Missale Romanum 1957
Oratio
EXCITA, quaésumus, Dómine, poténtiam tuam, et veni: ut ab imminéntibus peccatórum nostrórum perículis, te mereámur protegénte éripi, te liberánte salvári: Qui vivis et regnas.
Secreta
HAEC sacra nos, Dómine, poténti virtúte mundátos, ad suum fáciant purióres veníre princípium. Per Dóminum.
Postcommunio
SUSCIPIÁMUS, Dómine, misericórdiam tuam in médio templi tui: ut reparatiónis nostrae ventúra solémnia cóngruis honóribus praecedámus. Per Dóminum.
Oratio
EXCITA, Dómine, corda nostra ad praeparándas Unigéniti tui vias: ut, per ejus advéntum, purificátis tibi méntibus servíre mereámur: Qui tecum vivit.
Secreta
PLACÁRE, quaésumus, Dómine, humilitátis nostrae précibus et hóstiis: et ubi nulla súppetunt suffrágia meritórum, tuis nobis succúrre praesídiis. Per Dóminum.
Postcommunio
REPLÉTI cibo spirituális alimóniae, súpplices te, Dómine, deprecámur: ut hujus participatióne mystérii, dóceas nos terréna despícere et amáre caeléstia. Per Dóminum.
Oratio
AUREM tuam, quaésumus, Dómine, précibus nostris accómmoda: et mentis nostrae ténebras, grátia tuae visitatiónis illústra: Qui vivis.
Secreta
DEVOTIÓNIS nostrae tibi, quaésumus, Dómine, hóstia júgiter immolétur: quae et sacri péragat institúta mystérii, et salutáre tuum in nobis mirabíliter operétur. Per Dóminum.
Postcommunio
IMPLORÁMUS, Dómine, cleméntiam tuam: ut haec divína subsídia, a vítiis expiátos, ad festa ventúra nos praéparent. Per Dóminum.
Oratio
EXCITA, quaésumus, Dómine, poténtiam tuam, et veni: et magna nobis virtúte succúrre ; ut per auxílium grátiae tuae, quod nostra peccáta praepédiunt, indulgéntia tuae propitiatiónis accéleret: Qui vivis et regnas.
Secreta
SACRIFÍCIIS praeséntibus, quaésumus, Dómine, placátus inténde: ut et devotióni nostrae profíciant, et salúti. Per Dóminum.
Postcommunio
SUMPTIS munéribus, quaésumus, Dómine: ut cum frequentatióne mystérii, crescat nostrae salútis efféctus. Per Dóminum.
Oratio
DEUS, qui de beátae Maríae Vírginis útero Verbum tuum, Angelo nuntiánte, carnem suscípere voluísti: praesta supplícibus tuis ; ut, qui vere eam Genitrícem Dei crédimus, ejus apud te intercessiónibus adjuvémur. Per eúmdem Dóminum.
Secreta
IN méntibus nostris, quaésumus, Dómine, verae fídei sacraménta confírma: ut, qui concéptum de Vírgine Deum verum et hóminem confitémur ; per ejus salutíferae resurrectiónis poténtiam, ad aetérnam mereámur perveníre laetítiam. Per eúmdem Dóminum.
Postcommunio
GRÁTIAM tuam, quaésumus, Dómine, méntibus nostris infúnde: ut qui, Angelo nuntiánte, Christi Fílii tui incarnatiónem cognóvimus ; per passiónem ejus et crucem, ad resurrectiónis glóriam perducámur. Per eúmdem Dóminum.
A die 29 Dec. ad diem 2 Febr.
Oratio
DEUS, qui salútis aetérnae, beátae Maríae virginitáte fecúnda, humáno géneri praémia praestitísti: tríbue, quaésumus ; ut ipsam pro nobis intercédere sentiámus, per quam merúimus auctórem vitae suscípere, Dóminum nostrum Jesum Christum Fílium tuum: Qui tecum vivit et regnat.
Secreta
TUA, Dómine, propitiatióne, et beátae Maríae semper Vírginis intercessióne, ad perpétuam atque praeséntem haec oblátio nobis profíciat prosperitátem et pacem. Per Dóminum.
Postcommunio
HAEC nos commúnio, Dómine, purget a crímine: et, intercedénte beáta Vírgine Dei Genitríce María, caeléstis remédii fáciat esse consórtes. Per eúmdem Dóminum.
Reliquis anni temporibus
Oratio
CONCÉDE nos fámulos tuos, quaésumus, Dómine Deus, perpétua mentis et córporis sanitáte gaudére: et, gloriósa beátae Maríae semper Vírginis intercessióne, a praesénti liberári tristítia, et aetérna pérfrui laetítia. Per Dóminum.
Secreta
TUA, Dómine, propitiatióne, et beátae Maríae semper Vírginis intercessióne, ad perpétuam atque praeséntem haec oblátio nobis profíciat prosperitátem et pacem. Per Dóminum.
Postcommunio
SUMPTIS, Dómine, salútis nostrae subsídiis: da, quaésumus, beátae Maríae semper Vírginis patrocíniis nos ubíque prótegi ; in cujus veneratióne haec tuae obtúlimus majestáti. Per Dóminum.
Oratio
DEUS, qui corda fidélium Sancti Spíritus illustratióne docuísti: da nobis in eódem Spíritu recta sápere ; et de ejus semper consolatióne gaudére. Per Dóminum nostrum Jesum Christum Fílium tuum, qui tecum vivit et regnat in unitáte ejúsdem Spíritus Sancti.
Secreta
MÚNERA, quaésumus, Dómine, obláta sanctífica: et corda nostra Sancti Spíritus illustratióne emúnda. Per Dóminum nostrum Jesum Christum Filium tuum: Qui tecum vivit et regnat in unitáte ejúsdem.
Postcommunio
SANCTI Spíritus, Dómine, corda nostra mundet infúsio: et sui roris íntima aspersióne fecúndet. Per Dóminum nostrum Jesum Christum Fílium tuum: Qui tecum vivit et regnat in unitáte ejúsdem.
Oratio
ECCLÉSIAE tuae, quaésumus, Dómine, preces placátus admítte: ut, destrúctis adversitátibus et erróribus univérsis, secúra tibi sérviat libertáte. Per Dóminum.
Secreta
PRÓTEGE nos, Dómine, tuis mystériis serviéntes: ut, divínis rebus inhaeréntes, et córpore tibi famulémur, et mente. Per Dóminum.
Postcommunio
QUSUMUS, Dómine Deus noster: ut, quos divína tríbuis participatióne gaudére, humánis non sinas subjacére perículis. Per Dóminum.
Oratio
DEUS, ómnium fidélium pastor et rector, fámulum tuum N., quem pastórem Ecclésiae tuae praeésse voluísti, propítius réspice: da ei, quaésumus, verbo et exémplo, quibus praeest, profícere ; ut ad vitam, una cum grege sibi crédito, pervéniat sempitérnam. Per Dóminum.
Secreta
OBLÁTIS, quaésumus, Dómine, placáre munéribus: et fámulum tuum N., quem pastórem Ecclésiae tuae praeésse voluísti, assídua protectióne gubérna. Per Dóminum.
Postcommunio
HAEC nos, quaésumus, Dómine, divíni sacraménti percéptio prótegat: et fámulum tuum N., quem pastórem Ecclésiae tuae praeésse voluísti ; una cum commísso sibi grege, salvet semper et múniat. Per Dóminum.
Oratio
A CUNCTIS nos, quaésumus, Dómine, mentis et córporis defénde perículis: et, intercedénte beáta et gloriósa semper Vírgine Dei Genitríce María, cum beáto Joseph, beátis Apóstolis tuis Petro et Paulo, atque beáto N. et ómnibus Sanctis, salútem nobis tríbue benígnus et pacem ; ut, destrúctis adversitátibus et erróribus univérsis, Ecclésia tua secúra tibi sérviat libertáte. Per eúmdem Dóminum.
Secreta
EXÁUDI nos , Deus, salutáris noster: ut, per hujus sacraménti virtútem, a cunctis nos mentis et córporis hóstibus tueáris ; grátiam tríbuens in praesénti, et glóriam in futúro. Per Dóminum.
Postcommunio
MUNDET et múniat nos, quaésumus, Dómine, divíni sacraménti munus oblátum: et, intercedénte beáta Vírgine Dei Genitríce María, cum beáto Joseph, beátis Apóstolis tuis Petro et Paulo, atque beato N. et ómnibus Sanctis ; a cunctis nos reddat et perversitátibus expiátos, et adversitátibus expedítos. Per eúmdem Dóminum.
Oratio
DEUS, qui nobis sub Sacraménto mirábili passiónis tuae memóriam reliquísti: tríbue, quaésumus, ita nos córporis et sánguinis tui sacra mystéria venerári ; ut redemptiónis tuae fructum in nobis júgiter sentiámus: Qui vivis.
Secreta
ECCLÉSIAE tuae, quaésumus, Dómine, unitátis et pacis propítius dona concéde: quae sub oblátis munéribus mýstice designántur. Per Dóminum.
Postcommunio
FAC nos, quaésumus, Dómine, divinitátis tuae sempitérna fruitióne repléri: quam pretiósi córporis et sánguinis tui temporális percéptio praefigúrat: Qui vivis.
Oratio
DEUS, refúgium nostrum et virtus: adésto piis Ecclésiae tuae précibus, auctor ipse pietátis, et praesta ; ut, quod fidéliter pétimus, efficáciter consequámur. Per Dóminum.
Secreta
DA, miséricors Deus: ut haec salutáris oblátio et a própriis nos reátibus indesinénter expédiat, et ab ómnibus tueátur advérsis. Per Dóminum.
Postcommunio
SÚMPSIMUS, Dómine, sacri dona mystérii, humíliter deprecántes: ut quae in tui commemoratiónem nos fácere praecepísti, in nostrae profíciant infirmitátis auxílium: Qui vivis.
Oratio
DEUS, in quo vívimus, movémur, et sumus: plúviam nobis tríbue congruéntem ; ut, praeséntibus subsídiis sufficiénter adjúti, sempitérna fiduciálius appetámus. Per Dóminum.
Secreta
OBLÁTIS, quaésumus, Dómine, placáre munéribus: et opportúnum nobis tríbue plúviae sufficiéntis auxílium. Per Dóminum.
Postcommunio
DA nobis, quaésumus, Dómine, plúviam salutárem: et áridam terrae fáciem fluéntis caeléstibus dignánter infúnde. Per Dóminum.
Oratio
AD te nos, Dómine, clamántes exáudi: et áëris serenitátem nobis tríbue supplicántibus ; ut, qui juste pro peccátis nostris afflígimur, misericórdia tua praeveniénte, cleméntiam sentiámus. Per Dóminum.
Secreta
PRAEVÉNIAT nos, quaésumus, Dómine, grátia tua semper, et subsequátur: et has oblatiónes, quas pro peccátis nostris nómini tuo consecrándas deférimus, benígnus assúme ; ut, per intercessiónem Sanctórum tuórum, cunctis nobis profíciant ad salútem. Per Dóminum.
Postcommunio
QUSUMUS, omnípotens Deus, cleméntiam tuam: ut inundántiam coérceas ímbrium, et hilaritátem vultus tui nobis impertíri dignéris. Per Dóminum.
Oratio
A DOMO tua, quaésumus, Dómine, spiritáles nequítiae repellántur: et aëreárum discédat malígnitas tempestátum. Per Dóminum.
Secreta
OFFÉRIMUS tibi, Dómine, laudes et múnera, pro concéssis benefíciis grátias referéntes, et pro concedéndis semper supplíciter deprecántes. Per Dóminum.
Postcommunio
OMNÍPOTENS sempitérne Deus, qui nos et castigándo sanas, et ignoscéndo consérvas: praesta supplícibus tuis ; ut et tranquillitátibus hujus optátae consolatiónis laetémur, et dono tuae pietátis semper utámur. Per Dóminum.
Oratio
DEUS, ómnium fidélium pastor et rector, fámulum tuum N., quem pastórem Ecclésiae N. praeésse voluísti, propítius réspice: da ei, quaésumus, verbo et exémplo, quibus praeest, profícere ; ut ad vitam, una cum grege sibi crédito, pervéniat sempitérnam. Per Dóminum.
Secreta
OBLÁTIS, quaésumus, Dómine, placáre munéribus: et fámulum tuum N., quem pastórem Ecclésiae N. praeésse voluísti, assídua protectióne gubérna. Per Dóminum.
Postcommunio
HAEC nos, quaésumus, Dómine, divíni sacraménti percéptio prótegat: et fámulum tuum N., quem pastórem Ecclésiae N. praeésse voluísti ; una cum commísso sibi grege, salvet semper et múniat. Per Dóminum.
Oratio
OMNÍPOTENS et miséricors Deus, humilitátis meae preces benígnus inténde: et me fámulum tuum, quem, nullis suffragántibus méritis, sed imménsa cleméntiae tuae largitáte, caeléstibus mystériis servíre tribuísti, dignum sacris altáribus fac minístrum ; ut, quod mea voce deprómitur, tua sanctificatióne firmétur. Per Dóminum.
Secreta
HUJUS, Dómine, virtúte sacraménti, peccatórum meórum máculas abstérge: et praesta ; ut ad exsequéndum injúncti offícii ministérium, me tua grátia dignum effíciat. Per Dóminum.
Postcommunio
OMNÍPOTENS sempitérne Deus, qui me peccatórem sacris altáribus astáre voluísti, et sancti nóminis tui laudáre poténtiam: concéde propítius, per hujus sacraménti mystérium, meórum mihi véniam peccatórum ; ut tuae majestáti digne mérear famulári. Per Dóminum.
Oratio
FIDÉLIUM, Deus, ómnium cónditor et redémptor: animábus famulórum famularúmque tuárum remissiónem cunctórum tríbue peccatórum ; ut indulgéntiam, quam semper optavérunt, piis supplicatiónibus consequántur: Qui vivis.
Secreta
HÓSTIAS, quaésumus, Dómine, quas tibi pro animábus famulórum, famularúmque tuárum offérimus, propitiátus inténde: ut, quibus fídei christiánae méritum contulísti, dones et praémium. Per Dóminum.
Postcommunio
ANIMÁBUS, quaésumus, Dómine, famulórum famularúmque tuárum orátio profíciat supplicántium: ut eas et a peccátis ómnibus éxuas, et tuae redemptiónis fácias esse partícipes. Qui vivis.
Oratio
OMNÍPOTENS sempitérne Deus, qui vivórum domináris simul et mortuórum, omniúmque miseréris, quos tuos fide et ópere futúros esse praenóscis: te súpplices exorámus ; ut, pro quibus effúndere preces decrévimus, quosque vel praesens saéculum adhuc in carne rétinet, vel futúrum jam exútos córpore suscépit, intercedéntibus ómnibus Sanctis tuis, pietátis tuae cleméntia ómnium delictórum suórum véniam consequántur. Per Dóminum.
Secreta
DEUS, cui soli cógnitus est númerus electórum in supérna felicitáte locándus: tríbue, quaésumus ; ut, intercedéntibus ómnibus Sanctis tuis, universórum, quos in oratióne commendátos suscépimus, et ómnium fidélium nómina, beátae praedestinatiónis liber adscrípta retíneat. Per Dóminum.
Postcommunio
PURÍFICENT nos, quaésumus, omnípotens et miséricors Deus, sacraménta quae súmpsimus: et, intercedéntibus ómnibus Sanctis tuis, praesta ; ut hoc tuum sacraméntum non sit nobis reátus ad poenam, sed intercéssio salutáris ad véniam: sit ablútio scélerum, sit fortitúdo fragílium, sit contra ómnia mundi perícula firmaméntum: sit vivórum atque mortuórum fidélium remíssio ómnium delictórum. Per Dóminum.
Oratio
DEUS, qui caritátis dona per grátiam Sancti Spíritus tuórum fidélium córdibus infudísti: da fámulis et famulábus tuis, pro quibus tuam deprecámur cleméntiam, salútem mentis et córporis ; ut te tota virtúte díligant, et quae tibi plácita sunt, tota dilectióne perfíciant. Per Dóminum... in unitáte ejúsdem.
Secreta
MISERÉRE, quaésumus, Dómine, fámulis et famulábus tuis, pro quibus hoc sacrifícium laudis tuae offérimus majestáti: ut per haec sancta, supérnae benedictiónis grátiam obtíneant, et glóriam aetérnae beatitúdinis acquírant. Per Dóminum.
Postcommunio
DIVÍNA libántes mystéria, quaésumus, Dómine: ut haec salutária sacraménta illis profíciant ad prosperitátem et pacem ; pro quorum quarúmque dilectióne haec tuae obtúlimus majestáti. Per Dóminum.
Oratio
PRAETÉNDE, Dómine, fidélibus tuis déxteram caeléstis auxílii: ut te toto corde perquírant, et quae digne póstulant, cónsequi mereántur. Per Dóminum.
Secreta
PROPITIÁRE, Dómine, supplicatiónibus nostris, et has oblatiónes fidélium tuórum, quas tibi pro incolumitáte eórum offérimus, benígnus assúme: et, ut nullíus sit írritum votum, nullíus vácua postulátio, praesta, quaésumus ; ut, quod fidéliter pétimus, efficáciter consequámur. Per Dóminum.
Postcommunio
DA fidélibus tuis, quaésumus, Dómine, in tua fide et sinceritáte constántiam: ut in caritáte divína firmáti, nullis tentatiónibus ab ejus integritáte vellántur. Per Dóminum.
Missae, quae de singulis Festis in hoc Proprio habentur, exceptis tamen Missis de peculiaribus Mysteriis Domini aut de Festis beatae Mariae Virginis pro quibus specialis non habeatur indicatio, necnon Missis de S. Joseph ac de Ss. Petro et Paulo App., dicuntur etiam ut votivae ; sed in eis, nisi aliter suis locis habeatur, post Epistolam sumitur Graduale cum Versu sequenti aut cum suo Tractu, vel, Tempore Paschali, Allelúja cum suis Versibus, quae desint, de respectivo Communi. Pro Martyribus autem, Tempore Paschali, dicitur Missa Protexísti vel Sancti tui, prout casus ferat, et in ea dicuntur Orationes, Epistola et Evangelium propria, si habeantur. In singulis tamen Orationibus omittuntur verba hodiérna die, ánnua et similia, ubicumque habentur, et immutantur voces natális, natalítium, festívitas in commemorátio, memória. Itemque, loco Introitus Gaudeámus, dicitur Introitus de respectivo Communi, et extra Tempus Paschale omittuntur Allelúja, quae ad Introitum, Offertorium et Communionem ob Tempus Paschale addita reperiantur.
Die 28 Novembris
* Ante Adventum in omnibus Missis de Officio Semiduplici aut Simplici et in Missis votivis, quae pro re gravi et publica simul causa non sint, dicuntur, juxta Rubricas, Orationes pro diversitate Temporum assignatae, nempe 2a ad poscenda suffragia Sanctorum A cunctis, et 3a ad libitum eligenda.
In Adventu autem, nisi aliter notetur, fit Commemoratio Feriae, et dicitur, juxta Rubricas, 3a Oratio de sancta Maria Deus, qui de beátae.
* Si hodie fuerit Sabbatum, fit de Vigilia anticipata S. Andreae Ap., de qua dicitur Missa ut die sequenti notatur ; sed omittitur Commemoratio S. Saturnini Mart., et dicitur, juxta Rubricas, 2a Oratio de sancta Maria Concéde, et 3a contra persecutores Ecclesiae, vel pro Papa.
Simplex
Introitus Matth. 4, 18 et 19
DÓMINUS secus mare Galilaéae vidit duos fratres, Petrum et Andréam, et vocávit eos: Veníte post me: fáciam vos fíeri piscatóres hóminum. Ps. 18, 2 Caeli enárrant glóriam Dei: et ópera mánuum ejus annúntiat firmaméntum. V/. Glória Patri.
Non dicitur Glória in excélsis.
Oratio
QUSUMUS, omnípotens Deus: ut beátus Andréas Apóstolus, cujus praevenímus festivitátem, tuum pro nobis implóret auxílium ; ut, a nostris reátibus absolúti, a cunctis étiam perículis eruámur. Per Dóminum.
* In Adventu 2a Oratio Feriae, 3a S. Saturnini Martyris.
Extra Adventum 2a Oratio S. Saturnini, 3a de S. Maria Concéde.
Léctio libri Sapiéntiae.
Eccli. 44, 25-27 ; 45, 2-4 et 6-9
BENEDÍCTIO Dómini super caput justi. Ideo dedit illi Dóminus hereditátem, et divísit illi partem in tríbubus duódecim: et invénit grátiam in conspéctu omnis carnis. Et magnificávit eum in timóre inimicórum, et in verbis suis monstra placávit. Glorificávit illum in conspéctu regum, et jussit illi coram pópulo suo, et osténdit illi glóriam suam. In fide et lenitáte ipsíus sanctum fecit illum, et elégit eum ex omni carne. Et dedit illi coram praecépta, et legem vitae, et disciplínae, et excélsum fecit illum. Státuit ei testaméntum aetérnum, et circumcínxit eum zona justítiae: et índuit eum Dóminus corónam glóriae.
Graduale Ps. 138, 17-18 Nimis honoráti sunt amíci tui, Deus: nimis confortátus est principátus eórum. V/. Dinumerábo eos: et super arénam multiplicabúntur.
+ Sequéntia sancti Evangélii secúndum Joánnem.
Joann. 1, 35-51
IN illo témpore: Stabat Joánnes, et ex discípulis ejus duo. Et respíciens Jesum ambulántem, dicit: Ecce Agnus Dei. Et audiérunt eum duo discípuli loquéntem, et secúti sunt Jesum. Convérsus autem Jesus, et videns eos sequéntes se, dicit eis: Quid quaéritis ? Qui dixérunt ei: Rabbi, (quod dícitur interpretátum Magíster) ubi hábitas ? Dicit eis: Veníte, et vidéte. Venérunt, et vidérunt ubi manéret, et apud eum mansérunt die illo: hora autem erat quasi décima. Erat autem Andréas frater Simónis Petri unus ex deóbus, qui audíerant a Joánne, et secúti fúerant eum. Invénit hic primum fratrem suum Simónem, et dicit ei: Invénimus Messíam (quod est interpretátum Christus) . Et addúxit eum ad Jesum. Intúitus autem eum Jesus, dixit: Tu es Simon fílius Jona: tu vocáberis Cephas, quod interpretátur Petrus. In crástinum vóluit exíre in Galilaéam, et invénit Philíppum. Et dicit ei Jesus: Séquere me. Erat autem Philíppus a Bethsáida, civitáte Andréae et Petri. Invénit Philíppus Nathánaël, et dicit ei: Quem scripsit Móyses in lege, et prophétae, invénimus, Jesum fílium Joseph a Názareth. Et dixit ei Nathánaël: A Názareth potest áliquid boni esse ? Dicit ei Philíppus: Veni, et vide. Vidit Jesus Nathánaël veniéntem ad se, et dicit de eo: Ecce vere Israëlíta, in quo dolus non est. Dicit ei Nathánaël: Unde me nosti ? Respóndit Jesus, et dixit ei: Priúsquam te Philíppus vocáret, cum esses sub ficu, vidi te. Respóndit ei Nathánaël, et ait: Rabbi, tu es Fílius Dei, tu es Rex Israël. Respóndit Jesus, et dixit ei: Quia dixi tibi: Vidi te sub ficu, credis: majus his vidébis. Et dicit ei: Amen, amen dico vobis, vidébitis caelum apértum, et Angelos Dei ascendéntes, et descendéntes supra Fílium hóminis.
Offertorium Ps. 8, 6-7 Glória et honóre coronásti eum: et constituísti eum super ópera mánuum tuárum, Dómine.
Secreta
SACRÁNDUM tibi, Dómine, munus offérimus: quo beáti Andréae Apóstoli solémnia recoléntes, purificatiónem quoque nostris méntibus implorámus. Per Dóminum nostrum.
Communio Joann. 1, 41 et 42 Dicit Andréas Simóni fratri suo: Invénimus Messíam, qui dícitur Christus: et addúxit eum ad Jesum.
Postcommunio
PERCÉPTIS, Dómine, sacraméntis supplíciter exorámus: ut, intercedénte beáto Andréa Apóstolo tuo, quae pro illíus veneránda gérimus passióne, nobis profíciant ad medélam. Per Dóminum.
Pro S. SATURNINO
Martyre
Missa Laetábitur, de Communi unius Martyris 4 loco, cum Orationibus sequentibus.
Oratio P
DEUS, qui nos beáti Saturníni Mártyris tui concédis natalítio pérfrui: ejus nos tríbue méritis adjuvári. Per Dóminum.
Secreta P
MÚNERA, Dómine, tibi dicáta sanctífica: et, intercedénte beáto Saturníno Mártyre tuo, per haec éadem nos placátus inténde. Per Dóminum.
Postcommunio P
SANCTÍFICET nos, quaésumus, Dómine, tui percéptio sacraménti: et intercessióne Sanctórum tuórum tibi reddat accéptos. Per Dóminum.
Apostoli
Duplex II classis
Introitus Ps. 138, 17
MIHI autem nimis honoráti sunt amíci tui, Deus: nimis confortátus est principátus eórum. Ps. ibid., 1-2 Dómine, probásti me, et cognovísti me: tu cognovísti sessiónem meam, et resurrectiónem meam. V/. Glória Patri.
Oratio
MAJESTÁTEM tuam, Dómine, supplíciter exorámus: ut, sicut Ecclésiae tuae beátus Andréas Apóstolus éxstitit praedicátor et rector ; ita apu d te sit pro nobis perpétuus intercéssor. Per Dóminum.
Et, in Adventu, fit Commemoratio Feriae.
Léctio Epístolae beáti Pauli Apóstoli ad Romános.
Rom. 10, 10-18
FRATRES: Corde enim créditur ad justítiam: ore autem conféssio fit ad salútem. Dicit enim Scriptúra: Omnis, qui credit in illum, non confundétur. Non enim est distínctio Judaéi, et Graeci: nam idem Dóminus ómnium, dives in omnes, qui ínvocant illum. Omnis enim, quicúmque invocáverit nomen Dómini, salvus erit. Quómodo ergo invocábunt, in quem non credidérunt ? Aut quómodo credent ei, quem non audiérunt ? Quómodo autem áudient sine praedicánte ? Quómodo vero praedicábunt, nisi mittántur ? sicut scriptum est: Quam speciósi pedes evangelizántium pacem, evangelizántium bona ! Sed non omnes obédiunt Evangélio. Isaías enim dicit: Dómine, quis crédidit audítui nostro ? Ergo fides ex audítu, audítus autem per verbum Christi. Sed dico: Numquid non audiérunt ? Et quidem in omnem terram exívit sonus eórum, et in fines orbis terrae verba eórum.
Graduale Ps. 44, 17-18 Constítues eos príncipes super omnem terram: mémores erunt nóminis tui, Dómine. V/. Pro pátribus tuis nati sunt tibi fílii: proptérea pópuli confitebúntur tibi.
Allelúja , allelúja. V/. Diléxit Andréam Dóminus in odórem suavitátis. Allelúja.
+ Sequéntia sancti Evangélii secúndum Matthaéum.
Matth. 4, 18-22
IN illo témpore: Ambulans Jesus juxta mare Galilaéae, vidit duos fratres, Simónem, qui vocátur Petrus, et Andréam fratrem ejus, mitténtes rete in mare (erant enim piscatóres), et ait illis: Veníte post me, et fáciam vos fíeri piscatóres hóminum. At illi contínuo, relíctis rétibus, secúti sunt eum. Et procédens inde, vidit álios duos fratres, Jacóbum Zebedaéi, et Joánnem fratrem ejus in navi cum Zebedaéo patre eórum, reficiéntes rétia sua: et vocávit eos. Illi autem statim, relíctis rétibus et patre, secúti sunt eum.
Credo.
Offertorium Ps. 138, 17 Mihi autem nimis honoráti sunt amíci tui, Deus: nimis confortátus est principátus eórum.
Secreta
SACRIFÍCIUM nostrum tibi, Dómine, quaésumus, beáti Andréae Apóstoli precátio sancta concíliet: ut, in cujus honóre solémniter exhibétur, ejus méritis efficiátur accéptum. Per Dóminum.
Et, in Adventu, fit Commemoratio Feriae.
Praefatio de Apostolis.
Communio Matth. 4, 19-20 Veníte post me: fáciam vos fíeri piscatóres hóminum: at illi contínuo, relíctis rétibus, secúti sunt Dóminum.
Postcommunio
SÚMPSIMUS, Dómine, divína mystéria, beáti Andréae Apóstoli festivitáte laetántes: quae, sicut tuis Sanctis ad glóriam, ita nobis, quaésumus, ad véniam prodesse perfícias. Per Dóminum.
Et, in Adventu, fit Commemoratio Feriae.
* In Missis votivis post Septuagesimam omnia dicuntur ut supra, sed post Graduale, omissis Allelúja, et Versu sequenti, dicitur Tractus Desidérium ex Missa Státuit, de Communi unius Martyris 1 loco.
Tempore autem Paschali Introitus et Offertorium sumuntur ex Missa Protexísti, de Communi Martyrum 1 loco , reliqua dicuntur ut supra ; sed post Epistolam omittitur Graduale, et ejus loco dicitur:
Allelúja , allelúja. V/. Diléxit Andréam Dóminus in odórem suavitátis. Allelúja. V/. Ps. 20, 4 Posuísti, Dómine, super caput ejus corónam de lápide pretióso. Allelúja.
Die 1 Decembris
* Si hodie Officium fuerit de Feria VI infra Hebdomadam ultimam post Pentecosten, et primo resumenda non sit Missa praecedentis Dominicae impedita, in Choro post Primam dicitur Missa conventualis pro Defunctis, juxta Rubricas, et in Missis privatis, quae non sint Defunctorum, paenultimo loco dicitur Oratio Fidélium.
Virginis et Martyris
Semiduplex
Missa Me exspectavérunt, de Communi Virginum 2 loco, praeter Orationem sequentem.
Oratio P
DEUS, ómnium largítor bonórum, qui in fámula tua Bibiána cum virginitátis flore martýrii palmam conjunxísti: mentes nostras ejus intercessióne tibi caritáte conjúnge ; ut, amótis perículis, praémia consequámur aetérna. Per Dóminum.
Et, in Adventu, fit Commemoratio Feriae.
Secreta C
HÓSTIAS tibi, Dómine, beátae Bibiánae Vírginis et Mártyris tuae dicátas méritis, benígnus assúme: et ad perpétuum nobis tríbue proveníre subsídium. Per Dóminum.
Postcommunio C
DIVÍNI múneris largitáte satiáti, quaésumus, Dómine Deus noster: ut, intercedénte beáta Bibiána Vírgine et Mártyre tua, in ejus semper participatióne vivámus. Per Dóminum.
Confessoris
Duplex majus
Introitus Ps. 118, 46-47
LOQUÉBAR de testimóniis tuis in conspéctu regum, et non confundébar: et meditábar in mandátis tuis, quae diléxi nimis. Ps. 116, 1-2 Laudáte Dóminum, omnes gentes, laudáte eum, omnes pópuli: quóniam confirmáta est super nos misericórdia ejus, et véritas Dómini manet in aetérnum. V/. Glória Patri.
Oratio
DEUS, qui Indiárum gentes beáti Francísci praedicatióne et miráculis Ecclésiae tuae aggregáre voluísti: concéde propítius ; ut, cujus gloriósa mérita venerámur, virtútum quoque imitémur exémpla. Per Dóminum.
Et fit Commemoratio Feriae.
Léctio Epístolae beáti Pauli Apóstoli ad Romános.
Rom. 10, 10-18
FRATRES: Corde enim créditur ad justítiam: ore autem conféssio fit ad salútem. Dicit enim Scriptúra: Omnis, qui credit in illum, non confundétur. Non enim est distínctio Judaéi et Graeci: nam idem Dóminus ómnium, dives in omnes, qui ínvocant illum. Omnis enim, quicúmque invocáverit nomen Dómini, salvus erit. Quómodo ergo invocábunt, in quem non credidérunt ? Aut quómodo credent ei, quem non audiérunt ? Quómodo autem áudient sine praedicánte ? Quómodo vero praedicábunt, nisi mittántur ? sicut scriptum est: Quam speciósi pedes evangelizántium pacem, evangelizántium bona ! Sed non omnes obédiunt Evangélio. Isaías enim dicit: Dómine, quis crédidit audítui nostro ? Ergo fides ex audítu, audítus autem per verbum Christi. Sed dico: Numquid non audiérunt ? Et quidem in omnem terram exívit sonus eórum, et in fines orbis terrae verba eórum.
Graduale Ps. 91, 13 et 14 Justus ut palma florébit: sicut cedrus Líbani multiplicábitur in domo Dómini. V/. Ibid., 3 Ad annuntiándum mane misericórdiam tuam, et veritátem tuam per noctem.
Allelúja, allelúja. V/. Jac. 1, 12 Beátus vir, qui suffert tentatiónem: quóniam cum probátus fúerit, accípiet corónam vitae. Allelúja.
+ Sequéntia sancti Evangélii secúndum Marcum.
Marc. 16, 15-18
IN illo témpore: Dixit Jesus discípulis suis: Eúntes in mundum univérsum, praedicáte Evangélium omni creatúrae. Qui credíderit, et baptizátus fúerit, salvus erit: qui vero non credíderit, condemnábitur. Signa autem eos, qui credíderint, haec sequéntur: In nómine meo daemónia ejícient: linguis loquéntur novis: serpéntes tollent: et si mortíferum quid bíberint, non eis nocébit: super aegros manus impónent, et bene habébunt.
Offertorium Ps. 88, 25 Véritas mea, et misericórdia mea cum ipso: et in nómine meo exaltábitur cornu ejus.
Secreta
PRAESTA nobis, quaésumus, omnípotens Deus: ut nostrae humilitátis oblátio, et pro tuórum tibi grata sit honóre Sanctórum, et nos córpore páriter et mente puríficet. Per Dóminum.
Et fit Commemoratio Feriae.
Communio Matth. 24, 46-47 Beátus servus, quem, cum vénerit dóminus, invénerit vigilántem: amen dico vobis, super ómnia bona sua constítuet eum.
Postcommunio
QUSUMUS, omnípotens Deus: ut, qui caeléstia aliménta percépimus, intercedénte beáto Francísco Confessóre tuo, per haec contra ómnia advérsa muniámur. Per Dóminum.
Et fit Commemoratio Feriae.
Episcopi, Confessoris et Ecclesiae Doctoris
Duplex
Introitus Eccli. 15, 5
IN médio Ecclésiae apéruit os ejus: et implévit eum Dóminus spíritu sapiéntiae, et intelléctus: stolam glóriae índuit eum. Ps. 91, 2 Bonum est confitéri Dómino: et psállere nómini tuo, Altíssime. V/. Glória Patri.
Oratio
DEUS, qui beátum Petrum Chrysólogum Doctórem egrégium, divínitus praemonstrátum, ad regéndam et instruéndam Ecclésiam tuam éligi voluísti: praesta, quaésumus ; ut, quem Doctórem vitae habúimus in terris, intercessórem habére mereámur in caelis. Per Dóminum.
Et fit Commemoratio Feriae.
Deinde Commemoratio S. Barbarae Virginis et Martyris.
Oratio
DEUS, qui inter cétera poténtiae tuae mirácula étiam in sexu frágili victóriam martýrii contulísti: concéde propítius ; ut, qui beátae Bárbarae Vírginis et Mártyris tuae natalítia cólimus, per ejus ad te exémpla gradiámur. Per Dóminum.
Léctio Epístolae beáti Pauli Apóstoli ad Timótheum.
2 Tim. 4, 1-8
CARÍSSIME: Testíficor coram Deo, et Jesu Christo, qui judicatúrus est vivos et mórtuos, per advéntum ipsíus, et regnum ejus: praédica verbum, insta opportúne, importúne: árgue, óbsecra, íncrepa in omni patiéntia, et doctrína. Erit enim tempus, cum sanam doctrínam non sustinébunt, sed ad sua desidéria coacervábunt sibi magístros, pruriéntes áuribus, et a veritáte quidem audítum avértent, ad fábulas autem converténtur. Tu vero vígila, in ómnibus labóra, opus fac Evangelístae, ministérium tuum imple. Sóbrius esto. Ego enim jam delíbor, et tempus resolutiónis meae instat. Bonum certámen certávi, cursum consummávi, fidem servávi. In réliquo repósita est mihi coróna justítiae, quam reddet mihi Dóminus in illa die, justus judex: non solum autem mihi, sed et iis, qui díligunt advéntum ejus.
Graduale Eccli. 44, 16 Ecce sacérdos magnus, qui in diébus suis plácuit Deo. V/. Ibid., 20 Non est invéntus símilis illi, qui conserváret legem Excélsi.
Allelúja, allelúja. V/. Ps. 109, 4 Tu es sacérdos in aetérnum, secúndum órdinem Melchísedech. Allelúja.
+ Sequéntia sancti Evangélii secúndum Matthaéum.
Matth. 5, 13-19
IN illo témpore: Dixit Jesus discípulis suis: Vos estis sal terrae. Quod si sal evanúerit, in quo saliétur ? Ad níhilum valet ultra, nisi ut mittátur foras, et conculcétur ab homínibus. Vos estis lux mundi. Non potest cívitas abscóndi supra montem pósita. Neque accéndunt lucérnam, et ponunt eam sub módio, sed super candelábrum, ut lúceat ómnibus qui in domo sunt. Sic lúceat lux vestra coram homínibus, ut vídeant ópera vestra bona, et gloríficent Patrem vestrum, qui in caelis est. Nolíte putáre, quóniam veni sólvere legem aut prophétas: non veni sólvere, sed adimplére. Amen quippe dico vobis, donec tránseat caelum et terra, jota unum, aut unus apex non praeteríbit a lege, donec ómnia fiant. Qui ergo sólverit unum de mandátis istis mínimis, et docúerit sic hómines, mínimus vocábitur in regno caelórum: qui autem fécerit, et docúerit, hic magnus vocábitur in regno caelórum.
Credo.
Offertorium Ps. 91, 13 Justus ut palma florébit: sicut cedrus, quae in Líbano est, multiplicábitur.
Secreta
SANCTI Petri Chrysólogi Pontíficis tui atque Doctóris nobis, Dómine, pia non desit orátio: quae et múnera nostra concíliet ; et tuam nobis indulgéntiam semper obtíneat. Per Dóminum.
Et fit Commemoratio Feriae.
Pro S. Barbara
Secreta
SÚSCIPE, Dómine, múnera, quae in beátae Bárbarae Vírginis et Mártyris tuae solemnitáte deférimus: cujus nos confídimus patrocínio liberári. Per Dóminum.
Communio Matth. 25, 20 et 21 Dómine, quinque talénta tradidísti mihi: ecce ália quinque superlucrátus sum. Euge, serve bone et fidélis, quia in pauca fuísti fidélis, supra multa te constítuam, intra in gáudium Dómini tui.
Postcommunio
UT nobis, Dómine, tua sacrifícia dent salútem: beátus Petrus Chrysólogus Póntifex tuus et Doctor egrégius, quaésumus, precátor accédat. Per Dóminum.
Et fit Commemoratio Feriae.
Pro S. Barbara
Postcommunio
AUXILIÉNTUR nobis, Dómine, sumpta mystéria: et, intercedénte beáta Bárbara Vírgine et Mártyre tua, sempitérna fáciant protectióne gaudére. Per Dóminum.
Missale Romanum 1957