Christi Dómini mei: propter quem ómnia detriméntum feci, et árbitror ut stércora, ut Christum lucrifáciam, et invéniar in illo, non habens meam justítiam, quae ex lege est, sed illam, quae ex fide est Christi Jesu: quae ex Deo est justítia in fide, ad cognoscéndum illum, et virtútem resurrectiónis ejus, et societátem passiónum illíus: configurátus morti ejus: si quo modo occúrram ad resurrectiónem, quae est ex mórtuis: non quod jam accéperim, aut jam perféctus sim: sequor autem, si quo modo comprehéndam, in quo et comprehénsus sum a Christo Jesu.
Graduale Ps. 91, 13 et 14 Justus ut palma florébit: sicut cedrus Líbani multiplicábitur in domo Dómini. V/. Ibid., 3 Ad annuntiándum mane misericórdiam tuam, et veritátem tuam per noctem.
Allelúja , allelúja. V/. Osee 14, 6 Justus germinábit sicut lílium: et florébit in aetérnum ante Dóminum. Allelúja.
+ Sequéntia sancti Evangélii secúndum Matthaéum.
Matth. 11, 25-30
IN illo témpore: Respóndens Jesus, dixit: Confíteor tibi, Pater, Dómine caeli et terrae, quia abscondísti haec a sapiéntibus et prudéntibus, et revelásti ea párvulis. Ita Pater: quóniam sic fuit plácitum ante te. Omnia mihi trádita sunt a Patre meo. Et nemo novit Fílium, nisi Pater: neque Patrem quis novit, nisi Fílius, et cui volúerit Fílius reveláre. Veníte ad me omnes, qui laborátis, et oneráti estis, et ego refíciam vos. Tóllite jugum meum super vos, et díscite a me, quia mitis sum, et húmilis córde: et inveniétis réquiem animábus vestris. Jugum enim meum suáve est, et onus meum leve.
Offertorium Ps. 20, 2-3 In virtúte tua, Dómine, laetábitur justus, et super salutáre tuum exsultábit veheménter: desidérium ánimae ejus tribuísti ei.
Secreta
LAUDIS tibi, Dómine, hóstias immolámus in tuórum commemoratióne Sanctórum: quibus nos et praeséntibus éxui malis confídimus et futúris. Per Dóminum.
Pro S. Mauro
Secreta
SACRIS altáribus, Dómine, hóstias superpósitas sanctus Maurus Abbas, quaésumus, in salútem nobis proveníre depóscat. Per Dóminum.
Communio Ps. 63, 11 Laetábitur justus in Dómino, et sperábit in eo: et laudabúntur omnes recti corde.
Postcommunio
REFÉCTI cibo potúque caelésti, Deus noster, te súpplices exorámus: ut, in cujus haec commemoratióne percépimus, ejus muniámur et précibus. Per Dóminum.
Pro S. Mauro
Postcommunio
PRÓTEGAT nos, Dómine, cum tui perceptióne sacraménti beátus Maurus Abbas, pro nobis intercedéndo: ut et conversatiónis ejus experiámur insígnia, et intercessiónis percipiámus suffrágia. Per Dóminum.
Missale Romanum 1957 - S. PETRI CHRYSOLOGI